"ᖁᕕᐊᓱᑦᑎᐊᖅᐳᖓ ᐊᕙᓗᔭᐅᓯᒪᔪᓐᓇᕋᒪ ᐃᓄᖕᓂᑦ ᖃᐅᔨᒪᓂᕐᒥᓂᒃ ᐊᒻᒪ ᐊᔪᙱᑕᒥᓂᒃ ᐅᕙᓐᓂᒃ ᑐᓂᓯᔪᒪᔪᓂᒃ ᐊᒻᒪ ᖃᐅᔨᒪᓂᕆᔭᖏᓐᓂᒃ ᑐᓂᓯᔪᓐᓇᑦᑎᐊᖅᑐᓂᒃ ᑕᐃᒪᓐᓇᑦᑕᐅᖅ ᐱᓕᕆᔪᓐᓇᕐᓂᐊᕋᒪ," ᐅᖃᓚᐅᖅᐳᖅ ᑯᐃᔅ ᕼᐋᒧᓪᑕᓐ. ᓅ-ᓵ-ᓄᓪᑦ ᐊᒻᒪ ᔅᑐᕉ ᐊᑖᑕᖓᑕ ᓴᓂᐊᓂ ᐊᒻᒪ ᐳᐊᑦ ᐋᓪᐳᓂᒥᐅᑕᐅᓪᓗᓂ. ᐊᓈᓇᖓᑕ ᓴᓂᐊᓂ, Sto:lo-ᖑᒋᕗᖅ. ᐱᓕᕆᔨᒻᒪᕆᐅᓂᕐᒥᒍᑦ, ᐱᐅᓴᐅᑎᓂᒃ ᑎᑎᖅᑐᒐᖅᑎᐅᓯᒪᓕᖅᑐᖅ ᐊᕐᕌᒍᓄᑦ ᐊᕐᕕᓂᓕᖕᓄᑦ. ᑖᔅᓱᒪ ᓯᓚᑖᒍᑦ, ᐊᒥᐊᕆᓲᖅ, ᑕᕐᕆᔭᐅᓯᐅᖅᐸᒃᖢᓂ, ᐊᔾᔨᓕᐅᕆᕙᒃᖢᓂ ᐊᒻᒪ ᑎᑎᕋᐅᓯᓕᐅᖅᐸᒃᑭᓪᓗᓂ. ᓇᖏᖅᖢᓂ ᐅᓂᒃᑳᖅᑐᐊᓕᐅᖃᑦᑕᖅᓯᒪᖕᒥᔪᖅ ᐊᒻᒪ ᐊᒥᐊᕆᕙᒃᖢᓂ ᐊᑭᓐᓇᕐᒥᐅᑕᓂᒃ. ᓯᕗᓂᐊᒍᑦ, ᐊᓕᒍᓕᐅᖅᑎᐅᓚᐅᖅᐳᖅ ᐊᕐᕌᒍᓂ ᖁᓕᓂ. ᑕᐃᒪᙵᓂ 15-ᓂᒃ ᐅᑭᐅᖃᓕᕋᒥ, ᓴᓇᙳᐊᖃᑦᑕᖅᓯᒪᕗᖅ ᒫᓐᓇᓗ 31-ᓂᒃ ᐅᑭᐅᖃᓕᖅᖢᓂ.

ᐱᓕᒻᒪᒃᓴᕐᓂᒃᑯᓪᓕ ᐃᖅᑲᓇᐃᔮᒥᓄᑦ, ᐃᓕᑦᑎᓚᐅᖅᐳᖅ ᐊᔪᕆᖅᓱᖅᑕᐅᓂᒃᑯᑦ. 2019−ᒥ, ᓇᖕᒥᓂᖅ ᐱᐅᓴᐅᑎᓂᒃ ᓴᓇᖃᑦᑕᓕᓚᐅᖅᐳᖅ, ᓇᖕᒥᓂᖅ ᓴᓇᕐᕈᑎᓕᐅᖅᐸᒃᖢᓂ. ᐱᒋᐊᓕᓵᖅᑎᓪᓗᒍ, ᓴᓇᓚᐅᖅᑕᖓ ᐱᑐᐃᓐᓇᐅᓚᐅᙱᓚᖅ. ᐊᒃᑲᖓᑕ ᐃᓚᖓᑦ, ᐅᐃᓕᐊᒻ ᐅᐊᐃᑦ, ᑦᓯᒻᓯᐊᓐ ᓄᕕᖅᓴᖅᑎ, ᐃᓕᓐᓂᐊᖁᔨᓚᐅᖅᐳᖅ ᓵᓐ ᐃᑕᓐᓵᒥᑦ, ᕼᐊᐃᑕ ᐊᒻᒪ ᒋᒃᓴᓐ ᐱᐅᓴᐅᑎᓂᒃ ᓴᓇᕙᒃᑐᖅ. ᐃᑕᓐᓵ ᐃᓕᓐᓂᐊᖅᑎᓚᐅᖅᓯᒪᔭᖓ ᐱᐅᓴᐅᑎᓕᐅᕐᓂᕐᒥᒃ, ᐊᐅᒃᑎᕆᓂᕐᒥᒃ ᓴᕕᕋᔭᖕᓂᒃ ᓴᕕᕋᔭᒃᓴᓕᐅᕐᓂᕐᒥᒃ, ᐅᔭᖅᑲᓂᒃ ᐋᖅᑭᒃᓱᐃᓂᕐᒥᒃ, ᓴᓇᙳᐊᕐᓂᕐᒥᒃ ᐊᒻᒪ ᑎᑎᕋᐅᔭᕐᓂᕐᒥᒃ. ᐃᓕᓴᐃᔨᒋᒃᑲᓐᓂᓚᐅᖅᑕᖓ ᒧᐊᒐᓐ ᐊᓲᕝ, ᑦᓯᒻᓯᐊᓐ ᐱᐅᓴᐅᑎᓂᒃ ᓴᓇᙳᐊᖅᑎ ᐃᑲᔪᓚᐅᖅᓯᒪᔭᖓ ᓴᓇᙳᐊᖅᑕᒥᓂᒃ ᐱᐅᓯᒋᐊᖅᑎᑦᑎᒃᑲᓐᓂᖅᖢᓂ. ᐅᓪᓗᒐᓴᖕᓂᒃ ᑎᑎᕋᐅᔭᖅᐸᓚᐅᖅᐳᖅ ᓴᓇᙳᐊᖅᐸᒃᖢᓂᒋᑦ.

ᓴᒃ ᕼᐄᑦ, ᒋᒃᔅᓴᓐ ᐱᐅᓴᐅᑎᓂᒃ ᓴᓇᐅᒐᓕᐅᖅᑎᐅᖃᑕᐅᖕᒥᔪᖅ, ᐃᓕᓐᓂᐊᖅᑎᓚᐅᖅᓯᒪᔭᖓ ᓴᓇᙳᐊᖅᑎᐅᓂᕐᒥᒃ. ᕆᑦᓱᑦ ᐋᑦᑭᓐᔅ, ᐊᒥᐊᕆᔨ, ᓴᓇᙳᐊᖅᑎ ᐊᒻᒪ ᐱᐅᓴᐅᑎᓕᐅᖅᑎ, ᐃᑲᔪᓚᐅᖅᐳᖅ ᕼᐋᒧᓪᑕᓐ ᓴᓇᓯᒪᔭᖏᓐᓂᒃ ᐆᒻᒪᕆᖕᓂᖅᓴᐅᑎᑦᑎᓪᓗᓂ ᐊᒻᒪ ᐆᒻᒪᕆᒃᓯᑎᑦᑎᒃᑲᓐᓂᖅᖢᓂ. ᔨᐅᕆ ᓰᓇ ᐃᓕᓐᓂᐊᖅᑎᖦᖢᓂᐅᒃ ᕿᑐᕐᙵᐅᑉ ᒥᒃᓵᓄᑦ ᐊᒻᒪ ᔮᔅ ᐅᐊᑦᔅ, ᕼᐋᒧᓪᑕᓐ ᐃᓪᓗᐊᕐᔪᖓ, ᐃᓕᓐᓂᐊᖅᑎᖦᖢᓂᐅᒃ ᓴᓇᙳᐊᕐᓂᕐᒥᒃ ᕿᑐᕐᙵᒃᓴᔭᐅᑉ ᑮᓇᑉᐸᖓᓂᒃ.

ᐊᑖᑕᖓ ᐱᐅᓴᐅᑎᓕᐅᖅᑎᐅᓪᓗᓂ ᑖᔅᓱᒥᖓ ᐃᖅᑲᓇᐃᔮᕆᔪᒪᔭᒥᓂᒃ ᐱᔪᒪᓕᓚᐅᖅᓯᒪᕗᖅ. "ᓴᙱᔪᒥᒃ ᐱᖃᓐᓇᕆᔭᖃᓗᐊᙱᓐᓇᒪ, ᐊᒻᒪ ᐃᓱᒪᔪᖓ ᐃᓚᖓ ᐅᕙᓐᓂᒃ ᖃᓂᒃᓴᕐᓂᖅᓴᐅᔪᒪᖅᑰᓚᐅᕋᒪ," ᐅᖃᖅᑐᖅ. ᑕᐃᒪᐃᓐᓂᖓᓄᓪᓗ ᑐᓐᓂᖅᑯᓯᐊᖅᑖᖅᑎᑦᑎᔪᒪᓚᐅᕆᕗᖅ ᓇᔭᒥᓄᑦ ᐊᓈᓇᒥᓄᓪᓗ. "ᐃᓕᓯᓲᖑᕗᒍᑦ ᓇᓗᓇᐃᒃᑯᑕᑦᑎᓐᓂᒃ, ᖃᑕᙳᑎᒌᑦ ᐅᓂᒃᑳᖏᓐᓂᒃ, ᐱᔪᓐᓇᐅᑎᑦᑎᓐᓂᒃ, ᑕᐃᔭᐅᔾᔪᓯᑦᑎᓐᓂᒃ, ᒪᓕᒐᑦᑎᓐᓂᒃ ᑎᑎᕋᖅᓯᒪᓪᓗᑎᒃ ᐱᐅᓴᐅᑎᑦᑎᓐᓄᑦ ᐊᒻᒪ ᐊᑐᖅᐸᒃᑕᑦᑎᓐᓄᑦ. ᐱᒻᒪᕆᐅᓇᓱᒋᓚᐅᖅᑕᕋ ᐊᓈᓇᒐ ᓇᔭᒐᓗ ᑐᓐᓂᖅᑯᑎᒋᔪᓐᓇᕋᒃᑭᑦ ᐱᐅᔫᑎᓂᒃ ᐊᒻᒪ ᕿᓚᒥᑯᓗᒃ ᐃᖅᑲᓇᐃᔮᖑᓕᓚᐅᖅᐳᖅ," ᐅᓂᒃᑳᓚᐅᖅᐳᖅ.

ᑐᓗᖅᑕᕈᑎᑕᖃᓕᕌᖓᑦ, ᐋᓐᓂᐊᕕᒡᔪᐊᕐᓇᖅᑕᖃᖅᑎᓪᓗᒍ, ᕼᐋᒧᓪᑕᓐ ᐊᒃᓱᕉᑎᖃᓚᐅᖅᐳᖅ ᐃᓄᑑᔭᕆᐊᖃᕐᓂᕐᒥᒃ ᐊᒻᒪ ᐃᒃᐱᒍᓱᒃᖢᓂ ᐃᓄᖕᓂ ᐃᑲᔪᕋᓱᒍᓐᓇᙱᖦᖢᓂ ᐅᕝᕙᓘᓐᓃᑦ ᐃᑲᔪᖅᑕᐅᔪᒪᔪᓐᓇᙱᖦᖢᓂ. ᐊᒃᓱᕉᑎᖃᓚᐅᖅᐳᖅ ᐃᓱᒪᒥᒍᑦ ᐊᔪᕈᑎᖃᖅᖢᓂ ᐃᒻᒥᓂᒡᓗ ᑲᒪᒋᔪᓐᓇᐃᓪᓕᓪᓗᓂ. ᐊᑯᓂᐊᓗᒃ ᓄᓇᒦᖃᑦᑕᓚᐅᖅᑐᖅ ᐊᒻᒪ ᐱᓕᕆᖅᑳᖅᐸᒃᖢᓂ, ᐊᒃᓱᕉᑎᖃᖅᖢᓂ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᐊᒻᒪ ᐱᔪᓐᓇᐅᑎᖏᓐᓂᒃ. ᐊᒃᓱᕈᑦᑎᐊᖅᖢᓂ ᐅᓇᑕᕋᓱᒃᐸᒃᖢᓂ ᐃᒻᒥᓂᒃ ᑲᒪᒋᑦᑎᐊᕋᓱᙱᖦᖢᓂ, ᓯᓂᒃᐸᒃᖢᓂ ᐃᔅᓯᕙᐅᑕᑯᑖᓂ ᓄᓇᓯᐅᑎᒥᓘᓐᓃᑦ, ᐅᕕᓂᖕᓂᐊᖅᐸᒃᖢᓂ ᐃᖃᐃᓕᓴᕐᕕᖕᓂ. ᐃᓄᐃᑦ ᐊᐱᕆᔭᐅᒐᒥᒃ ᖃᓄᐃᒻᒪᑦ ᐅᖃᓚᐅᕐᒪᖔᑦ, "ᑕᐃᒪᐃᑉᐸᒃᐳᖓ ᓲᖃᐃᒻᒪ ᓄᓇᕐᔪᐊᒦᓐᓂᕋ. ᑕᐃᒪᐃᑉᐸᒃᐳᖓ ᓲᖃᐃᒻᒪ ᐅᕙᓐᓂᒃ ᑐᙵᕕᖃᑦᑎᐊᖅᑎᑦᑎᓲᖑᖕᒪᑦ ᐱᔭᒃᓴᖃᖅᑎᖦᖢᒍᓗ ᑐᑭᖃᑦᑎᐊᖅᑎᑦᑎᓪᓗᓂᓗ. ᐃᖅᑲᓇᐃᔮᕆᒐᒃᑯ."

"ᐃᓚᒃᑲ ᐱᖃᓐᓇᕆᔭᖃᖅᐳᑦ ᑭᖑᕚᕇᓄᑦ ᐊᒻᒪ ᐊᔾᔨᒌᙱᑦᑐᓄᑦ ᐊᕕᒃᑐᖅᓯᒪᓂᐅᔪᓄᑦ, ᐊᒻᒪ ᐊᑐᓂ ᑖᒃᑯᐊ ᐃᓕᖅᑯᓯᕆᔭᐅᔪᑦ, ᐊᑐᓂ ᑖᒃᑯᐊ ᐱᖃᓐᓇᕇᒍᓰᑦ, ᐱᖃᓐᓇᕇᒍᓰᑦ, ᑕᒪᕐᒥᒃ ᑐᑭᖃᖅᑐᐃᓐᓇᐅᕗᑦ."

ᐊᒃᓱᕈᕐᓇᕐᓂᖅᐹᖑᑎᓪᓗᒍ ᐃᓅᓯᕐᒥᓂ, ᐃᓱᒪᒥᒍᑦ ᖃᓄᐃᖏᑦᑎᐊᕋᓱᒃᖢᓂ, ᕼᐋᒧᓪᑕᓐ ᐱᔪᓐᓇᕐᓂᓕᒫᒥᓂᒃ ᓂᕆᓇᓱᖃᑦᑕᓚᐅᖅᑐᖅ ᓴᓗᒪᑎᑦᑎᓇᓱᒃᖢᓂᓗ. ᐃᖅᑲᐅᒪᕗᖅ ᐅᖃᐅᔾᔭᐅᓚᐅᖅᓯᒪᓂᕐᒥᓂᒃ ᓱᕈᓯᐅᓪᓗᓂ "ᖃᓄᑐᐃᓐᓇᑦᑎᐊᖅ ᐊᒃᓱᕈᕐᓇᖅᓯᒐᓗᐊᖅᐸᑦ, ᖃᓄᖅ ᐃᓄᐃᑦ ᐃᓕᖕᓂᒃ ᐱᑦᑎᐊᖅᑕᐅᕙᖕᒪᖔᑕ. ᐃᖅᑲᐅᒪᒋᑦ ᑭᓇᐅᖕᒪᖔᖅᐱᑦ, ᓴᐱᓕᕈᓐᓇᙱᑦᑐᑎᑦ. ᖃᐅᔨᒪᒍᕕᑦ ᑭᓇᐅᖕᒪᖔᖅᐱᑦ, ᓱᖁᑕᐅᙱᑦᑐᖅ ᖃᓄᐃᓕᐅᖅᑐᖃᓕᕋᓗᐊᕐᒪᖔᑦ ᐊᕙᑎᖕᓂ, ᖃᓄᖅ ᐃᓄᐃᑦ ᐅᖃᕐᒪᖔᑕ, ᖃᓄᑐᐃᓐᓇᑦᑎᐊᖅ." ᑖᒃᑯᐊ ᐅᖃᐅᓯᑦᑎᐊᕙᐃᑦ ᑎᒍᐊᖅᑎᒥᙶᖅᑐᑦ ᐊᓈᓇᑦᑎᐊᒥᙶᖅᑐᑦ ᕕᐅᕋ ᓂᐅᒪᓐ ᐊᓘᑦ ᐸᐃᒥᐅᑕᖅ. ᐃᖕᒥᓂᒃ ᐃᙱᑲᑕᒃᖢᓂ ᐊᒻᒪ ᑐᓴᕐᓈᑲᑕᒃᖢᓂ ᐊᒻᒪ ᐹᓪᓚᒃᑐᓂᒃ YouTube-ᑯᑦ ᐃᒻᒥᓂᒃ ᒪᑭᑉᐹᓪᓕᕈᑎᒋᓚᐅᖅᐸᐅᒃ.

"ᐃᓕᓴᖅᓯᕗᖓ ᐃᓚᒋᔭᐅᓂᓐᓂ ᐊᖏᓂᖅᓴᒥ ᐃᓚᒌᖑᔪᓂ ᓴᖅᑭᑎᑦᑎᓂᐅᔪᒥ."

ᑲᔪᖏᖅᓴᐃᓂᕐᒧᑦ, ᕼᐋᒧᓪᑕᓐ ᐅᖃᖅᑐᖅ, "ᐱᐅᔪᒻᒪᕆᐅᓱᒋᕙᕋ ᑲᔪᖏᖅᓴᖅᑕᐅᓪᓗᓂ ᐊᑐᖅᓯᒪᔭᕐᓄᑦ, ᓲᕐᓗ ᐊᖏᕐᕋᕆᔭᕐᓂ ᓄᓇᓕᒋᔭᕐᓂ ᐅᕝᕙᓘᓐᓃᑦ ᐊᐅᓪᓚᖅᓯᒪᓗᓂ ᐅᕝᕙᓘᓐᓃᑦ ᐅᓂᒃᑳᖅᑐᐊᕐᓗᓂ ᓱᕈᓯᐅᓂᕐᓂᑦ, ᐅᕙᓐᓄᓪᓘᓐᓃᑦ, ᑕᒪᑐᒧᙵ ᐱᔾᔪᑎᖃᕐᔪᐊᖅᐳᖅ, ᐋᓐᓂᐊᕐᓂᒃᑯᑦ ᒪᒥᓴᖅᐸᓪᓕᐊᓂᕐᒧᑦ, ᕿᒃᓵᖕᓂᒃᑯᑦ ᒪᒥᓴᖅᐸᓪᓕᐊᓂᕐᒧᑦ." ᖃᐅᔨᕙᒃᐳᖅ ᓴᖅᑭᑎᑦᑎᕙᖕᓂᕐᒥᓂᒃ ᐊᒃᓱᕈᕐᓇᕐᔪᐊᖅᑐᒃᑯᑦ ᐃᒃᐱᒋᔭᖃᓕᕌᖓᒥ.

ᐅᖃᐅᔾᔨᒋᐊᕈᑎᒋᔭᖓ ᒪᒃᑯᒃᑐᓄᑦ ᓴᓇᙳᐊᕈᒪᔪᓄᑦ ᖃᐅᑕᒫᑦ ᐊᔪᕈᓐᓃᖅᓴᖃᑦᑕᕐᓗᑎᒃ. "ᑎᑎᕋᐅᔭᕐᓂᖅ ᐅᕝᕙᓘᓐᓃᑦ ᐊᒥᐊᕆᓂᖅ ᐅᕝᕙᓘᓐᓃᑦ ᓴᓇᙳᐊᕐᓂᖅ ᐅᕝᕙᓘᓐᓃᑦ ᐱᐅᓴᐅᑎᓂᒃ, ᐃᙱᕐᓂᖅ, ᒧᒥᕐᓂᖅ, ᖃᓄᐃᑦᑐᑐᐃᓐᓇᕐᒥᒃ ᓴᓇᙳᐊᕈᒪᔭᕐᓂᒃ, ᐱᒻᒪᕆᐅᑎᑦᑎᐊᕐᓗᒍ ᑲᒪᒋᑦᑎᐊᕐᓗᒍᓗ ᓲᕐᓗ ᐱᖃᓐᓇᕆᔭᐃᑦ ᖃᑕᙳᑎᓪᓘᓐᓃᑦ ᑲᒪᒋᑦᑎᐊᕐᓗᒍ, ᓇᒡᓕᒍᓱᖕᓂᖅ ᑲᒪᒋᑦᑎᐊᕐᓗᒍᓗ ᐃᓕᑦᑎᕙᓪᓕᐊᔭᕐᓂᒃ, ᐃᓕᖕᓂᒡᓗ ᐃᒃᐱᒋᑦᑎᐊᕐᓗᑎᑦ, " ᑎᓕᐅᕆᕗᖅ. ᑭᖑᒧᑦ ᑕᑯᓪᓗᒋᑦ ᓯᕗᓪᓕᖅᐹᑦ ᓴᓇᕙᒃᑕᖏᑦ, ᐱᐅᙱᓐᓂᖅᓴᐅᕗᑦ ᒫᓐᓇ ᓴᓇᕙᒃᑕᖏᓐᓂᒃ, ᑭᓯᐊᓂ ᑕᐃᔅᓱᒪᓂᐅᑎᓪᓗᒍ ᐱᐅᔪᒻᒪᕆᐅᓚᐅᖅᐳᑦ ᐊᒻᒪ ᐱᔪᓐᓇᕐᓂᓕᒫᒥᓂᒃ ᐱᓕᕆᑦᑎᐊᖏᓐᓇᖅᖢᓂ ᐱᐅᓯᕚᓪᓕᖅᐸᓪᓕᐊᓪᓗᓂᓗ.

"ᐱᒻᒪᕆᐅᓇᓱᒋᕙᕋ ᐃᓕᖕᓂᒃ ᐱᑦᑎᐊᖅᐸᒡᓗᑎᑦ ᐊᒻᒪ ᑐᙵᓇᖅᐸᒡᓗᑎᑦ ᖃᓄᑐᐃᓐᓇᖅ ᓴᓇᙳᐊᖃᑦᑕᓕᕈᕕᑦ, ᐊᒻᒪ ᐃᓄᖕᓄᑦ ᐅᖃᓪᓚᖃᑎᒋᕙᒡᓗᒋᑦ. ᐃᓚᖓᑦ ᐱᔾᔪᑎᒋᓗᐊᖅᑕᕋ ᑕᒪᒃᑯᓂᖓ ᑲᔪᖏᖅᓴᐃᔨᖃᕋᒪ ᐅᖃᖃᑎᖃᖃᑦᑕᓚᐅᕋᒪ ᐃᓄᖕᓂᑦ ᑕᒪᑐᒪ ᒥᒃᓵᓄᑦ.... ᐅᓄᕐᓂᖅᓴᓂᒃ ᐃᓄᖕᓂ ᑐᓴᖅᑎᑦᑎᒍᕕᑦ, ᐊᑲᐅᓂᖅᓴᐅᓇᔭᖅᐳᑎᑦ ᓯᕗᓂᒃᓴᑦᑎᓐᓂ. ᐅᖃᐅᓯᖃᖅᐸᒃᐳᑎᑦ ᐃᒃᐱᒋᔭᕐᓂᒃ ᐃᓅᓯᕐᓂ, ᑲᙳᓱᙱᓪᓗᑎᑦ...," ᑎᓕᐅᕆᕗᖅ.

"ᑭᓇᑐᐃᓐᓇᕐᒧᑦ ᑐᓂᓯᒍᕕᑦ ᐃᓂᒃᓴᒥᒃ ᐱᕕᒃᓴᒥᒡᓘᓐᓃᑦ ᐃᓅᓯᖓᓂ ᐃᓕᑦᑎᓂᐊᕐᓗᓂ, ᐱᒻᒪᕆᐅᑎᑉᐸᒡᓗᒍ ᓲᖃᐃᒻᒪ ᐊᖏᔪᒻᒪᕆᐊᓗᒃ ᑐᓐᓂᖅᑯᓯᐊᖅ. ᑕᒪᓐᓇ ᐃᒃᐱᒋᑦᑎᐊᕐᓗᒍ, ᐃᓕᖕᓂᒃ ᐱᑦᑎᐊᓕᕐᓗᑎᑦ, ᓲᖃᐃᒻᒪ ᑭᓱᓕᒫᓂᒃ ᑲᒪᓇᔾᔮᙱᓐᓇᕕᑦ ᐱᒋᐊᓕᓵᖅᑎᓪᓗᑎᑦ. ᐃᓚᖏᑦ ᐃᓄᐃᑦ ᑕᐃᒪᐃᓲᖑᕗᑦ, ᑭᓯᐊᓂ ᐅᓄᙱᑦᑐᑯᓗᐃᑦ ᐊᒻᒪ ᐅᖓᓯᒃᑐᐊᓘᓪᓗᑎᒃ ᐱᐅᓯᕚᓪᓕᓲᖑᖕᒪᑕ ᐱᒋᐊᓕᓵᖅᑎᓪᓗᑕ. ᐊᑯᓂᐅᔪᓐᓇᖅᐳᖅ," ᐅᖃᖅᑐᖅ, ᐃᓱᒪᓪᓗᓂ ᖃᐅᔨᒪᔭᐅᑦᑎᐊᖅᑐᖅ ᓴᓇᙳᐊᖅᑎ ᐱᐊᓪ ᑎᒃ ᐊᔪᕆᖅᓲᔾᔨᔪᒪᓚᐅᕐᓂᖓᓂᒃ ᐊᒻᒪ ᐱᒻᒪᕆᐅᑎᙱᖦᖢᓂᐅᒃ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᕼᐋᒧᓪᑕᓐ ᑭᖑᓪᓕᖅᐹᒥᒃ ᑐᓴᖅᑎᑦᑎᕗᖅ, "ᓴᓇᕙᓪᓕᐊᖏᓐᓇᕆᑦ ᐅᓂᒃᑳᖏᓐᓇᕐᓗᓯᓗ. ᑐᑭᓯᐅᒪᑦᑎᐊᕆᑦ ᑭᓇᐅᖕᒪᖔᖅᐱᑦ, ᓇᑭᙶᕐᒪᖔᖅᐱᑦ, ᐱᔪᓐᓇᕐᓂᓕᒫᕐᓂ." ᑐᑭᓯᐅᒪᓂᕆᔭᖓ ᑭᓇᐅᓂᕐᒥᓂᒃ ᐊᑖᑕᖓᑕ ᓴᓂᐊᓂ ᐊᑐᕐᓂᑯᒋᕙᐅᒃ. ᐊᑯᓂᐊᓗᒃ ᐅᖃᓕᒫᖅᐸᒃᐳᖅ ᖃᐅᔨᓇᓱᒃᐸᒃᖢᓂᓗ ᖃᓄᑐᐃᓐᓇᑦᑎᐊᖅ ᑐᑭᓯᓇᓱᒃᖢᓂ ᑭᓇᐅᓂᕐᒥᓂᒃ.

"ᐃᓕᑦᑎᕙᓪᓕᐊᖏᓐᓇᕆᑦ ᑭᓇᐅᖕᒪᖔᖅᐱᑦ... ᑭᓱᑐᐃᓐᓇᓂᒃ ᓴᖅᑭᑎᑦᑎᒑᖓᕕᑦ, ᑭᓇᐅᖕᒪᖔᖅᐱᑦ ᐋᖅᑭᒃᓱᐃᔪᓐᓇᖅᐳᑎᑦ. ᐅᓂᒃᑳᖅᑐᐊᕌᖓᕕᑦ, ᐱᕕᖃᖅᑎᑦᑎᓪᓚᕆᓲᖑᒐᕕᑦ ᐃᓄᖕᓄᑦ ᐃᓕᑦᑎᕚᓪᓕᕈᑎᒃᓴᓂᒃ ᐊᒻᒪ ᑐᑭᓯᖃᑦᑕᐅᑎᔪᓐᓇᕐᓂᕐᒥᒃ. ᐱᒻᒪᕆᐊᓘᖕᒪᑦ, ᑕᐃᒪᐃᖏᓐᓇᕆᑦ," ᐅᖃᕆᓪᓗᓂ.

ᐊᕙᓗᔭᐅᓯᒪᓪᓗᓂ ᐃᓄᖕᓂ ᐊᒥᖅᑳᖃᑎᖃᕈᒪᔪᓂᒃ ᖃᐅᔨᒪᓂᕆᔭᒥᓂᒃ ᐊᔪᙱᓐᓂᕐᒥᓂᒡᓗ ᑐᓂᓯᔪᒪᔪᓂᒡᓗ ᖃᐅᔨᒪᓂᕆᔭᒥᓂᒃ ᑕᐃᒪᐃᓕᐅᕈᓐᓇᕐᓂᐊᕋᒥ, ᑯᐃᔅ ᕼᐋᒧᓪᑕᓐ ᐃᓕᑦᑎᕙᓪᓕᐊᕗᖅ ᖃᓄᑐᐃᓐᓇᑦᑎᐊᖅ ᐊᔪᙱᓐᓂᕐᒥᓂᒃ. ᐱᔪᒃᓯᑎᑕᐅᓪᓗᓂ ᖃᑕᙳᑎᖏᓐᓄᑦ ᐊᒻᒪ ᐱᔾᔪᑎᖏᓐᓄᑦ ᑕᒪᐅᙵᖅᑎᑕᐅᓇᓱᒋᓪᓗᓂ, ᕼᐋᒧᓪᑕᓐ ᓴᖅᑭᑎᑦᑎᕗᖅ, ᐊᒃᓱᕈᕈᑎᖃᖅᐳᖅ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᐊᒻᒪ ᒪᑭᑕᑦᑎᐊᖅᖢᓂ ᑭᓇᐅᓂᕐᒥᓂᒃ. ᐱᕚᓪᓕᖅᑎᑕᐅᓪᓗᓂ ᑲᔪᖏᖅᓴᐃᓂᒃᑯᑦ, ᐊᔪᙱᑕᖏᑦ ᐱᐅᓯᕚᓪᓕᖅᑎᑕᐅᕙᒃᐳᑦ ᐊᓯᒥᓄᑦ ᑐᓐᓂᖅᑯᑎᒋᕙᒃᖢᓂᒋᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.