"ᖃᐅᑕᒫᑦ ᐅᓇᑕᖃᑦᑕᖅᑰᔨᖃᑦᑕᖅᑐᖓ ᑕᐃᒪᐃᓕᐅᕆᐊᖃᙱᖦᖢᖓᓗ. ᑭᓯᐊᓂ ᐅᓇᒻᒥᐊᕆᖏᓐᓇᕐᓂᐊᖅᑰᔨᒐᒃᑯ ᑭᓯᐊᓂ ᐃᓅᔪᓐᓃᕈᒪ," ᐅᖃᖅᐳᖅ ᑭᒡᒐᖅᑐᐃᔨ ᓗᕇᓕ ᐅᐃᓕᐊᒻᔅ. ᓯᑲᑎᓐᒥᐅᑕᖅ ᐊᒻᒪᓗ ᔅᑏᔅ ᐃᖅᑭᓖᑦ ᐊᒻᒪᓗ ᓄᓇᖃᑦᑐᓂ ᕚᓐᑰᕙᒥ. ᐱᓕᕆᐊᖏᑦ ᑐᕌᒐᖃᖅᑐᑦ ᐊᓯᐅᓯᒪᔪᓂᑦ ᐃᓄᐊᖅᑕᐅᓯᒪᔪᓂᓪᓗ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ, ᓂᕕᐊᖅᓯᐊᓂᑦ ᒪᕐᕉᓐᓂᓪᓗ-ᑕᕐᕆᔭᕐᓂᑦ ᐃᓄᓐᓂᑦ, ᐃᓚᒋᔭᐅᑦᓱᓂ ᒧᒥᖅᑎᖏᑦ ᑕᐃᔭᐅᔪᑦ ᑕᕐᕋᓕᑭᑖᖅᑐᑦ Spirit-ᒥᑦ. ᐱᒋᐊᓚᐅᖅᓯᒪᔪᖅ ᐅᔾᔨᕈᓱᓕᖅᑎᑦᓯᓂᕐᒥᑦ ᐊᓇᑦ ᐱᓕᓐᑕ ᐅᐃᓕᐊᒻᔅᒥᑦ, 1978-ᒥᓂᑦ ᐊᒻᒪᓗ ᐃᓪᓗᐊᕐᔪᖓ ᑖᓐᔭ ᕼᐆᓕᒃ, ᐃᓄᐊᖅᑕᐅᓯᒪᔪᖅ ᕌᐳᑦ ᐱᒃᑕᓐᒧᑦ. ᐃᓚᖓᑦ ᐊᑦᑕᖓᑕ ᐊᔭᐅᖅᑕᐅᓪᓗᓂ ᐃᒐᓛᒥ ᑕᐅᕙᓂ ᑲᓇᓐᓇᖅᐸᓯᒻᒥ ᐊᒻᒪᓗ ᐃᓪᓗᖓ ᑐᖁᑕᐅᓪᓗᓂ ᖃᖓᑕᓲᒃᑯᑦ ᑐᖁᑦᑎᔨᒧᑦ, ᑕᒪᒃᑮᒃ ᐃᓅᓚᐅᖅᑑᒃ ᖁᔭᓐᓇᒦᖅᑐᑎᒃ.

ᐅᐃᓕᐊᒻᔅ ᐃᖅᑲᓇᐃᔭᖃᑦᑕᖅᑐᖅ ᓄᓇᓖᑦ ᑲᓇᓐᓇᖓᓂᑦ ᐊᕐᓇᐃᑦ, ᓂᕕᐊᖅᓯᐊᑦ ᐊᒻᒪ ᒪᕐᕉᒃ−ᑕᕐᕆᔭᐅᑏᒃ, ᐃᖅᑲᓇᐃᔭᖅᓯᒪᔪᑦ ᒪᒃᓯᑯᒥᑦ ᕿᓂᖅᑐᑎᑦ ᐃᓄᓐᓂᑦ ᐊᓯᐅᓯᒪᔪᓂᑦ, ᐃᑲᔪᖅᑐᐃᓪᓗᑎᑦ ᓄᓇᓕᓐᓂᑦ ᐃᓚᒌᓂᑦ ᐊᒻᒪ ᕿᓂᖅᑐᑎᑦ ᐃᓄᐊᖅᑕᐅᓯᒪᔪᓂᑦ ᐊᒻᒪ ᐊᓯᐅᓯᒪᔪᓂᑦ ᑲᓇᑕᒥ ᐊᒻᒪ ᐅᖃᓕᒪᔪᓂᑦ ᑲᑎᒪᓂᐅᔪᓂᑦ, ᖃᓄᐃᕿᔅᓯᒪᔪᓂᑦ, ᐊᒻᒪ ᐱᕙᓪᓕᐊᔪᓕᕆᔨᓄᑦ ᑐᓴᖅᑎᑦᑎᓪᓗᑎ ᐃᓄᓐᓂᑦ. ᐃᓚᒥᓄᑦ, ᐅᐃᓕᐊᒻᔅ ᐃᖅᑲᓇᐃᔭᖅᓯᒪᔪᖅ ᐱᔨᑦᑎᕋᖅᑐᓄᑦ ᑲᑐᔾᔨᖃᑎᒌᓄᑦ ᐸᓖᓯᒃᑯᓐᓄᓪᓗ ᑕᐅᕙᓂ ᑲᓇᖕᓇᖅᐸᓯᐊᓂ. ᐃᓕᓐᓂᐊᕐᕕᖕᒧᑦ ᐅᑎᓚᐅᖅᑐᖅ ᐱᔭᕇᕋᓱᒃᖢᓂᐅᒃ ᐱᔭᕇᕈᓯᐊᖓ ᑭᓯᐊᓂ ᑲᔪᓯᓪᓗᓂ ᑭᒡᒐᖅᑐᐃᓂᕐᒧᑦ ᐃᖅᑲᓇᐃᔮᖓ ᐊᑭᓕᖅᑕᐅᓯᒪᖖᒋᖦᖢᓂ ᑭᓯᐊᓂ ᐱᔪᓐᓇᖅᓯᓪᓗᓂ ᐊᐃᑦᑑᑎᓂᒃ ᑮᓇᐅᔭᖃᖅᑎᑕᐅᔾᔪᑎᓂᒃ. 

ᒧᒥᖅᑏᑦ ᑲᑎᓚᐅᖅᐳᑦ ᐅᐃᓕᐊᒻᔅ ᐃᓱᒪᑖᖅᑎᓪᓗᒋᑦ Facebook-ᑯᑦ, ᒧᒥᖅᑎᓂᑦ ᐃᑲᔪᕈᓐᓇᖁᓪᓗᓂᒋᑦ ᐊᑦᑕᖓᑕ ᐊᔾᔨᓕᐅᖅᑕᐅᓂᖓ ᑕᖅᑳᓂ. ᑕᐃᒪᓕ ᐃᓄᐃᑦ ᐃᑲᔪᖃᑕᐅᓕᓚᐅᖅᑐᑦ ᐊᒻᒪᓗ ᐃᓚᒥᓂᒃ ᐃᓚᒃᓴᒥᓂᒃ ᐃᓚᐃᖅᑐᑎᒃ. ᑲᑎᕐᒪᓪᓗᑎᒃ, ᐃᓚᒥᓂᒃ ᑭᒡᒐᖅᑐᐃᖃᑦᑕᖅᐳᑦ ᐊᒻᒪ ᓇᒡᓕᒋᔭᒥᓂᒃ ᐊᓯᐅᔨᓪᓗᑎᒃ, ᐅᔾᔨᕈᓱᓕᒃᑲᓐᓂᖅᑎᑦᑎᓪᓗᑎᒃ ᑕᒪᑐᒥᖓ ᐱᒻᒪᕆᐅᔪᒥᒃ ᐃᓅᓯᓕᕆᔾᔪᑕᐅᖏᓐᓇᖅᑐᒥᒃ. 

"ᐱᒋᐊᖅᑎᓪᓗᖓ ᒧᒥᖅᑎᖁᑎᒃᑲ ᖃᐅᔨᓚᐅᖅᓯᒪᙱᑦᑐᖓ ᖃᓄᖅ ᒪᒥᓴᕐᓂᖅ ᓴᙱᑎᒋᖕᒪᖔᓪᓗ," ᐅᐃᓕᐊᒻᔅ ᐃᖅᑲᐅᒪᔪᖅ. ᒧᒥᖅᑎᐅᓚᐅᖅᓯᒪᙱᒻᒪᑦ ᑕᐃᔅᓱᒪᓂ, ᑐᓴᕈᒪᑐᐃᓐᓇᓚᐅᖅᑐᖅ ᐊᑦᑕᖓᑕ ᒥᒃᓵᓄᑦ. ᐃᓄᑑᓚᐅᙱᑦᑐᖅ, ᐊᒥᓱᑦ ᒧᒥᖅᑎᖏᑦ ᖃᐅᔨᒪᓚᐅᙱᒻᒪᑕ ᒧᒥᕐᓂᕆᕙᑦᑕᖏᓐᓂᒃ ᐃᓄᖁᑎᖏᑕ. ᑲᑎᙵᔪᑦ ᐅᑎᕐᖢᑎᒃ ᓇᖕᒥᓂᖅ ᐃᓄᖏᓐᓄᑦ ᐃᓕᑦᑎᓗᑎᒃ, ᐊᑐᕋᓱᖕᓂᖅ ᒪᒥᓴᕐᓂᕐᒧᑦ ᐊᒃᑑᑎᓯᒪᔪᖅ. ᐅᐸᓗᖓᐃᔭᖅᑎᓪᓗᒋᑦ ᓯᕗᓪᓕᖅᐹᒥᒃ ᐱᙳᐊᖅᑎᓪᓗᒋᑦ, ᐅᐃᓕᐊᒻᔅ ᐊᓈᓇᖓ ᐃᓅᔪᓐᓃᓚᐅᕐᒪᑦ. 

ᑲᔪᓯᔪᒪᓕᓚᐅᖅᑐᑦ, ᓯᕘᕋᓂᖅ ᐅᐃᓕᐊᒻᔅ ᐊᒃᓱᕈᕋᓗᐊᖅᖢᓂ. ᐃᙱᖅᖢᓂ ᐊᕐᓇᐃᑦ ᐅᓇᑕᖅᑎᖏᑦ ᐃᙱᐅᓯᖏᓐᓂᒃ, ᓅᑕᐅᕐᔪᐊᓚᐅᖅᑐᖅ ᓲᖃᐃᒻᒪ ᑕᐃᒪᓐᓇ ᐃᙱᓚᐅᕐᒪᑕ ᐊᓈᓇᒥᓄᑦ ᐃᓅᔪᓐᓃᖅᑎᓪᓗᒍ. ᓴᙱᓂᖃᕈᓐᓇᓚᐅᖅᑐᖅ ᐊᒻᒪ ᓯᕘᕋᓂᖓ ᓱᓕ ᐱᓕᕆᑎᓪᓗᒍ. 

ᐃᓕᓐᓂᐊᕐᓂᖓᒍᑦ ᐃᖅᑲᓇᐃᔭᓚᐅᕋᓂ ᑕᒫᓂ, ᐅᐃᓕᐊᒻᔅ ᓅᓚᐅᖅᑐᖅ ᕚᓐᑰᕗᒥᑦ ᓯᓕᕚᒃᒧᑦ ᐃᓪᓗᖓ ᐊᓯᐅᓚᐅᖅᑎᓪᓗᒍ ᐊᒻᒪ ᖃᐅᔨᔭᐅᓚᐅᖅᑐᖅ ᑲᑕᑦᑐᒥᓂᐅᒋᐊᖓᓂᑦ ᐱᓂᕐᓗᓐᓂᐅᔪᒥᑦ. ᕚᓐᑰᕗᒧᑦ ᐅᑎᓕᓚᐅᖅᑐᖅ ᐃᓕᓐᓂᐊᖅᑕᒥᓂᒃ ᐊᓂᒍᐃᔭᖅᑐᖅᖢᓂ ᐊᒻᒪ ᔮᐹᓐᒧᑦ ᑕᖅᑭᓄᑦ 6-ᓄᑦ ᐃᖅᑲᓇᐃᔭᕆᐊᖅᑐᖅᖢᓂ ᑐᔪᕐᒥᕕᐊᓗᖕᒥ ᒪᒃᑯᒃᑐᓄᑦ ᐃᓚᒋᔭᐅᓪᓗᓂ. ᐃᓕᓐᓂᐊᓕᓚᐅᖅᑐᖅ ᐅᖃᐅᓯᕐᒥᒃ ᑭᒃᑯᓕᒫᑦ ᐃᓱᒪᓚᐅᕐᒪᑕ ᔮᐸᓃᓯᑎᑐᑦ ᐊᒻᒪᓗ ᐃᑲᔪᕈᓐᓇᕈᒪᓪᓗᓂ ᖃᐃᖁᔭᐅᓯᒪᔪᓂᒃ. 

ᐅᑎᕋᒥ ᔭᐹᓐᒥᑦ, ᐳᓚᕋᖅᑐᓕᕆᓂᖕᒧᑦ ᐊᐅᓚᑦᑎᔨᐅᓂᕐᒧᑦ ᐱᔭᕇᕈᓯᐊᓚᐅᖅᑐᖅ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᕕᐊᓂᑦ ᑲᔪᓯᓪᓗᓂᓗ ᓯᓚᑦᑐᖅᓴᕐᕕᒡᔪᐊᒥᑦ ᐱᔭᕇᕈᓯᐊᒥᑦ ᐳᓚᕋᖅᑐᓕᕆᓂᖕᒧᑦ ᓇᖕᒥᓂᖃᖕᓂᖕᒧᓪᓗ ᐊᐅᓚᑦᑎᓂᖕᒥᑦ. ᐃᓕᓐᓂᐊᕐᓂᖓ ᐅᓚᕕᓴᖅᑕᐅᓚᐅᖅᑐᖅ ᐃᓅᔪᓐᓃᕐᓂᖓᓄᑦ ᐊᓂᖓ ᕿᑐᕐᖓᒃᓴᖃᓕᕐᖢᓂᓗ ᑭᓯᐊᓂ ᓄᑕᕋᓛᖓ ᐃᓕᓐᓂᐊᕌᓂᒍᓯᐊᕐᒧᐊᕈᑎᓪᓗᓂᐅᒃ ᐱᑎᓪᓗᒍ ᐃᓕᓐᓂᐊᕌᓂᒍᓯᐊᖓ.  ᐱᔭᕇᓕᒑᑦᑎᐊᓕᖅᑐᖅ ᐃᓕᓐᓂᐊᖅᑕᒥᓂᒃ ᖃᔅᓰᓐᓇᑯᓗᖕᓂᑦ ᐃᓕᓐᓂᐊᕆᐊᑲᑕᒃᖢᓂ. 

ᐃᓱᒪᒋᓪᓗᒍ ᓂᕆᐅᒋᔭᖏᑦ ᓯᕗᓂᒃᓴᒧᑦ, ᐅᐃᓕᐊᒻᔅ ᐅᖃᖅᑐᖅ, ᐃᓱᒪᒋᔭᖃᖅᖢᓂ ᐱᓪᓚᕆᒃᑐᒥᑦ ᐱᓕᕆᐊᖃᕐᓂᕐᒥᑦ ᐋᓐᓂᖅᑎᕆᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ ᓂᕕᐊᖅᓯᐊᓂᓪᓗ, ᖃᐅᔨᒪᔪᖅ ᐊᖏᔪᒥᑦ ᐊᑐᐊᒐᕐᒥᑦ ᐊᓯᔾᔩᓂᖃᙱᓪᓗᓂ, ᐱᓕᕆᐊᖓ ᐊᑯᓂᐅᓂᐊᖅᑐᖅ.  "ᐊᓯᐅᖁᔪᓐᓃᖅᑕᒃᑲ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ ᐊᒻᒪ ᒪᕐᕉᒃ−ᑕᕐᕇᒃ ᐃᓅᓇᓱᓕᖅᑐᖓ. ᐊᓐᓇᐅᒪᓇᓱᐃᓐᓇᖅᑰᔨᔪᖓ," ᓂᑲᒍᓱᒃᑐᖅ. ᐊᐃᑉᐸᖃᙱᖦᖢᓂ ᐊᓈᓇᐅᓪᓗᓂ ᓂᕆᑎᑦᑎᓇᓱᒃᐸᒃᖢᓂ ᕿᑐᕐᖓᒥᓂᒃ, ᐃᖅᑲᓇᐃᔮᖃᒃᑲᓐᓂᖅᖢᓂ, ᐅᐃᓕᐊᒻᔅ ᑕᖃᖓᖕᒪᑦ ᐊᒻᒪ ᐊᑲᐅᒃᓴᙱᖦᖢᓂ. 

"ᑭᙴᒪᒋᔭᐅᒃᑲᓐᓂᖁᔪᓐᓃᖅᑕᒃᑲ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ ᐊᒻᒪ ᒪᕐᕉᒃ−ᑕᕐᕇᒃ ᐃᓅᓇᓱᓕᖅᑐᖓ."

ᐱᓕᕆᖃᑎᖃᖅᖢᓂ ᓴᓂᐊᓂ ᐅᐃᓕᐊᒻᔅ ᐱᖃᓐᓈᕆᓪᓗᓂᐅᒃ ᐃᓚᒋᔭᐅᓪᓗᓂ Crazy Indian Brotherhood,-ᑯᓐᓄᑦ, ᑲᑐᔾᔨᖃᑎᒌᖑᔪᖅ ᐅᑎᖅᑎᑦᑎᓲᖅ ᓄᓇᓕᖕᓄᑦ ᐊᒻᒪᓗ ᓴᐳᔾᔨᓪᓗᓂ ᑕᐃᒃᑯᓄᖓ ᕿᓂᖅᑐᓄᑦ ᐊᓯᐅᓯᒪᔪᓄᑦ ᐃᓄᐊᖅᑕᐅᓯᒪᔪᓄᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ. ᐅᓗᕆᐊᓇᖅᑐᓂ ᖃᓄᐃᓐᓂᐅᔪᓂ ᐅᐃᓕᐊᒻᔅ ᖃᐅᔨᓯᒪᔭᖓᓂ, ᓄᑲᕇᒃ ᓄᖅᑲᖅᓯᒪᓕᖅᑐᑦ ᐊᒻᒪ ᐃᖅᓯᓇᖅᑐᑦ ᐊᖑᑏᑦ ᐅᑎᖅᓯᒪᔪᑦ. ᐃᑲᔪᖅᓯᒪᔪᑦ ᕿᓂᖅᑎᓪᓗᒋᑦ ᐊᒻᒪᓗ ᐃᑲᔪᖅᑐᐃᓪᓗᑎᒃ, ᑐᒃᑲᕆᐊᖅᓯᒪᓂᖅᓴᐅᓪᓗᑎᒃ ᐊᒻᒪᓗ ᓄᓇᓯᐅᑎᒥᓂᒃ ᕕᓕᐊᒻᔅ ᐊᒻᒪᓗ ᐊᓯᖏᑦ ᕿᓂᖅᑎᓪᓗᒋᑦ ᐱᓱᑦᑐᑎᒃ. 

ᑕᐃᒫᖅᐸᓪᓕᐊᓕᖅᑭᑦ, ᐅᐃᓕᐊᒻᔅ ᐅᖃᐅᓯᖃᖅᑐᖅ ᑲᔪᖏᖅᓴᐃᓂᕐᒥᑦ, ᐅᖃᖅᑐᓂ, "ᓴᖅᑭᖃᑦᑕᖅᑐᑦ ᐊᒻᒪ ᐃᑲᔪᖅᑐᐃᓪᓗᑎᑦ ᖃᓄᑐᐃᓐᓇᖅ ᐅᑦᔨᕈᓱᓐᓂᐅᔪᓂᑦ ᐅᕝᕙᓘᓐᓃᑦ ᐃᓄᐊᖅᑕᐅᓯᒪᔪᓂᑦ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ ᓂᕕᐊᖅᓯᐊᓂᓪᓗ. ᑭᒃᑯᓕᒫᑦ ᐊᔾᔨᐅᖏᑦᑐᓂᒃ ᑐᓂᕐᕈᑎᖃᕐᒪᑕ ᐊᒻᒪᓗ ᑐᓂᓯᒍᓐᓇᖅᐸᑕ, ᑕᒪᓐᓇ ᐱᐅᒻᒪᕆᒃᑲᔭᖅᑐᖅ. ᑎᑎᖅᑐᒐᕈᓐᓇᑎᐊᕋᓗᐊᕈᕕᑦ ᐊᒻᒪᓗ ᖃᕋᓴᐅᔭᒃᑯᑦ ᑎᑎᖅᑐᒐᖅᑎᐅᒐᓗᐊᕈᕕᑦ, ᐅᕝᕙᓘᓐᓃᑦ ᐃᓄᐃᑦ ᐅᕙᓐᓄᑦ ᑐᓂᓯᕙᓚᐅᖅᑐᑦ ᑲᒪᓇᒻᒪᕆᑦᑐᓂᒃ ᐅᐱᓐᓇᕋᓂ ᓇᒻᒥᓂᖅ ᑲᒪᒋᑦᑎᐊᕆᐊᖃᕋᒪ. ᖁᔭᓕᔪᒻᒪᕆᐅᕗᖓ ᖁᐊᖅᓵᖅᓯᒪᔪᓄᑦ ᐃᓕᓐᓂᐊᖅᑕᓐᓄᑦ, ᐃᑲᔪᖅᓯᒪᔪᖅ ᐅᕙᓐᓂᒃ ᑭᓯᐊᓂ ᐃᑲᔪᕈᓐᓇᕈᕕᑦ ᐊᒻᒪ ᖃᓄᑐᐃᓐᓇᖅ ᐃᑲᔪᕈᓐᓇᕈᕕᑦ, ᐊᒻᒪ ᓲᖃᐃᒻᒪ ᑮᓇᐅᔭᑎᒍᑦ ᐃᑲᔫᑎᐅᔪᑦ ᐃᑲᔪᐃᓐᓇᐅᔭᕐᒪᑕ ᐅᕙᑦᑎᓐᓂᑦ, ᐊᒻᒪ − butterfliesinspirit@gmail.com ᖃᕋᓴᐅᔭᒃᑯᑦ ᐅᕝᕙᓘᓐᓃᑦ PayPal."

ᐅᕕᓂᖃᑎᒋᙱᑕᒥᒃ ᐊᑭᕋᖅᑐᕐᓂᖅ, ᒧᒥᕐᓂᖅ ᐊᒻᒪ ᐅᔾᔨᕈᓱᒃᑎᑦᑎᓂᖅ ᖃᐅᑕᒫᑦ, ᓗᕇᓕ ᐅᐃᓕᐊᒻᔅ ᐊᓯᔾᔩᕗᖅ ᐃᓚᒌᓄᑦ ᐃᓄᐊᖅᑕᐅᓯᒪᔪᓄᑦ ᐊᓯᐅᓯᒪᔪᓄᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ, ᓂᕕᐊᖅᓵᑦ ᐊᒻᒪ ᒪᕐᕉᒃ−ᑕᕐᕇᒃ ᐃᓅᒃ. ᐅᓇᑕᐃᓐᓇᖁᔨᙱᖦᖢᓂ, ᐱᔪᒪᓂᖃᖅᑐᖅ ᐃᓄᐃᑦ ᐊᑦᑕᕐᓇᖅᑐᒦᑎᑦᑕᐃᓕᓗᒋᑦ ᐃᑲᔪᕐᓗᒋᓪᓗ ᖃᑕᙳᑎᒌᑦ ᓇᓂᓯᓗᑎᒃ ᑭᒡᒍᑎᓂᒃ. ᑲᑎᖃᑎᒋᓂᖅ ᐃᓕᖅᑯᓯᒃᑯᑦ, ᕿᓂᕐᓂᖅ ᐊᓯᐅᓯᒪᔪᓂᒃ ᓇᓂᓯᓗᓂᓗ ᑮᓇᐅᔭᖃᖅᑎᑕᐅᔾᔪᑎᓂᒃ ᐱᓕᕆᐊᕆᓂᐊᕐᓗᒍ, ᐱᓕᕆᔪᖅ ᐱᔪᓐᓇᖅᑕᖏᓐᓂ ᐱᓕᕆᖃᑎᖏᓐᓄᑦ ᓄᓇᓕᖕᒥᐅᓄᓪᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.