ᐅᓂᒃᑳᖅᑐᐊᓂᒃ ᐅᖃᐅᓯᖃᕐᓂᖅ ᐅᑭᐅᖅᑕᖅᑐᒥ: ᓗᐊᕋᓐᔅ ᓇᐃᓕ ᑲᑎᙵᖃᑎᖃᖅᐳᖅ ᓈᓚᐅᑎᒃᑯᑦ ᐆᒻᒪᑎᒃᑯᓪᓗ
"ᐱᓇᔪᒋᐊᖃᑐᐃᓐᓇᖅᐳᑎᑦ ᐊᒻᒪ ᐅᒃᐱᕆᓗᒋᑦ ᐊᓯᑎᑦ ᐊᒻᒪ ᐃᓕᖕᓂᒃ ᓴᙱᔫᓗᑕᓗ," ᐅᖃᓚᐅᖅᐳᖅ ᓗᐊᕋᓐᔅ ᓇᐃᓕ. ᔭᓗᓇᐃᕝᒥᐅᑕᐅᓕᖅᑐᖅ ᐊᕐᕌᒍᓄᑦ 14-ᓄᑦ ᐃᖅᑲᓇᐃᔭᖅᖢᓂᓗ ᓰᐲᓰᒃᑯᓐᓄᑦ ᐅᓐᓄᒃᓴᒃᑯᑦ ᓈᓚᐅᑎᒃᑯᑦ ᐅᖃᓪᓚᒃᑎᐅᓪᓗᓂ ᐅᓂᒃᑳᖅᑐᐊᓂᒃ ᐅᑭᐅᖅᑕᖅᑐᒥᐅᓂᒃ. ᐱᕈᖅᓴᔭᐅᓪᓗᓂ ᐃᑦᑐᒃᑯᒥᓄᑦ ᐊᐅᓪᓚᕋᔪᒃᐸᒃᑐᓄᑦ, ᐅᒥᐊᒃᑯᑦ, ᖃᖓᑕᓲᒃᑯᑦ ᐅᕝᕙᓘᓐᓃᑦ ᐅᑭᐅᒃᑯᑦ ᐊᖅᑯᑎᒃᑯᑦ ᐊᖏᕐᕋᕆᔭᒥᓂ ᕗᕆᒃᓕᒥᑦ. ᐅᖃᐅᓯᕐᒥᓂᒃ, ᐃᓕᖅᑯᓯᕐᒥᒃ ᐊᒻᒪ ᐅᓂᒃᑳᖅᑐᐊᓂᒃ ᐃᓚᐅᓂᖃᑦᑎᐊᖅᖢᓂ, ᓄᑕᕋᑐᐊᖑᓚᐅᖅᐳᖅ ᐃᒡᓗᒥᐅᖃᑎᖏᓐᓂ. ᐱᕈᖅᓴᑲᐅᖅᑐᓚᐅᖅᐳᖅ ᐊᒻᒪ ᓴᓇᕈᓘᔭᕈᓐᓇᓕᓵᖅᖢᓂ.
ᓄᓇᓕᖕᓂ ᐊᒃᓱᕉᑎᖃᖅᑎᓪᓗᒋᑦ ᑭᖑᕚᕇᓄᑦ ᐊᒃᑐᐃᔾᔪᑕᐅᓲᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᐃᓕᓐᓂᐊᕈᑎᒃᓴᓂᒃ ᐊᑐᐃᓐᓇᖃᓚᐅᖅᐳᖅ ᑐᕌᖓᔪᓂᒃ ᒪᒃᑯᒃᑐᓂᒃ ᐃᑲᔫᑎᒃᓴᓂᒃ ᓄᖅᑲᖅᑎᑦᑎᓇᓱᒃᖢᑎᒃ ᐃᓕᖅᑯᓯᕆᔭᐅᕙᒃᑐᓂᒃ ᐊᒻᒪᓗ ᐃᖅᑭᓖᑦ ᐅᒃᐱᕐᓂᓕᕆᔾᔪᓯᖏᓐᓂᒃ ᑲᑎᙵᑎᑦᑎᕙᒃᖢᑎᒃ.
ᑕᐃᑲᓂᑦᑕᐃᓐᓇᖅ, ᓇᐃᓕ ᓵᑦᑎᐊᕐᒥᐅᑕᖃᓚᐅᖅᐳᖅ ᒫᓐᓇᓕᓴᕐᓄᑦ, ᐱᐅᙱᑦᑐᓄᑦ ᐊᑐᖅᑕᐅᓕᖅᐸᒃᑐᓄᑦ ᑎᒍᐊᙳᐊᕆᔭᐅᓕᖅᖢᓂᓗ ᒪᒃᑯᒃᑐᓄᓪᓗ ᒪᓕᒐᓕᕆᔾᔪᑕᐅᕙᒃᑐᓄᑦ. ᖃᑕᙳᑎᖏᑦ ᐃᑲᔪᖅᑕᐅᑎᓪᓗᒋᑦ, ᐃᓅᓯᕐᒥᓂᒃ ᓴᖑᑎᑦᑎᓚᐅᖅᐳᖅ ᐊᒻᒪ ᑕᐅᑐᒐᖃᓪᓗᐊᑕᖅᖢᓂ ᐅᓂᒃᑳᖅᑐᐊᕐᓂᕐᒥᒃ ᐊᒻᒪ ᐃᑲᔪᕐᓂᕐᒥᒃ ᓄᓇᖅᑲᑎᒥᓂᒃ.
ᓴᖅᑭᑎᑦᑎᓚᐅᖅᐳᖅ ᐱᕙᓪᓕᐊᔪᓂᒃ ᑐᓴᒐᒃᓴᓂᒃ ᑐᓴᖅᑎᑦᑎᔪᒪᓪᓗᓂ ᓄᓇᓕᖕᒥᐅᓂᒃ ᐱᕙᓪᓕᐊᓂᕆᔭᐅᔪᒥᒃ ᐃᓱᒫᓘᑕᐅᔪᓂᒡᓗ ᒪᑲᓐᔨ ᕚᓕᒥ ᒑᓯᒧᑦ ᓱᓪᓗᓕᖕᒧᑦ ᑐᓴᖅᑎᑦᑎᔪᒪᓪᓗᓂᓗ ᓄᓇᓕᖕᒥᐅᑦ ᐃᓱᒪᒋᔭᖏᓐᓂᒃ. ᐱᓇᔪᓚᐅᖅᐳᖅ ᑕᕐᕆᔭᐅᓯᐅᕐᓂᕐᒧᑦ ᐃᓕᓐᓂᐊᕐᕕᖕᒧᑦ Capilano ᓯᓚᑦᑐᖅᓴᕐᕕᒡᔪᐊᒥ ᑭᓯᐊᓂ ᐃᖅᑲᓇᐃᔭᐃᓐᓇᕈᒪᓚᐅᕆᕗᖅ ᓄᓇᖃᖅᑳᖅᑐᖁᑎᒥᓄᑦ. ᐊᒡᒐᒥᓄᑦ ᐱᙳᐊᕈᓯᖃᖃᑦᑕᓕᓚᐅᖅᐳᖅ ᒪᒃᑯᒃᑐᓂᒃ, ᓄᓇᒧᑦ ᐊᐅᓪᓚᑲᑕᒃᖢᓂ ᐊᒻᒪ ᐃᒃᓯᕙᐅᑕᐅᖃᑕᐅᓪᓗᓂ Dehcho ᐊᕐᕌᒍᑕᒫᖅᓯᐅᒻᒥᒃ ᑲᑎᒪᑎᓪᓗᒋᑦ.
ᑕᑯᒃᓴᐅᑎᑦᑎᓪᓗᓂ ᓇᒡᓕᒍᓱᖕᓂᕐᒥᒃ ᓄᓇᖅᑲᑎᒥᓄᑦ, ᓇᒡᓕᒍᓱᖕᓂᕐᒥ ᓇᓂᓯᓚᐅᖅᐳᖅ ᐊᒻᒪ ᓇᐃᓕ ᑲᑎᓯᓪᓗᓂ ᐊᓈᓇᒋᔭᐅᔪᒥᒃ ᕿᑐᕐᖓᒥᓄᑦ. ᕿᑐᕐᙵᖅᑖᓚᐅᖅᓯᒪᔫᒃ ᔭᓗᓇᐃᒧᑦ ᓄᒃᑎᓚᐅᖅᓯᒪᓪᓗᑎᒃ ᐱᕕᒃᓴᖃᕐᓂᖅᓴᐅᓕᖅᖢᑎᒃ. ᑐᓴᓚᐅᖅᐳᖅ ᓈᓚᐅᑎᒃᑯᑦ ᐃᖅᑲᓇᐃᔮᕆᔪᒪᔭᒥᓂᒃ ᑭᓯᐊᓂ ᐅᔭᕋᖕᓂᐊᕐᕕᖕᒥ ᐊᑭᓕᖅᓱᖅᑕᐅᑦᑎᐊᖅᑐᒥᒃ ᐃᖅᑲᓇᐃᔮᖅᑖᕌᓂᒃᓯᒪᓕᕋᒥ ᑕᐃᑲᓃᖏᓐᓇᓕᓚᐅᖅᐳᖅ.
ᑭᖑᓂᐊᒍᑦ, ᓈᓚᐅᑎᒃᑯᑦ ᐃᖅᑲᓇᐃᔮᖃᕐᓂᖅ CKLB−ᑯᓐᓄᑦ ᐅᑎᓚᐅᖅᐳᖅ ᐅᔾᔨᕈᓱᓕᕋᒥ ᑮᓇᐅᔭᖅ ᑭᓱᑐᐃᓐᓇᐅᙱᓐᓂᖓᓂᒃ. ᐃᓕᓐᓂᐊᑲᐅᖅᑐᓚᐅᖅᖢᓂ ᓈᓚᐅᑎᓕᕆᔨᐅᓂᕐᒥᒃ, ᐅᖃᐃᓐᓇᓚᐅᖅᐳᖅ ᐅᖃᐅᓯᕐᒥᓂᒃ ᐊᑐᖅᖢᓂ ᐊᕐᕌᒍᓄᑦ ᑕᓪᓕᒪᑲᓴᖕᓄᑦ ᑭᓯᐊᓂ ᒐᕙᒪᒃᑯᑦ ᑮᓇᐅᔭᖁᑎᖏᑦ ᓇᑲᑎᖅᑕᐅᓚᐅᙱᓐᓂᖏᓐᓂ ᓄᖅᑲᖅᑎᑕᐅᓕᓚᐅᖅᐳᖅ. ᒪᒃᑯᒃᑐᓂᒃ ᐱᓕᕆᖃᑎᖃᓕᓚᐅᖅᐳᖅ ᓄᓇᓕᖕᓂ ᐃᓅᓯᓕᕆᔨᖃᖅᖢᓂ ᐊᒻᒪ ᒪᒥᓴᐃᔨᖃᖅᖢᓂ. ᒐᕙᒪᒃᑯᑦ ᓴᖅᑭᑎᑦᑎᑎᓪᓗᒋᑦ ᐊᑕᖐᔪᒥᒃ ᐱᖁᔭᒃᓴᒥᒃ ᐸᒡᕕᓵᕆᓇᔭᖅᑐᒥᒃ ᐃᒪᕐᒧᑦ ᐱᔪᓐᓇᐅᑎᒋᔭᐅᔪᓂᒃ, ᓇᐃᓕ ᐃᓚᐅᓕᓚᐅᖅᐳᖅ ᑭᒡᒐᖅᑐᐃᓂᕐᒥᒃ ᓄᓇᒥᒃ ᐃᒪᕐᒥᒡᓗ ᓴᐳᔾᔨᓯᒪᓂᕐᒥᒃ. ᐃᑲᔪᓚᐅᖅᓯᒪᕗᖅ ᐱᒋᐊᖅᑎᑦᑎᓂᕐᒥᒃ ᑲᑐᔾᔨᖃᑎᒌᒥᒃ ᑕᒪᑐᒧᖓ ᐱᔾᔪᑎᖃᖅᖢᓂ.
ᓈᓚᐅᑎᒃᑰᒃᑲᓐᓂᓕᓚᐅᖅᐳᖅ ᐱᖃᓐᓇᕆᔭᒥᓄᑦ ᓰᐲᓰᒃᑯᓐᓄᑦ ᐱᓇᔪᖁᔭᐅᓪᓗᓂ. ᑳᐱᑐᖅᖢᓂ ᐅᖃᓪᓚᖃᑎᖃᓚᐅᖅᐳᖅ, ᐊᐱᖅᓱᖅᑕᐅᓕᖅᖢᓂᓗ ᖃᐅᔨᓕᖅᖢᓂᓗ ᐃᖅᑲᓇᐃᔮᖅᑖᕐᓂᕋᖅᖢᓂ. ᐅᑭᐅᓂᒃ 8-ᓂᒃ ᐱᖃᑎᒋᓯᒪᓕᖅᑕᖓ. ᑎᑎᕋᖅᑕᒥᓂᒃ ᓄᖅᑲᕐᓂᕋᖅᖢᓂ ᓰᐲᓰᒃᑯᓐᓄᑦ ᐊᒃᓱᕈᕐᓇᓚᐅᖅᑐᖅ ᑭᓯᐊᓂ ᐅᐱᒋᔭᖃᓚᐅᖅᑐᖅ ᐱᐊᓂᒃᓯᒪᔭᒥᓂᒃ.
ᐱᕈᖅᓴᓪᓗᓂ ᓯᕗᓕᖅᑎᓂᒃ, ᐃᓐᓇᕐᓂᒃ, ᐃᖅᑭᓕᖕᓂᒃ ᐅᐱᒋᔭᒥᓂᒃ, ᐱᒃᑯᒥᒍᓱᖕᓂᖃᓚᐅᕐᒥᔪᖅ ᐃᖅᑭᓖᑦ ᖃᑕᙳᑎᒌᓂᒃ ᐊᒻᒪ ᓄᓇᖃᖅᑳᖅᓯᒪᔪᓂᒃ ᒐᕙᒪᓕᕆᔨᓂᒃ. ᐃᓄᐃᑦ ᓇᐃᓕ ᑕᐅᑐᒃᑕᖏᑦ ᐊᔾᔨᒌᖕᓂᖃᓚᐅᖅᐳᑦ ᐃᑲᔪᕈᒪᓪᓗᑎᒃ ᓄᓇᓕᕐᔪᐊᖁᑎᒥᖕᓂᒃ ᐃᓄᖁᑎᒥᖕᓂᒡᓗ. ᒪᒃᑯᒃᖢᓂ, ᓇᓂᓯᔪᒪᓚᐅᖅᐳᖅ ᖃᓄᖅ ᑲᑎᙵᖃᑎᖃᕈᓐᓇᕐᒪᖔᑦ ᓄᓇᖃᖅᑳᖅᓯᒪᙱᑦᑐᓂᒃ, ᐱᓗᐊᙳᐊᖅᖢᓂ ᐊᒥᖅᑳᕈᑕᐅᔪᓂᒃ ᐊᒃᓱᕈᕐᓇᖅᑐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓯᕗᓂᒃᓴᑦᑎᓐᓂ.
"ᐊᑐᕈᓐᓇᖅᓯᓯᒪᕗᖓ ᐃᓕᖅᑯᓯᑦᑎᓐᓂᒃ, ᐅᖃᐅᓯᑦᑎᓐᓂᒃ, ᕿᓚᐅᔾᔭᕐᓂᑦᑎᓐᓂᒃ, ᐃᙱᐅᓯᑦᑎᓐᓂᒃ, ᓄᓇᕐᔪᐊᕐᒨᕈᓐᓇᖅᖢᖓ ᐊᒥᖅᑳᕈᑎᒋᕙᒃᖢᒍᓗ ᐊᓯᑦᑎᓐᓄᑦ, ᐊᒻᒪᓗ ᐊᒥᖅᑳᖃᑎᒋᕙᒃᖢᒋᓪᓗ ᐱᔪᒪᔭᑦᑎᓐᓂᒃ ᓯᕗᓂᒃᓴᖃᑦᑎᐊᖁᓪᓗᑕ ᕿᑐᕐᖓᑦᑎᓐᓄᑦ. ᐄ, ᐅᓪᓘᑉ ᓄᙳᐊᓂ, ᐊᑐᖅᑐᐊᑐᐃᓐᓇᕋᑦᑕ ᑮᓇᐅᔭᓂᒃ. ᑕᒫᓃᖏᓐᓇᔾᔮᙱᑦᑐᒍᑦ. ᑕᒪᒃᑯᐊ ᓇᒃᓴᔾᔮᙱᑕᕗᑦ ᐊᐅᓪᓚᖅᓯᒪᓕᕈᑦᑕ. ᐱᒻᒪᕆᐅᕗᖅ ᐃᖅᑲᐅᒪᔭᕗᑦ ᕿᒪᒃᑕᕗᑦ ᐊᒻᒪ ᕿᒪᐃᔪᒪᕗᒍᑦ ᐱᐅᔪᒥᒃ ᐊᑐᕈᓐᓇᕐᓂᐊᖅᑕᖏᓐᓂᒃ," ᓇᐃᓕ ᐅᖃᓚᐅᖅᐳᖅ, ᐅᖃᐅᓯᖃᖅᖢᓂ ᓂᕆᐅᖕᓂᕋᖅᖢᓂ ᑕᕐᕆᔮᒃᓴᑦ ᐃᑲᔪᕋᔭᕐᓂᖏᓐᓂᒃ ᒪᒃᑯᒃᑐᓂᒃ ᓂᕈᐊᑦᑎᐊᕈᓐᓇᕐᓂᕐᒥᒃ ᓯᕗᓂᒃᓴᒥ ᐊᒃᓱᕈᕐᓇᖅᑐᓂᒃ ᐃᓱᒪᓕᐅᕆᔭᕆᐊᖃᓕᕌᖓᑕ.
ᓄᓇᖃᖅᑳᖅᑐᑦ ᐃᓕᓐᓂᐊᖅᑎᑦ ᐊᐅᓪᓚᕌᖓᑕ ᓄᓇᒋᔭᒥᓂᒃ ᐃᖅᑲᓇᐃᔭᕆᐊᕐᓗᑎᒃ ᐃᓕᓐᓂᐊᕆᐊᖅᑐᕐᓗᑎᒡᓗ, ᐅᖃᐅᔾᔪᖅᓱᐃᔾᔪᑎᒋᔭᖓ ᐃᒪᓐᓇ, "ᐃᑲᔫᑎᒃᓴᖅᑕᖃᖅᐳᖅ ᐃᓕᖕᓂᒃ ᐃᑲᔪᕈᑎᒃᓴᓂᒃ ᐱᕚᓪᓕᕈᑎᒃᓴᓂᒃ, ᐊᒻᒪ ᐃᓄᖕᓂ ᐃᒃᐱᒍᓱᑦᑎᐊᖅᑐᓂᒃ ᐃᑲᔪᕈᒪᔪᓂᒡᓗ ᐃᓕᖕᓂᒃ ᑎᑭᐅᑎᔪᓐᓇᖁᓪᓗᑎᑦ ᐅᐸᒋᐊᖃᖅᑕᕐᓄᑦ, ᐅᕝᕙᓘᓐᓃᑦ ᐅᐸᒋᐊᖃᖅᑕᕐᓄᑦ. ᑭᓯᐊᓂ ᐃᑲᔪᕋᓱᑐᐃᓐᓇᕐᓂᖅ ᐊᒻᒪ ᑲᑎᙵᖃᑎᖃᕐᓂᖅ."
ᒪᒃᑯᒃᑐᓄᑦ ᐊᒃᓱᕈᕐᓇᖅᑐᒃᑰᖅᑐᓄᑦ ᓄᖅᑲᖅᑎᑦᑎᔪᓐᓇᖅᑐᓄᑦ ᐱᕙᓪᓕᐊᓂᕐᒧᑦ ᓲᕐᓗ ᐅᐃᕆᓯᒪᓂᕐᒧᑦ, ᑮᓇᐅᔭᑎᒍᑦ ᐊᑲᐅᙱᓕᐅᕈᑕᐅᔪᓄᑦ, ᓄᒫᓱᖕᓂᕐᒧᑦ, ᐃᖅᑲᓇᐃᔮᖃᙱᓐᓂᕐᒧᑦ, ᐱᖃᓐᓇᕆᔭᕐᓄᑦ ᐹᑎᕈᒪᔪᓄᑦ, ᐅᖃᖅᑐᖅ, "ᑕᒪᒃᑯᐊ ᐃᓱᒪᒋᑦᑎᐊᕋᓱᒃᐸᒡᓗᒋᑦ. ᐅᕙᓐᓄᓪᓕ, ᐃᓱᒪᓕᐅᕆᑐᐃᓐᓇᓚᐅᖅᐳᖓ, ᖁᕕᐊᓱᖃᑎᒌᖏᓐᓇᕈᒪᕗᖔ ᐃᓚᒋᔭᐅᓗᖓᓗ ᑖᒃᑯᓂᖓᑦᑕᐃᓐᓇᖅ ᐱᙳᐊᖅᑎᐅᖃᑎᒌᓂᒃ, ᑖᒃᑯᓂᖓᔅᓴᐃᓐᓇᖅ ᐅᓂᒃᑳᖅᑐᐊᓂᒃ, ᑖᒃᑯᓂᖓᔅᓴᐃᓐᓇᖅ ᐱᓪᓚᑦᑖᙳᐊᖅᑐᓂᒃ, ᐅᕝᕙᓘᓐᓃᑦ ᐱᐅᔪᐊᓗᖕᒥᒃ ᓴᖅᑭᑦᑎᔪᒪᕗᖓ, ᕿᑐᕐᙵᒪ ᐅᐱᒋᔭᐅᔪᓐᓇᖅᑐᒥᒃ, ᐱᐅᔪᒥᒃ?... ᑕᐃᒪᓐᓇ ᓂᕈᐊᓚᐅᖅᐳᖓ, ᑭᓯᐊᓂ ᐃᑲᔪᖅᑕᐅᔭᕆᐊᖃᓚᐅᕆᕗᖓ. ᓇᓂᓯᔭᕆᐊᖃᖅᐳᑎᑦ ᐱᓕᕆᖃᑎᒋᓂᐊᖅᑕᕐᓂᒃ." ᐊᒃᓱᕉᑎᖃᖅᖢᓂ ᐃᓄᑑᔭᕆᐊᖃᕐᓂᕐᒥᒃ ᐊᖏᕐᕋᕆᔭᕐᓂ, ᓇᐃᓕ ᐃᒪᓐᓇᐅᖁᔨᕗᖅ, ᑲᔪᓰᓐᓇᖃᑦᑕᖁᔨᓪᓗᓂ ᓇᓂᓯᓚᐅᙱᓐᓂᕐᓂ ᐃᓄᖕᓂᒃ ᑲᑎᖃᑎᖃᕈᓐᓇᕐᓂᕐᒥᒃ.
ᐊᐱᕆᖁᔨᖕᒥᔪᖅ ᐱᔭᕆᐊᖃᖅᑕᕐᓂᒃ. "ᐃᖅᑭᓖᑦ ᐅᒃᐱᕐᓂᓕᕆᑎᓪᓗᒋᑦ, ᑕᐃᒪᓐᓇ ᐅᖃᓲᖑᖕᒪᑕ ᓄᓇᒨᑐᐃᓐᓇᕐᓗᓯ ᐅᖃᓪᓚᑲᑕᒡᓗᑕᓗ, ᐅᖃᐅᑎᓗᑎᒍᑦ, ᓄᓇ ᐱᑕᖃᕐᒪᑦ ᒪᒥᓴᕐᓂᕐᒧᑦ ᐊᒻᒪ ᑕᓯᐅᖅᓯᓂᕐᒧᑦ ᐅᕙᑦᑎᓐᓂᒃ. ᐱᕕᒃᓴᖃᖅᑎᓪᓗᑎᑦ ᑕᖅᑳᙵᐅᔭᕆᐊᖃᖅᐳᑎᑦ ᐊᒻᒪ ᐃᒻᒪᖄ ᐱᙳᐊᖅᑎ ᑕᐅᓄᙵᐅᓗᓂ ᑕᑯᓗᓂ ᖃᓄᖅ ᓇᒡᓕᖕᓇᖅᑎᒋᖕᒪᖔᖅᐱᑦ, ᐊᒻᒪ ᓇᒃᓴᕐᓗᓂ ᑭᓱᒥᒃᑭᐊᖅ ᐊᑐᕈᓐᓇᖅᑕᕐᓂᒃ, ᐃᓕᖕᓂᒃ ᐃᑲᔪᕐᓂᐊᖅᑐᓂᒃ," ᐅᓂᒃᑳᕆᓪᓗᓂ.
ᓇᐃᓕ ᐱᓕᕆᖃᑎᖃᖁᔨᕗᖅ ᐃᓄᖕᓂ ᑭᒃᑯᑐᐃᓐᓇᓄᑦ ᐱᐅᔪᒥᒃ ᑐᕌᕆᔭᖃᕐᓂᕐᒧᑦ. "ᓲᖃᐃᒻᒪ ᐅᓪᓘᑉ ᐃᓱᐊᓂ, ᓄᓇᓕᖕᓅᖓᓪᓚᕆᖕᒪᑦ. ᐃᓚᒌᖕᓂᕐᒨᖓᕗᖅ, ᐃᓚᒌᖕᓂᕐᒨᖓᓪᓗᓂᓗ. ᐃᑲᔪᖃᑦᑕᐅᑎᑦᑎᐊᖅᑐᑦ. ᓲᖃᐃᒻᒪ ᐱᕈᖅᓴᓚᐅᖅᓯᒪᒐᒪ ᑐᓴᖃᑦᑕᖅᖢᖓ ᐃᓐᓇᑐᖃᕐᓂᒃ ᐃᒪᓐᓇ ᐅᖃᖅᑐᓂᒃ. ᐃᑲᔪᖃᑦᑕᐅᑎᔭᕆᐊᖃᖅᐳᒍᑦ... ᐃᓄᖕᓂ ᓇᒡᓕᒍᓱᒋᐊᖃᖅᐳᑎᑦ ᐆᒻᒪᑎᓕᒫᒃᑯᑦ..."
ᐃᒻᒥᓂᒃ ᐊᑐᐃᓐᓇᐅᑎᖦᖢᓂ ᐊᒻᒪ ᐃᒻᒥᓂᒃ ᒪᑐᐃᙶᑦᑎᐊᖅᖢᓂ, ᓂᔾᔭᐅᓯᔭᕈᓐᓇᓚᐅᖅᐳᖅ, ᑕᕐᕆᔭᐅᓯᐅᖃᑕᐅᔪᓐᓇᖅᖢᓂᓗ, ᐊᒻᒪ ᕉᒻᒨᕈᓐᓇᖅᖢᓂ ᐃᖅᑭᓖᑦ ᕿᓚᐅᔾᔭᖏᓐᓂᒃ ᐊᑐᕆᐊᖅᑐᖅᖢᓂ ᑲᑎᒪᔭᖅᑐᖅᓯᒪᔪᓂᒃ. ᐃᓄᑑᑎᙱᖦᖢᓂᐅᒃ, ᐃᓄᖕᓂ ᐊᒻᒪ ᐱᕕᒃᓴᓂᒃ ᓇᓂᓯᔪᓐᓇᖅᑎᑦᑎᓚᐅᖅᐳᖅ. ᓄᓇᓕᖓᑎᒍᑦ ᐊᒻᒪᓗ ᐱᓗᐊᖅᑐᒥ ᐊᑖᑕᑦᑎᐊᒥᓄᑦ, ᐃᓕᑦᑎᓚᐅᖅᑐᖅ ᐊᒃᓱᕈᓗᐊᖃᑦᑕᖏᓐᓂᕐᒥᒃ ᑭᓱᑐᐃᓐᓇᕐᓂᒃ ᐊᒻᒪᓗ ᐃᓱᒪᖓᑕ ᓴᙱᓂᖓᓂᒃ. ᐃᓕᑦᑎᓚᐅᖅᐳᖅ ᖃᓄᐃᙱᑦᑎᐊᕆᐊᖃᕐᓂᕐᒥᓂᒃ, ᓱᐴᖅᑐᒐᕐᓂᒃ ᐃᒥᐊᓗᖕᒥᒡᓗ ᐊᑐᖅᑕᐃᓕᒪᓂᕐᒥᒃ, ᐃᒃᐱᒋᔭᒥᓂᒃ ᓴᒃᑯᐃᓗᓂ ᐊᒻᒪ ᓯᕘᕋᓂᕐᒥᒃ, ᐊᒻᒪ ᐃᒃᐱᒋᔭᒥᓂᒃ ᐊᒃᓱᕈᓗᐊᙱᓪᓗᓂ. ᐃᓕᑦᑎᓚᐅᖅᐳᖅ ᒪᑐᐃᙶᑦᑎᐊᕐᓂᕐᒥᒃ, ᐃᒻᒥᓂᒃ ᐱᕐᔪᐊᖑᙱᓪᓗᓂ, ᖁᕕᐊᒋᔭᖃᕐᓂᕐᒥᒃ ᐃᓅᖃᑎᒥᓂᒃ ᓇᒡᓕᒋᔭᒥᓂᒃ ᐊᒻᒪ ᐊᓯᒥᓂᒃ ᑲᒪᑦᑎᐊᕐᓂᕐᒥᒃ.
ᐱᓇᔪᒍᓐᓇᓚᐅᖅᐳᖅ, ᐊᓯᒥᓂᒃ ᐅᒃᐱᕈᓱᒃᖢᓂ ᐃᒻᒥᓂᒡᓗ ᓴᙱᔫᓪᓗᓂᓗ ᐊᒻᒪ ᑲᒪᓇᖅᑐᓂᒃ ᖃᓄᐃᓕᐅᕈᓘᔭᖅᑎᑦᑎᕙᒃᖢᓂ. ᐅᓂᒃᑳᑲᑕᒃᖢᓂ ᓈᓚᐅᑎᒃᑯᑦ, ᐃᙱᐅᓯᖃᖅᖢᓂ ᕿᓚᐅᔾᔭᖅᖢᓂ ᕉᒥ ᐊᒻᒪ ᒪᒃᑯᒃᑐᓂᒃ ᐱᓕᕆᖃᑕᐅᕙᒃᖢᓂ, ᓗᐊᕋᓐᔅ ᓇᐃᓕ ᐊᒃᑐᐃᓯᒪᕐᔪᐊᖅᐳᖅ ᐃᓅᓯᖓᓂ ᒫᓐᓇᒧᑦ ᑎᑭᖦᖢᒍ. ᓄᓇᓕᒃ ᐆᒻᒪᑎᖓᓃᑎᓪᓗᒍ ᐃᖅᑲᓇᐃᔮᖓᓂ ᐃᓅᓯᖓᓂᓗ, ᖃᓄᑐᐃᓐᓇᑦᑎᐊᖅ ᑐᓂᓯᓯᒪᕗᖅ, ᐃᒻᒥᓂᒃ ᒪᑐᐃᙶᖅᑎᑦᑎᓪᓗᓂ ᐱᕕᒃᓴᓄᑦ ᑲᑎᙵᓂᕆᔭᐅᔪᓄᓪᓗ ᐊᒻᒪ ᑭᖑᓪᓕᕐᒧᑦ ᐱᐅᔪᒻᒪᕆᖕᒧᑦ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.
