"ᐊᔾᔨᒋᑦᑎᐊᙱᑕᖓᓂ ᐃᖅᑲᓇᐃᔮᖅᑖᕈᒪᓕᓚᐅᖅᑐᖓ ᒫᓐᓇᓗ ᐅᖃᓪᓚᒍᓐᓇᖅᓯᓪᓗᖓ ᖃᑕᙳᑎᒃᑲ, ᐱᖃᓐᓇᕆᔭᒃᑲ ᐃᓕᓐᓂᐊᖅᑎᓪᓗ ᐅᖃᐅᓯᖓᓂ ᐅᓪᓗᓕᒫᖅ," ᓈᓴᐃᒃᑲᓐᓂᖅᖢᖓ ᐳᕆᒃᑕᐃᐅᓪ, ᐳᕆᑎᔅ ᑲᓚᒻᐱᐊᒥ ᐃᓅᓂᑯ ᐊᒻᒪ ᐱᕈᖅᓴᓪᓗᓂ ᒪᐃᐊ ᐋᓐᑕᐃᓐ.  ᐅᓪᓗᓕᒫᖅ ᐃᓕᓴᐃᔨᐅᔪᖅ, ᐃᓕᓴᐃᔨᐅᓪᓗᓂ ᑕᖅᑭᓄᑦ 8-ᓄᑦ ᐃᓐᓇᕐᒧᑦ ᐃᓚᐅᓂᐅᕙᒃᑐᒧᑦ ᓴᐃᒪᓐ ᕗᕋᐃᓱ ᓯᓚᑦᑐᖅᓴᕐᕕᒡᔪᐊᖓᓂ ᑕᓪᓕᒪᐅᓪᓗᑎᒃ ᐃᓕᓴᐃᔩᑦ ᖃᖓᑐᐃᓐᓇᑦᑎᐊᖅ ᐅᓪᓗᕐᒥ. ᐃᓕᓐᓂᐊᖅᑏᑦ ᐱᒋᐊᕋᔪᒃᐸᒃᐳᑦ ᐅᖃᐅᓯᕐᒥᒃ ᖃᐅᔨᒪᙱᖦᖢᑎᒃ ᖃᐅᔨᓂᖅᓴᐅᕙᒃᖢᑎᒡᓗ ᐅᖃᓪᓚᒍᓐᓇᕐᓂᕐᒥᒃ 100−ᓄᑦ ᐃᑲᕐᕋᓄᑦ ᐃᓚᐅᕝᕕᒋᔭᒥᓄᑦ. ᐃᓕᓐᓂᐊᕐᕕᐅᑉ ᓯᓚᑖᓂ, ᐊᓈᓇᐅᓪᓗᓂ ᐱᒋᐊᖅᑎᑦᑎᔨᐅᓪᓗᓂᓗ ᑮᓇᐅᔾᔭᒃᓴᕋᓱᐊᖅᑎᐅᙱᖦᖢᓂ ᑕᐃᔭᐅᓪᓗᓂ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓯᓚᒥ.

ᐊᕐᕌᒍᓄᑦ ᐱᖓᓱᓄᑦ, ᐋᓐᑕᓂ ᐅᖃᓪᓚᖃᑦᑕᖅᓯᒪᓕᖅᑐᖅ Squamish Language-ᒥᒃ, ᐊᓂᒍᐃᓯᒪᓪᓗᓂ ᐃᓕᓐᓂᐊᖅᑕᒥᓂᒃ ᐃᓕᓴᐃᑎᓪᓗᒍ. ᐃᓕᓐᓂᐊᕇᖅᓯᒪᙱᖦᖢᓂ ᐃᓕᑕᕆᔭᐅᔾᔪᑎᑖᖅᓯᒪᔪᖅ UBC−ᑯᓐᓂ ᐊᕙᑎᑦᑎᓐᓂ ᐃᖏᕐᕋᐃᓐᓇᕈᓐᓇᕐᓂᕐᒧᑦ. ᐃᓕᓐᓂᐊᕈᒪᓚᐅᖅᑐᖅ Squamish Language Program-ᒥᑦ ᐃᓕᑦᑎᒃᑲᓐᓂᕈᒪᓪᓗᓂ ᓇᑭᙶᕐᒪᖔᑦ ᐊᒻᒪᓗ ᐅᖃᐅᓯᖃᕈᖕᓇᕐᓂᐊᕐᒪᑦ ᐱᕈᖅᑐᓂᒃ ᐊᒻᒪᓗ ᓂᕐᔪᑎᓂᒃ ᐅᖃᐅᓯᐅᑉ ᒥᒃᓵᓄᑦ ᐃᖅᑲᓇᐃᔭᕐᕕᖕᒥ ᐊᒻᒪᓗ ᓯᓚᒦᓪᓗᓂ ᐅᖃᓪᓚᒍᓐᓇᕐᓂᕐᒧᑦ. ᑕᕝᕘᓇ ᐊᖅᑯᑎᒋᔭᖓ ᓂᕆᐅᓇᓐᖏᑦᑐᒃᑯᑦ ᓴᖅᑭᓚᐅᖅᑐᖅ. 

"ᐅᖃᐅᓯᕆᑐᐊᕈᒃᑯ, ᐅᖃᐅᓯᖅ ᐱᐅᒋᑦᑎᐊᓚᐅᖅᑕᕋ. ᕿᓚᒥᐊᓗᒃ ᑎᒍᓚᐅᖅᑕᕋ ᐊᒻᒪᓗ ᐃᓕᓐᓂᐊᕇᕋᒪ ᐊᒻᒪᓗ ᐅᕙᓐᓂᒃ ᐃᓕᓴᐃᓪᓗᖓ ᐊᒻᒪᓗ ᐃᓕᓐᓂᐊᑲᓐᓂᖅᑐᖓ," ᐃᖅᑲᐅᒪᔪᖅ. ᐋᓐᑕᓂ ᐱᔭᕇᖅᓯᓪᓗᓂ ᓇᓗᓇᐃᒃᑯᑕᖅᑖᕐᓂᕐᒧᑦ ᐃᓕᓐᓂᐊᒐᒃᓴᒥᒃ, ᐊᐅᔭᒃᑯᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕐᖢᓂ ᑲᔪᓯᔪᓐᓇᖅᓯᓪᓗᓂ ᐅᖃᕈᓐᓇᑦᑎᐊᕐᓂᕐᒥᓂᒃ, ᐱᑎᑕᐅᓪᓗᓂᓗ ᓇᓗᓇᐃᒃᑯᑕᖅᑖᕐᓂᕐᒧᑦ ᐃᓕᓐᓂᐊᒐᒃᓴᒥᒃ ᐃᓕᑦᑎᒃᑲᓐᓂᕐᓂᕐᒧᑦ. ᐃᓕᓴᐃᔨᙳᓚᐅᖅᑐᖅ ᐱᒋᐊᓕᓵᖅᑐᓄᑦ ᐱᓕᕆᐊᒃᓴᓄᑦ.  

"ᐃᓱᒪᒋᔭᕋ ᐅᖃᐅᓯᕐᒥᒃ ᐃᓕᓐᓂᐊᕐᓂᖅ, ᐱᓗᐊᖅᑐᒥᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ, ᐊᒻᒪᓗ, ᐊᒻᒪᓗ ᓇᖕᒥᓂᖅ ᐅᖃᐅᓯᕐᓂᒃ, ᐊᒥᓱᓂᒃ ᐃᒃᐱᖕᓂᐊᓂᒃᑯᑦ ᑐᓗᖅᑕᕈᑎᑕᓕᒃ. ᑲᙳᓇᕈᓐᓇᖅᑐᖅ ᐱᒋᐊᕆᐊᒃᓴᖅ ᐃᓐᓇᐅᓗᓂ ᐃᓕᑦᑎᕙᓪᓕᐊᓗᓂ ᐅᖃᐅᓯᖕᓂᑦ ᖃᐅᔨᒪᙱᓪᓗᑎᓪᓗ ᖃᓄᖅ ᖃᐅᔨᑎᑦᑎᔭᕆᐊᒃᓴᖅ ᐃᓕᖕᓂᒃ ᖃᐅᔨᒪᓗᑎᓪᓘᓐᓃᑦ ᖃᓄᖅ ᐅᖃᓪᓚᒋᐊᒃᓴᖅ ᐅᖃᐅᓯᖕᓂᑦ ᓯᕗᓕᕕᓂᕕᑦ ᐅᖃᓪᓚᒃᑕᖏᓐᓂᑦ," ᓴᖅᑭᔮᖅᑎᑦᑎᔪᖅ. ᐋᓐᑕᓂ ᐃᖅᑲᐅᒪᔪᖅ ᓇᖕᒥᓂᖅ ᑲᙳᓲᑎᒋᓯᒪᔭᖓᓂᒃ ᐅᖃᕈᒪᙱᖦᖢᓂ ᖃᐅᔨᒪᙱᖦᖢᓂᐅᒃ ᐅᖃᐅᓯᖅᑕᖓ, ᑭᓯᐊᓂ ᐊᔭᐅᕐᖢᓂᐅᒃ ᐃᓕᓴᕆᓪᓗᓂᐅᒡᓗ ᐅᖃᐃᓐᓇᔾᔮᖏᓐᓇᒥ ᑭᓱᓕᒫᓂᒃ, ᒫᓐᓇᓘᓐᓃᑦ. 

ᐅᖃᓪᓚᒃᑎᓪᓗᒍ ᐅᖃᐅᓯᖅᑕᖓ, ᐊᒃᓱᕈᖃᑦᑕᖅᑐᖅ ᖃᓗᓈᑎᑑᖓᔪᓐᓃᖅᑎᖦᖢᒍ. ᐋᖅᑭᒃᓯᒪᓂᖓ ᒪᕐᕉᒃ ᐅᖃᐅᓰᒃ ᐊᔾᔨᒌᙱᒻᒪᑎᒃ, ᓲᕐᓗ ᓄᓇᕐᔪᐊᕐᒥᐅᑎᑐᑦ ᐊᒻᒪ ᑕᐅᑐᖅᑰᖅᑕᐅᔪᑦ ᐅᖃᐅᓯᖅᑕᑦ ᑭᒡᒐᖅᑐᐃᔪᑦ. "ᐊᒃᓱᕈᐃᓐᓇᕆᐊᖃᓚᐅᖅᑐᖓ ᐊᔪᕈᓐᓃᖅᓴᐃᓐᓇᕐᖢᖓᓗ ᓂᑲᒍᓱᐃᓐᓇᕐᖢᖓᓗ," ᐋᓐᑕᓂ ᐃᖅᑲᐅᒪᔪᖅ.  

"ᖃᔅᓯᑲᓪᓚᖕᓂᒃ ᐊᑐᒐᒃᓴᖅᑕᖃᖅᐳᖅ ᐃᓕᖕᓂᒃ ᐊᑦᑕᑕᒃᑲᓐᓂᕈᓐᓇᕐᓂᕐᒥᒃ ᐅᕝᕙᓘᓐᓃᑦ ᐊᒃᑐᐊᓂᖃᐃᓐᓇᕐᓗᑎᑦ ᐃᓕᖕᓄᑦ, ᐃᓕᖅᑯᓯᕐᓄᑦ ᐊᒻᒪ ᓄᓇᖅᑲᑎᖕᓄᑦ."

ᐱᕈᖅᐸᓪᓕᐊᓪᓗᓂ, ᐋᓐᑕᓂ ᐊᒃᑐᐊᓂᖃᑦᑎᐊᓚᐅᙱᑦᑐᖅ ᐅᖃᐅᓯᕐᒧᑦ, ᐃᓕᖅᑯᓯᕐᒧᑦ ᐊᒻᒪ ᓄᓇᖅᑲᑎᒥᓄᑦ, ᑭᓯᐊᓂ ᐅᖃᐅᓯᖅᑕᖓ ᐃᓕᓐᓂᐊᖅᖢᓂ ᐱᒋᐊᕈᑕᐅᓯᒪᕗᖅ ᐊᑦᑕᑕᖅᑎᑕᐅᒃᑲᓐᓂᕋᓱᒃᖢᓂ. "ᑕᐃᒪᓕ, ᒪᑐᐃᖅᑕᐅᓯᒪᓕᖅᑐᖅ ᐊᒥᓱᓂᑦ ᐹᓂᑦ ᑲᑎᑎᑦᓯᑲᓐᓂᕐᓂᕐᒥᑦ ᐊᔾᔨᒌᖏᑦᑐᓄᑦ ᐃᓚᒌᓄᑦ ᑲᑎᑎᑦᓯᓂᕐᒥᓪᓘᓐᓃᑦ ᐅᑉᐱᕐᓂᕐᒧᑦ ᐱᓕᕆᔾᔪᓯᕐᓂᑦ, ᑲᓲᑎᑲᓐᓂᕐᓂᕐᒥᑦ ᓄᓇᑦᑎᓐᓄᑦ. ᑕᒪᒃᑯᐊᓕᒫᑦ ᐱᒋᐊᖅᓯᒪᔪᑦ ᐃᓕᓐᓂᐊᐸᓪᓕᐊᓂᕐᒥᑦ ᐅᖃᐅᓯᓐᓂᑦ," ᐅᖃᖅᑐᖅ.  

ᐅᖃᐅᔾᔪᐃᓂᖓ ᒪᒃᑯᖕᓂᖅᓴᓄᑦ ᓇᖕᒥᓂᖅ ᐃᒪᐃᑉᐳᖅ, "ᐅᖃᐅᓯᕐᒥᒃ ᐃᓕᑦᑎᔭᕆᐊᖃᙱᓚᖅ ᐃᓕᖕᓄᑦ ᑭᓇᑐᐃᓐᓇᒧᓪᓘᓐᓃᑦ, ᑭᓯᐊᓂ ᑕᐃᒪᐃᒍᓐᓇᖅᐳᖅ. ᖃᓄᐃᑦᑐᑐᐃᓐᓇᖅ ᐃᓕᖅᑯᓯᐅᔪᖅ ᐊᒃᑐᐊᓂᖃᖅᑐᒋᔭᐃᑦ, ᐅᕝᕙᓘᓐᓃᑦ ᐃᓕᒃᑲᓐᓂᕈᒪᓐᓂᕈᕕᐅᒃ ᓲᕐᓗ ᐊᓪᓗᕆᐊᕈᑎᑦᑎᐊᕙᐅᔪᖅ ᐊᒻᒪᓗ ᖃᐅᔨᒪᒋᐊᖃᕐᓇᓂ ᑭᓱ ᓴᖅᑭᓂᐊᕐᒪᖔᖅ ᐊᒻᒪᓗ ᑕᑯᔭᕆᐊᖃᕐᓇᓂ ᐊᖏᓂᖅᓴᒥᒃ ᑕᑯᓐᓇᖑᐊᕐᓗᒍ ᑭᓯᐊᓂ ᑖᓐᓇᑐᐊᖅ ᐊᓪᓗᕆᐊᕈᑎ ᐅᕝᕙᓘᓐᓃᑦ ᐊᑕᐅᓯᕐᒧᑦ ᐃᓕᓐᓂᐊᕐᓂᐅᔪᒧᑦ ᐅᕝᕙᓘᓐᓃᑦ ᖃᐅᔨᒋᐊᕐᓗᓂ ᐊᑕᐅᓯᕐᒧᑦ ᐃᓚᒌᓄᑦ ᒪᑐᐃᖅᓯᒍᓐᓇᕐᒪᑦ ᐊᒥᓱᓂᒃ ᒪᑐᓂᒃ. ᑕᐃᒪᐃᓕᐅᑐᐃᓐᓇᕐᓗᑎᑦ, ᑲᑉᐱᐊᓇᖅᐳᖅ ᐃᓕᕋᓇᕈᓐᓇᖅᖢᓂᓗ, ᑭᓯᐊᓂ ᖁᔭᓕᑦᑎᐊᕐᓂᐊᖅᐳᑎᑦ ᐃᓱᐊᓂ ᐱᓕᕆᓚᐅᕐᓂᕐᓂᒃ ᐊᒻᒪ ᐊᑐᖅᑕᓕᒫᕐᓂᒃ ᑐᓴᖅᑎᑦᑎᔪᓐᓇᕐᓂᐊᖅᐳᑎᑦ."

ᖃᐅᔨᓚᐅᖅᑐᖅ ᐅᖃᐅᓯᖅ 9-ᒥᑦ 5-ᒧᑦ ᐃᖅᑲᓇᐃᔮᒃᓴᐅᙱᒻᒪᑦ, ᐱᓗᐊᖅᑐᒥᓪᓗ ᓄᑕᕋᓛᖃᕐᓗᓂ, ᐃᓱᒪᐃᓐᓇᐅᔭᖅᑐᖅ ᖃᓄᖅ ᐃᓕᓐᓂᐊᖅᑎᑦᑎᔪᓐᓇᕐᒪᖔᑦ ᐊᐃᑉᐸᕐᒥᓄᑦ ᐃᓅᓯᒪᙱᑦᑐᒧᓪᓗ ᐸᓂᖓᓄᑦ. ᑕᐅᑐᓪᓗᐊᑕᕐᖢᓂ ᐅᖃᐅᓯᖅᑕᒥᒃ ᐊᑐᕈᓐᓇᖅᑕᖓᓂᒃ ᖃᐅᑕᒫᑦ ᐃᓅᓯᖓᓂ ᐊᓃᓚᐅᑲᖕᓇᖅᑎᓪᓗᒍᓗ ᐊᒃᓱᕈᕐᓇᓗᐊᙱᑦᑐᖅ. ᑖᓐᓇ ᐃᖅᑲᓇᐃᔮᕆᖅᑰᔨᙱᒻᒪᒍ. "ᐱᔭᕇᖅᑎᓪᓗᒍ, ᐊᑭᓕᖅᓱᖅᑕᐅᑦᑎᐊᖅᑰᔨᔪᖓ ᓇᒡᓕᒋᔭᓐᓂᒃ ᐱᓕᕆᔭᕆᐊᒃᓴᖅ," ᐊᓕᐊᓇᐅᔭᖅᑐᖅ. ᓇᓂᓯᓇᓱᖃᑦᑕᕐᒥᔪᖅ ᓇᓕᒧᒌᒃᑎᑦᑎᓂᕐᒥᒃ ᒥᒃᖠᒋᐊᖅᑎᓪᓗᒍ ᑕᐅᑐᖕᓂᖓᑕ ᐱᕕᒃᓴᖓ ᐊᓂᓗᓂᓗ ᐊᓂᖅᑎᕆᑦᑎᐊᕐᓇᖅᑐᒥ. 

ᑮᓇᐅᔾᔭᒐᓱᐊᖅᑎᐅᙱᑦᑐᖅ, ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓯᓚᒥ, 2020−ᒥ ᐱᒋᐊᓚᐅᖅᓯᒪᕗᖅ, ᐱᓱᔪᒋᐊᓯᓪᓗᓂ ᐊᕐᓇᓄᑦ ᑲᓇᑕᒥ. ᑐᓂᔭᐅᓚᐅᖅᐳᖅ ᐱᓇᓱᐊᕈᓰᒃ ᒪᕐᕉᒃ ᐊᓂᒍᖅᐸᑎᒃ ᐱᓱᕋᔭᓐᓂᐊᕋᒥ ᖁᕕᐊᓇᖅᑐᒻᒪᕆᐅᓪᓗᓂ. ᐃᓄᐃᑦ ᓯᓚᒧᐊᖃᑦᑕᓚᐅᖅᑐᑦ ᐊᒻᒪᓗ ᐃᓕᓐᓂᐊᕆᐊᖅᖢᑎᒃ ᐱᓱᔪᖕᓂᕐᒧᑦ ᐊᒻᒪᓗ ᐋᓐᑕᓂ ᐱᔪᒪᓂᖃᑦᑎᐊᓚᐅᖅᑐᖅ ᐱᕈᖅᑎᓐᓇᓱᒃᖢᓂᔾᔪᒃ ᑲᑐᔾᔨᖃᑎᒌᖓ ᐊᒻᒪᓗ ᐃᑲᔪᒃᑲᓐᓂᖅᖢᓂ ᐃᓄᖕᓂᒃ, ᐱᓗᐊᖅᑐᒥᒃ ᓄᓇᖃᖅᑳᖅᑐᑦ ᐃᓄᐃᑦ ᐊᒃᑐᐊᓂᖃᙱᑦᑐᑦ ᐊᖏᕐᕋᖏᓐᓄᑦ ᓄᓇᖏᓐᓄᑦ ᐅᕝᕙᓘᓐᓃᑦ ᐃᓕᖅᑯᓯᖏᓐᓄᑦ. 

ᑖᒃᑯᐊ ᐅᓄᖅᓯᒋᐊᖅᓯᒪᔪᑦ ᐊᒻᒪᓗ ᐃᓕᓐᓂᐊᖅᑎᑕᐅᓪᓗᑎᒃ ᐱᓐᖑᐊᕆᐅᖅᑐᑦ, ᖃᖅᑳᓗᒃᑯᑦ ᓯᐊᕐᕆᔮᕐᓂᖅ, ᖃᖅᑲᓂᒃ, ᐊᒻᒪᓗ ᐊᐳᑕᐃᔭᐃᓂᖅ. ᐃᑲᔪᕋᓱᓲᑦ ᐃᓄᖕᓂᒃ ᐃᓕᑦᑎᓗᑎᒃ ᑕᒻᒪᖓᙱᑦᑐᓂᒃ ᐊᓐᓄᕌᓂᒃ ᖃᐅᔨᒪᓂᐅᔪᓂᒃᓗ ᐊᑦᑕᕐᓇᙱᑦᑐᒃᑯᑦ ᐃᓚᐅᖃᑕᐅᓂᕐᒧᑦ. ᐃᓚᐅᖃᑕᐅᔪᑦ ᐃᓕᑦᑎᖃᑦᑕᐅᑎᖕᒥᔪᑦ ᐅᖃᐅᓯᖕᓂᑦ ᐃᓕᖅᑯᓯᖕᓂᓪᓗ.  "ᑕᐃᒪᓕ ᖃᓛᖅᑎᑦᑎᑐᐃᓐᓇᖅᐳᖅ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐊᒻᒪ ᓯᓚᒦᑐᐃᓐᓇᕐᓗᑎᒃ," ᐋᓐᑕᓂ ᐅᐱᒍᓱᒃᖢᓂ ᑐᓴᖅᑎᑦᑎᕗᖅ.  

ᐋᓐᑕᓂ ᓇᓂᓯᓯᒪᔪᖅ ᐅᖃᐅᓯᕐᒥᑦ ᐃᓕᓐᓂᐊᕐᓂᕐᒥᑦ ᐅᖃᐅᓯᑐᐃᓐᓇᐅᖏᑦᑐᓂᑦ. "ᐃᓕᑦᑎᓂᖅᓴᐅᕗᑎᑦ ᐅᖃᐅᓯᑐᐃᓐᓇᕐᒥᑦ, ᐃᓕᑦᑎᕗᑎᑦ ᖃᓄᖅ ᓄᓇᕐᔪᐊᕐᒦᑦᑕᕆᐊᒃᓴᖅ ᖃᓄᕐᓗ ᐃᓕᖕᓂᒃ ᑎᒍᒥᐊᕈᓐᓇᕐᒪᖔᖅᐱᑦ ᖃᓄᕐᓗ ᓯᕗᓕᕕᓂᕗᑦ ᑕᐅᑐᓚᐅᖕᒪᖔᑦ ᑐᑭᓯᖕᒪᖔᓪᓗ ᓄᓇᕐᔪᐊᒥᑦ ᖃᓄᕐᓗ ᐊᑐᕆᐊᒃᓴᖅ ᐅᓪᓗᒥᑦ ᓄᑖᖑᓂᕐᓴᒥᑦ ᓄᓇᕐᔪᐊᒥᑦ," ᓇᓗᓇᐃᕐᓯᔪᖅ. "ᑕᑯᓇᓱᑐᐃᓐᓇᖅᑕᒃᑲ ᐅᖃᐅᓯᓕᒫᒃᑲ ᐃᓕᓴᐃᔨᓕᒫᒃᑲ ᑕᑯᑎᒐᔪᒃᐸᒃᑲ ᐃᓄᑦᑎᐊᕙᐅᓂᕐᒥᒃ ᐃᑲᔪᕈᒪᑦᑎᐊᕐᓂᕐᒥᒡᓗ ᐅᕙᓐᓂᒃ ᐃᓕᓴᐃᑐᐃᓐᓇᙱᖦᖢᑎᒃ ᐅᖃᐅᓯᕐᒥᒃ, ᑭᓯᐊᓂ ᖃᓄᖅ ᐱᐅᓛᖑᔪᓐᓇᖅᐳᖓ ᐊᕐᓇᐅᔪᓐᓇᕐᓂᓐᓂ," ᑲᔪᓰᓐᓇᖅᐳᖅ. 

ᐃᓱᒪᓚᐅᖅᑐᖅ ᐊᔾᔨᒋᓐᖏᑕᖓᓂᒃ ᐃᖅᑲᓇᐃᔮᖃᕐᓂᐊᕆᐊᒃᓴᖅ ᐊᒻᒪᓗ ᒫᓐᓇ ᒪᐃᐊ ᐋᓐᑕᓂ ᐅᖃᓪᓚᒍᓐᓇᖅᓯᔪᖅ ᐊᒻᒪᓗ ᐃᓕᓐᓂᐊᖅᑎᖦᖢᓂᒋᑦ ᖃᑕᙳᑎᖏᑦ, ᐱᖃᓐᓇᕆᔭᖏᑦ ᐊᒻᒪᓗ ᐃᓕᓐᓂᐊᖅᑎᑦ ᐅᖃᐅᓯᖏᓐᓂᒃ ᐅᓪᓗᓕᒫᖅ. ᐃᓕᓐᓂᐊᕐᕕᐅᑉ ᐃᓗᐊᓂ ᓯᓚᑦᑎᐊᕙᐅᓂᖓᓄᑦ, ᐅᖃᐅᓯᖅ ᐃᓅᓯᓕᒫᖓᓂ ᐃᓚᒋᔭᐅᕗᖅ. ᐃᓂᓕᐅᕐᖢᓂ ᐊᒥᖅᑳᕈᑎᒋᓗᒍ ᓯᓚᒥ, ᐃᖕᒥᓂᒃ ᓇᓂᓯᓪᓗᓂ ᐃᓗᐊᓂ ᐃᓕᖅᑯᓯᓕᕆᓂᕐᒥ ᓄᓇᓕᖕᒥ ᐱᔪᒪᓕᖅᑎᑦᑎᓪᓗᓂ ᖃᐅᑕᒫᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.