ᐊᑎᖓ, ᑐᓗᒐᖅ, ᑐᑭᖃᖅᑐᖅ ᑐᓗᒐᖅ ᐊᒻᒪ ᐊᔾᔨᐅᖏᑦᑐᒃᑯᑦ ᐱᓕᕆᐊᒃᑯᑦ ᐅᑭᐅᖅᑕᖅᑐᒥ ᒪᒃᑯᑦᑐᓄᑦ, ᓯᐊᒪᒃᑎᕆᔪᓐᓇᓚᐅᖅᑐᖅ ᐃᓴᕈᖏᓐᓂᑦ ᐊᒻᒪ ᖃᖓᑕᓪᓗᓂ.  ᓕᐋᓐ ᑖᒻᓴᓐ ᐊᕐᕌᒍᒃᑲᓐᓂᕐᒥ ᐃᓕᓐᓂᐊᖅᑎᐅᔪᖅ ᓄᓇᕗᑦ ᓯᕗᓂᒃᓴᕗᒻᒥ ᐊᒻᒪᓗ ᑲᖏᖅᖠᓂᕐᒥᐅᑕᐅᓪᓗᓂ. ᒪᕐᕉᑎᓪᓗᒍ, ᓅᓚᐅᖅᓯᒪᔪᖅ ᑳᓐᒧᐊᒧᑦ, ᐋᓪᐴᑕᒧᑦ ᑲᒪᒋᔭᐅᔭᖅᑐᖅᖢᓂ ᐋᓐᓂᐊᕐᔪᐊᖅᑐᓄᑦ, ᑕᖅᑭᓄᑦ 9−ᓄᑦ ᐋᓐᓂᐊᕕᖕᒦᖦᖢᓂ. ᑕᐃᒪᖓᓂ ᓴᐅᓂᖓᑕ 18-ᑲᓴᓐᓂᑦ ᐊᕐᕌᒍᓂᑦ ᑳᓐᓱᖃᖏᑦᑐᖅ. ᖃᑕᙳᑎᖏᑦ ᓄᓇᖃᓚᐅᖅᑐᑦ Canmore-ᒥ ᐊᕐᕌᒍᓄᑦ 8-ᓄᑦ ᐊᒻᒪᓗ ᓅᖦᖢᑎᒃ ᐋᑐᕚᒧᑦ. 

ᐃᓚᒋᔭᐅᓪᓗᓂ ᓄᓇᕗᑦ ᓯᕗᓂᒃᓴᕗᒻᒧᑦ, ᒪᕐᕉᖕᓄᑦ ᐊᕐᕌᒎᖕᓄᑦ ᐱᓕᕆᐊᖑᕙᒃᑐᖅ, ᐃᓕᑦᑎᕙᓪᓕᐊᕗᖅ ᐃᓄᐃᑦ ᖃᓄᐃᓕᐅᖅᐸᓚᐅᕈᓯᖏᓐᓂᒃ, ᓅᑉᐸᖕᓂᕐᒥᓂ ᖃᖓᙳᕌᖓᑦ, ᐊᕐᕙᒐᓱᒃᑎᐅᓂᕐᒥᒃ, ᑮᔭᖃᑦᑕᕐᓂᕐᒥᒃ ᐱᒋᐊᖅᑕᐅᓯᒪᔪᓂᒡᓗ ᓲᕐᓗ ᐱᓕᕆᐊᖑᔪᒥᒃ ᐊᑎᕈᓯᕐᒥᒃ ᑕᒪᒃᑯᐊ ᐃᓄᐃᑦ ᐃᓄᒃᑎᑐᑦ ᐊᑎᕐᒥᓂᒃ ᐅᑎᖅᑎᑦᑎᕙᓪᓕᐊᓪᓗᑎᒃ. ᐃᓕᓐᓂᐊᓚᐅᕐᒥᔪᖅ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᐊᒻᒪᓗ ᓄᓇᑖᕋᓱᐊᕐᓂᕐᒥᒃ, ᐅᑭᐅᖅᑕᖅᑐᒥ ᐃᓄᐃᑦ ᒥᒃᓵᓄᑦ, ᒐᕙᒪᓕᕆᓂᕐᒥᒃ ᐊᒻᒪᓗ ᓄᓇᓕᓐᓂ ᐱᕙᓪᓕᐊᓂᐅᔪᓂᒃ. 

ᐱᕈᖅᓴᓚᐅᖅᑎᓪᓗᒍ ᖃᓪᓗᓈᑦ ᓄᓇᖓᓐᓂ, ᐃᓕᑉᐸᓪᓕᐊᔭᖓ ᓄᑖᖑᒻᒪᑦ ᐅᐱᓐᓇᕋᓂ ᐃᓕᓐᓂᐊᕐᕖᑦ ᓯᓚᑖᓂ ᐅᑭᐅᖅᑕᖅᑑᑉ ᑕᒪᒃᑯᓂᖓ ᑲᒪᕙᓚᐅᙱᒻᒪᑕ. ᐃᓕᑉᐹᓕᕐᓂᖅ ᐃᓕᖅᑯᓯᖓᑕ ᒥᒃᓵᓄᑦ ᐊᒻᒪᓗ ᖃᓄᐃᓕᐅᖅᐸᓚᐅᕈᓯᖏᓐᓂᒃ ᐊᒃᑐᐃᓂᖃᕐᔪᐊᖅᓯᒪᔪᖅ ᑖᒻᓴᓐᒧᑦ. "NS−ᒨᕋᒪ, ᐃᒪᓐᓇᐅᓚᐅᖅᑐᖓ, 'ᐊᐅᒃ!' ᐅᐱᒍᓱᑦᑐᒻᒪᕆᐅᓚᐅᖅᐳᖓ ᐃᓅᓪᓗᖓ. ᖁᕕᐊᓱᑦᑎᐊᓚᐅᖅᑐᖓ," ᐃᖅᑲᐅᒪᔪᖅ. ᑲᑎᖃᑎᖃᕈᓐᓇᓚᐅᖅᑐᖅ ᐊᒥᓱᓂᒃ ᐃᓄᖕᓂᒃ, ᑐᓵᓪᓗᓂ ᐅᓄᖅᑐᓂᒃ ᐊᔾᔨᒌᖏᑦᑐᓂᒃ ᐅᖃᐅᓯᖅᑕᓂᒃ ᐅᓂᒃᑳᓂᒡᓗ ᓄᓇᕗᓕᒫᒥ.

ᓄᑕᕋᐅᓂᕐᒥᓂ, ᐊᓈᓇᖓ ᐃᓅᔪᑐᐊᖑᓚᐅᖅᑐᖅ ᖃᓂᒋᔭᖏᓐᓃᑦᑐᓂ ᐊᒥᖅᑳᖃᑎᒋᕙᓚᐅᖅᑕᖓᓗ ᐃᓕᖅᑯᓯᖓᑕ ᒥᒃᓵᓄᑦ ᑭᓯᐊᓂ ᑖᒻᓴᓐ ᖃᐅᔨᓪᓗᓂ ᑕᐃᒃᑯᐊ ᐃᓕᑕᖏᑦ "ᓇᕿᑦᑎᙱᖦᖢᑎᒃ". ᒫᓐᓇ ᐃᓚᒋᔭᐅᓪᓗᓂ ᑕᒪᑐᒧᖓ ᐱᓕᕆᐊᖑᔪᒧᑦ, ᐃᓕᑦᑎᕗᖅ ᑲᑕᔾᔭᕐᓂᕐᒥᒃ, ᒥᖅᓱᕐᓂᕐᒥᒃ ᐃᓕᖅᑯᓯᑐᖃᒃᑯᓪᓗ ᐃᙱᐅᓯᕐᓂᒃ. ᐊᓈᓇᖓ ᑎᓕᐅᕆᓪᓗᓂ ᐱᓇᔪᖁᓗᒍ ᐊᓯᐊᒍᑦ ᐃᓱᒪᒋᔭᖃᖅᑎᓪᓗᒍ Algonquin ᓯᓚᑦᑐᖅᓴᕐᕕᖕᒥ ᐊᒻᒪ ᐋᑐᕚᒥ ᓯᓚᑦᑐᖅᓴᕐᕕᒃᔪᐊᒥ. ᐊᖏᕐᓂᖓ ᖁᕕᐊᓇᓚᐅᖅᑐᖅ ᐃᓱᒫᓘᑎᖃᕐᓂᖓᓄᑦ ᐃᓚᐅᖃᑕᐅᔾᔮᖏᓐᓂᖓᓂᒃ. 

ᐃᓱᒪᑎᓪᓗᒍ ᐃᓕᓐᓂᐊᕆᐊᕈᒪᓂᕐᒥᒃ ᐃᓕᓐᓂᐊᕐᕕᒡᔪᐊᒧᑦ, ᐱᓇᓱᐊᕐᓂᐅᓚᐅᖅᐳᖅ ᓴᓇᙳᐊᒐᕐᒥᒃ ᑎᑎᕋᐅᔭᖅᑕᒥᓂᒃ, ᓲᕐᓗ ᓄᓇᒥᒃ ᕿᓂᕐᓂᕐᒥᒃ. ᑭᓯᐊᓂ ᐃᓕᑦᑎᒃᑲᓐᓂᕋᒥ ᓄᓇᑖᕋᓱᖕᓂᕐᒧᑦ ᐊᖏᕈᑎᓂᒃ ᐱᓕᕆᐊᒥ, ᖃᐅᔨᓪᓗᓂ ᐊᕙᑎᒋᖕᒪᒍ ᐃᑲᔪᕈᒪᔭᖓ. ᐱᔭᕇᖅᑎᓪᓗᒍ, ᓂᕈᐊᕆᐊᖃᙱᖦᖢᓂ ᐊᑯᓐᓂᖏᓐᓂ ᓴᓇᙳᐊᕐᓂᕐᒥ ᐅᖃᐅᓯᖃᕐᓂᖅ ᐃᓕᑦᑎᓂᕐᓗ ᐃᓕᖅᑯᓯᖓᑕ ᒥᒃᓵᓄᑦ ᓲᖃᐃᒻᒪ ᐱᓕᕆᐊᒃᓴᖅ ᐃᓂᖃᓚᐅᕐᒪᑦ ᓴᓇᑐᓂᕐᒥᒃ.

ᒪᕐᕉᒃ ᑎᑎᕋᐅᔭᖅᓯᒪᔭᖏᑦ ᓵᓚᖃᓚᐅᖅᑐᑦ ᓇᓗᓇᐃᒃᑯᑕᕐᒥᑦ ᐱᓂᑭᓴᐅᑎᓂᕐᒥᑦ ᓄᓇᕗᑦS-ᑯᑦ ᐅᓪᓚᖃᑕᐅᓚᐅᖅᑐᑦ ᑎᑎᕋᐅᔭᕐᓂᕐᒧᑦ ᐳᐃᔾᔪᕋᕐᓂᕐᒧᑦ. ᒫᓐᓇ ᓴᓇᐅᒐᖏᑦ ᐊᑐᐃᓐᓇᐅᓕᖅᑐᑦ ᓂᐅᕕᖅᑕᐅᔪᓐᓇᖅᖢᑎᒃ ᐅᕕᓂᕈᕐᓄᑦ ᐊᒻᒪ ᐊᐅᒪᔮᖅᑎᓄᑦ ᐊᒻᒪ ᐃᓄᒃᑎᑐᑦ ᐊᑎᖃᖅᖢᓂ, ᑐᓗᑲᕋ, ᑐᑭᖃᖅᖢᓂ ᓕᑐᓪ ᑐᓗᒐᖅ. ᖁᕕᐊᒋᔭᖃᖅᑐᖅ ᐃᓄᐃᑦ ᐃᓕᖅᑯᓯᖓᓂᑦ ᓴᓇᙳᐊᕐᓂᕐᒥᑦ, ᓄᓇᒥᑦ ᑕᑯᑦᓴᐅᑎᑦᓯᓂᕐᒥᑦ ᐃᓄᒃᓱᓐᓂᑦ ᓄᓇᒥ, ᐃᖃᓗᓐᓂᑦ ᐊᒻᒪᓗ ᐊᖅᓴᕐᓂᕐᓂᑦ. ᐱᓕᕆᓂᖅ ᐃᓚᒋᓪᓗᓂᐅᒃ ᐱᓕᕆᐊᒃᓴᐅᑉ ᐃᑲᔪᕐᖢᓂ ᑲᙳᓱᙱᓐᓂᖅᓴᐅᓕᕐᖢᓂ ᖁᓱᔪᓐᓃᖅᑎᑦᑎᕚᓪᓕᕐᖢᓂᓗ, ᑎᓕᐅᕆᔭᐅᓪᓗᓂ ᓇᒡᓕᖕᓂᕐᒧᑦ ᐅᖅᑰᔪᒧᓪᓗ ᐃᖅᑲᓇᐃᔭᖅᑎᓄᑦ ᐃᓕᓐᓂᐊᖅᑎᓄᓪᓗ ᖃᐅᔨᕙᓪᓕᐊᔭᖓᓄᑦ. 

ᐅᖃᐅᔾᔪᐃᓂᖓ ᐊᓯᒥᓄᑦ ᐃᓱᒪᒋᔭᖃᖅᑐᓄᑦ ᑕᒪᑐᒥᖓ ᐱᓕᕆᐊᒃᓴᒥᒃ, "ᑕᒪᓐᓇ ᐱᓕᕆᐊᕆᓪᓚᕆᓕᖅᖢᒍ. ᖃᐅᔨᒪᓚᐅᖏᑦᑐᖓ ᖃᓄᐃᓕᐅᕐᓂᐊᕐᒪᖔᕐᒪ. ᔭᒐᑦᑐᐹᓘᕋᑖᕋᒪ. ᑭᓯᐊᓂ ᐅᐸᑐᐊᕋᒪ ᓄᓇᕗᑦ ᓯᑰᓴᒧᑦ, ᓇᒻᒥᓂᖅ ᖃᐅᔨᓚᐅᖅᑐᖓ. ᑲᑎᖃᑎᖃᖃᑦᑕᓚᐅᖅᑐᖓ ᐊᒥᓱᓂᒃ ᒪᒃᑯᒃᑐᓂᒃ ᐅᕙᖓᑎᑐᑦ. ᐊᑏᒎᖅ. ᖃᑕᙳᑎᒃᑲᓐᓂᐅᖅᑰᔨᓚᐅᖅᑐᖓ, ᐅᖃᕋᔭᖅᐳᖓ."

ᐃᓚᖓᑦ ᐊᕝᕕᐊᕈᑎᒋᓂᖅᐹᖓ ᐊᖏᕐᕋᖅᓯᓇᕐᓂᖓ. ᐊᖓᔪᖅᑳᖏᒃ ᐅᖓᓯᓗᐊᖏᒃᑲᓗᐊᖅᑎᓪᓗᒋᑦ, ᓱᓕ ᑭᖑᓂᖃᓈᖅᓯᓚᐅᖅᑐᖅ. ᑲᑎᖃᑎᖃᕐᓂᖅ ᐊᓯᒥᓂᒃ ᐃᓄᖕᓂᒃ ᓱᒃᑲᓕᓂᖅᓴᐅᓚᐅᖅᐳᖅ ᐃᑲᔪᖅᖢᓂᓗ ᐊᒥᓱᓂᒃ ᐃᖅᑲᐅᒪᔭᒥᓂᒃ. ᐃᓚᒥᓄᑦ ᐅᖄᓚᔪᓐᓇᖅᓯᓚᐅᖅᑐᖅ, ᐱᓱᔪᒃᖢᓂ, ᐅᕕᓂᖕᓂᐊᖅᖢᓂ ᐅᐃᒪᙱᖦᖢᓂᓗ ᐃᑲᔪᖅᑕᐅᓪᓗᓂ, ᐃᓱᒪᒥᒍᓪᓗ ᖃᓄᐃᙱᑦᑎᐊᖏᓐᓇᕋᓱᒃᖢᓂ. 

ᒪᒃᑯᖕᓂᖅᓴᓂᒃ ᐅᖃᐅᔾᔪᐃᔪᓐᓇᕈᓂ ᐃᒪᐃᒃᑲᔭᖅᑐᖅ, "ᐃᓱᒪᑐᔫᖏᓐᓇᕐᓗᓂ. ᑕᐃᒪᐃᓕᐅᖏᓐᓇᕐᓗᑎᑦ, ᐃᑲᔪᕐᓂᖃᖅᑐᖅ ᓯᕗᓂᒃᓴᑦᑎᓐᓂ. ᐊᔪᙱᑦᑐᑎᑦ. ᐊᔾᔨᐅᙱᑦᑑᓪᓗᓂ." ᐊᓈᓇᖓ ᐃᓛᓐᓂᒃᑯᑦ ᓱᐊᒃᓯᕙᓚᐅᖅᑐᖅ ᐊᔾᔨᐅᖏᑦᑐᓂᒃ ᐱᓕᕆᑎᓪᓗᒍ ᐊᒻᒪᓗ ᑎᓕᐅᕆᔪᒪᑐᐃᓐᓇᖅᑐᓂ ᓄᑲᖅᑎᒥᓂᒃ ᐃᒻᒥᓂᒃ ᑐᒥᖓᓃᒻᒪᑦ ᐊᒻᒪᓗ ᑲᔪᓯᓗᓂ ᐱᔪᒪᔭᒥᓂᒃ. 

ᐃᓄᒃᑎᑐᑦ ᐊᑎᖃᖅᑐᓂ ᑐᓗᒐᖅ ᐊᒻᒪᓗ ᐱᓕᕆᐊᖅ ᐱᕕᖃᑦᑎᑦᑎᓯᒪᔪᖅ ᕿᒥᕐᕈᒍᓐᓇᓂᕐᒥᒃ ᐃᓕᖅᑯᓯᒥᓂᒃ, ᓕᐊᓐ ᑖᒻᓴᓐ ᑐᓂᐅᖅᑲᐃᒍᓐᓇᖅᓯᒪᔪᖅ ᐃᓴᕈᖏᓐᓂᒃ ᐊᒻᒪᓗ ᖃᖓᑕᓪᓗᓂ. ᐅᑭᐅᖅᑕᖅᑐᒥᒃ ᐱᕈᖅᓴᓯᒪᔪᖅ, ᐊᖏᕐᕋᕈᓐᓇᖅᓯᓯᒪᔪᖅ ᓄᑖᒧᑦ ᓄᓇᓕᒻᒧᑦ ᐱᖅᑯᓯᕐᒥᓂᒃ ᑲᑐᔾᔨᓪᓗᓂ. ᓴᐅᓂᖅ ᐸᒥᐅᕐᔪᐊᖅ ᐱᕕᖃᒃᑲᓐᓂᓕᓚᐅᖅᑐᖅ ᐃᓅᓯᖓᓂ, ᓄᓇᕗᑦ ᓯᕗᓂᒃᓴᕗᒃᑯᓪᓗ ᐱᕕᖃᒃᑲᓐᓂᓕᓚᐅᖅᑐᖅ ᐃᓅᓪᓗᓂ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.