ᐱᕐᔪᐊᕌᓗᖕᒥ ᐱᕐᕈᓗᐊᕿᓂᖅ ᓯᓐᓇᒃᑑᒪᔭᖏᓐᓂᒃ ᑲᑕᒃᑎᑦᑎᑲᓴᓚᐅᖅᐳᖅ, ᑭᓯᐊᓂ ᐱᓇᔪᓪᓚᕆᒍᒪᓂᖓ ᐊᒻᒪ ᓴᙱᔪᒥᒃ ᐃᑲᔪᖅᑐᐃᖃᑎᒌᒍᓯᕐᒥᒃ ᐃᓚᓕᐅᔾᔨᓚᐅᖅᐳᑦ ᓯᕗᓂᒃᓴᑦᑎᐊᕙᖕᒧᑦ ᓵᑕᖅᑕᐅᓯᒪᔪᒧᑦ ᒐᕙᒪᒃᑯᑦ ᑮᓇᐅᔭᓕᕆᔨᖏᓐᓄᑦ ᑯᕆᔅᑎᐊᓐ ᑑᐱᓐᒧᑦ. ᓄᓇᓕᕋᓛᒥᐅᑕᖅ ᓴᐃᓐᑦ ᒃᓘᑦ, ᒫᓂᑑᕙᒥ, ᐅᐊᓂᐸᐃᒡ ᖃᓂᒋᔮᓂ ᓯᓚᑦᑐᓴᕐᕕᕐᔪᐊᕐᒨᓚᐅᕐᒪᑦ ᓇᒻᒥᓂᖃᕐᓂᕐᒧᑦ ᐃᓕᑕᕆᔭᐅᔾᔪᑎᑖᕆᐊᖅᑐᖅᑐᓂ ᑮᓇᐅᔭᓕᕆᔪᒻᒪᕆᐅᓪᓗᓂ. ᒫᓐᓇ ᐃᖅᑲᓇᐃᔭᓕᖅᑐᖅ MNP−ᒥ ᖁᕕᐊᒋᓪᓗᓂᐅᒡᓗ.. 

ᐱᕈᖅᓴᓪᓗᓂ, ᖃᐅᔨᒪᓚᐅᖅᑐᖅ ᓇᖕᒥᓂᖃᕈᒪᓂᕐᒥᓂᒃ, ᐃᓱᒪᔪᒪᓪᓗᓂ ᓯᓚᑖᓂ ᕿᑐᑦᑐᒐᐅᔭᐅᑉ ᐊᒻᒪᓗ ᖃᓄᐃᓕᐅᕐᓗᓂ ᓈᓴᐅᑎᓄᑦ ᑭᓯᐊᓂ ᓂᕆᐅᓚᐅᙱᑦᑐᖅ ᑮᓇᐅᔭᓕᕆᔨᙳᕐᓂᐊᕆᐊᒃᓴᖅ ᐊᒻᒪᓗ ᐃᓕᓐᓂᐊᕐᓗᓂ 7-ᓂᒃ ᐊᕐᕌᒍᓂᒃ ᖁᑦᑎᖕᓂᖅᓴᒥᒃ ᐃᓕᓐᓂᐊᓚᐅᖅᑎᓪᓗᒍ. ᐊᑖᑕᖓ ᓇᒻᒥᓂᖁᑎᖃᓚᐅᕐᒪᑦ ᐊᒻᒪᓗ ᑲᔪᖏᖅᓴᖅᑕᐅᓪᓗᓂ. ᓯᓚᑦᑐᖅᓴᕐᕕᔾᔪᐊᕐᒥ, ᐃᖅᑲᓇᐃᔭᖃᑎᖃᓚᐅᖅᑐᖅ ᑮᓇᐅᔭᒃᑯᕕᒻᒥᒃ ᑮᓇᐅᔭᓕᕆᓂᕐᒧᑦ ᖃᐅᔨᒪᓕᕋᓱᐊᖅᑐᓂ ᐊᒻᒪᓗ ᒫᓐᓇᐅᔪᖅ ᐃᖅᑲᓇᐃᔭᖅᕕᒋᔭᖓᓄᑦ ᐊᐅᔭᒧᑦ. 

ᓇᒻᒥᓂᖅ ᓇᓂᓯᓚᐅᖅᑐᖅ ᑮᓇᐅᔭᓕᕆᓂᕐᒥᒃ ᐊᒻᒪᓗ ᖁᕕᐊᒋᒻᒪᕆᑦᑕᖓ ᐱᓕᕆᐊᖓ. ᐱᔭᕇᕋᒥ, ᐃᓕᓐᓂᐊᓚᐅᖅᑐᖅ ᒪᕐᕈᑲᓐᓃᓐᓂᒃ ᐊᒻᒪᓗ ᐊᕝᕙᖓᓂᒃ ᐊᕐᕌᒎᓐᓂᒃ ᐊᒻᒪᓗ ᑎᑎᕋᖅᑐᓂ ᖃᐅᔨᓴᖅᑕᐅᓂᕐᒥᓂᒃ ᑎᒃᑯᐊᖅᑕᐅᓂᖓᓄᑦ. ᓱᓕ ᐃᖅᑲᓇᐃᔭᖅᖢᓂ ᐃᓕᓐᓂᐊᖅᐳᖅ, ᖃᓄᐃᓕᐅᖅᐸᖕᒪᖔᑦ ᐊᒻᒪ ᐊᓯᔾᔨᖅᐸᓪᓕᐊᖕᒪᖔᑦ. 

ᓯᓐᓇᑦᑑᒪᒋᔭᒥᓄᑦ ᐃᖏᕐᕋᓂᕆᔭᖓᑦ ᐊᕗᖔᕈᑎᖃᓚᐅᖅᐳᖅ. ᐅᑭᐊᒃᓵᖑᑎᓪᓗᒍ ᐃᓕᓐᓂᐊᖅᑎᓪᓗᒍ ᐊᕐᕌᓂ ᓯᓚᑦᑐᖅᓴᕐᕕᒡᔪᐊᒥ, ᑕᐃᓐᓇ ᐱᖃᓐᓇᕆᔭᖏᓪᓗ ᐱᕐᕈᓗᐊᕿᓪᓗᑎᒃ ᐊᖑᓇᓱᒋᐊᖅᓯᒪᑎᓪᓗᒋᑦ. ᐱᓇᓱᐊᕈᓯᓕᒫᒥᑦ ᐃᖅᑲᐅᒪᔪᓐᓃᓚᐅᖅᑐᖅ ᐱᖃᓐᓇᕆᔭᖏᓪᓗ ᐃᑲᔪᕈᓐᓇᓚᐅᕐᖢᓂᒋᑦ. ᐋᓐᓂᐊᕕᒻᒨᕈᔾᔭᐅᓚᐅᖅᐳᑦ ᖃᖓᑕᓲᒃᑯᑦ ᑐᐊᕕᕐᓇᖅᑐᒃᑯᑦ ᐊᒻᒪ ᐋᓐᓂᖅᓯᒪᓂᖓᓄᑦ ᐊᒻᒪ ᖃᓄᐃᒍᓐᓃᕐᓂᖓᓄᑦ ᓄᖅᑲᖓᑲᐃᓐᓇᕆᐊᖃᓚᐅᕐᒪᑦ. 

ᑑᐱᓐ ᐃᖅᑲᐅᒪᔪᖅ ᐋᓐᓂᐊᕕᒻᒨᓚᐅᕐᒪᑦ ᐊᒻᒪᓗ ᖃᐅᔨᓇᓱᐊᖅᑐᓂ ᖃᓄᖅ ᐅᑎᕐᓂᐊᕐᒪᖔᖅ ᐃᓕᓐᓂᐊᖅᑕᖏᓐᓄᑦ ᐊᒻᒪᓗ ᑐᕌᕋᓱᐊᖏᓐᓇᖅᑐᓂ. ᓯᕗᓪᓕᖅᐹᒥ ᑎᓕᓯᔾᔪᑎᖓ ᖃᓄᐃᑦᑐᓐᓃᖅᐸᓪᓕᐊᑦᑕᐅᑎᒋᓚᐅᖅᑐᖅ ᐋᓐᓂᐊᕕᒻᒥ ᐊᓂᒍᓐᓇᖁᓪᓗᒍ. ᐱᓇᓱᐊᕈᓯᑦ ᖃᔅᓯᐊᕐᔪᐃᑦ ᐃᓗᐊᓂ ᐊᓯᐊᓄᑦ ᐋᓐᓂᐊᕕᖕᒧᐊᖅᑕᐅᓚᐅᖅᐳᖅ ᖃᕋᓴᒃᑯᑦ ᐋᓐᓂᖅᓯᒪᓪᓗᓂ. ᐊᒥᓲᓚᐅᖏᑦᑐᑦ ᐃᓂᐅᔪᑦ ᐊᒻᒪᓗ ᐱᔪᓐᓇᑦᑎᐊᓚᐅᖅᑐᖅ ᐃᓕᓐᓂᐊᕐᕋᔅᓴᒧᑦ.

ᐱᓇᓱᐊᕈᓯᕐᓄᑦ ᑎᓴᒪᓄᑦ ᖃᐅᑕᒫᑦ ᐃᓅᓕᓴᖃᑦᑕᓚᐅᖅᑐᖅ ᐃᒻᒥᓂᒃ ᐅᑎᕋᓱᒃᓗᓂ ᑎᒥᒃᑯᑦ, ᐃᓱᒪᒃᑯᑦ ᐃᒃᐱᖕᓂᐊᓂᒃᑯᓪᓗ. ᐊᓂᑎᑕᐅᓚᐅᖅᑎᓪᓗᒍ, ᖃᐅᔨᓴᓚᐅᖅᑐᖅ ᐊᒻᒪᓗ ᐊᓂᑎᑕᐅᓪᓗᓂ ᑲᔪᓯᓂᐊᕐᓗᓂ ᐃᓕᓐᓂᐊᖅᑕᒥᓂᒃ. ᐊᐅᔭᒃᑯᑦ ᐃᓕᓐᓂᐊᖅᑐᓂ, ᐊᖑᒻᒪᑦᑎᒍᓐᓇᓚᐅᖅᑐᖅ ᐃᓕᓐᓂᐊᕐᕕᒻᒥ.  

ᐱᕐᕈᓗᐊᕿᓂᐅᓚᐅᖅᑐᖅ ᕿᒪᒃᓯᓪᓗᓂ ᑭᔾᔭᖅᓯᓪᓗᓂ, ᕿᑦᑕᐃᖓᓪᓗᓂ ᐊᒻᒪ ᕿᓕᖅᓯᓇᖅᖢᓂ. ᖁᐊᖅᓵᖅᓇᖅᑐᒃᑰᓚᐅᖅᑐᖅ ᖃᕆᓴᖓᒍᑦ ᐊᒻᒪ C2−ᒥᑦ ᕿᒥᕐᓗᒃᑯᑦ ᓱᕋᐃᓪᓗᓂ, ᓂᐊᖁᖓ ᕿᒥᕐᓗᒻᒧᑦ ᐊᒃᑐᐊᓪᓗᓂ. ᑑᐱᓐ ᐱᓚᑦᑕᐅᓚᐅᖅᑐᖅ ᕿᒥᕐᓗᖓᒍᑦ ᐊᒻᒪᓗ ᐃᓚᖓᑦ ᐊᒃᓱᕈᕈᑎᒋᓚᐅᖅᑕᖓᑦ ᒪᒥᒐᓱᐊᖅᑐᓂ ᐅᖃᐅᓯᑦᑎᐊᕙᐅᔪᓂᒃ ᓇᓂᓯᓇᓱᐊᖅᑐᓂ ᑭᓱᑐᐃᓐᓇᕐᒧᑦ. ᐃᓚᖏᑦ ᐊᖅᑯᑎᑦ ᖃᕋᓴᖓᓂ ᐋᖅᑭᒃᑕᐅᒃᑲᓐᓂᕆᐊᖃᓚᐅᖅᑐᑦ ᑭᓯᐊᓂ ᐋᓐᓂᕐᔪᐊᖅᓯᒪᓚᐅᙱᑦᑐᖅ. 

ᐱᖃᓐᓇᕆᔭᑦ, ᖃᑕᙳᑎᒌᑦ, ᐱᙳᐊᖅᑎᑦ ᐊᒻᒪ ᐃᓱᒪᓕᕆᔨᒻᒪᕇᑦ ᐃᑲᔪᓚᐅᖅᐳᑦ ᐃᓕᓐᓂᐊᕐᕕᒃᑯᑦ. ᐊᔾᔨᒋᓐᖏᑕᖓᓂᒃ ᑲᒪᒋᔭᐅᔪᒪᓚᐅᙱᒻᒪᑦ ᐊᓯᖏᓐᓂᒃ ᐃᓕᓐᓂᐊᖅᑎᐅᔪᓂᒃ ᐊᒻᒪᓗ ᐃᓕᒋᐊᖃᓚᐅᖅᑐᖅ ᖃᓄᖅ ᓱᖏᐅᑎᔪᓐᓇᕐᓂᕐᒥᓂᒃ ᐋᓐᓂᓚᐅᖅᑎᓪᓗᒍ. ᐃᓱᒪᖓ ᐊᓯᔾᔨᓚᐅᖅᑐᖅ ᑐᐊᕕᐃᓐᓇᖅᖢᓂ ᐅᑎᕆᐊᒃᑲᓐᓂᖅᖢᓂ, ᐃᓱᒪᓕᕐᖢᓂ ᖃᓄᖅ ᐱᐅᔪᓐᓃᒃᑲᓐᓂᕈᓐᓇᖕᒪᖔᑦ. ᑑᐱᓐ ᕿᒪᒃᑕᐅᓚᐅᖅᑐᖅ ᖁᔭᓕᓪᓗᓂ, ᐆᒪᑦᑎᐊᖅᑰᔨᓪᓗᓂ ᐅᑎᕈᒪᓪᓗᓂᓗ.

"ᐃᓚᒋᔭᐅᔪᒪᓇᔭᖅᐳᖓ ᑕᒪᒃᑯᓄᖓ ᑕᑯᒃᓴᐅᑎᑦᑎᔪᓄᑦ ᐃᓕᓐᓂᐊᖅᑎᓂᒃ ᑭᓇᑐᐃᓐᓇᑦᑎᐊᒥᒡᓘᓐᓃᑦ ᐊᒃᓱᕈᕐᓇᖅᑐᒃᑰᑐᐃᓐᓇᕆᐊᓕᖕᓂᒃ, ᐊᖅᑯᑎᖃᐃᓐᓇᐅᔭᖅᑐᒥᒃ," ᑕᐃᒪᓐᓇ ᐅᖃᖅᖢᓂ. ᖁᕕᐊᒋᔭᖃᖅᑐᖅ ᐃᓚᒋᔭᐅᓂᕐᒥᑦ ᓴᖅᑭᔮᖅᑎᑦᓯᓂᕐᒧᑦ ᖃᓄᐃᓕᐅᕐᓂᐅᔪᓄᓪᓗ ᖃᖓᑕᔫᒃᑯᑦ ᑐᐊᕕᕐᓇᖅᑐᓕᕆᓂᕐᒧᑦ ᐃᑲᔪᓚᐅᖅᑐᖅ ᐃᓅᒍᓐᓇᕐᓂᖓᓄᑦ. ᐱᖃᓐᓇᕆᔭᖏᑦ ᐋᓐᓂᙱᓐᓂᖅᓴᐅᓚᐅᖅᑐᑦ ᑲᑎᙵᔪᓪᓗ ᖁᕕᐊᓱᖃᑎᒌᒃᖢᑎᒃ. 

ᐱᖃᓐᓇᕆᔭᒥᓂᒃ ᐱᖃᑎᖃᕆᐊᒃᓴᖅ ᖁᕕᐊᒋᔭᓕᒃ ᐊᒻᒪ ᐃᖅᑲᓇᐃᔮᒥᓂᒃ ᖁᕕᐊᒋᓪᓗᓂᐅᒃ. ᖁᕕᐊᒋᔭᓕᒃ ᐱᓕᕆᖃᑎᖃᕆᐊᒃᓴᖅ ᐊᔾᔨᒌᖏᑦᑐᓂᒃ ᑲᒪᒋᔭᖏᓐᓂ ᐱᓯᓂᓯᓂᒃᓗ ᐃᑲᔪᕐᓗᒋᓪᓗ ᐱᓕᕆᑎᓪᓗᒋᑦ ᑐᕌᕆᔭᖏᓐᓄᑦ. ᕿᒥᕐᕈᓪᓗᓂ ᑮᓇᐅᔭᓕᕆᓂᕐᒧᑦ ᑎᑎᕋᖅᓯᒪᔪᓂᒃ ᑭᖑᓂᑦᑎᓐᓂ, ᐊᐅᓚᓂᖃᖅᑐᖅ ᓇᒻᒥᓂᖃᕐᓂᕐᒧᑦ ᐅᖃᐅᔾᔨᒋᐊᖅᑎᐅᓪᓗᓂ, ᐱᓕᕆᖃᑎᖃᖅᑐᓂ ᑖᒃᑯᓂᖓ ᑲᔪᓯᑦᑎᐊᖁᓪᓗᒋᑦ ᐊᒻᒪᓗ ᐱᐅᓂᖅᐹᓂᒃ ᓂᕈᐊᖃᑦᑕᕐᓗᓂ. ᓈᓴᐅᑎᑐᐃᓐᓇᐃᑦ ᐅᖓᑖᓄᑦ, ᓴᙱᔪᒥᒃ ᑕᐅᑐᒐᖃᓪᓗᐊᑕᖅᐳᑦ ᐃᓅᖃᑎᒌᖕᓂᕐᓂᒃ ᐱᔭᕆᐊᖃᕐᓂᕐᒥᒡᓗ ᐱᓕᕆᔨᓪᓚᕆᐅᓂᕐᒧᑦ ᐊᑕᓂᕆᔭᐅᔪᓂᒃ. 

ᓯᕗᒧᑦ ᑕᐅᑐᒃᖢᓂ, ᐱᓕᕆᔪᒪᖕᒪᑦ ᑮᓇᐅᔭᓕᕆᔨᖁᑎᒥᓂᒃ ᐊᒻᒪᓗ ᕿᒥᕐᕈᓗᓂ ᐱᕕᒃᓴᐅᔪᓗᒃᑖᓂᒃ ᐱᕈᕐᓂᕐᒧᑦ ᐱᓕᕆᕝᕕᖕᒥᓂ. ᐱᓕᕆᖃᑕᐅᖏᓐᓇᕈᒪᔪᖅ ᓄᓇᓕᖕᓂ, ᐊᑭᓕᖅᓱᖅᑕᐅᙱᖦᖢᓂ ᐱᓕᕆᕙᒃᖢᓂ ᐊᒻᒪ ᓄᓇᒥᓄᑦ ᐅᑎᖅᑎᖦᖢᓂᒋᑦ ᐃᑲᔪᖃᑦᑕᖅᖢᓂᓗ ᐅᔾᔨᕆᔭᐅᓕᖅᑎᓐᓇᓱᒃᖢᒋᑦ ᐱᕈᖅᐸᓪᓕᐊᔪᓐᓇᕐᓂᐊᕐᒪᑕ. 

ᐱᕐᓗᐊᕿᔪᖃᒻᒪᕆᓚᐅᕋᓗᐊᖅᑎᓪᓗᒍ ᓯᓐᓇᑦᑑᒪᒋᓚᐅᖅᑕᒥᓂᒃ, ᓵᑕᖅᓯᓯᒪᔪᖅ ᑭᒃᑯᑐᐃᓐᓇᕐᓄᑦ ᑮᓇᐅᔭᓕᕆᔨᒥᒃ ᑯᕆᔅᑎᐊᓐ ᑑᐱᓐ ᓯᕗᓂᑦᓴᑎᓐᓂᒃ ᑕᐅᑐᒻᒪᑦ, ᓇᒻᒥᓂᕆᓐᖏᑕᒥᓂᒃ ᑭᓯᐊᓂ ᐱᕈᕐᕕᒋᓚᐅᖅᑕᖓᓂ.  ᐱᔪᒪᓂᖃᑦᑎᐊᕐᖢᓂ ᓴᙱᔪᒥᒃᓗ ᐃᑲᔪᖅᓱᐃᖃᑎᒌᖕᓂᕐᒥᒃ, ᓂᕆᐅᒃᑐᖅ ᑕᒪᒃᑭᕐᓗᓂ ᑲᑎᒍᑎᓗᓂ ᓯᕗᓂᒃᓴᑦᑎᐊᕙᖕᒧᑦ ᑭᒃᑯᑐᐃᓐᓇᕐᓄᑦ ᓄᓇᓕᖓᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.