ᐃᓕᓴᐃᔨᐅᖃᑦᑕᓚᐅᖅᓯᒪᓪᓗᓂ ᐅᖃᓕᒫᒐᕐᓂᒃ ᐊᒻᒪ ᒫᓐᓇ ᑎᑎᕋᖅᐸᓕᖅᖢᓂᒋᑦ, ᓕᐅᓇ ᐳᕆᓐᔅ ᐃᓚᒋᔭᐅᕗᖅ Lake Babine Nation-ᑯᓐᓄᑦ ᓄᓇᖃᖅᖢᓂ Burns Lake-ᒥ. ᐱᖓᓱᓂᒃ ᕿᑐᕐᖓᓕᒃ. ᐊᖓᔪᒃᖠᖅᐹᖓ ᓴᓇᙳᐊᖅᑎᐅᓪᓗᓂ ᑐᕆᕗᕆᔅᒥᐅᑕᐅᓪᓗᓂ, ᕿᑎᐊᓃᑦᑐᖅ ᕿᑐᕐᖓᖓ ᓄᓇᖃᖅᑳᖅᑐᒥ ᐃᓕᓐᓂᐊᕐᓂᓕᕆᔨᐅᓪᓗᓂ ᐳᕆᓐᔅ ᔪᐊᔾᒥ ᐊᒻᒪ ᓄᑲᖅᖠᖅᐹᖓ ᖁᑦᑎᖕᓂᓕᖕᒥ 12-ᒦᖦᖢᓂ. ᓇᖕᒥᓂᖅ ᐃᖅᑲᓇᐃᔮᖓᓄᓪᓕ, ᐃᓕᓐᓂᐊᖅᓯᒪᔪᖅ ᐃᓕᓴᐃᔨᐅᓪᓗᓂ ᒫᓐᓇ ᑐᑭᒧᐊᖅᑎᑦᑎᔨᐅᓕᖅᑐᖅ ᐃᓕᓐᓂᐊᖅᑎᑦᑎᔨᓄᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᖏᓐᓄᑦ ᐃᓕᓐᓂᐊᕐᕕᖕᒧᑦ 91 ᓇᑲᑯ ᑕᓯᖏᓐᓄᑦ. 

ᐃᓅᓚᐅᖅᓯᒪᔪᖅ ᐳᕆᓐᔅ ᔪᐊᔾᒥ ᐱᕈᖅᓴᔭᐅᓪᓗᓂᓗ ᓄᓇᒥᓂ, ᐃᓚᒌᑦ ᓅᓚᐅᖅᓯᒪᕗᑦ ᐃᐊᑦᒪᓐᑕᓐᒧᑦ 9-ᓂᒃ ᐅᑭᐅᖃᓕᖅᑎᓪᓗᒍ. 13-ᓂᒃ ᐅᑭᐅᖃᓕᖅᖢᓂ, ᐊᖓᔪᖅᑳᖏᒃ ᐊᕕᓚᐅᖅᓯᒪᔫᒃ ᓅᖦᖢᓂᓗ ᐴᓐᔅ ᑕᓯᕐᒧᑦ. ᐊᓈᓇᖓ ᑲᑎᑎᑕᐅᓚᐅᖅᓯᒪᕗᖅ Lake Babine Nation-ᒥᐅᑕᒥᒃ ᐃᓚᒋᔭᐅᔾᔪᑎᖓᓗ ᓅᑕᐅᓪᓗᓂ ᑕᐃᑯᖓ. ᐊᑖᑕᒃᓴᖓ ᐊᖓᔪᖅᑳᙳᓚᐅᖅᐳᖅ. ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᓯᒪᔪᖅ ᐳᕆᑎᔅ ᑲᓚᒻᐱᐊᒥ ᐳᕆᓐᔅ ᔪᐊᔾᒥ ᓯᓚᑦᑐᖅᓴᕐᕕᒡᔪᐊᕐᒥ ᐳᕆᑎᔅ ᔪᐊᔾᒥ ᐊᒻᒪ ᐃᓕᑕᕆᔭᐅᔾᔪᑎᑖᖅᖢᓂ ᒪᕐᕉᓕᖅᑲᖓᓪᓗᓂ ᐃᓕᓐᓂᐊᖅᑕᒥᓄᑦ, ᖃᐅᔨᓴᖅᑐᓕᕆᓂᕐᒥᒃ ᐃᖃᓗᓕᕆᓂᕐᒧᑦ ᐊᒻᒪ ᐃᓕᑕᕆᔭᐅᔾᔪᑎᑖᖅᖢᓂ ᓄᓇᖃᖅᑳᖅᓯᒪᔪᑦ ᖃᐅᔨᓴᕈᓯᖏᓐᓂᒃ. ᐊᐅᔭᒃᑯᑦ ᐃᖅᑲᓇᐃᔭᖃᑦᑕᓚᐅᖅᑐᖅ ᐃᖃᓗᓕᕆᔨᒃᑯᓐᓂ ᓄᓇᓕᕐᔪᐊᒥᓄᑦ. 

ᐅᐃᖓ ᓇᐹᖅᑐᓕᕆᓂᕐᒥ ᐃᖅᑲᓇᐃᔭᖅᖢᓂ ᐊᒻᒪ ᐃᖃᓗᓕᕆᕝᕕᖕᒥ ᐃᖅᑲᓇᐃᔭᖅᖢᓂ, ᑕᒪᕐᒥᒃ ᐊᐅᓪᓚᖅᓯᒪᔪᓐᓇᓚᐅᙱᓚᑦ ᕿᑐᕐᙵᖃᕋᒥᒃ. ᐃᓕᓐᓂᐊᒃᑲᓐᓂᓕᓚᐅᖅᐳᖅ ᐃᓕᓐᓂᐊᒃᑲᓐᓂᕐᓂᕐᒧᑦ ᐃᓕᓐᓂᐊᕐᓂᓕᕆᓂᕐᒥᒃ ᐃᓕᓴᐃᔨᙳᕆᐅᖅᓴᓪᓗᓂ, ᑕᒪᓐᓇᓗ ᑕᐃᒪᐃᑐᐃᓐᓇᓕᓚᐅᖅᓯᒪᓪᓗᓂ ᐱᕈᖅᓴᓪᓗᓂ ᖃᑕᙳᑎᖏᑦ ᐱᙳᐊᖃᑎᒋᕙᒃᖢᓂᒋᑦ.  ᐃᓕᓐᓂᐊᓚᐅᖅᓯᒪᔪᖅ ᐃᓕᓐᓂᐊᕐᕕᐊᓗᖕᒥ ᖃᐅᔨᓴᖅᑐᓕᕆᓂᕐᒥᒃ, ᓈᓴᐅᓯᕆᓂᕐᒥᒃ ᐊᒻᒪ ᓄᓇᖃᖅᑳᖅᑐᓂᒃ ᖃᐅᔨᓴᕐᓂᕐᒥᒃ ᐃᓕᓴᐃᔨᐅᓂᕐᒥᒃ. ᖃᐅᔨᑲᐅᑎᒋᓚᐅᖅᐳᖅ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᓈᒻᒪᙱᓐᓂᖓᓂ ᐊᒻᒪ ᓅᖦᖢᓂ ᐃᓕᓴᐃᔨᐅᓂᕐᒧᑦ ᓄᑲᖅᖡᑦ ᐃᓕᓐᓂᐊᕐᕕᖓᓂ. ᐃᓕᓴᐃᔨᐅᓚᐅᖅᓯᒪᕗᖅ ᓄᓇᖃᖅᑳᖅᑐᑦ ᓂᕈᐊᕆᔭᖏᓐᓄᑦ ᐃᓕᓐᓂᐊᕐᕕᖕᒥ ᐳᕆᓐᔅ ᔪᐊᔾᒥ, ᑭᖑᓂᐊᒍᓪᓗ ᐊᒡᓚᕝᕕᓕᕆᔨᙳᖅᖢᓂ ᐃᓕᓴᐃᔨᓄᑦ ᐊᖓᔪᖅᑳᒧᑦ ᑐᒡᓕᕆᔭᐅᓪᓗᓂ. ᑭᖑᓂᐊᒍᑦ, ᐃᓚᒌᑦ ᓅᓕᓚᐅᖅᓯᒪᕗᑦ ᐴᓐᔅ ᑕᓯᕐᒧᑦ ᐱᓕᕆᐊᖃᓕᖅᖢᓂ ᐊᕕᒃᓯᒪᓂᕐᒥ ᐊᖓᔪᖅᑳᒧᑦ ᑐᒡᓕᕆᔭᐅᓕᖅᖢᓂ ᓄᓇᖃᖅᑳᖅᑐᓄᑦ ᐃᓕᓐᓂᐊᕐᓂᓕᕆᓂᕐᒧᑦ, ᑭᖑᓂᐊᒍᓪᓗ ᐊᕕᒃᓯᒪᓂᕐᒥ ᐊᖓᔪᖅᑳᕆᔭᐅᓕᖅᖢᓂ ᒫᓐᓇᓗ ᑐᑭᒧᐊᖅᑎᑦᑎᔨᒋᔭᐅᓕᖅᖢᓂ. ᖃᖓᑦᑎᐊᓵᖅ, ᐊᕐᕌᒍᒧᑦ ᐊᑕᐅᓯᕐᒧᑦ ᐱᓕᕆᐊᒃᓴᖃᓚᐅᖅᐳᖅ ᐊᖓᔪᖅᑳᒻᒪᕆᐅᑉ ᐃᑲᔪᖅᑎᒋᓪᓗᓂᐅᒃ ᓄᓇᖃᖅᑳᖅᑐᑦ ᐃᓕᓐᓂᐊᕐᓂᓕᕆᔨᖏᓐᓄᑦ ᐊᕕᒃᓯᒪᓂᖓᓂ ᐳᕆᑎᔅ ᑲᓚᒻᐱᐊ, ᑭᓯᐊᓂ ᑕᐃᒪᙵᓂᑦ ᐃᖅᑲᓇᐃᔮᒥᓄᑦ ᐅᑎᖅᓯᒪᓕᖅᐳᖅ.

ᐃᓚᖓᑦ ᐊᕝᕕᐊᕈᑕᐅᕙᒃᑐᖅ ᓵᙵᔭᖓ ᐱᑐᐃᓐᓇᐅᙱᑦᑐᒃᑯᑦ ᖁᐊᖅᓵᖅᓯᒪᓂᖅ. ᐊᓯᐊᑦᑕᐅᖅ ᐊᒃᓱᕈᕐᓇᖅᑐᖅ ᓵᙵᔭᖓ ᒪᒃᑯᒃᑑᓪᓗᓂ ᐊᐃᑉᐸᖃᕐᓂᖅ ᑭᓇᒥᑭᐊᖅ ᐃᓐᓇᐅᓗᐊᓕᖅᑐᒥᒃ ᑖᔅᓱᒧᖓ. ᑐᓴᖅᑎᑦᑎᔪᒪᔪᖅ ᐊᑐᖅᓯᒪᔭᒥᓂᒃ ᐃᒪᓐᓇᐅᕗᖅ, "ᑕᒪᑦᑕ ᓄᓇᖃᖅᑳᖅᓯᒪᓪᓗᑕ, ᓴᐱᓕᖅᓴᕋᐃᙱᖦᖢᑕ ᐊᔪᙱᑦᑐᒻᒪᕆᐊᓘᓪᓗᑕᓗ, ᑕᒪᐃᓐᓄᓪᓗ ᐊᒃᑐᖅᓯᖁᕙᒃᑲ, ᓲᖃᐃᒻᒪ ᑭᓱᑐᐃᓐᓇᑦᑎᐊᓂᒃ ᐊᓂᒍᐃᔪᓐᓇᕋᑦᑕ, ᓴᙱᓂᖃᕐᓗᑕ ᓯᕗᓕᕆᓚᐅᖅᑕᑦᑕ ᓯᕗᕚᑦᑎᓐᓂ ᐊᓐᓇᐅᒪᓚᐅᖅᑐᓂᒃ, ᐅᓪᓗᒥ ᑕᒫᓃᑦᑐᓐᓇᕐᓂᐊᕋᑦᑕ." 

ᐃᓱᒪᒥᒍᑦ ᖃᓄᐃᙱᑦᑎᐊᕈᒪᓪᓗᓂ, ᐳᕆᓐᔅ ᓄᓇᒧᑦ ᑲᑎᙵᖃᑎᖃᐃᓐᓇᖅᐸᒃᐳᖅ ᐊᖑᓇᓱᒃᐸᒃᖢᓂ ᐅᐃᒥᓂᒃ. ᖁᕕᐊᒋᔭᖃᕐᒥᔪᖅ ᒥᖅᓱᕐᓂᕐᒥᒃ ᓴᐸᖓᓕᕆᓂᕐᒥᒡᓗ, ᐊᒻᒪᓗᑦᑕᐅᖅ ᑎᑎᕋᕐᓂᕐᒥᒃ ᐅᑭᐅᒃᑯᑦ. ᐃᒪᓐᓇᐅᖁᔨᕗᖅ, ᐃᓕᑦᑎᕙᓪᓕᐊᓂᕐᒥᒃ ᐃᓕᓐᓂᐊᖅᑎᑦᑎᓂᕐᒥᒃ ᑭᒃᑯᑐᐃᓐᓇᓄᑦ ᑐᓴᐅᒪᔪᓕᕆᔾᔪᑎᒃᑯᑦ ᐊᒃᑐᐊᓂᖃᙱᒃᑯᕕᑦ ᓄᓇᓕᒋᔭᕐᓄᑦ. "ᐃᓕᑦᑎᓗᑎᑦ ᓄᓇᓕᖕᒥᐅᓂᑦ ᐃᓄᖕᓂᑦ, ᐱᓕᕆᕙᓪᓕᐊᓕᕐᓗᑎᑦ, ᐊᒻᒪᓗ ᐃᒪᐃᓕᐅᕐᓂᐊᖅᐳᑎᑦ ᑲᔪᖏᖅᓴᐃᓗᓂ ᐃᓕᖕᓂᒃ ᑎᑭᐅᑎᓂᕐᒧᑦ ᓇᖕᒥᓂᖅ ᐊᑐᖅᐸᒃᑕᕐᓄᑦ," ᐅᖃᖅᑐᖅ. 

ᐳᕆᓐᔅ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᖃᓄᐃᔾᔮᙱᓐᓂᕋᖅᖢᓂᐅᒃ, ᑕᐃᒪᐃᑦᑐᒦᙱᓐᓂᕋᖅᖢᓂᐅᒃ. "ᐅᖃᐅᑎᔪᒪᑐᐃᓐᓇᖅᑕᕋ ᑭᓱᓕᒫᑦᑎᐊᖑᖕᒪᑦ ᓯᕗᓕᕆᓚᐅᖅᑕᑦᑕ ᓂᕆᐅᒋᔭᖏᓐᓂᒃ, ᐊᒻᒪ ᐃᖏᕐᕋᐃᓐᓇᕐᓂᐊᕐᓗᓂ, ᓴᙱᓗᓂ, ᐊᒻᒪ ᖃᓄᐃᑦᑐᒦᒃᑲᓗᐊᕈᕕᑦ ᐃᓕᖕᓂᒃ, ᓲᖃᐃᒻᒪ ᐃᓚᖏᑦ ᖃᓄᐃᓐᓂᐅᔪᑦ ᐅᕙᓐᓄᑦ ᑕᐃᒪᐃᑎᑕᐅᕙᓚᐅᕐᒪᑕ ᐊᒻᒪ ᒪᒃᑯᒃᑑᑎᓪᓗᖓ, ᐃᓚᖏᑦ ᐅᕙᓐᓄ ᐱᕙᓚᐅᖅᐸᒃᑲ. ᐃᓄᐃᑦ ᐱᕈᖅᐸᓪᓕᐊᕙᒃᐳᑦ ᐊᓯᔾᔨᖅᐸᒃᖢᑎᒡᓗ, ᓇᖕᒥᓂᕐᓗ ᓄᑖᙳᕆᐊᕈᓐᓇᖅᖢᑎᑦ. ᐱᕕᒃᓴᖃᑦᑎᐊᖅᐳᑎᑦ ᐃᓕᖕᓂᒃ ᓄᑖᙳᕆᐊᖅᑎᑦᑎᓂᕐᒥᒃ, ᖃᐅᑕᒫᑦ ᓄᑖᙳᖅᐸᓪᓕᐊᓂᐅᕗᖅ ᐊᓯᔾᔨᕐᓂᕐᒧᑦ ᐱᒋᐊᒃᑲᓐᓂᕐᓂᕐᒧᓪᓗ ᓄᑖᒥᓗ," ᐅᓂᒃᑳᕆᓪᓗᓂ.

ᐊᓯᐊᑦᑕᐅᖅ ᐱᓕᕆᐊᒃᓴᕆᖕᒥᔭᖓ ᐳᕆᓐᔅ ᑎᑎᕋᖅᑎᐅᓪᓗᓂ. ᑭᖑᓪᓕᖅᐹᒥᒃ ᐅᖃᓕᒫᒐᓕᐊᕆᓚᐅᖅᓯᒪᔭᖓ ᓇᔭᒥᓄᑦ ᐅᓇᐅᓚᐅᖅᐳᖅ, Be a Good Ancestor ᐊᒻᒪᓗ ᓯᕗᓪᓕᖅᐹᖑᓪᓗᓂ Dance Through the Season. ᒫᓐᓇᓕᓴᐅᓛᖅ ᐊᑎᖃᖅᑐᖅ ᐃᖅᑲᐅᒪᒋᑦ ᑭᓇᐅᖕᒪᖔᖅᐱᑦ ᖃᓪᓗᓈᑎᑑᖓᓂᐊᖅᖢᓂᓗ, ᐊᓪᓚᐃᑦ ᐅᐃᕖᑎᑐᓪᓗ. ᐅᓂᒃᑲᐅᓯᖃᖅᐳᖅ ᐃᓚᖓᓂᒃ ᑖᔅᓱᒪᙵᑦ:

ᐊᑯᓂᐊᓗᒃ ᑭᖑᕚᕇᖕᓂᙶᖅᓯᒪᕗᑎᑦ. ᐃᓕᖅᑯᓯᕆᔭᐃᑦ ᑐᙵᕕᖃᖅᐳᖅ ᓴᙱᓂᕆᔭᐅᔪᓂᒃ ᐊᕐᓇᓄᑦ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᓴᙱᓂᖅᓴᐅᕗᑎᑦ ᐃᓱᒪᒋᔭᕐᓂᒃ. ᐃᓕᖅᑯᓯᑐᖃᓯ ᖃᐅᔨᒪᓂᕆᔭᓯᓗ ᑕᑯᒃᓴᐅᑎᑦᑎᕗᑦ ᑕᒪᑐᒥᖓ ᐅᒃᐱᕆᔭᖃᕐᓂᕐᒥᒃ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᓴᓇᔭᐅᓯᒪᕗᑎᑦ ᑭᓱᓕᒫᑦᑎᐊᓂᒃ ᐱᔭᕆᐊᖃᖅᑕᕐᓂᒃ ᑲᔪᓯᑦᑎᐊᕐᓂᐊᕐᓗᑎᑦ. ᑎᑎᕋᖅᑕᐅᓚᐅᖅᑐᖅ ᐅᓪᓗᕆᐊᓂᑦ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᐊᐅᖃᖅᐳᑎᑦ ᐊᒥᓱᓂ ᓯᕗᓕᕆᓚᐅᖅᑕᕐᓂ ᐃᖏᕐᕋᓂᖃᖅᑐᒥ ᑕᖃᒃᑯᑦ. ᐃᒃᐱᒋᓗᒋᑦ ᓴᙱᓂᕆᔭᖏᑦ ᑕᐃᒃᑯᐊ ᐃᕝᕕᑦ ᓯᕗᕚᕆᓚᐅᖅᑕᖏᑦ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᐃᓚᒋᔭᐅᕗᑎᑦ ᐃᓕᖅᑯᓯᕆᔭᐅᔪᒧᑦ ᑐᙵᕕᓕᖕᒥᒃ ᐃᒃᐱᒍᓱᑦᑎᐊᕐᓂᕐᒥᒃ, ᐊᓯᖕᓂᒃ ᐃᒃᐱᒍᓱᑦᑎᐊᕐᓂᕐᒥᒃ, ᑭᓯᐊᓂ ᐱᒻᒪᕆᐅᓂᖅᓴᖅ, ᐃᓕᖕᓂᒃ ᐃᒃᐱᒋᑦᑎᐊᕐᓂᖅ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ, ᐃᕝᕕᑦ. ᐃᓅᓚᐅᖅᓯᒪᒐᕕᑦ ᑭᓇᐅᓪᓚᑦᑖᕈᒪᓪᓗᑎᑦ, ᐃᓄᖁᑎᑎᑦ ᐃᓕᓴᖅᓯᕗᑦ ᑲᔪᖏᖅᓴᐃᓪᓗᑎᒡᓗ ᐊᔾᔨᐅᙱᑦᑐᓂᒃ ᐊᔪᙱᑕᕐᓂᒃ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᑭᖑᕚᕇᓄᑦ ᓇᒡᓕᒍᓱᖕᓂᖃᖅᐳᑎᑦ. ᓇᒡᓕᒍᓱᖕᓂᖅ ᑐᙵᓱᒃᑎᑦᑎᓲᖑᕗᖅ ᑐᙵᓇᕐᓂᕐᒥᒃ, ᐃᖕᒥᓃᕈᒪᙱᓐᓂᕐᒥᒃ ᐊᒻᒪ ᑐᓐᓂᖅᑯᑎᖃᕐᓂᕐᒥᒃ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᐃᓄᖕᓃᙶᖅᓯᒪᕗᑎᑦ ᓱᓕᔪᒥᒃ ᐅᐱᒍᓱᒃᑐᓂᒃ, ᐃᓅᓯᖃᖅᑐᓂᒃ ᐊᒻᒪ ᐅᖃᓪᓚᒃᐸᒃᑐᓂᒃ ᓱᓕᔪᒥᒃ ᑭᒃᑯᓕᒫᓄᑦ ᐃᑲᔫᑕᐅᓂᐊᖅᑐᓂᒃ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᐅᓇᑕᖅᑐᒃᓴᙳᕈᒪᕗᑎᑦ ᓴᐳᔾᔨᔨᐅᓗᑎᓪᓗ. ᖃᐅᔨᒪᒋᐊᕐᓂᐊᖅᐳᑎᑦ ᐊᑦᑕᕐᓇᙱᑦᑐᒦᖁᓪᓗᒋᑦ ᐃᖅᑲᓇᐃᔭᖅᑎᑎᑦ. ᐳᐃᒍᖅᑕᐃᓕᒋᑦ ᑭᓇᐅᖕᒪᖔᖅᐱᑦ, ᑐᙵᕕᒋᔭᐅᒐᕕᑦ ᓄᓇᓕᖕᓄᑦ. ᐃᑲᔪᕈᓐᓇᖅᐳᑎᑦ ᑭᒃᑯᓕᒫᑦ ᑲᔪᓯᑦᑎᐊᖁᓪᓗᒋᑦ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᓯᓚᑐᔪᐊᓘᕗᑎᑦ ᐅᒃᐱᕆᔭᒃᓴᐅᙱᑦᑐᒥᒃ. ᐃᒃᐱᒋᔭᑎᑦ ᐅᔾᔨᕈᓱᖕᓂᕆᔭᑎᓪᓗ ᓂᕿᑦᑎᐊᕙᐅᕗᑦ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᓴᙱᓂᖃᖅᐳᑎᑦ ᓯᕗᓕᖅᑎᙳᕈᓐᓇᕐᓂᕐᒧᑦ. ᑭᖑᕚᕆᔭᓯ ᑕᑖᖅᐳᖅ ᐃᓄᖕᓂ ᐱᒃᑯᒥᒍᓱᒃᑎᑦᑎᓯᒪᔪᓂᒃ ᐱᐅᔪᒻᒪᕆᖕᓂᒃ. ᐃᖅᑲᐅᒪᓂᐊᖅᐳᑎᑦ ᑭᓇᐅᖕᒪᖔᖅᐱᑦ. ᐃᓅᖃᑎᒌᖕᓂᕗᑦ ᐱᑐᐃᓐᓇᐅᙱᖦᖢᑎᒃ, ᐊᔾᔨᒌᙱᑦᑑᑕᐅᓪᓗᑎᒃ ᐊᒻᒪ ᐱᐅᔪᐊᓘᓪᓗᑎᒃ. ᐃᓄᖁᑎᕗᑦ ᓴᓇᔭᐅᓯᒪᖕᒪᑕ ᓴᙱᔫᖁᓪᓗᒋᑦ ᐅᒃᐱᕆᔭᑦᑎᓐᓂᒃ ᐅᒃᐱᕆᔭᑦᑎᓐᓂᒡᓗ. ᓄᓇᓕᕐᔪᐊᖑᒐᑦᑕ ᐊᓯᑦᑎᓐᓂᒃ ᓵᑕᒃᓴᐅᑎᑦᑎᕙᒃᖢᑕ ᑭᒃᑯᓕᒫᓂᒡᓗ ᓯᕗᒻᒧᐊᒃᑎᑦᑎᕙᒃᖢᑕ. ᐃᓅᓯᖃᖅᐳᒍᑦ ᑐᙵᕕᖃᑦᑎᐊᖅᖢᑕ ᑭᖑᓂᑦᑎᓐᓂ ᐊᒻᒪ ᓯᕗᓂᒃᓴᑦᑎᓐᓂ ᐱᔪᒃᓯᑎᑕᐅᓪᓗᑕ. ᕿᑐᕐᖓᕆᔭᐅᕗᒍᑦ ᐊᖓᔪᖅᑳᓄᑦ. ᐃᖅᑲᐅᒪᒋᑦ ᑭᓇᐅᖕᒪᖔᑦᑕ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᐅᖃᓚᐅᖅᐳᖅ, "ᒫᓐᓇᐅᓕᖅᑐᖅ ᐃᓄᐃᑦ ᐅᖃᐅᓯᖃᕋᔪᖕᒪᑕ ᐱᐅᙱᑦᑐᓂᒃ ᖃᓄᐃᓕᐅᖅᑕᐅᖃᑦᑕᖅᓯᒪᔪᓂᒃ ᑭᖑᓂᑦᑎᓐᓂ. ᓇᓕᒧᒌᒃᑎᑦᑎᔭᕆᐊᖃᖅᑰᕋᑦᑕ, ᕿᑐᕐᖓᕗᓪᓗ ᓇᓕᒧᒌᒃᑎᑦᑎᔭᕆᐊᖃᖅᐳᑦ ᑕᑯᑎᑦᑎᓗᑎᒃ ᓄᓇᕐᔪᐊᕐᒥᐅᓄᑦ ᐊᒃᓱᕉᑎᑐᐃᓐᓇᐅᙱᓐᓂᑦᑎᓐᓂᒃ. ᓴᐱᓕᕈᓐᓇᕐᓂᑐᐃᓐᓇᐅᙱᑦᑐᒍᑦ, ᐊᖏᔪᐊᓗᖕᒥ ᖃᐅᔨᒪᓂᖅᑕᖃᖅᐳᖅ ᐊᒻᒪ ᐊᔪᙱᓐᓂᖃᑦᑎᐊᖅᖢᓂ ᓄᓇᓕᑦᑎᓐᓂ."

ᐃᓕᓴᐃᔨᐅᖃᑦᑕᓚᐅᖅᓯᒪᓪᓗᓂ ᐅᖃᓕᒫᒐᕐᓂᒃ, ᒫᓐᓇᓕ ᓕᐅᓇ ᐳᕆᓐᔅ ᑎᑎᕋᖅᐸᒃᖢᓂᒋᑦ ᐊᒻᒪ ᑐᑭᒧᐊᒃᑎᑦᑎᕙᒃᖢᓂ ᐃᓕᓐᓂᐊᖅᑎᑦᑎᔾᔪᑎᒃᓴᓂᒃ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᖏᓐᓂᒃ ᐊᖏᔪᐊᓗᖕᒥ ᐃᓕᓐᓂᐊᕐᕕᖕᓂ. ᐊᓂᒍᐃᓯᒪᓪᓗᓂ ᐊᔪᕐᓇᕈᔪᒃᑐᓂᒃ ᖁᐊᖅᓵᖅᓯᒪᓂᐅᕙᒃᑐᓂᒃ ᐊᔪᕐᓇᖅᑐᓂᒡᓗ ᐊᑐᖅᓯᒪᔭᒥᓂᒃ, ᐱᖓᓱᓂᒃ ᓄᑕᖅᑲᓂᒃ ᐱᕈᖅᓴᐃᓯᒪᕗᖅ ᓯᕗᓕᖅᓯᓯᒪᓪᓗᓂᓗ ᐃᓕᓐᓂᐊᕐᓂᕐᒥᒃ ᐊᒥᓱᒃᑲᓐᓂᕐᓂᒃ. ᐱᐅᔪᒥᒃ ᑐᓴᒐᒃᓴᖃᖅᖢᓂ ᐊᒥᖅᑳᕈᑎᒋᔪᓐᓇᖅᑕᒥᓂᒃ ᓴᙱᓂᖃᖅᖢᓂᓗ ᐊᓂᒍᐃᔪᓐᓇᖅᖢᓂᓗ, ᓯᕗᓂᒃᓴᒧᑦ ᑕᐅᑐᒃᐳᖅ ᐱᐅᓯᒋᐊᖅᑎᑦᑎᓪᓗᓂᓗ ᐱᐅᔪᒥᒃ ᐃᓕᓐᓂᐊᖅᑎᑦᑎᓂᒃᑯᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.