ᓯᓚᑦᑐᖅᓴᕐᕕᔾᔪᐊᓕᐊᕐᓂᖅ ᐊᖓᔪᖅᑳᕆᔭᐅᓗᓂ ᑭᒍᑎᓂᒃ ᓴᓗᒻᒪᖅᓴᐃᔨᙳᕐᓗᓂ ᐊᒃᓱᕈᕐᓇᖅᑐᖅ ᑭᓯᐊᓂ ᐃᑲᔪᖅᓱᖅᑕᐅᓗᓂ ᑎᓕᐅᕆᑦᑎᐊᕐᓗᓂᓗ ᐃᓕᓐᓂᐊᕐᕕᖕᒥ ᓄᓇᓕᖓᓂ, ᓖᑕ ᔫᓇᓴᓐ ᐱᔾᔪᑎᓂᒃ ᖁᖓᑦᑐᓐᓇᖅᑐᖅ. ᑕᓯᖅ ᒫᓂᑑᕙᒥ ᓄᓇᖃᖅᑳᖅᑐᓄᑦ ᐅᐃᓂᐸᒡᒥ ᓄᓇᖃᖅᑐᖅ ᐊᒻᒪᓗ ᐊᒃᓱᕈᖅᑐᓂ ᐱᓕᕆᔪᖅ ᐃᖅᑲᓇᐃᔮᖃᕋᓱᐊᖅᑐᓂ "ᓴᓗᒻᒪᖅᓴᐃᔪᓐᓇᑎᐊᖅᑐᓂ", ᑭᒍᑕᐃᔭᐃᓂᕐᒥᒃ ᑕᒪᒃᑯᓄᖓᓕᒫᖅ ᐊᑭᓕᕆᐊᓕᓐᓄᑦ ᐱᕈᖅᓴᐃᔪᓄᑦ ᓱᕈᓯᕐᓂᒃ. 

ᕿᑐᕐᖓᖃᓚᐅᙱᑎᓪᓗᒍ, ᐅᓪᓗᓕᒫᖅ ᐃᖅᑲᓇᐃᔭᕐᖢᓂ ᓂᐅᕕᐊᒃᓴᖃᕐᕕᖕᒥ. ᐊᓈᓇᙳᓚᐅᖅᑎᓪᓗᒍ, ᐃᓕᓐᓂᐊᕆᐊᒃᑲᓐᓂᕈᒪᓕᓚᐅᖅᑐᖅ ᓲᖃᐃᒻᒪ ᐃᖅᑲᓇᐃᔮᖃᑦᑎᐊᒃᑲᓐᓂᕆᐊᖃᕋᓱᒋᓚᐅᕐᒪᑦ ᐃᑲᔪᕈᒪᓪᓗᓂᒋᑦ. ᑐᓂᓯᔪᒪᓪᓚᕆᓚᐅᖅᑐᖅ ᐃᓅᓯᕆᔪᒪᓚᐅᖅᑕᖓᓂᒃ ᓱᕈᓯᐅᓪᓗᓂ. 

ᐃᓚᖓ ᐱᔾᔪᑕᐅᔫᑉ ᑭᒍᑎᓂᒃ ᓴᓗᒻᒪᖅᓴᐃᔨᙳᕈᒪᓕᓚᐅᖅᑐᖅ ᐊᔭᖓ ᑭᒍᑎᓕᕆᔨᐅᑉ ᐃᑲᔪᖅᑎᒋᓚᐅᖅᖢᓂᐅᒃ ᐃᒻᒥᓂᒃ ᐃᓕᓴᐃᓪᓗᓂ ᑭᒍᑎᓂᒃ ᓴᓗᒻᒪᖅᓴᐃᓂᕐᒥᒃ. ᔪᓇᓴᓐ ᐊᑐᖅᓯᒪᔭᖓᓂᒃ ᐊᑐᓚᐅᖅᑐᖅ ᑭᒍᓯᕆᔨᒧᑦ, $20.00-ᓂᒃ ᑐᓂᓯᖏᓐᓇᖅᑐᓂ. ᖃᐅᔨᒪᓪᓗᓂ ᖃᔅᓯᑦ ᓄᓇᖃᖅᑳᖅᓯᒪᔪᑦ ᑭᒍᑎᖏᑦ ᓴᓗᒻᒪᖅᓴᖅᑕᐅᔪᓐᓇᙱᒻᒪᖔᑕ ᐊᒻᒪ ᖃᓄᖅ ᑭᒍᑎᓕᕆᔨᓕᐊᕐᓂᖅ ᐊᒃᓱᕈᕐᓇᕈᓐᓇᕐᒪᑦ, ᐃᓱᒪᓚᐅᖅᑐᖅ ᐊᔪᙱᓐᓂᖃᕋᓱᒋᓪᓗᓂᐅᒃ ᐃᑲᔪᕈᓐᓇᕋᓱᒋᓪᓗᓂᐅᒃ ᓄᓇᓕᖓᓂ.  

ᑖᓐᓇ ᑭᒍᓯᕆᓂᕐᒧᑦ ᐱᓕᕆᐊᖑᔪᖅ ᐊᑭᑦᑐᕋᐅᑎᓂᐅᒻᒪᑦ ᐊᒻᒪᓗ ᑎᒥᖏᑦ, ᓈᓴᖅᑕᐅᓯᒪᓂᖏᑦ, ᐊᒻᒪᓗ ᖃᓪᓗᓈᑎᑐᑦ ᐋᖅᑭᒋᐊᕆᕙᓪᓕᐊᓪᓗᓂ. ᐱᓪᓗᒍ ᐊᒥᓱᑦ ᐃᓄᐃᑦ ᐃᓕᓐᓂᐊᕆᐊᕈᒪᒻᒪᑕ, ᕿᓂᖅᐸᒻᒪᑕ ᖁᑦᑎᓐᓂᖅᓴᓂᒃ ᖁᑦᑎᓐᓂᓕᓐᓂᑦ ᐃᓄᓐᓂᒃ. ᖁᕕᐊᓇᖅᑐᖅ ᐱᓕᕆᐊᒃᓴᖅᑕᖃᕐᒪᑦ ᐃᑲᔪᕐᓂᐊᖅᑐᓂᒃ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑎᓂᒃ ᐊᒻᒪᓗ ᐃᑲᔪᖅᓱᐃᓂᐅᔪᑦ ᐱᓕᕆᖃᑎᒌᒃᑎᑦᑎᓂᕐᒥᒃ, ᕿᓂᕐᓂᕐᒥᒃ ᓯᓚᑦᑐᖅᓴᕐᕕᒡᔪᐊᖓᓂᒃ ᒫᓂᑑᐸ ᓯᓚᑦᑐᖅᓴᕐᕕᐅᑉ, ᓇᓂᓯᓂᕐᒥᒃ ᑮᓇᐅᔭᑎᒍᑦ ᐃᑲᔪᖅᑕᐅᓂᕐᒥᒃ, ᐊᒻᒪᓗ ᐊᐅᔭᒃᑯᑦ ᐃᖅᑲᓇᐃᔮᒃᓴᒥᒃ ᕿᓂᕐᓂᕐᒥᒃ ᐊᔪᕐᓇᙱᓐᓂᖅᓴᒃᑯᑦ ᔫᓇᓴᓐᒧᑦ. 

ᖃᐅᔨᓚᐅᖅᑐᖅ ᐊᔾᔨᐅᙱᑦᑐᒥᑦ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᑎᓄᑦ ᐃᑲᔪᖅᑐᐃᓂᖕᒧᑦ ᐱᓕᕆᐊᓂᑦ ᑭᓇᒥᑭᐊᖅ ᑐᓂᓯᔪᖃᖕᒪᑦ ᐅᖃᓕᒫᒐᒥᑦ ᓯᓚᑦᑐᖅᓴᕐᕕᖕᒦᑎᓪᓗᒍ ᖁᕝᕙᕆᐊᖅᓯᑎᓪᓗᒍ ᖃᐅᔨᓴᖕᓂᖕᒥᑦ. ᐃᓱᒪᓚᐅᙱᑦᑐᖅ ᐊᖏᖅᑕᐅᓂᐊᕋᓱᒋᓪᓗᓂ ᓲᖃᐃᒻᒪ ᐊᐅᔭᒃᑯᑦ ᐱᓕᕆᐊᖑᓚᐅᕐᒪᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕌᓂᑐᐃᓐᓇᖅᑐᓄᑦ ᐃᓐᓇᐅᓪᓗᓂᓗ ᐃᓕᓐᓂᐊᖅᑎᐅᓪᓗᓂ. ᐱᓇᓱᐊᓚᐅᖅᑐᖅ, ᐃᓯᖅᑐᓂ ᐊᒻᒪ ᖁᕕᐊᓱᑦᑐᒻᒪᕆᐅᓪᓗᓂ ᐊᐅᔭᒃᑯᑦ. ᔫᓇᓴᓐ ᐃᑲᔪᕐᓂᖃᖅᑐᒻᒪᕆᐅᓚᐅᖅᑐᖅ. 

ᐃᑲᔪᖅᑕᐅᑲᓐᓂᕐᓂᖅ ᐱᒻᒪᕆᐅᓚᐅᖅᑐᖅ ᕿᑐᕐᖓᖏᑦ 6-ᓂᒃ ᐊᒻᒪᓗ 2-ᓂᒃ ᐅᑭᐅᖃᕐᒪᑕ ᐊᒻᒪᓗ ᐃᓕᓐᓂᐊᕆᐊᖅᑐᑎᒃ ᐊᖏᔪᖅᑳᕆᔭᐅᓪᓗᑎᒃ ᐊᒃᓱᕈᓐᓇᖅᑐᒻᒪᕆᐅᒍᓐᓇᕐᒪᑦ, ᐱᓗᐊᖅᑐᒥᒃ ᐋᓐᓂᐊᔪᒥᒃ ᓱᕈᓯᕐᒥᒃ ᐸᐃᕆᕕᒻᒦᑦᑐᒥᒃ. ᓄᕙᒡᔪᐊᕐᓇᖅ ᐊᒻᒪ ᐃᕐᓂᖓ ᐊᓂᖅᓵᕈᓐᓃᖅᖢᓂ ᐊᒻᒪ ᓄᑕᕋᓛᕐᒧᑦ ᐊᐅᐸᓪᓛᓐᓇᖅᖢᓂ, ᐃᓕᓐᓂᐊᖃᑎᒌᓂᒃ ᐅᐸᑲᑕᙱᖦᖢᓂ ᑭᓯᐊᓂ ᒪᑭᖦᖢᓂ. ᐳᕝᕕᕿᓪᓗᓂ ᖁᕕᐊᓱᒡᕕᐅᓚᐅᖅᑎᓐᓇᒍ, ᖃᐅᔨᓴᖅᑕᐅᑎᓪᓗᒍ, ᐱᔭᕇᕋᓱᒃᑎᓪᓗᒍ ᖁᕕᐊᓱᒡᕕᐅᑉ ᓯᕗᓂᐊᓂ ᐊᒻᒪ ᖁᕕᐊᓇᙱᖦᖢᓂ ᐊᓂᖅᓵᖅᑐᒡᒐᖅᑎᓪᓗᒍ. 

ᔫᓇᓴᓐ ᐊᒥᓱᓂᒃ ᐊᕐᕌᒍᓂᒃ ᐃᓕᓐᓂᐊᖅᓯᒪᓕᕐᒪᑦ, ᐊᒻᒪᓗ ᑕᒪᓐᓇ ᐅᖁᒪᐃᑦᑑᑎᓪᓗᒍ, ᖃᐅᔨᒪᔪᖅ ᐊᑑᑎᖃᕐᓂᖓᓂᒃ. "ᕿᑐᕐᖓᒃᑲ ᓯᕗᓂᒃᓴᖃᑦᑎᐊᕐᓂᖅᓴᐅᓂᐊᖅᑐᑦ... ᐊᒻᒪᓗ ᐃᑲᔪᖅᑐᑎᒃ ᓄᓇᓕᐅᔪᓂᒃ ᖁᕕᐊᓱᐃᓐᓇᖅᑐᑎᒃ. ᖃᓄᑐᐃᓐᓇᖅ ᐅᑭᐅᖃᕋᓗᐊᕈᕕᑦ, ᓱᓕ ᐱᐅᕗᖅ ᐃᓕᓐᓂᐊᕐᕕᖕᒧᑦ ᐅᑎᕆᐊᒃᓴᖅ," ᐃᒻᒥᓂᒃ ᐃᖅᑲᐃᓯᕗᖅ. ᕿᑐᕐᖓᖏᑦ ᐱᔪᒃᓯᑎᑦᑎᓲᑦ, ᐱᖃᓐᓇᕆᔭᖓᓗ ᐱᓕᕆᕐᔪᐊᖃᑦᑕᖅᑐᖅ ᐃᑲᔪᖅᖢᓂ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ. ᐃᑲᔪᕈᓐᓇᕈᒪᔪᖅ ᐃᓅᖃᑎᒥᓂᒃ ᐱᔪᓐᓇᕐᓂᓕᒫᒥᓂᒃ. 

ᑎᓕᐅᕆᓯᒪᔪᖅ ᐅᖃᐅᔾᔨᒋᐊᕐᓂᕐᒥᑦ ᑐᙵᕕᖃᕐᓗᓂ ᐊᑐᖅᓯᒪᔭᖏᓐᓂᑦ ᐃᓕᓐᓂᐊᕐᕕᒻᒥᑦ. "ᑲᔪᓯᒋᑦ. ᐊᔪᕐᓇᖅᑰᔨᔫᒐᓗᐊᖅ ᑭᓯᐊᓂ ᐃᑲᔪᖅᑐᒻᒪᕆᐅᒻᒪᑕ ᑕᖅᑳᓂ. ᐊᔪᕐᓇᙱᓐᓂᖅᓴᐅᓕᓲᖅ ᐊᑯᓂᐅᙱᑦᑐᖅ," ᑎᓕᐅᕆᓪᓗᓂ, ᑕᐅᑐᒃᓗᒋᑦ ᐱᕕᒃᓴᓕᒫᑦ ᐊᑐᐃᓐᓇᐅᔪᑦ ᑭᓯᐊᓂ ᐱᓇᔪᒋᐊᖃᖅᑕᑎᑦ. ᐱᓇᓱᐊᓚᐅᖅᑐᖅ ᐊᒻᒪ ᐃᓕᓐᓂᐊᕈᑎᑖᖅᑐᓂ ᐃᑲᔪᖅᑕᐅᔪᒻᒪᕆᐅᓚᐅᖅᑐᖅ ᐃᓕᓐᓂᐊᖅᑎᐅᓪᓗᓂ ᐊᒻᒪ ᐊᖏᔪᖅᑳᖑᓪᓗᓂ. ᑕᐃᒪᐃᙱᑉᐸᑦ, ᐃᒪᓐᓇᐅᖁᔨᓇᔭᖅᐳᖅ, ᐅᖃᖃᑎᖃᕐᓗᓂ ᐃᓚᒥᓄᑦ, ᐱᖃᓐᓇᕆᔭᕐᓄᑦ, ᐃᓕᓴᐃᔨᓪᓚᕆᖕᓄᓪᓗ ᐃᑲᔪᖅᑐᖅᑕᐅᔪᒪᓂᕐᒧᑦ ᓇᓗᙱᑦᑎᐊᕈᒪᓂᕐᒧᓪᓗ ᐃᓅᖃᑎᑎᑦ ᐊᖕᒪᓗᖅᓯᓯᒪᔪᑦ ᐊᒃᑐᐊᓂᖃᕋᓗᐊᕐᒪᖔᑕ ᖃᓄᕆᑦᑐᓂᒃ ᐊᓯᔾᔨᕐᓂᕆᔭᐅᔪᓂᒃ ᐊᑐᕈᒪᓇᔭᖅᑕᕐᓂᒃ ᐃᓅᓯᕐᓂ. "ᐃᓄᐃᑦ ᖃᓂᒋᔭᑎᑦ ᐱᒻᒪᕆᐅᖕᒪᑕ," ᓇᓗᓇᐃᖅᐳᖅ. ᐊᒥᓱᐊᖅᑎᖅᑐᓂ, ᕿᑐᕐᖓᒥᓂᒃ ᐊᕙᓗᔭᐅᓯᒪᓪᓗᓂ, ᑭᓯᐊᓂᓕ ᖃᐅᔨᒪᔪᖅ ᐱᖃᓐᓂᕆᔭᒥᓂᒃ, ᐊᒻᒪᓗ ᖃᐅᔨᒪᑦᑎᐊᖅᑐᓂ ᖃᓂᒋᔭᖃᕋᓱᐊᖅᑐᓂ ᐃᓄᓐᓂᒃ ᐃᓱᒪᒥᓂᒃ ᐅᖃᐅᓯᖃᖅᑐᓂᒃ. 

ᐃᓕᓐᓂᐊᕐᕕᖕᒥ ᐱᓕᕆᓗᐊᙱᒃᑳᖓᒥ, ᓂᐅᕕᕆᐊᕈᒪᓲᖑᖕᒪᑦ ᐊᔪᙱᑦᑕᕌᖓᑦ, ᐅᕝᕙᓘᓐᓃᑦ ᐊᐅᓪᓚᑲᑕᒃᖢᓂ ᕿᑐᕐᖓᒥᓂᒃ ᑰᖕᒧᑦ ᐃᒡᓗᑯᓗᖕᒥ ᐃᒡᓗᒦᖦᖢᓂ ᐃᓚᒥᓂᒡᓗ ᐱᖃᑎᖃᕈᓐᓇᖅᖢᓂ. ᓄᓇᓕᐸᐅᔭᖅ ᐅᐊᑲᓪᓚᓗᐊᖑᖅᑰᔨᓕᕌᖓᑦ, ᑕᑯᒥᓇᙱᑦᑐᒃᑰᕐᓂᖅ ᐃᑲᔫᑎᖃᕈᓐᓇᖅᐳᖅ, ᐱᓗᐊᖅᑐᒥ ᐃᓅᓯᖓᓂ ᐊᓯᔾᔩᑎᓪᓗᒍ ᐊᖏᔪᐊᓗᖕᒥᒃ. 

ᑖᓐᓇ ᑕᓯᖅ ᒪᓂᑑᐸᒥ ᓄᓇᖃᖅᑳᖅᓯᒪᔪᓄᑦ ᐃᓚᒋᔭᐅᔪᖅ ᐊᑦᓱᕈᖅᓱᓂ ᐱᓕᕆᔪᖅ ᓴᓇᑦᓱᓂ ᐃᖅᑲᓇᐃᔮᑦᓴᒥᒃ "ᓴᓗᒻᒪᖅᓴᐃᒍᓐᓇᑦᓯᐊᖅᓱᓂ", ᑭᒍᑕᐃᕆᓂᕐᒥᒃ ᓄᓇᓕᒻᒥᓂ ᐃᓘᓐᓇᖏᓐᓄᑦ ᐊᑭᓕᑦᓴᓄᑦ ᐱᕈᖅᓴᐃᔪᓄᑦ ᓄᑕᖅᑲᓂᒃ. ᓯᓚᑦᑐᓴᕐᕕᕐᔪᐊᕐᒨᕐᓗᓂ ᐊᖏᔪᖅᑳᖑᓗᓂ ᑭᒍᑎᓂᒃ ᓴᓗᒻᒪᖅᓴᐃᔨᕈᕋᓱᐊᖅᑐᓂ ᐱᒡᒐᓇᖅᑐᒻᒪᕆᐅᕗᖅ ᑭᓯᐊᓂ ᓖᑕ ᔫᓇᓴᓐ ᐱᔾᔪᑎᖃᕐᒪᑦ ᖁᖓᒋᐊᖓ ᐊᒻᒪ ᓄᑖᓂᒃ ᕿᑐᕐᖓᖏᑦ ᖁᖓᖁᓪᓗᒋᑦ, ᐊᒻᒪ, ᐃᓅᓯᕆᔪᒪᔭᒥᓂᒃ ᑐᓂᓯᓪᓗᓂ, ᐊᑕᐅᓯᐊᖅᑐᓂ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.