"ᐃᓱᒪᔪᖓᓕ ᐃᓅᓪᓗᓂ, ᑲᑎᙵᓂᖃᖅᐳᖅ ᐱᐅᓂᖓᓂ ᐊᒻᒪ ᐊᒃᓱᕈᕐᓇᕐᓂᖓᓂ," ᐅᖃᓚᐅᖅᐳᖅ ᓖᓴ ᑑᒪᔅ ᓅᕕᐅᓪᑦ. ᐱᕈᖅᓴᓚᐅᖅᑐᖅ ᐅᐃᓂᐸᐃᒡᒥ, ᒫᓐᓇ ᓄᓇᖃᖅᖢᓂ, ᖃᑕᙳᑎᖏᓪᓗ ᕋᑦ ᕆᕗᒥ ᐊᓪᓚᖓᔪᑦ ᐊᒻᒪ Mennonite-ᖑᓪᓗᑎᒃ. ᐃᖅᑲᓇᐃᔮᒥᓄᑦ ᐃᓅᓯᖓᓄᓪᓕ, ᐱᒋᐊᓚᐅᖅᓯᒪᕗᖅ ᐊᒡᓚᒡᕕᖕᒥ ᐃᑲᔪᖅᑎᐅᓪᓗᓂ, ᑭᖑᓂᐊᒍᓪᓗ ᓯᓚᑦᑐᖅᓴᕐᕕᒡᔪᐊᒧᑦ ᐅᑎᒃᑲᓐᓂᖅᖢᓂ 28-ᓂᒃ ᐅᑭᐅᖃᓕᖅᖢᓂ ᐃᓕᓴᐃᔨᙳᕋᓱᒃᖢᓂ. ᓴᓂᕌᒍᑦ, ᑎᑎᕋᖅᐸᒃᐳᖅ ᐅᖃᓪᓚᒃᐸᒃᖢᓂᓗ.

ᓅᕕᐅᓪᑦ ᒪᒃᑯᒃᑑᑎᓪᓗᒍ, ᐊᒃᓱᕈᖃᑦᑕᓚᐅᖅᐳᖅ ᐃᓕᓐᓂᐊᕐᕕᖕᒥ. ᖃᔅᓰᓐᓇᕐᓂᒃ ᐃᓕᓴᐃᔨᖃᓚᐅᖅᐳᖅ ᑲᑎᙵᖃᑎᒋᕙᒃᑕᒥᓂᒃ ᑐᑭᖃᑦᑎᐊᖅᑐᒃᑯᑦ, ᑭᓯᐊᓂ ᑲᑎᙵᖃᑎᖃᒃᑲᓐᓂᕈᒪᓕᓚᐅᖅᐳᖅ, ᑲᔪᖏᖅᓴᐃᓪᓗᓂ ᓇᖕᒥᓂᖅ ᐃᓕᓴᐃᔨᙳᕈᒪᓪᓗᓂ. ᐊᓈᓇᑦᑎᐊᖓ ᐃᓕᓴᐃᔨᐅᓚᐅᖅᐳᖅ ᐊᒻᒪ ᐊᕐᕌᒍᑕᒫᑦ ᐃᑲᔪᖅᐸᒃᖢᓂᐅᒃ ᐃᓕᓐᓂᐊᕐᕕᐊᕈᓯᕐᒥᓂᒃ ᐋᖅᑭᒃᓱᐃᑎᓪᓗᒍ. ᐊᓈᓇᑦᑎᐊᖓᑕ ᑐᒥᖏᓐᓂᒃ ᒪᓕᒍᒪᓚᐅᖅᐳᖅ ᐃᓕᓴᐃᔨᙳᕈᒪᓪᓗᓂ.

ᓴᓂᑦᑎᐊᖓᓃᖦᖢᓂ, ᑕᐅᑐᒃᖢᓂ ᐊᒻᒪ ᐃᓕᑦᑎᕙᓪᓕᐊᓪᓗᓂ ᐊᓈᓇᑦᑎᐊᒥᓂᒃ ᐃᓚᒋᔭᐅᓚᐅᖅᐳᖅ ᐱᓕᒻᒪᒃᓴᕐᓂᕆᓚᐅᖅᑕᖓᓄᑦ. "ᐃᓚᖏᑦ ᐊᖏᓛᑦ ᐃᓕᑦᑎᔾᔪᑎᒋᓚᐅᖅᑕᒃᑲ ᐊᒃᓱᕈᕐᓂᒃᑯᑦ," ᓅᕕᐅᓪᑦ ᐅᖃᖅᑐᖅ. ᐃᓕᓐᓂᐊᖃᑕᐅᓚᐅᖅᑐᖅ ACCESS ᓯᓚᑦᑐᖅᓴᕐᕕᒡᔪᐊᖓᓂ ᐅᐃᓂᐸᐃᒡᒥ. ᑐᕌᖓᑎᑕᐅᔪᖅ ᐃᓕᓐᓂᐊᖅᑎᓄᑦ ᓯᓚᑦᑐᓴᕐᕕᔾᔪᐊᕐᒨᑲᐅᑎᒋᓚᐅᖏᑦᑐᓄᑦ ᐃᓕᓐᓂᐊᕐᕕᐊᓗᒻᒥ ᐱᔭᕇᕋᐃᒻᒪᑕ ᐊᒻᒪᓗ ᐃᑲᔪᖅᑕᐅᑲᓐᓂᕆᐊᓕᓐᓄᑦ. ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐊᒻᒪ ᐃᓕᓐᓂᐊᕐᕕᖕᒧᐊᖅᖢᓂ ᒫᓐᓇᓗ ᐱᓕᕆᐊᖃᓕᖅᖢᓂ Master's-ᒥᒃ ᓴᐃᓕᓂᕐᒧᑦ ᐊᒻᒪ ᐊᑲᐅᙱᓕᐅᕈᑕᐅᔪᓄᑦ ᖃᐅᔨᓴᕐᓂᕐᒧᑦ.

ᑲᑎᙵᖃᑎᖃᕐᓂᖅ ᓴᐃᓕᓂᕐᒥᒃ ᐊᒻᒪ ᐊᑲᐅᙱᓕᐅᕈᑕᐅᔪᓂᒃ ᖃᐅᔨᓴᕐᓂᕐᒥᒃ ᓈᒻᒪᒋᑦᑎᐊᓚᐅᖅᐸᖓ ᓂᐅᕕᐅᓪᑦᒧᑦ, ᐅᓂᒃᑳᖅᐳᖅ, "ᐃᒻᒪᖄ ᐱᒃᑯᒥᒍᓱᐃᓐᓇᐅᔭᕋᒪ ᓴᐃᓕᓂᕐᒥᒃ ᐊᒻᒪ ᐊᑲᐅᙱᓕᐅᕈᑕᐅᔪᓂᒃ ᐃᓗᒃᑯᑦ, ᑕᒪᒃᑯᐊ ᐃᓗᒃᑯᑦ ᐊᒃᓱᕈᕈᑕᐅᕙᒃᑐᑦ ᓵᙵᔭᑦᑎᓐᓂ ᐊᒻᒪ ᐃᓗᒃᑯᑦ ᓴᐃᓕᓂᖃᕈᓐᓇᕐᓂᑦᑎᓐᓂ. ᐅᒃᐱᕈᓱᒃᐳᖓ ᐃᓄᐃᑦ ᓴᐃᓕᑦᑎᐊᖅᐸᑕ ᐃᒻᒥᓂᒃ, ᑕᒪᓐᓇ ᓴᖅᑭᓐᓂᐊᕐᒪᑦ ᐃᓅᖃᑎᒌᓄᑦ ᐊᒻᒪ ᐊᓯᔾᔩᕙᓪᓕᐊᓕᕐᓗᓂ ᐃᓅᖃᑎᒌᓂᒃ ᓴᐃᒻᒪᖃᑎᒌᖕᓂᒃᑯᑦ, ᐆᒃᑑᑎᒋᓗᒍ."

ᓯᓚᑦᑐᖅᓴᕐᕕᖕᒧᐊᖅᐸᓪᓕᐊᓕᖅᖢᓂ, ᓅᕕᐅᓪᑦ ᐊᒥᓱᓂᒃ ᑐᓗᖅᑕᕈᑎᖃᓚᐅᖅᐳᖅ. ᐊᒃᓱᕉᑎᖃᓚᐅᖅᐳᖅ ᐊᔪᕐᓇᕈᔪᒃᑐᓂᒃ ᖁᐊᖅᓵᖅᓯᒪᓂᕐᒧᑦ ᑎᒍᐊᙳᐊᕆᔭᐅᓂᕐᒥᓄᑦ, ᐊᔪᕐᓇᖅᑐᖅᓯᐅᖅᐸᒃᖢᓂᓗ ᓇᖕᒥᓂᖅ−ᐊᐅᓚᑦᑎᔪᓐᓇᕐᓂᕐᒥᒃ ᐊᓂᒍᐃᔪᓐᓇᕐᓂᕐᒥᒡᓗ ᐱᐅᔪᒃᑯᑦ. ᐃᓕᑦᑎᕙᓪᓕᐊᓂᖅ ᐃᑲᔪᖅᑕᐅᔪᒪᓂᕐᒥᒃ ᐊᒃᓱᕈᕐᓇᓚᐅᖅᐳᖅ. ᐊᓂᒍᐃᕙᓪᓕᐊᓂᖅ ᑕᒪᒃᑯᓂᖓ ᐃᓅᖃᑎᒌᖕᓂᒃᑯᑦ, ᐃᒃᐱᒋᔭᒃᑯᑦ ᐃᓱᒪᒃᑯᓪᓗ ᐊᒃᓱᕈᕐᓇᖅᑐᓂᒃ ᓱᒃᑲᐃᑦᑐᒥᒃ ᐊᑐᓚᐅᖅᐳᖅ ᑭᓯᐊᓂ ᐋᖅᑭᒃᓱᐃᕙᓪᓕᐊᕗᖅ ᐊᑐᖅᑕᐅᔪᓐᓇᖅᑐᓂᒃ, ᐃᑲᔪᖅᑐᐃᔾᔪᑎᓂᒃ ᕿᓄᐃᓵᕐᓂᕐᒧᓪᓗ ᖃᓄᐃᓕᐅᖅᑕᐅᕙᓪᓕᐊᕙᒃᑐᓂᒃ ᖃᖓᙳᖅᐸᓪᓕᐊᑎᓪᓗᒍ ᑲᒪᒋᔭᖃᕈᒪᓪᓗᓂ ᐊᒃᓱᕈᕈᑎᒋᔭᒥᓂᒃ. ᑮᓇᐅᔭᓕᕆᓂᖅ ᑐᓗᖅᑕᕈᑕᐅᕐᔪᐊᓚᐅᕆᕗᖅ ᐱᒋᐊᓕᓵᖅᑎᓪᓗᒍ ᐃᓄᑑᓪᓗᓂ ᐊᖓᔪᖅᑳᖑᓪᓗᓂ ᑭᓯᐊᓂ ACCESS ᐱᓕᕆᐊᒃᑯᑦ ᑮᓇᐅᔭᖅᑖᖅᑎᑕᐅᓚᐅᖅᐳᖅ ᐊᒻᒪ ᐃᓕᓐᓂᐊᖅᑎᓄᑦ ᐃᑲᔫᑎᓂᒃ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᐊᐅᓪᓚᕈᒪᔪᓄᑦ ᓄᓇᒋᔭᒥᓂᑦ ᐃᓕᓐᓂᐊᒃᑲᓐᓂᕆᐊᖅᑐᕐᓗᑎᒃ ᓇᓂᓯᓗᑎᒃ ᐃᓂᒥᒃ ᑲᑎᙵᖃᑎᖃᕈᓐᓇᕐᓂᕐᒥᒃ ᐊᓯᒥᓂᒃ, ᐱᙳᐊᖅᑎᐅᒐᓗᐊᖅᐸᑦ ᐃᓕᖅᑯᓯᒃᑰᕋᓗᐊᕈᓂᓘᓐᓃᑦ. ᓅᕕᐅᓪᑦ ᑕᐅᑐᒃᐳᖅ ᑲᑎᙵᖃᑎᒌᖕᓂᖅ ᐱᒻᒪᕆᐅᓂᖓᓂᒃ ᐊᒃᓱᕈᕐᓇᖅᑐᒃᑰᖅᑎᓪᓗᑕ ᐊᓯᔾᔨᖅᐸᓪᓕᐊᔪᖃᖅᑎᓪᓗᒍᓗ ᓴᙱᒃᑎᒋᐊᖅᑎᑦᑎᔪᒪᓪᓗᓂ ᐊᒃᑐᖅᑕᐅᓴᕋᐃᑦᑐᓂᒃ ᓴᖅᑭᑐᐃᓐᓇᕆᐊᓕᖕᓂᒃ ᐊᒃᓱᕈᕐᓇᖅᑐᖅᓯᐅᕈᑕᐅᕙᒃᑐᓄᑦ. ᖁᕕᐊᓱᖕᓂᖅ, ᑲᑉᐱᐊᓱᖕᓂᖅ ᓯᕘᕋᓂᕐᓗ ᐊᖏᒡᓕᕙᓪᓕᐊᔪᓐᓇᖅᐳᖅ ᐊᓯᔾᔨᖅᐸᓪᓕᐊᓂᐅᔪᒥ ᐊᒻᒪ ᐃᑲᔪᖅᓱᐃᓂᖅ ᓇᖕᒥᓂᕐᓗ ᐊᑐᕈᓐᓇᖅᑕᖏᓐᓂ ᐃᑲᔪᖅᐸᒃᐳᖅ ᑐᙵᑦᑎᐊᖏᓐᓇᕐᓂᕐᒧᑦ.

ᑕᐅᑐᒐᖃᐃᓐᓇᕋᓱᒃᑎᓪᓗᒋᑦ ᑐᕌᒐᕆᔭᒥᓄᑦ, ᐅᖃᐅᔾᔨᒋᐊᕈᑎᒋᔭᖓ ᓇᓂᓯᓗᓂ ᐃᑎᔪᒥᒃ ᖃᓄᐃᒻᒪᑦ. ᓅᕕᐅᓪᑦ ᐅᖃᓚᐅᖅᐳᖅ ᐱᔪᒪᓂᖃᑦᑎᐊᕐᓂᖅ ᐱᑕᖃᕈᓐᓃᕈᓐᓇᖅᐳᖅ ᑭᓯᐊᓂ ᐃᓂᖅᑎᕆᓂᖅ ᑲᔪᓰᓐᓇᕈᓐᓇᖅᐳᖅ. ᐃᓱᒪᒋᔭᖃᕐᓂᖅ ᑭᓱᑦ ᐊᑖᓃᑦᑐᑦ ᑐᕌᒐᕆᔭᕐᓂ ᐃᑲᔪᕈᓐᓇᖅᐳᖅ ᑕᐅᑐᒐᖃᑦᑎᐊᖏᓐᓇᕐᓂᕐᒧᑦ. "ᐃᓚᖓᑦ ᐅᒃᐱᕐᓂᕐᒧᑦ ᐃᓕᓴᐃᔨᒪ ᐃᓕᓐᓂᐊᖅᑎᓚᐅᖅᐹᖓ ᖃᖓᑐᐃᓐᓇᒃᑯᑦ ᒪᒥᓴᓕᕌᖓᒪ ᐅᕙᓐᓂᒃ, ᒪᒥᓴᕐᓂᐊᕋᒪ ᓯᕗᓕᕆᓚᐅᖅᑕᓐᓄᑦ ᐊᒻᒪ ᑭᖑᕚᒃᓴᑦᑎᓐᓄᑦ," ᐃᖅᑲᐅᒪᔪᖅ, ᐃᓱᒪᓪᓗᓂ ᓇᖕᒥᓂᖅ ᖃᓄᐃᒻᒪᒃ.

ᓅᕕᐅᓪᑦ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᑕᑯᓇᔭᖅᑕᖓ ᒫᓐᓇ ᖃᓄᐃᓕᖓᓂᕆᔭᖓ, ᐊᐱᕆᓗᓂ "ᖃᓄᐃᑉᐸ ᐊᖕᒪᓗᖅᓯᓯᒪᕗᖓ? ᖃᓄᐃᑉᐸ ᐃᓱᒪᒃᑯᑦ, ᑎᒥᒃᑯᑦ, ᐃᒃᐱᒋᔭᒃᑯᑦ ᑕᕐᓂᒃᑯᓪᓗ? ᐊᒻᒪ ᐃᓕᓴᕆᓪᓗᒍ, ᐱᔾᔪᑎᒋᓪᓗᒍ ᐃᓚᖏᑦ ᓯᕗᓕᕆᓚᐅᖅᑕᒪ ᐊᑐᖅᐸᓚᐅᖅᑕᖏᑦ, ᐊᕙᓗᒐ ᐊᕕᒃᓯᒪᒐᓚᓚᐅᖅᐳᖅ ᐅᕝᕙᓘᓐᓃᑦ ᓱᕋᒃᓯᒪᓪᓗᓂ... ᖃᓄᐃᓕᐅᕈᒪᓇᔭᖅᐱᑦ ᑖᓐᓇ ᐊᖕᒪᓗᖅᓯᓯᒪᔪᖅ ᐋᖅᑭᑦᑎᐊᒃᑲᓐᓂᕋᓱᒡᓗᒍ?" ᐃᖕᒥᓂᒃ ᐱᑦᑎᐊᕋᓱᒃᐸᓚᐅᕆᕗᖅ.

ᐱᔪᒃᓯᑎᑦᑎᓂᒃᑯᓪᓕ, ᓅᕕᐅᓪᑦ ᐅᔾᔨᕈᓱᓕᖅᐳᖅ ᑭᓱᓕᒫᓂᒃ ᐃᒻᒥᓅᖓᑐᐃᓐᓇᖁᔨᙱᖦᖢᓂ. ᐊᓯᒥᓂᒃ ᐱᔨᑦᑎᕋᕈᒪᔪᖅ ᓲᖃᐃᒻᒪ ᐃᓄᖕᓄᑦ ᐃᑲᔪᖅᑕᐅᓚᐅᖅᓯᒪᖕᒪᑦ ᑖᖅᑐᒦᑎᓪᓗᒍ ᐊᑕᐅᓯᐊᖅᖢᓂ. ᐃᑲᔪᕈᒪᔪᖅ ᒪᒥᓴᕐᓂᕐᒥᒃ ᐊᒻᒪᓗ ᐃᕐᖑᑕᖓᑕ ᐊᖅᑯᑎᖓ ᑕᑯᒥᓇᕐᓂᖅᓴᐅᖁᓪᓗᒍ, ᐆᒻᒪᕆᖕᓂᖅᓴᐅᓗᓂ ᐊᒻᒪᓗ ᖃᓄᐃᖏᑦᑎᐊᕐᓗᓂ. ᓵᓚᖃᕈᒪᖕᒥᔪᖅ ᓂᕆᐅᒋᔭᐅᕙᒃᑐᓂᒃ ᑕᐃᒃᑯᓄᖓ ᐅᒃᐱᕆᔭᖃᙱᑦᑐᓄᑦ. ᑕᑯᒥᓇᕐᓂᖓ ᐊᒻᒪ ᐊᒃᓱᕈᕐᓇᕐᓂᖓ ᑕᑯᕙᒃᑕᖓ ᓄᓇᕐᔪᐊᒥ ᐱᔪᒃᓯᑎᑦᑎᒋᕗᖅᑕᐅᖅ, ᐊᒻᒪᓗᑦᑕᐅᖅ ᓴᖅᑭᑎᑦᑎᔪᒪᓪᓗᓂ ᐱᐅᓂᖅᓴᓂᒃ ᐊᒻᒪ ᑕᑯᒥᓇᕐᓂᖅᓴᓂᒃ, ᓇᓕᒧᒌᒃᑎᑦᑎᔪᒪᓪᓗᓂ. ᐃᓱᓕᑉᐸᓪᓕᐊᓕᖅᑎᓪᓗᒍ, ᐅᖃᓚᐅᖅᐳᖅ, "ᑲᔪᓯᑐᐃᓐᓇᕆᑦ. ᐊᒃᓱᕉᓴᒃᑯᕕᑦ, ᖃᓄᑐᐃᓐᓇᖅ ᐱᐅᓯᕚᓪᓕᕈᑎ ᐱᐅᓯᕚᓪᓕᕈᑎᐅᕗᖅ."

ᐊᒃᓱᕈᖅᑎᓪᓗᒍ ᐃᓕᓐᓂᐊᖅᑎᐅᓪᓗᓂ, ᓖᓴ ᑑᒪᔅ ᓅᕕᐅᓪᑦ ᐃᓕᓴᐃᔨᒻᒪᕆᐅᓕᓚᐅᖅᐳᖅ, ᑲᔪᖏᖅᓴᖅᑕᐅᓪᓗᓂ ᓇᖕᒥᓂᖅ ᐊᒃᓱᕈᕈᑎᒋᕙᒃᑕᒥᓄᑦ ᐊᒻᒪ ᐊᔪᙱᑦᑐᐊᓗᖕᒧᑦ ᐊᓈᓇᑦᑎᐊᖓᓄᑦ. ᐃᓅᖃᑎᒌᖕᓂᒃᑯᑦ, ᐃᒃᐱᒋᔭᒃᑯᑦ ᑮᓇᐅᔭᑎᒍᓪᓗ ᐊᔪᕐᓇᖅᑐᖅᓯᐅᕈᑎᖃᕋᓗᐊᖅᑎᓪᓗᒍ ᐃᓄᑑᓪᓗᓂ ᐊᖓᔪᖅᑳᖑᓪᓗᓂ ᐊᒃᓱᕈᕐᓇᖅᑐᒃᑰᖅᓯᒪᓪᓗᓂ, ᓱᓕ ᑲᔪᓯᔪᓐᓇᓚᐅᖅᐳᖅ ᑕᐅᑐᙳᐊᖅᑕᒥᓂᒃ ᐊᓂᒍᐃᔾᔪᑎᑖᖅᖢᓂᓗ. ᒫᓐᓇᓕ ᑎᑭᐅᑎᒃᑲᓐᓂᓕᖅᖢᓂ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᑕᕆᔭᐅᔾᔪᑎᑖᕋᓱᒃᖢᓂ, ᐃᓕᓐᓂᐊᖅᐳᖅ ᓴᐃᓕᓂᕐᒥᒃ ᐊᒻᒪ ᐊᑲᐅᙱᓕᐅᕈᑕᐅᔪᓂᒃ ᖃᐅᔨᓴᕐᓂᕐᒥᒃ ᐊᒻᒪ ᓇᖕᒥᓂᖅ ᓴᐃᓕᓂᕐᒥᒃ ᓇᓂᓯᓪᓗᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.