"ᐱᓇᔪᒃᐸᒡᓗᓯ ᑲᑉᐱᐊᓱᙱᓪᓗᓯᓗ ᓲᖃᐃᒻᒪ ᑲᑉᐱᐊᓱᙱᑦᑐᓃᙶᖅᓯᒪᒐᑦᑕ," ᐅᖃᖅᑐᖅ ᓗᐊᓇ ᒨᕐ. ᑕᕐᓂᖓᑕ ᐊᑎᖏᑦ ᐅᑯᐊᖑᕗᑦ Dancing Rainbow ᐊᒻᒪᓗ Heartbeat of Mother Earth ᐊᒻᒪᓗ ᐃᓚᒋᔭᐅᓪᓗᓂ Eagle Clan-ᑯᓐᓄᑦ. Crane River ᓄᓇᖃᖅᑳᖅᓯᒪᔪᖅ ᐊᒻᒪᓗ ᓄᓇᖃᖅᑳᖅᓯᒪᓪᓗᓂ ᓂᒋᖅᐸᓯᐊᓂ ᐳᕋᓯᐅᓪ ᐊᒻᒪᓗ ᐱᕈᖅᓴᓂᑰᓪᓗᓂ ᓄᓇᓕᐸᐅᔭᕐᒥ. ᐅᐃᓂᐸᐃᒡ, ᒫᓂᑑᐸᒥᐅᑕᖅ.

ᐱᓕᕆᔨᒻᒪᕆᐅᓂᕐᒥᒍᑦ, ᒨᕐ ᒥᑭᑦᑐᒥᒃ ᓇᖕᒥᓂᖁᑎᖃᖅᐳᖅ, ᑲᒪᒋᔭᖃᖅᐸᒃᖢᓂ ᖃᓄᐃᙱᑦᑎᐊᕈᓐᓇᕐᓂᕐᒧᑦ, ᓄᓇᒥ ᑐᙵᕕᓕᖕᒥᒃ ᐃᓕᖅᑯᓯᑐᖃᕐᓄᓪᓗ ᑲᑎᓐᓂᕆᔭᐅᔪᓂᒃ. ᐱᓕᕆᖃᑎᖃᖅᐸᒃᐳᖅ ᐃᓕᓐᓂᐊᕐᕕᖕᓂ ᒪᒃᑯᒃᑐᓄᓪᓗ ᐱᓕᕆᐊᖑᕙᒃᑐᓂᒃ ᐃᓚᒋᔭᐅᓪᓗᓂ ᐃᓕᓐᓂᐊᕌᓂᒃᑳᖓᑕ ᐱᓕᕆᐊᖑᕙᒃᑐᓄᑦ ᐊᐅᔭᒃᑯᓪᓗ ᐱᓕᕆᑎᑕᐅᕙᒃᑐᓄᑦ, ᐱᓕᕆᐊᖃᖅᐸᒃᖢᓂ ᓄᑕᖅᑲᓂᒃ. ᑕᒪᐃᑎᒍᑦ, ᐃᑲᔪᖅᑕᐅᕙᒃᑐᑦ ᖁᑦᑎᖕᓂᓖᑦ 2-ᒥᑦ 12-ᒧᑦ ᐊᓪᓛᑦ ᐃᓐᓇᐃᑦ. ᐱᒋᐊᓚᐅᖅᓯᒪᕗᖅ ᒪᒃᑯᒃᑐᓂᒃ ᐱᓕᕆᐊᒃᓴᓕᕆᔨᓂᒃ ᐃᖅᑲᓇᐃᔮᕆᒐᔪᒃᑕᒥᓄᑦ ᑭᓯᐊᓂ ᓇᖕᒥᓂᕆᔭᖓ ᐱᔭᒃᓴᖃᓗᐊᒧᑦ ᐱᔨᑦᑎᕋᖃᑦᑕᓕᓚᐅᖅᐳᖅ ᑳᓐᑐᓛᒃᑕᐅᓯᒪᑐᐃᓐᓇᖅᖢᓂ. ᐊᓯᐊᒍᑦᑕᐅᖅ ᐱᓕᕆᓲᖑᖕᒥᔪᖅ ᑐᓐᓂᖅᑯᑎᒋᕙᒃᖢᓂᐅᒃ ᐃᑲᔪᖅᑕᐅᔭᕆᐊᓕᖕᓂᒃ ᓄᓇᓕᖕᒥᐅᑕᓄᑦ ᐃᑲᔪᕈᓐᓇᖅᑐᓂᒃ ᒪᓕᒃᖢᓂ ᐊᑐᖅᓯᒪᔭᒥᓂᒃ ᐱᕈᖅᓴᓪᓗᓂ ᓄᓇᓕᖕᓂ. ᓇᖕᒥᓂᖅ ᐊᑎᕐᒥᓂᒃ ᐱᓕᕆᒐᔪᒃᖢᓂ, ᐃᓂᒃᓴᖃᕆᕗᖅ ᑕᐃᔭᐅᔪᒥᒃ ᓄᓇᒥ ᐃᓅᓕᓴᐅᑎᓂᒃ ᐃᓄᐃᑦ ᑲᑎᕝᕕᐅᔪᓐᓇᖅᖢᑎᒃ ᐊᒥᖅᑳᖃᑎᖃᖅᐸᒃᖢᑎᒡᓗ ᐃᓅᓕᓴᐅᑎᓂᒃ ᓇᒃᓴᖅᑕᖏᓐᓂᒃ.  

ᖃᖓᑦᑎᐊᓵᖅ, ᒧᐊ ᐊᔾᔨᓕᐅᕆᖃᑦᑕᓕᓚᐅᖅᐳᖅ, ᐱᓕᕆᖃᑎᖃᖅᖢᓂ ᓄᓇᖃᖅᑳᖅᓯᒪᔪᓂᒃ ᐊᓐᓄᕌᓕᐅᖅᑎᓂᒃ. ᐊᒡᒋᖅᑐᒥ ᑕᑯᒃᓴᐅᑎᑦᑎᓂᐅᔪᒥ ᔮᐸᓃᓯᒥ ᐊᓐᓄᕌᓄᑦ ᐱᓇᓱᐊᕈᓯᐅᔪᒥ ᐃᓚᒋᔭᐅᓪᓗᓂ ᓄᓇᖃᖅᑳᖅᑐᓕᒫᓄᑦ ᓴᓇᔭᐅᓯᒪᔪᓄᑦ. ᐊᓱᐃᓛᒃ, ᖁᕕᐊᒋᔭᖃᖅᑐᖅ ᓄᓇᓕᖕᓃᒋᐊᒃᓴᖅ ᖃᓄᐃᓕᐅᖅᑎᑦᑎᓂᕐᒥᒡᓗ.

ᐃᖅᑲᓇᐃᔭᕐᓇᐅᙱᑎᓪᓗᒍ, ᒧᐊᕐ ᐃᒻᒥᓂᒃ−ᐅᖃᖅᖢᓂ ᖃᓄᐃᙱᑦᑎᐊᕐᓂᕐᒧᑦ ᐊᔪᙱᑦᑐᒻᒪᕆᐅᕗᖅ ᐅᒃᐱᕐᓂᓕᕆᔪᒪᑦᑎᐊᖅᖢᓂᓗ. ᓇᓪᓕᐅᓐᓂᖅᓯᐅᖃᑕᐅᕙᒃᐳᖅ ᐃᓅᓕᓴᐅᑎᓕᐅᖅᐸᒃᖢᓂᓗ, ᐅᐊᓴᐅᑎᓕᐅᖅᐸᒃᖢᓂ ᐊᒻᒪ ᐊᕚᓚᕿᐊᓂᒃ ᓯᓐᓇᒃᑑᒪᑎᑦᑎᕙᒃᖢᓂ. ᐊᐅᓪᓚᑲᑕᒋᐊᒃᓴᖅ ᖁᕕᐊᒋᔭᖃᖅᑐᖅ ᖃᐅᔨᓇᓱᒋᐊᒃᓴᕐᓗ, ᓂᐅ ᓰᓚᓐᒨᖅᓯᒪᓪᓗᓂ ᐃᓕᓐᓂᐊᕆᐊᖅᓯᒪᓪᓗᓂ ᒪᐅᕆᒥᑦ ᐊᒻᒪ ᐸᓕᒧᑦ ᔫᒐᒧᑦ ᐃᓕᓴᐃᔨᐅᓂᕐᒧᑦ ᐱᓕᒻᒪᒃᓴᖅᖢᓂ.  

ᐱᕙᒌᔭᕈᒪᓪᓗᒍ ᑖᔅᓱᒧᖓ ᐃᖅᑲᓇᐃᔮᒧᑦ, ᒧᐊ ᐊᔾᔨᐅᙱᑦᑐᒧᑦ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒧᑦ ᐃᓚᐅᓪᓗᓂ ᐃᖅᑲᓇᐃᔮᒥᒃ ᒪᓕᑲᑕᒃᐸᒃᖢᓂ ᐊᒻᒪ ᐱᓕᒻᒪᒃᓴᖅᖢᓂ ᐃᖅᑲᓇᐃᔮᖅᑖᕋᓱᒍᓐᓇᕐᓂᐊᕋᒥ ᐃᓕᓐᓂᐊᒃᑲᓐᓂᓚᐅᙱᓐᓂᕐᒥᓂ. ᐃᓕᓐᓂᐊᖅᑕᒥᓂᒃ ᐃᓱᓕᑦᑎᓚᐅᖅᑳᕋᓂ, ᐃᓐᓇᕐᓂᒃ ᐃᓕᓐᓂᐊᖅᑎᑕᐅᖃᑦᑕᓚᐅᖅᑐᖅ ᓄᓇᓕᖕᓂ ᐃᓕᓐᓂᐊᖃᑕᐅᓪᓗᓂ. ᐅᐸᒍᑎᓯᒪᓂᖅ ᓇᓪᓕᐅᓂᕐᓯᐅᕐᓂᒧᑦ ᐃᓱᒪᒋᔭᐅᒻᒪᕆᓚᐅᕐᑐᖅ ᐃᓚᒋᓪᓗᓂᐅᒃ ᐃᓕᓐᓂᐊᕐᓂᖓᑕ. ᐃᓚᐅᕝᕕᒋᔪᓐᓇᓚᐅᖅᑕᖓ ᑕᐃᔭᐅᔪᖅ ᐃᓕᓐᓂᐊᖅᑏᑦ ᓯᑯᒦᑦᑐᑦ, ᐃᓕᓐᓂᐊᕈᓐᓇᓚᐅᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐃᓕᓐᓂᐊᖅᑎᑕᐅᓪᓗᓂ ᖃᐅᔨᓴᖅᑎᓄᑦ, ᓯᕐᓈᖅᑎᓄᑦ, ᒐᕙᒪᒃᑯᓐᓄᑦ ᐊᒻᒪᓗ ᐊᓯᖏᓐᓄᑦ ᐃᓕᓴᐃᔨᓄᑦ ᐅᒥᐊᕐᔪᐊᕐᒥ. ᑲᓛᖦᖡᑦ ᓄᓈᓄᙵᐅᓚᐅᖅᐳᖅ ᐃᓚᒋᔭᐅᓪᓗᓂ ᐃᓕᓐᓂᐊᖅᑕᒥᓄᑦ ᐊᒻᒪ ᐃᓕᓐᓂᐊᖅᑎᓂᒃ ᐱᓇᔪᖁᔨᓪᓗᓂ ᐃᓚᐅᖁᔨᓪᓗᓂ ᑕᒪᕐᒥᑲᓴᒃ ᐃᓄᐃᑦ ᑮᓇᐅᔭᖃᖅᑎᑕᐅᑦᑎᐊᕐᒪᑕ ᐃᓚᐅᓂᐊᖅᑎᓪᓗᒋᑦ ᐊᒻᒪ ᐃᑲᔫᑎᒃᓴᑦᑎᐊᕙᐅᓪᓗᓂ ᐊᐅᓪᓚᕐᓂᐊᕐᓗᓂ ᖃᐅᔨᔪᓐᓇᕐᓗᓂᓗ ᐅᑭᐅᖅᑕᖅᑐᒥ.

ᑲᔪᖏᖅᓴᐃᔾᔪᑎᒋᓚᐅᖅᐸᖓ ᐱᓕᕆᐊᕆᕙᒃᑕᒥᓂᒃ ᒧᐊᕐ ᐱᕈᖅᓴᑎᓪᓗᒍ, ᐃᑲᔪᖅᑐᖅᑕᐅᕙᒃᖢᓂ ᐊᖓᒃᑯᖏᓐᓄᑦ ᐊᒃᑲᖏᓐᓄᓪᓗ ᓄᓇᓕᖕᓂ ᐊᓯᖏᓐᓂᒡᓗ ᑲᔪᖏᖅᓴᐃᔨᖃᖅᖢᓂ. ᐃᓚᐅᖃᑦᑕᓚᐅᖅᐳᖅ ᐱᓕᕆᐊᖑᔪᓄᑦ ᐊᒻᒪ ᖁᕕᐊᓲᑎᖃᖅᑐᓄᑦ ᐅᐸᒍᑎᕙᒃᖢᓂ ᐊᒻᒪ ᒫᓐᓇ ᐃᓐᓇᐅᓂᖅᓴᐅᓕᕋᒥ, ᑐᓂᓯᔪᒪᕗᖅ ᐊᒻᒪ ᓴᖅᑭᑎᑦᑎᔪᒪᓪᓗᓂ ᐊᑦᑕᕐᓇᙱᑦᑐᒥ ᐃᓂᒃᓴᓂᒃ ᕿᒥᕐᕈᔪᓐᓇᖅᑕᒥᓂᒃ ᖁᕕᐊᒋᓚᐅᖅᑕᒥᓂᒃ. ᓇᔭᒋᓂᕋᖅᖢᓂᐅᒃ, ᐊᕐᓇᐅᓇᓱᒋᓕᖅᖢᓂ ᐊᒻᒪ ᐃᑲᔪᖅᓱᐃᔨᐅᔪᒪᑦᑎᐊᖅᖢᓂ ᒪᒃᑯᒃᑐᓄᑦ ᓄᓇᕐᔪᐊᓕᒫᒥ.

ᐃᓱᒪᒋᓪᓗᒍ ᒪᒃᑯᖕᓂᕆᓚᐅᖅᑕᖓ, ᒧᐊ ᐃᒃᐱᒋᔭᖃᓚᐅᖅᐳᖅ ᐊᒃᓱᕈᕐᓇᖅᑐᒥᒃ ᒪᒃᑯᒃᑑᓪᓗᓂ ᓄᓇᖃᖅᑳᖅᓯᒪᓪᓗᓂ ᐊᒻᒪ ᖃᓄᐃᓕᐅᕐᓂᐅᔪᑦ ᓇᖕᒥᓂᖅ ᐃᓅᓯᕐᒥᓂ ᐊᔪᕐᓇᖅᑐᖅᓯᐅᕈᑕᐅᕙᒃᖢᓂ ᐃᓕᓐᓂᐊᕆᐊᕆᐊᒃᓴᖅ. ᐊᑕᐅᑦᓯᒃᑯᓪᓗ, ᐃᓚᖏᑦ ᐃᓄᐃᑦ ᖃᓂᒋᔭᖏᓐᓃᑦᑐᑦ ᐅᖃᐅᓯᖃᖁᔨᕙᓚᐅᙱᓚᑦ ᐃᒃᐱᒋᔭᒥᓂᒃ ᐊᒻᒪ ᐃᒻᒥᓄᑦ ᐊᒃᓱᕈᖅᐸᒃᖢᓂ. ᐊᖓᔪᒃᖠᖅᐹᖑᓪᓗᓂ, ᐃᑉᐱᒍᓱᐃᓐᓇᖃᑦᑕᓚᐅᖅᑐᖅ ᑲᒪᑦᑎᐊᖏᓐᓇᕆᐊᖃᕐᓂᕐᒥᓂᒃ ᐊᒻᒪᓗ ᐊᓯᒥᓄᑦ ᑕᐃᒪᐃᖁᔭᐅᖏᓐᓇᐅᔭᖅᐸᒃᖢᓂ. ᖃᖓᙳᖅᐸᓪᓕᐊᑎᓪᓗᒍ, ᐃᒃᐱᒋᓕᓚᐅᖅᐳᖅ ᐊᓯᔾᔨᖅᐸᓪᓕᐊᓂᕐᒥᒃ ᐱᑦᑎᐊᕐᓂᖅᓴᐅᓕᕐᓂᕐᒥᒃ ᐃᓱᒪᒋᔪᓐᓇᐃᖅᓯᔪᓐᓇᕐᓂᕐᒥᒡᓗ.

ᑐᓗᖅᑕᕈᑕᐅᕙᒃᑐᓄᓪᓕ, ᒧᐊ ᖃᐅᔨᓯᒪᕗᖅ ᐊᓯᒥᓄᑦ ᐃᓂᒋᔭᐅᔪᓐᓇᖅᑐᓂ ᐊᒃᓱᕈᕐᓇᕐᔪᐊᕈᓐᓇᕐᓂᖓᓂ ᐊᒻᒪ ᓴᖅᑭᔮᕐᕕᐅᕙᒃᖢᓂ ᖁᐊᖅᓵᖅᓯᒪᓂᐅᔪᓄᑦ. ᐊᒃᓱᕉᑎᖃᖅᐸᒃᑭᕗᖅ ᐃᓛᓐᓂᒃᑯᑦ ᐊᓂᒍᖅᑎᑦᑎᓇᓱᒃᖢᓂ ᐊᔭᖅᑭᑦᑕᕈᑕᐅᕙᒃᑐᓂᒃ ᐊᑐᖅᑕᐅᕙᒃᑐᓂᒡᓗ ᑭᒡᒐᖅᑐᐃᓕᕌᖓᒥ ᐊᓯᒥᓂᒃ. ᑕᒪᒃᑯᐊ ᐊᑲᐅᙱᓕᐅᕈᑕᐅᔪᑦ ᑲᒪᒋᓂᐊᕐᓗᒋᑦ, ᐳᔪᕐᓗᒃᓯᕙᒃᐳᖅ ᓴᓗᒻᒪᖅᓴᖅᐸᒃᖢᓂᓗ ᐅᓪᓘᑉ ᓄᙳᐊᓂ. ᓄᖅᑲᖓᓚᐅᑲᒃᐸᒃᐳᖅ ᑕᐃᒪᐃᑦᑕᕆᐊᖃᕌᖓᒥ ᐃᒻᒥᓂᒡᓗ ᑲᒪᒋᑦᑎᐊᕋᓱᒃᐸᒃᖢᓂ ᐊᔪᕐᓇᙱᓐᓂᓕᒫᖓᓂ.

ᓇᓕᒧᒌᒃᑎᑦᑎᓇᓱᓕᕌᖓᒥ ᐊᒻᒪ ᐃᓱᒪᒥᒍᑦ ᖃᓄᐃᙱᑦᑎᐊᕋᓱᒃᖢᓂ, ᒧᐊᕐ ᒪᙳᐃᔭᖅᐸᒃᐳᖅ ᐊᑐᖅᐸᒃᖢᓂᓗ ᐱᓕᕆᔾᔪᓯᕐᒥᒃ ᑕᐃᔭᐅᔪᒥᒃ ᓇᕿᑦᑕᕐᓂᕐᒥᒃ. ᐃᒻᒥᓄᑦ ᐅᖃᑦᑎᐊᖅᐸᒃᐳᖅ ᑕᕐᕋᖅᑑᑎᒧᑦ, ᐃᓚᐅᕙᒃᖢᓂ ᖁᕕᐊᓱᒍᑕᐅᔪᒥ ᐃᓚᒋᔭᐅᓪᓗᓂ ᓯᕿᓂᕐᒧᑦ ᒧᒥᖅᐸᒃᖢᓂ, ᐆᒻᒪᕆᒃᖢᓂ ᐱᓕᕆᕙᒃᖢᓂ, ᕿᐊᕙᒃᖢᓂ, ᐃᒡᓚᖅᐸᒃᖢᓂ ᐱᖃᓐᓇᕆᔭᒥᓃᑉᐸᒃᖢᓂᓗ. ᐃᓛᓐᓂᒃᑯᑦ ᐃᓄᑑᔪᒪᓕᖅᐸᒃᖢᓂ ᐊᒃᓱᕈᕐᓇᖅᑐᒃᑰᖅᑎᓪᓗᒍ, ᖃᐅᔨᒪᕗᖅ ᓄᓇᓕᒃ ᐱᐅᓛᖑᓂᖓᓂᒃ ᐃᓅᓕᓴᐅᑎᒥᒃ. ᐊᒻᒪᓗᑦᑕᐅᖅ, ᐅᖃᖅᖢᓂ, "ᐃᓄᑑᓚᐅᖅᓯᒪᙱᑦᑐᑎᑦ," ᐃᓱᒪᒋᓪᓗᒍ ᐆᒻᒪᕆᖕᓂᖓ ᓄᓇᕐᔪᐊᒥ ᐊᒻᒪ ᐃᓄᐃᑦ ᑲᒪᒋᔭᖏᑦ ᐃᖕᒥᓂᒃ ᐊᓯᖏᓐᓂᒡᓗ.

ᑲᔪᖏᖅᓴᐃᑦᑎᐊᖅᑐᑦ ᒨᕐ ᒪᒃᑯᒃᑐᑦ ᐱᓕᕆᖃᑎᒋᕙᒃᑕᖏᑦ. "ᑭᓇᑐᐃᓐᓇᑦᑎᐊᖅ ᐅᕙᓐᓂᒃ ᓄᑲᖅᖠᖅ ᐱᓱᖃᑎᒋᕙᒃᑕᒃᑲ ᐱᒃᑯᒥᒋᔭᒃᑲ," ᖁᕕᐊᓱᒃᑐᖅ, ᐅᖃᐅᓯᖃᖅᖢᓂ ᖃᓄᖅ ᓱᓕᑦᑎᐊᕐᓂᖏᓐᓂᒃ ᐊᒻᒪ ᐃᖅᓯᓇᕐᓂᖏᓐᓂᒃ. ᐃᓕᑦᑎᓯᒪᕗᖅ ᐃᓄᐃᑦ ᖃᐅᔨᒪᓂᖏᓐᓂᒃ ᑭᓱᓂᒃ ᐱᔭᕆᐊᖃᓛᖑᖕᒪᖔᑕ ᐊᒻᒪ ᐃᑲᔪᖅᑎᑦᑎᐊᕙᐅᓗᓂ ᓈᓚᒋᐊᖃᕐᓇᖅᐳᖅ ᑲᖐᓱᙱᓪᓗᓂ. ᐱᒃᑯᒥᒍᓱᖕᒥᔪᖅ ᐃᓕᓐᓂᐊᖅᓯᓐᓈᑦ ᑲᑎᒪᑎᑦᑎᔪᓐᓇᕐᓂᕐᒥᓂᒃ ᖁᕕᐊᓲᑎᖃᕐᓂᕐᒥᒃ ᒪᓕᒐᕐᒥᒃ ᓱᕋᐃᕙᓚᐅᖅᓯᒪᒐᓗᐊᖅᑎᓪᓗᒍ. "ᓴᙱᔪᐊᓗᖕᒥᙶᖅᓯᒪᕗᒍᑦ ᐊᒻᒪ ᓴᐱᓕᖅᓴᕋᐃᙱᓐᓂᖅ ᐊᖏᔪᐊᓗᖕᒥ ᐱᔪᒃᓯᑎᑦᑎᓂᐅᕗᖅ," ᐅᖃᓚᐅᖅᐳᖅ, ᐃᖅᑲᐅᒪᓪᓗᓂ ᖃᓄᖅ ᓯᕗᓕᕆᓚᐅᖅᑕᕗᑦ ᐊᒃᓱᕈᓚᐅᕐᓂᖏᓐᓂᒃ ᐅᑎᖅᑎᑦᑎᔪᒪᓪᓗᑎᒃ ᒪᓕᒐᙳᖅᑎᑕᐅᔪᒥᒃ ᖁᕕᐊᓲᑎᖃᕐᓂᕐᒥᒃ.  

ᐅᖃᐅᔾᔨᒋᐊᕈᑎᒋᔭᖓ ᒪᒃᑯᒃᑐᓄᑦ ᐃᑲᔪᕈᒪᔪᓄᑦ ᓄᓇᓕᖏᓐᓂ ᓴᖅᑭᑉᐸᓪᓕᐊᓕᕐᓗᑎᒃ, ᐊᔪᕐᓇᕋᓗᐊᖅᐸᑦ ᓯᕗᓪᓕᕐᒥ, ᓄᓇᓕᐃᓪᓗ ᐱᕈᖅᑎᑉᐸᓪᓕᐊᓗᒍ ᑕᐃᒫᒃ. ᑭᖑᓂᐊᒍᑦ, ᐃᓄᐃᑦ ᐃᓕᖕᓂᒃ ᐃᓕᓴᖅᓯᓂᐊᖅᐳᑦ ᐊᒻᒪ ᐃᓕᖕᓂᒃ ᐊᑲᐅᒃᓴᓕᕐᓗᑎᒃ, ᒧᐊ ᑎᓕᐅᕆᕗᖅ, ᐊᒻᒪ ᖁᕕᐊᓱᒍᑎᖃᖁᔨᓪᓗᓂ ᒥᑭᑦᑐᑯᓗᖕᓂᒃ ᐊᓂᒍᖅᑎᓯᒪᔭᕐᓂᒃ ᐊᖅᑯᑖᓂ. ᐃᑲᔫᑎᒋᕙᒃᑕᖏᑦ podcasts ᐅᖃᓪᓚᖃᑎᖃᕈᓐᓇᑦᑎᐊᖅᑐᑦ, ᓇᖕᒥᓂᖅ ᐃᓅᓯᖓᓂ ᖃᐅᔨᒪᙱᖦᖢᓂ ᑭᓯᐊᓂ ᐱᓕᕆᐊᖏᑦ ᐱᕐᔪᐊᖑᓗᐊᕌᓗᙱᖦᖢᑎᒃ. ᐃᒪᓐᓇᐅᖁᔨᕗᖅ, ᐃᓱᒫᓗᙱᓪᓗᑎᒃ ᐃᓅᖃᑎᖃᖅᐸᖕᓂᕐᒥᒃ ᓈᒻᒪᙱᓕᐅᕈᑎᖃᕐᓂᕐᒥᒃ ᓲᖃᐃᒻᒪ ᐃᓄᐃᑦ ᐅᔾᔨᕈᓱᙱᑐᐃᓐᓇᕆᐊᖃᕐᒪᑕ. ᐃᓅᖃᑎᑎᑦ ᓇᓂᓗᒋᑦ ᐱᓇᔪᐃᓐᓇᕐᓗᑎᓪᓗ ᒪᕐᕉᒃ ᐅᖃᐅᔾᔪᖅᓱᐃᔾᔪᑎᓪᓗᐊᑕᖏᑦ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᐅᖃᐅᓯᖃᖅᐳᖅ ᑎᓕᐅᕆᓂᕐᒥᒃ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ, "ᓯᓐᓇᒃᑑᒪᒍᕕᑦ ᑭᓱᒥᒡᓘᓐᓃᑦ ᐃᓱᒪᐃᓐᓇᖃᑦᑕᕈᕕᑦ, ᐃᓱᒪᖕᓄᑦ ᓴᖅᑭᑦᑐᖃᖅᐸᒃᐳᖅ ᐱᔾᔪᑎᖃᕐᓗᓂ, ᓱᖁᑎᒋᙱᑐᐃᓐᓇᕐᓗᒍ. ᑕᒪᓐᓇ ᑕᕐᓂᐅᔪᖅ, ᐊᒻᒪᓗ ᐊᔪᙱᑦᑐᐊᓘᕗᑎᑦ... ᓇᓂᓯᒍᕕᑦ ᑭᓱᒥᒃᑭᐊᖅ ᐱᔾᔪᑎᒋᔭᕐᓂᒃ ᖁᕕᐊᒋᑦᑎᐊᖅᑕᕐᓂᒃᓗ, ᐊᑏ ᐱᓇᔪᒡᓗᒍ, ᑲᑉᐱᐊᓇᕋᓗᐊᖅᐸᑦ."

ᓄᓇᓕᖕᓃᑲᑕᖕᓂᖅ ᐊᒻᒪ ᑲᑎᙵᑎᑦᑎᕙᒃᖢᓂ ᐃᖅᑲᓇᐃᔮᑐᐃᓐᓇᐅᙱᓚᖅ ᓗᐊᓇ ᒧᐊᒧᑦ, ᐱᓕᕆᐊᒃᓴᕆᖕᒪᒍ. ᐃᓕᓐᓂᐊᖅᑎᑦᑎᕙᒃᖢᓂ ᒪᒃᑯᒃᑐᓄᑦ ᐃᓐᓇᕐᓄᓪᓗ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ ᑲᑎᑎᑦᑎᕙᒃᖢᓂᓗ ᐃᓄᖕᓂᒃ, ᐆᒻᒪᑎᖃᑦᑎᐊᖅᐳᖅ ᓴᖅᑭᑎᑦᑎᓂᕐᒥᒃ ᑲᔪᓯᑎᑦᑎᓂᕐᒥᒡᓗ ᓄᓇᓕᖕᓂ ᓇᒧᙵᐅᓕᕌᖓᒥ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.