"ᑭᒃᑯᓕᒫᓂᒃ ᐃᕿᑦᑎᑐᐃᓐᓇᕈᒪᒐᓗᐊᖅᐳᖓ," ᐅᖃᖅᑐᖅ ᒫᑕᓕᓐ ᒪᑳᓚᒻ. ᐊᑎᖓ ᓄᓇᕐᔪᐊᖅ ᓴᙱᔪᖅ ᐊᕐᓇᖅ ᐊᒻᒪᓗ ᓴᔅᑳᑦᓱᐊᓐ ᐅᐊᖕᓇᖅᐸᓯᐊᓂ ᓄᓇᓕᖓᓂ ᑕᐃᔭᐅᔪᖅ Île-à-la-Crosse. ᑕᐃᑲᓂᕐᒥᐅᑕᐅᓚᐅᖅᓯᒪᔪᖅ 12-ᓂᒃ ᐅᑭᐅᖃᓕᕋᒥ ᑎᑭᖦᖢᒍ, ᐊᑖᑕᒥᓂᒃ ᕿᓂᕆᐊᖅᑐᖅᖢᓂ ᐳᕆᑎᔅ ᑲᓚᒻᐱᐊᒧᑦ. 30 ᐊᕐᕌᒍᐃᑦ ᐊᓂᒍᖅᑎᓪᓗᒋᑦ, ᓄᓇᖃᓕᖅᐳᖅ ᒪᐃᐳᓪ ᕆᔾ, ᐳᕆᑎᔅ ᑲᓚᒻᐱᐊᒥ.

ᐃᖅᑲᓇᐃᔮᒥᒍᑦ ᐃᓅᓯᖓᓂ, ᒪᑳᓚᒻ ᓇᖕᒥᓂᖃᖅᑎᐅᕗᖅ. ᐱᒋᐊᓚᐅᖅᓯᒪᕗᖅ ᐊᓪᓚᖓᔪᓂᒃ ᒧᒥᕐᓂᕐᒥᒃ, ᑭᖑᓂᐊᒍᓪᓗ ᐹᕗ ᒧᒥᕐᓂᕐᒥᒃ, ᑭᖑᓂᐊᒍᓪᓗ ᑭᖑᕝᕕᐅᑎᓪᓗᓂ ᒧᒥᕐᓂᕐᒥᒃ hiphop−ᒧᑦ ᐊᒻᒪ R & B ᐃᙱᖅᑎᓄᑦ. ᑭᖑᓂᐊᒍᑦ, ᐃᓄᐃᑦ ᐊᐱᕆᔭᐅᓕᓚᐅᖅᐳᖅ ᐅᓂᒃᑳᖁᓪᓗᓂᐅᒃ ᐅᓂᒃᑳᕆᔭᒥᓂᒃ, ᐅᖃᓪᓚᒃᑎᐅᖃᑕᐅᔪᒪᓪᓗᓂ ᐅᖃᓪᓚᒃᑎᓪᓗᐊᑕᐅᓗᓂᓗ. ᓇᖕᒥᓂᖅ ᐃᖅᑲᓇᐃᔮᖃᕋᓗᐊᖅᖢᓂ, ᐅᖃᐅᓯᖃᖔᕈᒪᕙᒃᐳᖅ ᐱᓕᕆᐊᕆᔭᒥᓂᒃ ᐃᒻᒥᓂᒃ−ᓇᒡᓕᒍᓱᖕᓂᕐᒥᒃ ᐱᓕᕆᓂᐅᓂᖓᓂᒃ ᓇᖕᒥᓂᕆᔭᐅᙱᖔᖅᖢᓂ.

ᕿᑎᐊᓃᑦᑐᖅ ᑕᒪᑐᒪ ᐃᖏᕐᕋᓂᐅᔪᒥ ᐅᒃᐱᕈᓱᖕᓂᖓ ᐱᒻᒪᕆᐅᓂᖏᓐᓂᒃ ᐃᓄᐃᑦ ᐊᒻᒪ ᐃᒻᒥᓂᒃ. "ᑭᒃᑯᓕᒫᑦ, ᐃᓄᓕᒫᑦ, ᒪᒃᑯᒃᑐᓕᒫᑦ, ᖃᐅᔨᒪᖁᕙᒃᑲ ᓈᒻᒪᖕᓂᔅᓯᓐᓂᒃ. ᑕᐃᒪᙵᑦ ᐃᓅᓚᐅᖅᑎᓪᓗᑎᑦ. ᑕᒪᓐᓇ ᐅᕙᓐᓄᑦ ᖃᐅᔨᓕᓚᐅᖅᓯᒪᔭᕋ ᑕᐃᒪᙵᑦ ᐃᓅᓚᐅᖅᓯᒪᒐᒪᓂᑦ, 100 ᐳᓴᓐᑎᒥᒃ ᐊᓐᓂᕐᓇᐃᓐᓇᐅᔭᓚᐅᖅᑐᖓ ᓈᒻᒪᒃᖢᖓᓗ, ᐊᓈᓇᒐ ᐊᑖᑕᒐᓗ ᐅᕙᓐᓂᒃ ᐸᖅᑭᔪᓐᓇᓚᐅᙱᒃᑲᓗᐊᖅᑎᓪᓗᒋᑦ, ᐱᕈᖅᓴᖃᑎᒋᔪᓐᓇᓚᐅᙱᒃᑲᓗᐊᖅᖢᒋᑦ ᐊᖏᕐᕋᕆᔭᓐᓂ, ᐊᖏᕐᕋᖃᙱᖦᖢᖓ ᓯᓚᒥ, ᑎᒍᐊᙳᐊᕆᔭᐅᓯᒪᒐᓗᐊᖅᑎᓪᓗᖓ, ᐱᑦᑎᐊᖅᑕᐅᖃᑦᑕᙱᒃᑲᓗᐊᖅᑎᓪᓗᖓ ᐊᐃᑉᐸᕇᖕᓂᒃᑯᑦ, ᑕᒪᓐᓇ ᒥᒃᖠᒋᐊᖅᑎᑦᑎᓚᐅᖅᓯᒪᙱᓚᖅ ᐱᒻᒪᕆᐅᒋᔭᓐᓂᒃ... ᑕᒪᓐᓇ ᖃᐅᔨᓕᑕᐃᓐᓇᓚᐅᖅᑕᕋ ᑭᓯᐊᓂ 35-ᓂᒃ ᐅᑭᐅᖃᓕᖅᖢᖓ, ᓱᓕ ᐊᓐᓂᕐᓇᖅᑐᐃᓐᓇᐅᓂᑦᑎᓐᓂᒃ, ᐊᒃᓱᕈᕐᓇᖅᑐᒃᑰᕋᓗᐊᖅᑎᓪᓗᑕ ᐃᓅᓯᑦᑎᓐᓂ.... ᐊᒻᒪ ᑕᒪᓐᓇ ᐃᖅᑲᓇᐃᔮᕆᒐᒃᑯ, ᓇᒡᓕᖕᓂᕐᒥᒃ ᐊᒥᖅᑳᖃᑎᖃᕈᓐᓇᖅᐳᖓ."

ᐃᓕᓐᓂᐊᕐᓂᖓᓄᓪᓕ, ᒪᑳᓚᒻ ᐊᕐᕌᒎᖕᓄᑦ ᒪᕐᕉᖕᓄᑦ ᐱᕋᔭᖕᓂᓕᕆᓂᕐᒥᒃ ᐱᕙᒌᔭᓚᐅᖅᐳᖅ ᐃᖅᑲᓇᐃᔮᒃᓴᒧᑦ ᐱᓇᔪᒍᒪᙱᑕᒥᓄᑦ. ᐱᕈᖅᓴᓪᓗᓂ, ᐃᓕᑦᑎᓚᐅᖅᐳᖅ ᖁᕕᐊᓲᑎᖃᕐᓂᐅᔪᒥ ᐃᓚᐅᕝᕕᒋᔭᒥᓂᑦ ᐊᑖᑕᒥᓄᑦ. "ᐅᖃᓪᓚᕆᒃᐸᒃᐳᖓ ᖃᐅᔨᒪᓂᕆᔭᒃᑲ ᑐᙵᕕᖃᓪᓚᕆᖕᓂᖏᓐᓂᒃ ᐃᓅᓯᓐᓂ ᐊᑐᖅᓯᒪᔭᓐᓂᒃ ᐊᒻᒪ ᖃᐅᔨᒪᓂᕆᔭᕗᑦ ᑕᒪᒃᑯᓂᖓ ᐊᒥᖅᑳᕈᑎᖃᖅᐸᒃᖢᑎᒃ, ᐅᕙᖓᓗ ᑲᑎᙵᑎᖦᖢᒋᑦ ᐊᑐᓕᖅᑎᖦᖢᒍᓗ," ᐅᓂᒃᑳᕆᓪᓗᓂ.

ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᐊᖏᕐᕋᒥᓂ ᐊᐅᓪᓚᕈᒪᔪᓄᑦ ᐃᓕᓐᓂᐊᕈᒪᔭᒥᓄᑦ ᐃᖅᑲᓇᐃᔮᕆᔪᒪᔭᒥᓄᓪᓗ, ᒪᑳᓚᒻ ᐅᖃᓚᐅᖅᐳᖅ, "ᐃᓚᖓᑦ ᐃᓕᓐᓂᐊᖅᑎᑦᑎᔾᔪᑎᒋᔭᒪ ᐊᖅᑯᑎᒋᔭᓐᓂ ᐅᐃᒪᔮᖅᑎᑦᑎᕌᕐᔪᒃᑯᓂ, ᐋᓐᓂᕐᓇᙱᖦᖢᓂᓗ, ᑭᓯᐊᓂ ᐃᖢᕐᕆᔪᓐᓃᖅᑎᑦᑎᑐᐃᓐᓇᖅᐳᖅ, ᑕᐃᑯᙵᕐᓗᑎᑦ ᐃᓗᐊᙱᑦᑐᒧᑦ ᐃᓂᒧᑦ, ᓲᖃᐃᒻᒪ ᑕᐃᑲᓂ ᐱᕈᖅᐸᒃᐳᑎᑦ. ᐅᑎᕈᓐᓇᐃᓐᓇᐅᔭᖅᐳᑎᑦ.... ᐃᖅᑲᐅᒪᑐᐃᓐᓇᕆᑦ ᐱᕈᖅᐸᓪᓕᐊᓂᕆᔭᕐᓂᒃ ᓄᓇᔅᓯᓐᓄᑦ ᐅᑎᖅᑎᑦᑐᒪᔭᕐᓂᒃ... ᐃᓕᓴᕆᔪᒪᕙᕋ ᓴᙱᔪᐊᓘᒐᕕᑦ, ᑖᒃᑯᐊᑎᑐᑦ ᒪᒃᑯᒃᑐᑎᑐᑦ, ᓴᙱᔪᐊᓘᕗᑎᑦ ᐊᒻᒪ ᐊᔪᙱᑦᑎᐊᖅᖢᑎᑦ, ᐃᓛᓐᓂᒃᑯᓪᓗ ᐊᓂᔭᕆᐊᖃᖅᐸᒃᖢᑕ ᐅᑎᕈᓐᓇᕐᓂᐊᕋᕕᑦ."

ᓇᓗᓇᐃᖅᓯᖕᒥᔪᖅ ᖃᓄᐃᙱᓐᓂᖓᓂᒃ ᑲᑉᐱᐊᓱᒋᐊᒃᓴᖅ ᐊᒻᒪ ᓯᓚᖅᔪᐊᕐᒧᐊᕐᓗᓂ ᑲᑉᐱᐊᓱᒡᓗᓂ ᐊᓂᒎᑎᓗᒍᓗ ᑲᑉᐱᐊᓱᖕᓂᖅ. ᓱᕈᓯᐅᓪᓗᓂ, ᒪᑳᓚᒻ ᑲᑉᐱᐊᓱᒃᑐᒻᒪᕆᐅᓚᐅᖅᐳᖅ ᒫᓐᓇᓗ ᓇᒧᙵᐅᕈᓘᔭᖅᐸᒃᖢᓂ ᖃᓄᑐᐃᓐᓇᑦᑎᐊᕐᓗ ᐱᓕᕆᕙᒃᖢᓂ ᐃᓱᒪᒋᓚᐅᖅᓯᒪᙱᑕᒥᓂᒃ. ᐊᓈᓇᒥᓂᒃ ᐱᔪᒃᓯᑎᑦᑎᓯᒪᒻᒪᕆᒃᑐᖅ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ, ᒪᑳᓚᒻ ᐅᖃᐅᔾᔭᐅᔪᒪᓇᔭᖅᐳᖅ ᓇᒡᓕᒋᔭᐅᓂᖓᓂᒃ ᐊᒻᒪ ᓇᒡᓕᒋᔭᐅᔪᓐᓇᑦᑎᐊᕐᓂᖓᓂᒃ. ᑐᓴᕈᒪᒐᔭᕐᒥᔪᖅᑕᐅᖅ ᒧᒥᖅᑎᑦᑎᐊᕙᐅᓂᖓᓂᒃ. ᐱᐅᔪᓂᒃ ᐅᖃᕐᕕᐅᖃᑦᑕᖁᔨᒐᓗᐊᖅᐳᖅ ᒫᓐᓇᓗ ᐱᐅᔪᓂᒃ ᐅᖃᐅᓯᖃᓕᖅᖢᓂ ᓇᖕᒥᓂᖅ, ᖃᐅᔨᒪᓪᓗᓂ ᖃᓄᖅ ᐱᒻᒪᕆᐅᑎᒋᖕᒪᖔᑦ.

ᓇᓕᒧᒌᒃᑎᑦᑎᓇᓱᒃᖢᓂ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᒃ, ᒪᑳᓚᒻ ᐊᑐᖅᐸᒃᐳᖅ ᓱᓕᓂᕋᐃᓂᕐᒥᒃ ᐅᓪᓛᒃᑯᑦ, ᖃᐅᔨᒪᒐᒥ ᐃᒻᒥᓂᒃ−ᐅᖃᓪᓚᒍᓐᓇᕐᓂᖅ ᓴᙱᔪᐊᓘᓂᖓᓂᒃ. "ᐊᓯᙳᖅᑎᑦᑎᔭᕆᐊᖃᓕᖅᐳᒍᑦ ᐃᓗᒃᑯᑦ ᐅᖃᓪᓚᖕᓂᕆᔭᑦᑎᓐᓂᒃ ᐊᒻᒪ ᐅᖃᐅᓯᕐᓂᒃ ᐊᓯᑦᑕ ᐅᖃᐅᓯᕆᓚᐅᖅᑕᖏᓐᓂᒃ ᐅᕝᕙᓘᓐᓃᑦ ᑭᓇᑐᐃᓐᓇᐅᑉ ᐅᖃᖅᑕᖏᓐᓂᒃ ᑐᓴᕈᒪᓇᔭᖅᑕᑦᑎᓐᓂᒃ. ᐱᔪᓐᓇᕐᓂᖃᖅᐳᒍᑦ. ᐅᕙᑦᑎᓐᓃᑉᐳᖅ. ᐱᔪᓐᓇᕐᓂᖃᖅᐳᒍᑦ ᐊᓯᔾᔨᖅᓯᔪᓐᓇᕐᓂᕐᒥᒃ ᑕᒪᑐᒥᖓ ᐅᓂᒃᑳᕆᔭᐅᔪᒥᒃ ᐊᓯᔾᔨᖅᓯᔪᓐᓇᕐᓂᕐᒥᒡᓗ ᑎᑎᕋᐅᔭᖅᓯᒪᔪᒥᒃ ᐅᕙᑦᑎᓐᓃᑦᑐᒥᒃ." ᐃᓕᑦᑎᓯᒪᕗᖅ ᐊᑖᑕᒥᓂᒃ ᓇᒡᓕᒍᓱᖕᓂᕐᒥᒃ ᐃᒻᒥᓂᒃ−ᓇᒡᓕᒍᓱᖕᓂᕐᒥᒃ. "ᐃᓕᑦᑎᓂᖅ ᐅᕙᑦᑎᓐᓂ ᓇᒡᓕᒍᓱᖕᓂᕐᒥᒃ ᐊᒃᓱᕈᕐᓇᓛᖑᖃᑕᐅᕗᖅ ᐃᓅᓯᑦᑎᓐᓂ. ᐊᔪᕐᓇᙱᑉᐳᖅ ᑕᒪᔅᓯᑦᑎᐊᖅ, ᐃᓄᓕᒫᑦᑎᐊᓄᑦ," ᑎᓕᐅᕆᕗᖅ, ᓇᖕᒥᓂᖅ ᐊᑐᖅᓯᒪᔭᒥᓂᒃ ᑕᑯᒃᓴᐅᑎᑦᑎᓪᓗᓂ ᐊᔪᕐᓇᙱᓐᓂᖓᓂᒃ. ᑎᓕᐅᕆᕙᒃᐳᖅ ᐱᒋᐊᕈᑎᖃᕐᓗᓂ ᐊᔪᕐᓇᙱᑦᑐᑯᓗᖕᓂᒃ ᓱᓕᓂᕋᐃᔾᔪᑎᓂᒃ, "ᓈᒻᒪᒃᐳᖓ ᑕᐃᒪᐃᑦᑑᓂᓐᓄᑦ, ᑕᐃᒪᐃᑦᑑᓂᓐᓄᑦ ᐱᐅᔪᒻᒪᕆᐅᕗᖅ, ᓴᙱᓂᖃᑦᑎᐊᖅᐳᖓ, ᑕᐃᒪᐃᖏᓐᓇᐅᔭᖅᖢᖓᓗ."

ᖃᐅᔨᓯᒪᔭᖓᓕ ᐊᒥᓱᐊᓗᐃᑦ ᐅᖃᓪᓚᒃᑎᐅᒐᔪᒃᑐᑦ ᐅᖃᐅᓯᖃᖅᐳᑦ ᓄᓇᖃᖅᑳᖅᓯᒪᔪᑦ ᓄᓇᕐᔪᐊᒥ ᑕᐅᑐᖅᑰᖅᑕᖏᓐᓂᒃ ᐊᒻᒪ ᐱᓕᕆᔾᔪᓯᖏᓐᓂᒃ ᐊᒻᒪ ᐃᓂᒃᓴᖃᐃᓐᓇᐅᔭᖅᖢᓂ ᓂᐱᓂᒃ ᑕᒪᑐᒥᖓ ᐱᒻᒪᕆᐊᓗᖕᒥᒃ ᐱᓕᕆᐊᖃᖅᑐᓂᒃ. ᐅᒃᐱᕈᓱᖕᒥᔪᖅ ᐆᒻᒪᑎᐅᑉ ᐱᓕᕆᓂᕆᓚᐅᖅᑕᖓ ᑕᑯᒃᓴᐅᔪᓐᓇᕐᓂᖓᓂᒃ ᕿᓚᖕᒥᑦ ᐊᒻᒪ "ᑕᐃᒪᙵᑦ ᑭᓇᑐᐃᓐᓇᖅ ᓇᓂᓯᒃᑲᓐᓂᕌᖓᑦ ᖃᐅᒪᓂᕐᒥᓂᒃ ᐊᒻᒪ ᐃᑭᒃᑲᓐᓂᖅᖢᓂᐅᒃ, ᑕᑯᔪᓐᓇᖅᐳᑎᑦ ᖃᐅᒪᔪᑦ ᑖᒃᑯᓇᙵᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᐊᒻᒪ ᓄᓇᓕᕗᑦ ᖃᐅᒪᑎᑕᐅᑐᐃᓐᓇᖅᐸᒃᖢᑎᒃ ᓇᒡᓕᒍᓱᖕᓂᕐᒧᑦ, ᐊᒻᒪ ᑕᐃᒪᐃᑦᑐᓂᒃ ᖃᐅᒪᓂᕐᒥᒃ ᐊᒻᒪ ᓇᒡᓕᖕᓂᕐᒥᒃ"

ᒪᑳᓚᒻ ᐃᓂᖃᕆᕗᖅ ᐊᒃᓱᕈᕐᓇᖅᑐᓂᒃ ᓂᕆᐅᖕᓂᖃᕐᓂᕐᒥᒡᓗ. "ᐅᖃᐃᓐᓇᐅᔭᖅᐳᖓ, ᐊᔪᕐᓇᙱᓐᓂᖓᓂ ᐆᒻᒪᑎᒃᑯᑦ ᓱᕋᒃᓯᒪᔪᒥ ᐊᒻᒪ ᖁᕕᐊᓱᒡᓗᓂ ᐊᑕᐅᑦᑎᒃᑯᑦ... ᐃᓅᓯᓕᒫᓐᓂ ᐆᒻᒪᑎᒃᑯᑦ ᓱᕋᒃᓯᒪᔪᒥᒃ ᐃᓅᓯᖃᖅᓯᒪᕗᖓ... ᑭᓯᐊᓂ ᖁᕕᐊᓱᖕᓂᕐᒥᒃ ᓂᕈᐊᕆᔭᖃᕐᒥᔪᖓ, ᐊᑕᐅᓯᕐᒥᒃ ᐃᓅᓯᖃᕋᒪ,.... ᐊᒻᒪᓗ ᐅᕙᓐᓂᒃ ᐱᐅᓛᖑᔪᒪᕗᖓ ᖃᐅᔨᑎᑦᑐᒪᒐᒃᑯ, ᒫᑕᓚᐃᓐᒧᑦ, ᒫᑎᒧᑦ, ᐅᓪᓚᒃᐸᓚᐅᖅᑐᒧᑦ ᐊᖅᑯᑎᒃᑯᑦ ᕿᐊᓪᓗᓂ. ᖃᐅᔨᑎᑦᑐᒪᕙᕋ... ᑕᒪᒃᑯᓂᖓᓕᒫᖅ ᐱᓕᕆᔪᓐᓇᕐᓂᖓᓂᒃ, ᐱᒃᑯᒥᒍᓱᑐᐃᓐᓇᙱᓪᓗᓂ, ᑭᓯᐊᓂ ᐅᖃᕐᓗᓂ ᐊᔪᕐᓇᙱᓐᓂᖓᓂᒃ ᐅᕙᒍᑦ ᒥᑭᑦᑐᑯᓗᒃ ᓱᕈᓯᐅᓪᓗᑕ ᐃᓅᔪᓐᓇᕐᓂᑦᑎᓐᓂᒃ ᓄᓇᕐᔪᐊᒥ ᐊᒻᒪ ᐊᒥᖅᑳᖃᑎᖃᕐᓗᑕ ᓇᒡᓕᖕᓂᑦᑎᓐᓂᒃ ᐊᒻᒪ ᖃᐅᒪᓂᑦᑎᓐᓂᒃ ᐊᒻᒪ ᑕᑯᒃᓴᐅᑎᑦᑎᓗᑕ ᐱᔭᕆᐊᖃᕐᓂᑦᑎᓐᓂᒃ ᓇᒡᓕᒍᓱᖕᓂᕐᒥᒃ," ᖁᕕᐊᓱᒃᑐᖅ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᒪᑳᓚᒻ ᐅᖃᓚᐅᖅᐳᖅ, "ᐃᓛᓐᓂᒃᑯᑦ ᐃᓄᐃᑦ ᐃᒪᐃᓕᓲᖑᕗᑦ, 'ᐅᐊᑲᓪᓚᒃ, ᐱᐅᔪᒻᒪᕆᐅᕗᑎᑦ.' ᐊᒻᒪ ᓄᒫᓱᒃᓯᒪᕗᖓ ᐱᐅᙱᑦᑐᒥᒡᓗ ᐃᓅᓯᓕᒫᓐᓂ ᓲᖃᐃᒻᒪ ᓄᓇᕐᔪᐊᕐᒥᐅᑦ ᐊᔪᕆᖅᓲᔾᔨᓯᒪᖕᒪᑕ ᐅᕙᓐᓂᒃ ᖃᓄᖅ ᑕᐃᒪᐃᓕᐅᕈᓐᓇᕐᒪᖔᕐᒪ. ᐊᔾᔨᒋᙱᑕᖓᓂᒃ ᐱᓕᕆᔪᒪᔪᖓ. ᑕᑯᑎᑦᑐᒪᕙᒃᑲ ᐃᓐᓇᖁᑎᕗᑦ, ᐃᓐᓇᖁᑎᕗᑦ, ᕿᑐᕐᙵᕗᑦ ᐃᓅᔪᓐᓇᕐᓂᑦᑎᓐᓂᒃ ᖁᖓᔮᕐᓗᑕ."

ᑭᒃᑯᓕᒫᓂᒃ ᐃᕿᑦᑎᔪᒪᒐᓗᐊᖅᖢᓂ ᑭᓯᐊᓂ ᐊᔪᕋᒥ, ᓇᖕᒥᓂᖃᖅᑎ ᒫᑕᓖᓐ ᒪᑳᓚᒻ ᐱᒋᐊᖅᑎᑦᑎᓚᐅᖅᐳᖅ ᐃᒻᒥᓂᒃ−ᓇᒡᓕᒍᓱᖕᓂᕐᒥᒃ ᑕᑯᑎᑦᑎᓇᓱᒃᖢᓂ ᐃᓄᖕᓂ ᖃᓄᖅ ᐃᖕᒥᓂᒃ ᓇᒡᓕᒍᓱᒍᓐᓇᕐᓂᕐᒥᒃ. ᒧᒥᑲᑕᒃᖢᓂ ᒧᒥᖅᐸᒃᖢᓂ ᐅᓂᒃᑳᖅᑐᐊᖃᖅᖢᓂ ᐊᒻᒪ ᐅᖃᖅᑎᐅᓪᓗᓂ, ᓇᖕᒥᓂᖅᑖᓚᐅᖅᐳᖅ ᐊᒥᖅᑳᖃᑎᖃᖅᐸᒃᖢᓂ ᐊᔪᙱᑕᒥᓂᒃ ᐊᒻᒪ ᐱᓗᐊᖅᑐᒥ ᓇᒡᓕᖕᓂᕐᒥᒃ ᐊᒥᖅᑳᖃᑎᖃᖅᐸᒃᖢᓂ. ᐃᓅᓯᓕᒫᖓᓂ ᐆᒻᒪᑎᖓ ᓱᕋᒃᓯᒪᓪᓗᓂ ᐃᓅᓯᓕᒫᖓᓂ ᒫᓐᓇᓗ ᐆᒻᒪᑎᖓ ᐃᒻᒥᓂᒃ ᓇᒡᓕᒍᓱᑦᑎᐊᓕᖅᐳᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.