"ᐊᓕᐊᓇᐃᒋᑦᑎᐊᖅᑕᐃᑦ ᐱᓕᕆᐊᕆᔭᐃᑦ... ᓴᐸᖓᓕᖅᓱᐃᓂᖅ ᖁᕕᐊᒋᑦᑎᐊᖅᑕᕋ," ᑎᓕᐅᕆᕗᖅ ᒫᓖᓐ ᑦᓴᓐ. ᐊᑎᑐᖃᖓ ᐳᕋᐅᓐ ᐸᕙᓘ ᐊᕐᓇᖅ ᐃᓚᒋᔭᐅᓪᓗᓂᓗ Turtle Clan-ᑯᓐᓄᑦ. ᐱᕈᖅᓴᓚᐅᖅᑐᖅ ᑐᕌᓐᑐᒥ 17-ᓂᒃ ᐅᑭᐅᖃᓕᕋᒥ ᐊᓈᓇᖓ ᐱᕈᖅᓴᐃᔪᒪᓚᐅᖏᒻᒪᑦ ᐃᓚᒥᓂᒃ ᓄᓇᖃᕐᕕᒻᒥ ᑲᑉᐱᐊᓱᓐᓂᕐᒥᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ. ᓄᓇᖃᖅᓯᒪᓕᖅᑐᖅ ᑭᐊᔅᑭ ᓵᔨᖕ 27-ᓂᒃ ᐊᕐᕌᒍᓂᒃ ᒫᓐᓇᐅᓕᖅᑐᖅ ᐊᒻᒪᓗ ᖁᕕᐊᒋᔭᖃᖅᖢᓂ ᓄᓇᑐᐃᓐᓇᕐᒥᐅᑕᐅᓂᕐᒥᒃ, ᓄᓇᓕᖅᐸᐅᔭᕐᒧᐊᖅᐸᒃᖢᓂ ᑭᓯᐊᓂ ᓂᐅᕕᕆᐊᖅᓯᒪᓪᓗᓂ. 

ᑐᓴᓐ ᐊᓈᓇᑦᑎᐊᒥᓂᒃ ᓴᐸᖓᓕᕆᓂᕐᒥᒃ ᐃᓕᑦᑎᓚᐅᖅᐳᖅ 17-ᓂᒃ ᐅᑭᐅᖃᖅᖢᓂ ᓯᕗᓪᓕᖅᐹᒥᒡᓗ ᕿᑐᕐᙵᖅᑖᖅᖢᓂ. ᓴᐸᖓᓕᖅᓱᐃᖏᓐᓇᖅᑐᖅ ᑕᐃᒪᙵᓂᑦ ᐊᕐᕌᒍᐃᑦ 8 ᐅᖓᑖᓄᑦ ᐅᐃᒪᔮᓕᖅᑎᓪᓗᒍ. ᓴᓇᙳᐊᕐᓂᕆᓇᓱᒋᓪᓗᓂᐅᒃ ᑕᐃᒪᙵᓪᓗ 25-ᓂᒃ ᐅᑭᐅᖃᓕᕋᒥ. ᓂᐅᕕᐊᒃᓴᖃᖃᑦᑕᓚᐅᖅᐳᖅ ᐱᙳᐊᕆᐊᖅᑐᖅᑐᓂ ᐊᒻᒪ ᓴᓇᙳᐊᒐᕐᓂ ᐊᒻᒪ ᓴᓇᙳᐊᒐᕐᓂ ᑕᑯᒃᓴᐅᑎᑦᑎᓂᐅᔪᓂ ᐊᒻᒪ ᐃᓄᖕᓂ ᐊᒥᓱᓂ ᐊᔭᐅᕆᓂᖃᓚᐅᙱᓚᖅ ᐊᒻᒪ ᑲᔪᖏᖅᓴᐃᓂᖃᓚᐅᙱᓚᖅ ᑕᐃᔅᓱᒪᓂ. 

ᑐᓴᓐ 40-ᓂᒃ ᐅᑭᐅᖃᓕᖅᑎᓪᓗᒍ, ᐃᑲᔪᖃᑦᑕᓕᓚᐅᖅᐳᖅ ᐊᒻᒪ ᓂᐅᕕᐊᒃᓴᖃᖃᑦᑕᓕᖅᖢᓂ ᓴᓇᙳᐊᒐᕐᓂᒃ ᐅᐃᒋᓚᐅᖅᑕᒥᓄᑦ, ᓴᓇᙳᐊᒐᕐᓄᑦ ᑕᑯᔭᒐᖃᕐᕕᖕᒧᐊᖅᑎᖦᖢᓂᒋᑦ ᐊᒻᒪ ᐃᒻᒥᓂᒃ ᐱᔪᒥᓇᖅᓯᑎᖦᖢᓂᒋᑦ ᐊᑕᐅᑦᑎᒃᑯᑦ. ᐃᓚᐅᓚᐅᕐᒥᔪᖅ ᐋᓐᑎᐅᕆᐅᒥ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᑲᑐᔾᔨᖃᑎᒌᖏᓐᓄᑦ, ᓂᐅᕕᐊᒃᓴᖃᖅᐸᒃᖢᓂ ᓴᐸᖓᕐᓂᒃ ᑲᑎᒪᕕᒡᔪᐊᕐᓂᐅᔪᓂ, ᓴᐸᖓᓕᕆᓂᕐᒥᒃ ᐃᓕᓐᓂᐊᖅᑎᑦᑎᕙᒃᖢᓂ ᐊᒻᒪ ᑲᑎᙵᖃᑎᖃᖅᐸᒃᖢᓂ. ᓯᕗᓪᓕᕐᒥ ᑲᙳᓱᓚᐅᖅᑑᒐᓗᐊᖅ ᑭᓯᐊᓂ ᖁᓱᔪᓐᓃᖅᐸᓪᓕᐊᓕᓚᐅᖅᐳᖅ ᐃᓄᖕᓄᓪᓗ ᑲᑎᖅᓱᖅᑕᐅᕙᓪᓕᐊᓕᖅᖢᓂ ᓴᓇᐅᒐᖏᑦ ᐊᒻᒪ ᑎᑭᓴᐃᖃᑦᑕᓕᖅᖢᑎᒃ. 

ᐅᖃᐅᔾᔨᒋᐊᕈᑎᒋᔭᖓ ᒪᒃᑯᒃᑐᓄᑦ ᕿᒪᐃᔪᒪᔪᓄᑦ ᐃᖅᑲᓇᐃᔮᒥᓂᒃ ᓯᕗᒻᒧᐊᒃᑎᑦᑎᔪᒪᓪᓗᑎᒃ ᐃᒪᓐᓇ, "ᓴᐱᓕᖅᑕᐃᓕᒋᑦ, ᓲᖃᐃᒻᒪ ᐊᒥᓱᑦ ᐃᓄᐃᑦ ᐃᓱᒪᑐᐃᓐᓇᕆᐊᖃᕐᒪᑕ, 'ᐃᓛᒃ, ᐱᐅᔪᐊᓗᖕᓂᒃ ᐱᓕᕆᓲᖑᒐᒪ', ᐅᕙᖓᑎᑐᑦ. ᐱᐅᔪᐊᓗᖕᓂᒃ ᐱᓕᕆᖃᑦᑕᖅᑰᕋᒪ, ᑭᓯᐊᓂ ᑕᒪᒃᑯᐊ ᐱᓯᒪᐃᓐᓇᕐᓂᐊᕋᕕᒋᑦ ᐃᓛᓐᓂᒃᑯᑦ ᐊᑯᓂᐊᓗᒃ ᓂᐅᕐᕈᑕᐅᓚᐅᙱᓐᓂᖏᓐᓂ." ᒪᕐᕉᖕᓂᒃ 6 ᐃᓯᒐᓂᒃ ᐊᖏᓂᓕᖕᒥᒃ ᒪᕐᕉᖕᓂᒃ ᐃᓯᒐᖕᓂᒃ ᑕᑕᑦᑐᓂᒃ ᐱᖁᑎᖃᖅᐳᖅ ᐅᑭᐅᓕᒫᖅ ᐱᓕᕆᖃᑦᑕᖅᓯᒪᔭᒥᓂᒃ ᖃᐅᔨᒪᓪᓗᓂᓗ ᓂᐅᕕᖅᑕᐅᑲᐅᑎᒋᔾᔮᙱᓐᓂᖏᓐᓂᒃ. 

"ᓴᓂᕐᕙᒃᑕᐅᓯᒪᔫᑉ ᓯᓚᑖᓅᕈᕕᑦ ᓴᐸᖓᓕᖅᓱᐃᖃᑦᑕᓕᕈᕕᑦ ᒥᖅᓱᑲᑕᓕᕈᕕᓪᓘᓐᓃᑦ ᓂᐅᕐᕈᑎᒃᓴᖃᙱᖦᖢᑎᓪᓗ, ᐃᓄᐃᑦ ᐃᓱᒪᓲᖑᕗᑦ, 'ᐃᓛᒃ, ᐱᐅᒃᓴᖅᑐᖃᙱᑦᑎᐊᖅᑐᖅ ᐱᖁᑎᓐᓂᒃ.' ᑖᓐᓇ ᓱᓕᙱᑦᑐᖅ. ᐱᐅᒃᓴᙱᓐᓂᕐᒨᙱᑦᑐᖅ... ᓇᓂᓯᔭᕆᐊᖃᕋᕕᑦ ᓂᐅᕐᕈᑕᐅᔪᓐᓇᖅᑐᓂᒃ, ᐊᒻᒪᓗ ᓂᐅᕕᐊᒃᓴᐅᔪᓐᓇᖅᑐᑦ ᓇᓂᔭᒃᓴᐅᙱᖦᖢᑎᒃ. ᓄᓇᖃᖅᑳᖅᑐᑦ ᓴᓇᐅᒐᖏᓐᓂᒃ ᒥᖅᓱᒐᕐᓂᓪᓗ ᑕᑯᒃᓴᐅᑎᑦᑎᔪᓄᐊᕋᓗᐊᕈᕕᑦ, 100-ᑲᓐᓂᕐᓂᒃ ᐃᓚᐅᔪᖃᕐᓂᐊᕐᒥᔪᖅ ᑕᕝᕙᓂᑦᑕᐃᓐᓇᖅ ᑕᑯᒃᓴᐅᑎᑦᑎᓂᐅᔪᒥᒃ, ᐊᒻᒪᓗ ᐱᒡᒍᓴᐅᔾᔪᐊᖃᑕᐅᔪᐃᓐᓇᐅᓂᐊᖅᖢᑎᒃ.... ᐊᖏᔪᐊᓗᖕᒥ ᐊᑭᑦᑐᕋᐅᑎᓂᖅᑕᖃᖅᐳᖅ ᑕᖅᑳᓂ...." ᐅᖃᐅᔾᔪᐃᕙᒃᐳᖅ.

"ᓴᙱᔫᑐᐃᓐᓇᕆᑦ. ᐃᑲᔪᖅᑎᒃᓴᖅᓯᐅᕐᓗᑎᑦ. ᖃᐅᔨᒪᒋᐊᕆᑦ ᐃᑲᔪᖅᑎᖃᑦᑎᐊᕋᓗᐊᕐᒪᖔᖅᐱᑦ ᑕᖅᑳᓂ, ᓲᖃᐃᒻᒪ ᕿᐊᓂᐊᕋᕕᑦ... ᕿᐊᓯᒪᕗᖓ. ᓂᑲᓪᓗᖓᓕᓚᐅᖅᐳᖓ ᓲᖃᐃᒻᒪ ᐃᖅᑲᓇᐃᔭᓕᓵᖅᑎᓪᓗᖓ, ᓂᐅᕕᐊᒃᓴᖃᖃᑦᑕᓕᓚᐅᖅᓯᒪᒐᒪ ᑭᓱᓕᒫᓂᒃ ᓴᓇᕙᓚᐅᖅᑕᓐᓂᒃ, ᑭᓯᐊᓂ ᓴᓇᓚᐅᙱᓐᓇᒪ ᓴᓇᔭᕆᐊᖃᕋᓱᒋᓚᐅᖅᑕᓐᓂᒃ... ᐃᓕᖕᓂᒃ ᓯᓚᐃᕐᕆᔪᓐᓇᖅᐳᑎᑦ ᐃᓱᒪᓗᑎᑦ, 'ᐆ, ᐱᑦᑎᐊᖅᑐᐊᓘᒐᒪ, ᑭᒃᑯᓕᒫᓪᓗ ᐱᖁᑎᒃᑲ ᐱᔪᒪᓂᐊᖅᐳᑦ.' ᑕᐃᒪᐃᙱᒃᑳᖓᑕᓗ, ᓂᑲᓪᓗᖓᓕᕐᓇᖅᐳᖅ. ᖃᐅᔨᒪᒋᐊᕐᓗᑎᑦ ᐃᑲᔪᖅᑕᐅᒐᓗᐊᕐᒪᖔᖅᐱᑦ, ᓲᖃᐃᒻᒪ ᓂᑲᓪᓗᖓᓂᖅ ᐱᓪᓚᑦᑖᖑᖕᒪᑦ," ᑐᓴᓐ ᐅᖃᖅᑐᖅ. 

ᐱᔪᒃᓯᑎᑦᑎᓇᓱᓕᕌᖓᒥ, tsun ᐊᔭᐅᖅᑕᐅᓚᐅᖅᐳᖅ ᓴᐸᖓᓕᕆᓂᕐᒥᒃ ᖁᕕᐊᒋᔭᖃᕐᓂᕐᒧᑦ. "ᑕᒪᓐᓇ ᐱᐅᒋᑦᑎᐊᓕᓚᐅᖅᐸᕋ, ᐊᒻᒪᓗ ᐊᒥᖅᑳᖃᑎᖃᕈᒪᓚᐅᖅᐳᖓ ᐃᓕᖅᑯᓯᕆᔭᓐᓂᒃ, ᖁᕕᐊᒋᔭᓐᓂᒃ ᐊᒥᖅᑳᖃᑎᖃᕈᒪᓪᓗᖓ, ᐊᔪᙱᓐᓂᕆᔭᓐᓂᒃ ᐊᒥᖅᑳᖃᑎᖃᕈᒪᓪᓗᖓ," ᐃᖅᑲᐅᒪᕗᖅ. ᐃᓄᐃᑦ ᓂᐅᕕᕌᖓᒥᒃ ᓴᓇᙳᐊᒐᖏᓐᓂᒃ, ᐅᐱᒋᔭᐅᑦᑎᐊᖅᐸᒃᐳᖅ. "ᓴᐱᓕᖅᐸᓪᓕᐊᓕᕌᖓᒪ, ᐊᒻᒪ ᓱᓕ ᓴᐱᓕᖅᐸᒃᖢᖓ, ᐃᖅᑲᐅᒪᔭᕆᐊᖃᑐᐃᓐᓇᖅᐳᖓ ᐃᓄᖕᓂ ᓇᒡᓕᒍᓱᓚᐅᖅᑐᓂᒃ ᐊᒻᒪ ᖁᔭᓕᓚᐅᖅᑐᓂᒃ ᐊᒻᒪ ᓂᐅᕕᓚᐅᖅᑐᓂᒃ ᓴᓇᐅᒐᕐᓂᒃ, ᐊᒻᒪ ᖃᐅᔨᒪᕗᖓ ᐅᑎᒃᑲᓐᓂᓛᕐᓂᖏᓐᓂᒃ, ᐊᓯᖏᓪᓗ ᒪᓕᖕᓂᐊᖅᖢᑎᒃ," ᐅᖃᕆᓪᓗᓂ. 

ᐊᒥᓱᐊᓗᓐᓂᒃ ᓂᐅᕕᐊᑦᓴᖃᓲᖑᒻᒪᑕ, ᐅᓪᓗᑯᑖᓂᒃ ᐃᑦᓯᕚᑐᐃᓐᓇᖅᓱᓂ ᐅᑕᕿᑦᓱᑎᒃ ᓂᐅᕕᕆᐊᖅᓯᒪᔪᓂᒃ, ᐊᑭᖏᑦ ᒑᓴᓖᑉ ᐱᙳᐊᕆᐊᖅᑐᕐᓂᐊᕐᓗᓂ, ᓈᓴᖅᑕᐅᓯᒪᔪᑦ ᐊᑭᖏᑦ, ᓂᖀᑦ ᐊᑭᖏᑦ, ᑕᑯᑦᓴᐅᑎᑦᓯᕕᐅᑉ ᐊᑭᖏᑦ, ᑐᔪᕐᒥᕖᓪᓗ ᐊᑭᖏᑦ ᐅᓪᓗᒐᓴᓐᓄᑦ ᑕᑯᕋᓐᓈᑎᑦᓯᔪᓄᑦ ᓄᓇᓕᐅᑉ ᓯᓚᑖᓄᑦ. ᐃᓚᖏᑦ ᑕᑯᔭᒐᖃᕐᕕᐅᔪᑦ ᐊᑭᖃᖅᑎᒋᕗᑦ $500-ᓂᒃ, ᐊᔪᕐᓇᖅᑐᖅᓯᐅᕈᑕᐅᕙᒃᖢᓂ ᓂᐅᕕᐊᒃᓴᖃᕆᐊᒃᓴᖅ ᓯᐅᒻᒥᐅᑕᓂᒃ. ᑐᓴᓐ ᑮᓇᐅᔭᓂ ᓇᒃᓴᕆᐊᖃᕆᕗᖅ ᐊᓯᔾᔨᕈᑎᒃᓴᓂ ᓂᐅᕕᖅᐸᒃᑐᓄᑦ. ᐃᓚᖓᑦ ᐱᒻᒪᕆᐅᓛᖑᖃᑕᐅᔪᖅ ᐱᖁᑎᖓ Square Reader-ᖓ ᐊᐅᒃᑕᔫᓂᒃ ᐊᑮᑦᑐᖅᑖᕈᓐᓇᐅᑎᓂᒃ ᐊᒻᒪ ᐊᑭᓕᒃᓴᓂᒍᓐᓇᐅᑎᓂᒃ ᓂᐅᕕᖅᐸᒃᑐᓂᒃ ᑮᓇᐅᔭᓪᓚᑦᑖᓂᒃ ᐱᓯᒪᙱᑦᑐᓂᒃ. 

tsun ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐱᔾᔪᑎᖃᕋᔭᖅᐳᖅ ᐱᒻᒪᕆᐅᓂᖓᓂᒃ ᑐᓴᐅᒪᑎᑦᑎᓂᕐᒥᒃ, ᑕᒪᓐᓇᓗ ᖃᐅᔨᒪᓚᐅᙱᑕᖓ. ᐃᓱᒪᓚᐅᖅᐳᖅ ᓂᐅᕐᕈᑎᒋᓂᐊᕋᓱᒋᓪᓗᓂᐅᒃ ᓂᐅᕕᐊᒃᓴᒥᓂᒃ ᐅᔾᔨᕈᓱᙱᖦᖢᓂ ᐃᓄᖕᓂ ᑲᑎᖃᑎᖃᕆᐊᖃᕐᓂᕐᒥᓂᒃ. ᖃᐅᔨᒪᔪᒪᓚᐅᕆᕗᖅ ᐱᖁᑎᓕᒫᓂᒃ ᐱᓯᒪᔭᕆᐊᖃᕐᓂᐊᖅᑕᒥᓂᒃ, ᐃᓱᒪᓚᐅᕐᑐᖅ ᓂᐅᕐᕈᑎᒋᓂᐊᕋᓱᒋᓪᓗᓂᐅᒃ ᑭᓱᓕᒫᑦᑎᐊᑦ ᓴᓇᔭᖏᑦ. 

ᐊᑦᑕᓇᔾᔭᐃᖅᓯᒪᓂᖅ ᐅᔾᔨᖅᓱᕐᓂᖅᓴᐅᔪᒪᓚᐅᖅᑑᒐᓗᐊᖅ, ᐱᙳᐊᕆᐊᖅᑐᕐᓗᓂ ᐊᒻᒪ ᑕᑯᕋᓐᓈᕆᐊᖅᑐᕐᓗᓂ ᐃᓄᑑᓗᓂ. ᑐᓴᓐ ᐃᖕᒥᓂᒃ ᐅᖃᕋᔭᓚᐅᖅᐳᖅ, "ᐊᑦᑕᕐᓇᖅᑐᒦᑦᑕᐃᓕᒋᑦ, ᓲᖃᐃᒻᒪ ᐊᒥᓱᐊᓗᐃᑦ ᐃᓄᐃᑦ ᑕᖅᑳᓂ ᐱᑦᑎᐊᙱᒻᒪᑕ, ᐊᒻᒪ ᐃᓕᖕᓂᒃ ᐊᑐᕐᓂᕐᓗᒐᓱᖕᓂᐊᖅᐳᑦ, ᑮᓇᐅᔭᕐᓂᒃ ᑎᒡᓕᒐᓱᒡᓗᑎᒃ, ᑎᒡᓕᒐᓱᒡᓗᑎᒃ ᐱᖁᑎᖕᓂᒃ." ᐅᖃᐅᔾᔭᐅᔪᒪᓇᔭᓚᐅᕐᒥᔪᖅ ᐅᖃᓪᓚᖃᑎᖃᖁᔭᐅᓪᓗᓂ ᐊᒥᓱᓄᑦ ᐃᓄᖕᓄᑦ ᐊᒻᒪ ᐱᒻᒪᕆᐅᓂᖓᓂᒃ ᑲᑎᙵᓂᐅᑉ. ᐃᒪᓐᓇᐅᖁᔨᒃᑲᓐᓂᖅᐳᖅ, ᐱᓯᒪᐃᓐᓇᖁᔨᓪᓗᓂ ᑕᐅᑐᙳᐊᖅᑕᐅᔪᓂᒃ ᑎᑎᕋᖅᓯᒪᔪᓂᒃ ᐃᓱᒪᒋᔭᒃᓴᓂᒃ ᓯᕗᓂᒃᓴᒥ ᐱᓕᕆᐊᖑᔪᒃᓴᓄᑦ. 

ᖁᕕᐊᒋᑦᑎᐊᖅᑕᖓ ᐱᓕᕆᐊᒥᓂᒃ ᐊᒻᒪ ᖁᕕᐊᒋᔭᒥᓂᒃ ᓴᐸᖓᓕᖅᓱᐃᓂᕐᒥᒃ, ᒫᓖᓐ ᑦᓴᓐ ᓴᐸᖓᓕᖅᓱᐃᖃᑦᑕᖅᓯᒪᕗᖅ ᐃᓐᓇᕈᖅᐸᓪᓕᐊᓂᓕᒫᖓᓂ. ᐊᑯᓂᑲᓪᓚᒃ ᓇᓗᖅᑯᑎᙱᖦᖢᓂ ᐃᓕᑦᑎᕙᓪᓕᐊᓪᓗᓂᓗ ᖃᓄᖅ ᑮᓇᐅᔭᓕᐅᕈᓐᓇᕐᒪᖔᕐᒥᓂᒃ, ᑭᓯᐊᓂ ᓴᐸᖓᓕᖅᓱᐃᔪᓐᓇᐃᓐᓇᓕᓚᐅᖅᐳᖅ ᐊᓈᓇᑦᑎᐊᒥᓂᒃ ᐃᓕᑦᑎᓚᐅᖅᖢᓂ. ᓴᐸᖓᓕᖅᓱᒐᓕᐅᖅᐸᒃᖢᓂ ᓂᐅᕐᕈᑎᒋᕙᒃᖢᓂᒋᓪᓗ ᓂᐅᕕᕐᕕᖕᓂ, ᐱᙳᐊᕕᒡᔪᐊᕐᓇᒥ ᐊᒻᒪ ᓴᓇᙳᐊᒐᕐᓂᒃ ᑕᑯᒃᓴᐅᑎᑦᑎᕙᒃᑐᓂ, ᐃᓕᖅᑯᓯᕐᒥᓂᒃ ᐅᖃᐅᓯᖃᖅᐸᒃᐳᖅ, ᖁᕕᐊᒋᔭᒥᓂᒃ ᐊᒻᒪ ᐊᔪᙱᑕᒥᓂᒃ ᐅᐱᒍᓱᑦᑎᐊᖅᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.