"ᐅᒃᐱᕈᓱᐃᓐᓇᐅᔭᖅᑐᖓ ᓄᓇᓕᖕᒥ ᐅᒃᐱᕈᓱᒃᖢᖓᓗ ᖃᐅᔨᓗᑎᑦ ᑭᓇᐅᖕᒪᖔᖅᐱᑦ," ᐅᖃᖅᑐᖅ ᒫᓯᐅᓪ ᐅᐃᕖᑎᑐᑦ, 60−ᖏᓐᓂ ᓯᑰᑉ ᐃᓅᓂᑯ ᕉᔅᕗ ᕆᕗᕐ ᐊᓪᓚᐃᑦ ᓄᓇᖃᖅᑳᖅᓯᒪᔪᑦ ᓂᒋᐊᓂ ᒫᓂᑑᐸ.  ᐱᕈᖅᓴᓚᐅᖅᓯᒪᕗᖅ ᒪᓐᓇᐃᑦ ᓄᓇᖓᓂ, ᓅᓚᐅᖅᓯᒪᔪᖅ ᓄᓇᓕᐸᐅᔭᕐᒧᑦ ᐃᓐᓇᐅᓪᓗᓂ. ᐊᒃᓱᕈᖅᑐᓂ ᐱᓕᕆᓯᒪᔪᖅ ᑲᑎᖃᑎᖃᕋᓱᐊᖅᑐᓂ ᐃᓕᖅᑯᓯᕐᒥᓂᒃ ᐊᒻᒪᓗ ᐃᓚᒋᔭᐅᓕᕋᓱᐊᖅᑐᓂ ᐃᖅᑭᓖᑦ ᓄᓇᓕᖓᓐᓄᑦ ᐅᐊᓂᐸᐃᒻᒥ, ᖃᐅᔨᒪᓪᓗᓂ ᕿᑐᕐᖓᖏᑦ ᖃᐅᔨᒪᒃᑲᓐᓂᕈᒪᒻᒪᑕ ᓇᑭᙶᕐᒪᖔᑕ ᐊᒻᒪᓗ ᐃᒻᒥᓂᒃ ᐱᓕᕆᖅᑳᕈᒪᓪᓗᓂ. 

ᓄᓇᒥᓂᒃ ᓅᖦᖢᓂ ᓄᓇᓕᐸᐅᔭᕐᒧᐊᖅᖢᓂᓗ, ᐅᐃᐅᐃᑦ ᐊᒃᓱᕈᓚᐅᖅᐳᑦ ᓇᓂᓯᓇᓱᒃᖢᑎᒃ ᓇᓂ ᐃᓂᖃᕐᒪᖔᑦ ᐊᖏᓂᖅᓴᒥ ᓄᓇᒥᓂ ᑭᓯᐊᓂ ᐱᓇᔪᐃᓐᓇᓚᐅᖅᐳᖅ. ᐃᓚᐅᖃᑕᐅᓕᕐᖢᓂ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂ ᐃᓚᐅᖃᑕᐅᓪᓗᓂ ᖃᐅᔨᓪᓗᓂ ᑭᓇᐅᖕᒪᖔᑦ ᐹᖏᓪᓗ ᒪᑐᐃᖅᓯᒪᓕᕐᖢᑎᒃ ᐃᓕᑦᑎᒃᑲᓐᓂᕐᖢᓂ ᑕᕝᕘᓇ ᐱᕙᓪᓕᐊᓂᖓᓂ. 

"ᐃᓗᐃᑦᑐᒥᒃ, ᐱᓕᕆᖃᑕᐅᑐᐃᓐᓇᕋᒪ ᓄᓇᓕᖕᓂ ᐊᒻᒪ ᐱᐅᓂᖅᓴᒥᒃ ᓄᓇᓕᖃᖅᑎᓐᓇᓱᒃᖢᒋᑦ ᑭᒃᑯᓕᒫᑦ."

ᐅᐃᕖᑎᑐᑦ ᐃᓱᒪᔪᑦ ᓇᖕᒥᓂᖅ ᓄᓇᓕᖕᓂ ᑭᒡᒐᖅᑐᐃᔨᒥᒃ ᐃᓚᐅᖃᑕᐅᓯᒪᓪᓗᓂᓗ ᐅᓄᖅᑐᓂᒃ ᐊᔾᔨᒌᖏᑦᑐᓂᒃ ᑲᑎᙵᔪᓂᒃ ᑲᑐᔾᔨᖃᑎᒌᓂᒡᓗ. ᐃᓚᐅᖃᑕᐅᓯᒪᔪᖅ ᒪᓂᑑ ᐋᐱ ᓇᓪᓕᐅᓂᖅᓯᐅᕐᓂᕐᒧᑦ, ᐊᖏᓂᖅᐹᖅ ᓄᓇᓕᓐᓂ ᐊᑭᓯᕐᓄᑦ, ᑕᐃᒪᙵᓂᑦ ᐅᓪᓗᖓᓂ 1, ᐊᒻᒪᓗ ᓇᓪᓕᐅᓂᖅᓯᐅᖅᑐᓂ ᑑ ᐳᐊᔅ ᐅᖓᑖᓄᑦ 30 ᐊᕐᕌᒍᐃᑦ ᐊᑭᓕᖅᓱᖅᑕᐅᒐᓂ. ᑲᑎᒪᔨᐅᖃᑕᐅᔪᖅ Wa-Say ᒪᒥᓴᕐᕕᖕᒧᑦ ᐊᕐᕌᒍᑕᒫᑦ ᐊᓗᒡᕕᖕᒦᖦᖢᓂ ᐊᒻᒪ ᐊᐅᐸᔪᒃᑐᒥᒃ ᐅᕕᓂᕈᖅᓯᒪᓐᓇᒥ ᐅᕕᓂᕈᖅᓯᒪᓐᓇᒥ ᐱᓱᒡᕕᐅᕙᒃᖢᓂ. ᐅᐃᕖᑎᑐᑦᑕᐅᖅ ᐱᓕᕆᖃᑎᖃᖅᐸᒃᑭᕗᖅ ᑕᖕᒫᖅᓯᒪᕝᕕᖕᓂᒃ, ᑕᒪᓐᓇᓗ ᐊᒃᑐᐊᓂᖃᖅᐸᒃᖢᓂ ᓴᙱᔪᒃᑯᑦ ᐃᓗᕕᖅᓯᕙᖕᓂᕐᒧᑦ ᐊᖏᕐᕋᕆᔭᐅᕙᒃᑐᒥᒃ ᐱᓕᕆᔨᓪᓚᕆᐅᓪᓗᓂ ᐱᓕᕆᖃᑎᖃᖃᑦᑕᖅᓯᒪᓪᓗᓂᓗ ᐃᓚᒌᓂᒃ ᕿᑐᕐᖓᖃᕈᓐᓃᖅᓯᒪᔪᓂᒃ ᐊᔪᕐᓇᖅᑐᖅᓯᐅᖅᖢᑎᒡᓗ ᓇᓂᓯᓇᓱᒃᖢᑎᒃ ᒪᑐᓯᓂᕐᒥᒃ.

ᑖᓐᓇ ᑕᖕᒫᖅᓯᒪᕝᕕᒃ ᐅᔾᔨᕆᔭᖃᓕᖅᑎᑦᑎᕗᖅ ᐃᓄᐊᖅᑕᐅᓯᒪᔪᓄᑦ ᐊᓯᐅᓯᒪᔪᓄᓪᓗ ᓄᓇᖃᖅᑳᖅᑐᓄᑦ ᐊᕐᓇᓄᑦ ᖃᐅᔨᒪᔭᐅᔪᓄᑦ ᐊᒃᑕᕐᕕᖕᒦᑉᐸᖕᓂᖏᓐᓂᒃ. ᐊᑦᑎᖅᑕᐅᓚᐅᖅᑐᖅ ᒥᒃᑯᓕᐅᖅᑐᓂ ᒪᐃᕋᓐᒥᑦ, ᐊᕐᓇᐅᔪᖅ ᑕᐃᑲᓃᖃᑕᐅᓱᒋᔭᐅᓚᐅᖅᑐᖅ ᐊᓯᖏᓐᓂᑦ ᐊᕐᓇᓂᑦ. ᑖᓐᓇ ᑕᖕᒫᖅᓯᒪᕝᕕᒃ ᐃᓄᖃᖅᐸᒃᐳᖅ ᖃᐅᔨᓴᐅᑎᐅᑉ ᐅᐃᐅᐃᓪᓗ ᐱᔭᒃᓴᕆᔭᖓᓂ ᐅᓇ, ᖃᑦᑎᕆᔩᑦ ᐃᓐᓇᐃᓪᓗ ᐊᖏᕐᕋᕆᔭᐅᔪᒦᑦᑐᑦ ᐃᑲᔪᕐᓂᐊᕐᓗᑎᒃ ᑲᒪᒋᔭᖃᕐᓂᐊᕐᓗᓂ ᐃᓕᖅᑯᓯᑐᖃᕐᓄᑦ ᖃᓄᐃᓕᖓᓂᕆᔭᐅᔪᓄᑦ ᓴᖅᑭᓕᖅᐸᒃᑐᓄᑦ. ᐃᑭᖃᑦᑕᖅᓯᒪᓕᕐᒪᑦ ᑕᖅᑭᒐᓴᖕᓄᑦ ᐅᐃᕖᑐᓪᓗ ᐅᐸᒋᐊᖃᖅᖢᓂᑦ ᐱᔭᕆᐊᓕᖏᓐᓂᑦ ᓄᓇᓕᕋᓛᖃᕐᕕᐅᑉ ᐃᓂᖃᖅᑐᖅ ᐃᓄᐃᑦ ᐱᔪᓐᓇᐅᑎᖏᓐᓄᑦ ᑕᑯᔭᒐᖃᕐᕕᐅᑉ. ᓇᒦᓐᓂᖏᑦ ᐳᓚᕋᑦᑎᓂᑦ ᑐᓴᖅᓯᒪᔪᑦ ᓄᓇᓕᕋᓛᒥᑦ ᑭᓯᐊᓂ ᖃᐅᔨᒪᙱᑐᐃᓐᓇᕆᐊᓖᑦ ᐱᔾᔪᑎᖓᓂᑦ. ᐅᐃᕖᑎᑐᑦ ᐊᒻᒪᓗ ᓄᓇᖃᑦᑎᐅᖃᑎᕗᑦ ᑐᓴᖅᑎᑦᑎᖃᑦᑕᖅᑐᑦ ᐃᓄᓐᓂᒃ ᕕᓂᐸᐃᒡᒨᖅᓯᒪᔪᓂᒃ ᓇᑭᑐᐃᓐᓈᖅᓯᒪᔪᓂᒃ ᓄᓇᕐᔪᐊᕐᒥ. ᐃᓄᐃᑦ ᐃᑲᔪᕈᒪᔪᑦ ᓄᓇᓕᕋᓛᖃᕐᕕᖕᒥ, ᐅᐃᕕᑎᑐᑦ ᑐᓂᓯᖁᔨᓲᑦ ᕿᔪᖕᓂᒃ ᐅᕝᕙᓘᓐᓃᑦ ᐱᕕᒃᓴᒥᒃ ᐃᑭᑎᑦᑎᑦᑕᐃᓕᒪᓗᑎᒃ ᐅᕝᕙᓘᓐᓃᑦ ᐃᑲᔪᕐᓂᐊᕐᓗᑎᒃ ᐱᓕᕆᐊᖑᔭᕆᐊᓕᖕᓂᒃ ᓄᓇᓕᕋᓛᖃᕐᕕᖕᒥ.

ᐃᓱᒪᓕᐅᕋᓱᒃᑎᓪᓗᒍ ᓇᒦᑉᐸᖕᒪᖔᑦ, ᐅᐃᕕᑎᑐᑦ ᑕᐅᑐᒃᐳᖅ ᓇᒥ ᐃᓚᒋᔭᐅᖕᒪᖔᑦ. ᐃᓚᖓ ᐃᓪᓗᖓᑕ ᓇᔾᔨᓚᐅᖅᑐᖅ ᐃᓄᐊᖅᑕᐅᓪᓗᓂ 90-ᖏᓐᓂ. ᐃᓚᐅᖃᑕᐅᔪᒪᓕᓚᐅᖅᑐᖅ ᓄᓇᓕᕋᓛᒥ ᖃᐅᔨᒪᒐᒥ ᖃᓄᖅ ᐃᓚᒌᑦ ᐊᑐᖃᑦᑕᕐᒪᖔᑕ ᓇᓪᓕᒋᔭᖏᑦ ᐃᓄᐊᖅᑕᐅᑎᓪᓗᒋᑦ ᐅᕝᕙᓘᓐᓃᑦ ᐊᓯᐅᓯᒪᑎᓪᓗᒋᑦ ᐊᒻᒪᓗ ᓂᐱᖃᕐᕕᐅᔪᓐᓇᖅᑐᑎᒃ ᑕᐃᒃᑯᓄᖓ ᐅᖃᓪᓚᒍᒪᔪᓄᑦ. ᑭᐅᔾᔪᑎᔅᓴᖃᐃᓐᓇᕈᓐᓇᖅᑰᖏᑦᑐᖅ ᐃᓚᒌᓄᑦ ᕿᓂᖅᑕᖏᓐᓂᑦ, ᑭᓯᐊᓂ ᓱᓕᔪᒥᑦ ᐅᖃᐅᓯᖃᖅᐸᑉᐳᖅ ᐊᒻᒪ ᐊᑲᐅᔪᒦᑎᑦᑎᓪᓗᓂ.  

ᐅᖃᐅᔾᔪᐃᓂᖓ ᓄᓇᖃᖅᑳᖅᑐᓄᑦ ᓄᓇᓕᖕᒥᐅᓄᑦ ᕿᓂᖅᑐᓄᑦ ᐃᓚᐅᓂᕐᒥᒃ ᐊᑭᓕᖅᓱᖅᑕᐅᙱᖦᖢᓂᓗ ᐱᓕᕆᕙᒃᖢᓂ ᐃᓚᐅᓂᐊᕐᓗᓂ ᑲᑐᔾᔨᖃᑎᒌᓂᒃ ᖃᐅᔨᓗᓂᓗ ᖃᓄᖅ ᐊᑯᓂᐅᑎᒋᔪᒥᒃ ᐱᓕᕆᐊᖃᓪᓚᕆᒍᒪᕙᖕᒪᖔᑕ ᐊᑭᓕᖅᓱᖅᑕᐅᙱᖦᖢᑎᒃ ᐱᓕᕆᕙᒃᑐᑦ. ᐅᖃᖅᖢᓂ ᐊᖏᖅᓯᒪᓂᕋᖅᖢᓂ ᖁᕕᐊᒋᔭᖕᓂᑦ. "ᐆᒻᒪᑎᒋᔭᐃᑦ ᐃᓚᐅᙱᑉᐸᑦ, ᐱᓕᕆᑦᑎᐊᔾᔮᙱᑦᑐᑎᑦ ᐊᑭᓕᖅᓱᖅᑕᐅᙱᖦᖢᑎᑦ ᐱᓕᕆᓗᑎᑦ," ᑕᐅᑐᒃᖢᓂ. ᐱᒋᐊᕐᓗᓂ ᐱᓕᕆᑦᑎᐊᕐᓂᕐᒥᒃ ᐊᑕᐅᓯᕐᒥ ᑲᑐᔾᔨᖃᑎᒌᒥ, ᐃᓄᐃᑦ ᐅᔾᔨᕈᓱᒍᓐᓇᖅᑐᑦ ᐊᐱᕆᓗᑎᒃᓗ ᐃᑲᔪᖁᓗᒋᑦ ᐊᓯᐊᓄᑦ ᑲᑐᔾᔨᖃᑎᒌᒧᑦ. ᐃᓚᐅᖃᑕᐅᓂᖅ ᓄᓇᓕᖕᓂ ᐊᑭᓕᖅᓱᖅᑕᐅᙱᖦᖢᓂ ᐱᓕᕆᔨᐅᖃᑎᒌᖕᓂᖅ, ᓄᑖᓂᒃ ᐱᕕᒃᓴᖅᑕᖃᖅᖢᓂ ᐅᑎᖅᑎᓐᓇᓱᒃᓗᒍ ᑐᓂᔭᐅᓂᖅ ᖃᖓᙳᖅᐸᓪᓕᐊᑎᓪᓗᒍ.  

ᐅᐃᕖᑎᑐᑦ ᐱᒋᐊᓚᐅᖅᑐᖅ ᓄᓇᓕᖕᒥ ᖃᔪᖅᑐᕐᕕᖕᒥ. ᑕᑯᓚᐅᕐᒪᒋᑦ ᐅᑎᖅᑎᑦᑎᓪᓗᑎᒃ ᐊᒻᒪᓗ ᐱᔭᕆᐊᖃᕐᓂᕋᖅᑐᑎᒃ ᑭᓯᐊᓂ ᐱᖃᑕᐅᓚᐅᖅᓯᒪᖏᑦᑐᖅ ᓯᕗᓂᐊᒍᑦ ᐊᒻᒪᓗ ᖃᐅᔨᒪᒐᓂ ᑭᓱᒥᒃ ᐱᔾᔪᑎᖃᓪᓚᕆᒻᒪᖔᑕ. ᐅᐊᓴᖅᖢᓂ ᐊᓗᒡᕕᖕᓂᒃ, ᐃᕐᖑᓯᕐᓂᒃ ᐊᒻᒪ ᐱᓚᒃᓯᔾᔪᑎᓂᒃ, ᐃᓄᖕᓂᒃ ᑲᑎᖃᑎᖃᖃᑦᑕᓚᐅᖅᐳᖅ ᐃᓚᐅᖃᑦᑕᖅᖢᓂᓗ ᓄᓇᓕᖕᓂ. "ᐃᖅᑲᐅᒪᑦᑎᐊᖅᐳᖓ ᓯᕗᓪᓕᖅᐹᑦᑎᐊᒥ ᐊᑭᓕᖅᓱᖅᑕᐅᙱᖦᖢᖓ ᐱᓕᕆᓚᐅᖅᓯᒪᓪᓗᖓ," ᐅᖃᐅᓯᕆᖃᑦᑕᖅᑕᖓ. 

ᓯᕗᓂᒃᓴᒧᑦ ᑕᐅᑐᒡᓗᒍ, ᐅᐃᕖᑦ ᓂᕆᐅᖕᓂᖏᑦ ᐋᖅᑭᒋᐊᕈᑎᑦ ᐱᐊᓂᒃᑕᐅᓛᕐᓂᖏᓐᓂᑦ ᐃᓄᐃᓪᓗ ᐃᓕᓴᖅᓯᓗᑎᒃ ᓄᓇᖃᖅᑳᖅᓯᒪᔪᓂᑦ ᐊᒃᓱᕈᖕᓂᖏᓐᓂᒡᓗ, ᑐᑭᓯᐅᒪᓗᑎᒃ ᐅᓐᓄᐊᖏᓐᓇᖅ ᐋᖅᑭᒃᑕᐅᔾᔮᙱᓐᓂᖏᓐᓂᑦ. ᓂᐱᒋᔭᐅᖏᓐᓇᕈᒪᔪᖅ ᓄᓇᓕᖓᓄᑦ ᐃᖅᑭᓕᕆᔭᐅᓗᓂ. "ᐋᕿᒋᐊᕈᑎᖃᕐᓂᖅ, ᓴᙱᔪᒻᒪᕆᐊᓗᒃ ᐅᖃᐅᓯᖅ ᑐᑭᓯᒍᕕᐅᒃ ᑐᑭᓪᓚᑦᑖᖓ, ᖃᐅᔨᒪᔪᖓ ᐃᓚᒋᔭᐅᔪᐃᓐᓇᐅᒐᑦᑕ, ᐃᓚᒋᔭᐅᔪᓐᓇᖅᖢᑎᒡᓘᓐᓃᑦ," ᐊᔾᔨᖃᖅᑐᖅ. "ᐱᓇᓱᐊᑦᑎᐊᖅᑐᑎᑦ ᐊᒻᒪ ᐅᒃᐱᕈᓱᒡᓗᑎᑦ ᐃᓕᖕᓂᒃ ᐊᑖᓃᑦᑎᐊᖅᐳᑎᑦ. ᐅᒃᐱᕈᓱᓕᖅᐳᑎᑦ, ᖃᐅᒃᐸᑦ ᐅᓪᓗᑦᑎᐊᕙᐅᓂᖅᓴᐅᓂᐊᕐᓂᖓᓂᒃ ᑕᒪᓐᓇᓗ ᑐᑭᖃᖅᖢᓂ ᐱᓕᕆᖃᑕᐅᓂᕐᒥᒃ ᓄᓇᔅᓯᓐᓂ," ᑲᔪᓰᓐᓇᖅᐳᖅ. 

ᐅᒃᐱᕈᓱᖕᓂᖅ ᓄᓇᓕᖕᓂ ᐃᓕᑦᑎᕙᓪᓕᐊᑎᓪᓗᒋᓪᓗ ᑭᓇᐅᓂᕐᒥᓂᒃ, ᒫᓯᐅᓪ ᐅᐃᕕᑎᑐᑦ ᐅᑎᖅᑎᑦᑎᕙᓪᓕᐊᕗᖅ ᐊᔪᙱᓐᓂᓕᒫᒥᓂᒃ. ᐅᐊᓴᐅᑎᓄᑦ ᐅᐊᓴᕐᕕᖕᓂᑦ ᖃᔪᖅᑐᕐᕕᖕᒥᑦ ᐃᑭᑦᑐᒧᑦ ᐊᐅᓪᓛᕐᕕᖕᒧᑦ, ᐃᓕᑦᑎᓚᐅᖅᑐᖅ ᐃᓂᒋᔭᖓᓂᑦ ᐃᑲᔪᖅᑕᐅᔭᕆᐊᖃᖅᖢᓂ ᐊᒻᒪᓗ ᓇᐅᒃᑯᑦ ᐆᒻᒪᑎᖓ ᐱᖕᒪᖔᑦ. ᑖᓐᓇ 60−ᖏᓐᓂ ᓯᑰᑉ ᐃᓅᓂᑯ ᓇᓂᓯᓪᓗᓂ ᐅᑎᕐᓂᖓᓂᒃ ᓇᓂᓯᓪᓗᓂᓗ ᓇᖕᒥᓂᖅ ᐊᖅᑯᑎᒃᑰᖅᐸᓪᓕᐊᓪᓗᓂ. ᒫᓐᓇᓕ ᓇᓂᓯᓕᖅᑯᖅ ᓄᑖᖑᔪᓂᑦ ᐃᓚᒋᔭᐅᓂᕐᒥᑦ ᓄᓇᓕᐸᐅᔭᒃᑯᓐᓄᑦ ᐊᖏᕐᕋᕆᓂᕋᖅᑕᖓᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.