ᒪᕇᓴ ᒪᑭᓐᓂ ᐃᐊᑦᒪᓐᑕᓐᒥ ᐃᓅᓚᐅᖅᓯᒪᔪᖅ ᐱᕈᖅᓴᓚᐅᖅᓯᒪᓪᓗᓂᓗ ᕚᓐᑕᓐᒥ, ᓴᐃᓐᑦ ᐋᓪᐴᑦ ᐅᐊᖕᓇᖓᓂ. ᐊᕐᕌᒍ ᐊᑕᐅᓯᖅ ᑎᒍᐊᙳᐊᕆᔭᐅᓚᐅᖅᑎᓪᓗᒍ, ᑎᒍᐊᖅᑖᕆᔭᐅᓚᐅᖅᐳᖅ ᐊᖓᔪᒥᓄᑦ ᖃᑕᙳᑎᒌᓄᑦ ᖃᔅᓯᑲᓪᓚᖕᓄᑦ ᑎᒍᐊᕆᔭᐅᔪᓄᑦ. ᖃᑕᙳᑎᖏᑦ ᐃᓚᐅᓚᐅᖅᐳᑦ ᐱᓕᕆᐊᖑᔪᒥ ᑕᐃᔭᐅᔪᒥ ᐃᓚᒌᑦ ᓄᓇᖃᖅᑳᖅᑐᓄᑦ ᓄᑕᖅᑲᓄᑦ ᐃᓚᐅᔪᓐᓇᖅᖢᑎᒃ ᐅᕕᓂᙳᐊᓄᑦ, ᐃᓕᖅᑯᓯᑐᖃᒃᑯᑦ ᓴᓇᙳᐊᖅᑕᐅᕙᒃᑐᓄᑦ, ᐃᙱᕐᓂᕐᒧᑦ, ᕿᓚᐅᔾᔭᕐᓂᕐᒧᑦ ᐊᒻᒪ ᐱᙳᐊᕐᓂᕐᒧᑦ ᒧᒥᕐᓂᕐᒧᑦ. Powwow ᒧᒥᕐᓂᖅ ᓄᑕᕋᐅᑎᓪᓗᒍ ᐃᓚᒋᔭᐅᒻᒪᕆᓚᐅᖅᐳᖅ ᐊᓪᓛᑦ ᐱᕙᓪᓕᐊᔪᑎᒍᑦ ᐊᖕᒪᓗᖅᑐᓂᒃ ᒧᒥᕐᓂᕐᒧᑦ ᓄᓇᓯᐅᑎᖓᑕ ᐊᖅᑯᑎᖓᓂ. ᐃᓚᒌᑦ ᓅᒻᒪᑕ ᓴᐃᓐᑦ ᐋᓪᐴᑦᒥᑦ ᕚᓐᑐᕆᒧᑦ, ᑲᑎᙵᔪᓐᓃᖅᐸᓪᓕᐊᓕᓚᐅᖅᐳᖅ ᐱᓕᕆᐊᖑᔪᒧᑦ ᐃᓚᐅᔪᓐᓇᐃᓪᓕᓪᓗᓂᓗ ᓵᓚᖃᕋᓱᐊᕐᓂᐅᔪᓄᑦ. ᓄᓇᓕᐸᐅᔭᒧᑦ ᓅᓚᐅᖅᓯᒪᔪᖅ 18-ᓂᒃ ᐅᑭᐅᖃᓕᖅᖢᓂ, ᐊᒃᓱᕈᕐᓇᓚᐅᖅᖢᓂᓗ.

20-ᓂᒃ ᐅᑭᐅᖃᓕᖅᖢᓂ ᐃᖅᑲᓇᐃᔮᒥᓄᑦ ᐊᓯᔾᔨᖅᑕᖅᐸᒃᖢᓂ ᑭᓯᐊᓂ ᓴᓇᕈᓘᔭᐃᓐᓇᐅᔭᖅᐳᖅ. ᐱᙳᐊᖅᑎᐅᓪᓗᓂ ᒧᒥᖅᑎᐅᓪᓗᓂᓗ, ᒧᒥᖅᑎᐅᓚᐅᖅᐳᖅ ᐊᕐᕌᒍᒐᓴᖕᓄᑦ. ᒥᑭᑦᑐᒥ ᒥᖅᓱᕐᕕᖕᒥ ᐃᖅᑲᓇᐃᔭᓚᐅᖅᓯᒪᖕᒥᔪᖅ ᒥᖅᓱᕆᐅᖅᓴᓕᖅᖢᓂᓗ. ᑕᐃᔅᓱᒪᓂ, ᒪᕐᕉᖕᓂᒃ ᐃᖅᑲᓇᐃᔮᖃᖅᐸᒌᓚᐅᖅᐳᖅ. ᖃᓪᓗᓈᖅᑕᓂᒃ ᓂᐅᕕᕐᕕᖕᒧᑦ ᓅᓚᐅᖅᐳᖅ, ᑕᐃᑲᓃᖏᓐᓇᖅᖢᓂ ᐊᐅᓚᑦᑎᔨᒧᑦ ᐃᑲᔪᖅᑎᒋᔭᐅᓪᓗᓂ ᐊᕐᕌᒍᒐᓴᖕᓄᑦ. ᑮᓇᐅᔭᓕᐅᓗᐊᓚᐅᙱᒃᑲᓗᐊᖅᖢᓂ, ᐃᓕᑦᑎᕐᔪᐊᓚᐅᖅᐳᖅ ᓂᐅᕕᖅᐸᒃᑐᓂᑦ. ᐅᓪᓗᒥᐅᔪᖅ, ᒪᑭᓐᓂ ᐅᓪᓗᓕᒫᖅ ᐊᓈᓇᐅᔪᖅ ᓴᐸᖓᓕᖅᓱᐃᕙᒃᖢᓂ ᒥᖅᓱᖅᐸᒃᖢᓂᓗ ᐅᓪᓘᑉ ᐃᓚᐃᓐᓇᖓᓂ. ᐃᒃᐱᒍᓱᑦᑎᐊᖅᑐᖅ ᐃᓱᒪᒃᑯᑦ ᐊᔪᕈᑎᓕᖕᒥᒃ ᐃᕐᓂᕐᒥᓂᒃ ᑕᐅᑐᒍᒪᑦᑎᐊᖅᖢᓂᐅᒃ ᓴᓇᙳᐊᖅᑎᓪᓗᒍ.

ᒪᑭᓐᓂ ᖃᐅᔨᓯᒪᕗᖅ ᖃᖓᙳᖅᐸᓪᓕᐊᑎᓪᓗᒍ ᐅᖃᓪᓚᖃᑎᖃᕐᓂᖅ ᐃᓄᖕᓂ ᐊᒻᒪ ᐱᕕᒃᓴᖃᖅᑎᓪᓗᑎᑦ ᐃᓕᑦᑎᔪᓐᓇᕐᓂᕐᓂᒃ ᓄᑖᓂᒃ ᐊᔪᕈᓐᓃᖅᑕᐅᕙᒃᑐᓂᒃ ᐅᕝᕙᓘᓐᓃᑦ ᐱᖁᑎᓂᒃ ᑕᐅᖅᓰᖃᑎᖃᕈᓐᓇᕐᓂᕐᓂᒃ. ᐃᓕᑦᑎᓯᒪᕗᖅ ᐋᓪᓚᒧᑦ ᐅᐸᒍᑎᔪᓐᓇᕐᓂᕐᓂᒃ ᐊᐱᕆᓗᒍᓗ ᓇᑭᑦ ᓯᐅᒻᒥᐅᑕᓂᒃ ᐱᓐᓂᕐᒪᖔᑕ ᐅᕝᕙᓘᓐᓃᑦ ᓴᓇᓚᐅᕐᒪᖔᑕ ᐊᒻᒪ ᖃᓄᖅ ᐊᒻᒪ ᐊᒥᓱᐊᓗᖕᓂᒃ ᒪᑐᐃᖅᓯᔪᓐᓇᖅᖢᓂ. ᐃᓄᖕᓂᒃ ᑲᑎᖃᑎᖃᕐᓂᖅ ᐃᓄᑑᓗᐊᕈᓐᓃᖅᑎᑦᑎᔪᓐᓇᕐᒥᔪᖅ.

ᐊᓂᒍᖅᑎᑦᑎᓇᓱᒃᖢᓂ ᑐᓗᖅᑕᕈᑎᓂᒃ, ᒪᑭᓐᓂ ᖃᔅᓯᑲᓪᓚᖕᓂᒃ ᐃᖅᑲᓇᐃᔮᖃᓚᐅᖅᐳᖅ. ᕿᔪᓕᕆᕝᕕᖕᒥ ᐃᖅᑲᓇᐃᔭᓚᐅᖅᓯᒪᔪᖅ, ᕿᔪᖕᓂᒃ ᓇᑲᑎᕆᕙᒃᖢᓂ ᐃᑲᕐᕋᓂᒃ ᖁᓕᓂᒃ ᐅᓪᓗᑕᒫᑦ. ᐱᖃᓐᓇᕆᔭᖏᑦ ᐃᒥᕋᓚᕝᕕᓕᐊᕌᖓᒥᒃ ᐹᑎᕆᐊᖅᑐᖅᖢᑎᒃ, ᐃᖅᑲᓇᐃᔭᖅᐸᓚᐅᖅᐳᖅ ᐃᒥᕋᓚᒡᕕᖕᒦᖃᑕᐅᔪᓐᓇᕋᒥ ᐊᑭᓕᖅᑕᐅᕙᒃᖢᓂᓗ. ᓄᓇᐅᑉ ᐊᑖᓂ ᓂᔾᔭᐅᓯᔭᖅᑎᓂᒃ ᐱᓕᕆᖃᑦᑕᓚᐅᖅᐳᖅ ᖁᙱᐊᖅᑕᐅᔪᓂᒃ ᖁᕕᐊᒋᔭᖃᕈᒪᓪᓗᓂ ᐊᒻᒪ ᓂᔾᔭᐅᓯᔭᖅᑎᓂᒃ ᑲᑎᖃᑎᖃᖅᐸᒃᖢᓂ. ᓄᓇᒃᑰᕈᑎᑐᖃᖃᓚᐅᖅᐳᖅ, ᖁᒃᓴᓱᒃᖢᓂ ᐊᖁᑦᑕᕆᐊᒃᓴᖅ, ᐊᒻᒪ ᐊᓯᐅᔨᕐᔪᐊᖅᓯᒪᓪᓗᓂ ᐊᒥᓱᑦ ᐱᖃᓐᓇᕆᔭᖏᑦ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᙱᓐᓂᖏᓐᓄᑦ. ᓲᖑᓴᖃᑦᑕᓚᐅᖅᓯᒪᖕᒥᔪᖅ. ᓄᓇᓕᐸᐅᔭᕐᒥᐅᑕᐅᓪᓗᓂ, ᐃᓄᑑᓗᐊᖅᑰᔨᓕᓚᐅᖅᐳᖅ ᕿᓂᕆᐊᖃᖅᐸᒃᖢᓂᓗ ᐃᓱᒪᖃᖅᑐᓂᒃ ᐃᓄᖕᓂᒃ. ᓇᓂᕙᒃᖢᓂᒋᑦ ᐃᖅᑲᓇᐃᔮᕆᔭᒥᓂ. ᐃᓄᑑᔭᕆᐊᖃᓕᓚᐅᖅᐳᖅ. "ᖃᖓᙳᕌᖓᑦ ᐊᐱᖅᓱᖃᑦᑕᐃᓐᓇᐅᔭᕐᓂᐊᖅᐳᑎᑦ ᑭᓇᐅᖕᒪᖔᖅᐱᑦ," ᐅᖃᖅᑐᖅ. ᐱᕚᓪᓕᑦᑎᐊᓚᐅᖅᑐᖅ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕈᓐᓃᕋᒥ ᐱᒋᐊᒃᑲᓐᓂᓕᖅᖢᓂᓗ, ᐃᓅᖃᑎᒥᓂᒃ ᓇᓂᓯᓪᓗᓂ ᐊᒻᒪ ᖁᕕᐊᒋᔭᒥᓂᒃ ᐱᓕᕆᓪᓗᓂ ᓲᕐᓗ ᓂᔾᔭᐅᓯᔭᕐᓂᖅ, ᐊᒻᒪ ᓴᓇᙳᐊᕐᓂᖅ.

ᒪᑭᓐᓂ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᖃᓄᐃᙱᑦᑐᖅ ᖃᓄᐃᙱᓪᓗᓂ. ᖃᓄᐃᙱᓚᖅ ᓱᓕᔪᒥᒃ ᐅᖃᕆᐊᒃᓴᖅ. ᖃᓄᐃᙱᑦᑐᖅ ᐊᔾᔨᐅᙱᑦᑑᒐᓗᐊᖅ. ᐊᔾᔨᐅᙱᑦᑑᓯᒪᕗᖓ ᐃᓅᓯᓕᒫᓐᓂ... ᑲᑉᐱᐊᓱᙱᓪᓗᑎᑦ ᐃᓅᓯᕐᒥᒃ ᐲᖅᓯᔭᕆᐊᒃᓴᖅ ᓇᖕᒥᓂᕆᓕᕐᓗᒍᓗ. ᐃᓱᒪᑦᑎᐊᖅᐳᖓ ᖃᓄᑐᐃᓐᓇᑦᑎᐊᖅ ᐱᓕᕆᔪᓐᓇᕋᕕᑦ. ᐱᓕᕆᔭᕆᐊᖃᖅᐳᑎᑦ, ᐊᒻᒪ ᐃᓱᒪᒥᐅᑕᕆᔭᕆᐊᖃᖅᑕᐃᑦ ᑲᑉᐱᐊᓱᙱᓪᓗᑎᑦ ᐊᔾᔨᐅᙱᑦᑑᔭᕆᐊᒃᓴᖅ ᑲᑉᐱᐊᓱᙱᓪᓗᑎᒡᓘᓐᓃᑦ ᐱᑦᑎᐊᙱᑦᑕᕆᐊᒃᓴᖅ ᐅᕝᕙᓘᓐᓃᑦ ᓯᕗᓕᐅᖅᑎᐅᓂᕐᒥᒃ."

ᖃᓄᐃᙱᑦᑎᐊᕋᓱᓕᕌᖓᒥ, ᒪᑭᓐᓂ ᐊᓂᕙᒃᐳᖅ ᑎᒥᓂ ᐊᐅᓚᑎᖦᖢᓂᐅᒃ, ᓂᒡᓚᓱᒃᑐᐊᓘᒐᓗᐊᖅᑎᓪᓗᒍ. ᐱᖃᓐᓇᕆᔭᒥᓄᑦ ᐅᖃᓪᓚᖃᑎᖃᖅᐸᒃᐳᖅ, ᐋᖅᑭᒃᓯᓯᒪᓪᓗᓂ ᑐᓴᐅᒪᖃᑎᒌᒍᑎᓂᒃ ᐅᖃᐅᓯᖃᕈᓐᓇᖅᑕᒥᓂᒃ ᑭᓱᒥᒃ ᐊᑲᐅᙱᓕᐅᕈᑎᖃᕐᒪᖔᑦ. ᐊᓈᓇᒥᓄᑦ ᐅᖄᓚᒐᔪᒃᖢᓂ ᓄᓇᒃᑰᕈᑎᒥ ᑲᑎᖃᑎᖃᕈᒪᓪᓗᓂ. ᐃᒪᓐᓇᐅᖁᔨᕗᖅ, ᐃᓄᖕᓂ ᐅᖃᖃᑎᖃᖅᐸᒡᓗᑎᑦ ᐃᓄᒋᐊᒃᑐᒃᑯᕕᖕᓂ ᑲᑎᙵᖃᑎᖃᕆᐊᖃᓕᕌᖓᕕᑦ, ᖃᐅᔨᒪᓗᒋᑦ ᐊᓯᑎᑦ ᐃᓄᑑᓗᐊᖅᐸᖕᓂᖏᓐᓂᒃ ᐃᓕᖕᓂᑦ. ᐅᖃᐅᔾᔨᕗᖅ ᓴᐱᓕᖅᑕᐃᓕᖁᔨᙱᖦᖢᓂ ᑐᙵᓇᕐᓂᖅ ᐱᔭᐅᙱᒃᑯᓂ ᐱᓂᐊᕐᓂᕆᓚᐅᖅᑕᒥᓄᑦ ᑕᒪᓐᓇᓗ ᐃᓕᖕᓂᒃ ᐊᓯᔾᔨᖅᑎᑦᑕᐃᓕᓗᒍ.

ᐱᕕᒃᓴᖃᖅᑎᖦᖢᓂᐅᒃ ᐊᒻᒪ ᐱᓇᔪᒃᖢᓂ ᑕᐅᖅᓰᓂᕐᒧᑦ ᖃᐅᔨᒪᓂᕐᒧᑦ ᐊᒻᒪ ᐊᑐᖅᓯᒪᔭᒥᓄᑦ, ᒪᕇᓴ ᒪᑭᓐᓂ ᐃᓅᓚᐅᖅᐳᖅ ᐊᒻᒪ ᐃᓕᑦᑎᕐᔪᐊᓚᐅᖅᐳᖅ ᓄᓇᓕᐸᐅᔭᕐᒧᑦ ᓅᒃᑲᒥ. ᐱᙳᐊᖅᑎᐅᓪᓗᓂ, ᓴᓇᙳᐊᖅᑎᐅᓪᓗᓂ, ᐊᒻᒪ ᒧᒥᖅᑎᐅᓪᓗᓂ, ᐱᒻᒪᕆᐅᓛᖑᖃᑕᐅᖕᒥᔪᖅ ᑕᒪᑐᒪᓂ ᐅᑭᐅᕐᒥ: ᐊᓈᓇᖓ. ᐊᒃᓱᕉᑎᖃᖅᓯᒪᒐᓗᐊᖅᖢᓂ ᓲᖑᓴᒃᑕᐅᓂᕐᒥᒃ ᐊᒻᒪ ᐊᓯᐅᔨᓂᕐᒥᒃ ᐃᓕᓐᓂᐊᕐᕕᐊᓗᖕᒥ, ᑕᐃᒪᙵᓂᑦ ᐱᕚᓪᓕᖅᓯᒪᐃᓐᓇᖅᐳᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.