ᐱᕈᖅᓴᓪᓗᓂ, ᓄᓇᒨᕈᒪᓕᓚᐅᖅᓯᒪᕗᖅ ᐃᖅᑲᓇᐃᔮᖅᑖᓚᐅᖅᓯᒪᓪᓗᓂᓗ ᐊᔪᕐᓇᙱᑎᑦᑎᔪᓐᓇᖅᑐᒥᒃ. ᓯᑕᕙᓂ ᐱᐅᕋᓐᔅ ᐱᕼᓲᑯ, ᓄᓇᑦᓯᐊᕐᒥ ᐃᑦᑐᒃᑯᖏᒃ ᐃᑦᑐᒃᑯᖏᒃ ᓄᓇᒋᓚᐅᖅᓯᒪᔭᖏᑦ. Tłı̨chǫ ᐊᕐᓇᐅᓪᓗᓂ ᓄᒃᑎᓚᐅᖅᓯᒪᓪᓗᓂ ᐊᔾᔨᒌᙱᑦᑐᓄᑦ ᓄᓇᓄᑦ ᓄᓇᕘᒥ. ᒫᓐᓇ ᓂᕐᔪᑎᓂᒃ ᖃᐅᔨᓴᖅᑎᐅᓕᖅᑐᖅ Tłı̨chǫ ᒐᕙᒪᒃᑯᓐᓄᑦ, ᐃᖅᑲᓇᐃᔮᕆᓯᒪᓕᖅᑕᖓ ᐊᕐᕌᒍᓄᑦ 6-ᓄᑦ ᒫᓐᓇᓗ ᐊᐅᓚᑦᑎᔨᙳᖅᐸᓪᓕᐊᓕᖅᖢᓂ. ᐃᖅᑲᓇᐃᔮᕆᓂᐊᓕᖅᑕᖓ ᐊᐅᓚᑦᑎᔨᐅᓗᓂ ᓄᓇᓕᕆᓂᕐᒧᑦ ᓴᐳᔾᔨᓂᕐᒧᑦ ᓄᓇᒥᐅᑕᓕᕆᔨᒃᑯᓐᓄᓪᓗ.

ᐱᐅᕋᓐᔅ ᐆᒪᔪᓂᒃ ᖃᐅᔨᓴᖅᑎᐅᕗᖅ ᐊᒻᒪ ᐃᓕᓐᓂᐊᕇᕋᒥ, ᓅᓚᐅᖅᓯᒪᕗᖅ ᓄᐊᒪᓐ ᐅᐃᓪᔅᒧᑦ. ᐃᖅᑲᓇᐃᔮᒥᓂᒃ ᓯᕗᒻᒧᐊᒃᑎᑦᑎᓚᐅᖅᐳᖅ ᓄᓇᕗᑦ ᒐᕙᒪᒃᑯᓐᓂ ᐆᒪᔪᓕᕆᔨᐅᓚᐅᖅᖢᓂ ᐆᒪᔪᓂᒃ ᖃᐅᔨᓴᖅᑎᙳᖅᖢᓂ ᐊᖏᕐᕋᒧᑦ ᐅᑎᓚᐅᙱᓐᓂᕐᒥᓂ. ᓯᕗᓪᓕᕐᒥ ᐊᖏᕐᕋᒥᓂ ᓅᓚᐅᖅᓯᒪᕗᖅ ᐃᓕᓐᓂᐊᕆᐊᖅᖢᓂ 2005-ᒥ ᐅᑎᖅᖢᓂᓗ ᐊᖏᕐᕋᒥᓄᑦ 14 ᐊᕐᕌᒍᑦ ᐊᓂᒍᖅᑎᓪᓗᒋᑦ. ᖁᕕᐊᓱᑦᑎᐊᖅᑐᖅ ᐃᖅᑲᓇᐃᔭᕆᐊᒃᓴᖅ ᐃᓄᖁᑎᒥᓄᑦ.

ᐃᓕᓐᓂᐊᕐᓂᖓᒍᓪᓕ, ᐱᐅᕋᓐᔅ ᐱᒋᐊᓚᐅᖅᓯᒪᕗᖅ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᖅᑎᐅᓪᓗᓂ ᔭᓗᓇᐃᒥ. ᐊᑕᐅᓯᕐᒥ ᐃᓕᓐᓂᐊᕐᓇᒥ, ᓴᖑᓕᓚᐅᖅᐳᖅ ᖃᕋᓴᐅᔭᓕᕆᓂᕐᒧᑦ ᐃᓕᓐᓂᐊᒐᒃᓴᒥ ᐅᕘᓇ Aurora College ᕗᐊᑦ ᓯᒥᑦᒥ, ᐃᓕᓐᓂᐊᒃᑲᓐᓂᖅᖢᓂ ᖃᐅᔨᓴᖅᑐᓕᕆᓂᕐᒥᒃ ᐊᒻᒪ ᐱᔭᕆᐊᖃᖅᑕᖏᓐᓂᒃ ᐊᕙᑎᓕᕆᓂᕐᒧᑦ ᐊᒻᒪ ᓄᓇᒥᙶᖅᑐᓂᒃ ᐱᓕᕆᔾᔪᑎᓄᑦ ᐃᓕᓐᓂᐊᒐᒃᓴᒥ ᕗᐊᑦ ᓯᒥᑦᒥ. ᖃᐅᔨᒪᓚᐅᖅᑐᖅ ᐱᓕᕆᐊᒃᓴᒥᒃ ᐱᕈᖅᓴᓪᓗᓂ ᐃᓚᐅᔪᒪᓪᓗᓂᓗ, ᐱᔪᒪᓂᖃᑦᑎᐊᖅᖢᓂ ᐱᕕᒃᓴᒥᒃ ᓄᓇᒧᑦ ᐊᐅᓪᓚᕐᓂᕐᒥᒃ, ᐱᕕᒃᓴᖅ ᑲᔪᖏᖅᓴᖅᑕᐅᙱᖦᖢᓂ ᐊᕐᓇᓄᑦ ᐃᓕᖅᑯᓯᖓᑎᒍᑦ. ᐃᖅᑲᓇᐃᔮᖃᕈᒪᓚᐅᖅᐳᖅ ᓵᑉ ᑐᓄᐊᓃᖏᓐᓇᐅᔭᙱᓪᓗᓂ, ᓄᓇᒦᖏᓐᓇᕈᓐᓇᕐᓗᓂ, ᐊᕙᑎᖓᓗ ᐱᐅᒋᑦᑎᐊᖅᖢᓂᐅᒃ.

ᐱᐅᕋᓐᔅ ᕗᐊᑦ ᓯᒥᑦ-ᒨᕆᐊᖃᓚᐅᖅᐳᖅ ᐃᓕᓐᓂᐊᕆᐊᖅᖢᓂ ᐊᒃᓱᕈᕐᓇᓚᐅᖅᑐᖅ ᐊᓈᓇᐅᓪᓗᓂ ᐃᓄᑑᓪᓗᓂ. ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᓕᓚᐅᖅᐳᖅ ᐊᒻᒪ ᓄᓇᒥᙶᖅᑐᓂᒃ ᐱᓕᕆᔾᔪᑎᓂᒃ ᐃᓕᓐᓂᐊᓕᖅᖢᓂ, ᐊᑲᕐᕉᑎᖃᓕᖅᖢᓂ ᓅᑎᕆᓂᕐᒧᑦ ᐊᖏᖃᑎᒌᒍᑎᒥᒃ ᓯᓚᑦᑐᖅᓴᕐᕕᒡᔪᐊᕐᒥ ᓕᑦᐳᕆᔾᒥ. ᐃᓕᑕᕆᔭᐅᔾᔪᑎᑖᖅᓯᒪᔪᖅ ᖃᐅᔨᓴᖅᑐᓕᕆᓂᕐᒥᒃ ᐊᕙᑎᓕᕆᓂᕐᒥᒃ. ᓯᓚᑦᑐᖅᓴᕐᕕᖕᒧᑦ ᐃᓕᓐᓂᐊᕆᐊᖅᖢᓂ ᐊᒻᒪ ᓯᓚᑦᑐᖅᓴᕐᕕᒡᔪᐊᒧᑦ ᓅᑉᐸᓪᓕᐊᓪᓗᓂ ᐱᐅᓚᐅᖅᐳᖅ ᐱᐅᕋᓐᔅᒧᑦ ᓲᖃᐃᒻᒪ ᒪᕐᕉᖕᓂᒃ ᐊᕐᕌᒎᖕᓂᒃ ᓯᕗᓪᓕᕐᓂᒃ ᐱᐊᓂᒃᓯᑐᐃᓐᓇᕈᓂ, ᐊᒃᓱᓪᓘᓐᓃᑦ ᐊᓂᒍᐃᔾᔪᑎᑖᕈᓐᓇᓚᐅᖅᐳᖅ. ᐱᔭᕇᕈᓯᐊᖓ ᐊᕐᕌᒍᒃᑲᓐᓂᕐᒥᒃ ᐃᓕᓐᓂᐊᒃᑲᓐᓂᓚᐅᖅᐳᖅ ᑯᐊᐸᒃᑯᓐᓂ ᐃᓕᓐᓂᐊᖅᑎᐅᓚᐅᕐᓂᖓᓄᑦ. ᓯᓚᑦᑐᖅᓴᕐᕕᒡᔪᐊᕐᒥ ᐱᔭᕇᕋᒥ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᓕᓚᐅᖅᐳᖅ ᓄᓇᑦᑎᐊᑉ ᒐᕙᒪᖓᑕ ᒪᓂᒪᑎᑕᖏᓐᓂᒃ, ᐱᒋᐊᕈᑎᒋᓪᓗᓂᐅᒃ ᐃᖅᑲᓇᐃᔮᒥᓂᒃ.

ᐃᓱᒪᒋᓪᓗᒍ ᐊᑐᓚᐅᖅᓯᒪᔭᖓ ᐃᓕᓐᓂᐊᕆᐊᖅᖢᓂ ᒪᕐᕉᖕᓂᒃ ᕿᑐᕐᖓᒥᓂᒃ ᐱᕈᖅᓴᐃᓪᓗᓂ, ᐱᐅᕋᓐᔅ ᐅᖃᓚᐅᖅᐳᖅ, "ᐃᓱᒪᒥᐅᑕᕆᔭᕆᐊᖃᖅᑕᐃᑦ. ᐱᔪᒪᓂᖃᑦᑎᐊᕆᑦ. ᐃᓕᖕᓂᒃ ᓴᐱᓕᖅᑕᐃᓕᒋᑦ ᐱᓇᔪᑐᐃᓐᓇᓕᕐᓗᑎᓪᓗ. ᖃᐅᔨᐃᓐᓇᐅᔭᖅᐳᖓ ᑲᑉᐱᐊᓇᕐᓂᖅᐹᑦ ᐃᓅᓯᑦᑎᓐᓂ ᐊᑑᑎᖃᓛᖑᓂᖏᓐᓂᒃ. ᐅᓗᕆᐊᓇᖅᑐᒦᑐᐃᓐᓇᕆᐊᖃᖅᐳᑎᑦ ᐊᒻᒪ ᐃᓚᐅᓕᕐᓗᑎᑦ ᐊᒻᒪ ᐱᒋᐊᓕᕐᓗᑎᑦ."  ᐊᓈᓇᐅᓪᓗᓂ ᐃᓄᑑᓪᓗᓂ ᐊᒻᒪ ᐃᓕᓐᓂᐊᖅᑎᐅᓪᓗᓂ ᐊᒃᓱᕈᕐᓇᓚᐅᖅᐳᖅ, ᐃᖅᑲᐅᒪᔪᖅ. "ᐊᒃᓱᕈᕐᓇᓚᐅᖅᐳᖅ, ᐊᒥᓱᓂ ᐊᒃᓱᕈᕐᓇᕐᓂᐅᔪᓂ, ᑭᓯᐊᓂ ᐊᒃᓱᕈᕐᓇᕐᓂᐅᔪᒥ ᐱᓕᕆᓂᐅᔪᒥ ᐊᒻᒪ ᖃᐅᔨᓇᓱᖕᓂᐅᔪᒥ ᖃᓄᖅ ᐊᓂᒍᖅᑎᑦᑎᔪᓐᓇᕐᓂᕐᒥ ᐊᒃᓱᕈᕐᓇᕐᓂᐅᔪᓂ ᑎᑭᐅᑎᔪᒪᓂᕐᒧᑦ ᑐᕌᒐᕆᔭᕐᓄᑦ, ᐊᒻᒪ ᐃᓱᒪᒋᐃᓐᓇᐅᔭᕐᓗᒍ ᑐᕌᒐᕆᔭᕗᑦ, ᓴᐱᓕᖅᑕᐃᓕᓗᒋᑦ ᑐᕌᒐᕆᔭᑎᑦ," ᐅᖃᒃᑲᓐᓂᖅᐳᖅ.

ᒪᒃᑯᒃᑑᓪᓗᓂ, ᐃᓕᓴᐃᔨᒧᑦ ᐱᔪᒃᓯᑎᑦᑎᓕᓚᐅᖅᓯᒪᕗᖅ ᕿᒪᐃᔪᒪᓪᓗᓂ ᐱᑦᑎᐊᖅᑕᐅᖃᑦᑕᙱᓐᓂᕐᒥᒃ ᐊᐃᑉᐸᕇᖕᓂᕐᒥ ᐅᖃᐅᑎᓪᓗᓂᐅᒃ, "ᐃᓱᒪᔪᓐᓇᙱᓐᓇᕕᑦ ᑕᐃᒪᐃᑦᑐᒥᒃ ᖃᑕᙳᑎᖃᕆᐊᒃᓴᖅ, ᐱᐅᔪᐊᓗᖕᓂᒃ ᖃᑕᙳᑎᒌᓂᒃ. ᐊᑖᑕᒥᓃᖏᓐᓇᙱᓪᓗᑎᑦ ᕿᑐᕐᖓᑎᑦ ᐊᑖᑕᖃᖁᑐᐃᓐᓇᕐᓗᒋᑦ, ᓲᖃᐃᒻᒪ ᖁᕕᐊᓱᙱᒃᑯᕕᑦ, ᕿᑐᙵᑎᑦ ᑕᒪᑐᒥᖓ ᑕᑯᓂᐊᕐᒪᑕ, ᐊᒻᒪ ᑕᒪᓐᓇ ᑲᔪᓯᑐᐃᓐᓇᕐᓂᐊᕐᒪᑦ ᐱᑦᑎᐊᖅᑕᐅᙱᓐᓂᖅ, ᐊᒻᒪ ᐃᓱᒪᑎᓐᓂᐊᕋᕕᒋᑦ ᖃᓄᐃᙱᓐᓂᖓᓂᒃ ᐃᓅᖃᑎᒥᓂᒃ ᐱᑦᑎᐊᖅᑕᐅᖃᑦᑕᙱᒃᑯᕕᑦ." ᐊᑖᑕᑦᑎᐊᕆᓚᐅᖅᑕᖓ ᐊᔭᐅᕆᓚᐅᖅᓯᒪᖕᒥᔪᖅ ᐃᓕᓐᓂᐊᕆᐊᖁᔨᓪᓗᓂ ᕿᑐᕐᖓᖏᓪᓗ ᐊᔾᔨᒌᙱᑦᑐᓂᒃ ᐊᑐᖃᑦᑕᖁᓪᓗᓂᒋᑦ ᐊᒻᒪ ᓂᕈᐊᕈᓐᓇᕐᓗᑎᒃ ᑐᙵᕕᒋᓗᒋᑦ ᑕᑯᓯᒪᔭᖏᑦ ᐊᑐᖅᓯᒪᔭᖏᓐᓂᒃ.

ᐃᓱᒪᒥᒍᑦ ᖃᓄᐃᙱᑦᑎᐊᖏᓐᓇᖁᓪᓗᒍ, ᐱᐅᕋᓐᔅ ᐃᓕᑦᑎᓯᒪᕗᖅ ᐊᓂᖅᓵᖅᑐᓚᐅᑲᖕᓂᕐᒥᒃ. ᐊᓕᐊᓇᐃᒋᖕᒥᔭᖓᑦᑕᐅᖅ ᓄᓇᒦᒋᐊᒃᓴᖅ ᓇᐅᑦᑎᖅᓱᖅᓯᓪᓗᓂ ᑐᒃᑐᓂᒃ ᐊᐅᔭᒃᑯᑦ. ᖁᕕᐊᒋᔭᖃᖅᐳᖅ ᐅᖄᓚᐅᑎᕋᓛᖃᙱᖦᖢᓂ ᐅᕝᕙᓘᓐᓃᑦ ᐱᓕᕆᔾᔪᑎᖃᙱᖦᖢᓂ.

ᐱᔪᒃᓯᓕᕋᓱᓕᕌᖓᒥ, ᐱᐅᕋᓐᔅ ᑕᐅᑐᒃᐳᖅ ᐊᑖᑕᑦᑎᐊᕆᓚᐅᖅᑕᒥᓂᒃ ᐃᑲᔪᖅᑐᐃᕐᔪᐊᓚᐅᖅᓯᒪᔪᒥᒃ ᐃᓕᓐᓂᐊᕐᓂᓕᕆᓂᕐᒥᒃ. ᑕᐅᑐᒃᐸᒃᑭᕗᖅ ᐃᓐᓇᕆᔭᒥᓂᒃ ᐊᔪᕐᓇᙱᑦᑐᑯᓗᖕᒥᒡᓗ ᐃᓅᓯᖃᖅᐸᖕᓂᖏᓐᓂᒃ ᐊᓐᓇᐅᒪᓇᓱᒃᐸᓚᐅᕐᓂᖏᓐᓂᒃ. ᕿᔪᒃᑖᕐᓂᕐᒥᒃ ᐃᒥᖅᑕᕐᓂᕐᒧᑦ, ᐱᓕᕆᕐᔪᐊᕆᐊᖃᓚᐅᖅᐳᑦ ᐱᔭᕆᐊᖃᖅᑕᒥᓄᑦ ᐊᒻᒪ ᐅᓂᒃᑳᖅᑐᐊᖏᑦ ᐊᒃᓱᕈᖅᖢᑎᒃ ᐱᓕᕆᓂᕆᓚᐅᖅᑕᖏᑦ ᐊᒻᒪ ᐊᒃᓱᕈᕐᓇᖅᑐᒃᑰᕐᓂᕆᓚᐅᖅᑕᖏᑦ ᐱᔪᒥᓇᖅᑐᒻᒪᕆᐅᕗᑦ. ᖃᐅᔨᑎᖦᖢᓂᔾᔪᒃ ᖃᓄᖅ ᐱᐅᒃᓴᙱᑎᒋᓂᖓᓂᒃ ᐃᖢᕐᕆᑦᑎᐊᕆᐊᒃᓴᖅ ᐅᖅᑰᔪᒥ ᐃᒡᓗᒥ. ᖁᕕᐊᒋᔭᖃᖅᐳᖅ ᐱᖃᑎᒋᔭᕆᐊᒃᓴᖅ ᑭᓯᐊᓂ ᐅᖃᐅᓯᕐᒥᓂᒃ ᐅᖃᓪᓚᒍᓐᓇᕈᒪᒐᓗᐊᖅᖢᓂ ᑐᑭᓯᔪᓐᓇᕐᓂᖅᓴᐅᓂᐊᕋᒥ ᐅᓂᒃᑳᖏᓐᓂᒃ. ᓂᕆᐅᖕᓂᖃᑦᑎᐊᖅᐳᖅ ᓯᕗᓂᒃᓴᒧᑦ ᐅᑎᓛᕈᒪᓪᓗᓂ ᐃᓕᖅᑯᓯᑐᖃᕐᓄᑦ ᑲᑎᒪᔨᐅᖃᑕᐅᕙᒃᖢᓂᓗ ᓄᓇᓕᒋᔭᒥᓄᑦ. ᐃᕐᖑᑕᓂ ᐃᓅᓯᖃᑦᑎᐊᖁᓪᓗᓂᐅᒃ ᐊᒻᒪ ᓄᓇᓕᖓ ᓄᖅᑲᖅᐸᓪᓕᐊᖁᓪᓗᓂᐅᒃ ᐋᖓᔮᕐᓇᖅᑐᓄᑦ ᐃᒥᐊᓗᖕᒧᓪᓗ ᐅᐃᕆᓯᒪᓂᕐᒧᑦ.

"ᖃᐅᑕᒫᑦ ᐃᓱᒪᓐᓃᖏᓐᓇᐅᔭᖅᑐᖅ, ᓯᓂᖕᓂᐊᓕᕌᖓᒪ ᐃᓱᒪᒋᔪᓐᓃᖅᐸᒃᖢᒍ, ᖃᓄᐃᓕᐅᕈᓐᓇᖅᐱᑕ ᐃᑲᔪᕐᓂᐊᕐᓗᒋᑦ ᓄᓇᓕᕗᑦ? ᐊᒃᓱᕉᓴᓐᓇᖅᑐᒻᒪᕆᐅᒻᒪᑦ, ᐊᒻᒪᓗ ᑐᓴᑐᐃᓐᓇᖅᑐᓂ ᔭᒐᐃᕙᓪᓕᐊᓂᑦᑎᓐᓂᒃ ᓄᓇᓕᓕᒫᓂ. ᐊᑕᐅᓯᑐᐊᖑᖏᒻᒪᑦ ᓄᓇᓕᒃ. ᓇᓂᓕᒫᑦᑎᐊᖅ. ᑕᒪᓐᓇ ᐋᓐᓂᐊᕕᒡᔪᐊᕐᓇᖅ ᒫᓐᓇ ᐊᑐᖅᑕᕗᑦ ᐃᓱᒪᕗᖓᓗ ᑕᒪᒃᑯᐊ ᓄᓇᓕᖕᓂ ᓯᕗᓕᖅᑎᐅᔪᑦ ᐅᑎᖅᑎᑦᑎᕙᓪᓕᐊᓕᖅᐸᑕ ᓄᓇᓕᒋᔭᒥᓂᒃ ᑐᕚᖃᑐᐃᓐᓇᕈᓐᓃᕐᓗᑎᒡᓗ ᒐᕙᒪᒃᑯᓐᓂᒃ, ᐃᒻᒪᖄ ᐃᑲᔪᕈᓐᓇᕋᔭᖅᐳᒍᑦ ᐃᓄᖁᑎᑦᑎᓐᓂᒃ ᓄᓇᓕᕗᓪᓗ ᐅᑎᖅᑎᓪᓚᕆᒡᓗᒋᑦ ᓄᓇᒧᐊᖅᑎᓪᓗᒋᓪᓗ ᑭᓯᐊᓂᓗᑦᑕᐅᖅ ᑕᒪᒃᑯᐊ ᐃᓄᐃᑦ ᐃᓱᒪᖅᓲᑎᒋᕙᖕᒥᔭᖏᑦ ᑕᒪᒃᑯᓂᖓ ᐊᑐᕈᒪᒍᑎᒃ ᐊᑐᕐᓗᒍᓗ. ᑕᐃᒪᐃᒐᔪᙱᖦᖢᑎᒃ. ᑭᓯᐊᓂ ᓂᕆᐅᖕᓂᖃᑦᑎᐊᖅᐳᖓ!" ᐅᖃᖅᑐᖅ.

ᒪᒃᑯᒃᑑᓪᓗᓂ, ᐆᒻᒪᑎᖓ ᐊᐅᓪᓚᕈᒪᓕᓚᐅᖅᓯᒪᕗᖅ ᑭᓯᐊᓂ ᓯᑕᕙᓂ ᐱᐅᕋᓐᔅ ᓇᓂᓯᔪᓐᓇᖅᓯᓚᐅᖅᐳᖅ ᐃᖅᑲᓇᐃᔮᒃᓴᒥᒃ ᐊᔪᕐᓇᙱᑎᑦᑎᔪᓐᓇᖅᑐᒥᒃ. ᐊᓈᓇᐅᓪᓗᓂ ᐃᓄᑑᓪᓗᓂ ᓄᖅᑲᖅᑎᑦᑎᓚᐅᙱᓚᖅ ᐊᓂᒍᐃᔾᔪᑎᑖᕋᓱᒃᖢᓂ, ᕿᑐᕐᙵᒥᓂᒃ ᐱᕈᖅᓴᐃᓚᐅᖅᐳᖅ ᐊᒻᒪ ᐃᓕᓐᓂᐊᖅᓯᒪᓂᕆᔭᖓ ᐊᑕᐅᑦᑎᒃᑯᑦ. ᐱᒋᐊᓚᐅᖅᓯᒪᕗᖅ ᐃᓗᐊᖅᓴᐃᔨᐅᓂᕐᒥᒃ ᑭᓯᐊᓂ ᐃᓂᒋᔭᕆᐊᖃᖅᑕᒥᓄᑦ ᑎᑭᐅᑎᓕᓚᐅᖅᓯᒪᕗᖅ, ᓄᓇᒥᙶᖅᑐᓂᒃ ᐱᓕᕆᔾᔪᑎᓂᒃ ᑭᖑᓂᐊᒍᓪᓗ, ᐊᕙᑎᓕᕆᓂᕐᒥᒃ ᖃᐅᔨᓴᖅᑐᓕᕆᓂᕐᒥᒃ ᓈᒻᒪᓛᖑᓪᓗᓂᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.