"ᖃᐅᔨᒪᓪᓚᕆᓚᐅᙱᓚᖓ ᓇᒧᙵᐅᕙᓪᓕᐊᓂᕆᔭᓐᓂᒃ ᐃᓅᓯᓕᒫᓐᓂ, ᑭᓯᐊᓂ ᖃᐅᔨᒪᓚᐅᖅᐳᖓ ᐃᑲᔪᖅᑎᐅᔪᒪᓪᓗᖓ, ᐊᓕᐊᓇᐃᒋᑦᑎᐊᖅᖢᒍᓗ ᐃᓕᓐᓂᐊᖅᑎᓂᒃ ᐃᓕᓐᓂᐊᕐᕕᖕᒦᖃᑎᖃᕆᐊᒃᓴᖅ," ᐅᖃᓚᐅᖅᐳᖅ ᒫᓴ ᒥᓯᔭᐱᑦ. ᑯᑯᒻ ᐅᐃᓂᐸᐃᒡᒥ ᐃᓕᓐᓂᐊᕐᕕᓕᕆᔨᒃᑯᓐᓄᑦ, ᐃᖅᑲᓇᐃᔭᓚᐅᖅᓯᒪᓪᓗᓂ ᐃᓕᓐᓂᐊᕐᕕᓕᕆᔨᒃᑯᓐᓂ 1980-ᒥᓂᑦ. ᐃᖅᑲᓇᐃᔮᖓ ᐊᖓᔪᖅᑳᒻᒪᕆᐅᑉ ᐃᑲᔪᖅᑎᖓ ᑭᓯᐊᓂ ᑯᑯᒻ ᐊᑎᖓ. ᒪᕐᕉᖕᓂ ᓄᓇᓕᖕᓂᙶᖅᑐᖅ ᐅᐃᓂᐸᐃᒡ ᐊᓯᐊᓂ, Lake Manitoba ᓄᓇᖃᖅᑳᖅᓯᒪᔪᓄᑦ ᐊᒻᒪ ᐊᓪᓚᖓᔪᓄᑦ ᓄᓇᓕᖓᓂ, ᕚᒐᕐ. Bear Clan-ᑯᓐᓂᙶᖅᑐᖅ ᑕᕐᓂᖓᑕᓗ ᐊᑎᖓ ᓴᙱᔪᖅ ᐱᓱᒃᑐᖅ ᐊᕐᓇᖅ.

ᖃᑕᙳᑎᒌᖕᓂᙶᖅᖢᓂ 11-ᓂᒃ ᐊᒻᒪ ᓄᓇᖅᑲᑎᒥᓄᑦ ᐊᒃᑐᐊᓂᖃᖅᖢᓂ, ᒥᓯᔭᐱᑦ ᐃᑲᔪᖅᑎᐅᔪᒪᐃᓐᓇᐅᔭᓚᐅᖅᐳᖅ ᐃᖅᑲᓇᐃᔮᕆᓪᓗᓂᐅᒃ. ᐊᓂᒍᐃᒐᒥ ᒪᒃᑯᒃᑑᓪᓗᓂ ᐊᓈᓇᐅᓪᓗᓂ, ᖃᑕᙳᑎᖓᑕ ᐃᓚᖓᑦ ᐅᖃᐅᑎᓚᐅᖅᐸᖓ ᐃᓕᓐᓂᐊᕐᕕᖕᒧᑦ ᐅᑎᖁᔭᐅᓪᓗᓂ ᐃᖅᑲᓇᐃᔮᖅᑖᕐᓗᓂᓗ. ᑕᒪᓐᓇ ᐅᖃᐅᔾᔪᖅᑕᐅᓂᖅ ᐃᓕᓴᐃᔨᒧᑦ ᐃᑲᔪᖅᑎᙳᕈᒪᓕᓚᐅᖅᐳᖅ. ᐃᓕᓐᓂᐊᖅᑎᓂᒃ ᐱᓕᕆᖃᑎᖃᕈᒪᑦᑎᐊᓚᐅᖅᐳᖅ. ᖃᑕᙳᑎᖏᓐᓄᑦ ᐃᑲᔪᖅᑐᖅᑕᐅᓚᐅᖅᑐᖅ ᑲᔪᓯᖁᓪᓗᒍ ᐃᓕᓐᓂᐊᖅᑕᒥᓂᒃ ᓯᓚᑦᑐᖅᓴᕐᕕᔾᔪᐊᖓᓂ ᐅᐃᓂᐸᐃᒡ ᐊᒻᒪᓗ ᓯᓚᑦᑐᖅᓴᕐᕕᔾᔪᐊᖓᓂ ᒫᓂᑑᕙᐅᑉ, ᑕᐃᑲᓂ ᐃᓕᓴᐃᔨᕈᖅᑐᓂ. ᓄᓇᒥᓄᑦ ᐅᑎᓚᐅᖅᑐᖅ ᐃᓕᓴᐃᔨᐅᔭᖅᑐᖅᑐᓂ ᐊᕐᕌᒍᓄᑦ ᐱᖓᓱᓄᑦ ᑭᓯᐊᓂ ᐅᑎᓕᓚᐅᖅᑐᖅ ᒫᓂᑑᕙᒧᑦ ᐃᓕᓴᐃᔨᐅᓪᓗᓂ ᐊᕐᕌᒍᒐᓴᖕᓄᑦ ᐃᑲᔪᖅᑎᙳᕋᓱᖕᓂᖓᓂ ᐃᓕᓴᐃᔨᓄᑦ 18-ᓄᑦ ᐃᓕᓐᓂᐊᕐᕕᖕᓄᑦ. ᖃᐅᔨᒪᔨᑕᙳᓚᐅᖅᓯᒪᕗᖅ 40-ᓄᑦ ᐃᓕᓐᓂᐊᕐᕕᖕᓄᑦ, ᑭᖑᓂᐊᒍᓪᓗ ᐃᓕᓴᐃᔨᓄᑦ ᐊᖓᔪᖅᑳᒧᑦ ᑐᒡᓕᕆᔭᐅᓕᖅᖢᓂ, ᑭᖑᓂᐊᒍᓪᓗ ᐃᓕᓴᐃᔨᓄᑦ ᐊᖓᔪᖅᑳᙳᖅᖢᓂ. ᑕᐃᑲᙵᑦ, ᑐᑭᒧᐊᖅᑎᑦᑎᔨᙳᓚᐅᖅᐳᖅ, ᑭᖑᓂᐊᒍᓪᓗ ᐊᖓᔪᖅᑳᒻᒪᕆᐅᑉ ᐃᑲᔪᖅᑎᒋᓕᖅᖢᓂᐅᒃ. ᐃᖅᑲᓇᐃᔮᒥᓂᒃ ᖁᕕᐊᒋᑦᑎᐊᖅᑕᖓ, ᐃᓕᓐᓂᐊᕐᕕᓕᐊᖅᐸᒃᖢᓂ, ᐃᒃᓯᕚᖃᑎᖃᖅᐸᒃᖢᓂ ᐃᓕᓐᓂᐊᖅᑎᓂᒃ ᖃᓄᑐᐃᓐᓇᖅ ᐅᑭᐅᓕᖕᓂᒃ ᐃᑲᔪᖅᑐᐃᕙᒃᖢᓂᓗ ᖁᕕᐊᒋᔭᒥᓂᒃ, ᐃᓕᓐᓂᐊᖅᑎᑦᑎᕙᒃᖢᓂ ᐃᓄᖕᓂᒃ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᒧᑦ ᐊᐅᓪᓚᖅᑐᓄᑦ ᓄᓇᓕᒋᔭᒥᓂᑦ ᐃᓕᓐᓂᐊᕆᐊᕐᓗᓂ ᓴᙱᔪᒥᒃ ᑲᑎᙵᓂᖃᐃᓐᓇᕐᓗᓂ ᖃᑕᙳᑎᖏᓐᓄᑦ ᓇᓂᓯᓗᓂᓗ ᐃᑲᔪᖅᓱᐃᔪᓂᒃ ᐃᓄᖕᓂ ᐃᓕᓐᓂᐊᕐᕕᖕᒥ ᐅᕝᕙᓘᓐᓃᑦ ᓄᓇᒋᓕᖅᑕᖓᓂ. "ᓄᓇᓕᖕᓂ ᐃᑲᔪᕆᐊᖃᓪᓚᕆᒃᐳᖅ ᐃᓕᓐᓂᐊᖅᑎᒥᒃ ᓯᕗᒻᒧᐊᒃᑎᑦᑎᓂᐊᕐᓗᓂ, ᐊᒻᒪ ᐊᒥᓱᓂᒃ, ᐅᓄᖅᑐᓂᒃ ᐃᑲᔪᖅᑐᐃᔪᓂᒃ ᐃᓄᖕᓂᒃ, ᑕᐃᒪᓕ ᑭᓯᐊᓂ ᑲᔪᓯᑦᑎᐊᕈᓐᓇᖅᐳᑎᑦ. ᐃᓄᑑᓗᓂ ᐃᖏᕐᕋᓪᓗᓂ, ᐊᒃᓱᕈᕐᓇᖅᑐᒻᒪᕆᐅᔪᓐᓇᖅᐳᖅ ᐱᔭᕐᓂᙱᖦᖢᓂᓗ, ᐃᓛᓐᓂᒃᑯᓪᓗ ᐊᒃᓱᕈᕐᓇᖅᑐᑦ ᒪᒃᑯᒃᑐᓂᒃ ᓴᐱᓕᕈᒪᓕᖅᐸᒃᖢᑎᒃ, ᑭᓯᐊᓂ ᐃᑲᔪᖅᑎᖃᕈᕕᑦ ᐃᓕᓐᓂᐊᕐᕕᖕᒦᑦᑐᓂᒃ ᓯᓚᑖᓂᓗ ᖃᑕᙳᑎᖕᓂᓪᓗ, ᐃᓱᒪᕗᖓ ᐱᐅᓂᖅᓴᒥᒃ ᐱᕕᒃᓴᖃᕋᔭᖅᐳᑎᑦ ᑎᑭᐅᑎᓗᒋᑦ ᑕᒪᒃᑯᐊ ᑐᕌᕆᔭᐅᔪᑦ ᑕᐅᑐᙳᐊᖅᑕᐅᔪᒪᔪᓪᓗ ᐃᓅᓯᕐᓂ. " ᒥᓯᔭᐱᑦ ᐅᖃᖅᑐᖅ.

ᐊᔪᕐᓇᖅᑐᖅᓯᐅᓕᕌᖓᒥ, ᒥᓯᔭᐱᑦ ᐊᒃᓱᕉᑎᖃᓚᐅᖅᐳᖅ ᐃᒻᒥᓂᒃ ᐅᐱᒋᑦᑎᐊᕋᓱᒃᖢᓂ ᐊᒻᒪ ᓇᓂᓯᓇᓱᒃᖢᓂ ᐃᓂᒋᔪᓐᓇᖅᑕᒥᓂᒃ. ᐃᓕᓐᓂᐊᖃᑕᐅᓪᓗᓂ ᓯᓚᑦᑐᖅᓴᕐᕕᒡᔪᐊᒥ ᐅᐃᓂᐸᐃᒡᒥ ᓱᕈᓯᐅᓪᓗᓂ, ᑕᑯᓚᐅᙱᓚᖅ ᑖᔅᓱᒥᖓᑎᑐᑦ ᐊᔾᔨᖃᖅᑐᒥᒃ, ᐅᓂᒃᑳᓕᖅᖢᓂ ᐃᓱᒪᒥᒍᑦ ᓯᓚᑦᑐᖅᓴᕐᕕᒡᔪᐊᕐᒧᐊᓚᐅᖅᓯᒪᔾᔮᙱᓐᓂᕋᖅᖢᓂ. ᐊᖓᔪᒃᖡᑦ ᐃᓕᓐᓂᐊᕐᕕᖓᓂ, ᓯᓚᑦᑐᖅᓴᕐᕕᒡᔪᐊᒧᑦ ᐃᓯᕈᓐᓇᕐᓂᕐᒧᑦ ᐃᓕᓐᓂᐊᖃᑕᐅᓚᐅᙱᑦᑐᖅ ᐊᒻᒪ ᐊᔪᕆᖅᓱᖅᑕᐅᑦᑎᐊᓚᐅᙱᑦᑐᖅ. ᑭᖑᓂᐊᒍᑦ, ᐃᓕᓴᐃᔨᒧᑦ ᐃᒃᓯᕚᖅᑎᖦᖢᓂᐅᒃ ᐊᐱᕆᓪᓗᓂᐅᒃ ᖃᓄᐃᓕᐅᕈᒪᖕᒪᖔᑦ. ᐊᔪᕆᖅᓱᖅᑕᐅᓚᐅᙱᒃᑲᓗᐊᖅᖢᓂ ᓄᑲᖅᖡᑦ ᐊᒻᒪ ᐊᖓᔪᒃᖡᑦ ᐃᓕᓐᓂᐊᕐᕕᖓᓂ, ᐊᔪᙱᑦᑎᐊᕐᓂᖓ ᐃᓕᓐᓂᐊᕐᓂᓕᕆᓂᕐᒥ ᐃᓕᓴᕆᔭᐅᓚᐅᖅᐳᖅ ᓯᓚᑦᑐᖅᓴᕐᕕᒡᔪᐊᒥ ᐱᖃᓐᓇᕆᔭᖅᑖᖅᐸᒃᖢᓂᓗ ᑲᑎᖃᑎᖃᖅᐸᒃᖢᓂᓗ ᐃᓕᓴᐃᔨᓂᒃ ᐊᒻᒪ ᐃᓕᓴᐃᔨᓂᒃ. ᐱᖃᓐᓇᕆᔭᖅᑖᓚᐅᕆᕗᖅ ᐃᖅᑲᓇᐃᔭᕐᕕᖕᒥ, ᐃᑲᔪᖅᑐᐃᓚᐅᖅᑐᓂᒃ ᓇᒧᙵᐅᕙᓪᓕᐊᓂᕆᔭᖓᓂᒃ.

ᒥᓯᔭᐱᑦ ᑐᓴᖅᑎᑦᑎᔪᓐᓇᖅᐸᑦ ᒪᒃᑯᖕᓂᖅᓴᒧᑦ ᐃᒪᓐᓇᐅᓇᔭᖅᐳᖅ, "ᓴᐱᓕᖅᑕᐃᓕᒋᑦ. ᑭᓇᑐᐃᓐᓇᕐᒧᑦ ᐅᖃᐅᔾᔭᐅᓚᐅᖅᓯᒪᙱᓪᓗᑎᑦ ᖃᓄᐃᓕᐅᕈᓐᓇᙱᓐᓂᕐᓂ ᓲᖃᐃᒻᒪ ᐆᒃᑐᐃᓐᓇᕆᐊᖃᕋᕕᑦ ᐃᓅᓯᕐᓂ. ᑭᒃᑯᓕᒫᑦ ᐊᒃᓱᕈᕐᓇᖅᑐᖃᖅᐳᑦ. ᑭᒃᑯᓕᒫᑦ ᑕᒻᒪᖃᑦᑕᕐᓂᐊᕐᒪᑕ, ᑭᓯᐊᓂ ᐱᕕᒃᓴᖃᖅᑎᑕᐅᔪᐃᓐᓇᐅᓂᐊᖅᐳᒍᑦ ᖃᖓᑐᐃᓐᓇᒃᑯᑦ ᐃᓅᓯᑦᑎᓐᓂ, ᐊᒻᒪ ᐃᓛᓐᓂᒃᑯᑦ, ᐃᓱᒪᓕᖅᐸᒃᐳᒍᑦ ᖃᓄᐃᓕᐅᕈᓐᓇᙱᓐᓂᑦᑎᓐᓂᒃ ᑕᐃᒪᓕ ᐆᒃᑐᕈᒪᙱᖦᖢᑕ."

ᒪᑭᑕᑦᑎᐊᕈᒪᓪᓗᓂ ᖃᓄᐃᙱᑦᑎᐊᕈᒪᓪᓗᓂᓗ, ᒥᓯᔭᐱᑦ ᐊᒃᑐᐊᓂᖃᐃᓐᓇᖅᐳᖅ ᑭᓇᐅᓂᕐᒥᓄᑦ ᐃᓕᖅᑯᓯᕐᒥᓄᓪᓗ, ᐅᐸᒍᑎᕙᒃᖢᓂ ᖁᕕᐊᓲᑎᖃᕐᓂᐅᔪᒧᑦ. "ᑕᒪᑦᑕᑦᑎᐊᖅ ᐃᓅᓯᖃᑦᑎᐊᕈᒪᒐᓗᐊᖅᑎᓪᓗᑕ, ᑭᓯᐊᓂ, ᑕᒪᓐᓇ ᑐᑭᖃᖅᑰᔨᙱᓚᖅ, ᑕᒪᓐᓇ ᑐᑭᖃᙱᓚᖅ ᑕᒪᓐᓇ ᐃᓅᓯᖅ ᐊᔪᕐᓇᙱᑦᑐᑯᓘᓂᐊᕐᓂᖓᓂᒃ," ᐅᖃᓚᐅᖅᐳᖅ. ᐃᓕᑦᑎᕙᓪᓕᐊᓂᖅ ᓄᓇᖃᖅᑳᖅᓯᒪᔪᑦ ᐱᐅᓯᕆᕙᓚᐅᖅᑕᖏᓐᓂᒃ ᐊᒻᒪ ᐊᒃᓱᕈᕐᓇᖅᑐᓂᒃ ᓄᓇᖃᖅᑳᖅᓯᒪᔪᑦ ᓵᙵᔭᖏᓐᓂᒃ ᑐᙵᕕᖃᑦᑎᐊᓚᐅᖅᐳᖅ ᐊᒻᒪ ᐊᔪᕆᖅᓲᔾᔨᓪᓗᓂ ᐊᔪᕈᓐᓃᖅᓴᕐᓂᕐᒥᒃ ᐅᒃᐱᕐᓂᕐᒥᓂᒃ ᐊᒻᒪ ᐃᓕᖅᑯᓯᕐᒥᓂᒃ, ᑕᒪᓐᓇᓗ ᐃᑲᔪᖅᓯᒪᓪᓗᓂ ᐱᓯᒪᐃᓐᓇᕐᓂᕐᒥᒃ ᐊᒻᒪ ᖁᕝᕙᖅᐹᓪᓕᖅᑎᑦᑎᓂᕐᒥᒃ ᓇᖕᒥᓂᖅ ᐅᐱᒋᔪᓐᓇᕐᓂᕐᒥᒃ ᑭᓇᐅᓂᕐᒥᓂᒡᓗ. "ᐱᒃᑯᒍᓱᒃᐳᖓ ᑭᓇᐅᓂᓐᓂᒃ ᐅᓪᓗᒥ ᐊᒻᒪ ᐅᐊᑦᑎᐊᕈᐊᓗᒃ, ᒪᒃᑯᖕᓂᖅᓴᐅᑎᓪᓗᖓ ᑐᑭᓯᙱᖦᖢᒍᓗ, ᐱᒃᑯᒍᓱᓗᐊᖅᐸᓚᐅᙱᑦᑐᖓ," ᐅᖃᖅᑐᖅ.

ᐱᔪᒃᓯᑎᑦᑎᓂᒃᑯᓪᓕ, ᒥᓯᔭᐱᑦ ᑕᐅᑐᒃᐸᒃᐳᖅ ᒪᒃᑯᖕᓂᖅᓴᓂᒃ ᐃᓕᓐᓂᐊᖅᑎᓐᓇᓱᐊᖅᑕᒥᓂᒃ ᐃᓅᓯᖃᑦᑎᐊᕐᓂᕐᒥᒃ. "ᐃᖅᑲᓇᐃᔮᖃᖁᔭᒃᑲ ᐅᓪᓗᒥ ᐊᑐᐃᓐᓇᐅᔪᓂᒃ," ᑕᐅᑐᙳᐊᖅᑐᖅ ᓂᐱᖅᑯᖅᑐᓪᓗᓂ. ᐃᓱᒪᒋᖕᒥᔭᖏᑦ ᖃᑕᙳᑎᖏᑦ ᐃᓕᓴᐃᔨᐅᓪᓗᑎᒃ ᐊᒃᓱᕉᑎᖃᓚᐅᖅᑐᑦ ᐃᓅᖃᑎᒥᓂᒃ ᐊᑭᕋᖅᑐᕐᓂᕐᒥᒃ ᐊᒻᒪ ᐊᔪᖅᓴᕐᓂᕐᒥᒃ ᖃᓄᕈᓘᔭᕐᓗ. "ᐊᒃᓱᕉᑎᖃᓚᐅᖅᐳᑦ ᐊᒥᓱᓂᒃ ᐊᒃᓱᕈᕐᓇᖅᑐᓂᒃ ᑲᑎᒪᑎᓪᓗᒋᑦ, ᐊᒻᒪ ᑕᐃᒪᓐᓇ ᐱᓕᕆᓚᐅᕐᓂᖏᓐᓄᑦ, ᑎᑭᐅᑎᔪᓐᓇᓚᐅᖅᐳᖓ ᑐᕌᒐᕆᔭᐅᔪᓂᒃ ᐊᒻᒪ ᑕᐅᑐᙳᐊᖅᑕᐅᔪᓂᒃ ᐊᒻᒪ ᐃᓂᒋᔭᓐᓂᒃ ᐊᐅᓚᑦᑎᔨᐅᓪᓗᖓ ᐊᒻᒪᓗᑦᑕᐅᖅ ᓯᕗᓕᖅᑎᐅᓪᓗᖓ ᐊᖓᔪᖅᑳᒻᒪᕆᐅᑉ ᐱᓕᕆᕝᕕᖓᓂ," ᐅᖃᖅᑐᖅ.

ᐅᖃᐅᔾᔨᒋᐊᕈᑎᒋᔭᖓᓄᑦ ᑭᓇᑐᐃᓐᓇᕐᒧᑦ ᐊᒃᓱᕉᓴᒃᑐᒧᑦ ᐊᖅᑯᑎᒋᔭᒥᓄᑦ, ᒥᓯᔭᐱᑦ ᐅᖃᕋᔭᖅᐳᖅ "ᖃᐅᔨᓇᓱᖕᓂᐅᕗᖅ ᑲᑎᙵᖃᑎᖃᕐᓂᕐᒥᒃ ᐅᒃᐱᕐᓂᕐᓂᒃ. ᐅᖃᐃᓐᓇᐅᔭᖅᐳᖓ ᐱᖓᓱᓪᓗᐊᑕᕐᓂᒃ ᐱᔾᔪᑎᑕᖃᕐᓂᖓᓂᒃ ᓄᓇᕐᔪᐊᕐᒧᐊᖅᑕᐅᓂᑦᑎᓐᓄᑦ ᐃᓅᓪᓗᑕ, ᓯᕗᓪᓕᖅ ᓇᓂᓯᔪᒪᓂᕐᒧᑦ ᑐᓐᓂᖅᑯᓯᐊᕆᔭᕐᓂᒃ....ᐊᒻᒪᓗ ᐊᐃᑉᐸᖓ ᐱᔾᔪᑕᐅᔪᖅ ᐊᒥᖅᑳᖃᑎᖃᕈᒪᓂᕐᒧᑦ ᑕᒪᒃᑯᓂᖓ ᑐᓐᓂᖅᑯᓯᐊᓂᒃ, ᐃᓕᖕᓂᒃ ᐃᑲᔪᕈᒪᓂᕐᒧᑦ ᐃᓅᓯᕐᓂ ᐊᒻᒪᓗ ᐊᓯᖕᓂᒃ ᐃᑲᔪᕈᒪᓂᕐᒧᑦ ᓇᒧᙵᐅᕙᓪᓕᐊᓂᖏᓐᓂ. ᑭᓯᐊᓂ ᐱᔾᔪᑎᓪᓗᐊᑕᐅᔪᖅ ᓄᓇᖃᖅᑳᖅᑐᓄᑦ ᐃᓄᖕᓄᑦ... ᑲᑎᙵᖃᑎᖃᕐᓂᖅ ᓴᙱᓂᖅᓴᐅᓂᑦᑎᓐᓄᑦ. ᓇᓂᓯᒑᖓᑦᑕ ᓇᓕᒧᒌᒃᑎᑦᑎᓂᕐᒥᒃ ᑕᒪᒃᑯᓂᖓᓕᒫᖅ, ᓇᒧᙵᐅᕙᓪᓕᐊᓂᕆᔭᕗᑦ ᑐᕌᕆᔭᕗᓪᓗ ᐃᓅᓯᑦᑎᓐᓂ ᐊᔪᕐᓇᙱᓐᓂᖅᓴᐅᓕᖅᐸᒃᐳᑦ."

"ᐱᔪᒪᔭᑐᐊᕆᔭᕋ ᓄᓇᖃᖅᑳᖅᑐᖁᑎᑦᑎᓐᓄᑦ ᐊᒻᒪ ᓄᓇᕐᔪᐊᓕᒫᓄᑦ ᑎᑭᑉᐸᓪᓕᐊᔪᓄᑦ ᑕᒪᐅᙵᖅᐸᓪᓕᐊᔪᓄᑦᑕᐅᖅ, ᐃᖏᕐᕋᖃᑎᒌᖕᓂᐅᕗᖅ, ᐊᒻᒪ ᐃᓅᓯᖃᑦᑎᐊᕋᓱᓪᓚᕆᒡᓗᑕ," ᒫᓴ ᒥᓯᔭᐱᑦ ᐅᖃᓚᐅᖅᐳᖅ. ᐃᓕᓐᓂᐊᕐᓂᕐᒧᑦ ᐃᖅᑲᓇᐃᔮᕆᔪᒪᔭᒥᓂᒃ ᐱᒋᐊᓚᐅᖅᓯᒪᔪᖅ ᒪᒃᑯᒃᑑᓪᓗᓂ ᐊᓈᓇᐅᓪᓗᓂ ᐱᕈᖅᐹᓪᓕᖅᓯᒪᕗᖅ ᒫᓐᓇ ᐊᖓᔪᖅᑳᒻᒪᕆᐅᑉ ᐃᑲᔪᖅᑎᒋᓕᖅᖢᓂᐅᒃ. ᐊᒃᓱᕉᑎᖃᓚᐅᖅᓯᒪᕗᖅ ᐃᒻᒥᓂᒃ ᐅᐱᒋᔭᒥᓂᒃ ᑭᓯᐊᓂ ᓇᓂᓯᓯᒪᓕᖅᐳᖅ ᐊᔪᙱᑕᒥᓂᒃ ᐊᒥᖅᑳᕈᑎᒋᔪᓐᓇᖅᑕᒥᓂᒃ ᓄᓇᕐᔪᐊᕐᒥᐅᓄᑦ ᐃᓕᑦᑎᓪᓗᓂᓗ ᖃᓄᐃᓕᐅᖅᐸᓚᐅᕐᓂᕐᒥᓂᒃ ᑐᙵᕕᖃᑦᑎᐊᕈᒪᓪᓗᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.