"ᑕᕐᕆᔭᐅᓯᐅᕐᓂᖅ ᐊᒻᒪ ᑕᓚᕖᓴᒃᑯᑦ ᑲᑎᙵᑎᑦᑎᓲᖑᖕᒪᑕ ᐃᓄᖕᓂᒃ," ᐅᖃᓚᐅᖅᐳᖅ ᒥᐊᓕᓘ ᒥᓐᑐᕌᒻ. ᐊᑎᑐᖃᖓ Standing Rainbow Woman-ᖑᓂᕋᖅᑕᖓ ᓂᓯᓰᕙᐊᓯᒃ ᐊᓪᓚᐃᑦ ᓄᓇᖓᓐᓃᙶᖅᓯᒪᓪᓗᓂ. ᖁᕕᐊᒋᔭᖃᒻᒪᕆᓕᓚᐅᖅᑐᖅ ᑎᑎᕋᕐᓂᕐᒥᒃ ᐊᒻᒪᓗ ᓴᖅᑭᑎᑦᑎᓂᕐᒥᒃ ᑕᕐᕆᔭᐅᓯᐅᕐᓂᕐᒧᑦ ᐃᓕᓐᓂᐊᕐᕕᒻᒥ. ᑐᑭᒧᐊᖅᑎᑦᑎᔨᙳᕈᒪᓪᓗᓂ, ᓂᕆᐅᒃᐳᖅ ᓇᖕᒥᓂᖅ ᑐᑭᒧᐊᒃᑎᑦᑎᔪᒪᓪᓗᓂ ᑕᕐᕆᔭᒐᒃᓴᓕᐊᒥᓂᒃ ᑎᑎᕋᖅᑕᒥᓂᒃ. ᒫᓐᓇᓵᖑᓚᐅᖅᑐᖅ ᐱᐊᓂᒃᓯᓚᐅᖅᐳᖅ ᑕᕐᕆᔭᒐᒃᓴᒥᒃ ᑕᐃᔭᐅᔪᒥᒃ Making the Cut ᓂᕈᐊᖅᑕᐅᓚᐅᖅᖢᓂᓗ ᐱᓕᕆᐊᖑᔪᒧᑦ ᑕᐃᔭᐅᔪᒧᑦ ᐊᕐᓇᐃᑦ ᑕᕐᕆᔭᐅᓯᐅᕐᓂᕐᒧᑦ ᑕᓪᓕᒪᑦ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕈᐊᖅᑕᐅᓪᓗᑎᒃ ᐃᓕᓐᓂᐊᖅᑎᑕᐅᓂᐊᖅᖢᑎᒃ ᑏᓇ ᑮᐳᒧᑦ.

ᑕᕐᕆᔮᒃᓴᓕᐊᖅ ᒥᓐᑐᕌᒻ ᑎᑎᕋᓚᐅᖅᑕᖓ ᐅᓂᒃᑳᖅᑐᐊᕆᔭᐅᙱᖦᖢᓂ ᓄᓇᓕᖓᑕ ᒥᒃᓵᓄᑦ, ᑐᙵᕕᖃᖅᖢᓂ ᓄᔭᐃᔭᖅᑎᒥᒃ. "ᓄᔭᐃᑦ ᐱᒻᒪᕆᐊᓘᕗᑦ ᐱᒻᒪᕆᐅᓪᓗᑎᒡᓗ," ᐅᓂᒃᑳᕆᓪᓗᓂ. ᑕᕐᕆᔮᒃᓴᓕᐊᖓ ᑕᑯᒃᓴᐅᑎᑦᑎᕗᖅ ᓄᓇᓕᖓᑕ ᐃᓕᓴᐃᔾᔪᑎᖏᓐᓂᒃ, ᐱᒻᒪᕆᐅᒋᔭᖏᓐᓂᒃ, ᑐᑭᓯᐅᒪᔭᖏᓐᓂᒃ, ᐊᒻᒪᓗᑦᑕᐅᖅ ᓄᓇᖃᖅᑳᖅᓯᒪᔪᑦ ᖃᐅᔨᒪᔾᔪᓯᖏᓐᓂᒃ, ᐱᓕᕆᔾᔪᓯᖏᓐᓂᒃ ᐊᒻᒪ ᐃᓅᔾᔪᓯᖏᓐᓂᒃ.

ᑕᕐᕆᔮᒃᓴᓕᐊᖅ ᐱᔪᒃᓯᑎᑦᑎᓕᓚᐅᖅᐳᖅ ᐊᔭᐅᕆᔨᐅᓂᕐᒥᒃ ᐊᒻᒪ ᐃᓕᓐᓂᐊᕆᐊᖅᓯᒪᓪᓗᓂ ᓄᓇᖃᖅᑳᖅᓯᒪᔪᓄᑦ ᒪᓕᒐᓕᕆᓂᕐᒧᑦ ᐊᒻᒪ ᐱᕋᔭᒃᑐᓕᕆᓂᕐᒧᑦ ᐃᓕᓐᓂᐊᒐᒃᓴᒥ ᓯᓚᑦᑐᖅᓴᕐᕕᒡᔪᐊᒥ ᓴᔅᑳᑦᓱᐊᓐᒥ ᐃᓱᒪᓪᓗᓂ ᒪᓕᒐᓕᕆᔨᙳᑐᐃᓐᓇᕆᐊᖃᕐᓂᕐᒥᓂᒃ. ᒥᓐᑐᕌᒻ ᐊᖓᔪᖅᑳᖑᓚᐅᖅᐳᖅ ᓄᓇᖃᖅᑳᖅᑐᑦ ᐃᓕᓐᓂᐊᖅᑏᑦ ᑲᑎᒪᔨᖏᓐᓄᑦ, ᑮᓇᐅᔭᓂᒃ ᐱᕈᖅᓴᐃᓪᓗᓂ ᐸᐃᕆᕝᕕᖕᒧᑦ ᐊᒻᒪ ᑭᒡᒐᖅᑐᐃᓪᓗᓂ ᓄᓇᖃᖅᑳᖅᓯᒪᔪᑦ ᐸᐃᕆᕝᕕᖃᕈᓐᓇᖁᓪᓗᒋᑦ. ᐃᓕᓐᓂᐊᖅᑎᑦᑎᖃᑦᑕᓚᐅᖅᑐᖅ ᓴᐸᖓᓕᕆᓂᕐᒥᒃ, ᒥᖅᑯᓕᖅᓱᐃᓂᕐᒥᒃ ᐊᒻᒪ ᓄᕕᖅᓵᕆᓂᕐᒥᒃ ᐃᓚᒋᔭᐅᓪᓗᓂ ᓄᓇᖃᖅᑳᖅᓯᒪᔪᑦ ᐃᑲᕐᕋᖓᓂ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᕕᖓᓂ. ᑕᕐᕆᔭᐅᓯᐅᒃᑲᓐᓂᓕᓚᐅᖅᐳᖅ ᐅᓂᒃᑳᒃᑲᓐᓂᕆᐊᖅᑐᖅᖢᓂ.

ᖁᕕᐊᒋᔭᖃᐃᓐᓇᐅᔭᖅᑐᖅ ᐃᓕᑦᑎᕙᓪᓕᐊᓂᕐᒥᒃ ᐅᖃᓕᒫᕐᓂᕐᒥᒡᓗ. ᒥᓐᑐᕌᒻ ᐱᕈᖅᓴᓚᐅᖅᐳᖅ ᒫᓂᑑᐸᐅᑉ ᐅᐊᖕᓇᖓᓂ ᐊᒻᒪ ᕿᒪᐃᓪᓗᓂ ᐃᓕᓐᓂᐊᖅᑎᑦᑎᐊᕙᐅᓛᖑᓪᓗᓂ 11-ᓂᒃ ᐅᑭᐅᖃᓕᖅᑎᓪᓗᒍ. ᖃᓪᓗᓈᑦ ᓄᓇᖓᓐᓄᑦ ᓅᒃᑲᒥ ᑭᖑᕙᓯᒃᑲᓐᓂᓕᓚᐅᖅᓯᒪᕗᖅ ᑐᕌᓐᑐᒧᑦ ᓅᒃᑲᒥᒃ. ᐃᓱᒪᓚᐅᖅᐳᖅ ᐃᓕᑦᑎᕆᑦᑎᐊᙱᑐᐃᓐᓇᕆᐊᖃᕐᓂᕐᒥᓂᒃ ᑭᓯᐊᓂ ᐃᑲᔪᖅᑕᐅᓪᓗᓂ ᐊᙳᑎᓚᐅᖅᐳᖅ ᐊᓂᒍᐃᓪᓗᓂᓗ.  ᐃᓕᓐᓂᐊᓚᐅᖅᐳᖅ ᖃᐅᔨᓴᖅᑐᓕᕆᓂᕐᒥᒃ, ᐃᓅᓕᓴᐅᑎᙳᕈᒪᓪᓗᓂ.

ᐱᙳᐊᕐᓂᕐᒧᑦ ᐃᓕᓴᐃᔨᖓᑕ ᑎᓕᐅᖅᐸᓚᐅᖅᑕᖓ ᑎᑎᕋᖃᑦᑕᖁᔭᐅᓪᓗᓂ ᐊᒻᒪ ᓴᓇᙳᐊᖃᑦᑕᖁᔭᐅᓪᓗᓂ, ᖁᕕᐊᒋᓗᐊᓚᐅᙱᑕᖓ. ᐊᓈᓇᑦᑎᐊᖓ ᐊᖏᓚᐅᖅᐳᖅ ᑕᐃᒪᐃᓕᐅᕈᒪᓪᓗᓂ. ᐃᓱᒪᒋᕙᓪᓕᐊᑐᐃᓐᓇᖅᖢᓂᐅᒃ, ᑕᕐᕆᔭᐅᓯᐅᕐᓂᕐᒥᒃ ᖁᕕᐊᒋᔭᖃᓚᐅᖅᐳᖅ ᐃᓱᒪᓪᓗᓂᓗ, "ᑕᐃᒪᐃᑦᑐᒧᑦ ᐃᓚᒋᔭᐅᔪᒪᑦᑎᐊᖅᐳᖓ, ᐅᓂᒃᑳᖅᑐᐊᕐᓗᖓ, ᑭᓯᐊᓂ ᓄᓇᖃᖅᑳᖅᑐᕕᓂᕐᒨᖓᓕᖅᑎᖦᖢᒍ ᐊᒻᒪ ᑕᐅᑐᒃᖢᒍ ᓄᓇᖃᖅᑳᖅᓯᒪᔪᑦ ᐃᓗᓕᖏᑦ, ᑭᒡᒐᖅᑐᐃᓂᖅ ᐱᒻᒪᕆᐊᓘᕗᖅ." ᐱᓇᔪᓚᐅᖅᐳᖅ ᑕᕐᕆᔭᐅᓯᐅᕐᓂᕐᒧᑦ ᐃᓕᓐᓂᐊᕐᕕᖕᒧᑦ ᐊᒻᒪ ᐱᓪᓗᓂ ᐊᖏᖅᑕᐅᔾᔪᑎᓕᒫᓂᒃ ᐊᓯᖏᓐᓄᑦ ᐃᓕᓐᓂᐊᕐᕕᖕᓄᑦ ᐱᓇᔪᒃᑕᖏᓐᓄᑦ ᐊᒻᒪ ᑕᕐᕆᔭᐅᓯᐅᕐᓂᕐᒧᑦ ᐃᓕᓐᓂᐊᕐᕕᖕᒧᑦ.

ᖃᐅᔨᓇᓱᓕᓚᐅᖅᐳᖅ ᑕᕐᕆᔭᐅᓯᐅᕐᓂᕐᒧᑦ ᐃᓕᓐᓂᐊᕐᕕᖕᒥ ᐊᒻᒪ ᐱᔪᒪᓕᓚᐅᖅᐳᖅ. ᐊᒃᓱᕈᖅᖢᓂ ᐱᓕᕆᓚᐅᖅᐳᖅ ᐱᓇᔪᒃᖢᓂᓗ ᑕᒪᐃᓐᓄᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᓄᑦ ᑎᑭᖦᖢᒍ ᓯᕗᓪᓕᖅᐹᑦᑎᐊᒥ ᓴᓇᕝᕕᖕᒥ ᐃᖅᑲᓇᐃᔮᖅᑖᕋᒥ CTV News ᓗᐃᑦ ᕌᐳᑦᓴᓐ ᖃᐅᔨᓴᖅᖢᓂ. ᑭᖑᓂᐊᒍᑦ, ᖁᙱᐊᖅᑕᐅᔪᓂᒃ ᑐᑭᒧᐊᒃᑎᑦᑎᔨᐅᓚᐅᖅᐳᖅ ᑐᕌᓐᑐ 1-ᒥ, ᑭᖑᓂᐊᒍᓪᓗ ᐱᓕᕆᐊᖃᓕᖅᖢᓂ ᓇᐃᑦᑐᓂᒃ ᑕᕐᕆᔭᒐᒃᓴᓂᒃ, ᓯᕗᓪᓕᖅᐹᑦᑎᐊᒥ ᓵᓚᖃᖅᖢᓂ ᓄᓇᕐᔪᐊᓕᒫᒥ. ᐃᖅᑲᓇᐃᔭᓚᐅᖅᓯᒪᖕᒥᔪᖅ Big Soul Productions−ᑯᓐᓄᑦ ᓄᓇᖃᖅᑳᖅᓯᒪᔪᑦ ᐃᓗᓕᖏᓐᓂᒃ. ᐃᖅᑲᓇᐃᔮᒥᓂ, ᐊᐅᓪᓚᖃᑦᑕᖅᓯᒪᔪᖅ ᑲᓇᑕᓕᒫᒧᑦ ᐅᓂᒃᑳᖅᑐᐊᕆᐊᖅᑐᖅᑐᓂ ᐊᒻᒪᓗ ᓴᖅᑮᓯᒪᓪᓗᓂ ᐃᖅᑲᐅᒪᓇᖅᑐᓂᒃ ᐱᙳᐊᕕᔾᔪᐊᕐᓂᕐᓄᑦ.

ᐊᒥᓱᓂᒃ ᐃᓕᑦᑎᓯᒪᕗᖅ. "ᐊᑕᐅᓯᖅ ᐅᕙᓐᓄᑦ ᐅᖃᐅᔾᔪᖅᑕᐅᖏᓐᓇᐅᔭᖅᑐᖅ ᓴᖅᑭᑐᐃᓐᓇᕆᑦ, ᓲᖃᐃᒻᒪ ᖃᐅᔨᒪᙱᓐᓇᕕᑦ ᖃᓄᐃᓕᓂᐊᕐᒪᖔᑦ ᓴᖅᑭᒃᑯᕕᑦ. ᐃᓛᓐᓂᒃᑯᑦ ᑕᒪᒃᑯᐊ ᓴᖅᑭᑲᐅᑎᒋᔪᒪᕙᒃᑕᕗᑦ, ᑭᓯᐊᓂ ᐊᑯᓂᐅᓲᖑᕗᖅ. ᓴᖅᑭᕈᕕᑦ ᐃᓚᒋᔭᐅᓕᕐᓗᑎᓪᓗ ᖃᓄᐃᓕᐅᕈᑎᒋᓗᒋᓪᓗ ᑕᒪᒃᑯᐊ ᐃᒃᐱᒋᔭᑎᑦ, ᑕᐸᐃᑐᐃᓐᓇᕆᐊᖃᖅᐳᑎᑦ, ᓲᖃᐃᒻᒪ ᓇᓂᓯᑐᐃᓐᓇᕆᐊᖃᕋᕕᑦ ᑲᔪᖏᖅᓴᐃᔨᒃᓴᒥᒃ, ᐊᓯᐊᓂᒃ ᓇᓂᓯᑐᐃᓐᓇᕆᐊᖃᖅᐳᑎᑦ ᐊᑦᑕᒋᓇᔭᖅᑕᕐᓂᒃ. ᑕᐃᒪᐃᓕᐅᙱᒃᑯᑦᑕ, ᐃᖢᕐᕆᓇᙱᒃᑲᓗᐊᖅᑎᓪᓗᒍ, ᑭᑭᑦᑎᑐᐃᓐᓇᖅᐳᒍᑦ," ᐅᖃᖅᑐᖅ.

"ᑭᓱᑐᐃᓐᓇᖅ ᖁᕕᐊᒋᔭᐃᑦ, ᑭᓱᑐᐃᓐᓇᖅ ᖁᕕᐊᒋᔭᐃᑦ, ᐱᑕᖃᖅᑰᔨᙱᒃᑲᓗᐊᖅᑎᓪᓗᒍ: ᐊᑏ ᐱᓕᕆᓗᒍ."

ᐊᖑᑎᓄᑦ ᐊᐅᓚᑕᐅᔪᓄᑦ ᐱᓕᕆᓂᐅᔪᒥ ᐊᒃᓱᕈᕐᓇᓚᐅᖅᐳᖅ ᒥᓐᑐᕌᒻᒧᑦ, ᐱᓗᐊᖅᑐᒥ ᓄᓇᖃᖅᑳᖅᓯᒪᓪᓗᓂ. ᐊᖏᓕᑕᐃᓐᓇᓚᐅᖅᐳᖅ, ᐱᒋᐊᖅᖢᓂ ᐱᓕᕆᐊᒃᓴᒧᑦ ᐊᐅᓚᑦᑎᔨᐅᓪᓗᓂ ᐊᒻᒪ ᓴᖅᑭᑎᑦᑎᕙᓪᓕᐊᓕᖅᖢᓂ ᐊᒻᒪ ᑎᑎᕋᖅᐸᓪᓕᐊᓕᖅᖢᓂ. "ᑕᒪᓐᓇ ᓱᒃᑲᐃᑦᑐᒥ ᐱᕙᓪᓕᐊᓂᐅᕗᖅ. ᑭᓱᓕᒫᑦ ᐊᔪᕐᓇᙱᑦᑐᑯᓘᔾᔮᙱᒻᒪᑕ, ᑭᓯᐊᓂ ᐱᓕᕆᔭᕆᐊᖃᖅᐳᑎᑦ ᐊᒻᒪ ᒥᑭᒡᓕᑎᖅᓯᒪᓗᑎᑦ ᓲᖃᐃᒻᒪ ᐃᓛᓐᓂᒃᑯᑦ ᑕᒪᒃᑯᐊ ᒥᑭᑦᑑᑎᓂᒃ ᐱᓕᕆᐊᒃᓴᓂᒃ ᑎᒍᓯᔭᕆᐊᖃᓲᖑᒐᑦᑕ ᐊᒻᒪ ᐊᒃᓱᓪᓘᓐᓃᑦ ᐃᓕᑦᑎᕙᓪᓕᐊᕗᑎᑦ, ᓱᓕ ᐃᓕᑦᑎᔪᓐᓇᖅᐳᑎᑦ ᐊᒻᒪ ᑕᑯᔪᓐᓇᖅᖢᑎᑦ ᖃᓄᖅ ᑭᓱᑐᐃᓐᓇᐃᑦ ᐃᖏᕐᕋᓂᖃᕐᒪᖔᑕ, ᖃᓄᖅ ᐱᓕᕆᐊᖑᕙᖕᒪᖔᑕ, ᐄᓛᒃ?" ᐅᖃᖅᑐᖅ. ᖃᐅᔨᒪᕗᖅ ᐱᓕᕆᖃᑦᑕᖅᓯᒪᓂᑰᓂᖅ ᐃᑲᔪᖅᐸᒃᐳᖅ ᓯᕗᓕᖅᑎᐅᓂᕐᒧᑦ ᐃᓂᒋᔭᐅᕙᒃᑐᓄᑦ ᑐᐊᕕᓗᐊᖅᐸᒃᖢᓂᓗ ᑕᖃᓗᐊᓕᕐᓇᖅᐸᒃᖢᓂ.

"ᓱᓕᑦᑎᐊᕐᓗᑎᑦ, ᓱᓕᑦᑎᐊᕐᓗᑎᑦ ᐃᓕᖕᓄᑦ, ᐊᒻᒪ ᐃᓕᓴᕆᓗᒍ ᓇᖕᒥᓂᖅ ᑭᒡᒐᖅᑐᐃᔨᐅᓂᕐᓄᑦ. ᐱᙳᐊᕆᔭᐅᕗᑎᑦ ᓇᖕᒥᓂᖅ ᐃᓅᓯᕐᓂ."

ᐱᓕᕆᐊᓕᒫᖏᓐᓂ, ᐃᓱᒪᕗᖅ ᑭᖑᕚᒃᓴᑦᑎᓐᓂ ᐊᒻᒪ ᖃᓄᖅ ᐱᕚᓪᓕᕈᑎᖃᖅᓯᒪᖕᒪᖔᑦ ᓯᕗᓕᕆᓚᐅᖅᑕᒥᓂᑦ ᐊᒻᒪ ᐱᓇᔪᖕᓂᕆᓚᐅᖅᑕᖏᓐᓂ. "ᑲᑕᒃᐸᓪᓕᐊᑐᐃᓐᓇᖅᐳᒍᑦ. ᐊᐅᓚᑎᑦᑎᕙᓪᓕᐊᕗᒍᑦ ᐊᒻᒪ ᑕᐃᒪᐃᑎᓪᓗᒍ, ᐃᖏᕐᕋᓂᖃᑦᑎᐊᖁᓪᓗᒍ ᐊᒻᒪ ᐃᖏᕐᕋᓂᖃᕐᓂᐊᕐᓗᓂ, ᐊᒃᑐᐃᓂᖃᕆᐊᖃᖅᐳᑎᑦ, ᐄᓛᒃ? ᐅᔭᖅᑲᒥᒃ ᐃᒋᑦᑎᔭᕆᐊᖃᖅᐳᑎᑦ, ᐅᕝᕙᓘᓐᓃᑦ ᐊᒃᓱᕈᕆᐊᖃᖅᐳᑎᑦ, ᐃᓛᓐᓂᒃᑯᓪᓗ ᐃᒪᕐᒧᑦ ᑐᓗᖅᓯᒑᖓᕕᑦ, ᐊᒃᓱᕈᕐᓇᖅᐸᒃᐳᖅ... . ᑭᓯᐊᓂ ᓱᓕ ᖃᓄᐃᓕᐅᕆᐊᖃᖅᐳᑎᑦ ᐊᒻᒪ ᑕᐃᒪᐃᓕᐅᕐᓗᑎᑦ, ᐊᔪᕐᓇᖅᑰᔨᒐᓗᐊᖅᑎᓪᓗᒍ," ᐅᖃᖅᑐᖅ. ᖃᐅᔨᒪᔪᖅ ᖃᓄᖅ ᐱᒻᒪᕆᐅᑎᒋᓂᖏᓐᓂᒃ ᓯᕗᒃᑲᖅᑕᖅᑎᐅᔪᑦ ᐊᒻᒪᓗ ᐅᐱᒋᔭᖃᖅᖢᑎᒃ ᐊᔪᕆᖅᓱᐃᔨᓂᒃ ᐊᒻᒪᓗ ᐊᒃᑲᖏᓐᓂᒃ ᑕᓯᐅᖅᓯᓚᐅᖅᑐᓂᒃ ᐊᒻᒪᓗ ᐋᖅᑭᒃᓱᐃᓚᐅᖅᑐᓂᒃ ᐃᖅᑲᓇᐃᔮᕆᔪᒪᔭᒥᓂᒃ.

"ᖁᕝᕙᓯᖕᓂᖃᕆᐊᖃᖅᐳᒍᑦ ᐊᑦᑎᒃᑐᒦᑦᑕᕆᐊᖃᖅᖢᑕᓗ, ᑕᒪᓐᓇᓗ ᐃᑲᔪᖅᐸᒃᖢᓂ ᐃᓕᖅᑯᓯᑦᑎᐊᕆᖕᓂᕐᒥᒃ. ᖁᕝᕙᓯᖕᓂᖃᐃᓐᓇᕈᓐᓇᙱᓚᒍᑦ. ᐱᔪᒪᔭᑦᑎᓐᓂᒃ ᐱᐃᓐᓇᕈᓐᓇᖏᓐᓇᑦᑕ. ᐃᕐᖐᓐᓇᖅ ᑲᔪᓯᓂᖃᐃᓐᓇᕈᓐᓇᙱᓚᒍᑦ."

ᒪᒃᑯᖕᓂᖅᓴᒥ ᐃᒻᒥᓄᑦ ᐅᖃᐅᔾᔨᔪᓐᓇᕈᓂ, ᓲᕐᓗ ᐃᕐᓂᕐᒥᓄᑦ ᐅᖃᐅᔾᔪᖅᓱᐃᔾᔪᑎᒋᕙᒃᑕᖓᑎᑐᑦ, ᐃᒪᓐᓇ, "ᐃᖅᑲᐃᑎᑉᐸᕋ ᒪᓕᒋᐊᖃᖅᑕᑦᑎᓐᓂᒃ. ᐃᖅᑲᐃᑎᑉᐸᕋ ᐃᓕᖅᑯᓯᑦᑎᓐᓂᒃ.... ᐊᒻᒪᓗ ᓴᐱᓕᖅᑎᖦᖢᒍ ᑕᐃᒪᐃᓕᐅᕈᓐᓇᖁᓪᓗᒍ, ᐱᓱᒡᓗᓂ ᖁᓱᙱᑦᑎᐊᕐᓗᓂ, ᓲᖃᐃᒻᒪ ᒥᑭᑦᑐᑯᓗᖕᒥᒃ ᐱᙳᐊᕐᓂᖅ ᐃᑲᔪᙱᒻᒪᑦ ᑭᓇᑐᐃᓐᓇᕐᒥᒃ... ᑭᓇᐅᖕᒪᖔᖅᐱᑦ ᐱᒻᒪᕆᐅᕗᖅ, ᐃᓚᒋᔭᐅᓪᓗᑎᓪᓗ ᑲᑎᙵᓂᑦᑎᓐᓄᑦ, ᐃᓚᒋᔭᐅᖏᓐᓇᐅᔭᕐᓂᐊᖅᐳᑎᓪᓗ ᐊᖕᒪᓗᖅᓯᓯᒪᔪᓄᑦ, ᐃᓕᓴᖅᓯᓂᕐᓗ ᐱᒻᒪᕆᐅᒋᔭᕐᓂᒃ ᓄᓇᓕᑦᑎᓐᓂ ᐱᒻᒪᕆᐊᓘᕗᖅ. ᐃᓛᓐᓂᒃᑯᑦ ᐃᓕᖕᓂᒃ ᑲᑕᒃᓴᕋᐃᓐᓇᖅᐸᒃᐳᖅ, ᐅᕝᕙᓘᓐᓃᑦ ᐃᖕᒥᓂᒃ ᐱᐅᒃᓴᙱᖦᖢᓂ, ᐃᓱᒪᓕᖅᐸᒃᖢᖓᓘᓐᓃᑦ 'ᑭᓇᐅᕗᖓ? ᑕᐃᒪᐃᑦᑐᑐᐃᓐᓇᐅᕗᖓ.' ᑭᓯᐊᓂ ᒥᑭᑦᑐᒥᒃ ᐱᙳᐊᕐᓂᖅ ᐃᓕᖕᓂᒃ ᐃᑲᔪᓗᐊᔾᔮᙱᑦᑐᖅ ᓄᓇᓕᔅᓯᓐᓂᓪᓘᓐᓃᑦ. ᑕᐃᒪᐃᓐᓂᖓᓄᑦ ᑲᑉᐱᐊᓱᙱᓪᓗᑎᑦ ᐱᓱᒋᐊᒃᓴᖅ ᖁᓱᙱᓪᓗᑎᑦ. ᑲᑉᐱᐊᓱᙱᓪᓗᑎᑦ ᐃᓇᖐᒋᐊᒃᓴᖅ. ᑲᑉᐱᐊᓱᙱᓪᓗᑎᑦ ᓇᓂᓯᔭᕆᐊᒃᓴᖅ ᖁᕕᐊᒋᔭᕐᓂᒃ. ᑲᑉᐱᐊᓱᙱᓪᓗᑎᑦ ᓇᓂᓯᔭᕆᐊᒃᓴᖅ ᑭᓇᐅᖕᒪᖔᖅᐱᑦ ᖃᐅᔨᑎᑦᑎᔪᓐᓇᖅᑐᒥᒃ, ᓲᖃᐃᒻᒪ ᑭᓇᐅᖕᒪᖔᖅᐱᑦ ᐱᒻᒪᕆᐅᖕᒪᑦ ᓄᓇᓕᖕᓂ ᐊᒻᒪ ᐊᔪᙱᔾᔪᑎᖃᖅᖢᑎᑦ ᐊᔪᙱᑕᖃᖅᖢᑎᓪᓗ ᐊᓯᕕᑦ ᐱᒋᙱᑕᖏᓐᓂᒃ... ᑲᑉᐱᐊᓱᙱᓪᓗᑎᑦ ᑕᒪᒃᑯᓂᖓ ᐊᑦᑕᕐᓇᖅᑐᓂᒃ ᐊᑐᕆᐊᒃᓴᖅ ᐃᒪᐃᓕᓗᖓᓗ, ᑭᓇᐅᕗᖓ, ᑭᓱᓪᓗ ᖁᕕᐊᒋᕙᒃᑲ? ᖃᐅᔨᓇᓱᒡᓗᒍ. ᖃᐅᔨᓴᕐᓗᑎᑦ. ᐊᑏ ᓴᖅᑭᓚᐅᕆᑦ. ᐱᓕᕆᒋᑦ, ᖃᐅᔨᓂᐊᕋᕕᑦ ᐱᕈᖅᐸᓪᓕᐊᓂᐊᕋᕕᑦ... ᑕᒪᑦᑕᑦᑎᐊᖅ ᓇᖕᒥᓂᖅ ᑲᑎᙵᔪᓂᒃ ᐱᖃᖅᑐᐃᓐᓇᐅᕗᒍᑦ, ᐊᒻᒪ ᓄᓇᓕᖕᒧᐊᕌᖓᑦᑕ, ᐃᓚᒋᔭᐅᓪᓗᑕᓗ ᐊᖕᒪᓗᖅᓯᓯᒪᔪᓄᑦ, ᑖᒃᑯᐊ ᑲᑎᖅᓱᖅᓯᒪᔪᑦ ᐱᒻᒪᕆᐅᕗᑦ ᓄᓇᓕᑦᑎᓐᓂ, ᐊᑏ ᓇᒃᓴᕐᓗᒋᑦ."

ᖃᐅᔨᒪᓪᓗᓂ ᑕᕐᕆᔭᐅᓯᐅᕐᓂᖅ ᐊᒻᒪ ᑕᓚᕖᓴᒃᑯᑦ ᑲᑎᙵᑎᑦᑎᔪᓐᓇᕐᓂᖏᓐᓂᒃ ᐃᓄᖕᓂᒃ, ᒥᐊᓕᓘ ᒥᓐᑐᕌᒻ ᐃᓱᒪᓕᓚᐅᖅᐳᖅ ᐃᓚᒋᔭᐅᔪᒪᓪᓗᓂ ᐊᖓᔮᕐᓇᖅᑐᓄᑦ. ᓱᓕᑦᑎᐊᖅᖢᓂ, ᓴᖅᑭᑉᐸᒃᖢᓂ ᐊᒻᒪ ᐊᒃᑐᐃᓯᒪᓪᓗᓂ, ᐃᓱᒪᕗᖅ ᑭᖑᕚᕆᓂᐊᖅᑕᖏᓐᓂᒃ 7-ᓂᒃ ᑭᖑᕚᕆᓂᐊᖅᑕᖏᓐᓂᒃ ᑕᕐᕆᔭᐅᓯᐅᖅᐸᓪᓕᐊᑎᓪᓗᒍ ᐊᑑᑎᖃᖅᑐᓂᒃ. ᐃᓱᒪᓚᐅᕐᑐᖅ ᐃᓅᓕᓴᐅᑎᙳᕐᓂᐊᕆᐊᒃᓴᖅ, ᑭᓯᐊᓂᓕ ᑕᕐᕆᔭᐅᑎᒃᑰᓕᓚᐅᕐᓯᒪᔪᖅ, ᐅᓂᒃᑳᑲᑕᒃᖢᓂ ᓴᙱᔪᒻᒪᕆᖕᒧᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.