"ᓂᔾᔭᐅᓯᔭᕐᓂᖅ ᐅᕙᓐᓂᒃ ᓂᕈᐊᕆᔭᖃᓚᐅᖅᐳᖅ. ᓂᕈᐊᓚᐅᙱᓐᓇᒃᑯ," ᐅᓂᒃᑳᖅᑐᖅ. ᒍᕆᒡ ᑭᐅᕈᓪ ᐃᓚᒋᔭᐅᔪᖅ ᖃᓕᐳ ᒥ'kmaq ᓄᓇᖃᖅᑳᖅᓯᒪᔪᓄᑦ, ᓴᐃᓐᑦ ᔪᐊᔾ, ᓂᐅᕙᐅᓐᓛᓐᒥᐅᑕᒃᓴᔭᖅ, ᒫᓐᓇ ᓄᓇᖃᓕᖅᑐᖅ ᑐᕉᕉ, ᓅᕙ ᓯᑰᓴᒥ. ᓂᔾᔭᐅᓯᔭᖅᑎᒻᒪᕆᐅᓪᓗᓂ ᐊᒻᒪ ᐃᙱᖅᑎᐅᓪᓗᓂ/ᐃᙱᐅᓯᐅᖅᑎᐅᓪᓗᓂ ᓯᕗᓪᓕᖅᐹᖓᓂ ᓂᔾᔭᐅᓯᔭᖅᑎᓂ ᐅᑭᐅᖃᖅᖢᓂ 16-ᓂᒃ, ᐱᕈᖅᓴᓚᐅᖅᐳᖅ ᓂᔾᔭᐅᓯᔭᖅᑎᓂᒃ ᐃᓚᒌᓂᒃ. ᓂᔾᔭᐅᓯᔭᖃᑦᑕᓕᓚᐅᖅᓯᒪᔪᖅ 9-ᓂᒃ ᐅᑭᐅᖃᖅᖢᓂ ᐃᓕᓐᓂᐊᓚᐅᖅᓯᒪᓪᓗᓂᓗ ᓂᔾᔭᐅᓯᔭᕐᓂᕐᒥᒃ. ᑕᐃᒪᙵᓂᑦ ᐱᙳᐊᖃᑎᖃᖃᑦᑕᖅᓯᒪᕗᖅ ᖃᐅᔨᒪᔭᐅᑦᑎᐊᖅᑐᓂᒃ country ᑎᑕᒃᑎᓂᒃ ᓲᕐᓗ ᓵᑦ ᐳᕋᐅᓐᓕ, ᓵᓕ ᒪᐃᐅᓪ, blues ᑯᒃᑭᑕᐹᖅᑎ ᐊᐃᒨᓯ ᒋᐅᕆᑦ ᐊᒻᒪ ᑎᑕᒃᑎ ᑖᒻ ᑳᒃᕋᓐ. ᐳᓚᕋᖃᑦᑕᓚᐅᖅᑐᖅ ᐊᒥᐊᓕᒐᐃᑦ ᐅᐊᖕᓇᖓᓂ ᕚᓯᒃᑯᑦ, ᐱᙳᐊᖃᑕᐅᓪᓗᓂ ᐃᓄᒋᐊᒃᑐᓄᑦ 40,000-ᓄᑦ ᐃᓄᖕᓄᑦ. ᐅᖃᐅᓯᐅᒻᒪᕆᓚᐅᕐᒥᔪᖅ Rolling Stone-ᑯᓐᓄᑦ ᐅᖃᓕᒫᒐᕐᓂ. ᓄᖅᑲᖅᓯᒪᓕᖅᖢᓂ ᐊᖅᑯᑎᒥ, ᒫᓐᓇ ᐃᓕᓴᐃᕙᒃᐳᖅ ᓂᔾᔭᐅᓯᔭᕐᓂᕐᒥᒃ ᓇᖕᒥᓂᖅᓱᖅᖢᓂ ᐊᒻᒪ ᐃᙱᐅᓯᓕᐅᖅᐸᒃᖢᓂ country ᐃᙱᐅᓯᕐᓂᒃ.

ᓄᓇᓕᖓ ᑳᕈᓪ ᐱᕈᖅᓴᕐᕕᒋᓚᐅᖅᑕᖓ ᐊᒃᓱᕈᕐᓇᓚᐅᖅᐳᖅ ᐊᒻᒪ ᑲᑕᒃᓯᒪᓪᓗᓂ ᐅᓄᙱᑦᑐᓂ ᑲᔪᓯᑦᑎᐊᕐᓂᖃᖅᑐᓂ ᐅᓂᒃᑳᓂ. ᐱᖃᓐᓇᕆᔭᖏᑦ ᐱᐅᒃᓴᑦᑎᐊᓚᐅᖅᐳᑦ ᐊᔪᙱᓐᓂᖓᓂᒃ ᑭᓯᐊᓂ ᐃᓱᒪᓚᐅᙱᓚᑦ ᐊᔪᙱᓐᓂᖃᕋᓱᒋᙱᖦᖢᓂ ᐊᕗᖓᓕᒫᖅ. ᐊᑲᐅᓈᖅᓯᒪᒐᓗᐊᖅᑎᓪᓗᒍ, ᓂᔾᔭᐅᓯᔭᖅᑎᑦ ᓄᓇᓕᖕᓂ basse-ᑖᕆᐊᖃᓕᓚᐅᖅᓯᒪᖕᒪᑕ ᐃᖅᑲᓇᐃᔮᖅᑖᓚᐅᖅᓯᒪᓪᓗᓂᓗ ᑯᒃᑭᑕᐹᖅᑎᐅᒐᓗᐊᖅᖢᓂ. ᐊᒃᑲᒥᓄᑦ ᐃᓕᑦᑎᓚᐅᖅᓯᒪᕗᖅ ᐊᖓᒃᑯᒥᓄᑦ ᐊᒻᒪᓗ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑎᒧᑦ. ᐱᐅᒃᓴᓕᓚᐅᖅᐳᖅ ᓂᔾᔭᐅᓯᔭᖅᑎᐅᓂᕐᒥᒃ ᓯᕗᓪᓕᖅᐹᒥ ᐱᙳᐊᖅᑕᐅᓚᐅᖅᑎᓪᓗᒍ. ᐊᔪᕈᓐᓃᖅᐸᓪᓕᐊᓕᓚᐅᖅᐳᖅ ᓂᔾᔭᐅᓯᔭᖅᑎᐅᓪᓗᓂ ᓴᐃᓐᑦ ᕗᕌᓐᓯᔅ ᔮᕕᐊᐃᒥ, ᐱᕐᔪᐊᖑᓪᓗᓂ ᓯᓚᑦᑐᖅᓴᕐᕕᒡᔪᐊᖅ ᖃᐅᔨᒪᔭᐅᑦᑎᐊᖅᖢᓂ ᓂᔾᔭᐅᓯᔭᕐᓂᕐᒧᑦ ᐊᒻᒪ ᐃᓕᑕᕆᔭᐅᔾᔪᑎᑖᖅᖢᓂ ᐃᓕᓐᓂᐊᓚᐅᖅᖢᓂ ᐋᓐ ᒨᕆᐅᑉ ᓂᔾᔭᐅᓯᔭᕐᓂᕐᒧᑦ ᑐᑭᒧᐊᖅᑎᑦᑎᔨᖓᓂᒃ, ᓯᑭᑉ ᐸᑭᑐ ᐃᓕᓐᓂᐊᕐᕕᖕᒥ. ᐋᓪᐴᑕᒥ ᓄᓇᖃᓕᓚᐅᖅᐳᖅ ᐊᒻᒪ country ᑎᑕᒃᑎᓂᒃ 29-ᓄᑦ ᐊᕐᕌᒍᓄᑦ.

ᐃᓱᒪᒋᓪᓗᓂᒋᑦ ᐊᔪᕐᓇᖅᑐᖅᓯᐅᕈᑎᒋᕙᒃᑕᖏᑦ, ᑭᐅᕈᓪ ᐅᖃᓚᐅᖅᐳᖅ, "ᑐᓴᕐᓈᕐᓂᖅ ᕿᒻᒥᓂᒃ ᓂᕆᔪᒻᒪᕆᐊᓘᕗᖅ, ᐃᓅᓇᓱᐊᕐᓂᐊᕈᕕᑦ, ᐅᕕᓂᖓ ᐃᔾᔪᔪᐊᓘᔭᕆᐊᖃᖅᐳᖅ." ᐃᒥᕋᓚᒡᕕᖕᓂ ᐱᙳᐊᖃᑕᐅᕙᒃᖢᓂ 16-ᓂᒃ ᐅᑭᐅᖃᖅᖢᓂ, ᐃᓐᓇᕈᖅᐸᓪᓕᐊᓕᓚᐅᖅᓯᒪᕗᖅ ᓱᕈᓯᐅᓪᓗᓂ. ᓂᔾᔭᐅᓯᔭᖅᑎᑦ ᓄᓇᕐᔪᐊᒥ ᐱᒡᒍᓴᐅᔾᔪᐊᓲᖑᖕᒪᑕ, ᖃᐅᔨᓚᐅᖅᐳᖅ, ᓱᖏᐅᑎᔭᕆᐊᖃᓕᓚᐅᖅᐳᖅ. "ᐊᔪᕈᓐᓃᖅᓴᐃᓐᓇᕆᐊᖃᖅᐳᑎᑦ ᐊᒻᒪ ᐊᔪᙱᑦᑎᐊᕐᓗᑎᑦ ᐊᒻᒪ ᖃᐅᔨᒪᓗᑎᑦ ᑕᐃᓐᓇ ᐊᖑᑦ ᑎᒎᑎᑐᐃᓐᓇᖅᑐᖅ ᐃᓕᖕᓂᒃ ᓴᕕᖕᒧᐊᖅᓯᓂᐊᕐᒥᔪᖅ ᐱᕕᒃᓴᖃᓕᕈᓂ, ᓲᖃᐃᒻᒪ ᐱᙳᐊᕈᒪᒐᒥ," ᐃᖅᑲᐅᒪᓚᐅᖅᐳᖅ. ᐃᓐᓇᕈᖅᐸᓪᓕᐊᓕᕋᒥ ᐊᒻᒪ ᓵᓚᖃᕋᓱᐊᕐᓂᐅᔪᑦ ᒪᒃᑯᒃᓯᕙᓪᓕᐊᓪᓗᑎᒃ ᐊᒻᒪ ᑳᓕᖅᐸᓪᓕᐊᓪᓗᑎᒃ, ᓄᖅᑲᕈᒪᓕᓚᐅᖅᐳᖅ ᐊᖅᑯᑎᒥ ᐊᒻᒪ ᐱᑦᑎᐊᙱᖦᖢᓂ ᐱᓕᕆᓂᐅᔪᒥ ᐊᒥᓱᐊᓗᐃᑦ ᐅᖃᑲᐅᖅᑐᖅᐸᒃᖢᑎᒃ ᐊᓯᒥᓂᒃ ᐱᙳᐊᖃᑕᐅᔪᒪᓪᓗᑎᒃ.  

ᑲᒪᒋᔭᖃᕐᓂᐊᕐᓗᓂ ᐱᐅᙱᓐᓂᖏᓐᓂᒃ ᓇᖕᒥᓂᕆᔭᐅᔪᒥ, ᑭᐅᕈᓪ ᐃᓅᖃᑎᖃᖅᐸᓚᐅᙱᓚᖅ ᐱᐅᙱᑦᑐᓂᒃ ᐊᔪᕐᓇᙱᓐᓂᓕᒫᖓᓂ. ᐅᖃᓚᐅᕆᓪᓗᓂ, "ᓂᔾᔭᐅᓯᔭᕐᓂᖅ ᒪᒥᓴᕐᓂᐅᕗᖅ. ᐊᒃᓱᕈᕐᓇᖅᓯᒑᖓᒪ, ᑯᒃᑭᑕᐹᕋ ᑎᒍᔪᓐᓇᖅᑕᕋ ᐱᙳᐊᑐᐃᓐᓇᕐᓗᖓᓗ... ᐊᒻᒪᓗ ᑕᒪᓐᓇ ᑭᓱᓕᒫᓂᒃ ᑐᑭᓯᕚᓪᓕᖅᑎᑦᑎᓂᐊᖅᐳᖅ. … ᐃᓱᒪᒋᑐᐃᓐᓇᖅᑕᕋ ᒫᓐᓇ ᑯᒃᑭᑕᐹᕋ ᐊᒻᒪ ᐅᓇ ᐃᙱᐅᓯᖅ ᐃᙱᐅᓯᕋ ᐅᕙᓐᓂᒃ ᕿᒪᐃᑐᐃᓐᓇᖅᑐᖅ." ᑕᐃᒪᐃᓕᐅᖃᑦᑕᖅᓯᒪᕗᖅ ᑕᐃᒪᙵᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᐊᒃᓱᕈᕐᓇᖅᑐᖅᓯᐅᖅᐸᒃᖢᓂ ᐊᓯᓕᒫᖏᓐᓂᒡᓗ.

ᐅᖃᐅᔾᔨᒋᐊᕈᑎᒋᓚᐅᖅᑕᖓ ᓂᔾᔭᐅᓯᔭᖅᑎᙳᕈᒪᔪᓄᑦ ᐃᒪᓐᓇᐅᓇᔭᖅᐳᖅ, "ᖁᕕᐊᓱᒋᐊᖃᖅᐳᑎᑦ. ᑕᒪᓐᓇ ᐱᓪᓗᐊᑕᐅᕗᖅ. ᓂᔾᔭᐅᓯᔭᕐᓂᖅ ᖁᕕᐊᓇᕆᐊᖃᕋᓗᐊᕐᒪᑦ... ᐃᓱᒪᔪᖓᓕ ᖃᓄᑐᐃᓐᓇᑦᑎᐊᖅ ᐊᔪᙱᓐᓂᖃᕈᒪᒐᓗᐊᕈᕕᑦ, ᖁᕕᐊᒋᔭᕆᐊᖃᖅᑕᐃᑦ, ᓲᖃᐃᒻᒪ ᓂᔾᔭᐅᓯᔭᖅᑎᒻᒪᕆᐅᔪᒪᒍᕕᑦ, ᐃᑲᕐᕋᒐᓵᓗᖕᓂᒃ ᐃᓄᑑᔭᕆᐊᖃᕐᓇᕐᒪᑦ ᐃᙱᐅᓯᕐᒥᒃ. ᐃᓕᑦᑎᔭᕆᐊᖃᖅᐳᑎᑦ ᐃᓱᒪᒋᔭᐅᔪᓂᒃ ᓲᖃᐃᒻᒪ ᖃᐅᔨᒪᔭᕆᐊᖃᕋᕕᑦ ᖃᓄᖅ ᓂᔾᔭᐅᓯᔭᕐᓂᖅ ᐊᐅᓚᓂᖃᓲᖑᖕᒪᖔᑦ, ᑕᐃᑯᙵᑐᐃᓐᓇᙱᓪᓗᓂ ᐊᒻᒪ ᐃᙱᐅᓯᕐᒥᒃ ᑐᓴᕐᓈᑐᐃᓐᓇᙱᓪᓗᓂ... ᑕᒪᑐᒥᙵ ᐱᑕᖃᒃᑲᓐᓂᖅᐳᖅ." ᖃᐅᔨᒪᖕᒥᔪᖅ ᑭᒃᑯᓕᒫᑦ ᐱᓪᓚᕆᐊᓘᙱᓐᓂᖏᓐᓂᒃ ᓂᔾᔭᐅᓯᔭᖅᑎᓪᓚᕆᐅᓪᓗᑎᒃ ᐊᒻᒪ ᐃᓚᖏᑦ ᖁᕕᐊᓱᑐᐃᓐᓇᓲᖑᓪᓗᑎᒃ ᓂᔾᔭᐅᓯᔭᖅᑎᓂᒃ ᐱᓇᓱᐊᕈᓯᐅᑉ ᓄᙳᐊᓂ ᐊᒻᒪ ᐃᓱᒪᓪᓗᓂ ᑕᐃᒪᓐᓇᑦᑕᐅᖅ ᓈᒻᒪᒋᓪᓗᓂᐅᒃ ᖁᕕᐊᓱᒍᑎᒃ.

ᑲᔪᖏᖅᓴᐃᓕᕌᖓᒥ, ᑳᕈᓪ ᐱᔪᒃᓯᑎᑕᐅᖏᓐᓇᐅᔭᖅᐳᖅ ᑐᓴᕐᓈᒐᒃᓴᙳᕌᖓᑦ. ᓈᓚᒃᖢᓂ ᐅᐃᓕ ᓂᐅᓪᓴᓐ ᐃᙱᐅᓯᖏᓐᓂᒃ, ᐃᓕᓐᓂᐊᖅᑐᖅ ᐊᒻᒪ ᐅᐱᒋᔭᖃᖅᖢᓂ. ᐃᙱᐅᓯᓕᐅᕈᒪᓕᓚᐅᖅᓯᒪᕗᖅ ᐱᕈᖅᓴᓪᓗᓂ ᓂᔾᔭᐅᓯᔭᖅᑎᓂᒃ ᐃᓚᒌᓂᒃ ᑭᓯᐊᓂ ᐱᔪᒪᓂᖃᐃᓐᓇᐅᔭᖅᐳᖅ ᑎᑎᕋᕆᐊᒃᓴᖅ ᓲᕐᓗ ᐃᙱᐅᓯᓕᐅᖅᑎᒻᒪᕆᖕᓂᒃ country ᐃᙱᐅᓯᐅᖅᑎᓂᒃ ᓈᓚᒃᐸᒃᑕᒥᓂᒃ.

ᑳᕈᓪ ᓂᕆᐅᖕᓂᖃᖅᐳᖅ ᒪᒃᑯᒃᑐᓄᑦ ᐱᓂᐊᕐᓂᖏᓐᓂ ᐅᖃᓪᓚᖕᓂᕆᔭᒥᓂ ᐅᖃᐅᓯᒃᓴᖓᓂ, "ᐃᒻᒥᓂ ᐅᒃᐱᕆᐃᓐᓇᐅᔭᕐᓗᑎᑦ. ᐃᓕᖕᓂᒃ ᐅᒃᐱᕆᒍᕕᑦ, ᑭᓱᑐᐃᓐᓇᑦᑎᐊᓂᒃ ᐊᓂᒍᐃᔪᓐᓇᖅᐳᑎᑦ. ᐊᒥᓱᐊᓗᐃᑦ ᐃᓄᐃᑦ ᑕᖅᑳᓂ ᐃᓕᖕᓂᒃ ᐅᒃᐱᕈᓱᔾᔮᙱᑦᑐᑦ, ᐊᒻᒪ ᐱᐅᒃᓴᙱᑦᑐᖃᖃᑦᑕᕐᓂᐊᖅᖢᓂ, ᐊᒻᒪ ᑕᑯᑎᑦᑕᕆᐊᖃᖅᑕᑎᑦ 'ᐋᒃᑲ, ᑭᓇᐅᒐᒪ ᐅᕙᓂ'."

ᑳᕈᓪ ᐅᖃᐅᔾᔨᒋᐊᕈᓐᓇᕈᓂ ᐃᒪᓐᓇᐅᓇᔭᖅᐳᖅ, "ᓄᒃᑕᕐᓂᖅ. ᐊᓂᒋᑦ! ᓄᓇᕐᔪᐊᖅ ᐊᖏᔪᐊᓘᖕᒪᑦ ᑕᖅᑳᓂ. ᐱᔪᒃᓯᓕᕐᓗᑎᑦ. ᓄᒃᑕᕐᓂᖅ ᑲᔪᖏᖅᓴᐃᓐᓇᐅᔭᖅᐳᖅ, ᐊᓯᐊᓄᙵᐅᓂᐊᕋᓗᐊᕈᕕᑦ.... ᐃᓕᖕᓂᒃ ᓱᓕᑦᑎᐊᕐᓗᑎᑦ, ᑭᓇᐅᖕᒪᖔᖅᐱᑦ ᖃᐅᔨᒪᓗᑎᑦ, ᓴᙱᓗᑎᑦ, ᐊᒻᒪ ᓄᓇᕐᔪᐊᖅ ᑕᑯᔪᓐᓇᕐᓂᓕᒫᕐᓂᒃ ᑕᑯᔪᓐᓇᖅᓯᓗᑎᑦ. ᓄᓇᕐᔪᐊᖅ ᐊᖏᔪᐊᓘᖕᒪᑦ, ᖃᐅᔨᒪᓚᐅᖅᓯᒪᔾᔮᙱᖦᖢᑎᓪᓗ ᑭᓱᑦ ᐃᓕᖕᓂᒃ ᐅᑕᖅᑭᖕᒪᖔᑕ."

ᓂᔾᔭᐅᓯᔭᕐᓂᕐᒧᑦ ᓂᕈᐊᕆᔭᐅᓚᐅᖅᐳᖅ ᐊᒻᒪ ᐊᕐᕌᒍᑦ 30 ᐅᖓᑖᓄᑦ ᒍᕆᒡ ᑭᐅᕈᓪ ᓂᕈᐊᕆᓚᐅᖅᓯᒪᔭᖓ. ᐱᕈᖅᓴᔭᐅᓪᓗᓂ ᓂᔾᔭᐅᓯᔭᖅᑎᓂᒃ ᐃᓚᒌᓂᒃ, ᐊᒃᑲᖓᑕ ᐃᓕᓐᓂᐊᖅᑎᓚᐅᖅᓯᒪᔭᖓ ᐃᙱᐅᓯᕐᒥᒃ ᓂᕈᐊᖅᑕᒥᓂ ᓂᔾᔭᐅᓯᔭᖅᑎᓂᒃ ᐊᒻᒪ ᐊᒥᐊᒃᑯᖏᑦ ᓂᔾᔭᐅᓯᔭᕐᓂᕐᒧᑦ ᐱᐅᓯᕆᔭᐅᕙᓚᐅᖅᑐᓂ. ᐱᙳᐊᖃᑦᑕᓚᐅᖅᖢᓂ ᐃᓄᒋᐊᒃᑐᓄᑦ 40,000-ᓄᑦ ᐃᓕᓴᐃᖃᑦᑕᓕᖅᖢᓂ ᐃᙱᐅᓯᕐᓂᒃ ᐃᓄᑑᓪᓗᓂ ᐊᒻᒪ ᐃᙱᐅᓯᓕᐅᖅᐸᒃᖢᓂ ᓄᖅᑲᖅᓯᒪᓕᕋᒥ ᐊᖅᑯᑎᒥ ᐊᒻᒪ ᖃᓄᐃᓕᐅᕈᓘᔭᖅᐸᒃᖢᓂ ᖃᐅᔨᒐᒥ ᐊᖏᕐᕋᖓᓂ ᓄᑖᓂ ᓂᔾᔭᐅᓯᔭᕐᓂᖅᑕᖃᓕᕐᓂᖓᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.