ᒨᒥᓛᖅ ᖃᖅᑲᖅ ᐱᐅᔪᒻᒪᕆᐊᓘᕗᖅ ᒪᒃᑯᒃᑐᓄᑦ ᓄᓇᖃᖅᑳᖅᓯᒪᔪᓄᑦ ᓯᕗᓕᖅᑎᐅᓪᓗᓂ ᑭᒡᒐᖅᑐᐃᓪᓗᓂᓗ ᐃᓄᖕᓂᒃ. ᒫᓐᓇ ᒪᓕᒐᓕᐅᖅᑎᕐᔪᐊᖑᖃᑕᐅᔪᖅ (MP) ᓄᓇᕗᒻᒧᑦ. ᐃᓅᓂᑯ ᖃᒪᓂᑦᑐᐊᕐᒥ, ᐃᖃᓗᓐᓂᒥᐅᑕᐅᓕᖅᑐᖅ. ᒧᒥᓛᖅ ᓂᕈᐊᖅᑕᐅᓚᐅᖅᓯᒪᔪᖅ 2019−ᒥ, 25−ᓂᒃ ᐅᑭᐅᖃᑐᐃᓐᓇᖅᑎᓪᓗᒍ. ᓯᕗᓂᐊᒍᑦ, ᓇᖏᖅᓯᓚᐅᖅᓯᒪᔪᖅ ᓇᓗᓇᐃᖅᓯᓪᓗᓂ 2017−ᒥ ᓴᙱᔪᒥᑦ ᐊᒻᒪ ᐃᑉᐱᓐᓂᐊᓂᒃᑯᑦ ᐅᖃᐅᓯᖃᖅᑎᓪᓗᒍ ᓄᓇᖃᖅᑳᖅᓯᒪᔪᑦ ᐃᓅᓯᕐᒥᑦ ᑭᐱᓯᓗᐊᕐᓂᕐᒥᑦ, ᑭᒡᒐᖅᑐᐃᓪᓗᓂ ᐸᓂᖏᓐᓂᑦ ᓂᕈᐊᖅᑎᓪᓗᒋᑦ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂᑦ.

ᒧᒥᓛᑉ ᐊᖅᑯᑎᒋᓚᐅᖅᑕᖓ ᓱᓪᓗᑯᑖᓄᑦ ᓴᙱᓂᖏᓐᓄᑦ ᑐᑭᓕᐊᑦᑎᐊᓚᐅᙱᑦᑐᖅ, ᑕᐅᕗᙵᓕᒫᕐᓗ ᑲᓇᑕᒥ. ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᖢᓂ, ᐃᓕᓐᓂᐊᓯᒋᐊᓚᐅᖅᓯᒪᕗᖅ ᐱᖓᓱᓂᒃ ᐊᔾᔨᒌᙱᑦᑐᓂᒃ ᓯᓚᑦᑐᖅᓴᕐᕕᖕᓂ; ᓯᕗᓪᓕᕐᒥ, ᓵᓚᑦᑕᐅᓐᒥ, ᐳᕆᓐᔅ ᐃᐊᑦᕗᑦ ᐊᐃᓚᓐᒥ, ᐲᑕᐴᕉᒥ, ᐋᓐᑎᐅᕆᐅᒥ, ᐊᒻᒪᓗ ᐊᓪᒑᓐᑯᐃᓐᒥ ᐋᑐᕚᒥ. ᑭᓯᐊᓂᓕ, ᐱᔭᕇᖅᓯᓚᐅᖅᓯᒪᙱᑦᑐᖅ ᑖᒃᑯᓂᖓ ᓇᓗᓇᐃᒃᑯᑕᕐᓂᑦ. "ᑕᐃᒪᓕ, ᖁᑦᑎᖕᓂᕋ 12−ᒥ ᐱᓯᒪᑐᐃᓐᓇᖅᑕᕋ!"

"ᐱᙳᐊᕐᓂᕐᒧᑦ ᓴᐃᓕᓂᕐᒧᓪᓗ ᐊᐅᓚᑦᑎᖃᑦᑕᓚᐅᖅᑐᖓ, ᒫᓐᓇᓗ ᒪᓕᒐᓕᐅᖅᑎᕐᔪᐊᖑᓕᖅᑐᖓ. ᖃᐅᔨᒪᙱᑦᑐᖓ ᖃᓄᑎᒋ ᐅᖓᓯᖕᓂᖅᓴᒥᒃ ᐱᔪᓐᓇᕐᒪᖔᖅᐱᑦ," ᐃᒡᓚᖅᑐᖅ. ᑖᒃᑯᐊ ᐃᓕᓐᓂᐊᕐᓂᕐᒧᑦ ᓄᖅᑲᖃᑦᑕᖅᑐᑦ ᐊᒻᒪᓗ ᐱᒋᐊᓯᓪᓗᑎᒃ ᐃᑲᔪᓚᐅᖅᑐᑦ ᒧᒥᓛᖅᒥᑦ ᐃᓱᒪᑦᑎᐊᕐᓂᕐᒥᑦ ᐃᓱᒪᒋᔭᖃᓕᕌᖓᒥᒃ ᓯᕗᓂᒃᓴᖓᓂᑦ. "ᓂᕈᐊᙱᑐᐃᓐᓇᕆᐊᖃᖅᑕᑦ ᐃᖅᑲᓇᐃᔮᕆᔪᒪᔭᐃᑦ. ᐊᒻᒪᓗ ᖃᓄᐃᒐᓂ. ᖃᓄᐃᖏᑦᑐᖅ. 26-ᓂᒃ, ᒪᓕᒐᓕᐅᖅᑎᐅᔪᖓ, ᐊᒻᒪᓗ ᓱᓕ ᖃᐅᔨᒪᙱᓐᓇᒪ ᖃᓄᐃᓕᐅᕈᒪᒻᒪᖔᕐᒪ ᐃᓅᓯᓐᓄᑦ. ᐃᖅᑲᓇᐃᔮᕆᓛᕈᒪᔭᖃᕐᓂᕐᒧᑦ ᓂᕈᐊᕆᔭᐅᔪᑦ ᐊᓯᔾᔨᕈᓐᓇᖅᑐᑦ. ᐃᓱᒪᒋᔭᖃᑐᐃᓐᓇᕆᐊᖃᖅᐳᑎᑦ ᐃᓱᒪᒋᔭᖃᕐᓂᕐᓂᒃ ᑭᓱᒥᑭᐊᖅ, ᐃᒻᒪᖄᓗ ᖃᐅᔨᒍᕕᑦ ᑕᐃᒪᐃᓪᓚᕆᙱᓐᓇᕕᑦ."

ᒧᒥᓛᖅ ᒪᒃᑯᒃᑐᓂᒃ ᐱᔪᒪᔪᖅ, ᐃᓐᓇᕐᓂᒡᓘᓐᓃᑦ, ᖃᐅᔨᒪᓗᑎᒃ ᐱᔪᓐᓇᕐᓂᖃᕐᓂᖏᓐᓂᒃ ᐊᓯᔾᔩᓂᕐᒥᒃ ᐃᓅᓯᖏᓐᓂᒃ. "ᐊᒃᓱᕈᓗᐊᖅᑎᑦᑎᓗᐊᖃᑦᑕᖅᐳᒍᑦ ᒪᒃᑯᒃᑐᖁᑎᑦᑎᓐᓄᑦ, ᒪᒃᑯᖕᓂᖅᓴᓄᓪᓗ ᐃᓐᓇᕐᓄᑦ, ᖃᐅᔨᑲᐅᖅᑐᕋᓱᒃᖢᑕ. ᖃᓄᐃᖏᑦᑐᖅ ᑕᐃᒪᐃᙱᒃᑯᕕᑦ. ᖃᓄᐃᖏᑦᑐᖅ. ᓱᓕ ᑕᐃᒪᐃᓚᐅᙱᑦᑐᖓ, ᖃᓄᐃᖅᑰᙱᖦᖢᖓᓗ."

ᖁᓱᙱᒃᑲᓗᐊᖅᖢᓂ ᓴᙱᓂᖃᕋᓗᐊᖅᑎᓪᓗᒍᓗ, ᒧᒥᓛᖅ ᓱᓕ ᓇᓗᓈᕿᔪᖅ. "ᐊᒃᓱᕈᕐᓇᖃᑦᑕᕐᒪᑦ ᖃᐅᔨᒪᙱᖦᖢᖓ ᑕᒻᒪᙱᖦᖢᖓ ᐱᓕᕆᖕᒪᖔᕐᒪ," ᐅᖃᑦᑎᐊᓲᖅ. "ᐃᓅᓯᑦᑎᓐᓂ ᐊᐳᖅᑕᕈᑎᖃᕐᓂᖅᐹᖑᖃᑦᑕᕋᑦᑕ, ᐊᖏᓛᖑᓪᓗᑕ, ᐱᐅᙱᓛᑦᑎᐊᓂᒃ." ᒧᒥᓛᖅ ᓂᑲᒋᔭᐅᒐᔪᒃᑲᓗᐊᖅᖢᓂ ᐃᔾᔪᐊᒐᒃᓴᑦᑎᐊᕙᐅᓂᖓᓄᑦ, ᐃᓛᓐᓂᒃᑯᑦ ᐊᒃᓱᕈᓕᖅᐸᒃᖢᓂ ᐃᓗᒥᓄᑦ ᓂᐱᒥᓄᑦ. "ᐃᖅᑲᓇᐃᔭᖃᑦᑕᖅᑐᖓ ᐃᑲᕐᕋᓄᑦ 14−ᓄᑦ ᐅᓪᓗᕐᒥ ᓱᓕᓗ ᐱᓕᕆᙱᓗᐊᖅᑰᔨᙱᖦᖢᖓ." ᐃᒻᒥᓂᒃ ᐃᖅᑲᐃᓯᔭᕆᐊᖃᖅᐳᖅ ᓴᙱᓂᕆᔭᒥᓂᒃ, ᐅᖃᓪᓚᑦᑎᐊᖅᖢᓂᓗ ᓇᖕᒥᓂᖅ. "[ᐱᓯᒪᕗᖓ] ᑖᓐᓇ ᐅᖃᐅᓯᕆᖃᑦᑕᓚᐅᖅᑕᕋ ᐃᒪᓐᓇ ᐅᖃᖅᖢᓂ, 'ᐋᒃᑲ, ᑕᒫᓂᒥᐅᑕᐅᒐᕕᑦ, ᑕᒫᓃᑎᑕᐅᓇᓱᒃᐳᑎᓪᓗ.'"

ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂ ᐃᒃᓯᕚᖅᑎᓪᓗᒍ, ᒥᒥᓛᖅ ᐅᖃᐅᓯᐅᒐᔪᖕᒪᑦ 'ᐃᓚᒋᔭᐅᙱᖦᖢᓂ.' "ᓄᖅᑲᖅᑎᑕᐅᓲᖑᔪᖓ ᓇᐅᑦᑎᖅᓱᖅᑎᒧᑦ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂ," ᐅᖃᖅᖢᓂ. "ᖃᓪᓗᓈᖑᙱᑦᑐᖓ, ᓄᖅᑲᕐᔪᐊᖃᑦᑕᖅᑐᖓ. ᐅᓪᓗᒐᓵᓗᓐᓂᒃ ᐱᔭᕆᐊᑐᔪᖁᑎᖃᓪᓚᕆᒃᑲᒪ, ᐃᒻᒪᖃ ᐅᕙᓃᒋᐊᖃᖏᑦᑐᖓ. ᐃᒻᒪᖄ ᐃᓚᒋᔭᐅᔭᕆᐊᖃᙱᑦᑐᖓ ᖃᓄᑐᐃᓐᓇᖅ ᐱᓕᕆᔾᔪᓯᕐᒧᑦ."

ᓲᖃᐃᒻᒪ, ᒧᒥᓛᖅ ᖃᐅᔨᒪᔪᖅ ᑕᐃᒪᐃᙱᓐᓂᖓᓂᒃ; ᐱᒋᔭᐅᑐᐃᓐᓇᖏᑦᑐᖅ, ᐃᓄᐃᑦ ᐱᒻᒪᕆᐊᓘᒻᒪᑕ ᐱᐅᓯᑎᑦᑎᑲᓐᓂᓂᕐᒧᑦ ᒐᕙᒪᑦᑎᓐᓂᒃ.

"ᖃᔅᓯᑲᓪᓚᐃᑦ ᑖᒃᑯᐊ ᐋᖅᑭᐅᒪᔪᑦ ᓴᓇᔭᐅᓯᒪᙱᒻᒪᑕ ᓄᓇᖃᖅᑳᖅᓯᒪᔪᓄᑦ, ᓴᓇᔭᐅᕙᙱᑦᑐᑦ ᐅᕕᓂᖃᙱᑦᑐᓄᑦ ᐃᓄᖕᓄᑦ, ᓴᓇᔭᐅᕙᙱᑦᑐᑦ ᐊᕐᓇᓄᑦ. ᑕᐃᒪᓕ ᐱᕕᖃᑦᑎᐊᖃᑦᑕᖅᑐᖓ [ᐅᕙᖓ], 'ᐅᕙᖓ ᐃᓚᒋᔭᐅᔪᖓ. ᑕᒫᓂᒥᐅᑕᐅᒐᒪ. ᑕᒫᓂᒥᐅᑕᐅᒐᒪ. ᖃᐅᔨᒪᔪᖓ ᓱᓕᓪᓗᖓ. ᖃᐅᔨᒪᔭᕋ ᐊᑐᖃᑦᑕᕐᓂᑯᒃᑲ. ᖃᐅᔨᒪᔪᖓ ᓱᓕᔪᓂᑦ ᐱᐅᓯᕆᔭᐅᕙᓚᐅᖅᑐᓂᓪᓗ ᑭᒡᒐᖅᑐᖅᑕᓐᓄᑦ."

ᒧᒥᓛᖅ ᓂᐱᖃᐃᓐᓇᐅᔭᖅᑐᖅ, ᑭᒡᒐᖅᑐᐃᑦᑎᐊᕐᖢᓂ ᐃᓄᖕᓂᑦ. "ᐃᓅᓪᓗᑕ, ᐃᒃᓯᕚᒃᑲᓐᓂᖃᑦᑕᕋᑦᑕ ᓈᓚᒃᖢᑕᓗ; ᓂᐱᖃᕆᐊᖃᓕᖅᐳᒍᑦ ᐅᕙᑦᑎᓐᓄᑦ ᐊᒃᑐᐃᑲᐅᑎᒋᔪᓂᒃ... ᒫᓐᓇ ᑕᑯᔭᕆᐊᖃᓕᖅᐳᒍᑦ ᓂᐱᓂᒃ ᑕᐅᑦᑐᔪᓂᒃ ᐅᖃᓪᓚᒃᐸᒃᑐᓂᒡᓗ ᓲᕐᓗ ᐅᕙᖓᑎᑐᑦ, ᐱᓗᐊᙳᐊᖅᖢᓂ ᑕᒪᒃᑯᓄᖓ ᐊᖏᔪᓄᑦ ᐋᖅᑭᒃᓯᒪᓕᖅᑎᑦᑎᓂᕐᒧᑦ ᑭᐳᓄᑦ."

ᑭᓯᐊᓂ, ᐊᑕᐅᓯᕐᒥᒃ ᐅᖃᐅᔾᔪᐃᔾᔪᑎᖃᖅᐸᑦ ᒪᒃᑯᖕᓂᖅᓴᒧᑦ, ᒧᒥᓛᖅ ᓈᓚᖕᓂᖅᓴᐅᖁᔨᓇᔭᖅᑐᖅ, ᐅᖃᓪᓚᙱᓐᓂᖅᓴᐅᓗᓂ. "ᐃᓛᓐᓂᒃᑯᑦ ᑭᖑᒧᑦ ᑕᑯᒋᐊᕌᖓᒪ, ᖃᓂᕋ ᒪᑐᑐᐃᓐᓇᖁᓇᔭᖅᑕᕋ ᐃᖏᓪᓗᖓᓗ, ᐅᖃᕐᓗᖓᓗ, 'Just soak it in and ᓈᓚᒡᓗᑎᑦ.' ᑕᒪᓐᓇ ᑲᒪᒋᔭᐃᓐᓇᕆᕙᓪᓚᐃᔭᕗᑦ. ᓇᓗᓇᕈᔪᖕᒪᑦ ᐱᕈᖅᐸᓪᓕᐊᓪᓗᓂ."

ᓱᕈᓯᐅᓪᓗᓂ, ᒥᒥᓛᖅ ᐃᓐᓇᐅᔪᒪᐃᓐᓇᖅᐸᓚᐅᕐᒪᑦ ᐊᒻᒪᓗ ᓇᒻᒥᓂᖅ ᐃᓱᒪᓕᐅᖃᑦᑕᖅᑐᓂ. "ᐃᓐᓇᐅᓕᖅᑎᓪᓗᖓ, ᓲᕐᓗ, 'ᓇᓕ ᐊᓈᓇᒐ? ᐊᖓᔪᖅᑳᒃᑲ! ᑭᓇᒧᒃᑭᐊᖅ ᐋᖅᑭᒃᓯᓪᓗᓂ ᐅᕙᓐᓄᑦ, ᐊᑏ!' ᑭᓯᐊᓂ ᑕᐃᒪᓐᓇ ᐊᐅᓚᓂᖃᙱᑦᑐᖅ."

ᒧᒥᓛᖅ ᖁᕕᐊᒋᔭᖃᖅᑐᖅ ᓇᒡᓕᖕᓂᕐᒥᒃ, ᐊᔪᕆᖅᓯᐅᔾᔨᓂᕐᒥᒃ, ᐊᒻᒪᓗ ᐃᑲᔪᐃᓂᕐᒥᒃ ᐊᖓᔪᖅᑳᖏᓐᓂᒃ. "ᖃᖅᑳᓗᖕᓂᒃ ᓅᓯᒪᓕᖅᑐᑦ ᐅᕙᓐᓄᑦ ᐊᒻᒪ ᐊᓂᓐᓄᑦ. ᐊᓕᐊᓇᐃᒋᑦᑎᐊᖅᑕᕋ." ᐅᖃᐅᔾᔨᖃᑦᑕᖅᖢᓂᓗ ᒪᒃᑯᒃᑐᓂᒃ ᐃᑲᔪᖅᓱᐃᔪᓂᒃ ᖃᑕᙳᑎᖃᖅᑐᓂᒃ "ᖁᕕᐊᒋᑦᑎᐊᕐᓗᒋᑦ ᐃᓚᑎᑦ... ᐄ, ᑕᐃᒪ ᐆᒻᒪᕆᓐᓂᖅᓴᐅᒍᒪᒐᓗᐊᖅᑐᖓ ᐊᒻᒪᓗ ᐱᒃᑯᒥᓇᕐᓂᖅᓴᐅᖁᓪᓗᖓ ᑕᒪᒃᑯᓂᖓ ᐱᓕᕆᖃᑎᒌᒋᐊᖃᓕᖅᑎᓪᓗᖓ, ᑭᓯᐊᓂ ᒫᓐᓇ ᐱᓕᕆᐊᕆᓕᖅᑕᕗᑦ. ᐃᓅᓯᖅ ᐃᓕᑦᑎᓂᕐᒨᖓᔪᖅ."

ᑭᒡᒐᖅᑐᐃᔨᐅᓪᓗᓂ ᑲᑎᒪᔨᐅᓪᓗᓂᓗ, ᒧᒥᓛᖅ ᐊᖅᑯᑕᐅᕗᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓄᑦ ᑐᓴᖅᑕᐅᖁᓪᓗᒋᑦ. "ᐊᕐᕌᒍᒐᓴᖕᓂᑦ ᐊᑲᐅᒃᓴᕈᓐᓃᖅᐸᓪᓕᐊᖏᓐᓇᖅᐳᖓᓗ ᐃᓅᖃᑎᒌᓂᑦ ᐊᒻᒪ 'ᐃᓐᓇᖅ ᓄᓇᕐᔪᐊᖅ' ᐅᕝᕙᓘᓐᓃᑦ ᖃᓄᑐᐃᓐᓇᖅ ᑕᐃᔪᒪᒍᕕᐅᒃ, ᒪᒃᑯᒃᑐᓂᒃ ᐃᓚᐅᑎᑦᑎᕙᙱᑦᑐᒍᑦ ᐱᔭᕆᐊᖃᖅᑕᓕᒫᑦᑎᓐᓂᒃ, ᐊᔪᙱᓐᓂᓕᒫᑦᑎᓐᓂ. [ᒪᒃᑯᒃᑐᑦ] ᑲᒪᒋᔭᒃᓴᖃᕈᒪᖕᒪᑕ. ᐃᓚᓕᐅᔾᔭᐅᔪᒪᒐᑦᑕ. ᐃᑲᔪᕈᒪᒐᑦᑕ ᐊᒻᒪᓗ ᐃᓚᒋᔭᐅᓗᑕ ᓯᕗᓂᒃᓴᑎᓐᓄᑦ. ᐊᒻᒪᓗ ᐱᔪᓐᓇᕐᓂᖃᑦᑎᐊᖅᑐᒍᑦ.

"ᖃᓄᐃᖅᑰᙱᑦᑐᖅ ᐃᒃᓯᕚᕆᐊᒃᓴᖅ ᑭᐳᒥ. ᖃᓄᐃᓗᐊᙱᑦᑐᖅ ᓂᓪᓕᕆᐊᒃᓴᖅ. ᐊᒻᒪᓗ ᐱᐅᖏᓛᖑᔪᖅ ᓇᒻᒥᓂᖅ ᓂᕈᐊᕐᓗᑕ ᓂᐱᖃᓐᖏᓪᓗᑕ ᓂᕈᐊᕐᓗᑕ ᐱᕕᒃᓴᖃᕝᕕᐅᒍᓐᓇᖅᑐᓂᒃ ᐱᕕᖃᑦᑎᑦᑎᔪᓂᒃ ᐅᕙᑦᑎᓐᓂᒃ ᐃᓅᓪᓗᑕ, ᐅᕙᒍᑦ ᐃᓚᒌᑎᒍᑦ, ᐅᕙᒍᑦ ᓄᓇᖃᑦᑎᐅᓪᓗᑕ ᐃᓚᒋᔭᐅᒍᓐᓇᕐᓗᑕ ᐃᓱᒪᓕᐅᕐᓂᕐᒧᑦ, ᐊᑦᑐᐃᓂᖃᕐᓗᑕ ᓯᕗᓂᑦᑎᓐᓄᑦ ᖃᓄᐃᓕᖓᓂᐊᕐᒪᖔᖅ ᐅᕙᑦᑎᓐᓄᑦ.

"ᓯᕗᓂᒃᓴᕆᒐᑦᑎᒍᑦ. ᐊᑯᓂᐅᓂᕐᓴᖅ ᑕᒫᓃᓐᓂᐊᕋᑦᑕ ᐊᓯᑦᑎᓐᓂᒃ. ᐊᒻᒪᓗ ᑕᑯᕙᓪᓕᐊᕙᓪᓚᐃᓕᖅᑐᒍᑦ ᐃᖏᕐᕋᓂᐅᔪᓂᒃ ᑕᑯᕙᓪᓕᐊᓪᓗᑕ ᐃᓅᓱᒃᑐᓂᒃ ᓱᓕᓂᖅᓴᐅᔪᓂᒃ, ᖃᐅᔨᓴᖅᑐᓂᒃ, ᐱᐅᓂᖅᓴᓂᒃ ᐊᒻᒪᓗ ᓱᕈᖅᑎᕆᖏᓂᖅᓴᐅᔪᓂᒃ ᐊᒻᒪᓗ ᐱᖃᓯᐅᔾᔨᓂᖅᓴᐅᔪᓂᒃ ᖃᓄᖅᑑᕈᑎᓂᒃ. ᐊᒻᒪᓗ ᑕᑯᕙᓪᓕᐊᓕᕋᑦᑕ ᐃᓱᒪᒥᐅᑕᖃᕐᓗᑕ ᑭᒃᑯᑦ ᐃᖅᑲᓇᐃᔭᕈᓐᓇᕐᒪᖔᑕ ᐊᒻᒪᓗ ᑭᒃᑯᑦ ᐱᔪᓐᓇᖏᒻᒪᖔᑕ. ᐅᖃᑐᐃᓐᓇᕋᔭᖅᑐᖓ ᑕᐃᑲᓃᒍᒪᒍᕕᑦ ᐊᒻᒪᓗ ᐃᓂᖃᕈᒪᒍᕕᑦ ᓵᒥ, ᐊᑏ, ᐅᓇᑕᕐᓗᑎᑦ! ᑕᐃᒪᓐᓇᐅᔪᒪᓪᓚᕆᒃᑯᕕᓪᓗ, ᑭᓇᑐᐃᓐᓇᕐᒥᑦ ᐅᖃᐅᔾᔨᑦᑕᐃᓕᓗᑎᑦ ᐊᔪᖅᑐᑎᑦ."

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.