ᓇᒧᙵᕈᓘᔭᖃᑦᑕᓚᐅᖅᑐᖅ ᐃᓅᓯᕐᒥᓂ ᑭᓯᐊᓂ ᐆᒻᒪᑎᖓ ᐊᒃᑐᐊᓂᖃᐃᓐᓇᓚᐅᖅᑐᖅ ᐃᓄᐃᑦ ᐃᓕᓴᐃᔾᔪᑎᖏᓐᓄᑦ, ᐃᓕᖅᑯᓯᖓᓄᑦ ᐊᒻᒪᓗ ᐊᖏᕐᕋᕈᓐᓇᖅᓯᑕᐃᓐᓇᓚᐅᖅᐳᖅ. ᓗᐃᓴ ᓴᓪᓗᕕᓂᖅ ᒋᓕᐊᔅᐱ ᐃᓅᓪᓗᓂ ᓴᓇᙳᐊᖅᑎᐅᔪᖅ, ᕿᓚᐅᔾᔭᖅᑎ, ᑲᑕᔾᔭᖅᑎ, ᖁᙱᐊᖅᑕᐅᕙᒃᑐᖅ, ᐃᓕᓐᓂᐊᖅᑎᑦᑎᔨ, ᐃᓅᖃᑎᒥᓂᒃ ᐃᑲᔪᕈᒪᓂᖃᑦᑎᐊᖅᑐᖅ ᐊᒻᒪ ᐃᓐᓇᑐᖃᐅᓪᓗᓂ ᖃᐅᓱᐃᑦᑐᒥᐅᖅ. ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᖅ ᐊᒻᒪᓗ ᖁᑦᑎᑦᑐᒧᑦ ᓄᑦᑎᖅᑕᐅᓚᐅᖅᓯᒪᓪᓗᓂ ᓵᓚᖃᓚᐅᖅᑐᖅ ᓄᓇᕗᒻᒥ ᑲᒥᓴᓇᐅᑉ ᑐᓂᕐᕈᓯᐊᖓᓂᒃ ᐃᓕᑕᕆᔭᐅᔾᔪᑎᒥᒃ ᐱᓕᕆᑦᑎᐊᖃᑦᑕᖅᓯᒪᓂᖓᓄᑦ ᓄᓇᓕᓐᓂ.

ᓄᓇᓕᖓᑕ ᓄᒃᑎᖅᑕᐅᒋᐊᙵᓚᐅᖅᓯᒪᕗᖅ ᐊᕐᕌᒍᖃᖅᖢᓂ ᓇᑉᐸᖓᓂᓪᓗ ᐃᖅᑲᐅᒪᙱᖦᖢᓂ ᓄᒃᑎᓚᐅᖅᓯᒪᓂᖓᓂᒃ. ᒋᓕᔅᐱ ᖃᐅᓱᐃᑦᑐᒥᐅᑕᐅᓚᐅᖅᑐᖅ 12-ᓂᒃ ᐅᑭᐅᖃᓕᕋᒥ ᑎᑭᖦᖢᒍ, ᐋᓐᓂᐊᕕᖕᒧᐊᕆᐊᖃᓕᓚᐅᖅᓯᒪᓪᓗᓂ ᐃᐊᑦᒪᓐᑕᓐᒧᑦ ᐊᕐᕌᒍᓕᒫᒧᑦ ᐳᕙᒡᓗᒃᑐᓂ. ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᔪᖅ ᒥᑭᔫᑕᐅᓂᖅᐹᓂᒃ ᒍᕋᐃᑦ 8-ᒧᑦ, ᐱᒋᐊᖅᑐᓂ ᐅᓪᓗᒃᑯᑦ ᐃᓕᓐᓂᐊᕐᕕᒻᒥ ᐊᒻᒪᓗ ᓅᑦᑐᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᑰᔾᔪᐊᕌᓗᒻᒧᑦ, ᒫᓂᑑᐸᒧᑦ.

ᐃᓚᖓᑦ ᐊᒃᓱᕉᑕᐅᓂᖅᐹᖑᖃᑕᐅᓚᐅᖅᑐᖅ ᓄᒃᑎᖅᑕᐅᑎᓪᓗᒋᑦ ᖃᐅᔨᒪᙱᓐᓂᖅ ᐊᖑᓇᓱᒡᕕᐅᕙᒃᑐᓂᒃ ᑕᐅᕙᓂ. ᓯᕗᓪᓕᕐᐹᒥ ᒪᕐᕉᖕᓂᓪᓘᓐᓃᑦ, ᓂᕿᒃᓴᕐᓯᐅᕐᓂᖅ ᐊᒃᓱᕈᕐᓇᓚᐅᕐᑐᖅ. ᐊᖏᕐᕋᒧᑦ ᐅᑎᖅᖢᓂ ᐃᒪᖃᙱᖦᖢᓂ ᐆᒻᒪᖅᑯᑎᖃᙱᖦᖢᓂᓗ ᐊᒻᒪ ᐅᖅᑰᔪᒥ ᐃᒡᓕᖃᖅᖢᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᒥ ᐊᒃᓱᕈᕐᓇᓚᐅᕆᕗᖅ, ᒐᕙᒪᒃᑯᑦ ᓄᑖᙳᕆᐊᖅᑎᑦᑎᒐᓗᐊᖅᑎᓪᓗᒋᑦ ᐃᒡᓗᓂᒃ. ᖃᐅᔨᓚᐅᕆᕗᑦ ᐃᓕᓐᓂᐊᕐᕕᒃ ᐃᓕᓐᓂᐊᕈᑎᖃᓗᐊᓚᐅᙱᓐᓂᖓᓂᒃ, ᑭᓯᐊᓂᓕ ᓴᓇᔪᓕᕆᓂᕐᒧᑦ ᐃᓕᓐᓂᐊᖅᑎᑦᑎᖃᑦᑕᓚᐅᖅᑐᖅ ᐃᓕᓐᓂᐊᖅᑏᑦ ᐱᔨᑦᑎᕋᖅᑎᐅᔪᓐᓇᕐᓂᐊᕐᒪᑕ ᐃᓕᓴᐃᔨᓄᑦ ᐊᒻᒪ ᖃᓪᓗᓈᓄᑦ ᓅᑉᐸᓪᓕᐊᔪᓄᑦ ᖃᐅᓱᐃᑦᑐᒧᑦ.

ᑰᔾᔪᐊᕌᓗᒻᒦᓐᓂᕆᓚᐅᖅᑕᖓ ᐊᕐᕌᒍᓄᑦ ᐱᖓᓱᓄᑦ, ᓯᕗᓪᓕᖅ ᐊᕐᕌᒍ ᓱᖏᐅᑎᕙᓪᓕᐊᓪᓗᓂ ᐃᓪᓗᓂᒃ ᓇᔪᒐᖃᕐᓂᕐᒧᑦ, ᐊᐃᑉᐸᖓ ᐊᕐᕌᒍ ᓂᕿᓕᐅᕆᐅᖅᓴᓪᓗᓂ ᐊᒻᒪᓗ ᐱᖓᔪᐊᑦ ᐊᕐᕌᒍ ᐃᓱᒪᖅᓱᖅᑐᑎᒃ ᕗᐊᑦ ᓯᒥᑦ-ᒨᕈᓐᓇᖅᑐᑎᒃ ᒍᕋᐃᑦ 10-ᒨᕐᓗᑎᒃ ᐅᕝᕙᓘᓐᓃᑦ ᓄᓇᓕᐸᐅᔭᕐᒨᕈᒪᒍᑎᒃ ᒍᕋᐃᑦ 12-ᒥᒃ ᐃᓕᓐᓂᐊᕈᒪᒍᑎᒃ. ᒋᓕᔅᐱ ᐃᐊᑦᒪᓐᑕᓐᒨᓚᐅᖅᓯᒪᔪᖅ, ᑭᓯᐊᓂ ᑕᐃᔅᓱᒪᓂ 19-ᓂᒃ ᐅᑭᐅᖃᓕᖅᖢᓂ ᐊᒻᒪ ᐃᒥᕋᓚᒡᕕᖕᒥ ᐱᒋᐊᓕᓵᕐᓂᖓ ᐃᓕᓐᓂᐊᕆᐊᕈᒪᔪᓐᓃᓚᐅᖅᐳᖅ. ᖃᓪᓗᓇᐅᔭᕈᒪᓗᐊᓚᐅᙱᑦᑐᖅ ᐊᖏᕐᕋᕋᒥ ᐃᖅᑲᓇᐃᔮᖅᑖᕆᐊᖅᑐᖅᖢᓂ ᖃᐅᔨᑎᑕᐅᒐᒥ ᐃᒥᐊᓗᖕᒧᑦ ᓱᐴᖅᑐᒐᕐᒧᓪᓗ. ᐊᑲᐅᙱᓕᐅᕈᑕᐅᒐᔪᒃᑐᖅ ᓱᓕ ᑕᑯᕙᒃᑕᖓ ᒪᒃᑯᒃᑐᑦ ᐅᑭᐅᕐᑕᖅᑐᕐᒥᑦ ᖃᓪᓗᓈᓄᑦ ᓅᑦᑕᕌᖓᑕ, ᐱᔭᒃᓴᖃᓗᐊᖅᖢᑎᒃ.

ᓯᕗᓪᓕᖅᐹᒥ ᐃᖅᑲᓇᐃᔮᕆᓚᐅᖅᓯᒪᔭᖓ ᓯᕗᓪᓕᖅᐹᒥ ᐊᕐᕌᒍᒥ ᑰᔾᔪᐊᕌᓗᒻᒦᓚᐅᖅᑎᓪᓗᒍ ᑎᑎᕋᖅᑎᐅᓪᓗᓂ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᒧᑦ ᒪᑐᐃᖅᓯᓚᐅᖅᑐᒧᑦ ᐊᓪᓚᕝᕕᒻᒥᒃ ᓄᓇᓕᒻᒥ. ᑭᖑᓂᐊᒍᑦ, ᐃᓕᓐᓂᐊᕐᕕᖕᒥ ᐃᓅᓯᓕᕆᔨᙳᓚᐅᖅᐳᖅ, ᑭᓯᐊᓂ ᐊᔪᕐᓇᖅᑐᖅᓯᐅᓚᐅᖅᐳᖅ ᐃᖅᑲᓇᐃᔮᒥᓂᒃ ᐃᓕᑦᑎᓇᓱᒃᖢᓂ ᓲᖃᐃᒻᒪ ᑕᐃᒃᑯᐊ ᐃᓕᓐᓂᐊᖅᑎᑕᖏᑦ ᐃᓄᒃᑎᑐᑐᐊᖅ ᐅᖃᓪᓚᒍᓐᓇᕐᒪᑕ. ᒋᓕᔅᐱ ᓇᖕᒥᓂᖅ ᒪᒥᓴᓕᓚᐅᖅᐳᖅ ᐅᒃᐱᕐᓂᒃᑯᑦ. ᒪᒥᓴᓚᐅᙱᓐᓂᕐᒥᓂ, ᐊᒃᓱᕉᑎᖃᓚᐅᖅᐳᖅ ᐃᒥᐊᓗᖕᒧᑦ ᐃᓚᖃᙱᖦᖢᓂᓗ ᐃᓕᓐᓂᐊᖅᑎᑕᐅᔪᓐᓇᖅᑐᒥᒃ ᐃᓅᓪᓗᓂ ᐊᓈᓇᐅᓂᕐᒥᒃ. ᐅᐃᖓᑕ ᐃᑲᔪᕋᓱᓚᐅᖅᑕᖓ ᐃᒥᐊᓗᓗᐊᖃᑦᑕᕈᓐᓃᖅᑎᖦᖢᓂᐅᒃ ᑭᓯᐊᓂ ᓅᒐᔪᖕᓂᖏᓐᓄᑦ, ᐃᒥᐊᓗᖕᒧᑦ ᓵᙵᓕᓚᐅᖅᐳᖅ ᕿᓄᐃᓵᕈᒪᓪᓗᓂ. ᐊᓱᐃᓛᒃ, ᐊᕕᖦᖢᑎᒃ ᑐᒃᓯᐊᕆᐊᖃᑦᑕᓕᖅᖢᓂᓗ.

ᒎᑎᒧᑦ ᑐᙵᕕᖃᓕᖅᖢᓂ ᐃᑲᔪᓚᐅᖅᐳᖅ ᐃᒥᐊᓗᖕᒥ ᓄᖅᑲᕐᓂᕐᒧᑦ. ᒋᓕᔅᐱ ᐃᒻᒥᓂᒃ ᐃᓕᑉᐸᓪᓕᐊᓕᓚᐅᕐᒥᔪᖅ ᐃᓅᓪᓗᓂ ᐊᕐᓇᐅᓪᓗᓂ ᐱᙳᖅᑎᑕᐅᓚᐅᖅᓯᒪᒐᒥ ᐊᒻᒪ ᐊᓯᖏᓐᓂᒃ ᐃᓄᖕᓂᒃ ᐱᖃᑎᖃᖅᐸᒃᖢᓂ ᐱᕈᖅᓴᓚᐅᖅᑐᓂᒃ ᐊᖓᔪᖅᑳᒥᖕᓂᒃ. ᐊᓯᐊᒍᓪᓕ, ᐊᓈᓇᖓ ᐋᓐᓂᐊᕕᖕᒦᖏᓐᓇᖃᑦᑕᓚᐅᖅᑐᖅ ᐊᑖᑕᖓᓗ ᐃᖅᑲᓇᐃᔭᖅᖢᓂ ᐊᑭᓖᓇᓱᒃᖢᓂ ᓄᒃᑎᖅᑕᐅᓂᖏᓐᓂᒃ. ᐸᐃᑉᐹᖁᑎᓂᒃ ᐃᓕᓐᓂᐊᖅᖢᓂ, ᐊᔾᔨᒌᖕᓂᖏᓐᓂᒃ ᑕᑯᓚᐅᖅᐳᖅ ᐃᓕᓴᐃᔾᔪᑎᖏᓐᓂᒃ ᐊᒻᒪ ᐃᓄᐃᑦ ᐃᓕᑉᐸᓪᓕᐊᔭᖏᓐᓂᒃ ᓯᕗᓕᕆᓚᐅᖅᑕᒥᖕᓂᒃ.

ᒋᓕᔅᐱ ᐋᑐᕚᒧᑦ ᓅᓚᐅᖅᑎᓪᓗᒍ, ᑲᑎᖃᑎᖃᓚᐅᖅᐳᖅ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪ ᐅᓐᓄᒃᑯᑦ ᑲᑎᑉᐸᒃᖢᑎᒃ ᐃᓄᐃᑦ ᐃᓕᓴᐃᔾᔪᓯᖏᓐᓂᒃ ᐅᖃᐅᓯᖃᖅᖢᑎᒃ. ᖃᐅᔨᓕᓚᐅᖅᐳᖅ ᓈᒻᒪᒋᑦᑎᐊᖅᑕᖓᓂᒃ, ᓲᖃᐃᒻᒪ ᐅᒃᐱᕐᓂᖓ ᐊᒻᒪ ᓯᕗᓕᕆᓚᐅᖅᑕᖓᑕ ᖃᐅᔨᒪᓂᕆᔭᖓ ᑲᑎᙵᑦᑎᐊᓚᐅᕐᓂᖏᓐᓄᑦ. "ᐅᒃᐱᕐᓂᕋ ᐊᒻᒪ ᓯᕗᓕᕆᓚᐅᖅᑕᒪ ᖃᐅᔨᒪᓂᖓ, ᐃᓕᓐᓂᐊᖅᑎᑕᐅᓂᕆᓚᐅᖅᑕᕋ ᐱᐅᔪᒻᒪᕆᐅᓚᐅᖅᐳᖅ, ᐊᒻᒪ ᒪᒥᓴᕐᓂᖅᓴᐅᓕᓚᐅᖅᐳᖓ ᑕᐃᔅᓱᒪᓂ," ᐃᖅᑲᐅᒪᔪᖅ.

2009-ᖑᑎᓪᓗᒍ, ᖃᐅᓱᐃᑦᑐᒥ, ᒋᓕᔅᐱ ᐆᑦᑐᕈᓐᓇᖅᓯᓚᐅᕐᒪᑦ ᐊᓪᓚᐃᑦ ᕿᓚᐅᑎᖏᓐᓂᒃ ᑕᐃᑲᓂ ᐃᒃᓯᕚᖅᑐᓂᒃ. ᐃᓕᓐᓂᐊᕌᓂᒃᑳᖓᒥ, ᑲᑎᙵᖃᑎᖃᖅᐸᓚᐅᖅᐳᖅ ᕿᓚᐅᔾᔭᕐᓂᕐᒥᒃ ᐃᓕᓐᓂᐊᖃᑎᒌᒃᐸᒃᖢᑎᒡᓗ ᓈᓚᒍᓐᓇᕐᓂᕐᒥᒃ ᐆᒻᒪᑎᐅᑉ ᑎᒡᓕᖕᓂᖓᓂᒃ ᐱᙳᐊᖅᑎᐅᑉ ᕿᓚᐅᔾᔭᕐᓂᒃᑯᑦ. "ᐃᓱᒪᔪᖓᓕ ᕿᓚᐅᔾᔭᕐᓂᖅ, ᕿᓚᐅᔾᔭᕐᓂᖅ ᐅᕙᓐᓂᒃ ᓇᓗᓇᐃᒃᑯᑕᐅᓚᐅᖅᐳᖅ, ᐆᒻᒪᑎᒐ, ᐃᖅᑯᒻᒪᖅᐸᓪᓕᐊᓪᓗᖓ ᓱᓕ ᒪᒥᓴᖅᐸᓪᓕᐊᒐᒪ," ᐃᖅᑲᐅᒪᔪᖅ, ᐃᓱᒪᓪᓗᓂ ᐃᓕᓐᓂᐊᖅᑎᑕᐅᓚᐅᕐᓂᕐᒥᓂᒃ ᕿᐊᖃᑦᑕᖁᔭᐅᙱᖦᖢᓂ ᐃᔨᖅᓯᓯᒪᔭᕆᐊᖃᖅᖢᓂᓗ ᐃᒃᐱᒋᔭᒥᓂᒃ ᐊᒻᒪ ᑕᒪᓐᓇ ᓴᙱᓂᖅ ᑕᐃᕙᒃᖢᒍ. ᑕᐃᒪᙵᓂ ᐃᓕᑦᑎᓯᒪᓕᖅᐳᖅ ᐊᒃᑐᖅᑕᐅᓴᕋᐃᓐᓂᕐᒥᒃ, ᐃᒡᓚᕈᓐᓇᕐᓂᕐᒥᒃ ᕿᐊᔪᓐᓇᕐᓂᕐᒥᒡᓗ ᐊᒻᒪ ᐃᒻᒥᓂᒃ ᐃᒃᐱᒋᔭᒥᓂᒃ ᐱᕕᖃᖅᑎᑦᑎᔪᓐᓇᕐᓂᕐᒥᒃ.

ᒋᓕᔅᐱ ᐅᖃᐅᔾᔨᒋᐊᕈᓐᓇᖅᐸᑦ ᒪᒃᑯᖕᓂᖅᓴᒧᑦ ᐅᖃᕋᔭᖅᑐᖅ, "ᐃᓄᐃᑦ ᖃᑕᙳᑎᒃᑲ ᓈᓚᒃᑲᓐᓂᖃᑦᑕᕐᓗᒋᑦ, ᖁᔭᓈᑐᐃᓐᓇᙱᓪᓗᒋᑦ, ᖁᔭᓈᑐᐃᓐᓇᙱᓪᓗᒋᑦ, ᐃᓐᓇᖅᓯᐅᕐᓗᓯᓗ ᓈᓚᒍᓐᓇᖅᑐᒥᒃ ᓈᓚᒍᓐᓇᖅᑕᒥᓂᒡᓗ." ᑭᖑᒧᑦ ᑕᑯᓪᓗᓂ, ᐃᖅᑲᐅᒪᔪᖅ, "ᐃᓐᓇᑐᖃᖃᓗᐊᓚᐅᙱᓚᒍᑦ ᓅᓐᓂᑦᑎᓐᓄᑦ, ᑭᓯᐊᓂ ᐊᖓᔪᒃᖠᖅᐹᖑᔪᑦ ᓯᓚᑐᔪᐊᓘᓚᐅᖅᐳᑦ, ᐋᓐᓂᐊᕐᓂᕆᓚᐅᖅᑕᑦᑎᓐᓄᑦ, ᓴᙱᓕᓚᐅᖅᐳᒍᑦ, ᓴᐱᓕᖅᓴᕋᐃᙱᖦᖢᑕ, ᓈᓚᓚᐅᕈᒪᓗ, ᐃᓕᓐᓂᐊᖅᑎᑕᐅᓚᐅᖅᐳᖓ... ᑲᙳᓇᙱᓚᖅ ᕿᐊᓗᓂ."

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᕈᒪᔪᓄᑦ ᐃᓕᓐᓂᐊᒃᑲᓐᓂᕐᓂᕐᒧᑦ ᑐᙵᕕᖃᕐᓗᑎᒃ ᐃᓄᐃᑦ ᐅᕝᕙᓘᓐᓃᑦ ᐃᔾᔪᔪᖁᑎᓂᒃ ᐃᓕᓴᐃᔾᔪᑎᓂᒃ, ᐃᒻᒥᓂᒃ ᓈᒻᒪᒋᓗᑎᒃ ᑭᓇᐅᔭᕆᐊᖃᕐᓂᕐᒥᓂᒃ ᖃᓪᓗᓈᑎᑑᙱᖔᕐᓗᑎᒃ. "ᐃᓕᖅᑯᓯᕗᑦ ᐆᒪᑏᓐᓇᕐᓗᒍ ᐊᔪᕐᓇᙱᓐᓂᓕᒫᖓᓂ," ᑎᓕᐅᕆᕗᖅ, ᑎᒃᑯᐊᖅᓯᓪᓗᓂ ᐃᑭᐊᖅᑭᕕᒃᑯᑦ ᑐᓴᐅᒪᖃᑎᒌᒍᑎᒃᓴᓂᒃ.

ᓯᕗᓂᒃᓴᑦᑎᓐᓂ, ᒋᓕᔅᐱ ᓂᕆᐅᒃᐳᖅ ᓇᓂᓯᓛᕈᒪᓪᓗᓂ ᐅᒃᐱᖃᑎᒋᔭᒥᓂᒃ ᐃᓱᒪᒋᔭᒥᓂᒃ ᐊᔾᔨᖃᖅᑐᒥᒃ, ᐃᓅᓪᓗᓂᓗ ᖃᐅᔨᒪᓪᓗᓂᓗ ᐃᓕᖅᑯᓯᖏᓐᓂᒃ. ᐊᕐᕌᓂ, ᐃᓕᓐᓂᐊᖅᑎᑦᑎᓚᐅᖅᐳᖅ ᕿᓚᐅᔾᔭᕐᓂᕐᒥᒃ ᑲᑕᔾᔭᕐᓂᕐᒥᒡᓗ ᐃᓕᓐᓂᐊᖅᑎᓄᑦ ᐊᔪᙱᓐᓂᓕᖕᓄᑦ 2-ᒥᑦ 5-ᒧᑦ. ᐳᓚᕋᖅᑎᓄᑦ ᐅᒥᐊᕐᔪᐊᖅ ᐃᓱᓕᓯᒪᓕᖅᐳᖅ ᑭᓯᐊᓂ ᐃᓕᓐᓂᐊᕐᓂᖅ ᐱᒋᐊᖅᓯᒪᓕᖅᐳᖅ ᑕᐃᒪᐃᓐᓂᖓᓄᓪᓗ ᑲᑎᖃᑎᖃᕐᓂᐊᖅᐳᖅ ᐃᓕᓴᐃᔩᑦ ᐊᖓᔪᖅᑳᖓᓂᒃ ᐅᖃᐅᓯᖃᕐᓂᐊᕐᓗᓂ ᐊᕐᕌᒎᓂᐊᖅᑐᒥᒃ.  ᐊᒥᖅᑳᖃᑎᖃᖅᐸᒃᐳᖅ ᐊᓯᖏᓐᓂᒃ ᓄᓇᓕᖕᓂ ᐅᑯᑎᒎᓇᖅ, Connected North−ᑯᑎᒍᑦ.

"ᐱᐅᓯᕚᓪᓕᕐᓂᖅ ᐃᒪᐃᑦᑑᕗᖅ ᐃᓅᓕᕐᓗᓂ ᑕᐃᒪᐃᑦᑕᕆᐊᖃᕐᓂᕐᓂᒃ, ᐱᐅᓂᖅᓴᐅᙱᓪᓗᓂ ᐊᓯᖕᓂᑦ, ᐱᐅᙱᓐᓂᖅᓴᐅᙱᓪᓗᓂ ᐊᓯᖕᓂᑦ."

ᐅᖃᐅᔾᔨᒋᐊᕈᑎᒋᔭᖓ ᒪᒃᑯᒃᑐᓄᑦ ᐃᒪᓐᓇ, "ᓇᓂᓯᓗᑎᑦ ᕿᓄᐃᓵᕈᑎᒋᓂᐊᖅᑕᕐᓂᒃ. ᓇᓂᓯᓗᑎᑦ ᓵᕝᕕᒋᔭᕐᓂᒃ ᐊᒃᓱᕈᕐᓇᖅᑐᒃᑰᓕᕌᖓᕕᑦ. ᐃᒥᐊᓗᒃᑰᖅᑎᑦᑕᐃᓕᒍᒃ ᐋᖓᔮᕐᓇᖅᑐᓂᒡᓘᓐᓃᑦ. ᐃᓕᖅᑯᓯᓯ ᑕᑯᓚᐅᕈᒃ, ᐊᖓᔪᖅᑳᓯ ᑕᑯᓗᒋᑦ, ᓯᕗᓕᕕᓂᓯ ᑕᑯᓚᐅᕈᒃ. ᐃᖅᑲᐅᒪᕙᐃᑦ? ᖃᓄᖅ ᐊᓂᒍᐃᓚᐅᖅᐸᑦ ᐃᒥᐊᓗᒃ ᐋᖓᔮᕐᓇᖅᑐᕐᓗ ᐱᑕᖃᓚᐅᙱᓐᓂᖓᓂ? ᑕᒪᒃᑯᐊ ᐃᓕᓐᓂᐊᕐᓗᒋᑦ." ᒋᓕᔅᐱ ᑎᓕᐅᕆᒋᕗᖅ ᖃᐅᔨᖁᓪᓗᒋᑦ ᑭᓇᐅᓂᕐᒥᓂᒃ, ᐃᓕᑦᑎᓗᑎᒃ ᐃᒃᐱᒋᔭᒥᓂᒃ ᐊᑐᑦᑎᐊᕈᓐᓇᕐᓂᕐᒥᒃ ᐊᒻᒪᓗ ᕿᓂᕐᓗᑎᒃ ᐃᕆᐊᓛᕐᕕᒋᔪᓐᓇᖅᑕᖏᓐᓂᒃ ᑕᐃᒪᐃᑦᑕᕆᐊᖃᕈᑎᒃ.  ᐃᓱᓕᑉᐸᓪᓕᐊᓕᖅᑎᓪᓗᒍ, ᐅᖃᓚᐅᖅᐳᖅ, "ᒪᓕᙱᓪᓗᒋᑦ ᐃᓄᒋᐊᒃᑐᑦ. ᐃᔪᒃᑲᑐᐃᓐᓇᕆᐊᖃᖅᐳᑎᑦ ᐃᓐᓈᕈᕐᒧᑦ. ᐃᓄᒋᐊᒃᑐᓃᖃᑕᐅᔪᒪᒍᕕᑦ, ᓇᓂᓯᓗᑎᑦ ᑲᑎᙵᔪᓂᒃ ᐊᔾᔨᒌᓂᒃ ᐱᔪᒪᓂᖃᖅᑐᓂᒃ, ᐊᔾᔨᐸᓗᖏᓐᓂᒃ ᐊᑐᖅᓯᒪᔪᓂᒃ."

ᓇᒧᙵᕈᓘᔭᖃᑦᑕᕋᓗᐊᖅᑎᓪᓗᒍ ᐃᓅᓯᕐᒥᓂ, ᓗᐃᓴ ᓴᓪᓗᕕᓂᖅ ᒋᓕᔅᐱᐅᑉ ᐆᒻᒪᑎᖓ ᓱᓕᑦᑎᐊᓚᐅᖅᑐᖅ ᐃᓄᐃᑦ ᐃᓕᓴᐃᔾᔪᑎᖏᓐᓄᑦ, ᐃᓕᖅᑯᓯᕐᒥᓄᑦ ᐊᒻᒪᓗ ᑭᖑᓂᐊᒍᑦ, ᐅᑎᓕᓚᐅᖅᐳᖅ ᐊᖏᕐᕋᒧᑦ ᖃᐅᓱᐃᑦᑐᒧᑦ. ᒪᒥᓴᕐᓂᕆᓚᐅᖅᑕᖓ ᖃᐅᔨᓚᐅᖅᐸᐅᒃ ᐱᙳᐊᖅᑎᒥᑎᒍᑦ ᐊᒻᒪ ᕿᓚᐅᑎᑎᒍᑦ ᒫᓐᓇᓗ ᐃᓕᖅᑯᓯᕐᒥᓂᒃ ᖃᐅᔨᑎᑦᑎᕙᒃᐳᖅ ᒪᒃᑯᒃᑐᓄᑦ ᓄᓇᓕᖓᓂ, ᐊᓯᖏᓐᓂ ᓄᓇᓕᖕᓂ ᐊᒻᒪ ᐅᒥᐊᕐᔪᐊᒃᑯᑦ ᐳᓚᕋᖅᐸᒃᑐᓄᑦ. ᓴᐱᓕᖅᓴᕋᐃᙱᖦᖢᓂ ᓴᙱᓂᖃᖅᖢᓂᓗ, ᐃᓕᑦᑎᓯᒪᕗᖅ ᖃᓄᐃᙱᓐᓂᖓᓂᒃ ᕿᐊᔭᕆᐊᒃᓴᖅ ᑭᓇᐅᓪᓚᕆᖕᓂᕐᒥᓂᒡᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.