ᒥᓯᐊᓪ ᓖ ᐅᓪᓚᔅ ᐅᖃᖅᐳᖅ ᑐᓴᕐᓈᕐᓂᖅ ᑲᐳᔾᔭᕐᕕᒋᓂᕋᖅᖢᓂᐅᒃ ᓲᖃᐃᒻᒪ ᐃᒻᒥᓂᒃ ᐅᖃᐅᓯᕆᑦᑎᐊᕈᓐᓇᓚᐅᕐᒪᑦ.

ᒥᓯᐊᓪ ᓖ ᐅᓪᓚᔅ, ᖃᐅᔨᒪᔭᐅᔪᖅ MzShellz, ᐅᖃᖅᖢᓂ ᐱᕈᖅᓴᓂᖓ ᐊᒃᓱᕈᖅᖢᓂ. ᐊᓈᓇᖓ ᐃᓄᐊᖅᑕᐅᓪᓗᓂ ᒪᒃᑯᒃᑎᓪᓗᒍ. ᐊᒻᒪᓗ ᐃᓕᓐᓂᐊᕐᕕᐅᙱᑦᑐᓂᒃ, ᐱᓕᕆᐊᖃᓚᐅᖅᑐᖅ ᐅᕕᓂᖃᑎᒋᙱᑕᒥᓂᒃ ᑭᓯᐊᓂ ᓂᐱᖓ ᓇᓂᓪᓗᓂᐅᒃ.

"ᐃᓱᒪᒋᔭᕋ ᑎᑎᕋᕐᓂᖅ ᐅᕙᓐᓄᑦ ᐊᖏᓛᖑᖏᓐᓇᐅᔭᖅᑐᖅ. ᐃᓅᓱᒃᑑᓪᓗᖓ ᐃᓐᓇᕈᖅᐸᓪᓕᐊᓪᓗᖓ ᐊᒻᒪᓗ ᑕᐃᒃᓱᒪᓂ, ᑎᒍᐊᓐᖑᐊᖃᓚᐅᖅᓯᒪᒐᒪ. 18-ᕈᕋᒪ, ᐃᓐᓇᐅᓕᖅᑎᓪᓗᖓ, ᓇᓪᓕᐅᑎᑦᑎᐊᕋᒪ, ᓲᕐᓗ ᐊᓂᓪᓗᖓ. ᐃᒡᓗᒦᓚᐅᙱᑦᑐᖓ, ᐃᓱᒪᔮᖅᖢᖓ ᑎᕝᕗᐊᖅᖢᖓ," MzShellz. "ᓇᒧᙵᐅᕕᒃᓴᖃᓚᐅᙱᑦᑐᖓ."

MzShellz−ᑯᑦ ᐱᔪᒃᓯᑎᑕᐅᖏᓐᓇᐅᔭᓚᐅᖅᐳᑦ ᐱᓕᕆᐊᖓᓄᑦ ᑐᐹᒃ, ᐊᒻᒪᓗ ᕼᐆᕈᑎᑐᑦ, ᑎᑎᕋᖃᑦᑕᓕᓚᐅᖅᑐᖅ. ᔭᔾᔭᐃᓇᒧᑦ ᓅᒻᒪᑦ ᓇᓂᓯᓚᐅᖅᑐᖅ hip hop-ᒥᑦ ᓄᓇᓕᖕᓂᑦ ᐊᒻᒪᓗ MzShellz ᐃᖅᑲᐅᒪᔪᖅ ᐃᒃᓯᕚᖃᑎᖃᖅᖢᓂ ᑲᑎᕐᒪᔪᓂᑦ ᐊᒻᒪᓗ ᑎᑎᕋᑐᐃᓐᓇᖅᖢᓂ.

"ᐱᔭᕇᖅᑎᓪᓗᒍ, ᓂᒡᓚᖅᓯᐊᕐᔪᓚᐅᖅᑐᒍᑦ. ᑕᒪᓐᓇ ᐅᖃᐅᓯᕆᑐᐃᓐᓇᖅᐸᕋ. ᑎᑎᕋᕈᓘᔭᖃᑦᑕᖅᑐᖓ, ᓲᕐᓗ ᐃᓱᒪᖅᓱᖅᑐᖓ ᑎᑎᕋᖅᑐᖓ. ᐱᓪᓚᕆᐊᓗᑐᐃᓐᓇᐅᓚᐅᙱᑦᑐᖅ, ᐃᓱᒪᐃᓐᓇᕿᔪᕐᔫᔮᓚᐅᖅᑐᖅ. ᔨᐊ, ᓂᐱᒐ ᓇᓂᓕᓚᐅᖅᑕᕋ," ᐅᖃᖅᑐᖅ ᒪᔅᓯᐅᓪᔅ.

ᐃᓕᓐᓂᐊᒃᑲᓐᓂᕋᓱᓚᐅᖅᑐᖅ ᑭᓯᐊᓂ ᐊᒃᓱᕈᓚᐅᖅᑐᖅ ᓯᓚᒦᙶᖅᖢᓂ ᐊᒻᒪ ᐋᓐᓂᖅᓯᕆᓪᓗᓂ ᐃᓅᖃᑎᖃᖃᑦᑕᓚᐅᕐᒪᑦ. ᐊᐃᑉᐸᕇᖕᓂᖅ ᑐᖁᓐᓇᖅᑐᒻᒪᕆᐅᓚᐅᖅᐳᖅ ᐃᓚᖓ ᕿᑐᕐᖓᖓᑕ ᑎᒍᔭᐅᓪᓗᓂ ᐊᖏᕐᕋᖓᓂ, ᖃᐅᔨᒪᓪᓗᓂᓗ ᐊᓯᔾᔨᕆᐊᖃᓕᕐᓂᖓᓂ.

MzShellz ᐊᓂᓚᐅᖅᑐᖅ ᓇᔭᓂ ᕚᓐᑰᕗᒥ. ᓄᓇᓕᐸᐅᔭᖅ ᓱᓕ ᓄᓇᖃᖅᑐᖅ ᓲᖃᐃᒻᒪ ᑕᑯᑎᑦᑎᔪᒪᓕᓚᐅᕐᒪᑦ ᕿᑐᕐᖓᒥᓂᒃ ᐱᐅᓂᖅᓴᒥᒃ ᐃᓅᓯᖃᕐᓂᕐᒥᒃ.

"ᖃᐅᔨᒪᓚᐅᖅᓯᒪᙱᑦᑐᑎᑦ ᐊᕙᑎᕗᑦ ᖃᓄᖅ ᐊᓯᔾᔨᕈᓐᓇᕐᒪᖔᑦ ᐃᓅᓯᕐᓄᑦ. ᑕᒪᐅᓐᖓᓚᐅᕋᒪ ᐊᒻᒪᓗ ᐱᑕᖃᓚᐅᕐᓇᖓ. ᖃᐅᔨᒪᓚᐅᙱᑦᑐᖓ, ᑭᓯᐊᓂ ᖃᐅᔨᒪᓚᐅᖅᑐᖓ ᐊᓂᔭᕆᐊᖃᕐᓂᓐᓂᒃ," ᐅᖃᖅᑐᖅ ᒪᔾᓯᐅᓪᔅ.

ᒫᓐᓇ, ᓂᔾᔭᐅᓯᔭᕐᓂᕐᒧᑦ ᐃᖅᑲᓇᐃᔮᖃᓕᖅᑐᖅ ᐊᒻᒪᓗ ᑖᓐᓇ ᐊᒻᒪᓗ ᐱᖓᓱᑦ ᕿᑐᕐᖓᖏᑦ ᐊᑦᑕᓇᖏᑦᑐᒦᓕᖅᑐᑦ ᐊᒻᒪᓗ ᖃᓄᐃᖏᑎᐊᖅᑐᒥᒃ ᐊᕙᑎᖃᑦᑐᑦ. MzShellz ᓂᕆᐅᒋᔭᖃᖅᐳᖅ ᐊᓯᖏᓐᓂᒃ ᓄᓇᖃᖅᑳᖅᑐᓂᒃ ᐃᓄᖕᓂᒃ ᖃᐅᔨᒪᓂᖏᓐᓂᒃ ᐱᓇᔪᖕᓂᕐᒥᓂ ᓯᓐᓇᑦᑑᒪᒋᔭᒥᓂᒃ ᑕᑯᒃᓴᐅᑎᑦᑎᔪᓐᓇᕋᔭᕐᓂᖏᓐᓂᒃ ᓯᕗᓂᒃᓴᑦᑎᐊᕙᖕᒥᒃ.

"ᐱᔭᕇᖅᓯᓗᑎᑦ ᓱᓇᑐᐃᓐᓇᕐᓂᑦ ᐱᔭᕇᕈᒪᔭᓐᓂᑦ ᐃᓅᓯᕐᓂᑦ. ᐅᒃᐱᕈᓱᒃᓗᑎᑦ ᐱᔪᒪᔭᕐᓂᒃ ᓲᖃᐃᒻᒪ ᓯᓐᓇᑦᑑᒪᑦ ᐱᓪᓚᑦᑖᖑᖕᒪᑕ. ᐊᖏᔪᖅ, ᑐᕌᕆᓗᒍ ᕿᓚᒃ ᓲᖃᐃᒻᒪ ᐊᓯᖕᓂᒃ ᐅᒃᐱᕈᓱᒃᑐᖃᔾᔮᙱᒻᒪᑦ ᐃᓕᖕᓂᒃ. ᐊᒃᓱᕈᓕᓚᐅᖅᐳᑎᑦ ᖃᓄᑐᐃᓐᓇᖅ ᐱᔭᕆᐊᖃᕈᕕᑦ," ᐅᖃᖅᑐᖅ MzShellz.

"ᓯᓐᓇᑦᑑᒪᓂᖅ, ᐱᕈᖅᐸᓪᓕᐊᖏᓐᓇᕆᑦ, ᐱᕈᖅᐸᓪᓕᐊᖏᓐᓇᕆᑦ."

ᖁᔭᓐᓇᒦᒃ ᐋᔅᑳᕐ ᐸᐃᑯᕐ III ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.