"ᑕᒪᐃᓐᓂᓕᒫᖅ ᓅᑉᐸᓪᓕᐊᓂᖅ... ᐅᑎᕆᐊᖃᓚᐅᕐᒪᑦ ᐊᒻᒪᓗ ᐃᔾᔪᐊᒐᒃᓴᑦᑎᐊᕙᐅᓪᓗᓂ ᓄᓇᑦᑎᓐᓂ. ᑕᐃᒪᑐᖅ ᑕᒪᓐᓇ ᑲᔪᓯᑎᑦᑐᓐᓇᕐᓂᐊᖅᐸᕋ, ᐊᑕᖃᑎᒌᖏᓐᓇᕐᓗᖓᓗ ᓄᓇᑦᑎᓐᓂᒃ ᖁᕕᐊᒋᓗᒋᓪᓗ ᐃᓐᓇᖁᑎᕗᑦ ᑕᐃᒪᐃᓕᐅᓚᐅᕐᓂᖏᓐᓄᑦ," ᓂᑰᓪ ᐴᕋᓐ−ᒥᒃ ᐊᒥᖅᑳᖃᑎᖃᖅᐳᖅ. ᐱᕈᖅᓴᓚᐅᖅᑐᖅ ᕚᓕᒥ, ᐋᓪᐴᑕᒥ ᐊᒻᒪ ᒫᓐᓇ ᓄᓇᖃᓕᖅᑐᖅ ᕗᐊᑦ ᕗᐊᑦᔅᒥᑦ. 

2015-ᒥ, ᐃᓚᒋᔭᐅᓚᐅᖅᑐᖅ ᐃᓕᓐᓂᐊᖃᑎᒌᓄᑦ ᓯᓚᑦᑐᖅᓴᕐᕕᔾᔪᐊᖓᓂ ᕕᒃᑐᐊᕆᐊᒥ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐆᒻᒪᖅᑎᑦᓯᑲᓐᓂᕐᓂᕐᒧᑦ ᐱᓕᕆᐊᒥᑦ ᐃᓕᓐᓂᐊᖅᓱᓂ ᐅᖃᐅᓯᕐᒥᑦ. ᐊᕐᕌᒎᖕᓄᑦ ᒪᕐᕉᖕᓄᑦ ᓇᑉᐸᕐᒧᓪᓗ, ᐃᓕᓐᓂᐊᓚᐅᖅᑐᖅ ᐃᓚᒋᔭᐅᓪᓗᓂ ᐆᒃᑑᒪᔭᒍᑕᐅᔪᒧᑦ ᐱᓕᕆᐊᖑᔪᒧᑦ. "ᓴᓗᕋᐅᑎᖃᕐᔪᐊᓚᐅᖅᑐᒍᑦ," ᐃᖅᑲᐅᒪᔪᖅ. ᐃᓕᓐᓂᐊᖅᑕᒥᓂᒃ ᐊᓂᒍᐃᔪᑦ ᐱᑎᑕᐅᓚᐅᖅᐳᑦ ᐱᓕᕆᐊᖑᖔᕈᓐᓇᖅᑐᓂᒃ ᕕᒃᑑᕆᐊ ᓯᓚᑦᑐᖅᓴᕐᕕᓕᐊᕈᓐᓇᖅᖢᑎᒃ Bachelor of Education−ᒧᑦ ᐃᓕᓐᓂᐊᕐᓗᑎᒃ ᐅᖃᐅᓯᓕᕆᓂᕐᒧᑦ ᐃᓕᓴᐃᔨᐅᓂᕐᒥᒃ, ᐊᔪᕈᓐᓃᖅᓴᕐᓗᑎᒃ ᐃᓕᓴᐃᔾᔪᓯᕐᓂᒃ. ᑖᑯᓇᙵᑦ 13-ᖑᔪᓂᑦ ᐅᖃᐅᓯᕐᒥᑦ ᐆᒻᒪᖅᑎᑦᑎᒃᑲᓐᓂᕐᓂᕐᒥᑦ ᐊᓂᒍᐃᔪᓂᑦ, ᑎᓴᒪᑦ ᑲᔪᓯᔪᒪᓚᐅᖅᑐᑦ ᐊᒻᒪᓗ ᐊᓂᒍᐃᓪᓗᑎᒃ ᓇᓗᓇᐃᒃᑯᑕᖅᑖᖅᖢᑎᒃ. 

ᐅᖓᑖᓄᑦ ᐃᓕᑦᑎᕙᓪᓕᐊᓂᕐᒥᒃ ᐅᖃᐅᓯᕐᒥᒃ, ᑖᓐᓇ ᐱᓕᕆᐊᖑᔪᖅ ᒪᓂᒪᑎᑦᑎᓚᐅᖅᐳᖅ ᐅᑯᖕᓄᙵ, ᐱᕕᒃᓴᒥᒃ ᐅᑎᖅᑎᑦᑎᔪᓐᓇᕐᓂᕐᒥᒃ ᑭᓇᐅᓂᕐᒥᓂᒃ, ᑐᑭᓯᐅᒪᓗᓂ ᐱᒋᐊᕐᕕᖏᓐᓂᒃ ᐊᑕᖃᑎᖃᖅᐸᖕᓂᕐᒥᒡᓗ ᐃᓐᓇᕐᓂᒃ. ᐱᕈᖅᓴᓪᓗᓂ ᕚᓕᒥ, ᑕᐃᒃᑯᐊ ᐃᓚᑰᓚᐅᖅᑐᑦ. "ᐃᓅᖃᑎᒃᑲ ᑲᑎᙵᖃᑎᒋᒐᒃᑭᑦ ᐅᖃᐅᓯᖅᐳᑦ ᐱᔾᔪᑎᒋᓪᓗᒍ ᑲᒪᓇᑦᑎᐊᖅᖢᓂᓗ," ᐱᙳᐊᒃᑲᒻᒪᕆᐊᓗᒃ. 

ᐅᖃᐅᓯᓕᕆᓂᕐᒧᑦ ᐃᓕᓐᓂᐊᓚᐅᖏᓐᓂᕐᒥᓂ, ᐃᓕᓴᐃᔪᒪᓗᐊᓚᐅᖅᓯᒪᙱᑦᑐᖅ. ᐊᐱᕆᔭᐅᒐᒥᒃ ᓴᖅᑭᑦᑎᖁᔭᐅᓪᓗᑎᒃ ᐃᓕᓐᓂᐊᕐᓂᕐᒧᑦ ᐃᓱᒪᒋᔭᐅᔪᒥᒃ, ᖃᐅᔨᓚᐅᖅᑐᖅ ᐃᓕᓴᐃᔨᐅᖏᓐᓇᐅᔭᕐᓂᖓᓂᒃ, ᐃᓅᓯᖏᓐᓂᒃ ᒪᕐᕉᒃ ᓄᑲᕇᒃ. ᐴᕋᓐ ᖃᐅᔨᓚᐅᖅᑐᖅ ᐱᓕᕆᐊᒃᓴᒥᑦ ᐃᓕᓐᓂᐊᕐᕕᐅᑉ ᐊᖓᔪᖅᑳᖓᑎᒍᑦ ᐱᒻᒪᕆᐅᖏᓐᓇᐅᔭᖅᑐᖅ ᐃᓐᓇᐅᓪᓗᓂ ᐃᓅᓯᖓᓂ.

"ᐊᒃᓱᕈᕐᓇᖅᑐᐊᓘᓚᐅᖅᑐᖅ ᐱᒋᐊᕐᓂᖓᓂ ᓲᖃᐃᒻᒪ ᐱᕈᖅᐸᓪᓕᐊᓚᐅᕋᒪ ᐃᓗᐊᕆᔭᓐᓂ. ᑕᐃᒫᒃ ᑭᓯᐊᓂ ᐱᕈᖅᐸᓪᓕᐊᒍᓐᓇᕋᑦᑕ ᐊᒻᒪᓗ ᐃᓅᓯᓕᒫᖅ ᐃᓕᓐᓂᐊᖅᑎᐅᖏᓐᓇᖅᑐᑕ. ᑕᐃᔅᓱᒪᓂ ᐃᖏᕐᕋᓯᒋᐊᓚᐅᖅᓯᒪᕗᖓ, ᖃᐅᔨᒪᓚᐅᖅᑐᖓᓗ ᓇᓃᑦᑐᒪᒻᒪᖔᕐᒪ ᑭᓱᓕᒫᓪᓗ ᓴᖅᑭᓵᓚᐅᖅᑐᑦ," ᐃᖅᑲᐅᒪᔪᖅ.

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ ᓄᓇᒥᓂᒃ ᕿᒪᐃᖁᓪᓗᒋᑦ ᐃᓕᓐᓂᐊᕋᓱᒃᓗᑎᒃ ᐃᓕᓐᓂᐊᕆᐊᕈᒪᖕᒪᑕ, ᖃᐅᔨᒪᒐᓗᐊᖅᖢᓂ ᑲᑉᐱᐊᓇᕐᓂᖓᓂᒃ. ᐃᓚᒥᓂᒃ ᐴᖅᑲᐃᓪᓗᓂ, ᐊᖏᓛᖑᖃᑕᐅᓚᐅᖅᑐᖅ ᐱᓚᐅᖅᓯᒪᔭᒥᓂᒃ ᑭᓯᐊᓂ ᐊᓕᐊᓇᐃᒍᓱᒃᑐᖅ ᑲᑎᙵᓚᐅᕐᒪᑕ. "ᖃᓄᑐᐃᓐᓇᖅ ᐊᓯᐅᔨᔭᕆᐊᖃᙱᑦᑐᖅ, ᑭᓱᓕᒫᓂᒃ ᐱᑕᓕᒃ ᐃᓕᖕᓂᒃ ᓇᓂᓯᓂᐊᖅᑐᑎᑦ... ᐊᓯᐊᒎᕐᕕᖃᕋᔭᓐᖏᑦᑐᖓ. ᐅᐱᒍᓱᑦᑎᐊᖅᐳᖓ ᐊᖅᑯᑎᒋᔪᓐᓇᕋᒃᑭᑦ ᐊᖏᕐᕋᕐᓗᖓ ᐃᓕᓴᐃᔨᐅᓗᖓᓗ,... ᑕᐃᒪᐃᓕᐅᕐᓗᑎᑦ ᐅᒃᐱᕈᓱᒃᓗᑎᓪᓗ ᑭᓱᓕᒫᑦ ᐊᑑᑎᖃᕐᓂᐊᕐᓂᖏᓐᓂᒃ," ᑎᓕᐅᕆᔪᖅ.

ᐊᐳᖅᑕᕈᑎᖃᓕᕋᒥ ᐃᓕᓐᓂᐊᕆᐊᖅᑐᓂ, ᐴᕋᓐ ᐃᓚᒥᓂᒃ ᐱᖃᑎᖃᓚᐅᖅᑐᖅ. ᐱᔭᕇᓚᐅᖅᑐᖅ ᐸᐃᑉᐹᖁᑎᒥᓂᒃ ᐊᒻᒪᓗ ᐸᓂᖓ ᐱᔭᕇᓚᐅᖅᑐᖅ ᐃᓕᓐᓂᐊᕐᕕᐊᓗᒻᒥ ᑕᐅᕙᓂ. ᐃᓪᓗᖓ ᐃᓚᒌᑦ ᐃᑲᔪᓚᐅᖅᑐᑦ ᐊᑦᓱᕈᓐᓇᖅᑐᓂᑦ. "ᐃᖅᑲᐅᒪᐃᓐᓇᐅᔭᖅᑐᒍᑦ ᐅᕙᑦᑎᓐᓂᒃ ᐊᖏᕐᕋᖅᓯᒪᐃᓐᓇᐅᔭᕐᓂᑦᑎᓐᓂᒃ ᑲᑎᙵᑎᓪᓗᑕ. ᐱᔭᕆᐊᑭᑦᑐᑯᓘᓚᐅᙱᑦᑐᖅ. ᑭᓯᐊᓂ ᐃᓚᒌᓄᑦ ᐃᒡᓗ ᓴᙱᓛᖑᖃᑕᐅᓚᐅᖅᑐᖅ, ᓴᙱᓛᖑᖃᑕᐅᓪᓗᓂ ᐃᑲᔪᓚᐅᖅᑐᖅ ᑭᓱᓕᒫᓂᒃ ᐊᓂᒍᐃᔪᓐᓇᖅᖢᑕ," ᐃᖅᑲᐅᒪᔪᖅ.

ᑐᓴᖅᑎᑦᑎᒍᓐᓇᕈᓂ ᓄᑲᖅᑎᐅᓂᖅᓴᒧᑦ, ᑕᒻᒪᕐᓂᐅᒐᔭᖅᑐᖅ ᐱᕈᖅᐸᓪᓕᐊᓪᓗᓂ ᐊᒻᒪᓗ ᐃᒻᒥᓂᒃ ᐊᒃᓱᕈᖏᓐᓂᖅᓴᐅᓗᓂ. ᐃᓐᓇᐃᑦ ᐃᓅᓯᕐᒥᓂ ᐃᑲᔪᖅᓱᐃᓚᐅᖅᐳᑦ ᓇᓗᓇᐃᖅᓯᓪᓗᑎᒡᓗ ᓂᕆᐅᒋᔭᒥᓂᒃ ᑐᓴᖅᑎᑦᑎᓪᓗᑎᒃ ᓯᕗᓂᒃᓴᖓᓄᑦ, ᐊᒻᒪ ᐃᒻᒥᓂᒃ ᐅᖃᐅᔾᔨᖁᔨᓪᓗᓂ ᑕᐃᒪᓐᓇᑦᑕᐃᓐᓇᖅ ᓱᓕᓂᐊᕐᓂᕋᕈᑎᒥᒃ, "ᐱᕈᖅᐸᓪᓕᐊᖏᓐᓇᕐᓂᐊᖅᐳᑎᑦ ᐊᒻᒪ ᐱᓇᔪᑐᐊᕈᕕᑦ ᐱᐅᓂᖅᓴᒥᒃ ᐊᒻᒪ ᖃᐅᔨᒪᓂᖅᓴᐅᓗᑎᑦ, ᑕᐃᒪᓕ ᐊᑲᐅᓂᖅᓴᐅᔪᓐᓇᖅᐳᑎᑦ." 

ᐊᐅᓚᓐᓂᐊᕐᓗᒍ ᐃᓱᒪᖓ ᖃᓄᐃᙱᑦᑎᐊᕐᓂᖓᓗ, ᐴᕋᓐ ᐊᒃᑐᐊᓂᖃᐃᓐᓇᓲᖅ ᐅᖃᐅᓯᕐᓄᑦ ᓇᔭᖏᓐᓄᑦ, ᐃᓐᓇᑐᖃᖏᓐᓄᑦ, ᑲᔪᖏᖅᓴᐃᔨᖏᓐᓄᑦ ᐃᓄᓕᒫᓄᓪᓗ ᓯᕗᓕᖅᓯᒪᔪᓄᑦ. ᓄᓇᒦᓪᓗᓂ ᐃᒃᓯᕚᕐᖢᓂᓗ ᐃᑭᑦᑐᒧᑦ ᒪᒥᓴᕐᓂᕐᒥ ᐊᑐᕐᓂᑰᔪᖅ ᖃᐅᔨᙱᖦᖢᓂᐅᒃ ᕕᒃᑑᕆᐊᒦᑎᓪᓗᒍ. "ᑕᐃᒫᒃ ᐅᕙᓐᓄᑦ ᐃᓚᒋᔭᐅᓪᓚᕆᖕᒪᑦ ᐃᖅᑲᐃᓯᔾᔪᑎᒋᑦᑎᐊᕐᓗᒋᓪᓗ ᑭᓇᐅᖕᒪᖔᕐᒪ ᐊᒻᒪ ᖃᓄᐃᒻᒪᑦ ᐃᖏᕐᕋᓯᒋᐊᓚᐅᕐᒪᖔᕐᒪ ᐊᒻᒪ ᓄᓇᑦᑎᓐᓂ ᐱᓕᕆᐊᕆᕙᒃᑕᕋ," ᐅᖃᐅᓯᕆᕙᐅᒃ. ᐳᓛᕆᐊᕆᐊᒃᓴᖅ ᖁᕕᐊᒋᔭᓕᒃ ᐊᒻᒪ ᑲᑎᙵᖃᑎᖃᕆᐊᒃᓴᖅ ᑭᓇᒧᑦ ᓄᓇᖅᑲᑎᖏᓐᓄᓪᓗ ᐃᓅᓪᓗᓂ. 

ᐱᔪᒃᓯᓂᖓ ᐃᖅᑲᓇᐃᔮᒥᓂ ᐸᓂᒋᕙᐅᒃ. ᐃᓕᑦᑎᕙᓪᓕᐊᓂᖅ ᐃᓕᖅᑯᓯᑐᖃᕐᓂᒃ ᐃᓕᓐᓂᐊᖅᑎᑦᑎᓂᕐᒥᒃ ᐃᓄᖁᑎᒥᓂᒃ ᐃᓚᒋᔭᐅᓕᖅᑎᑦᑎᔪᓂᒃ ᐅᖃᐅᓯᕐᓄᑦ ᐱᓕᕆᐊᖑᕙᒃᑐᒧᑦ, ᐃᓕᑦᑎᓚᐅᖅᐳᖅ ᓄᓇᓕᖕᒥᓂ ᓄᑕᖅᑲᖏᑦ ᓂᑲᒋᔭᐅᓂᖏᓐᓂᒃ. "ᑕᒪᕐᒥᑦᑎᐊᖅ ᑕᐃᒪᐃᖃᑦᑕᖅᓯᒪᕗᖓ, ᑕᐃᑲᙵᑦ ᐃᓅᕝᕕᒋᓚᐅᖅᑕᓐᓂ ᓯᕗᒻᒧᐊᒃᐸᓪᓕᐊᑎᓪᓗᒍ ᐅᓪᓗᒥ ᓱᓕᓗ ᐅᓪᓗᒥᒧᑦ ᑎᑭᖦᖢᒍ, ᑖᔅᓱᒧᖓᐅᕗᖅ. ᐃᓚᒋᔭᐅᓂᐊᖅᑐᖅ ᑭᖑᕚᒃᓴᑦᑎᓐᓄᑦ ᐊᒻᒪᓗ ᐃᓕᓐᓂᐊᖅᑎᑕᐅᖏᓐᓇᓚᐅᖅᑐᒍᑦ ᑕᒪᓐᓇ ᐱᒻᒪᕆᐅᓂᖅᐸᐅᒻᒪᑦ. ᐅᓪᓗᖅ ᐊᑕᐅᓯᖅ, ᐊᐅᓪᓚᕈᑦᑕ, ᑕᑯᓂᐊᖅᑐᒍᑦ ᐱᕈᖅᓴᑎᑦᑎᓗᑕ ᐃᓄᑦᑎᐊᕙᖕᓂᑦ ᐆᒻᒪᑎᑦᑎᐊᕙᖕᓂᑦ ᐃᓕᑦᑎᔪᓂᑦ ᐃᓱᒪᑦᑎᐊᕈᓐᓇᕐᓂᕐᒥᑦ ᐊᓯᒥᓂᑦ ᐃᖕᒥᖕᓂᒃᓗ ᐊᕙᑎᖏᓐᓂᒃᓗ," ᐅᖃᕐᖢᓂ. 

ᐊᖓᔪᖅᑳᖑᓪᓗᓂ, ᕿᑐᕐᖓᒥᓂᒃ ᑕᐅᑐᒍᒪᑦᑎᐊᖅᑐᖅ ᐱᕈᖅᐸᓪᓕᐊᑎᓪᓗᒍ, ᑐᓗᖅᑕᕈᑎᓂᒃ ᐊᓂᒍᐃᔪᓐᓇᖅᖢᓂ ᐃᓕᑦᑎᓯᒪᓪᓗᓂᓗ ᐆᒻᒪᑎᒥᓂᒃ ᐅᒃᐱᕈᓱᒋᐊᖃᕐᓂᕐᒥᓂᒃ ᐸᓂᖓᓗ ᓇᖕᒥᓂᖅ ᓂᕈᐊᕈᓐᓇᖅᓯᓗᓂ ᐊᒻᒪ ᓇᖕᒥᓂᖅ ᓂᐱᖃᕈᓐᓇᖅᓯᓗᓂ. ᐱᕈᖅᐸᓪᓕᐊᓪᓗᓂ, ᐴᕋᓐ ᓇᒻᒥᓂᖅ ᐱᓯᒪᓚᐅᙱᓚᖅ.  "ᓴᙱᔪᒥᒃ ᓂᐱᖃᖅᑐᖅ, ᐊᑐᕆᐊᖃᖅᑕᖓ," ᖁᖓᓪᓗᓂ. ᖁᕕᐊᒋᔭᖃᕐᒥᔪᖅ ᑕᑯᔭᕆᐊᒃᓴᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᓂᑦ ᐃᓕᓐᓂᐊᕆᐊᒃᑲᓐᓂᖅᑐᓂᑦ ᖁᕕᐊᓱᒃᖢᑎᒃᓗ ᐃᖏᕐᕋᓂᖏᓐᓂᑦ, ᑲᔪᓯᑦᑎᐊᖁᓪᓗᓂᒋᑦ. 

ᑕᒪᓐᓇ ᐅᑎᕐᓂᐅᔪᖅ ᐅᑎᕆᐊᖃᓚᐅᕐᒪᑦ ᐊᒻᒪᓗ ᐃᔾᔪᐊᒐᒃᓴᑦᑎᐊᕙᐅᓪᓗᓂ ᓄᓇᒥᓂ. ᑖᓐᓇ ᓂᑰᓪ ᐴᕋᓐ ᐱᓇᔪᐃᓐᓇᖅᐳᖅ, ᑲᑎᙵᖃᑎᖃᖅᖢᓂ ᓄᓇᒥᓂᒃ ᖁᕕᐊᒋᓪᓗᓂᒋᓪᓗ ᐃᓐᓇᖏᑦ ᑕᐃᒪᐃᖃᑦᑕᓚᐅᕐᓂᖏᓐᓄᑦ. ᐱᕈᖅᓴᓚᐅᖅᖢᓂ ᐅᖓᓯᒃᑐᒥᑦ ᐊᖏᕐᕋᒥᓂᑦ, ᐅᑎᖅᑐᖅ ᕗᐊᑦ ᐊᓐᑦᔅ−ᒥᑦ ᓇᒃᓴᖅᖢᓂᓗ ᐱᔪᓐᓇᖕᓂᖕᒥᓂᒃ ᐃᓕᓐᓂᐊᕐᑎᑦᑎᓂᖕᒥᑦ ᐅᖃᐅᓯᖕᒥᓂᒃ ᐆᒻᒪᑎᒥᓂᒡᓗ. ᐸᓂᖓᓄᑦ, ᑭᓱᓕᒫᓂᒃ ᐱᔪᒪᔭᒥᓂᒃ ᑐᓂᓯᔪᖅ ᐱᕈᖅᓴᓪᓗᓂ, ᐊᒻᒪᓗ ᖃᐅᔨᒪᓪᓗᓂ ᑲᑎᒐᐃᒻᒪᑕ, ᐊᖏᕐᕋᖅᓯᒪᒻᒪᑕ ᐊᒻᒪᓗ ᑭᓱᑐᐃᓐᓇᑦᑎᐊᓂᒃ ᐊᓂᒍᐃᔪᓐᓇᖅᑐᑎᒃ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.