ᖃᖓᑕᓲᒃᑯᕕᒻᒥᑦ ᒪᓕᒐᓕᕆᓂᕐᒧᑦ ᐃᓕᓐᓂᐊᕐᕕᒻᒧᑦ, ᓄᑲ ᐆᓪᓴᓐ-ᕼᐊᑯᖓᖅ ᐃᖏᕐᕋᓯᒪᓕᖅᑐᖅ. ᖃᖓᑕᓲᕐᒥ ᐱᔨᑲᑖᖑᕌᖓᒥ, ᐅᐸᒐᓱᒃᑕᒥᓄᑦ ᐅᐸᒐᓱᒃᑕᒥᓄᑦ ᑎᑭᖦᖢᓂ: ᒪᓕᒐᒃᑯᑦ ᐃᖅᑲᓇᐃᔮᖃᓕᖅᖢᓂ. ᓯᕗᓪᓕᖅ ᐊᑎᖓ ᑐᑭᖃᖅᐳᖅ ᓄᑲᖅᖡᑦ ᖃᑕᙳᑎᖏᑦ ᓄᑲᖓᓘᓐᓃᑦ ᐃᓄᐃᓐᓇᖅᑐᓐ/ᐃᓄᒃᑎᑐᑦ. ᔭᓗᓇᐃᒥ ᐃᓅᓚᐅᖅᓯᒪᔪᖅ, ᐃᖃᓗᒃᑑᑦᑎᐊᕐᒥ ᐱᕈᖅᓴᓚᐅᖅᓯᒪᓪᓗᓂ ᐃᖃᓗᖕᓂᓗ ᓄᓇᖃᖅᓯᒪᓕᖅᑐᖅ ᐊᕐᕌᒍᓄᑦ ᑕᓪᓕᒪᓄᑦ. ᑕᐃᑲᓂ ᓅᓚᐅᖅᓯᒪᔪᖅ ᓄᓇᕗᒻᒥ ᒪᓕᒐᓕᕆᔨᐅᓂᕐᒧᑦ ᐃᓕᓐᓂᐊᖅᑐᓂ ᐱᔭᕇᓚᐅᖅᑎᓪᓗᒍ ᐃᓄᓕᕆᔨᒃᓴᐅᓂᕐᒧᑦ ᐃᓕᓐᓂᐊᕈᑎᒥᒃ.

ᐱᔭᕇᑲᓴᓕᖅᑐᖅ ᐊᕐᕌᒍᒥᓂᒃ ᐋᑦᑯ ᓴᓇᖑᐊᕐᓂᕐᒧᑦ ᐃᓕᓐᓂᐊᖅᕕᖓᓂ ᐊᒻᒪᓗ ᓂᕆᐅᑦᑐᓂ ᑕᐃᔭᐅᓂᐊᕆᐊᒃᓴᖅ ᒪᓕᒐᓕᕆᔨᓄᑦ ᑕᒫᓂ ᐊᐅᔭᒥ. ᐊᓕᐊᓇᐃᒍᓱᑦᑎᐊᖅᑎᓪᓗᒍ ᓇᓂᔭᕆᐊᒃᓴᖅ ᐃᓕᓐᓂᐊᕐᓂᖓᑕ ᐊᖅᑯᑖᓂᒃ, ᐊᑯᓂᐅᓚᐅᖅᑐᖅ ᑎᑎᕋᕋᓱᒃᓗᓂ ᐃᓕᓐᓂᐊᒐᒃᓴᒥᒃ ᑕᐃᑲᓂ ᐱᒋᐊᕐᖢᓂᓗ. "ᐃᓕᓐᓂᐊᕐᕕᖕᒧᑦ ᐅᑎᕆᐊᒃᓴᖅ ᐊᔪᕐᓇᓚᐅᖅᑐᖅ. ᐱᔭᕇᕋᒪ ᐃᓕᓐᓂᐊᕐᕕᐊᓗᒻᒥᒃ, ᖃᐅᔨᒪᓚᐅᖏᑦᑐᖓ ᖃᓄᐃᓕᐅᕈᒪᒻᒪᖔᕐᒪ. ᓯᓚᑦᑐᖅᓴᕐᕕᖕᒥ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᓕᓵᖅᑐᓂᒃ ᐃᓕᓐᓂᐊᕈᒪᓚᐅᙱᑦᑐᖓ," ᐃᖅᑲᐅᒪᔪᖅ, ᐃᓕᓐᓂᐊᕆᐊᒃᑲᓐᓂᕆᐊᒃᓴᖅ ᐃᓱᒪᓪᓗᓂ 21−ᓂᒃ ᐅᑭᐅᖃᓕᖅᖢᓂ.

ᐊᑯᓐᓂᐊᓂᑦ, ᓂᐅᕕᖃᑦᑕᖅᑐᓄᑦ ᐱᔨᑦᓯᕋᖃᑦᑕᖅᑐᖅ, ᑲᐃᓪᓗᐊᕈᑎᒃᑯᑦ ᐅᓯᖃᑦᑕᖅᓱᓂᓗ ᕘᔅᑦ ᐃᐊᒃᑯᑦ ᐱᒋᐊᙵᓚᐅᖅᓯᒪᑦᓱᓂ ᐊᐅᔭᒃᑯᑦ ᐃᓕᓐᓂᐊᖅᑎᐅᓪᓗᓂ, ᓅᑦᓱᓂ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᒐᕙᒪᒃᑯᓐᓄᑦ ᓄᓇᕗᒻᒥ. ᐆᓪᓴᓐ−ᕼᐊᑯᖓᒃ ᐃᓕᓐᓂᐊᒃᑲᓐᓂᓚᐅᖅᐳᖅ ᐃᐊᑦᒪᓐᑕᓐᒥᑦ, ᖃᖓᑕᓲᒥᑦ ᐱᔨᑲᑖᖑᓕᖅᖢᓂ ᑲᓇᐃᑎᐊᓐ ᓄᐊᑦᑯᓐᓄᑦ.  ᐊᐅᓪᓚᓚᐅᖅᑐᖅ ᐃᐊᑦᒪᓐᑕᓐ ᐊᒻᒪ ᐃᖃᓗᒃᑑᑦᑎᐊᕐᒧᑦ ᐊᒻᒪ ᐃᒻᒥᓂᒃ ᐅᖃᐅᑎᓪᓗᓂ, "ᖃᖓᑕᓲᓕᕆᔨᒃᑯᓐᓄᑦ ᐃᖅᑲᓇᐃᔭᕈᒪᔪᖓ ᐃᒻᒪᖄ ᐅᑭᐅᓄᑦ ᑕᓪᓕᒪᓄᑦ, ᐃᓅᓯᕆᓚᐅᖅᑕᓐᓄᑦ ᐊᒻᒪ ᑖᓐᓇ ᐃᖅᑲᓇᐃᔮᖅ, ᐊᒻᒪ ᐃᓱᒪᑦᑎᐊᓕᖅᖢᖓ ᖃᓄᐃᓕᐅᕈᒪᖕᒪᖔᕐᒪ ᐃᓕᓐᓂᐊᕐᕕᖕᒧᑦ ᐅᑎᕐᓗᖓ."

ᑖᓐᓇ ᐱᕕᒃᓴᕆᑎᑕᐅᔪᖅ ᓱᒃᑲᒃᑎᒋᐊᖅᑎᑕᐅᓚᐅᖅᐳᖅ ᓄᖅᑲᖅᑎᑕᐅᕌᓪᓚᓚᐅᖅᑎᓪᓗᒍ ᐊᕐᕌᒎᒃ ᒪᕐᕉᒃ ᐊᓂᒍᖅᓯᒪᓕᖅᑑᒃ, ᓅᑎᖦᖢᒍ ᐳᓚᕋᖅᑐᓕᕆᓂᕐᒧᑦ ᐃᖅᑲᓇᐃᔮᕆᔭᒥᓂᒃ ᐅᑎᕐᓗᓂᓗ ᐃᓕᓐᓂᐊᕐᕕᖕᒧᑦ ᓯᕗᓂᑲᓪᓚᖓᒍᑦ ᐋᖅᑭᒃᑕᐅᓯᒪᕙᒌᖅᑐᒧᑦ.  ᖃᐃᕋᔮᖑᓚᐅᖅᐳᖅ "ᒥᑦᑐᖅ" ᐆᓪᓴᓐ-ᕼᐊᑯᖓᒃᒧᑦ. "ᓄᓇᒃᑰᕈᑎᖃᓚᐅᖅᑐᖓ. ᐊᑐᖅᑐᐊᓚᐅᕋᒪ ᐃᓪᓗᒥᒃ ᓇᒻᒥᓂᖅ ᐊᒻᒪᓗ ᐱᐅᔪᒻᒪᕆᒻᒥᒃ ᐊᑐᓚᐅᖅᑐᖓ. ᐃᖃᓗᑦᑑᑦᑎᐊᕐᒨᖃᑦᑕᓚᐅᖅᑐᖓ ᐃᐊᑦᒪᓐᑕᓐᒥᑦ ᐳᓛᕆᐊᕋᔪᒃᑲᒪ ᐃᓚᓐᓄᑦ. ᑕᒪᓐᓇ ᐱᐅᒋᓚᐅᖅᑕᕋ ᖃᓪᓗᓈᓃᙶᖅᓯᒪᓪᓗᖓ ᑭᓯᐊᓂ ᓄᓇᕗᒻᒦᒍᓐᓇᖅᑐᖓ ᐃᖅᑲᓇᐃᔮᕋ ᐊᑐᖅᑐᒍ ᐊᒻᒪᓗ ᐱᓇᓱᐊᕈᓯᐅᑉ ᓄᙳᐊᓂ ᓇᒻᒥᓂᖅ. ᑕᑯᓚᐅᖅᑕᕋ ᐃᕐᖐᓐᓈᕈᑎᒃᑯᑦ ᐅᖃᖅᑐᒥᒃ ᓄᖅᑲᖅᑎᑕᐅᓯᒪᓂᓐᓂᒃ ᐊᒻᒪᓗ ᐱᓇᓱᐊᕈᓰᒃ ᒪᕐᕉᒃ ᖃᐅᔨᒃᑲᖅᑕᐅᓯᒪᓪᓗᖓ. ᐊᖏᕐᕋᕋᒪ ᐃᓱᒪᑐᐃᓐᓇᕐᕋᒪ, 'ᖃᓄᐃᓕᐅᓕᖅᐳᖓᓕ ᒫᓐᓇ?'" ᐃᖅᑲᐅᒪᔪᖅ.

ᐃᓅᒐᓗᐊᖅᑐᓂ ᐱᕈᖅᓴᓚᐅᖅᑐᖅ ᐅᑭᐅᖅᑕᖅᑐᒥ, ᐱᔪᓐᓇᓚᐅᖏᑦᑐᖅ ᐃᓕᓐᓂᐊᑲᓐᓂᕐᓂᕐᒧᑦ ᐃᑲᔪᖅᑕᐅᓂᕐᒥᒃ ᐱᑦᔪᑎᒋᓪᓗᒍ ᓄᓇᖃᕈᓐᓃᓚᐅᕐᒪᑦ ᐃᐊᑦᒪᑕᓐᒥ ᓄᓇᖃᑦᑐᓂ ᐊᒻᒪᓗ ᐃᓱᒪᒋᔭᐅᓪᓗᓂ ᐋᓪᕘᑕᒥ. ᑕᐃᒪᐃᒃᑲᓗᐊᖅᑎᓪᓗᒍ, ᐃᓚᒥᓂᒃ ᐱᖃᑎᖃᕈᒪᑦᑎᐊᓚᐅᖅᑐᖅ, ᐊᑖᑕᒥᓂᒃ ᐱᖃᑎᖃᖅᖢᓂ, ᐃᖃᓪᓕᐊᖃᑎᒋᔪᒪᓪᓗᓂᐅᒃ ᐊᒻᒪ ᓄᓇᒦᖃᑕᐅᓪᓗᓂ. ᑕᒪᓐᓇ ᖁᕕᐊᒋᔭᖃᕐᓂᖅ ᐃᓱᒪᖃᓚᐅᖅᑐᖅ ᐃᓕᓐᓂᐊᕐᓂᕐᒥᒃ ᐊᕙᑎᐅᑉ ᐊᑐᖅᑕᐅᕙᓪᓕᕈᑎᖏᓐᓂᒃ ᑭᓯᐊᓂᓕ ᖃᐅᔨᔭᐅᓚᐅᖅᑐᖅ ᐃᓄᓕᕆᔨᓄᑦ ᐱᓕᕆᐊᓄᑦ ᐅᖃᓕᒫᒐᕋᓛᓂᒃ. ᐊᑦᔨᑐᐃᓐᓇᕆᓚᐅᖅᑕᖓ ᐃᖅᑲᓇᐃᔭᖃᑦᑕᖅᓯᒪᓂᖓᓄᑦ ᐊᒻᒪᓗ ᓄᓇᒥᓂᒃ ᐊᐅᓪᓚᕆᐊᖃᕋᓂ ᑕᐃᒪᐃᓚᐅᖅᑐᖅ.

ᐃᓕᓐᓂᐊᖅᑎᑦ ᐃᓅᓯᖏᑦ ᐋᖅᑭᒋᐊᖅᑕᐅᕐᔪᐊᓚᐅᖅᐳᑦ ᐊᐅᓚᑦᑎᔨᐅᑎᓪᓗᒋᑦ, ᐃᓂᒃᓴᓕᐅᖅᑕᐅᓪᓗᑎᒃ, ᐊᐃᓯᒪᓪᓗᑎᒃ ᐃᓕᓐᓂᐊᕈᑎᖏᑦ ᐊᒻᒪ ᐃᓕᓐᓂᐊᖅᑎᑕᐅᓪᓗᑎᒃ ᓄᓇᓕᖕᓂ ᐃᓅᖃᑎᒌᒍᓯᖏᓐᓂᒃ ᐊᒻᒪ ᐃᑲᔫᑎᒃᓴᖃᑦᑎᐊᙱᓐᓂᖏᓐᓂᒃ. ᑭᖑᓂᐊᒍᑦ, ᓅᖦᖢᑎᒃ ᖁᓕᓂᑦ ᐃᓕᓐᓂᐊᕐᑎᓂᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥᑦ 25−ᒧᑦ ᒪᓕᒐᓕᕆᓂᖕᒧᑦ ᐃᓕᓐᓂᐊᒐᒃᓴᖏᓐᓂᑦ, ᐊᒥᓲᓂᕐᓴᒻᒪᕆᐅᖅᑰᔨᓚᐅᖅᑐᑦ ᐊᔾᔨᐅᙱᑦᑐᓂᒡᓗ ᐱᓕᕆᐊᖃᖅᖢᑎᒃ. ᐅᖃᖃᑎᖃᕐᓂᖅ ᖃᑕᙳᑎᖏᓐᓂᒃ, ᐱᖃᓐᓇᕆᔭᖏᓐᓂᒃ, ᐃᓕᓴᐃᔨᓂᒡᓗ ᐃᑲᔪᓚᐅᖅᑐᑦ.

"ᒪᓕᒐᓕᕆᓂᕐᒧᑦ ᐃᓕᓐᓂᐊᕐᕕᒃ ᐊᔾᔨᒋᙱᒻᒪᒍ ᐃᓕᑦᑎᕙᓪᓕᐊᓂᖅ. ᐃᓛᓐᓂᒃᑯᑦ ᐅᖃᙳᐊᖃᑦᑕᖅᑐᖓ ᖃᓄᖅ ᐃᒃᐱᒍᓱᖕᒪᖔᕐᒪ ᖃᕋᓴᕋ ᐲᖅᑕᐅᓪᓗᓂ ᐅᖁᒃᓯᒪᓪᓗᓂᓗ ᐊᔾᔨᒋᙱᖦᖢᓂᐅᒃ ᐃᒋᑕᐅᒃᑲᓐᓂᓕᖅᐸᒃᖢᖓᓗ." ᐱᕕᒃᓴᒥᒃ ᐊᐅᓚᑦᑎᓂᖅ ᐱᔭᕆᐊᖃᕐᓂᖅᓴᐅᕗᖅ ᐅᖃᓕᒫᖅᑕᐃᓐᓇᕆᒐᒥᐅᒃ ᐊᒻᒪ ᐃᑲᔪᖅᑎᑖᖅᖢᓂ ᓇᖕᒥᓂᖁᑎᖃᕐᓂᕐᒧᑦ ᒪᓕᒐᒃᑯᑦ ᐊᔪᕐᓇᕐᓂᖅᓴᒃᑯᑦ ᕿᓂᕋᓱᒋᐊᒃᓴᖅ ᑲᖐᒋᔭᐅᔪᓂᒃ ᐊᒻᒪ ᐱᔾᔪᑕᐅᔪᓂᒃ. ᑖᓐᓇ ᐱᓕᕆᐊᖑᔪᖅ ᐊᕐᕌᒍᒃᑲᓐᓂᕐᒥᒃ ᖃᐅᔨᓴᕐᓂᖃᓚᐅᖅᐳᖅ ᒪᓕᒐᑎᒍᑦ ᖃᐅᔨᓴᖅᓯᓂᕐᒥᒃ, ᑎᑎᕋᕐᓂᕐᒧᑦ ᐊᔪᕈᓐᓃᖅᓴᒐᒃᓴᓂᒃ, ᐃᓕᑦᑎᕙᓪᓕᐊᓂᕐᒥᒃ ᓄᓇᕗᒻᒥ ᐊᖏᖃᑎᒌᒍᑕᐅᓯᒪᔪᒥᒃ, ᓄᓇᕗᒻᒥᐅᑦ ᖃᓄᐃᓕᐅᖅᐸᓚᐅᕈᓯᖏᓐᓂᒃ ᒐᕙᒪᒃᑯᓪᓗ ᐃᓅᖃᑎᒌᒃᐸᖕᓂᖏᓐᓂᒃ.

9-5-ᑎᑐᑦ ᐃᒡᓗᒌᒃᑎᓐᓇᓱᒃᖢᓂᐅᒃ. ᕿᒻᒥᒥᓂᒃ ᐱᖃᑎᖃᕈᓐᓇᖅᑎᑦᑎᓪᓗᓂ, ᐊᓂᔪᓐᓇᖅᑎᑦᑎᓪᓗᓂ ᐊᒻᒪ ᓯᐊᕐᕆᔭᐅᑎᑯᑖᒃᑰᖏᓐᓇᖅᖢᓂ, ᐃᖅᑲᓇᐃᔭᖅᖢᓂ ᐱᖃᓐᓇᕆᔭᒥᓃᑉᐸᒃᖢᓂᓗ ᐊᒻᒪ ᐊᓕᐊᓇᐃᒋᔭᒥᓂᒃ ᐱᖃᑎᖃᖅᖢᓂ. "ᒪᓕᒐᓕᕆᓂᕐᒧᑦ ᐃᓕᓐᓂᐊᕐᕕᒃ ᐃᖅᑲᓇᐃᔮᖑᔪᖅ ᑭᓯᐊᓂ ᐃᓅᓯᕆᙱᑕᕋ. ᐃᓅᓯᖃᖅᑐᖓ ᓯᓚᑖᓂ ᑖᔅᓱᒪ," ᐊᔾᔨᖃᖅᑐᖅ.

ᒪᒃᑯᖕᓂᖅᓴᓂᒃ ᐅᖃᐅᔾᔪᐃᔪᓐᓇᕈᓂ, ᓈᓚᒃᑲᔭᖅᑐᖅ ᐊᖓᔪᖅᑳᒥᓂᒃ ᑲᔪᖏᖅᓴᐃᔨᖏᓐᓂᒡᓗ. "ᐊᓈᓇᒐ ᐅᖃᐃᓐᓇᐅᔭᖅᑐᖅ 'ᐃᓕᓐᓂᐊᕈᑎᑦ ᓇᓗᓇᐃᖅᓯᕙᙱᖦᖢᑎᒃ ᐃᓕᖕᓂᒃ', ᐃᑲᔪᕐᔪᐊᕐᖢᓂᖓ ᐃᓕᓐᓂᐊᒃᑲᓐᓂᕐᓂᕐᒧᑦ ᐃᓕᓐᓂᐊᕐᓂᕐᓂ," ᐊᒥᖅᑳᖃᑎᖃᕐᖢᓂ. ᖃᑕᙳᑎᖏᑦ, ᐅᔪᕈᖏᑦ ᐅᔪᕈᖏᓪᓗ ᐱᔪᒃᓯᑎᑦᑎᔪᑦ, ᑕᐃᒪᐃᒃᑭᓪᓗᓂ ᒪᒃᑯᖕᓂᖅᓴᐃᑦ. "ᐃᓱᒪᒋᔭᕋ ᐅᓄᖅᑐᑦ ᓄᑕᕋᑦᑎᐊᕙᑦ, ᐅᔪᕈᒐ ᐊᒻᒪ ᐅᔪᕈᒐ ᑭᖑᕚᒃᓴᒃᑲᓗ, ᐱᕈᖅᐸᓪᓕᐊᔪᑦ, ᐃᖅᑲᓇᐃᔮᓪᓗ ᐱᓕᕆᐊᖑᔪᑦ ᓄᓇᕗᒻᒥ ᒫᓐᓇ ᐊᒃᑐᐊᓂᖃᕆᐊᖃᓕᖅᑐᑦ ᖃᓄᖅ ᐊᒃᑐᐃᓂᐊᕐᒪᖔᑦ ᐃᓅᓯᖏᓐᓂᒃ 20−ᓂᒃ ᐅᑭᐅᓂᒃ," ᐅᖃᙳᐊᖅᑐᖅ. 

ᐃᓄᐃᑦ ᒪᒃᑯᒃᑐᑦ ᐊᖏᕐᕋᕈᒪᓕᕌᖓᑕ ᐃᖅᑲᓇᐃᔭᕆᐊᕐᓗᑎᒃ ᐃᓕᓐᓂᐊᕐᓗᑎᒃᓘᓐᓃᑦ, ᐅᖃᕈᓐᓇᖅᓯᔪᖅ ᓯᓚᑐᓂᕐᒥᓂᒃ, "ᐊᖏᕐᕋᐃᑦ ᑕᐃᑲᓃᖏᓐᓇᕐᓂᐊᖅᑐᖅ. ᐊᑖᑕᒪ ᐅᖃᐅᑎᖃᑦᑕᓚᐅᕐᒪᖓ, 'ᐊᖏᕐᕋᐃᑦ ᑕᒫᓃᖏᓐᓇᐅᔭᕐᓂᐊᖅᑐᖅ. ᐃᖃᓗᒃᑑᑦᑎᐊᖅ ᓇᒧᙵᐸᓪᓕᐊᖏᒻᒪᑦ.' ᐱᐅᕗᖅ ᐱᒋᐊᖅᑎᑦᑎᓗᓂ ᐊᒻᒪ ᐊᑐᕆᐊᒃᓴᖅ ᐃᓅᓯᖕᒥᑦ, ᐊᓯᐊᓂ ᓄᓇᓕᖕᓂ ᐅᕝᕙᓘᓐᓃᑦ ᓄᓇᓕᐸᐅᔭᕐᒥ ᐅᕝᕙᓘᓐᓃᑦ ᐊᖏᓂᖅᓴᒥ ᓄᓇᓕᐸᐅᔭᕐᒥ, ᑕᑯᓗᓂᓗ ᑭᓱ ᓈᒻᒪᖕᒪᖔᑦ ᐃᓅᓯᕐᓄᑦ ᑭᓱᓄᓪᓗ ᐊᓕᐊᓇᐃᒋᔭᕐᓄᑦ." ᐱᐅᓛᒥᒃ ᑲᐱᔭᐅᖁᔨᕗᖅ ᐊᖏᕐᕋᕈᓐᓇᐃᓐᓇᐅᔭᕋᕕᑦ. ᐆᓪᓴᓐ−ᕼᐊᑯᖓᒃ ᐃᓱᒪᐃᓐᓇᐅᔭᖅᑐᖅ ᐊᓂᒃᐸᑦ ᐅᑎᕋᔭᙱᖦᖢᓂ ᑭᓯᐊᓂ ᑕᐃᒪᐃᓚᐅᖅᑐᖅ. ᐊᕐᕌᒍᑦ ᑕᓪᓕᒪᑦ ᐊᓂᒍᖅᑎᓪᓗᒋᑦ ᐃᖃᓗᖕᓂ, ᐊᖏᕐᕋᖅᓯᒪᖅᑰᔨᓕᕐᓇᕐᒪᑦ, ᐅᑭᐅᖅᑕᖅᑐᒥᓗ ᐊᑲᐅᒃᓴᖅᖢᓂ. 

ᓄᑲ ᐆᓪᓴᓐ−ᕼᐊᑯᖓᖅ ᒥᑦᑕᕐᕕᓕᐊᖅᓯᒪᑎᓪᓗᒍ ᒪᓕᒐᓕᕆᓂᕐᒧᑦ ᐃᓕᓐᓂᐊᕐᕕᖕᒧᑦ ᐊᖏᕐᕋᐅᕙᓪᓕᐊᖃᑕᐅᓯᒪᔪᖅ ᐱᓱᒡᕕᒋᓂᐊᓕᖅᖢᓂᐅᒃ. ᓄᑖᓂᒃ ᐃᓕᑦᑎᕙᓪᓕᐊᓪᓗᓂ ᐊᒻᒪᓗ ᐃᒻᒥᓂᒃ ᑲᒪᒋᑦᑎᐊᖅᖢᓂ, ᖁᕕᐊᒋᔭᖃᖅᑐᖅ ᐃᓅᓯᖓᓂᒃ ᐅᑭᐅᖅᑕᖅᑐᒥ, ᐊᐅᓚᑕᐅᓪᓗᓂ ᒪᒃᑯᒃᑐᑦ ᓄᓇᒋᔭᖏᓐᓂ. ᓂᕆᐅᒋᓚᐅᖅᑕᒥᓂᒃ ᑕᐃᒪᐃᓚᐅᖅᑐᒃᓴᐅᔫᒐᓗᐊᖅ, ᑭᓯᐊᓂ ᖃᐅᔨᓚᐅᖅᑐᖅ ᖃᖓᑕᔪᒪᔭᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.

ᑎᓯᐱᕆ 2022−ᒥ ᓄᑖᙳᕆᐊᖅᓯᒪᔪᑦ: ᓄᐊᑲ ᐱᐊᓂᒃᓯᓚᐅᖅᐳᖅ ᑎᑎᕋᓚᐅᖅᑕᒥᓂᒃ ᔫᓂᒥ ᐊᒻᒪ ᒪᓕᒐᓕᕆᔨᒧᑦ ᐅᖃᓗᒡᕕᐅᓚᐅᖅᖢᓂ ᓯᑎᐱᕆ 14, 2022−ᒥ. ᓄᑦᑎᖅᓯᒪᓕᖅᑐᖅ ᐊᖏᕐᕋᒧᑦ ᕿᑎᕐᒥᐅᓄᑦ.