ᐃᖅᑲᓇᐃᔭᐃᓐᓇᖅᐸᓚᐅᖅᑐᖅ ᐃᑉᒥᒃ ᐊᒻᒪᓗ ᐃᖏᕐᕋᓂᖓᓂᒃ ᐃᒪᐅᑉ ᐊᒻᒪᓗ ᐃᓕᑉᐸᑦᑐᓂ ᐃᖏᕐᕋᓂᕐᒥᒃ ᑕᕐᕆᔭᓕᐅᕐᓂᕐᒥᒃ. ᐱᑐ ᕉᒧ ᓂᔅᒐ'a ᐊᒻᒪ Frisian−ᒥᐅᑕᖅ, ᐃᓚᒋᔭᐅᔪᖅ ᐊᒪᕈᐃᑦ ᐃᓐᓈᕈᖏᓐᓂᒃ ᐊᑎᑐᖃᖓᓗ ᑐᑭᖃᖅᖢᓂ 'ᕿᔪᐊᕐᔪᒃ ᐊᓗᒡᕕᒃ'. ᐊᑖᑕᖓᑕ ᓴᓂᐊᓃᖦᖢᓂ, ᖃᑕᙳᑎᖏᑦ ᐱᖅᑯᓯᑐᖃᒃᑯᑦ ᐃᒫᓃᑉᐸᓚᐅᖅᐳᑦ. ᕉᒧ ᐱᕈᖅᓴᓚᐅᖅᑐᖅ ᑮᓇᐅᔭᓕᐅᕋᓱᖕᓂᕐᒧᑦ ᐃᖃᓗᒐᓱᖕᓂᕐᒧᑦ ᐅᒥᐊᒃᑯᑦ ᖃᑕᙳᑎᖏᓪᓗ ᐃᖃᓗᒐᓱᒃᖢᑎᒃ ᐱᖓᖕᓇᖅᐸᓯᐊᓂ ᓯᒡᔭᖓᓂ ᕚᓐᑰᕗᒥ. ᐃᖃᓗᓚᐅᖅᑐᑦ ᐃᖃᓗᒃᓯᐅᖅᑐᑎᒃ ᐊᒻᒪᓗ ᐆᒐᕐᒥᒃ ᐱᔭᕇᕋᓱᐊᕐᓂᖓᓂ ᐊᒻᒪᓗ ᐊᑖᑕᖓ ᓄᖅᑲᖅᑐᓂ, ᐅᒥᐊᕐᒦᖏᓐᓇᖅᑐᓂ. ᓯᒡᔭᓕᐊᕋᒥ ᓅᖦᖢᓂᓗ ᑲᓇᖕᓇᖓᓄᑦ ᕚᓐᑰᕗᒧᑦ ᑕᑯᓇᓱᒃᖢᓂ ᑭᓱᒃᑲᓐᓂᕐᒥᒃ ᐃᓅᓯᖃᕈᒪᖕᒪᖔᑦ.

ᐅᓪᓗᒥ, ᕉᒧ ᐱᓕᕆᖃᑦᑕᖅᑐᖅ ᓄᓇᖃᖅᑳᖅᓯᒪᔪᓄᑦ ᓄᓇᓕᒻᒥ ᑐᓴᐅᒪᑎᑦᑎᔨᐅᓪᓗᓂ ᑕᕆᐅᕐᔪᐊᒥ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᒃ ᑲᓇᑕᒥ, ᐱᓕᕆᖃᑎᒌᒃᐸᓪᓕᐊᑎᑦᑎᓂᕐᒥᑦ ᑲᑐᔾᔨᖃᑎᒌᓂᑦ ᓄᓇᖃᖅᑳᖅᓯᒪᔪᓂᓪᓗ ᓄᓇᓕᓐᓂᑦ. ᐊᒥᓱᑦ ᓄᓇᓖᑦ ᐊᑦᑐᐊᓂᖃᕇᖅᑐᑦ ᑎᑎᖅᑲᖁᑎᒥᒍᑦ ᐃᖅᑲᓇᐃᔮᖏᑎᒍᑦ, ᑕᒪᓐᓇ ᐱᕙᓪᓕᐊᓯᒪᔪᖅ ᐃᓕᓐᓂᐊᑲᓐᓂᕐᓂᒃᑯᑦ ᐊᑐᐃᓐᓇᐅᑎᑕᐅᑦᓱᓂ ᐃᖃᓗᒐᓱᑦᑎᐅᓪᓗᓂ. ᐊᕐᕌᒍᒥᒃ ᐊᑕᐅᓯᕐᒥᒃ ᐃᓕᓐᓂᐊᓚᐅᖅᑐᖅ ᕖᓚᓄ ᓯᓚᑦᑐᖅᓴᕐᕕᒡᔪᐊᖓᓂ ᐊᕐᕌᒍᓄᑦ ᐊᕙᑎᓄᑦ ᐃᖅᑲᓇᐃᔭᓕᖅᖢᓂ, ᓄᓇᖃᖅᑳᖅᓯᒪᔪᓂᒃ ᑕᕐᕆᔮᒃᓴᓂᒃ ᐃᓕᓴᐃᓪᓗᓂ.  

ᐱᒋᐊᓕᓚᐅᖅᑐᖅ ᑕᓚᕖᓴᒃᑯᑦ ᖁᓛᓂ ᓴᓂᓪᓕᖓᓂ ᐃᖅᑲᓇᐃᔭᓚᐅᖅᑐᖅ ᕚᓐᑰᕗᒥ ᑕᓚᕕᓴᒃᑯᓐᓄᑦ ᐅᖃᐅᑎᓪᓗᓂᐅᒃ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᖅ ᓄᓇᖃᖅᑳᖅᓯᒪᔪᑦ ᑕᓚᕖᓴᒃᑰᖅᑎᑕᐅᑎᓪᓗᒋᑦ ᓯᕗᓪᓕᖅᐹᒥ ᐅᓂᒃᑳᖅᑐᖅ ᓴᖅᑭᓚᐅᖏᒻᒪᑦ. ᕉᒧ ᒥᖦᖢᓂ ᐃᖅᑲᓇᐃᔮᒧᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᖢᓂ, ᐱᕕᖃᕐᖢᓂ ᐊᒥᖅᑳᖃᑎᖃᕐᓂᕐᒥᒃ ᐱᒻᒪᕆᐅᔪᓂᒃ ᐅᓂᒃᑳᓂᒃ ᓴᓇᙳᐊᕐᓂᕐᒧᑦ, lacrosse, ᐊᒻᒪ ᐅᖃᐅᓯᕐᒧᑦ ᓴᖅᑭᑎᑦᑎᒃᑲᓐᓂᕐᓂᕐᓂ. ᐊᑕᐅᓯᐊᖅᑐᓂ, ᖃᐅᔨᒪᓚᐅᓐᖏᓚᖅ ᐃᖅᑲᓇᐃᔭᕐᓂᕐᒪᖔᖅ ᐊᐅᔭᒃᑯᑦ ᐃᖅᑲᓇᐃᔮᖃᓕᓚᐅᖅᑐᖅ ᐅᒥᐊᕐᔪᐊᒃᑯᑦ ᐳᓚᕋᑦᑎᓂᑦ ᐊᒻᒪᓗ ᓄᖅᑲᕆᐊᖃᓚᐅᖅᑐᓂ ᑐᔪᕐᒥᔪᖅ ᐃᖅᑲᓇᐃᔭᒃᑲᓐᓂᖅᑎᑕᐅᑎᓪᓗᒍ. ᐃᖅᑲᓇᐃᔭᖅᑎᑕᐅᓕᓚᐅᖅᑐᖅ ᐅᓪᓗᓕᒫᖅ ᓴᖅᑭᑎᑦᑎᔨᐅᓪᓗᓂ ᐊᒻᒪᓗ ᐊᕐᕌᒍᑦ ᖁᓕᑦ ᐊᓂᒍᖅᑎᓪᓗᒋᑦ ᖁᑦᑎᖕᓂᖅᓴᒥᑦ ᓴᖅᑭᑦᑎᔨᙳᖅᖢᓂ. ᑕᑯᒃᓴᐅᑎᑦᑎᓂᖅ ᓵᓚᒃᓴᓚᐅᖅᑐᖅ ᐊᒥᓱᓂᒃ ᑐᓐᓂᖅᑯᓯᐊᓂᒃ ᑭᓯᐊᓂ ᐲᖅᑕᐅᓚᐅᖅᑐᖅ ᐱᐅᓪ ᑐᓴᐅᒪᔪᓕᕆᔨᒃᑯᓐᓄᑦ ᐋᖅᑭᒃᓱᖅᑕᐅᒃᑲᓐᓂᕐᓂᖓᓄᑦ.

ᓯᕗᓪᓕᖅᐹᖅ ᐅᓂᒃᑳᖅᑐᐊᖅ ᒪᑐᓕᖅᑎᓪᓗᒍ, ᕌᒧ ᓱᓕ ᑕᓚᕖᓴᒃᑰᖏᓐᓇᖅᐳᖅ, ᓴᖅᑭᑦᑎᓪᓗᓂ ᐱᓕᕆᐊᒃᓴᕆᔭᐅᔪᓂᒃ APTN−ᑯᓐᓂ, ᓴᖅᑭᑦᑎᓪᓗᓂ ᒪᕐᕉᖕᓂᒃ ᓰᕖᓰᒃᑯᑦ ᐅᖃᓕᒫᒐᖏᓐᓂᒃ, ᐊᑕᐅᓯᖅ ᓄᖑᔪᐃᑦᑐᒥᒃ ᐅᔭᕋᖕᓂᐊᕐᓂᖅ ᓴᔅᑳᑦᓱᐋᓐᒥ ᐊᒻᒪ ᐊᐃᑉᐸᖓ ᐃᓕᓐᓂᐊᕐᓂᖅ ᖃᓂᒻᒪᒍᑕᐅᕙᓪᓕᐊᑎᓪᓗᒍ. ᑐᒃᓯᕋᐅᑎᓂᒃ ᐱᓯᒪᔪᖅ ᐱᕙᓪᓕᐊᒍᑎᓂᒃ ᓄᑖᓄᑦ ᐱᓕᕆᐊᓄᑦ ᑲᔪᓯᑎᓪᓗᒍ ᐅᓪᓗᖓᓂ ᐃᖅᑲᓇᐃᔮᒥᓂᒃ.

ᑲᙳᓱᓕᕋᒥ, ᕌᒧ ᖃᐅᔨᓚᐅᖅᑐᖅ ᑲᑎᖃᑎᖃᕈᓐᓇᕐᓂᕐᒥᓂᒃ ᓄᓇᓕᖕᓂ ᐃᖃᓪᓕᐊᖅᓯᒪᑎᓪᓗᒍ. ᑲᑐᔾᔭᐅᓪᓗᓂ ᐊᒻᒪ ᐅᒃᐱᕐᓇᖅᑑᓪᓗᓂ, ᐅᖃᓪᓚᒍᓐᓇᑦᑎᐊᓚᐅᖅᑐᖅ ᐊᒻᒪ ᕌᒧ ᐱᐅᓯᕚᓪᓕᕈᓐᓇᓚᐅᖅᖢᓂ. ᑕᕆᐅᑉ ᐊᑭᐊᓂᙶᖅᑐᓂᒃ ᕿᓂᖅᑎᓪᓗᒍ ᖁᓱᔪᓐᓃᖅᐹᓪᓕᖅᑎᑦᑎᓚᐅᕆᕗᖅ. "ᑎᓕᐅᕆᖏᓐᓇᐅᔭᖅᑐᖓ ᑭᓇᒥᑭᐊᖅ, ᐊᐅᓪᓚᕈᓐᓇᖅᐸᑕ, ᖃᐳᐊᑲᑕᒍᓐᓃᕐᓗᑎᑦ ᐅᔾᔨᕈᓱᓕᕐᓗᑎᓪᓗ ᖃᔅᓯᑦ ᐊᓯᖏᑦ ᓄᓇᐃᑦ ᐊᔾᔨᒌᙱᕐᔪᐊᕐᒪᖔᑕ, ᖃᐅᔨᒪᕕᑦ? ᐊᔾᔨᒌᖏᓐᓇᑦᑎᐊᖑᒋᕗᑦᑕᐅᖅ," ᐱᖃᖃᑕᐅᕗᖅ.

ᐊᑖᑕᖓᑕ ᐅᓂᒃᑳᕈᓐᓇᑦᑎᐊᕐᓂᖓᓄᑦ, ᐅᖃᐅᓯᖃᖅᖢᓂ ᖃᐅᔨᒪᔭᒥᓂᒃ ᐊᔾᔨᒌᙱᑦᑐᓂᒃ ᓄᓇᙳᐊᒃᑯᑦ, ᐱᕈᖅᓴᓚᐅᖅᑎᓪᓗᒍᓗ ᓈᓚᒃᖢᓂ ᐃᓐᓇᖏᓐᓂᒃ ᐊᓈᓇᑦᑎᐊᖓᓂᒡᓗ, ᕉᒥᐅᑉ ᖃᑕᙳᑎᖏᑦ ᐃᑲᔪᓚᐅᖅᐳᑦ ᐱᓕᕆᑦᑎᐊᕐᓂᖓᓄᑦ. ᓈᓚᒃᑐᒋᑦ ᐃᖃᓗᒐᓱᒃᑏᑦ ᐅᓂᒃᑳᖏᑦ ᐃᓅᓯᖓᑕ ᐃᓚᒋᓚᐅᕐᒥᔭᖓ. ᐃᓚᒋᔭᐅᖃᑕᐅᓪᓗᓂ ᐱᓪᓚᑦᑖᖑᓂᕐᒧᑦ ᐱᓕᕆᐊᒧᑦ ᐃᓕᓐᓂᐊᕐᕕᐊᓗᒻᒥ ᐃᑲᔪᕐᓂᖃᓚᐅᕐᒥᔪᖅᑕᐅᖅ.

ᐅᖃᐅᔾᔨᒋᐊᕐᓂᖓ ᑭᓇᑐᐃᓐᓇᕐᒧᑦ ᐃᓱᒪᔪᒧᑦ ᑕᕐᕆᔭᓕᐅᕐᓂᕐᒧᑦ ᐅᕝᕙᓘᓐᓃᑦ ᐊᐅᓪᓚᓂᕐᒧᑦ, "ᑕᒪᒃᑯᐊ ᐱᕕᓴᖃᖅᑎᑕᐅᑎᓪᓗᒋᑦ, ᑎᒍᒋᐊᖃᖅᑕᑎᑦ. ᐃᓕᓐᓂᐊᖅᑎᑕᐅᓚᐅᕋᒪ ᐋᒡᒑᖁᔭᐅᓇᖓ, ᖃᐅᔨᒪᓚᐅᕋᓗᐊᖅᑐᖓ ᐊᒃᓱᕈᕐᓇᕈᓐᓇᕆᐊᖓᓂᒃ. ᐊᒃᓱᕈᕐᓇᖅᑑᑎᓪᓗᒍ, ᑐᑭᖃᕐᒪᑦ ᐱᐅᓂᖓᓂᒃ, ᐊᒻᒪᓗ ᐸᒡᕕᒍᓱᒃᑯᕕᑦ, ᑐᑭᖃᕐᒪᑦ ᐃᒃᐱᒍᓱᖕᓂᕐᓂᒃ. ᑕᒪᒃᑯᐊ ᐊᒃᓱᕈᕐᓇᖅᑐᑦ ᐊᖏᓂᖅᐸᐅᓂᐊᖅᑐᑦ ᐃᓅᓯᕐᓂ ᐊᒻᒪᓗ ᐃᓛᓐᓂᒃᑯᑦ ᐃᓂᑦᑎᐊᕙᐅᙱᑐᐃᓐᓇᕆᐊᖃᖅᑐᑎᒃ, ᑭᓯᐊᓂᓕ ᓇᒧᒃᑭᐊᖅ ᐃᓱᒪᓕᓚᐅᖅᐳᑎᑦ ᑭᖑᓪᓕᕐᒥ ᐱᕕᖃᓕᕆᐊᒃᓴᖅ." ᖁᕕᐊᒋᓚᐅᙱᓐᓇᒥᐅᒃ ᐃᖅᑲᓇᐃᔭᕆᐊᒃᓴᖅ ᐅᒥᐊᕐᔪᐊᒥ, ᑕᑯᔪᒪᑦᑎᐊᓚᐅᖅᑐᖅ ᑲᑉᐲᓐᒥᑦ. ᐊᑕᐅᑦᑎᒃᑯᓪᓗ, ᖁᕕᐊᓱᓚᐅᖅᑐᖅ ᑕᕐᕆᔭᓕᐅᒃᑲᓐᓂᕆᐊᒃᓴᖅ.

ᐱᓕᕆᐊᖃᖅᖢᓂ ᑎᑎᕋᖅᓯᒪᔪᓂᒃ ᐱᕕᒃᓴᕆᑎᑕᐅᔪᓂᒃ ᐃᖅᑲᓇᐃᔭᖅᑎᕈᖅᓴᓂᖅ ᐊᒃᓱᕈᕐᓇᓚᐅᖅᐳᖅ ᖃᐅᔨᒪᐃᓐᓇᖅᐸᙱᖦᖢᓂᓗ ᑲᔪᓯᓂᖃᑦᑎᐊᕋᔭᕐᒪᖔᑦ ᑭᓯᐊᓂ ᑲᔪᓯᓂᖃᑦᑎᐊᓚᐅᖅᐳᖅ.

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᑲᒪᒋᔭᖃᙱᑦᑐᓄᑦ ᐃᓚᒌᓄᑦ ᐅᕝᕙᓘᓐᓃᑦ ᐃᒡᓗᖁᑎᑖᕋᓱᖕᓂᕐᒧᑦ ᓄᓇᖁᑎᑖᕋᓱᖕᓂᕐᒧᑦ ᐊᑭᓕᒃᓴᖓ, "ᖃᐅᔨᓴᒃᑲᓐᓂᕆᑦ. ᐊᓂᓗᑎᑦ, ᐊᔪᙱᒃᑲᓗᐊᕐᓗᑎᑦ, ᐊᐱᕆᓗᑎᑦ ᐅᓄᖅᑐᓂᒃ ᐊᐱᖅᑯᑎᓂᒃ ᐱᔪᓐᓇᕐᓂᓕᒫᕐᓂᒃ, ᑲᑉᐱᐊᓱᙱᓪᓗᑎᑦ ᐊᒥᖅᑳᖃᑎᖃᕆᐊᒃᓴᖅ ᑲᑉᐱᐊᒋᔭᕐᓂᒃ ᐊᒃᓱᕈᕐᓇᖅᑐᓂᒃᓗ ᐊᑐᕐᑕᕐᓂᒃ, ᓲᖃᐃᒻᒪ ᖃᐅᔨᓂᐊᕋᕕᑦ ᐃᓄᐃᑦ ᐃᑲᔪᕈᒪᐃᓐᓇᐅᔭᕐᓂᖏᓐᓂ ᐃᑲᔪᕐᓗᒋᓪᓗ ᑐᑭᒧᐊᒃᑎᓪᓗᑎᑦ ᐱᐅᔪᒃᑯᑦ ᑐᕌᕋᓱᒃᓗᑎᑦ. ᐱᐅᔪᒥᒃ ᐃᒃᐱᒍᓱᐃᓐᓇᕐᓗᑎᑦ ᐊᒻᒪ ᖁᕕᐊᓱᒃᑎᑦᑏᓐᓇᕐᓗᑎᑦ, ᐊᒻᒪ ᐃᓕᖅᑯᓯᖃᑦᑎᐊᖏᓐᓇᕐᓗᑎᑦ." ᓇᓗᓇᐃᖅᓯᓚᐅᖅᑐᖅ ᐃᓕᖅᑯᓯᕆᖃᑦᑕᖅᑕᖏᓐᓂᒃ ᑐᓂᔭᐅᖃᑦᑕᕐᓂᓕᒫᖏᓐᓂᒃ ᐊᒻᒪᓗ ᐊᑭᓖᓪᓗᓂ ᑕᐃᒃᑯᓂᖓ ᐊᓯᒥᓄᑦ ᑐᓂᓯᓪᓗᓂ ᐊᒻᒪᓗ ᓇᒻᒥᓂᖃᑦᑎᐅᓕᖅᑐᓂ.

ᑲᔪᓯᑎᑦᑐᒪᓪᓗᒍ ᐃᓱᒪᒃᑯᑦ ᖃᓄᐃᙱᑦᑐᓐᓇᕐᓂᖓ, ᕌᒧ ᐱᓱᔪᒍᒪᕙᒃᐳᖅ, ᓄᓇᒧᐊᕐᓗᓂ ᐃᒫᓃᓪᓗᓂᓗ. ᖁᕕᐊᒋᔭᖃᖅᑐᖅ ᐃᓱᒪᒃᓴᖅᓯᐅᕐᓂᕐᒥᑦ, ᐊᒻᒪᓗ ᓴᒃᑯᑦᑎᓂᕐᒥᑦ ᐱᔨᑦᑎᕋᙱᑕᖏᓐᓂᑦ. ᐱᓲᑎᑦ ᐳᐃᔾᔪᕋᕐᓃᓪᓗ ᐊᓕᐊᓇᐃᒋᔭᖏᑦᑕᐅᖅ ᑖᔅᓱᒧᖓ. ᐊᔪᓕᖅᓯᒪᖅᑰᔨᒐᓗᐊᖅᖢᓂ, ᐃᓱᒪᒥᓂᒃ ᑲᒪᓇᓱᐃᓐᓇᓲᖅ. "ᓂᐱᖃᕈᓘᔭᓕᖃᑦᑕᖅᐲᑦ, ᑭᓯᐊᓂ ᖃᓄᐃᙱᓚᖅ, ᓱᓕᕚ? ᑕᒪᓐᓇ ᐃᓅᓯᐅᑉ ᐃᓚᒋᒻᒪᒍ, ᐊᒻᒪᓗ ᐃᒻᒥᓂᒃ ᓵᓚᒋᑦᑕᐃᓕᒋᑦ ᑕᒪᒃᑯᓂᖓ. ᐃᓅᓯᖅ ᓇᐃᓗᐊᖅᑐᖅ. ᐃᓅᓯᖅ ᐊᓐᓂᕐᓇᓗᐊᖅᐳᖅ," ᐅᖃᐅᔾᔨᕗᖅ.

ᐱᓕᕆᖃᑎᖃᖅᖢᓂ ᐃᒪᕕᖕᒥ ᐊᒻᒪ ᑰᒃᐸᓪᓕᐊᔪᒥᒃ ᐃᒫᓂ, ᑲᑎᙵᖃᑎᖃᖅᖢᓂ ᓄᓇᓕᖕᓂ ᓴᓂᑦᑎᐊᖓᓂ ᐊᒻᒪ ᐃᖏᕐᕋᓪᓗᓂ ᑕᕐᕆᔭᐅᓯᐅᖅᑎᓂᒃ, ᐱᑐ ᕉᒧ ᖃᐅᔨᓯᒪᕗᖅ ᐱᓱᒡᕕᒋᔭᒥᓂᒃ ᓄᓇᒥ ᐃᒪᕐᒥᓗ. ᐅᓂᒃᑳᑲᑕᒃᖢᓂ ᐃᖃᓗᒐᓱᒃᑎᐅᓪᓗᓂ, ᐅᓂᒃᑳᖅᑎᐅᓪᓗᓂ ᐊᒻᒪ ᓄᓇᓕᖕᓂ ᑐᓴᐅᒪᑎᑦᑎᔨᐅᓪᓗᓂ, ᐃᓄᖕᓂᒃ ᑲᑎᑎᑦᑎᖃᑦᑕᖅᓯᒪᕗᖅ ᐅᓂᒃᑳᖅᖢᓂ ᐃᓅᓯᓕᒫᒥᓂᒃ. ᐱᐅᔪᒥᒃ ᐃᓕᖅᑯᓯᖃᖅᖢᓂ, ᐱᓇᔪᒍᒪᑦᑎᐊᓲᖅ ᐊᒻᒪ ᓴᖅᑭᓐᓇᖃᑦᑕᖅᑕᖓ, ᖃᐅᔨᒪᔭᐅᑦᑎᐊᓕᕐᓇᖅᐳᖅ ᐊᒻᒪ ᐊᖅᑯᑎᑦᑎᐊᕙᐅᓪᓗᓂ ᐹᖏᑦ ᖃᓂᒃᑲᓗᐊᖅᑎᓪᓗᒋᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ!