"ᓴᖅᑭᑦᑎᓂᖅ ᐅᕙᓐᓄᑦ ᐱᒻᒪᕆᐅᕗᖅ. ᐅᖃᑲᐃᓐᓇᕐᓚᖓ, ᖁᕕᐊᓱᓐᓂᐊᖅᑐᖓ," ᐳᕆᓯᓚ ᕘᓚᐃ, ᐱᖓᔪᒋᔭᐅᓪᓗᓂ ᓴᓇᓐᖑᐊᖅᑎᐅᔪᖅ ᑐᒃᑑᔮᖅᑐᒥᐅᑕᒃᓴᔭᖅ ᑭᓯᐊᓂᓕ ᒫᓐᓇ ᑳᓪᒍᕆᒥ ᓄᓇᖃᓕᖅᑐᖅ.  ᐳᐊᓚᐃ ᐱᕈᖅᓴᓚᐅᖅᑐᖅ ᑕᐅᑐᒃᖢᓂ 13-ᓂᒃ ᖃᑕᙳᑎᖏᓐᓂᒃ ᓴᓇᙳᐊᖅᑕᒥᓂᒃ ᑎᒍᓪᓗᓂᐅᒡᓗ ᖁᕕᐊᒋᓪᓗᒍ. ᖃᑕᙳᑎᖏᑦ ᐱᓕᕆᖃᑎᒌᒃᐸᒃᑐᑦ ᒫᓐᓇᓗ ᐃᓕᓴᐃᓕᖅᖢᑎᒃ ᒪᒃᑯᒃᑐᖁᑎᒥᓂᒃ. ᓴᓇᐅᒐᓕᐅᖅᖢᓂ, ᐊᑐᓲᖅ ᐱᖁᑎᓂ ᐅᒥᖕᒪᖕᓂᑦ, ᐅᒃᑯᓯᒃᓴᓂᑦ, ᓇᒡᔪᖕᓂᑦ ᐊᕐᕕᐅᑉ ᓴᐅᓂᖏᓐᓂᑦ ᓇᒃᓯᐅᔾᔭᐅᓲᑦ ᐃᓚᒥᓄᑦ ᐱᖃᓐᓇᕆᔭᒥᓄᓪᓗ ᐅᑭᐅᖅᑕᖅᑐᒥᑦ. 

ᓴᓇᙳᐊᕐᓂᖅ ᐊᖅᑯᑎᒋᔭᐅᓚᐅᖅᐳᖅ ᕘᓚᐃ ᓂᕈᐊᖅᑕᐅᓪᓗᓂ ᓄᑲᖅᖠᖅᐹᖅ ᐸᓂᖓ ᐊᖏᕐᕋᖅᓯᒪᔪᒪᓕᖅᖢᓂ. ᑲᔪᓯᑎᑦᑎᔪᒪᓚᐅᖕᒥᔪᖅᑕᐅᖅ ᐊᑖᑕᑦᑎᐊᒥᓂᒃ ᐃᓕᓴᐃᓚᐅᖅᑐᖅ ᕿᑐᕐᖓᒥᓂᒃ ᓴᓇᙳᐊᕐᓂᕐᒥᒃ. ᐊᖏᕐᕋᒥᓂᒃ ᐊᒻᒪᓗ ᐃᓚᐅᔪᓐᓇᙱᖦᖢᓂ ᐃᓕᖅᑯᓯᕐᒥᓂᒃ ᑕᐃᒪᓐᓇᑦᑕᐃᓐᓇᖅ, ᓴᓇᙳᐊᕐᓂᖅ ᐱᑎᑦᑎᕙᒃᐳᖅ ᐅᓂᒃᑳᖅᑐᐊᒥᓂᒃ. ᐃᓄᒃᓱᐃᑦ ᒥᒃᓵᓄᑦ ᐃᓕᓐᓂᐊᖅᑎᑦᑎᖃᑦᑕᖅᐳᖅ, ᕿᓚᓗᒐᕋᓱᖕᓂᕐᒥᒃ, ᐊᐃᕕᕐᓂᒃ ᐊᒻᒪ ᑑᒑᖏᓐᓂᒃ, ᐊᒻᒪ ᐅᒥᖕᒪᖏᓐᓂᒃ. ᓯᓚᑐᓂᖓ ᑐᓂᖃᑦᑕᖅᑕᖓ ᓴᖅᑭᑎᑦᑎᔾᔪᑕᐅᓇᓱᒃᐳᖅ ᐃᓕᖅᑯᓯᑐᖃᕐᓄᑦ ᐊᑕᓂᕆᔭᐅᔪᓂᒃ ᓄᑕᖅᑲᒥᓄᑦ. "ᐃᓅᓪᓗᓂ ᓄᓇᓕᒡᔪᐊᖑᓂᕐᒥ, ᐃᓕᑦᑎᕙᓪᓕᐊᔪᑦ ᖃᓄᖅ ᓄᓇᖃᖅᑳᖅᓯᒪᖕᒪᖔᑦ," ᐊᒥᖅᑳᖃᑎᖃᓲᖅ. 

ᕘᓚᐃ ᓂᐅᕐᕈᑎᖃᖃᑦᑕᓕᓚᐅᖅᑐᖅ ᐱᓕᕆᐊᒥᓂᒃ ᓄᓇᓕᖕᓄᐊᕋᒥ ᐊᒻᒪᓗ ᐅᖃᖅᖢᓂ ᐱᓇᔪᖃᑦᑕᕐᓂᕋᖅᖢᓂ ᐊᖏᔪᒥᒃ ᖁᕕᐊᓱᒡᕕᖕᒥ ᓂᐅᕐᕈᑎᖃᕐᓂᕐᒥᒃ ᐃᓚᖃᖅᑐᒥᒃ ᖁᑦᑎᒃᑐᒥᒃ ᐱᓕᕆᓂᕐᒥᒃ ᓲᕐᓗ. ᓴᖅᑭᔮᖅᑎᑦᑎᔪᒪᓚᐅᖅᐳᖅ ᐃᓄᕕᐊᓗᐃᑦ ᓴᓇᙳᐊᖅᑎᑦ ᐊᑎᖓᒍᑦ, ᑲᒻᐸᓂᐅᔪᖅ ᐊᑎᖓᓂᒃ ᓂᐅᕐᕈᑎᖃᕆᐊᖅᑐᖅᖢᓂ ᐃᓚᖏᑕ ᓴᓇᐅᒐᖏᓐᓂᒃ. ᕘᓚᐃ ᓴᖅᑭᑦᑎᓚᐅᖅᐳᖅ ᐃᑭᐊᖅᑭᕕᖕᒥᒃ ᐊᒻᒪ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᓂᒃ ᑲᒻᐸᓂᖓᓄᑦ.

ᓴᓇᙳᐊᖅᑎᐅᓂᕐᒧᑦ ᐃᓕᓐᓂᐊᖅᑎᑕᐅᓚᐅᖅᑐᖅ ᐃᓚᒥᓃᓚᐅᖅᑐᖅ, ᑭᓯᐊᓂ ᐱᓕᒻᒪᒃᓴᓚᐅᖅᑐᖅ ᓯᐅᕋᕐᒥᒃ ᓯᕙᓂᕐᒥᒃ ᐊᒻᒪ ᓯᐅᕗᒥᒃ. ᓇᒻᒥᓂᖃᕐᓂᕐᒧᑦ ᐃᓕᓐᓂᐊᕐᓂᖅ ᐃᓱᓕᑦᑕᕐᕕᖃᖅᑎᓪᓗᒍ, ᖃᐅᔨᒋᐊᕆᐊᖃᓚᐅᖅᑐᖅ ᖃᓄᖅ ᐊᐅᓚᓂᖃᕈᓐᓇᕐᒪᖔᖅ. ᐅᐃᖓᑕ ᐊᔪᖖᒋᓐᓂᖓ ᐊᔪᖖᒋᓐᓂᖃᕐᒪᑦ, ᐱᓗᐊᖅᑐᒥᒃ ᐃᓄᐃᑦ ᖃᕋᓴᐅᔭᒃᑯᑦ ᑐᑭᓯᒋᐊᕋᓱᓚᐅᖅᑎᓪᓗᒋᑦ. ᑲᑎᖦᖢᓂᐅᒃ ᐃᓕᓐᓂᐊᖅᑎᓪᓗᒍ ᐊᔾᔨᒌᖏᑦᑐᓂᒃ ᖃᕆᑕᐅᔭᓕᕆᔾᔪᑎᓂᒃ ᓯᓚᑦᑐᖅᓴᕐᕕᖕᒥ ᓅᖦᖢᓂᓗ ᑳᓪᒍᕆᒧᑦ ᐃᖅᑲᓇᐃᔭᕆᐊᖅᑐᕐᖢᓂ, ᒪᓕᒃᖢᓂᐅᒃ ᑕᐃᑲᓂ ᑭᖑᒻᒧᑦ ᑕᑯᒋᐊᓚᐅᖅᓯᒪᙱᖦᖢᓂ. 

Boulay's ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᓇᓗᔪᓄᑦ ᐊᖏᕐᕋᐅᔭᕆᐊᒃᓴᖅ, "ᑲᑉᐱᐊᓱᒃᑕᐃᓕᒋᑦ ᐃᓗᐊᕆᔭᕐᓂᒃ ᐊᓂᔭᕆᐊᒃᓴᖅ ᐆᒃᑐᕐᓗᓂᓗ ᓄᑖᓂᒃ. ᓄᓇᕐᔪᐊᖅ ᕿᒥᕐᕈᓗᒍ; ᓄᓇᕐᔪᐊᖅ ᐱᐅᔪᐊᓘᖕᒪᑦ. ᓄᓇᑦᑎᐊᕙᐃᑦ ᑲᔾᔮᕐᓇᖅᑐᑦ, ᐊᓕᐊᓇᐃᖦᖢᓂᓗ. ᒪᒃᑯᒃᑎᓪᓗᑎᑦ ᐱᓕᕆᓗᑎᑦ. ᑖᒃᑯᓂᖓᓕᒫᖅ ᐱᕕᒃᓴᖃᖅᐳᑎᑦ ᐊᑲᕐᕉᑎᒋᔪᓐᓇᖅᑕᕐᓂᒃ, ᒐᕙᒪᒃᑯᓐᓂ ᐃᑲᔪᖅᑕᐅᓂᕐᒥᒃ ᐊᒻᒪ ᐃᓕᓐᓂᐊᕐᕕᖕᒥ ᐃᑲᔪᖅᑕᐅᓂᕐᒥᒃ. ᐃᓄᑦᑕᖃᐅᕐᖓᑦ ᑕᖅᑳᓂ ᐃᑲᔪᕈᓐᓇᖅᑐᓂᒃ ᓇᓂᓯᒍᓐᓇᖏᒃᑯᕕᑦ. ᐃᓱᒪᒋᓗᒋᑦ ᐱᓕᕆᐊᕆᔪᒪᔭᑎᑦ ᐊᒻᒪ ᐱᑦᑕᐃᓕᑎᓪᓗᒍ." 

ᑲᑉᐱᐊᓱᓗᐊᕐᓂᕐᒧᑦ ᐃᓄᑑᔭᕆᐊᒃᓴᖅ ᓄᓇᓕᐸᐅᔭᕐᒥ, ᕘᓚᐃ ᐃᒪᐃᖁᔨᔪᖅ ᑲᑎᖃᑎᖃᕐᓂᕐᒥᒃ ᐃᓄᖕᓂᒃ ᓄᓇᖃᖅᑳᖅᓯᒪᔪᓂᒃᓘᓐᓃᑦ ᑲᑎᙵᔪᓂᒃ. ᐅᖃᕐᖢᓂ ᑕᐃᒃᑯᐊ ᓄᓇᓖᑦ ᐊᖏᕐᕋᖅᓯᒪᖅᑰᔨᑎᑦᑎᓂᐊᕐᒪᑕ ᐱᖃᓐᓇᕆᔭᖏᓐᓂ ᐃᑲᔪᕐᓗᑎᓪᓗ ᖃᐅᒪᔪᒥᒃ ᓇᓂᓯᓂᕐᒥᒃ. "ᐅᓄᖅᑐᐊᓘᖕᒪᑕ ᐱᐅᔪᑦ ᑕᐃᑲᓂ," ᖁᖓᖦᖢᓂ. ᖃᕆᑕᐅᔭᒃᑯᑦ ᐃᑲᔪᖅᐸᒃᐳᖅ ᐊᒃᑐᐊᖃᑎᖃᕐᓂᕐᒥᒃ ᐃᓚᒥᓄᑦ ᐅᖓᓯᒋᒐᓗᐊᖅᖢᒍ, ᐱᑎᑦᑎᓪᓗᓂᓗ ᖃᓄᕆᑦᑐᒥᒃ ᑐᓴᐅᒪᑎᑦᑎᓂᕐᒥᒃ ᐃᓱᒪᒥᐅᑕᖃᕐᓂᕐᒥᓂᒃ ᐱᑕᖃᙱᓐᓂᖓᓂᒃ ᒥᑭᑦᑐᒥᑦ ᓄᓇᓕᖕᒥᑦ. ᐅᖃᐅᓯᒃᓴᑦ ᐱᖃᑦᑕᖅᑕᖏᑦ ᐊᔾᔨᙳᐊᖏᓐᓂ ᐃᑲᔪᖅᑐᖅ ᖃᓂᓐᓂᖅᓴᐅᓗᓂ ᐊᖏᕐᕋᒧᑦ. 

ᖃᕆᑕᐅᔭᒃᑯᑦ ᐃᑭᐊᖅᑭᕕᒃᑯᑦ ᓇᖕᒥᓂᖅ ᐃᑲᔪᑐᐃᓐᓇᖅᓯᒪᙱᒻᒪᑦ, ᐃᑲᔫᑕᐅᓯᒪᖕᒥᔪᖅᑕᐅᖅ ᐱᓕᕆᔨᒻᒪᕆᐅᓂᒃᑯᑦ. Boulay−ᑯᑦ ᓂᐅᕕᕆᐊᖅᑐᓂᒃ ᖃᐅᔨᒋᐊᕈᓐᓇᖅᓯᓚᐅᖅᐳᑦ Facebook−ᑯᑦ ᓂᐅᕕᕐᕕᒃᑯᑦ ᐊᒻᒪ ᐊᒃᑐᐊᓂᖃᓕᖅᖢᑎᒃ ᐅᑭᐅᖅᑕᖅᑐᒧᑦ ᐊᒃᑐᐊᖃᑦᑕᐅᑎᔪᓄᑦ. ᐱᖃᓐᓇᕆᔭᖓᑕ ᐃᓚᖓᑦ ᐊᐱᕆᑎᓪᓗᒍ ᓴᓇᙳᐊᖅᑎᑕᖃᓚᐅᕐᒪᖔᑦ ᐅᓂᒃᑳᕈᒪᔪᓂᒃ, ᑭᐅᓚᐅᖅᐳᖅ ᐅᖄᓚᔪᓂᒃ ᒫᓐᓇᓗ ᑐᓴᖅᑎᑦᑎᔪᓐᓇᖅᓯᓪᓗᓂ ᖃᐅᔨᖃᑦᑕᖅᓯᒪᔭᖏᓐᓂᒃ ᐊᒻᒪ ᖃᐅᔨᒪᓂᖏᓐᓂᒃ ᒪᒃᑯᒃᑐᓄᑦ ᓇᖕᒥᓂᖅ ᓴᓇᙳᐊᕈᒪᔪᓂᒃ. ᒫᓐᓇᓕ ᑕᐃᒃᑯᐊ ᓱᕈᓰᑦ ᐱᕈᖅᐸᓕᖅᐳᑦ ᑕᑯᕙᓕᖅᑐᑎᒃ ᓴᓇᙳᐊᖅᑐᓂᒃ ᑕᐃᒪᐃᓚᐅᕐᒪᑦ, ᓴᖅᑮᔪᒪᓕᖅᐸᑦᑐᑎᒃ ᐊᒻᒪ ᓴᓇᓪᓗᑎᒃ ᑕᑯᔅᓴᕈᖅᑎᑕᖏᓐᓂᑦ ᐅᐱᒍᓱᓐᓂᕐᒥᓂᒃ.

ᒪᒃᑯᖕᓂᖅᓴᒥᒃ ᑐᓴᖅᑎᑦᑎᔪᓐᓇᕈᓂ, ᐊᖓᔪᖅᑳᒥᓂᒃ ᓈᓚᒋᐊᖃᕋᔭᖅᑐᖅ, ᑭᓯᐊᓂ ᐃᓕᑦᑎᓯᒪᔪᖅ ᑕᒻᒪᖅᑕᒥᓂᒃ ᐱᕈᕐᕕᒋᓯᒪᓪᓗᓂᓗᒋᑦ. ᐱᔭᕇᑦᑕᐅᑎᒋᓚᐅᓐᖏᓚᖅ ᐃᓕᓐᓂᐊᕐᕕᕐᔪᐊᕐᒥᑦ, ᐊᖑᓇᓱᑦᑐᓂ ᐊᒻᒪ ᐃᖃᓪᓕᐊᖅᑐᓂ ᐊᒻᒪ ᓄᓇᒦᑦᑐᓂ. ᑕᐃᒃᑯᐊ ᐊᑐᖅᓯᒪᔭᖏᑦ ᐃᓕᓐᓂᐊᕐᕕᐅᑉ ᓯᓚᑖᓂ ᐱᔪᒃᓯᑎᑦᑎᓯᒪᕗᑦ ᑐᓴᖅᑎᑦᑎᓪᓗᑎᒡᓗ ᓴᓇᙳᐊᖅᑕᒥᓂᒃ ᐅᓪᓗᒥ.

ᓇᓕᒧᒌᒃᑎᓐᓇᓱᒃᖢᒋᑦ ᖃᓄᐃᓕᐅᖃᑦᑕᖅᑕᖏᑦ, ᕘᓚᐃ ᐱᓇᓱᐊᕈᓯᐅᑉ ᓄᙳᐊᓂ ᓄᖅᑲᖓᓚᐅᑲᓲᖑᕗᖅ ᐱᖃᓐᓇᕆᔭᒥᓂᒃ ᐃᓚᒥᓂᒡᓗ ᐱᖃᑎᖃᖅᖢᓂ. ᐊᖏᕐᕋᒥᓂᒃ ᐃᓕᓐᓂᐊᖅᑎᓪᓗᒍ ᕿᑐᕐᖓᒥᓂᒃ ᖃᓂᒪᓐᓇᐅᑎᓪᓗᒍ, ᐅᓪᓛᒃᑯᑦ ᓴᓇᙳᐊᖅᐸᓚᐅᖅᑐᖅ ᐃᓚᒥᓂᒡᓗ ᐱᖃᑎᖃᖅᐸᒃᖢᓂ ᐅᓐᓄᒃᓴᒃᑯᑦ ᓴᖅᑭᑦᑎᓚᐅᖅᑎᓪᓗᒍ ᓴᓇᔭᒥᓂᒃ ᖃᕆᑕᐅᔭᒃᑯᑦ. ᐃᒡᓗᒌᖕᓂᖅ ᐱᒻᒪᕆᐅᕗᖅ ᑖᔅᓱᒧᖓ ᓲᖃᐃᒻᒪ ᐅᖃᕐᒪᑦ, "ᐊᐅᓚᖁᙱᓪᓚᕆᒃᑲᒃᑯ. ᖁᕕᐊᓱᒍᒪᔪᖓ ᐱᓕᕆᐊᕆᔭᓐᓂᒃ." 

ᐃᓚᒥᓂᒃ ᐱᖃᑎᖃᖃᑦᑕᖅᑎᓪᓗᒍ ᐃᖅᑲᓇᐃᔭᖅᑎᓪᓗᒍ, ᐃᖃᓪᓕᐊᖃᑎᒋᖃᑦᑕᓚᐅᖅᑕᖓ ᐊᑖᑕᑦᑎᐊᖓ ᓄᓱᒃᓯᑎᓪᓗᒍ ᐃᖃᓗᒐᓲᑎᒥᒃ ᐃᖃᓗᒐᓲᑎᒥᒃ ᐊᒻᒪᓗ ᐃᒻᒥᓂᒃ ᐃᖃᓗᒐᓱᓕᕋᒥ. ᖁᕕᐊᒋᔭᓕᒃ ᐊᕐᕕᓐᓂᐊᕐᓂᕐᒥᒃ ᐃᖅᑲᓇᐃᔮᖓᓂ, ᑲᔾᔮᕐᓇᕐᓂᖓ ᐱᕈᕐᕕᒋᓚᐅᖅᑕᖓᓂ ᐊᒻᒪᓗ ᓇᓄᕐᓂᒃ. ᐃᓛᓐᓂᒃᑯᑦ ᐱᔪᒪᓕᖅᐸᒃᖢᓂ ᐱᔪᒃᓯᓕᖅᐸᒃᖢᓂ, ᑭᓯᐊᓂᑦᑕᐅᖅ ᐱᐅᑦᑎᐊᕆᓪᓗᓂ ᐱᖁᑎᓂᒃ ᐊᑐᖅᐸᒃᖢᓂ ᐱᔪᒃᓯᑎᑦᑎᕙᒃᐳᖅ ᓴᖅᑭᑎᑦᑎᔪᒪᓂᕐᒥᒃ. 

ᐅᖃᐅᓯᖃᖅᑐᖅ ᓯᓚᑐᓂᕐᒥᒃ ᒪᒃᑯᒃᑐᓄᑦ, ᐅᖃᖅᖢᓂ, "ᖁᔭᓐᓇᒦᒃ ᐱᔪᒪᓂᖃᕋᕕᑦ ᕿᒥᕐᕈᓂᕐᒥᒃ ᐃᓱᒪᒃᓴᖅᓯᐅᕈᓐᓇᑦᑎᐊᖅᑐᓂᒃ ᖃᓄᐃᓕᐅᕈᑎᓂᒃ.  ᑭᓱᓕᒫᓂᒃ ᐆᒃᑐᕐᓗᑎᑦ. ᐃᓕᖅᑯᓯᕐᓄᑦ ᐊᒃᑐᐊᖃᑕᐅᒋᑦ. ᑲᑉᐱᐊᓱᙱᓪᓗᑎᑦ ᐆᒃᑐᕆᐊᒃᓴᖅ ᖁᕕᐊᓱᑐᐃᓐᓇᕐᓗᑎᓪᓗ ᑭᓱᓕᒫᓂᒃ ᐱᓕᕆᔭᕆᐊᒃᓴᖅ. ᐅᖃᐅᓯᕆᑦᑕᐃᓕᒍᒃ ᐱᐅᓂᐊᕐᒪᖔᑦ. ᖁᕕᐊᓱᒋᑦᑎ ᐃᓅᓯᖅ. ᖁᕕᐊᓱᒋᑦ ᐃᒃᐱᒋᑦᑎᐊᕐᓗᒋᓪᓗ ᐃᓐᓇᐃᑦ."

ᐅᖓᓯᒃᑲᓗᐊᖅᑐᓂ ᐊᖏᕐᕋᒥᓂᒃ, ᓴᓇᐅᒐᖏᑦ ᐃᓚᒥᓄᑦ ᖃᓂᒃᓴᖅᑎᑦᑎᕙᒻᒪᑕ ᐊᒻᒪᓗ ᐃᓄᖁᑎᒥᓄᑦ. ᖃᐅᔨᒪᔪᖅ ᖃᓄᑎᒋ ᐱᒻᒪᕆᐅᑎᒋᓂᖓᓂᒃ ᖁᕕᐊᓱᖕᓂᖓᓄᑦ ᓴᓇᔪᓐᓇᕆᐊᒃᓴᖅ. ᐊᔪᙱᓐᓂᕐᒥᓂᒃ ᑐᒃᑑᔮᖅᑐᒥᑦ ᖃᓪᓗᓈᓅᖅᑎᖦᖢᒍ, ᐅᐱᒍᓱᒃᑐᖅ ᐃᓚᒥᓂᒃ ᑲᔪᓯᑎᑦᑎᔪᓐᓇᓚᐅᕐᒪᑦ ᐊᒻᒪ ᓴᓇᙳᐊᖅᖢᓂ ᐃᓕᖅᑯᓯᑐᖃᕐᒥᓂᒃ ᑲᓪᒍᕆᒥ. ᐃᓕᓴᐃᓪᓗᓂ ᒪᒃᑯᒃᑐᓂᒃ ᐊᒻᒪᓗ ᓂᐅᕕᐊᒃᓴᖃᕐᓂᕐᒥᒃ ᐱᓕᕆᐊᒥᓂᒃ ᖃᕋᓴᐅᔭᒃᑯᑦ ᐊᒻᒪᓗ ᓴᓇᐅᒐᕐᓂᒃ ᐱᔪᒪᓕᖅᑎᑦᑎᓪᓗᓂ ᐱᕕᖃᕈᓐᓃᕐᓂᖓᓄᑦ ᐊᒻᒪᓗ ᓄᓇᒥ, ᐱᕈᖅᓴᐃᔪᖅ ᓄᑖᓂᒃ ᑭᖑᕚᕇᓂᒃ ᓴᓇᙳᐊᖅᑎᓂᒃ ᐊᒻᒪᓗ ᐅᓂᒃᑳᑲᑕᒃᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.