"ᐃᓱᒪᖃᑦᑕᓚᐅᖅᓯᒪᔪᖓ ᐱᒻᒪᕆᐅᓇᓱᒋᓪᓗᒍ ᓂᕈᐊᕐᓗᓂ ᐊᑕᐅᓯᕐᒥᒃ ᐃᖅᑲᓇᐃᔮᒃᓴᒥᒃ, ᑭᓯᐊᓂ ᐱᕕᒃᓴᕆᑎᑕᐅᔪᖅ ᑕᑯᑎᖦᖢᓂᖓ ᐊᓯᐊᒍᑦ," ᐅᖃᖅᑐᖅ ᖃᕙᖓᑦ ᐊᖓᓕᒃ. ᐊᕐᕕᐊᕐᒥᐅᑕᐅᔪᖅ, ᓄᓇᕗᒻᒥ ᑭᓯᐊᓂ ᒫᓐᓇ ᒪᓐᑐᕆᐊᒥᐅᑕᐅᓕᖅᑐᖅ ᐊᒻᒪᓗ ᖃᐅᔨᓴᖅᑎᐅᓪᓗᓂ ᓰᕖᓰ ᓈᓚᐅᑎᓕᕆᔨᒃᑯᓐᓂ ᑲᓇᑕᒥ. ᐊᖕᒐᓕᒃ ᓈᓚᒃᐳᖅ ᓂᐱᓕᐅᖅᓯᒪᔪᓂᒃ ᓂᐱᓕᐅᖅᓯᒪᔪᓂᒃ ᐃᓄᒃᑎᑐᑦ ᐅᓂᒃᑳᖅᑐᐊᓂᒃ ᐊᒻᒪ ᑎᑭᓵᒃᓴᓂᒃ ᖃᐅᔨᓴᖅᑎᑦ ᓇᓂᔭᕐᓂᕐᓂᖅᓴᐅᓂᐊᕐᒪᑕ ᐊᒻᒪ ᑭᖑᓂᐊᒍᑦ, ᐊᑐᐃᓐᓇᐅᓕᕐᓗᑎᒃ ᐃᓄᖕᓄᑦ. ᐊᒥᓱᓂᒃ ᐊᔾᔨᒌᙱᑦᑐᓂᒃ ᐃᖅᑲᓇᐃᔮᖃᖅᓯᒪᔪᖅ ᒫᓐᓇ ᐃᖅᑲᓇᐃᔮᖓᓄᑦ ᑎᑭᓚᐅᖅᑎᓐᓇᒍ.

ᒪᒃᑯᒃᖢᓂ, ᐃᖅᑲᓇᐃᔭᓚᐅᖅᓯᒪᔪᖅ ᓂᐅᕕᖅᐸᒃᑐᓂᑦ ᐱᔨᑦᑎᕋᖅᖢᓂ, ᓂᐅᕕᐊᒃᓴᖃᖅᑎᐅᓪᓗᓂ, ᑎᑎᕋᕐᕕᖕᒥᑦ ᐃᑲᔪᖅᑎᙳᖅᖢᓂ, ᐱᓕᕆᖃᑎᖃᖅᖢᓂ ᐊᔾᔨᒌᙱᑦᑑᑎᓂᑦ ᑲᑐᔾᔨᖃᑎᒌᓂᑦ ᒐᕙᒪᓂᒡᓗ. ᐃᖅᑲᓇᐃᔮᖃᖅᓯᒪᒻᒥᔪᖅ ᑮᓇᐅᔭᓕᐅᖅᑎᐅᓪᓗᓂ ᓄᓇᖃᖅᑳᖅᓯᒪᔪᓄᑦ ᓇᒻᒥᓂᖁᑎᓕᓐᓄᑦ. ᐃᖅᑲᓇᐃᔮᖓᑦ ᐊᓯᔾᔨᖅᓯᒪᕗᖅ ᐃᓄᐃᑦ ᐃᓕᖅᑯᓯᖓᓂ, ᐅᖃᓕᒫᕆᐅᖅᓴᓂᕐᒥᑦ, ᐅᖃᐅᓯᓕᕆᓂᕐᒥᑦ ᐊᒻᒪ ᐃᓕᓐᓂᐊᕐᓂᓕᕆᓂᕐᒥᑦ, ᐅᖃᓕᒫᕆᐅᖅᓴᓂᕐᒥᑦ ᐃᓅᓯᓕᕆᔨᐅᓪᓗᓂ, ᐃᓄᑦᑎᑑᓕᖅᑎᑦᑎᓪᓗᓂ, ᐃᑲᔪᖅᑎᐅᓪᓗᓂ ᒪᓕᒐᓕᐅᕐᕕᐅᑉ ᐅᖃᓕᒫᒐᖃᕐᕕᖓᓂ ᓄᓇᕗᒻᒥ ᐊᓪᓛᑦ ᐅᖃᓕᒫᒐᓕᕆᔨᙳᖅᑐᓂ. 

ᐊᖓᓕᒃ ᐱᑎᑦᑎᕙᒃᐳᖅ ᐃᓗᓕᖏᓐᓂᒃ ᐅᑯᑎᒎᓇᖅ, Connected North−ᑯᑎᒍᑦ, ᐅᖃᓕᒫᕐᓗᒋᑦ ᐃᓕᓐᓂᐊᖅᑏᑦ ᐃᓄᒃᑎᑐᑦ, ᐃᓚᒋᔭᐅᓪᓗᓂ ᓄᑕᖅᑲᑦ ᐅᖃᓕᒫᒐᖓ ᑎᑎᕋᓚᐅᖅᑕᖓ. ᓯᓚ ᐊᒻᒪ ᓄᓇ ᑎᑎᕋᖅᑕᐅᓚᐅᖅᑐᖅ ᐃᐅᕆᐋᓇᒧᑦ ᐊᒻᒪ ᓕᓐᓯ ᑑᐸᐃᒧᑦ, ᐊᒻᒪ ᓄᓇᖃᖅᑳᖅᓯᒪᔪᑦ ᑕᐅᑐᖅᑰᖅᑕᖏᓐᓂᒃ ᑐᓴᖅᑎᑦᑎᔪᒪᓪᓗᑎᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᑕ ᒥᒃᓵᓄᑦ. ᑭᖑᒧᑦ ᑕᑯᒋᐊᖅᖢᒍ ᐃᖅᑲᓇᐃᔮᕆᓛᕈᒪᔭᖓ, ᐅᖃᖅᐳᖅ, "ᖁᕕᐊᒋᔭᖃᐃᓐᓇᐅᔭᖅᑐᖓ ᐅᖃᐅᓯᕐᒥᒃ, ᐃᓄᐃᑦ ᐃᓕᖅᑯᓯᖓᓂᒃ, ᐱᐅᓯᕆᕙᓚᐅᖅᑕᖏᓐᓂᒃ ᐊᒻᒪ ᐃᓕᓐᓂᐊᖅᓯᒪᓂᖓᓂᒃ. ᓱᓕᓇᓱᐃᓐᓇᐅᔭᖅᑐᖓ ᐅᕙᓐᓄᑦ ᖁᕕᐊᒋᔭᓐᓂᒃ ᐱᓕᕆᓪᓗᖓ ᓲᖃᐃᒻᒪ ᐃᓕᑦᑎᓯᒪᒐᒪ ᐱᓕᕆᑦᑎᐊᕋᓱᒃᖢᖓ ᐊᔪᙱᓐᓂᓕᒫᓐᓂᓪᓗ ᐱᓕᕆᓪᓗᖓ."

ᐱᕕᒃᓴᖃᕐᕕᒋᔭᖏᑦ ᐃᓄᖕᓂᙶᖅᓯᒪᔪᑦ ᐃᑲᔪᖅᓱᐃᔪᓂᒃ ᑖᒃᑯᓇᙵᑦ ᐊᒻᒪ ᑕᐅᑐᖅᑰᖅᑕᖏᓐᓂᒃ. ᐱᕈᖅᓴᓪᓗᓂ ᒥᑭᑦᑐᒥ ᓄᓇᓕᖕᒥ ᐅᓄᙱᑦᑐᓂᒃ ᐊᑐᒐᒃᓴᖃᕐᖢᓂ, ᐅᓄᖅᑐᓂᒃ ᐃᓱᒪᓚᐅᖅᑐᖅ ᐊᔪᕐᓂᖓᓂᒃ, ᑭᓯᐊᓂ ᐱᓂᖅᓴᐅᓪᓗᓂ ᐱᔭᕇᕐᖢᓂ ᓲᖃᐃᒻᒪ ᑕᒪᕐᒥᒃ ᐅᒃᐱᕈᓱᓚᐅᖅᑐᑦ. ᓰᕖᓰᒃᑯᑦ ᐊᐱᖅᓱᓚᐅᖅᑐᑦ ᖁᕕᐊᒋᔭᖃᕐᓂᕐᒥᓂᒃ ᐅᖃᓕᒫᖅᖢᓂ ᓄᑕᖅᑲᓄᑦ ᐃᓄᒃᑎᑐᑦ ᐊᖅᑯᑎᒋᔭᐅᓪᓗᓂ ᐊᒃᑐᐊᖃᑦᑕᐅᑎᓂᖅ ᐅᑭᐅᖅᑕᖅᑐᒥ ᐱᓕᕆᐊᖅ ᐊᒻᒪᓗ ᖃᐅᔨᒪᓕᖅᖢᒍ, ᐃᓚᐅᓕᕈᒪᓕᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐱᓕᕆᐊᖓᓄᑦ, ᑐᕌᖅᑎᖦᖢᒍ ᒫᓐᓇᐅᔪᖅ ᐃᖅᑲᓇᐃᔮᖓᓄᑦ. 

ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᐅᓪᓗᓂ, ᐅᖃᓕᒫᖅᑎᐅᓚᐅᖅᑐᖅ ᐊᒻᒪ ᐃᓕᓐᓂᐊᖃᑎᖏᑕ ᖁᓛᓃᖦᖢᓂ. ᐊᕿᖃᑕᐅᓚᐅᖅᑐᖅ, ᐹᑦᒥᓐᑕᓐ, ᕚᓕᐹᓪ, ᐹᔨ, ᐱᙳᐊᓚᐅᖅᑐᖅ ᐊᒻᒪᓗ ᐊᑭᓕᖅᓱᖅᑕᐅᓇᓂ ᐱᓕᕆᓪᓗᓂ. ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᕌᓂᒃᑎᓪᓗᒋᑦ, ᐅᑭᐅᖕᓄᑦ ᒪᕐᕉᖕᓄᑦ ᖃᓪᓗᓈᑐᑦ ᐅᖃᓕᒫᒐᖏᑦ ᕗᕌᒃ ᓯᓚᑦᑐᖅᓴᕐᕕᒡᔪᐊᕐᒥ ᑮᓇᐅᔭᖃᖅᑎᑕᐅᓚᐅᖅᐳᑦ ᐃᓕᓐᓂᐊᕈᑎᒃᓴᖅᑖᖅᑎᑕᐅᓪᓗᑎᒃ TD−ᑯᓐᓂ ᓄᓇᓕᖕᓂ ᓯᕗᓕᖅᑎᓄᑦ. ᐊᒃᓱᕈᖅᑎᑕᐅᖅᑰᔨᓚᐅᖅᑐᖅ ᐃᓕᓐᓂᐊᖅᑎᐊᖅᓯᒪᑦᑎᐊᕐᖢᓂ ᐃᓱᒪᓕᕐᖢᓂᓗ ᑖᔅᓱᒧᖓᐅᙱᖦᖢᓂ. ᑕᐃᓐᓇᑐᐊᖅ ᐃᓄᒃ ᐃᓕᓐᓂᐊᖅᑎᐅᔪᖅ ᕗᕌᒃ ᐃᓕᓐᓂᐊᕐᕕᔾᔪᐊᖓᓂ, ᐸᐃᒃᐹᖏᑦ ᑮᓇᐅᔭᑎᒍᑦ ᐃᑲᔪᖅᑕᐅᓂᖓ ᐱᔭᕆᐊᑐᓚᐅᕐᒪᑦ ᐃᓕᓐᓂᐊᕐᕕᒻᒧᑦ ᐊᐅᓚᑦᑎᓇᓱᐊᖅᑐᓂ ᐊᒻᒪᓗ ᐃᑲᔪᕈᓐᓇᓚᐅᖏᑕᖓ ᖃᐅᔨᓇᓱᐊᖅᑎᓪᓗᒍ.

ᐊᒃᓱᕉᑎᖃᓚᐅᖅᑐᖅ ᐃᓱᒪᒥᒍᑦ ᐊᔪᕈᑎᖃᕐᓂᕐᒥᒃ, ᐃᒥᖅᖢᓂ ᐊᒻᒪ ᐋᖓᔮᕐᓇᖅᑐᓕᕆᓪᓗᓂ ᐊᒻᒪ ᐃᑲᔪᖅᑕᐅᙱᖦᖢᓂ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ. ᐃᑲᔪᖅᑕᐅᓂᖅᓴᐅᓗᓂ, ᐃᓱᒪᔪᖅ ᐱᔭᕇᖅᓯᒃᑲᓐᓂᕈᓐᓇᓚᐅᕐᓂᕐᒥᓂᒃ. ᐊᖓᓕᒃ ᐃᓄᐃᑦ ᐃᓕᓐᓂᐊᓚᐅᑲᓚᐅᖅᐳᑦ, ᑭᓯᐊᓂ ᓄᖅᑲᖓᓚᐅᑲᓚᐅᖅᐳᑦ ᐃᖅᑲᓇᐃᔭᕆᐊᒃᓴᖅ ᑲᒪᒋᔭᖃᖅᖢᓂᓗ ᐃᓱᒪᒥᒍᑦ ᖃᓄᐃᙱᑦᑎᐊᕐᓂᕐᒥᒃ. ᐅᑎᓚᐅᖅᑐᖅ ᐱᔭᕇᖅᑐᓂ ᐊᒻᒪᓗ ᒪᓐᑐᕆᐋᓪᒨᖅᑐᓂ. 

ᐃᓐᓇᐅᓪᓗᓂ, ᐃᓕᑦᑎᕚᓪᓕᖅᓯᒪᔪᖅ ᖃᓄᖅ ᐃᖕᒥᓂᒃ ᑲᒪᒋᑦᑎᐊᕈᓐᓇᕐᓂᕐᒥᒃ ᒪᒥᓴᕐᓂᒃᑯᑦ ᑲᑎᖃᑎᖃᕐᓗᓂᓗ ᑕᐃᒃᑯᓄᖓ ᐊᒃᓱᕈᕐᓇᖅᑐᒃᑰᖅᑐᓄᑦ. ᐃᒻᒥᓂᒃ ᓱᓕᓇᓱᖃᑦᑕᖅᑐᖅ, ᓇᓕᒧᒌᒃᑎᓐᓇᓱᒃᖢᓂ, ᐊᔾᔨᒌᒃᑎᑦᑎᓪᓗᓂ ᐊᒻᒪ ᓇᖕᒥᓂᖅ−ᐃᒃᐱᒋᑦᑎᐊᖅᐸᒃᖢᓂ. ᐃᒻᒥᓂᒃ ᐊᒃᓱᕈᖅᖢᓂ ᓯᕗᒻᒧᐊᒃᑎᑉᐸᓪᓕᐊᓇᓱᒃᖢᒍ. 

ᑲᑎᒫᓪᓚᓚᐅᕐᖢᓂ ᑲᒪᓇᖅᑐᓂᒃ ᐃᓄᖕᓂᒃ ᐅᒃᐱᕆᔭᐅᔪᓂᒃ, ᐃᓕᑦᑎᓪᓗᓂ ᐃᓄᑦᑎᐊᕙᐅᓂᕐᒥᒃ ᐃᖕᒥᓄᑦ ᐅᖃᐅᓯᕆᓗᒋᓪᓗ ᐃᒃᐱᒋᔭᖏᑦ, ᐅᒃᐱᕈᓱᒃᓗᓂ ᐃᖕᒥᓂᒃ ᑲᒪᒋᑦᑎᐊᕈᓐᓇᕐᓂᕐᒥᓂᒃ ᑭᓱᓕᒫᓪᓗ ᐊᑐᕈᓐᓇᖅᓯᓗᑎᒃ. 

ᓱᒃᑲᐃᓪᓕᒋᐊᕆᓂᖅ ᐊᒻᒪᓗ ᐃᓕᑕᖅᓯᓂᖅ ᓱᓇᑐᐃᓐᓇᕐᓂᒃ ᐃᑲᔪᕐᓂᖃᒻᒪᕆᓐᓂᐊᖏᒻᒪᑦ. ᐃᓱᒪᒥᓂᒃ ᐋᖅᑭᒃᓯᔭᕌᖓᑦ, ᐱᓕᕆᐊᖑᑲᐅᑎᒋᖁᓪᓗᓂᐅᒃ ᑕᒪᓐᓇᓗ ᐃᓕᓯᒪᓪᓗᓂᐅᒃ ᖃᖓᙳᖅᐸᓪᓕᐊᓪᓗᓂ. 

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᓅᑉᐸᖕᓂᖏᓐᓄᑦ ᓄᓇᒥᓂᑦ ᐃᒻᒥᓂᒃ ᓱᓕᔪᒪᓂᐅᕗᖅ, ᐱᓗᐊᙳᐊᖅᖢᓂ ᒥᑭᑦᑐᒥᑦ ᓄᓇᓕᖕᒥᙶᖅᖢᓂ ᐱᕕᒃᓴᖃᑦᑎᐊᙱᖦᖢᓂ ᐊᒃᓱᕈᕐᓇᖅᑐᒦᖦᖢᓂᓗ ᑭᒡᓕᖃᙱᑦᑐᓄᑦ ᐊᑐᖅᑕᐅᖔᓕᕈᓐᓇᖅᑐᓄᑦ ᓄᓇᓕᐸᐅᔭᕐᒥ. ᐃᒡᓗᒌᑦᑎᐊᕐᓂᖅ ᐱᒻᒪᕆᐅᕗᖅ ᖁᕕᐊᓇᕐᓂᖅᐹᒦᓪᓗᓂ. "ᐱᕕᒃᓴᖃᖅᑎᓪᓗᓯ. ᐃᓕᑦᑎᕚᓪᓕᕐᓂᖅᓴᐅᕗᑎᑦ ᐃᓕᖕᓂᒃ ᐃᓕᖅᑯᓯᕐᓂᓪᓗ, ᕿᒪᕉᑎᓕᕈᕕᐅᒃ. ᐃᓱᒪᒋᔭᕐᓂᒃ ᐱᓕᕆᓗᑎᑦ ᐊᑲᐅᓛᖑᓇᓱᒋᔭᕐᓂᒃ ᒫᓐᓇᐅᑎᓪᓗᒍ." ᑎᓕᐅᕆᔪᖅ, ᐃᖅᑲᐃᓯᓗᒋᑦ ᒪᒃᑯᒃᑐᑦ ᐊᖏᕐᕋᖏᑦ ᐅᑕᖅᑭᐃᓐᓇᕐᓂᐊᕐᒪᑕ ᐃᒃᐱᒍᓱᖕᒪᑕ ᐊᑭᕋᖅᑐᕐᓂᕐᒥᒃ ᐃᓚᒥᓂᒃ ᓄᓇᓕᖕᒥᐅᓂᒡᓗ ᐊᒻᒪ ᐊᑯᓂᐅᔪᒃᑯᑦ ᐱᕕᒃᓴᐅᔪᓐᓇᖅᑐᓂᒃ. 

"ᐱᐅᕗᖅ ᐃᓗᐊᖅᓴᕋᓱᒋᐊᒃᓴᖅ ᐃᖢᕐᕆᙱᖦᖢᓂ. ᐅᓄᖅᑐᓂᒃ ᐱᑕᖃᖅᐳᖅ ᐃᓗᐊᙱᑎᑦᑎᔪᓂᒃ ᐅᕙᑦᑎᓐᓂᒃ ᐃᑲᔪᓪᓚᕆᒃᐸᒃᑐᒥᒃ ᐊᖏᒡᓕᕙᓪᓕᐊᓂᕐᒥᒃ," ᒪᓂᒪᑎᑦᑎᕙᒃᐳᖅ ᐃᓱᒪᑦᑎᐊᕐᓂᒃᑯᑦ. ᑕᒪᓐᓇ ᐃᓗᐊᙱᔾᔪᑕᐅᑎᓪᓗᒍ, ᐅᖃᐅᓯᖃᖅᐳᖅ ᐊᔪᕐᓇᙱᓐᓂᕋᐃᓪᓗᓂ ᑕᑯᔭᕆᐊᒃᓴᖅ ᑭᓱᑦ ᑲᔪᓯᓂᖃᑦᑎᐊᕐᒪᖔᑕ ᑲᔪᓯᓂᖃᑦᑎᐊᙱᒻᒪᖔᑕᓗ ᖃᓄᕐᓗ ᑕᒪᓐᓇ ᐱᐅᓯᑎᑕᐅᒃᑲᓐᓂᕈᓐᓇᕐᒪᖔᑦ. 

"ᓈᒻᒪᒃᑐᖅ ᑕᒻᒪᕐᓇᙱᖦᖢᓂᓗ ᐃᓅᓯᖅ. ᑕᒪᓐᓇ ᐃᓅᓯᕆᒐᕕᐅᒃ. ᐊᓯᖕᓄᑦ ᐃᓱᒪᓕᐅᖅᑐᖃᔾᔮᙱᑦᑐᖅ."

ᐃᓛᓐᓂᒃᑯᑦ ᐃᒻᒥᓂᒃ−ᐃᓱᒪᒃᓴᖅᓯᐅᕈᑎᖃᕐᓂᖅ ᐊᔪᕐᓇᕈᓐᓇᖅᑐᖅ. "ᐱᔪᓐᓇᕐᓂᖃᑦᑎᐊᕐᓇᖅᐳᖅ, ᐃᓕᓴᖅᓯᔪᓐᓇᖅᖢᑎᑦ ᐊᔪᙱᓐᓂᕆᔭᕐᓂᒃ ᐊᒻᒪ ᖃᓄᐃᓕᐅᕈᓐᓇᙱᑕᕐᓂᒃ ᒫᓐᓇ ᑭᓯᐊᓂ ᓇᓕᒧᒌᒃᑎᓐᓇᓱᒃᖢᒋᑦ ᐊᔪᙱᓐᓂᕆᔭᑎᑦ. ᐅᒃᐱᕈᓱᒃᓗᑎᑦ ᐊᔪᙱᓐᓂᕐᓂ... ᐃᑲᔪᖅᑕᐅᔪᒪᓗᓂᓗ ᐱᔭᕆᐊᖃᕌᖓᕕᑦ," ᐊᑐᓕᖁᔨᔪᖅ. 

ᐱᔪᒃᓯᑎᑦᑎᓂᐊᕐᓗᓂ, ᐊᖓᓕᒃ ᐱᔪᒃᓯᑎᑕᐅᕙᒃᐳᖅ ᐃᓄᖕᓄᑦ ᐃᒃᐱᒋᔭᖃᑦᑎᐊᖅᑐᓄᑦ ᐃᓅᓯᕐᒥᒃ. ᖃᐅᔨᑎᑦᑎᔨᐅᓪᓗᓂ, ᐃᓱᒪᓚᐅᖅᓯᒪᙱᑦᑐᖅ ᐃᓅᓇᓱᒋᓗᓂ, ᑭᓯᐊᓂ ᓇᒡᓕᒋᔭᓕᒃ ᐃᓄᖕᓂᒃ, ᑐᓵᓪᓗᓂ ᐅᓂᒃᑳᖏᓐᓂ ᐊᒃᓱᕈᕐᓇᖅᑐᓄᑦ ᐱᕚᓪᓕᕈᑎᓄᓪᓗ. ᐃᓄᐃᑦ, ᐃᓕᖅᑯᓯᖏᑦ ᐊᒻᒪ ᐱᐅᓯᕆᕙᓚᐅᖅᑕᖏᑦ ᐱᔪᒃᓯᑎᑦᑎᖕᒪᑕ, ᐊᒻᒪ ᐃᓄᖁᑎᖏᑦ ᖃᓄᐃᓕᐅᖃᑦᑕᖅᓯᒪᓂᖏᓐᓂᒃ ᐊᒃᓱᕈᕐᓇᖅᑐᒃᑰᓗᐊᖅᖢᑎᒃ ᐊᒻᒪ ᑲᒪᓇᖅᑐᓂᒃ ᐱᓕᕆᓪᓗᑎᒃ. ᐅᓂᒃᑳᖅᑐᐊᑦ, ᐅᖃᓕᒫᒐᑦ, ᐃᙱᐅᑎᑦ ᐊᒻᒪ ᑐᓴᕐᓈᒐᒃᓴᑦ ᐱᔪᒃᓯᓕᕈᑎᒋᓲᕆᕙᖏᑦ. 

"ᑲᑎᖃᑎᖃᕈᕕᑦ ᑭᓇᒥᑭᐊᖅ ᖁᕕᐊᒋᔭᖃᕐᔪᐊᖅᑐᒥᒃ ᖃᓄᐃᓕᐅᖃᑦᑕᖅᑕᖏᓐᓂᒃ ᑭᓱᓂᒡᓗ ᖁᕕᐊᒋᔭᖃᕐᒪᖔᑕ. ᐊᐃᑦᑐᕐᓗᐃᓇᖅᑐᒻᒪᕆᐅᕗᖅ. ᑕᐃᒪᐃᒍᓐᓇᕈᒪᔪᖓ. ᐊᓯᓐᓄᑦᑕᐅᖅ ᐃᓅᓯᓐᓂ," ᖃᕙᖓᑦ ᐊᖓᓕᒃ ᐅᓂᒃᑳᖅᑐᖅ. ᐃᓱᒪᕙᔪᔫᒐᓗᐊᖅ ᐊᑕᐅᓯᕐᒥᒃ ᐃᖅᑲᓇᐃᔮᒥᒃ ᓇᓂᓯᒋᐊᖃᕆᐊᕕᑦ, ᑭᓯᐊᓂ ᐃᓕᓯᒪᔪᖅ ᐃᓅᓯᖅ ᒪᓂᒪᑎᑦᓯᑲᓐᓂᕆᐊᖓ. ᐊᕙᓗᔭᐅᓯᒪᓪᓗᓂ ᐃᓄᖕᓄᑦ ᐅᒃᐱᕆᔭᒥᓄᑦ, ᓇᓂᓯᓪᓗᓂ ᐊᑐᒐᒃᓴᒥᒃ ᐅᓄᖅᑐᓂᒃ ᖃᓄᐃᓕᐅᕆᐊᒃᓴᖅ ᐊᒥᖅᑳᕈᑎᒋᓗᒍᓗ ᓄᓇᕐᔪᐊᖅ ᑭᓱᓄᑦ ᓇᑦᓴᖅᑕᖏᓐᓄᑦ ᐃᓅᓯᖓᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.