ᐱᒋᐊᓚᐅᖅᓯᒪᕗᖅ ᓄᓇᓕᐸᐅᔭᐃᑦ ᓯᓚᑖᓅᕈᓐᓇᐅᑎᓂᒃ, ᒫᓐᓇᓕ ᑐᕌᒐᖃᓕᖅᐳᖅ ᐃᓄᖕᓂ ᕿᒥᕐᕈᑎᑦᑎᔪᒪᓪᓗᓂ ᑲᓇᑕᒥ. ᕌᓐᑎ ᕚᓇᑐ ᐊᓪᓚᖓᔪᖅ ᐊᒻᒪ ᐳᓚᕋᖅᑐᓕᕆᓂᕐᒥ ᐃᖅᑲᓇᐃᔭᖅᓯᒪᓪᓗᓂ ᐃᓅᓯᓕᒫᒥᓂ. ᐊᓈᓇᒥᓂᒃ ᐊᖅᓵᖅᑕᐅᓚᐅᖅᓯᒪᕗᖅ ᒪᒃᑯᒃᖢᓂ ᐋᖓᔮᕐᓇᖅᑐᓂᒃ ᐊᑐᕐᓂᕐᓗᖃᑦᑕᕐᓂᖓᓄᑦ, ᑎᒍᐊᙳᐊᕆᔭᐅᓕᖅᖢᓂ ᑕᓪᓕᒪᓂᒃ ᐅᑭᐅᖃᖅᖢᓂ ᐊᓈᓇᖓᑕ ᐅᑎᖅᑎᑕᐃᓐᓇᖅᖢᓂᐅᒃ. ᕚᓐᑰᕙᒦᓕᓚᐅᖅᓯᒪᔫᒃ ᓯᕗᓪᓕᖅᐹᖑᓪᓗᓂᓗ ᐃᓚᒥᓄᑦ ᐃᓕᓐᓂᐊᖅᑕᒥᓂᒃ ᐊᓂᒍᐃᓪᓗᓂ.  

ᐃᖅᑲᓇᐃᔭᓕᓵᖅᑎᓪᓗᒍ ᐳᓚᕋᖅᑐᓕᕆᓂᕐᒧᑦ, ᕚᓇᑐ ᖃᐅᔨᒪᓚᐅᙱᑦᑐᖅ ᐊᓪᓚᖓᓂᕐᒥᓂᒃ. ᓇᔭᖓ ᖃᐅᔨᓕᓚᐅᖅᐳᖅ ᖃᓄᐃᓕᐅᖅᐸᓚᐅᕐᓂᖏᓐᓂᒃ ᐅᖃᓕᒫᓚᐅᖅᖢᓂᓗ ᓯᕗᓕᕆᓚᐅᖅᑕᑦᑕ ᑎᑎᕋᖅᑕᕕᓂᖏᓐᓂᒃ ᐅᐃᓂᐸᐃᒡᒥ ᑕᑯᔭᒐᖃᕐᕕᖕᒦᑦᑐᒥᒃ. ᐃᓚᒥᓂᒃ ᐃᓕᑦᑎᓚᐅᖅᐳᖅ ᐱᐅᓯᕆᔭᐅᕙᓚᐅᖅᑐᓂᒃ ᐃᓕᓐᓂᐊᖅᖢᓂ. 

ᐃᓕᓐᓂᐊᕐᓂᓕᕆᓂᒃᑯᓪᓕ, ᕚᓇᑐ ᐃᓕᓐᓂᐊᕆᐊᓚᐅᖅᐳᖅ ᑐᕆᓐᑎ ᐅᐊᓕᓂᕐᒥ ᓯᓚᑦᑐᖅᓴᕐᕕᒡᔪᐊᒥ ᐊᕐᕌᒍᒧᑦ ᐊᑕᐅᓯᕐᒧᑦ. ᐃᖅᑲᓇᐃᔭᓚᐅᖅᓯᒪᕗᖅ ᐃᒡᓗᐊᓗᖕᒥ Expo 86-ᒥ ᐊᒻᒪ ᓈᓚᐅᑎᖃᕐᕕᖕᒥ Focus on the Family. ᓄᓕᐊᖃᓚᐅᖅᑐᖅ ᒪᕐᕉᖕᓂᒡᓗ ᕿᑐᙵᖃᖅᖢᓂ. ᓄᓇᓕᖕᓂ ᐱᓕᕆᖃᑦᑕᓚᐅᖅᓯᒪᔪᖅ, ᓂᕿᑖᕐᕕᐅᑉ ᑲᑎᒪᔨᖏᓐᓄᑦ ᐃᓚᐅᓕᓚᐅᖅᓯᒪᓪᓗᓂ ᑭᖑᓂᐊᒍᓪᓗ ᐃᒃᓯᕙᐅᑕᕆᔭᐅᓕᖅᖢᓂ ᖁᕕᐊᓱᒡᕕᖕᒥ ᑎᑎᕋᕐᕕᖕᒥ ᐊᑦᑎᖕᓂᖅᓴᒥ ᓄᓇᐃᓐᓇᕐᒥ. ᓂᕐᕆᓯᓂᒃ ᐅᐊᓴᖅᐸᒃᖢᓂ ᐅᓐᓄᐊᒃᑯᑦ. 

ᓯᓚᑦᑐᖅᓴᕐᕕᒡᔪᐊᕐᒥ ᐱᔭᕇᕋᒥ, ᕚᓇᑐ ᐃᓚᐅᓕᓚᐅᖅᐳᖅ ᑐᔪᕐᒥᕕᖕᓂ ᐋᖅᑭᒃᓱᐃᓪᓗᓂ ᐊᖅᓴᒥᒃ ᕼᐋᑭᖅᑎᓂᒃ, ᑭᖑᓂᐊᒍᓪᓗ ᕼᐋᑭᖅᑐᓂᒃ ᑲᓇᑕᒥ ᐊᕕᒃᑐᖅᓯᒪᔪᓂ, ᑭᖑᓂᐊᒍᓪᓗ NBA ᐱᙳᐊᕈᓯᕐᓂᒃ. ᐃᑲᔪᕋᓱᒃᐸᖕᓂᖓᓄᑦ ᑲᓇᖕᓇᖅᐸᓯᐊᓂ, ᐊᐱᕆᔭᐅᓚᐅᖅᐳᖅ ᓂᕈᐊᒐᒃᓴᐅᖁᔭᐅᓪᓗᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᒐᕙᒪᓕᕆᓂᕐᒧᑦ ᐊᑭᕋᖃᖅᖢᓂ ᒪᐃᒃ ᕼᐋᕐᑯᐊᑦᒥᒃ. ᓵᓚᖃᓚᐅᙱᑦᑐᖅ, ᑭᓯᐊᓂ ᐃᓕᑦᑎᕐᔪᐊᓚᐅᖅᐳᖅ ᒐᕙᒪᓕᕆᓂᕐᒥᒃ. 

ᓂᐅᕐᕈᑎᒋᔪᒪᓪᓗᒍ ᑐᔪᕐᒥᕕᒃ ᐃᖅᑲᓇᐃᔭᕐᕕᒋᔭᖓ, ᓴᖅᑭᑎᑦᑎᓚᐅᖅᐳᖅ ᐱᓕᕆᐊᒃᓴᒥᒃ ᑲᑎᙵᑎᑦᑎᓪᓗᓂ ᖃᓄᐃᓕᐅᖅᑕᐅᕙᓚᐅᖅᑐᓂᒃ ᐃᓕᓐᓂᐊᖅᑎᑦᑎᓂᕐᒥᒃ ᐊᒻᒪ ᑮᓇᐅᔭᓂᒃ ᐊᑐᓗᐊᖅᑕᐃᓕᒪᓂᕐᒥᒃ ᓄᓇᓕᖕᓂ ᐅᐸᒍᒥᓇᖅᑐᓂᒃ ᑕᐃᔭᐅᔪᖅ ᓄᓇᓕᐸᐅᔭᐃᑦ ᓄᓇᕐᔪᐊᑉ ᓯᓚᑖᓅᕈᓐᓇᐅᑎ. ᐱᓕᕆᐊᖃᓚᐅᖅᐳᖅ ᓄᓇᓕᐸᐅᔭᐃᑦ ᓯᓚᑖᓅᕈᓐᓇᐅᑎᓂᒃ ᓵᖓᑕ ᓴᓂᕌᓂ ᐃᖅᑲᓇᐃᔭᖅᑎᓪᓗᒍ ᑐᔪᕐᒥᕕᖕᒥ ᒪᕐᕉᖕᓄᑦ ᐊᕐᕌᒎᖕᓄᑦ ᐱᕈᖅᓴᐃᓪᓗᓂ ᒪᒃᑯᒃᑐᓂᒃ ᖃᑕᙳᑎᖏᓐᓂᒃ ᐊᖏᖅᑕᐅᓪᓗᓂ ᑐᔪᕐᒥᕕᖕᒥ ᓇᖕᒥᓂᖃᖅᑎᐅᔪᒧᑦ. Expedia ᐊᒻᒪ ᐳᓚᕋᖅᑐᓕᕆᓂᕐᒧᑦ ᐊᐅᓚᑦᑎᔨᑦ ᓂᐅᕐᕈᑎᖃᓚᐅᖅᐳᑦ ᐱᖁᑎᖏᓐᓂᒃ ᐊᒻᒪ ᓇᖕᒥᓂᕆᔭᖓ ᐱᐅᓚᐅᖅᐳᖅ. ᓴᖅᑭᑎᑦᑎᓚᐅᖅᐳᖅ ᐊᔾᔨᑲᓴᖏᓐᓂᒃ ᐱᓕᕆᐊᒃᓴᓂᒃ ᑲᓇᑕᓕᒫᒥ.

ᕚᓇᑐ ᐅᖃᓕᒫᒐᓕᐅᖅᑎᙳᓚᐅᖅᓯᒪᕗᖅ, 55-ᓂᒃ ᐅᖃᓕᒫᒐᓕᐅᖅᖢᓂ ᐅᑭᐅᑦ ᑕᓪᓕᒪᑦ ᐃᓗᐊᓂ. ᐊᐃᑦᑖᖑᒐᓗᐊᖅ, ᐅᖃᓕᒫᒐᓕᐅᕐᓂᕐᓴᐅᓕᓚᐅᕐᓯᒪᔪᖅ ᓂᐅᕐᕈᑎᒋᙱᖔᖅᖢᓂᒋᑦ ᐊᒻᒪ ᑲᑕᓚᐅᕐᓯᒪᓪᓗᓂ. ᓇᖕᒥᓂᕆᔭᒥᓂᒃ ᐱᒋᐊᖅᑎᑦᑎᒃᑲᓐᓂᖅᓯᒪᓕᖅᐳᖅ ᓄᑖᒥ ᓇᖕᒥᓂᖃᕐᓂᕐᒧᑦ ᐱᓕᕆᔾᔪᓯᖃᓕᖅᖢᓂ ᑭᓱᑐᐃᓐᓇᐃᓪᓗ ᐱᐅᓯᕚᓪᓕᖅᓯᒪᓕᖅᖢᑎᒃ. "ᐃᓚᖓᑦ ᐅᖃᐅᑎᓂᐊᖅᑕᕋ ᐃᓄᖕᓄᑦ ᒫᓐᓇ ᐃᑲᔪᖅᑕᐅᔪᒪᔭᕆᐊᖃᕐᓂᔅᓯᓐᓂᒃ. ᐅᕙᑦᑎᑑᙱᓪᓗᑎᑦ ᓇᖕᒥᓂᕐᓗ ᐱᓕᕆᓇᓱᒡᓗᑎᑦ.  ᐃᒻᒪᖄ ᐅᒃᐱᕆᔭᖃᑦᑎᐊᙱᖦᖢᖓ ᐱᕈᖅᓴᔭᐅᓂᕆᓚᐅᖅᑕᓐᓄᑦ, ᑭᓯᐊᓂ ᐃᑲᔪᖅᑕᐅᔪᒪᔭᕆᐊᖃᖅᐳᑎᑦ ᐃᒻᒪᖄᓗ ᐃᓕᓴᐃᔨᖃᒃᑲᓐᓂᕐᓗᑎᑦ ᐃᓕᖕᓂᒃ ᐃᑲᔪᕈᓐᓇᖅᑐᓂᒃ ᐃᓱᒪᒋᔭᕐᓄᑦ ᐅᕝᕙᓘᓐᓃᑦ ᖃᓄᐃᓕᐅᕐᓂᕆᔭᕐᓄᑦ ᐃᓅᓯᕐᓂ," ᐅᓂᒃᑳᕆᓪᓗᓂ. 

"ᑲᔪᖏᖅᓴᐃᔨᖃᕆᐊᖃᑐᐃᓐᓇᙱᓚᒍᑦ 18-ᓂᒃ ᐅᑭᐅᖃᓕᕌᖓᑦᑕ. ᑲᔪᖏᖅᓴᐃᔨᖃᕆᐊᖃᓲᖑᒐᑦᑕ 28, 38, 48-ᓂᒃ ᐅᑭᐅᖃᓕᕌᖓᑦᑕ ᐃᓛᓐᓂᒃᑯᑦ. ᑲᔪᖏᖅᓴᐃᔨᖃᕆᐊᖃᖅᑐᒍᑦ ᐃᓅᓯᑦᑎᓐᓂ. ᐃᖅᑲᐅᒪᔭᕆᐊᖃᖅᐳᒍᑦ ᐃᑲᔪᕋᓱᒋᐊᖃᕐᓂᑦᑎᓐᓂᒃ ᐅᕙᑦᑎᓐᓄ ᐊᒻᒪ ᐃᓛᒃ, ᑕᐸᐃᕐᓂᐊᖅᐳᑎᑦ ᖃᔅᓯᑦ ᐃᓄᐃᑦ ᐃᓕᖕᓂᒃ ᐃᒃᐱᒍᓱᑦᑎᐊᕐᓂᖏᓐᓂᒃ," ᕚᓇᑐ ᐅᖃᕆᓪᓗᓂ. 

ᓇᓗᓇᐃᒃᑯᑕᖅᑖᓚᐅᕆᕗᖅ Explore Canada-ᑯᓐᓄᑦ. ᑕᐅᑐᙳᐊᖅᑕᖓ ᖃᐅᔨᓇᓱᖕᓂᕐᒧᑦ ᑲᓇᑕᒥ ᓂᐅᕐᕈᑎᖃᕈᒪᓂᐅᕗᖅ ᐱᓕᕆᐊᒃᓴᒥᒃ ᐃᓄᐃᑦ ᐃᓕᑦᑎᔪᓐᓇᕐᓗᑎᒃ ᐱᐅᓯᕆᔭᐅᕙᓚᐅᖅᑐᓂᒃ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑲᓇᑕᒥ ᓇᒧᙵᐅᕙᓪᓕᐊᑎᓪᓗᒋᑦ ᑲᓇᑕᓕᒫᒧᑦ. ᖃᕋᓴᐅᔭᒃᑰᕈᑎᒃᑰᖓᓂᐊᖅᑐᖅ ᐊᒻᒪ ᕿᓂᖅᑐᖅ ᐳᓚᕋᑦᑐᓕᕆᓂᕐᒥᒃ ᓄᓇᖃᖅᑳᖅᑐᑦ ᓄᓇᓕᖏᓐᓄᑦ, ᐊᐱᕆᓪᓗᓂᒋᑦ ᓄᓇᓖᑦ ᐅᓂᒃᑲᐅᓯᖃᖁᓪᓗᒋᑦ ᖃᓄᐃᓕᐅᖅᑕᐅᕙᓚᐅᖅᑐᓂᒃ ᐳᓚᕋᖅᑎᓄᑦ.

ᐊᕝᕕᐊᕈᑎᖃᓕᕌᖓᒥ, ᕚᓇᑐ ᐊᒃᓱᕈᕈᑎᖃᓚᐅᖅᐳᖅ ᓇᖕᒥᓂᖃᕐᓂᕐᒧᑦ ᐱᓕᕆᔾᔪᓯᖓᓂ ᓲᖃᐃᒻᒪ ᐊᑭᓖᑎᑦᑎᓚᐅᙱᓐᓇᒥ ᐱᔪᒥᓇᖅᑐᓂᒃ ᐃᓚᐅᖃᑕᐅᓂᕐᒧᑦ ᐱᓕᕆᐊᖑᔪᒥ ᓯᕗᓪᓕᕐᒥ. ᖃᐅᔨᒪᓚᐅᙱᑦᑐᖅ ᖃᓄᖅ ᐃᔾᔪᐊᖅᓯᔭᕆᐊᒃᓴᖅ ᐱᙳᐊᖅᑎᓂᒃ ᐊᔪᕈᓐᓃᖅᓴᖅᑎᑦᑎᓂᕐᒥᒃ ᑭᓯᐊᓂ ᓱᒃᑲᐃᒡᓕᕚᓪᓕᖅᓯᒪᓂᖓ ᐋᓐᓂᐊᕕᒡᔪᐊᕐᓇᖅ ᐃᑲᔪᓚᐅᖅᐳᖅ ᑕᒪᑐᒥᙵ. ᑖᓐᓇ ᐱᓕᕆᐊᖑᔪᖅ ᓅᓚᐅᖅᐳᖅ ᐱᓕᕆᔾᔪᑎᓄᑦ ᐱᑎᑦᑎᕙᒃᑐᓄᑦ ᖃᖓᑦᑕᐅᑎᓂᒃ ᑭᓯᐊᓂ ᖃᖓᑦᑕᐅᑎᑖᖅᑎᑦᑎᕙᙱᖦᖢᑎᒃ ᐋᓐᓂᐊᕕᒡᔪᐊᕐᓇᖅ ᐱᔾᔪᑎᒋᓪᓗᒍ. ᒫᓐᓇᓕ, ᓵᙵᔭᖃᖅᐳᖅ ᐊᒃᓱᕈᕐᓇᖅᑐᓂᒃ ᐊᖏᒡᓕᕙᓪᓕᐊᑎᑦᑎᓂᕐᒥᒃ, ᓇᓂᓯᓂᕐᒥᒃ ᑮᓇᐅᔭᖁᑎᒋᔭᐅᔪᓂᒃ ᖃᐅᔨᓇᓱᖕᓂᕐᒥᒡᓗ ᖃᓄᖅ ᑕᒪᒃᑯᐊ ᖁᕝᕙᓯᖕᓂᖅᓴᒧᐊᖅᑎᑦᑐᓐᓇᕐᒪᖔᒋᑦ ᓈᒻᒪᒃᑐᓂᒃ ᐱᓕᕆᖃᑎᒋᔭᒥᓂᒃ. ᑭᖑᓪᓕᕐᒥ ᐱᓕᕆᐊᕆᓂᐊᓕᕐᒥᔭᖓ ᑐᓴᕋᓱᒃᐸᒃᖢᓂ ᑕᒪᐃᓐᓂᒃ ᐱᕙᓪᓕᐊᔪᓕᕆᔨᑦ ᑎᑎᕋᕐᕕᖏᓐᓂᒃ ᐊᑐᓂ ᓄᓇᓕᕐᔪᐊᓂ ᖃᐅᔨᓇᓱᒡᕕᒃ ᑲᓇᑕᒥ ᐱᖁᑎᖏᓐᓂᒃ ᖃᐅᔨᒪᓪᓗᓂ ᐱᐊᓂᒃᑎᓪᓗᒍ ᐱᕚᓪᓕᕈᑕᐅᓂᐊᕐᓂᖓᓂᒃ ᓄᓇᓕᖕᓄᑦ.  

"ᐃᓅᓯᕆᔭᐃᑦ ᒪᓕᒡᓗᓂ ᐃᓅᓯᖃᕈᓐᓇᙱᓚᑎᑦ. ᑲᑎᖦᖢᒋᑦ ᖁᕝᕙᓯᖕᓂᕆᔭᓕᒫᕗᑦ ᐊᑦᑎᖕᓂᖅᓴᕗᓪᓗ." 

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᐱᕐᔪᐊᖑᕗᑎᑦ", ᖃᐅᔨᒪᓪᓗᓂ ᖃᓄᖅ ᐃᒻᒥᓂᒃ ᐅᐱᒋᑦᑎᐊᕐᓂᖓ ᐊᒃᓱᕈᕈᑎᖃᓚᐅᕐᒪᖔᑦ ᑎᒍᐊᙳᐊᖃᕐᓂᕐᒧᑦ. ᐅᔾᔨᕆᔭᕆᐊᖃᓚᐅᖅᑕᖓ ᓱᓕᓂᕋᐃᔾᔪᑎ ᐱᔭᕆᐊᖃᖅᑕᖓ ᐊᑐᐃᓐᓇᐅᓂᖓᓂᒃ ᐃᓗᒥᒍᑦ. "ᑕᕐᕋᖅᑑᑎᒧᑦ ᑕᑯᒋᐊᑐᐃᓐᓇᕆᑦ. ᐃᓕᖕᓂᒃ ᓇᒡᓕᒋᔭᕆᐊᖃᖅᐳᑎᑦ. ᑐᑭᓯᐅᒪᔭᕆᐊᖃᖅᐳᑎᑦ ᓴᓇᓯᒪᑦᑎᐊᕋᕕᑦ ᐊᒻᒪᓗ ᐱᓐᓇᕆᔭᐅᑦᑎᐊᕋᕕᑦ ᐊᒻᒪᓗ ᓇᓂᓯᔭᕆᐊᖃᖅᑐᑎᑦ ᐃᓄᖕᓂ ᖃᓂᒋᔭᕐᓂ. ᑭᓇᑭᐊᖅ ᐃᓕᖕᓂᒃ ᓇᒡᓕᒍᓱᙱᒃᑯᓂ ᐃᑲᔪᖅᑐᐃᙱᒃᑯᓂᓗ, ᑕᐃᒪᓕ ᖃᐅᔨᒪᔪᑎᑦ, ᑕᒪᓐᓇ ᑲᒪᒋᔭᕆᐊᖃᕋᕕᐅᒃ. ᐊᓈᓇᒐ ᑕᒪᑐᒥᖓ ᑲᒪᓚᐅᖅᓯᒪᙱᑦᑐᖅ, ᐊᒻᒪᓗ ᐱᑦᑎᐊᖅᑕᐅᕙᓚᐅᙱᑦᑐᖅ ᐊᒻᒪᓗ ᐊᓯᓕᒫᖏᑦ. ᖃᓄᕈᓘᔭᖅ ᐱᐅᙱᑦᑐᐊᓗᖕᓂᒃ ᐃᖅᑲᐅᒪᔭᖃᖅᐳᖓ ᐊᒻᒪ ᑕᐃᒪᐃᑦᑐᓂᒃ ᐱᕈᖅᓴᓪᓗᖓ, ᑭᓯᐊᓂ ᐃᓱᒪᒋᙳᐊᕈᒃ ᖃᐅᔨᒪᓇᔭᓚᐅᕈᓂ ᐱᒻᒪᕆᐅᓂᖓᓂᒃ," ᐅᖃᖅᑐᖅ. 

ᒪᑭᑕᑦᑎᐊᖏᓐᓇᕋᓱᒃᖢᓂ ᖃᓄᐃᙱᑦᑎᐊᕐᓂᕐᒥᓂ, ᕚᓇᑐ ᒑᕝ ᐴᖅᓯᕙᒃᐳᖅ, ᐱᕕᖃᖅᑎᖦᖢᓂᐅᒃ ᐱᓱᒍᓐᓇᕐᓂᕐᒥᒃ, ᐃᓱᒪᔪᓐᓇᕐᓂᕐᒥᒃ ᐊᒻᒪ ᓇᒧᙵᐅᑲᑕᖕᓂᕐᒥᒃ. ᐱᙳᐊᖅᑐᒦᖃᑎᖃᖅᐸᒃᐳᖅ ᐊᓯᒥᓂᒡᓗ ᐃᑲᔪᕈᒪᑦᑎᐊᖅᖢᓂ. ᐅᒃᐱᕈᓱᒃᐳᖅ ᐃᓅᖃᑎᖃᑦᑎᐊᕈᓐᓇᕐᓂᕐᒥᒃ, ᖃᓄᐃᙱᑦᑎᐊᕈᓐᓇᕐᓂᕐᒥᒃ, ᐊᓂᖃᑦᑕᕐᓂᕐᒥᒃ ᖁᕕᐊᓱᒃᑎᑦᑎᒋᐊᖅᑐᕐᓗᓂ, ᐊᒻᒪ ᓄᓇᓕᖕᓂ ᐱᓕᕆᔭᕆᐊᖃᕐᓂᕐᒥᒃ. "ᑕᒪᓐᓇ ᐱᕕᒃᓴᖃᖅᑎᑦᑕᕆᐊᖃᕋᑦᑎᒍᑦ ᐅᕙᑦᑎᓐᓄᑦ, ᓲᖃᐃᒻᒪ ᐃᓄᖕᓂ ᑭᓯᐊᓂ ᐅᖓᓯᒃᑐᒧᐊᖅᑎᑦᑎᔪᓐᓇᕋᑦᑕ," ᐅᖃᖅᑐᖅ. 

ᓯᕗᓂᒃᓴᒧᑦ ᑕᐅᑐᒃᖢᓂ ᐅᖃᖅᑐᖅ, "ᐃᓄᐃᑦ ᐅᕙᓐᓂᒃ ᖃᐅᔨᒪᔪᑦ ᐱᓕᕆᑦᑎᐊᓛᖑᔪᒪᒐᒪ ᓇᖕᒥᓂᖁᑎᖃᖅᑎᐅᓗᖓ ᓄᓇᕐᔪᐊᓕᒫᒥ. ᕿᓂᕐᓂᖅ ᑲᓇᑕᒥ ᐱᐅᓛᖑᖁᔭᕋ ᑕᐃᒪᙵᑦ ᐸᓚᐅᒑᖅ ᐊᒡᒍᖅᓯᒪᓚᐅᖅᑎᓪᓗᒍ. ᑮᓇᐅᔭᒨᖓᙱᓚᖅ... ᐱᔾᔪᑎᖃᖅᐳᖅ ᐊᑐᕐᓂᕐᒥᒃ ᑐᓂᕐᕈᓯᐊᓂᒃ ᐱᙳᐊᖅᑎᐅᑉ ᑐᓂᓯᒪᔭᖏᓐᓂᒃ."

"ᐃᓄᐃᑦ ᕿᒥᕐᕈᖁᕙᒃᑲ ᑲᓇᑕᒥᒃ, ᐱᖁᑎᒃᑲᓄᑐᐊᖑᙱᑦᑐᖅ. ᑐᑭᓯᖁᕙᒃᑲ ᐱᐅᓯᕆᔭᐅᕙᓚᐅᖅᑐᓂᒃ ᐊᒻᒪ ᐃᓕᖅᑯᓯᑦᑎᓐᓂᒃ.... ᐅᕙᑦᑎᓐᓂᒃ ᐊᔭᐅᕆᙱᖔᖅᖢᑎᒃ, ᐅᕙᑦᑎᓐᓂᒃ ᐊᒃᑐᖅᓯᓯᒪᐃᓐᓇᖅᐳᑦ ᑕᐅᕗᖓᓕᒫᖅ. ᐊᔭᐅᖅᑐᕆᐊᖃᓕᖅᑕᕗᑦ ᓯᕗᒃᑲᖅᑕᐃᓗᑕᓗ, ᒪᓕᙱᖔᕐᓗᑕ. ᑕᐃᒪᓐᓇ ᐅᓂᒃᑳᖅᑐᐊᖃᕋᓱᑐᐃᓐᓇᖅᐳᖓ ᐱᓕᕆᐊᑦᑎᓐᓄᑦ, ᐊᐅᓪᓚᑲᑕᓕᕈᑦᑕ, ᐃᓕᑦᑎᕙᓪᓕᐊᓂᐊᕋᑦᑕ, ᖃᐅᔨᓇᓱᒡᓗᑕ, ᐊᒻᒪ ᑐᑭᓯᓂᐊᖅᐳᒍᑦ, ᐊᒻᒪ ᐃᓱᒪᕗᖓ ᓴᐃᒻᒪᖃᑎᒌᖕᓂᕐᒧᑦ," ᕚᓇᑐ ᓂᐱᖅᑯᖅᑐᓪᓗᓂ ᑕᐅᑐᙳᐊᖅᐳᖅ.

ᐊᖏᒡᓕᕙᓪᓕᐊᑎᑦᑎᓪᓗᓂ ᓄᓇᓕᐸᐅᔭᐃᑦ ᓯᓚᑖᓅᕈᓐᓇᐅᑎᓂᒃ ᐃᓄᖕᓂ ᕿᒥᕐᕈᑎᑦᑎᓕᖅᖢᓂ ᑲᓇᑕᒥ ᐊᒻᒪ ᖃᓄᐃᓕᐅᖅᑕᐅᕙᓚᐅᖅᑐᓂᒃ, ᕌᓐᑎ ᕚᓇᑐ ᓇᓂᓯᕗᖅ ᓄᑖᒥᒃ ᐊᖅᑯᑎᒃᓴᒥᒃ ᐊᔪᖅᓴᙱᓐᓂᖅᓴᐅᓂᕐᒧᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᐳᓚᕋᖅᑐᓕᕆᓂᒃᑯᑦ. ᖃᐅᔨᕙᓪᓕᐊᓪᓗᓂ ᓇᑭᙶᕐᓂᕐᒥᓂᒃ ᐊᒻᒪ ᖃᑕᙳᑎᒌᑦ ᐊᑐᖅᐸᓚᐅᖅᑕᖏᓐᓂᒃ ᐱᒻᒪᕆᐅᓚᐅᖅᐳᖅ ᐃᖏᕐᕋᓂᕆᓚᐅᖅᑕᖓ ᐃᑲᔪᖅᐸᒃᖢᓂᓗ ᐳᓚᕋᖅᑎᓂᒃ ᐃᓕᑦᑎᕙᓪᓕᐊᓪᓗᓂ ᐱᒻᒪᕆᐅᔪᓂᒃ ᓱᓕᔪᓂᒃ ᑭᖑᓪᓕᕐᒥ ᓴᓇᐅᒐᕐᒥᒍᑦ. ᑕᐅᑐᙳᐊᒐᖃᖅᖢᓂ ᑲᑐᔾᔨᓗᓂ ᑲᔪᓯᑦᑎᐊᕐᓂᕐᒥᒃ ᐊᒻᒪ ᐆᒻᒪᑎᖃᑦᑎᐊᕐᓂᕐᒥᒃ ᓴᐃᒻᒪᖃᑎᒌᖕᓂᕐᒧᑦ, ᓯᕗᒻᒧᐊᖅᐸᓪᓕᐊᕗᖅ ᓇᒧᙵᐅᕙᓪᓕᐊᓂᐅᔪᒥ ᓯᒡᔭᖅᐸᓯᖕᒧᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.