"ᓴᐸᖓᓕᖅᓱᐃᕙᓪᓕᐊᓕᓚᐅᖅᐳᖓ ᒪᒥᓴᕐᓂᕐᒧᑦ... ᑲᑎᙵᓕᒃᑲᓐᓂᕈᑎᒋᓪᓗᒍ ᐃᓕᖅᑯᓯᓐᓄᑦ, ᑭᓯᐊᓂᑦᑕᐅᖅ ᐱᒃᑯᒍᓱᓪᓚᕆᒃᖢᖓ ᑭᓇᐅᓂᓐᓂᒃ," ᐅᖃᓚᐅᖅᐳᖅ ᕋᐃᓕᓐ ᓱᐴᕐ. ᑎᓕᕗᐊ ᓄᓇᖓᓂᙶᖅᑐᖅ, ᓚᓐᑕᓐ, ᐋᓐᑎᐅᕆᐅ ᓂᒋᐊᓂ. ᐃᓚᒋᔭᐅᔪᖅ Turtle Clan-ᑯᓐᓄᑦ ᐱᕈᖅᓴᓂᑰᓪᓗᓂᓗ ᑕᐅᕙᓂ ᑭᓯᐊᓂ ᐊᒃᑐᐊᓂᖃᙱᖦᖢᓂ ᓄᓇᓕᒋᔭᒥᓄᑦ. ᓴᓇᙳᐊᖅᑎᐅᕗᖅ, ᐃᓕᓐᓂᐊᖅᑎᑦᑎᔨᐅᓪᓗᓂ ᐊᒻᒪ ᑲᔪᖏᖅᓴᐃᔨᐅᓪᓗᓂ.

ᓱᐳᕐ ᐱᒋᐊᓚᐅᖅᓯᒪᕗᖅ ᓴᐸᖓᓕᕆᓂᕐᒥᒃ ᑐᕆᓐᑦ ᓯᓚᑦᑐᖅᓴᕐᕕᒡᔪᐊᕐᒥ. "ᖃᐅᔨᓚᐅᖅᐳᖓ ᐊᔪᙱᑦᑎᐊᕐᓂᓐᓂᒃ, ᖃᐅᔨᒪᓚᐅᖅᑐᖓ ᓴᐸᖓᕐᓂᒃ ᑲᑎᑎᕆᔪᓐᓇᕐᓂᓐᓂᒃ ᐊᒻᒪ ᓴᓇᔪᓐᓇᕐᓂᓐᓂᒃ," ᐃᖅᑲᐅᒪᔪᖅ.  ᓄᓇᓕᓕᐅᓚᐅᖅᐳᖅ ᓴᐸᖓᓕᕆᔨᓂᒃ ᐃᓕᑦᑎᔪᒪᔪᓂᒃ ᐊᒻᒪ ᐱᓕᕆᖃᑎᒌᒍᒪᔪᓂᒃ ᐱᖃᓐᓇᕆᔭᐅᓗᑎᒃ ᐊᒻᒪ ᓴᓇᙳᐊᖅᑎᐅᓗᑎᒃ.

ᕋᐃᓕᓐ ᑐᕆᓐᑐᒦᑎᓪᓗᒍ, ᐃᓕᓐᓂᐊᓚᐅᖅᐳᖅ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᖏᓐᓂᒃ, ᐊᓂᒍᐃᓪᓗᓂ ᐊᑎᓕᐅᖅᑕᐅᖃᑕᐅᓪᓗᓂ ᓄᓇᖃᖅᑳᖅᓯᒪᔪᓄᑦ ᐃᓕᓴᐃᔨᐅᓂᕐᒧᑦ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ. ᒫᓐᓇ ᑕᐅᑐᒐᖃᓪᓗᐊᑕᖅᐳᖅ ᐃᒻᒥᓂᒃ ᐱᕙᓪᓕᐊᑎᑦᑎᓂᕐᒥᒃ ᓴᓇᙳᐊᖅᑎᐅᓂᕐᒥᒃ ᑭᓯᐊᓂ ᑕᑯᕙᒃᐳᖅ ᖃᓄᖅ ᓴᐸᖓᓕᖅᓱᐃᕙᖕᓂᖓ ᐊᖅᑯᑎᒋᔭᐅᔪᓐᓇᕐᓂᖓᓂᒃ ᒪᑐᐃᖅᑎᑦᑎᓗᓂ ᐃᓱᒪᒥᓂᒃ ᐊᔪᕈᓐᓃᖅᓴᖅᑎᑕᐅᔪᓐᓇᕐᓂᕐᒥᒃ ᐃᓕᓐᓂᐊᕐᕕᐊᕈᓯᕐᒥ, ᑕᐃᒪᓐᓇᑦᑕᐅᖅ ᐱᓕᕆᐊᕆᔭᒥᓄᑦ ᐃᓕᑦᑎᓯᒪᓂᕐᒥᓄᑦ ᓴᖅᑭᑎᑦᑎᔪᓐᓇᕐᓂᕐᒥᒃ ᐃᓕᑦᑎᕙᓪᓕᐊᓂᕐᒧᑦ ᐱᕕᒃᓴᐅᔪᓐᓇᖅᑐᓂᒃ. "ᐱᔾᔪᑎᖃᓗᐊᕆᕗᖅ ᓇᖕᒥᓂᖅ ᑭᓇᐅᓂᓐᓂᒃ ᐊᒻᒪ ᑭᓇᐅᖕᒪᖔᕐᒪ ᐃᖅᑲᓇᐃᔮᒧᑦ, ᐊᒻᒪ ᐃᓱᒪᔪᖓ ᐊᒥᓱᑦ ᐃᓕᓐᓂᐊᖅᑎᑦ ᑕᒪᑐᒥᖓ ᖁᕕᐊᒋᔭᖃᕐᓂᖏᓐᓂᒃ," ᐅᖃᕆᓪᓗᓂ.

ᐅᖃᐅᔾᔨᒋᐊᕈᑎᒋᔭᖓ ᐃᓕᓐᓂᐊᖅᑎᓄᑦ ᐊᐅᓪᓚᖅᑐᓄᑦ ᓄᓇᓕᖏᓐᓂ ᐃᓕᓐᓂᐊᕆᐊᕐᓗᑎᒃ ᓯᓚᑦᑐᖅᓴᕐᕕᖕᒥ ᑐᙵᕕᖃᖅᐳᖅ ᓇᖕᒥᓂᖅ ᐊᑐᖅᓯᒪᔭᖓᓂ ᓅᓐᓂᕐᒥᓂ. "ᐊᔪᕐᓇᕐᓂᐊᖅᑐᖅ. ᐃᓛᓐᓂᒃᑯᑦ ᐃᓄᑑᓇᕈᓐᓇᖅᐳᖅ. ᑕᒪᓐᓇ ᐱᕕᒃᓴᑦᑎᐊᕙᐅᓚᐅᖅᐳᖅ ᐅᕙᓐᓄᑦ ᐃᓱᒪᒐ ᒪᑐᐃᙶᖅᑎᖦᖢᒍ, ᓱᓕᓪᓗᖓᓗ, ᐃᓕᑦᑎᕚᓪᓕᕐᔪᐊᖅᓯᒪᕗᖓ ᐊᑕᐅᓯᑐᐊᑯᓗᖕᒥ ᐃᓂᒋᔭᕐᓂ. ᐊᒥᓱᐊᓗᖕᓂ ᐱᖃᓐᓇᕆᔭᖅᑖᖅᓯᒪᕗᖓ ᐊᒻᒪ ᑲᑎᙵᖃᑎᖃᓕᖅᖢᖓ ᑕᒫᓂ, ᐃᓅᓯᓕᒫᓐᓂ ᑕᒫᓃᓕᖅᐳᖓ, ᑭᓯᐊᓂ ᐱᒻᒪᕆᐊᓘᕗᖅ, ᐊᒻᒪ ᐆᒻᒪᑎᒧᑦ ᐅᖁᒪᐃᓪᓕᐅᕈᑕᐅᕙᒃᖢᓂ ᑲᑎᙵᔪᓐᓃᖅᖢᓂ ᖃᑕᙳᑎᖕᓂ ᐊᒻᒪ ᑕᒪᒃᑯᓂᖓ ᐱᓪᓗᐊᑕᕐᓂᒃ ᐃᓅᖃᑎᒌᒍᓯᕐᓂᒃ ᐃᓅᓯᑦᑎᓐᓂ," ᐅᓂᒃᑳᕆᓪᓗᓂ.

ᐃᓱᒪᒥᒍᑦ ᖃᓄᐃᖏᑦᑎᐊᖁᓪᓗᓂᐅᒃ, ᕋᐃᓕᓐ ᐅᑎᖅᐳᖅ ᐃᓅᓕᓴᐅᑎᓄᑦ ᐊᒃᓴᓗᐊᓕᖕᒧᑦ ᐃᓕᓴᐃᔾᔪᑎᓄᑦ, ᑕᐅᑐᒃᖢᓂ ᑭᓱᓂᒃ ᑕᐅᑐᒐᖃᕐᓂᖅᓴᐅᔭᕆᐊᖃᕐᒪᖔᑦ ᖃᐅᑕᒫᑦ ᓇᓕᒧᒌᓕᒃᑲᓐᓂᖁᓪᓗᒍ. "ᐋᖅᑭᒃᓯᓂᖅ ᐱᕕᒃᓴᒥᒃ ᓇᖕᒥᓂᖅ ᑲᒪᒋᑦᑎᐊᕐᓂᕐᒧᑦ ᐱᒻᒪᕆᐊᓘᕗᖅ, ᖃᐅᔨᒪᓪᓗᖓᓗ ᑕᐃᒪᓐᓇ ᐅᖃᕈᓐᓇᖅᑐᖓ, ᑭᓯᐊᓂ ᐱᓕᕆᓂᐊᕐᓗᓂ, ᐊᔪᕐᓇᕐᓂᖅᓴᒻᒪᕆᐅᕗᖅ," ᐅᖃᖅᑐᖅ. ᖃᐅᑕᒫᖅᓯᐅᑎᓂᒃ ᑎᑎᕋᖃᑦᑕᕐᓂᖅ, ᓴᓇᙳᐊᖃᑦᑕᕐᓂᖓ ᐊᒻᒪ ᓴᓇᕈᓘᔭᖃᑦᑕᕐᓂᖅ ᐊᑲᐅᓯᕚᓪᓕᕈᑎᒋᕙᐅᒃ. "ᓴᐸᖓᓕᕆᓂᖅ ᒪᒥᓴᕐᓂᐅᕗᖅ, ᐊᒻᒪ ᐊᒥᓱᑦ ᐃᒃᐱᖕᓂᐊᓂᐅᔪᑦ ᐊᒻᒪ ᐃᒃᐱᖕᓂᐊᓂᐅᔪᑦ ᐊᒻᒪ ᐃᓅᓯᓐᓂ ᐊᑐᖅᐸᓪᓕᐊᔭᒃᑲ," ᐅᓂᒃᑳᖅᐳᖅ, ᐅᖃᕆᓪᓗᓂ ᐅᖃᐅᔾᔭᐅᓯᒪᓂᕐᒥᓂᒃ ᓴᐸᖓᓕᖅᓯᖃᑦᑕᖁᔭᐅᙱᖦᖢᓂ ᐱᐅᙱᑦᑐᒥᒃ ᐆᒻᒪᑎᒃᑯᑦ ᐅᖁᒪᐃᑦᑐᒥᒡᓘᓐᓃᑦ ᑭᓯᐊᓂ ᑕᐃᔅᓱᒧᖓ, ᒪᒥᓴᖅᐸᓪᓕᐊᓂᖓᑕ ᐃᓚᒋᖕᒪᒍ.

ᓯᕗᓪᓕᖅᐹᖑᓪᓗᓂ ᓴᐸᖓᓕᖅᓱᐃᓂᕐᒧᑦ ᐱᓕᕆᐊᖓ ᓯᓚᑦᑐᖅᓴᕐᕕᒡᔪᐊᕐᒥ ᐱᓕᕆᐊᒃᓴᕆᔭᐅᓚᐅᖅᐳᖅ. ᕋᐃᓚᓐ ᐅᔭᒥᓕᐅᓚᐅᖅᐳᖅ ᐱᙳᐊᖅᑕᐅᓂᖓᑕ ᐅᓂᒃᑳᖓᓂᒃ ᓯᑲᐃ ᐊᕐᓇᐅᑉ ᑕᖅᑭᓄᑦ ᐱᖓᓱᓄᑦ. ᑕᖅᓴᕆᔭᐅᕗᖅ ᓖᓇᑉ ᓴᓇᐅᒐᖏᓐᓄᑦ ᑐᙵᕕᒋᔭᐅᓪᓗᓂᓗ ᑭᓱᓕᒫᓄᑦ ᐱᓕᕆᐊᕆᓯᒪᔭᖏᓐᓄᑦ ᑕᐃᒪᙵᓂᑦ. ᑭᖑᒧᑦ ᑕᑯᓪᓗᓂ, ᓈᒻᒪᙱᓐᓂᖏᓐᓂᒃ ᑕᑯᕗᖅ ᐊᒻᒪ ᐱᓕᕆᐊᕆᒃᑲᓐᓂᕈᒪᓪᓗᓂᐅᒃ ᑕᓪᓕᒪᒋᓕᖅᑕᖓᓂ ᐊᕐᕌᒍᖓᓂ ᓇᖕᒥᓂᕆᔭᐅᓕᖅᖢᓂ. ᑖᓐᓇ ᐊᑕᐅᓯᖅ ᐱᓕᕆᐊᒃᓴᕆᑎᑕᐅᔪᖅ ᑐᙵᕕᒋᔭᐅᓕᓚᐅᖅᐳᖅ ᓇᖕᒥᓂᕆᔭᒥᓄᑦ ᐃᓕᓴᐃᓂᕐᒧᓪᓗ ᐊᑐᖅᐸᒃᑕᒥᓄᑦ, ᐱᕕᒃᓴᖃᖅᑎᑦᑎᓚᐅᖅᐳᖅ ᐅᒃᐱᕆᔭᒥᓂᒃ ᐆᒃᑐᕈᒪᓪᓗᓂᐅᒃ ᖃᐅᔨᓇᓱᒃᖢᓂᓗ ᓇᒧᙵᐅᕙᓪᓕᐊᖕᒪᖔᑦ ᑕᑯᑎᑦᑎᔪᓐᓇᖅᖢᓂᓗ ᐃᓕᑦᑎᕙᓪᓕᐊᓂᕆᔭᒥᓂᒃ ᐊᔾᔨᒋᙱᑕᖓᒍᑦ. ᐱᒻᒪᕆᐊᓗᖕᒥᒃ ᐅᓂᒃᑲᐅᓯᖃᓚᐅᖅᐳᖅ, ᓯᕗᒻᒧᐊᒃᐸᓪᓕᐊᓪᓗᓂ ᐃᖅᑲᓇᐃᔮᒥᓂᒃ ᖁᕕᐊᒋᔭᖃᖅᖢᓂᓗ ᐅᓂᒃᑳᖅᑐᐊᕐᓂᕐᒥᒃ ᓴᐸᖓᓕᖅᓱᐃᕙᒃᖢᓂ.

ᕋᐃᓚᓐ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐱᒻᒪᕆᐅᓇᔭᖅᐳᖅ ᐃᓚᒋᔭᐅᓪᓗᓂᓗ, ᐅᕕᓂᖓᑕ ᑕᖅᓴᖓ ᐱᐅᔫᓪᓗᓂ ᐊᒻᒪ ᐱᐅᔪᐊᓗᖕᓂᒃ ᐊᓂᒍᐃᔪᓐᓇᖅᖢᓂ ᐃᓅᓯᕐᒥ. ᐱᕈᖅᓴᓪᓗᓂ, 9−ᓄᑦ ᐊᔾᔨᒌᙱᑦᑐᓄᑦ ᓄᑲᖅᖡᑦ ᐃᓕᓐᓂᐊᕐᕕᖏᓐᓄᑦ ᐃᓕᓐᓂᐊᕆᐊᖃᑦᑕᓚᐅᖅᐳᖅ ᐊᒻᒪ ᒪᕐᕉᖕᓄᑦ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᖕᓄᑦ ᐊᒻᒪ ᓄᓇᖃᖅᑳᖅᑐᑐᐊᖑᐃᓐᓇᐅᔭᖅᖢᓂ ᐃᓕᓐᓂᐊᕐᕕᐊᕈᓯᕐᒥ, ᐃᓛᓐᓂᒃᑯᓪᓗ ᐃᓕᓐᓂᐊᕐᕕᓕᒫᒥ. "ᐱᕈᖅᓴᓚᐅᖅᑐᖓ ᐊᒃᑐᐊᓂᖃᖅᑰᔨᙱᖦᖢᖓ, ᐃᓚᒋᔭᐅᖅᑰᔨᙱᖦᖢᖓ," ᐃᖅᑲᐅᒪᔪᖅ, ᓲᖑᓴᒃᑕᐅᖃᑦᑕᓚᐅᖅᓯᒪᓂᕐᒥᓂᒃ ᓄᓇᖃᖅᑳᖅᓯᒪᓂᕐᒥᓄᑦ ᐃᖅᑲᐃᔾᔪᑎᒋᕙᒃᖢᒍ.

"ᐃᓄᖁᑎᑎᑦ ᓇᓂᒍᕕᒋᑦ, ᐊᒻᒪ ᐃᓕᖕᓂᒃ ᓈᒻᒪᒋᓪᓚᕆᓕᕈᕕᐅᒃ, ᐃᒻᒥᓂᒃ ᓇᒡᓕᒍᓱᖕᓂᖃᓕᕈᕕᑦ, ᐊᕗᖓᐅᔨᔪᓐᓇᑦᑎᐊᖅᐳᑎᑦ."

ᐊᑕᐅᓯᖅ ᐱᓕᕆᐊᖑᔪᖅ ᐱᒻᒪᕆᐅᓗᐊᙳᐊᖅᑐᖅ ᕋᐃᓕᓐ ᓴᐸᖓᓕᖅᓱᓚᐅᖅᑕᖓ ᑕᓚᕖᓴᒃᑯᑦ ᑕᕐᕋᖅᑑᑎ. ᓴᓇᓚᐅᖅᓯᒪᔭᖓ ᓇᓗᓇᐃᒃᑯᑕᐅᓇᓱᒃᖢᓂ ᓄᓇᖃᖅᑳᖅᓯᒪᔪᑦ ᐱᐅᓂᖏᓐᓂᒃ, ᑕᓚᕖᓴᒃᑯᑦ ᑕᑯᒃᓴᐅᑎᑦᑎᓪᓗᓂ ᓄᓇᖃᖅᑳᖅᑐᕕᓂᕐᓂᒃ ᐱᓗᐊᙳᐊᖅᑐᒃᑯᑦ ᖃᓪᓗᓈᑦ ᑕᕐᕆᔮᒃᓴᖏᓐᓂᒃ ᐊᒻᒪ ᑕᐃᒪᐃᓐᓇᓱᒋᔭᐅᔪᓂᒃ. "ᐅᓇ ᓴᓇᔭᐅᓚᐅᕐᓯᒪᔪᖅ ᑭᒡᒐᖅᑐᐃᓪᓗᓂ ᑕᐃᒪᓐᓇ ᑕᐅᑦᑐᖃᕆᐊᑐᙱᑦᑐᑎᑦ, ᑕᐃᒪᐃᑦᑕᕆᐊᖃᙱᑦᑐᑎᑦ, ᑭᓯᐊᓂ ᓱᓕ ᓄᓇᖃᖅᑳᕐᓯᒪᒐᕕᑦ ᐊᒻᒪ ᐃᓗᐃᑦᑐᒥᒃ, ᐊᑕᖏᖅᑐᒥᒃ ᑭᓇᐅᓂᕐᓂᒃ ᓇᖕᒥᓂᕆᔪᓐᓇᖅᑕᐃᑦ," ᐅᖃᖅᑐᖅ. ᓇᓂᓯᓚᐅᖅᐳᖅ ᒪᒥᓴᕐᓂᕐᒥᒃ ᐊᒻᒪ ᐃᒻᒥᓂᒃ−ᓈᒻᒪᒋᓂᕐᒥᒃ ᓴᐸᖓᓕᖕᒥᒃ.

"ᐱᕈᖅᓴᓚᐅᙱᓐᓇᒪ ᓄᓇᑦᑎᓐᓂ. ᐱᕈᖅᓴᓚᐅᙱᓐᓇᒪ ᐃᓕᖅᑯᓯᕐᒥ. ᐱᕈᖅᓴᓚᐅᖅᑐᖓ ᐃᒻᒥᓂᒃ ᓇᒡᓕᒍᓱᙱᖦᖢᖓ."

ᖃᖓᙳᖅᑎᓪᓗᒍ, ᕋᐃᓚᓐ ᐊᑐᕈᒪᕙᓚᐅᙱᓚᖅ ᓴᐸᖓᕐᓂᒃ ᑭᓯᐊᓂ ᒫᓐᓇ ᐅᖃᓕᖅᐳᖅ, "ᖃᐅᔨᕗᖓ ᐱᒃᑯᒍᓱᑐᐃᓐᓇᖅᖢᖓ, ᑕᑯᒃᓴᐅᓪᓗᓂ ᓄᓇᖃᖅᑳᖅᑐᕕᓂᐅᓂᕋ ᐊᓯᔾᔨᖅᓯᓯᒪᓪᓚᕆᒃᐳᖅ ᐃᓅᓯᓐᓂᒃ ᐃᓱᒪᔾᔪᓯᕐᓂᒃᓗ, ᓲᖃᐃᒻᒪ ᐱᒃᑯᒍᓱᑦᑎᐊᕋᒪ ᑭᓇᐅᓂᓐᓂᒃ. ᐱᕈᖅᓴᓚᐅᖅᑎᓪᓗᒍ ᑲᑎᙵᙱᖦᖢᓂ ᓄᓇᓕᖕᓂ, ᖁᕕᐊᒋᔭᖃᖅᐳᖅ ᓄᓇᓕᖕᒥ ᓇᓂᔭᒥᓂᒃ ᐹᕗ ᐊᖅᑯᑎᖓᓂ, ᑐᓂᓯᔪᓐᓇᕐᓂᖓᓂ ᐊᒻᒪ ᐃᙱᐅᓰᑦ ᒧᒥᕐᓂᖏᓪᓗ ᖁᕕᐊᒋᔭᖏᑦ ᐊᖅᑯᑖᓂ.

ᕋᐃᓕᓐ ᑕᑯᒃᓴᐅᑎᑦᑎᕗᖅ ᓴᐸᖓᓕᖅᓱᖅᓯᒪᔭᒥᓂᒃ ᐃᓐᔅᑕᒍᕌᒻᑯᑦ ᐊᒻᒪ ᕙᐃᔅᐳᒃᑯᑦ ᖃᖓᑦᑎᐊᓵᕐᓗ ᓴᖅᑭᑎᑦᑎᓚᐅᖅᖢᓂ ᐃᑭᐊᖅᑭᕕᓪᓚᑦᑖᖓᓂᒃ.

ᒪᒥᓴᖅᐸᓪᓕᐊᓕᓚᐅᖅᐳᖅ ᓴᐸᖓᓕᕆᓂᒃᑯᑦ ᑲᑎᙵᓕᒃᑲᓐᓂᕋᓱᒃᖢᓂ ᐃᓕᖅᑯᓯᕐᒥᓄᑦ ᓇᖕᒥᓂᖅᑖᕈᑎᒋᓪᓗᓂᐅᒃ ᐃᓅᓯᖃᓕᖅᖢᓂᓗ ᑲᑎᑎᓚᐅᖅᑕᒥᓄᑦ. ᐃᓕᓴᐃᔨᐅᓪᓗᓂ ᐱᓕᒻᒪᒃᓴᖅᓯᒪᓪᓗᓂ, ᕋᐃᓕᓐ ᓱᐴᕐ ᐃᓕᑦᑎᓯᒪᕐᔪᐊᖅᐳᖅ ᐊᖅᑯᓯᐅᖅᐸᓪᓕᐊᓪᓗᓂ ᓇᓂᓯᓪᓗᓂᓗ ᐊᖅᑯᑎᒃᓴᒥᒃ ᑲᑎᙵᖃᑎᖃᕈᓐᓇᕐᓂᕐᒥᒃ ᐃᓕᓐᓂᐊᖅᑎᓂᒃ ᓴᓇᙳᐊᕐᓂᒃᑯᑦ. ᐃᖕᒥᓂᒃ ᓇᒡᓕᒍᓱᓚᐅᙱᒃᑲᓗᐊᖅᖢᓂ ᐱᕈᖅᓴᓪᓗᓂ, ᐃᒻᒥᓂᒃ ᓈᒻᒪᒋᓕᖅᓯᒪᕗᖅ ᓇᒡᓕᒍᓱᒃᖢᓂᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.