ᓴᓇᙳᐊᖃᑦᑕᓕᓚᐅᖅᓯᒪᕗᖅ ᒫᓐᓇᓗ ᐃᖅᑲᓇᐃᔮᕆᔪᒪᔭᒥᓂᒃ ᓴᖅᑭᑎᑦᑎᓯᒪᓕᖅᐳᖅ. ᕇᓇᓐ ᑰᓯᑲᒻ ᒥᐅᕆᑎᐊᓐ, ᐊᐃᑕᕼᐅᒥ ᓄᓇᖃᖅᐳᖅ ᑭᓯᐊᓂ ᐱᕈᖅᓴᓚᐅᖅᓯᒪᕗᖅ ᐅᑲᓇᔅ ᓄᓇᖃᖅᑳᖅᑐᑦ ᓄᓇᖃᕐᕕᖓᓂ ᓴᔅᑳᑦᓱᐊᓐᒥ. ᐃᓱᒪᖅᓱᓕᕌᖓᒥ, ᐱᙳᐊᕈᑎᓂᒃ ᐱᙳᐊᖅᐸᒃᐳᖅ. ᐃᖅᑲᓇᐃᔭᓕᕌᖓᒥ, ᐃᓱᒪᕙᒃᐳᖅ 3D-ᓂᒃ ᑭᓱᑐᐃᓐᓇᓕᕆᔨᐅᓇᓱᒋᓪᓗᓂ, ᓴᖅᑭᑎᑦᑎᕙᒃᖢᓂ 3D-ᓂᒃ ᑎᑎᕋᐅᔭᖅᓯᒪᔪᓂᒃ ᐊᒻᒪ ᐊᔾᔨᙳᐊᓕᐅᖅᐸᒃᖢᓂ ᐊᒻᒪᓗᑦᑕᐅᖅ ᖃᕆᑕᐅᔭᒃᑯᑦ ᑎᑎᕋᐅᔭᖅᓯᒪᔪᓂᒃ. ᒫᓐᓇ ᐱᓕᕆᐊᕆᔭᖓ ᑐᑭᒧᐊᒃᑎᑕᖓ ᖁᕕᐊᓇᑦᑎᐊᖅᐳᖅ, ᐱᓕᕆᖃᑎᖃᖅᐸᒃᖢᓂ ᐊᓯᖏᓐᓂᒃ ᐊᔪᙱᑦᑎᐊᖅᑐᓂᒃ ᓴᓇᙳᐊᖅᑎᓂᒃ. ᐱᒡᒍᓴᐅᕐᔪᐊᖅᑐᒥ ᐱᓕᕆᓂᐅᔪᒥ, ᐱᓕᕆᖃᑦᑕᖅᓯᒪᕗᖅ ᐃᓛᒃᑰᖅᑐᓂ ᐱᓕᕆᐊᖑᔪᓂ ᐃᑲᔪᖅᓯᒪᓪᓗᓂ ᑕᑯᔪᓐᓇᕐᓂᖅᓴᐅᓪᓗᓂ ᑕᑯᒃᓴᐅᙱᑦᑐᓂ ᐱᓕᕆᐊᖑᔪᓂ ᐱᓕᕆᐊᖑᔪᒥ ᓴᖅᑭᑎᑦᑎᓂᐅᔪᒥ.

ᖁᕕᐊᒋᔭᖃᐃᓐᓇᐅᔭᖅᖢᓂ ᑎᑎᕋᐅᔭᕐᓂᕐᒥᒃ ᐱᕈᖅᓴᓪᓗᓂ, ᑰᓯᑲᒻ ᐃᓱᒪᓚᐅᖅᓯᒪᙱᓚᖅ 3D ᑎᑎᖅᑐᒐᐅᔭᕐᓂᕐᒥᒃ ᐊᒻᒪ ᐊᔾᔨᓕᐅᕆᓂᕐᒥᒃ ᑭᓯᐊᓂ ᓯᓚᑦᑐᖅᓴᕐᕕᖓ, ᐱᓕᕆᕝᕕᒃ ᓴᓇᙳᐊᒐᕐᓄᑦ ᐊᒻᒪ ᓄᑖᙳᖅᐸᓪᓕᐊᔪᓄᑦ, ᓄᓇᖓᓄᑦ ᑎᑭᓚᐅᙱᓐᓂᖓᓂ, ᖃᐅᔨᒪᓚᐅᙱᓐᓂᕐᒥᓄᑦ ᑕᒪᓐᓇ ᐊᑐᖅᑕᐅᖔᕈᓐᓇᕐᓂᖓᓂᒃ. ᖁᕕᐊᒋᔭᖃᒻᒪᕆᓕᓚᐅᖅᐳᖅ ᖃᕆᑕᐅᔭᒃᑯᑦ ᑎᑎᕋᐅᔭᕐᓂᕐᒥᒃ, ᑎᑎᕋᐅᔭᖅᓯᒪᔪᓂᒃ, ᐊᔾᔨᓕᐅᕆᓂᕐᒥᒃ ᐊᒻᒪ ᑕᑯᔪᒪᓪᓗᓂᐅᒃ ᓴᓇᙳᐊᖅᑕᖏᑦ ᑕᒪᐅᖓ ᑐᕌᖅᐸᓪᓕᐊᑎᓪᓗᒋᑦ. ᐱᔪᒪᓂᖃᓚᐅᖅᐳᖅ ᓄᑖᙳᖅᐸᓪᓕᐊᔪᓂᒃ ᐊᒻᒪ ᐃᓱᒪᓪᓗᓂ ᓈᒻᒪᒋᑦᑎᐊᖅᑕᖓᓂᒃ ᑖᔅᓱᒧᖓ. "ᖃᐅᔨᒪᑐᐃᓐᓇᓚᐅᖅᐳᖓ ᑕᒪᓐᓇ ᐱᓕᕆᐊᕆᔪᒪᑐᐃᓐᓇᖅᖢᒍ ᑕᐅᕗᖓᓕᒫᖅ," ᖁᕕᐊᓱᒃᑐᖅ.

ᐃᓕᓐᓂᐊᖅᑕᒥᓄᑦ, ᑰᓯᑲᒻ ᐃᓕᓐᓂᐊᕆᐊᓚᐅᖅᐳᖅ Center for Arts and Technology ᐳᕆᑎᔅ ᑲᓚᒻᐱᐊᒥ ᐊᓯᔾᔨᕈᑎᕐᔪᐊᖑᓚᐅᖅᐳᖅ, ᓴᔅᑳᑦᓱᐊᓐᒥᐅᑕᐅᖏᓐᓇᐅᔭᖅᖢᓂ. ᐅᐸᒃᓯᒪᙱᒃᑲᓗᐊᕐᓗᒍ ᐃᓕᓐᓂᐊᓚᐅᕐᒥᔪᖅ ᑐᕌᓐᑐᒥ ᑕᕐᕆᔭᐅᓯᐅᕐᓂᕐᒧᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᕈᒪᓪᓗᓂ ᑎᑎᖅᑐᒐᐅᔭᖅᓯᒪᔪᓂᒃ ᐊᔾᔨᓕᐅᕆᓂᕐᒥᒃ ᑕᕐᕆᔭᐅᑎᒃᑯᑦ ᐱᙳᐊᕈᑎᓄᑦ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐊᐅᓪᓚᖅᑐᓄᑦ ᓄᓇᓕᖏᓐᓂ ᐱᓇᓱᒋᐊᖅᑐᕐᓗᑎᒃ ᐱᕕᒃᓴᓂᒃ ᑲᑉᐱᐊᓇᕐᓂᐊᕐᓂᖓᓂᒃ ᑭᓯᐊᓂ "ᑲᑉᐱᐊᓱᒡᓗᑎᑦ... ᑕᒪᓐᓇ ᐊᑑᑎᖃᓪᓚᕆᖕᓂᐊᖅᑐᖅ. ᐃᓱᒪᔪᖓ ᐱᒻᒪᕆᐊᓘᓂᖓᓂᒃ ᐱᕈᖅᐸᓪᓕᐊᓂᕐᓄᑦ ᐃᓱᒪᖕᓄᓪᓗᑦᑕᐅᖅ." ᖃᐅᔨᒪᔪᖅ ᐊᒃᓱᕈᕐᓇᖅᑐᓂᒃ ᐊᒡᒋᖅᑐᓂᒃ ᑭᓯᐊᓂ ᐅᒃᐱᕈᓱᒃᑐᖅ ᑕᒪᓐᓇ ᐃᓅᓯᐅᑉ ᐃᓚᒋᖕᒪᒍ. ᐃᓄᑑᖃᑦᑕᐃᓐᓇᕐᓂᐊᕋᓗᐊᖅᑎᓪᓗᒍ, ᐅᖃᖅᑐᖅ ᑲᑎᙵᓂᐅᔪᑦ ᐃᓕᓐᓂᐊᖃᑎᖏᓐᓄᑦ ᐊᒻᒪ ᐃᓕᓴᐃᔨᓄᑦ ᐃᑲᔪᕐᓂᐊᕐᓂᖏᓐᓂᒃ ᓄᑖᒥᒃ ᐊᖏᕐᕋᓕᐅᕐᓂᕐᒧᑦ ᐊᒻᒪ ᐃᓚᑎᑦ, ᓄᓇᐃᑦ ᐊᒻᒪ ᓄᓇᓕᑦ ᑕᐃᑲᓃᖏᓐᓇᐅᔭᕐᓂᐊᕐᓂᖏᓐᓂᒃ. "ᓄᓇᓕᒋᔭᐃᑦ ᐃᓕᖕᓂᒃ ᐃᑲᔪᖅᑐᐃᖏᓐᓇᐅᔭᕐᓂᐊᖅᑐᖅ, ᑕᐃᒪᑐᖅ ᐃᓕᖕᓂᒃ ᐃᑲᔪᖅᑐᐃᓂᐊᖅᑐᒃᓴᐅᒋᕗᑎᑦ," ᐅᖃᕆᓪᓗᓂ.

ᑐᓗᖅᑕᕈᑎᓄᓪᓕ, ᑰᓯᑲᒻ ᐊᒃᓱᕉᑎᖃᓚᐅᖅᐳᖅ ᓄᓇᓯᐅᑎᒧᑦ ᐊᑲᐅᙱᓕᐅᕈᑕᐅᔪᓄᑦ, ᐃᓱᒪᒥᒍᑦ ᐃᒃᐱᖕᓂᐊᓂᒃᑯᓪᓗ ᖃᓄᐃᙱᑦᑎᐊᕐᓂᕐᒧᑦ ᐊᒻᒪ ᑭᖑᕚᕇᓄᑦ ᐊᒃᓱᕈᕐᓇᖅᑐᒃᑰᕈᑎᓄᑦ. ᐊᒃᓱᕈᕈᑎᖃᓚᐅᕆᕗᖅ ᐃᓅᖃᑎᒥᓂᒃ ᓯᕘᕋᓂᕐᒥᒃ, ᐃᖢᐃᓪᓕᐅᕈᑎᖃᕐᓂᕐᒥᒃ, ᐃᓄᑑᓗᐊᕐᓂᕐᒥᒃ ᐊᒻᒪ ᐃᓕᑦᑎᕙᓪᓕᐊᓂᕐᒥᒃ ᓇᖕᒥᓂᖅ ᑲᒪᒋᔪᓐᓇᕐᓂᕐᒥᒃ. ᐱᒋᐊᓕᓵᖅᑎᓪᓗᒍ, ᐊᒃᓱᕈᕐᓇᖅᓯᓚᐅᖅᐳᖅ ᒪᒃᑯᒃᑑᓪᓗᓂ ᑭᓯᐊᓂ ᐃᓕᑦᑎᓚᐅᖅᐳᖅ ᐅᑎᕆᐊᕐᓂᕐᒥᒃ ᐊᓂᖅᓵᖅᑐᕐᓂᕐᒥᒡᓗ ᖃᐅᔨᓴᕈᒪᓪᓗᓂ ᑭᓱᑐᐃᓐᓇᓂᒃ ᖄᖅᑎᑦᑎᙱᖔᖅᖢᓂ ᐃᒃᐱᒋᔭᒥᓂᒃ ᐴᖅᑲᐃᑐᐃᓐᓇᙱᖦᖢᓂ. ᐃᓛᓐᓂᒃᑯᑦ ᓄᖅᑲᖓᓚᐅᑲᖕᓂᖅ ᐊᒃᑐᐃᕙᓚᐅᖅᐳᖅ ᐅᐸᖃᑦᑕᕐᓂᕆᔭᖓᓂᒃ, ᑭᓯᐊᓂ ᑕᐃᒪᐃᑦᑕᕆᐊᖃᓚᐅᖅᐳᖅ ᑕᐃᔅᓱᒪᓂ. ᖃᐅᔨᓚᐅᖅᐳᖅ ᖃᐅᔨᔭᐅᓯᒪᙱᑦᑐᒥᒃ ᓯᕘᕋᓂᕐᒥᒃ ᒥᒃᖠᕚᓪᓕᖅᑎᑕᐅᓪᓗᓂ ᐅᖃᐅᓯᖃᓕᕌᖓᒥ ᐃᒃᐱᒋᔭᒥᓂᒃ ᐃᓕᑦᑎᒃᑲᓐᓂᖅᖢᓂᓗ ᑭᓱᓂᒃ ᐱᔭᕆᐊᖃᕐᒪᖔᕐᒥᓂᒃ. ᐃᓅᖃᑎᖃᖅᐸᖕᓂᕐᒧᑦ ᓯᕘᕋᓂᖅ ᐊᒃᓱᕉᑕᐅᕐᔪᐊᖅᐸᓚᐅᖅᐳᖅ ᑰᓯᑲᒻᒧᑦ, ᐱᓗᐊᙳᐊᖅᖢᓂ ᐱᒻᒪᕆᐊᓘᓂᖓᓄᑦ ᐱᓕᕆᖃᑎᒌᒃᐸᖕᓂᖅ ᐱᓕᕆᕝᕕᒋᔭᒥᓂ.

ᑰᓯᑲᒻ ᑐᓴᖅᑎᑦᑎᔪᓐᓇᖅᐸᑦ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᑭᓱᓕᒫᑦᑎᐊᑦ ᖃᓄᐃᔾᔮᙱᓚᑦ. ᑭᖑᒻᒧᐊᓚᐅᑲᒡᓗᑎᑦ, ᐊᓂᖅᓵᖅᑐᕐᓗᑎᑦ, ᑕᖃᐃᖅᓯᓚᐅᑲᒡᓗᑎᑦ, ᑲᔪᓯᓗᑎᓪᓗ ᐱᑐᐃᓐᓇᕆᐊᖃᓕᕈᕕᑦ. ᐱᒻᒪᕆᐊᓘᕗᖅ ᐃᓕᖕᓂᒃ ᖃᐅᔨᒪᓕᕐᓗᑎᑦ... ᐃᓕᑦᑎᓗᑎᑦ ᕿᓄᐃᓵᕐᓂᕐᒧᑦ ᐊᑐᖅᑕᐅᕙᒃᑐᓂᒃ ᖃᓄᐃᙱᑦᑎᐊᖅᑐᒃᑯᑦ."

ᓇᓕᒧᒌᒃᑎᑦᑎᔪᒪᓪᓗᓂ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᓂᒃ ᑲᒪᒋᑦᑎᐊᕈᒪᓪᓗᒍᓗ, ᑰᓯᑲᒻ ᐊᑐᖅᐸᒃᐳᖅ ᓄᖅᑲᖓᓚᐅᑲᖕᓂᕐᒥᓂᒃ, ᐱᓱᔪᒃᐸᒃᖢᓂ ᓂᕆᑦᑎᐊᖅᐸᒃᖢᓂᓗ. ᓄᖅᑲᖓᓕᕌᖓᒥ ᐅᒃᐱᕆᔭᖃᖅᐸᒃᐳᖅ ᐅᖃᓕᒫᕐᓂᕐᒥᒃ ᕿᒥᕐᕈᐊᒐᕐᒥᒃ, ᐱᙳᐊᕐᓂᕐᒥᒃ ᑕᓚᕖᓴᒥᒡᓘᓐᓃᑦ ᑕᐅᑐᖕᓂᕐᒥᒃ ᐃᓱᒪᔪᓐᓃᖅᑎᑦᑎᔪᒪᓪᓗᓂ ᐱᓗᐊᙳᐊᖅᖢᓂ ᐃᑲᔪᖅᐸᒃᐳᖅ ᐃᓱᒪᓗᐊᓕᕐᓂᕐᒧᑦ.

ᑕᐃᒃᑯᓄᖓ ᐃᓱᒪᒋᔭᖃᖅᑐᓄᑦ ᒪᓕᒍᒪᓂᕐᒥᒃ ᐃᖅᑲᓇᐃᔮᕆᔪᒪᔭᒥᓂᒃ, ᑰᓯᑲᒻ ᐃᒪᓐᓇᐅᖁᔨᕗᖅ, ᐃᓚᐅᓕᕐᓗᓂ ᖃᕆᑕᐅᔭᒃᑯᑦ ᓄᓇᓕᖕᓂᒃ, ᐱᓕᕆᖃᑎᖃᕐᓗᓂ ᐊᓯᖏᓐᓂᒃ ᓴᓇᙳᐊᖅᑎᓂᒃ ᑎᑎᕋᐅᔭᖅᓯᒪᔪᓂᒃ, ᑕᐅᑐᒃᐸᒡᓗᓂ ᐊᔪᕆᖅᓲᔾᔨᓯᒪᔪᓂᒃ, ᐊᔪᕈᓐᓃᖅᓴᖅᐸᒡᓗᑎᒡᓗ ᐊᔪᕈᓐᓃᖅᐸᓪᓕᐊᔪᒪᓂᕐᒥᓂᒃ.

ᐱᔪᒃᓯᑎᑦᑎᓇᓱᓕᕌᖓᒥ, ᑰᓯᑲᒻ ᐱᔪᒪᓂᖃᐃᓐᓇᐅᔭᖅᐳᖅ ᓴᓇᙳᐊᒃᑲᐅᓪᓗᓂᓗ, ᒪᒃᑯᒃᑑᒐᓗᐊᖅᑎᓪᓗᒍ. ᐱᙳᐊᕈᑎ Final Fantasy ᐱᔪᒃᓯᑎᑦᑎᓚᐅᖅᐳᖅ ᐅᓂᒃᑳᖅᑐᐊᖅᑕᖃᑦᑎᐊᕐᓂᖓᓄᑦ ᐊᒻᒪ ᐅᓂᒃᑳᖅᑐᐊᓄᑦ ᐊᐅᓚᑕᐅᓪᓗᓂ, ᓴᓇᓯᒪᓂᖏᑦ ᐊᒻᒪ ᐃᓄᙳᐊᖏᑦ. "ᐅᓇᑕᖅᑎᐅᕗᖓ ᖃᐅᒪᓂᕐᒧᑦ ᐃᓅᓯᓐᓂ," ᐅᓂᒃᑳᖅᑐᖅ. "ᐅᓂᒃᑳᖅᑐᐊᖅᑕᖃᐅᑦᑎᐊᕐᓂᖓᓄᑦ ᑕᐃᒪᐃᑦᑐᓂᒃ ᓴᖅᑭᑦᑎᔪᓐᓇᕈᒪᖕᒥᔪᖓᑦᑕᐅᖅ, ᓄᓇᓕᓐᓄᑐᐊᖑᙱᑦᑐᖅ ᑭᓯᐊᓂ ᐊᓯᖏᓐᓄᑦ ᐃᓄᖕᓄᑦ ᓄᓇᕐᔪᐊᓕᒫᒥ ᐃᒃᐱᒋᔭᖃᕈᓐᓇᖅᑐᓂᒃ ᐊᒻᒪ ᓂᕆᐅᒃᐳᖓ ᐱᔪᒃᓯᑎᑦᑎᔪᓐᓇᕐᓂᕐᒥᒃ ᐊᒻᒪ ᑲᔪᖏᖅᓴᐃᓂᕐᒥᒃ," ᐅᖃᕆᓪᓗᓂ. ᖁᕕᐊᒋᔭᖃᖅᐳᖅ ᐃᓚᒋᔭᐅᒋᐊᒃᓴᖅ ᐊᖏᔪᒥᒃ ᐱᓕᕆᐊᖑᔪᒥᒃ ᓇᖕᒥᓂᖅ ᓴᓇᔭᒥᓄᑦ ᐊᒻᒪ ᑲᔪᖏᖅᓴᐃᔾᔪᑎᒋᕙᒃᖢᓂᐅᒃ ᐊᓯᒥᓄᑦ ᑕᑯᔭᐅᔪᓐᓇᕐᓂᐊᕐᒪᑦ ᐊᒻᒪ ᑲᔪᖏᖅᓴᖅᑕᐅᔪᓐᓇᖅᖢᓂ ᓇᖕᒥᓂᖅ ᐱᓕᕆᐊᒃᓴᒥᓄᑦ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᐅᖃᓚᐅᖅᐳᖅ, "ᐅᒃᐱᕆᔭᖃᖅᐳᖓ ᒪᒃᑯᒃᑐᖁᑎᑦᑎᓐᓂᒃ, ᐃᓕᖕᓂᒃ ᐅᒃᐱᕆᔭᖃᖅᐳᖓ ᐃᓕᖕᓂᒡᓗ ᐅᒃᐱᕆᓪᓗᐊᖅᐳᑎᑦ. ᖃᐅᔨᒪᙱᑦᑎᐊᖅᐳᑎᑦ ᖃᓄᖅ ᐱᒻᒪᕆᐅᑎᒋᖕᒪᖔᖅᐱᑦ, ᖃᓄᖅ ᐱᓇᔪᖕᓂᖃᖅᑎᒋᖕᒪᖔᖅᐱᑦ. ᑕᑯᖃᑦᑕᕋᒪ ᐊᒥᓱᐊᓗᖕᓂᒃ ᒪᒃᑯᒃᑐᓂᒃ ᐊᔪᙱᓐᓂᖃᑦᑎᐊᖅᑐᓂᒃ ᑲᒪᓇᑦᑎᐊᖅᖢᓂᓗ... ᑕᐅᑐᙳᐊᖅᑕᑎᑦ ᒪᓕᒡᓗᒋᑦ ᓲᖃᐃᒻᒪ ᑕᐃᒪᐃᒃᑯᕕᑦ, ᐱᓪᓚᑦᑖᖑᖅᑰᔨᓂᐊᕐᒪᑦ ᓄᖅᑲᖅᑎᒐᒃᓴᐅᙱᖦᖢᓂᓗ."

ᓴᓇᙳᐊᕐᓂᕐᒥᒃ ᖁᕕᐊᒋᔭᖃᐃᓐᓇᐅᔭᓚᐅᖅᐳᖅ ᐊᒻᒪ ᖁᕕᐊᒋᔭᖃᒻᒪᕆᒃᖢᓂ ᓄᑖᙳᖅᐸᓪᓕᐊᔪᓂᒃ, ᒫᓐᓇᓕ 3D-ᒥ ᑭᓱᓕᕆᔨᐅᓕᖅᑐᖅ, ᕇᓇᓐ ᑰᓯᑲᒻ ᓇᓂᓯᓚᐅᖅᐳᖅ ᖁᕕᐊᒋᔭᒥᓂᒃ ᐊᑭᓖᑎᑦᑎᔪᓐᓇᖅᖢᓂ. ᓴᓇᓯᒪᔭᖏᑦ ᐆᒻᒪᖅᑎᖦᖢᓂᒋᑦ ᐊᖓᔮᕐᓇᖅᑐᓂᒃ 3D ᑎᑎᖅᑐᒐᕐᓂᒃ ᐊᒻᒪ ᖃᕆᓴᐅᔭᒃᑯᑦ ᑎᑎᕋᐅᔭᒐᕐᓂᒃ, ᑕᐅᑐᙳᐊᖅᑕᒥᓂᒃ ᐊᓂᒍᐃᑎᑦᑎᓯᒪᒋᕗᖅ. ᖃᐅᔨᒪᓚᐅᙱᑦᑐᖅ ᐃᖅᑲᓇᐃᔮᕆᔪᒪᔭᒥᓂᒃ ᐱᑕᖃᕐᓂᖓᓂᒃ ᐱᕈᖅᓴᓪᓗᓂ, ᑭᓯᐊᓂ ᓇᓂᒐᒥᐅᒃ, ᓯᕘᕋᒐᓗᐊᖅᖢᓂ ᓄᖅᑲᖓᑎᑦᑎᔪᓐᓇᓚᐅᙱᓚᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.