"ᐃᓕᖅᑯᓯᖅ ᑐᓴᕐᓐᓈᕐᓂᑐᐃᓐᓇᐅᙱᑦᑐᖅ ᒧᒥᕐᓂᑐᐃᓐᓇᐅᙱᖦᖢᓂᓗ. ᐃᓅᓯᐅᕗᖅ," ᕋᕆ ᑖᓴᓐ ᐅᖃᖅᖢᓂ. Kwakwa ̱ka ̱wakw ᑎᑎᖅᑐᒐᖅᑎ Kingcome Inlet-ᒥ, ᐱᕈᖅᓴᓚᐅᖅᑐᖅ ᓴᓂᕐᕙᒃᑕᐅᒪᔪᒥᑦ, ᐃᓄᖃᓚᐅᖅᑐᖅ 150-ᓂᑦ, 13-ᖑᕋᓱᖕᓂᖓᓂ. ᕚᓐᑰᕗᒧᑦ ᓅᓚᐅᖅᓯᒪᔪᖅ ᐃᓕᓐᓂᐊᕐᕕᐊᓗᒻᒧᑦ ᐱᑕᖃᓚᐅᙱᒻᒪᑦ ᓄᓇᓕᖓᓐᓂᑦ ᐊᒻᒪ ᐃᓕᖅᑯᓯᑐᖃᖅ ᖁᐊᖅᓵᖅᑐᓂ ᓄᓇᓕᐸᐅᔭᕐᒧᑦ. ᑕᐃᒪᓐᖓᓂᓪᓕ, ᐅᑎᖅᐸᓪᓕᐊᓕᖅᑐᖅ ᓵᓚᒋᓇᓱᐊᖅᑐᒍ ᐊᒻᒪᓗ ᓴᓇᐅᒐᖏᑦ ᓴᕕᕋᔭᕈᖅᑎᑦᑐᓂᒋᑦ ᑕᐅᕗᖓᓕᒫᖅ, ᐃᓕᖅᑯᓯᑐᖃᕐᒥᑎᑐᑦ.

 "ᐊᓯᐅᓕᓚᐅᖅᑐᖓ ᓄᓇᓕᐸᐅᔭᕐᔪᐊᒥ ᐊᒻᒪ ᓂᑲᒍᓱᓕᖅᖢᖓ ᐱᑲᒻᒪᒃᑕᐅᔪᓄᑦ, ᐊᒻᒪ ᐅᕙᓐᓂᒃ ᐊᓯᐅᔨᓪᓗᖓ ᐊᑯᓂᐅᓕᖅᑐᖅ," ᐃᖅᑲᐅᒪᔪᖅ. ᓂᕆᐅᑉᐳᖅ ᒪᒃᑯᑦᑐᐃᑦ ᐅᐸᓗᖓᐃᖅᓯᒪᑦᑎᐊᓂᖅᓴᐅᖁᓪᓗᒋᑦ, "ᐱᒻᒪᕆᐅᓱᒋᕙᕋᓕ, ᒥᑭᔪᒥᑦ ᓴᓂᕐᕙᐃᓯᒪᒍᕕᑦ ᐅᕙᖓᑎᑐᑦ, ᐅᐸᓗᖓᐃᔭᕐᓗᒋᑦ ᐱᔪᓐᓇᕐᓂᓕᒫᒥᒍᑦ ᓄᓇᓕᐸᐅᔭᒃᑯᓐᓄᑦ. ᑕᒪᓐᓇ ᐃᓕᖅᑯᓯᐅᔪᖅ ᖁᐊᖅᓵᓇᒻᒪᕆᒻᒪᑦ ᐊᒥᓱᑎᒍᑦ, ᓱᓕᒍᒪ. ᓄᓇᓕᐸᐅᔭᕐᒥ ᐅᕙᓂ, ᐊᓯᐅᖃᑦᑕᕋᑦᑕ."

ᐱᕈᖅᓴᔭᐅᓚᐅᖅᑐᖅ ᐊᑖᑕᒥᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᒧᑦ ᐊᒻᒪᓗ ᐃᓄᑑᓪᓗᓂ ᐊᖓᔪᖅᑳᖑᓪᓗᓂ 6-ᓄᑦ. ᑖᓴᓐ ᐊᓈᓇᖓ ᕿᒪᓚᐅᖅᑕᖓ ᐊᑖᑕᖓᑕ ᓂᖓᕐᓂᖓᓄᑦ, ᓄᑕᕋᓛᖑᙱᖦᖢᓂ ᖃᑕᙳᑎᖏᓐᓄᑦ. ᑖᓴᓐ ᐊᖏᕐᕋᑲᐃᓐᓇᓚᐅᖅᑐᖅ, ᐅᑎᑐᐃᓐᓇᖅᑐᓂ ᕚᓐᑰᕗᒧᑦ. ᐊᔪᓕᖅᓯᒪᓂᖓ ᐱᐅᔪᓐᓃᖅᐹᓪᓕᓚᐅᖅᐳᖅ ᓄᓇᓕᐸᐅᔭᕐᒥ ᐃᓱᒪᖅᓱᕐᓂᖅᓴᐅᓕᖅᖢᓂ ᐊᒻᒪ ᐊᑐᐃᓐᓇᐅᓂᖅᓴᐅᓕᖅᖢᓂ, ᐱᐅᙱᑦᑐᒥᒃ ᓇᖕᒥᓂᖅ−ᐃᓱᒪᒋᔪᓐᓃᖅᖢᓂ ᐊᒻᒪ ᓄᓇᓕᐸᐅᔭᕐᒥ ᓄᓇᖃᕈᒪᔪᓐᓃᖅᖢᓂ. ᓂᑲᓪᓗᖓᓪᓗᓂ ᐃᖅᑲᓇᐃᔮᖅᑖᕋᓱᓚᐅᖅᑎᓪᓗᒍ 30-ᓂᒃ ᐃᖅᑲᓇᐃᔮᓂᒃ ᑭᐅᔭᐅᙱᖦᖢᓂ, ᑕᑯᓚᐅᖅᑐᖅ ᑭᓇᒥᑭᐊᖅ ᐊᓯᔾᔩᓇᔭᖅᑐᒥᒃ ᐃᓅᓯᖓᓂᒃ.

ᓴᓇᙳᐊᖅᑎᐅᓚᐅᖅᑐᖅ, ᓇᖏᖅᑐᓂ ᓯᓚᑖᓂ ᓴᓇᙳᐊᕐᕕᐅᑉ ᐃᓄᐃᑦ ᐊᒥᐊᕆᓪᓗᑎᒃ, ᓴᓇᙳᐊᖅᑐᑎᒃ ᐊᒻᒪᓗ ᑕᑯᒥᓴᐅᑎᓕᐅᖅᑐᑎᒃ. ᑖᓴᓐ ᐃᒻᒥᓂᒃ ᓇᓗᓇᐃᓚᐅᖅᑐᖅ. ᐃᓕᓐᓂᐊᕈᒪᓚᐅᖅᑐᖅ ᑕᑯᒥᓴᐅᑎᓕᐅᕐᓂᕐᒥᑦ ᐊᒻᒪ ᑎᑎᖅᑐᒐᖅᑎ ᐊᖏᖅᑐᓂ, ᑕᖅᑭᓄᑦ ᑎᓴᒪᓄᑦ ᐃᓕᓐᓂᐊᖅᑎᑕᐅᓪᓗᓂ ᑮᓇᐅᔭᖃᖅᑎᑕᐅᓪᓗᓂ ᐃᓚᒌᑦᑎᐊᓂᕐᒧᑦ ᐃᓪᓗᒧᑦ. 12-ᖑᔪᑦ ᐃᓕᓐᓂᐊᖅᑏᑦ ᐱᖃᑕᐅᓚᐅᖅᑐᑦ, ᑭᓯᐊᓂ ᐃᓕᓴᐃᔨᖓ ᑮᓇᐅᔭᐃᔭᕐᓂᕐᒧᑦ ᐊᑲᐅᙱᓕᐅᕈᑎᖃᓚᐅᕐᒪᑦ, ᑮᓇᐅᔭᑲᓪᓚᓐᓂᒃ ᐊᑐᓚᐅᖅᑐᖅ ᐊᒻᒪᓗ ᐱᐅᓗᐊᕋᓂ. ᑕᐃᑲᙵᓪᓕ, ᓇᒻᒥᓂᖅ ᐃᓕᓐᓂᐊᖅᑎᑕᐅᕙᓚᐅᖅᑐᖅ ᐊᒻᒪᓗ ᓴᓇᙳᐊᖅᑎᕈᕈᒪᓕᓚᐅᖅᑐᖅ.

ᐊᕐᕌᒍᒐᓵᕐᔪᖕᓂᑦ ᐃᖅᑲᓇᐃᔭᓚᐅᖅᑐᖅ ᐃᓕᓐᓂᐊᕐᕕᖕᒥᑦ ᐃᓕᖅᑯᓯᖕᒧᑦ ᐃᑲᔪᖅᑐᐃᓪᓗᓂ ᓄᓇᓯᐅᑎᒃᑯᓪᓗ ᐱᕐᕈᓗᐊᕿᓪᓗᓂ ᐋᓐᓂᖅᖢᓂᓗ ᓱᒃᑲᐃᒡᓕᕚᓪᓕᖅᖢᓂ, ᑭᓯᐊᓂᓕ ᓱᓕ ᓴᖅᑭᑦᑎᕙᓪᓕᐊᔪᖅ ᐃᓕᑦᑎᕙᓪᓕᐊᓪᓗᓂᓗ.

"ᓴᓇᐅᒐᓕᒫᑦ, ᑐᑭᓯᔭᒃᑯᑦ, ᑐᑭᓕᐅᖅᑕᐅᓂᖏᑦ ᓴᓇᒪᓂᖏᑦ. ᑭᓱᑐᐃᓐᓇᖅᑎᑐᑦ, ᐃᓕᔭᑦᓴᕆᓗᒍ, ᐱᓂᖅᓴᐅᒍᕕᑦ'

ᑖᓴᓐ ᐅᓂᒃᑳᖅᑐᖅ. ᐊᒃᑲᖓ ᕿᔪᓕᕆᔨᐅᓚᐅᕐᒪᑦ ᐊᒻᒪᓗ ᐊᒥᓲᓪᓗᑎᒃ ᓴᓇᙳᐊᖅᑎᐅᔪᑦ ᓄᓇᓕᖓᓂ, ᑭᓯᐊᓂ ᑕᑯᒥᓴᐅᑎᓂᒃ ᐱᑕᖃᓐᖏᑦᑐᖅ. ᑕᐃᒪᓕ, ᓴᖅᑮᓚᐅᕐᒪᑦ ᑭᓱᒥᑭᐊᖅ ᐱᒋᐊᕐᓂᖓᓂ, ᐱᔭᕆᐊᖃᖅᑐᓂᒃ. ᑭᖑᓂᐊᒍᑦ, ᐊᓯᐊᓂᒃ ᓴᖅᑭᑦᑎᔪᓐᓇᕋᔭᖅᑐᖅ.

ᑖᓴᓐ ᐃᑲᔪᕐᓂᖃᒻᒪᕆᓚᐅᖅᑐᖅ ᐱᒋᐊᖅᑎᑦᑎᓂᕐᒥᑦ ᐱᖅᑯᓯᑐᖃᕐᓂᑦ ᒧᒥᖅᑎᓂᑦ 90-ᖏᓐᓂᑦ. "ᐃᑲᔪᑐᐃᓐᓇᓚᐅᖅᑐᖅ ᐅᕙᑦᑎᓐᓂᑦ ᑲᓲᑎᑎᑦᓯᓂᕐᒥᑦ ᓯᕗᓕᑦᑕ ᓯᕗᓕᖅᑎᑎᓐᓂᑦ ᐃᓕᓐᓂᐊᑎᑦᓯᔾᔪᑎᑦᑎᓐᓂᓪᓗ. ᐃᓐᓇᑐᖃᕐᓂᒃ ᑲᑎᑎᑦᑎᓚᐅᕋᑦᑕ ᐊᐱᕆᓪᓗᑕ ᖃᓄᖅ ᑕᒪᓐᓇ ᐱᓕᕆᐊᕆᔪᓐᓇᕐᒪᖔᑦᑎᒍᑦ, ᐃᓕᒍᒪᑐᐃᓐᓇᓚᐅᕋᑦᑕ ᐃᙱᕐᓂᕐᒥᒃ ᐊᒻᒪᓗ ᒧᒥᕐᓂᕐᒥᒃ, ᐅᖃᐅᓯᕐᒥᒃ ᐊᒻᒪᓗ ᐊᓯᖏᓐᓂᒃ. ᑕᒪᓐᓇ ᐃᓚᒋᑐᐃᓐᓇᓚᐅᖅᑕᕋ ᐅᑎᖅᑎᑦᑎᓂᕐᒧᑦ ᐅᕙᓐᓂᒃ, ᐊᒻᒪᓗ ᐃᓄᓐᓂᒃ ᐃᓂᖃᑦᑎᑦᑎᓪᓗᑎᒃ ᐊᑦᑕᓇᖏᑦᑐᒦᓪᓗᑎᒃ, ᐊᖏᖅᑕᐅᓗᑎᒃ ᐊᒻᒪᓗ ᑐᑭᓯᔭᐅᓗᑎᒃ, "ᐃᖅᑲᐅᒪᔪᖅ.

ᑖᓴᓐ ᐱᔪᒃᓯᑎᑕᐅᕗᖅ ᓴᖅᑭᑎᑦᑎᒃᑲᓐᓂᕐᓂᖓᓄᑦ ᓄᓇᖃᖅᑳᖅᑐᑦ ᐃᓕᖅᑯᓯᑐᖃᖏᓐᓄᑦ ᐊᑐᖅᑕᐅᕙᒃᑐᓂᒃ ᐱᔪᒃᓯᑎᑕᐅᖅᑰᔨᓪᓗᓂᓗ ᑕᑯᓚᐅᖅᑕᒥᓄᑦ ᖃᖓᑦᑎᐊᓵᒃᑯᑦ ᐊᓐᓄᕌᓂᒃ ᑕᑯᒃᓴᐅᑎᑦᑎᓂᐅᓚᐅᖅᑐᒥ.

"ᖁᕕᐊᓇᖅᑐᒻᒪᕆᐅᓚᐅᖅᐳᖅ ᑕᑯᓪᓗᓂ ᐊᒥᓱᓂᒃ ᐊᔾᔨᒌᙱᑦᑐᓂᒃ ᐅᖃᐅᓯᖃᖅᑐᓂᒃ ᑕᐃᑲᓂ, ᐊᔾᔨᒌᙱᑦᑐᓂᒃ ᓴᓇᙳᐊᖅᑎᓂᒃ ᐃᒻᒥᓂᒃ ᐅᖃᐅᓯᖃᖅᑐᓂᒃ ᓴᓇᙳᐊᕐᓂᒃᑯᑦ, ᐊᓐᓄᕌᑎᒍᑦ, ᐅᕝᕙᓘᓐᓃᑦ ᑕᑯᒥᓴᐅᑎᒃᑯᑦ, ᐅᕝᕙᓘᓐᓃᑦ ᕿᔪᖕᒥᒃ ᓴᓇᙳᐊᕐᓂᒃᑯᑦ, ᐅᕝᕙᓘᓐᓃᑦ ᐃᓅᓕᓴᐅᑎᑐᐃᓐᓇᐅᒐᓗᐊᖅᐸᑕ. [ᐱᒻᒪᕆᐅᖕᒪᑦ] ᓇᓂᓯᒍᑦᑕ ᐱᕕᒃᓴᓂᑦ ᑕᐃᒪᓐᓇ ᐱᕕᖃᖅᑎᑦᑎᓪᓚᕆᒡᓗᑕ ᐅᕙᑦᑎᓐᓂᒃ ᑕᐅᑐᓪᓗᐊᑕᕐᓗᑕ ᐅᑎᕐᓗᑕᓗ ᐱᒻᒪᕆᐅᒋᔭᑦᑎᓐᓄᑦ, ᐃᓕᓴᐃᔾᔪᑎᑦᑎᓐᓄᑦ ᐊᔪᕐᓇᙱᓐᓂᖅᓴᓄᓪᓗ ᓄᓇᓕᖕᒧᑦ,"

ᑐᓂᓯᔪᖅ. ᑕᒪᓐᓇ ᐅᑎᖅᑎᑦᑎᓂᖅ ᓂᕆᐅᒋᕙᐅᒃ ᒪᒃᑯᑦᑐᐃᑦ ᓇᓂᔭᐅᓂᐊᕆᐊᖓ. ᐅᖃᐅᔾᔪᐃᓂᖓ ᑖᒃᑯᓄᖓ ᐊᑕᖃᑎᖃᕈᒪᓂᐅᕗᖅ ᓄᓇᓕᖕᓂᒃ ᐃᓚᖏᓐᓂᒡᓗ, ᐃᓕᑦᑎᓗᓂᓗ ᐃᓚᒌᑦ ᖃᓄᐃᓕᐅᖅᐸᓚᐅᕈᓯᖏᓐᓂᒃ, ᐃᙱᐅᓯᕐᒥᒃ ᒧᒥᕐᓂᕐᒥᒡᓘᓐᓃᑦ ᓇᓂᓯᓗᓂᓗ ᖃᓄᑐᐃᓐᓇᖅ ᑕᕐᓂᕆᔭᐅᔪᓐᓇᖅᑐᒥᒃ.

ᐊᕐᕌᒍᒐᓴᐅᓕᖅᑐᓂᑦ, ᑖᓴᓐ ᐃᓕᖅᑯᓯᖃᑎᒌᓄᑦ ᐃᑲᔪᖅᑎᐅᓯᒪᔪᖅ ᑕᐅᕙᓂ ᑲᓇᖕᓇᖅᐸᓯᐊᓂᑦ. ᑕᑯᓐᓇᓚᐅᖅᑐᒋᑦ ᐃᓄᐃᑦ ᐊᒃᓱᕈᖅᑎᓪᓗᒋᑦ ᐊᔪᓕᖅᓯᒪᓂᕐᒥᒃ, ᐃᓪᓗᑭᔅᓴᓂᕐᒥᒃ, ᑲᓲᒪᓇᓱᐊᕐᒪᑦ ᐃᓚᒋᔭᐅᓪᓗᓂ ᓄᓇᓕᓐᓄᑦ ᐃᓅᓱᒃᑐᐃᑦ ᐊᔪᖅᓯᓯᒪᖁᓇᒋᑦ ᐃᓅᓯᕐᒥᓂ.

"ᑕᐃᑲᓃᖏᓐᓇᕐᓂᐊᖅᑐᖅ. ᑕᒪᓐᓇ ᐱᒋᐊᕐᓂᑐᐃᓐᓇᐅᕗᖅ ᐅᕙᑦᑎᓐᓂᒃ ᒪᒥᓴᖅᐸᓪᓕᐊᓗᑕ ᖁᐊᖅᓵᖅᓯᒪᓂᒃᑰᖅᑎᓪᓗᑕ ᓄᓇᖃᖅᑳᖅᓯᒪᔪᓂᑦ ᓄᓇᓕᐸᐅᔭᕐᓂᑦ ᐊᒻᒪ ᖃᓄᑐᐃᓐᓇᖅ,"

ᐃᖅᑲᐅᒪᔪᖅ. 

"ᐃᖅᑲᐅᒪᔪᖓ ᑐᓴᕆᐅᕋᒪ ᖃᑦᑕᐅᔭᕐᒥᑦ ᓄᓇᓕᐸᐅᔭᕐᒦᑎᓪᓗᖓ, ᒥᑭᑦᑐᑯᓘᓚᐅᖅᑐᖅ ᐃᓪᓗᕈᓯᖅ ᐃᒻᒪᖄ 12 ᐃᓯᒐᐃᑦ 12 ᐃᓯᒐᐃᑦ. ᐅᕙᓐᓄᑦ ᐃᖅᑲᐃᓯᔾᔪᑎᒋᓕᓚᐅᖅᑕᕋ ᑭᓇᐅᓂᓐᓂᒃ ᐊᒻᒪ ᐊᑯᓂᐅᓕᖅᖢᖓ ᑭᓇᐅᓂᓐᓂᒃ," ᐃᖅᑲᐅᒪᔪᖅ. ᑕᐃᑉᓱᒪᓂᐅᑎᓪᓗᒍ ᒧᒥᖅᑎᓕᐅᕈᒪᓕᓚᐅᖅᑐᖅ, ᐊᒻᒪᓗ ᑕᒪᓐᓇ ᐊᒃᑐᐊᓂᐅᔪᖅ ᒪᒃᑯᒃᑐᓄᑦ ᐊᑐᖅᑕᐅᖁᓪᓗᓂᐅᒃ.

ᐃᓕᖅᑯᓯᑐᖃᖅ ᐃᓐᖏᕐᓂᑐᐃᓐᓇᐅᙱᒻᒪᑦ ᐊᒻᒪ ᒧᒥᕐᓂᑐᐃᓐᓇᐅᒐᓂ, ᐃᓅᓯᐅᒻᒪᑦ ᑕᐃᒪᐃᒻᒪᑦ ᕋᐃᕆ ᑖᓴᓐ ᐃᓕᖅᑯᓯᑐᖃᖅᑎᓐᓄᑦ ᐊᒻᒪ ᓴᓇᙳᐊᕐᓂᕐᒧᑦ. ᐃᓕᖅᑯᓯᑐᖃᖅ ᖁᒃᓴᓪᓚᒃᑎᑦᑎᓚᐅᕐᒪᑦ ᓄᓇᓕᐸᐅᔭᕐᒥ ᒥᑎᕋᒥᐅᒃ, ᑭᓯᐊᓂ ᕿᓚᐅᑎᖓ ᐊᒻᒪ ᓴᓇᐅᒐᖓ ᐅᑎᕈᑎᒋᓚᐅᖅᐸᐅᒃ ᓵᓚᒋᔭᐅᔪᒧᑦ. ᑕᐃᒃᑯᐊ ᓴᓇᓯᒪᓂᖏᑦ ᓴᕕᕋᔭᓐᓄᑦ, ᐊᑐᕆᐊᑦ ᐳᐃᒍᖅᑎᔾᔮᖏᑕᖏᑦ ᓇᑭᙶᕐᒪᖔᖅ ᐊᒻᒪᓗ ᑭᓇᐅᒻᒪᖔᖅ, ᐊᒻᒪᓗ ᐃᑲᔪᖅᑐᖅ ᓄᓇᓕᒻᒥᓂᒃ ᐃᖅᑲᐅᒪᑎᑦᑎᓪᓗᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.