"ᐊᓕᐊᓇᐃᒋᑦᑎᐊᖅᑕᕋ ᐃᑲᔪᕆᐊᒃᓴᖅ ᒪᒃᑯᒃᑐᓂᒃ ᖃᐅᔨᕚᓪᓕᖅᑎᑦᑎᓂᕐᒥᒃ ᑮᓇᐅᔭᓂᒃ, ᓲᖃᐃᒻᒪ ᑮᓇᐅᔭᖅ ᐱᒻᒪᕆᐊᓘᖕᒪᑦ. ᓇᓂᑐᐃᓐᓈᖅᑐᖅ ᐊᕙᑎᑦᑎᓐᓂ," ᐅᖃᖅᑐᖅ ᕋᐃᓕ ᑖᑦ-ᒧᐊ. ᑕᕐᓂᖓᑕ ᐊᑎᖓ ᕋᑦ ᐸᕙᓗ. ᐃᓅᓚᐅᖅᓯᒪᔫᒃ ᐱᕈᖅᓴᓪᓗᑎᒡᓗ ᐅᐃᓂᐸᐃᒡ, ᒫᓂᑑᐸᒥ ᐊᒻᒪ ᐃᓚᒌᑦ ᓄᐊᕙᐃ ᕼᐊᐅᔅ ᐊᓪᓚᐃᑦ ᓄᓇᖓᓂ ᒫᓂᑑᐸᐅᑉ ᐅᐊᖕᓇᖓᓂ. ᒪᕐᕉᖕᓂᒃ ᐅᑭᐅᕐᑕᖅᑐᕐᒥ ᑲᑎᙵᓂᐅᔪᓂᒃ ᐃᓕᓐᓂᐊᖅᑎᑦᑎᓯᒪᓕᖅᑐᑦ ᐃᓕᓐᓂᐊᖅᑎᓂᒃ ᑮᓇᐅᔭᓕᕆᓂᐅᑉ ᒥᒃᓵᓄᑦ ᒫᓐᓇᒧᑦ ᑎᑭᖦᖢᒍ. ᐅᖃᐅᔾᔪᖅᓱᐃᔪᒪᑦᑎᐊᖅᐳᑦ ᑮᓇᐅᔭᓂᒃ ᐊᑐᖅᑐᒃᓴᓂᒃ, ᑮᓇᐅᔭᓂᒃ ᐊᑐᓗᐊᖅᑕᐃᓕᒪᓂᕐᒥᒃ ᐊᒻᒪ ᐊᑭᓕᒃᓴᖅᑖᕈᓐᓇᕐᓂᕐᒥᒃ. 

ᐱᓕᕆᔨᓪᓚᕆᐅᓪᓗᑎᒃ, ᐃᖅᑲᓇᐃᔭᖅᐸᒃᐳᑦ SEED Winnipeg-ᒥ, ᑮᓇᐅᔭᓕᐅᕋᓱᒃᑎᐅᙱᖦᖢᑎᒃ. ᐃᑲᔪᖃᑦᑕᖅᑐᑦ ᐃᑲᔫᓯᐊᖅᑖᕈᓐᓇᕐᓂᕐᒧᑦ, ᓇᓗᓇᐃᖅᓯᓂᕐᒧᑦ, ᐊᒻᒪᓗ ᑮᓇᐅᔭᓂᒃ ᐊᐅᓚᑦᑎᔪᓐᓇᕐᓂᕐᒧᑦ ᐱᓕᒻᒪᒃᓴᕐᓂᕐᒧᑦ. ᐊᓈᓇᖓ ᐃᖅᑲᓇᐃᔭᖃᑎᒋᕙᓚᐅᖅᓯᒪᔭᖏᑦ ᑕᐃᑲᓂᓗ ᐃᖅᑲᓇᐃᔭᕈᒪᐃᓐᓇᐅᔭᖅᖢᑎᒃ. ᐃᓚᐅᓕᓚᐅᖅᐳᑦ ᓄᑲᖅᖡᑦ ᐃᓕᓴᐃᔨᐅᓂᕐᒧᑦ ᐱᓕᕆᐊᒃᑯᑦ, ᐊᐅᔭᒃᑯᑦ ᐱᓕᕆᐊᖑᔪᒥ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᑕᐃᑲᙵᓪᓗ ᑲᔪᓯᑎᑕᐅᓚᐅᖅᖢᑎᒃ. 

ᐃᓕᓐᓂᐊᕐᓂᓕᕆᓂᒃᑯᓪᓕ, ᑖᑦ-ᒧᐊ ᐃᓕᓐᓂᐊᓯᒋᐊᖅᐳᖅ ᓯᓚᑦᑐᖅᓴᕐᕕᒡᔪᐊᒥ ᐅᐃᓂᐸᐃᒡᒥ, ᐃᓕᓐᓂᐊᖅᖢᓂ ᐃᓕᖅᑯᓯᓕᕆᓂᕐᒥᒃ ᐅᓪᓗᓕᒫᖅ. ᐅᓪᓘᑉ ᐃᓚᐃᓐᓇᖓᓂ ᐃᓕᓐᓂᐊᖃᑦᑕᓚᐅᖅᓯᒪᔫᒐᓗᐊᑦ ᑭᓯᐊᓂ ᑖᓐᓇ ᓯᕗᓪᓕᖅᐹᕆᒻᒪᒍ ᐅᓪᓗᓕᒫᖅ ᓯᓚᑦᑐᓴᕐᕕᒻᒥ ᐃᓕᓐᓂᐊᕐᓂᕐᒧᑦ. 

ᑐᓗᖅᑕᕈᑕᐅᕙᒃᑐᓄᑦ, ᑖᑦ-ᒨᐊ ᖃᐅᔨᕗᖅ ᐊᒃᓱᕈᕐᓇᕐᔪᐊᕐᓂᖓᓂ ᑮᓇᐅᔭᑦ ᓇᑲᑎᖅᑕᐅᓂᖏᓐᓄᑦ, ᐊᒃᓱᕈᕐᓇᕐᓂᐅᔪᒥ ᑮᓇᐅᔭᓂ ᐱᑕᖃᙱᓐᓂᐅᔪᒥ ᐊᒻᒪ ᐊᒃᓱᕈᕐᓂᐅᔪᒥ ᑮᓇᐅᔭᓂ ᐃᓗᐊᓂ ᑮᓇᐅᔭᓕᐅᕋᓱᒃᑎᐅᙱᑦᑐᓂ ᐃᖅᑲᓇᐃᔭᕐᕕᒋᔭᖏᓐᓂ. ᓯᕗᓪᓕᐅᔾᔨᔭᕆᐊᖃᕐᒥᔪᑦ ᑭᒃᑯᑦ ᐃᑲᔪᖅᑕᐅᖃᑦᑕᕐᒪᖔᑕ ᐃᑲᔪᕈᒪᓂᖏᓐᓂᒡᓗ ᐅᑭᐅᖅᑕᖅᑐᒥᐅᑦ ᓄᓇᓕᖏᓐᓂᑦ ᐃᑲᔪᕐᓗᑎᒡᓗ ᓄᓇᓕᖕᓂᑦ. ᑖᑦ-ᒧᐊ ᐊᒡᓚᕝᕕᓕᕆᔨ ᐊᒻᒪ ᐱᓕᕆᐊᒃᓴᒧᑦ ᐃᑲᔪᖅᑎ ᐱᓕᒻᒪᒃᓴᖅᑐᖅ ᐃᖅᑲᓇᐃᔭᖅᑐᖅ ᑮᓇᐅᔭᓂᒃ ᐅᓂᒃᑳᓂᒃ ᐱᓕᕆᐊᒥ ᐃᑲᔪᖅᐸᒃᖢᓂᓗ ᐃᓄᖕᓂ ᐃᓯᖅᐸᓪᓕᐊᔪᓂᒃ ᑐᑭᓯᒋᐊᖅᑎᓪᓗᒋᑦ ᐱᔭᕆᐊᖃᖅᑕᖏᓐᓂᒃ. 

ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕆᐊᕐᓂᐊᖅᑐᓄᑦ, ᐅᖃᐅᔾᔨᒋᐊᕈᑎᒋᔭᖓ ᐊᐅᓚᑦᑎᓂᐊᕐᓗᓂ ᑮᓇᐅᔭᓂᒃ ᐊᑐᖅᑐᒃᓴᓂᒃ ᐸᕐᓇᐅᑎᓕᐅᕐᓗᑎᒃ. "ᐸᕐᓇᐅᑎᖃᕐᓂᖅ ᐱᒻᒪᕆᐊᓘᕗᖅ ᐊᒻᒪ ᑲᔪᓯᑦᑎᐊᙱᒃᑲᓗᐊᕈᓂ ᐊᒻᒪ ᐸᕐᓇᐃᑦᑎᐊᕋᓗᐊᕈᕕᐅᒃ, ᖃᓄᐃᙱᑦᑎᐊᖅᑐᖅ. ᐃᓛᓐᓂᒃᑯᑦ ᐸᕐᓇᐅᑎᑦ ᑲᔪᓯᔪᓐᓇᖅᐸᙱᓚᑦ ᐱᔪᒪᔭᑦᑎᓐᓄᑦ. ᐃᓅᓯᖅ ᑕᐃᒪᐃᓕᔪᓐᓇᖅᐳᖅ... ᐆᒃᑐᒃᑲᓐᓂᕐᓗᑎᑦ, ᐋᖅᑭᒋᐊᖅᓯᓇᓱᒡᓗᑎᑦ, ᓇᐅᒃᑯᑦ ᐋᖅᑭᒋᐊᖅᓯᔭᕆᐊᖃᕐᒪᖔᖅᐱᑦ ᐃᓚᖏᓐᓂᒃ. ᐊᒻᒪ ᓴᐱᓕᖅᑕᐃᓕᒋᑦ," ᐅᖃᓚᐅᖅᐳᑦ. ᑕᒪᓐᓇ ᐱᒻᒪᕆᐅᓇᓱᒋᔭᐅᕗᖅ ᓅᑉᐸᓪᓕᐊᓂᕐᒧᑦ ᓄᓇᓕᕋᓛᖑᓂᖅᓴᒥᑦ ᓄᓇᓕᐸᐅᔭᕐᒧᑦ. ᐃᓄᖕᓂ ᖃᐅᔨᒪᔭᖃᕐᓂᖅ ᐃᑲᔫᑎᖃᕈᓐᓇᖅᐳᖅ ᑭᓯᐊᓂ ᓅᑉᐸᓪᓕᐊᓂᖅ ᐊᔪᕐᓇᕈᓐᓇᖅᐳᖅ, ᐅᖃᓚᐅᖅᐳᑦ. 

ᐊᑭᓕᒃᓴᓂᒍᓐᓇᐅᑎᓕᐅᕐᓂᖅ ᐱᒋᐊᕈᑎᖃᓲᖑᕗᖅ ᐊᐅᒃᑕᔫᒥᒃ ᐊᑭᓕᒃᓴᓂᒍᓐᓇᐅᑎᒥᒃ, ᑖᑦ-ᒧᐊ ᐊᑐᖁᔨᕗᖅ, ᖃᐅᔨᓴᖁᔨᓪᓗᓂ. ᑐᑭᓯᐅᒪᓂᖅ ᕿᑐᕐᖏᐅᕈᑎᓄᑦ ᐊᑭᖏᓐᓂᒃ, ᑭᓱᑦ ᐱᔭᐅᔭᕆᐊᖃᕐᒪᖔᑕ ᐊᑎᓕᐅᕐᓂᐊᕐᓗᓂ ᐊᑭᓕᒃᓴᓂᒍᓐᓇᐅᑎᒧᑦ ᐊᐅᒃᑕᔫᒧᑦ, ᐊᑐᖅᑕᐅᓂᖓᑕ ᐊᑭᖏᑦ, ᐱᕕᖃᖅᑎᑕᐅᓂᖏᑦ ᕿᑐᕐᖏᐅᕈᑎᓄᑦ ᑕᒪᕐᒥᒃ ᐃᓱᒪᒋᔭᐅᔪᑦ ᐱᒻᒪᕆᐅᔪᑦ ᑐᑭᓯᐅᒪᔭᕆᐊᒃᓴᖅ. 

ᐊᒃᓱᕈᕐᓇᖅᑐᒃᑰᖅᑐᖃᖅᑎᓪᓗᒍ ᑮᓇᐅᔭᓕᕆᓂᕐᒧᑦ, ᑖᑦ−ᒧᐊ ᐅᖃᓚᐅᖅᐳᖅ ᐅᖃᖃᑎᖃᕐᓗᓂ ᑭᓇᒥᑭᐊᖅ ᑮᓇᐅᔭᓕᕆᓂᕐᒧᑦ ᐊᔪᕆᖅᓱᖅᑕᐅᔪᒪᓗᓂ, ᑮᓇᐅᔭᒃᑯᕕᖕᒧᐊᕐᓗᓂ, ᐊᑭᓕᖅᓱᐃᓂᕐᒧᑦ ᐸᕐᓇᐅᑎᓕᐅᕐᓗᓂ, ᐅᖃᖃᑎᖃᕐᓗᓂᓗ ᑮᓇᐅᔭᓕᕆᓂᕐᒧᑦ ᐅᖃᐅᔾᔪᐃᔨᓂᒃ. "ᐊᒥᓱᐊᓗᖕᓂ ᓂᕈᐊᒐᒃᓴᖅᑕᖃᖅᐳᖅ, ᑭᓯᐊᓂ ᓯᕗᓪᓕᕐᒥ ᐊᓪᓗᕆᐊᕐᓗᓂ ᐊᒃᓱᕈᕐᓇᕐᔪᐊᕈᓐᓇᖅᐳᖅ, ᑭᓯᐊᓂ ᐆᒥᖓ ᐱᕗᑎᑦ," ᑎᓕᐅᕆᕗᑦ. 

ᑲᔪᖏᖅᓴᐃᓂᕐᒧᑦ, ᑖᑦ−ᒧᐊ ᑕᐅᑐᒃᐸᒃᐳᖅ ᓄᓇᓕᒋᔭᒥᓄᑦ ᓄᓇᖃᖅᑳᖅᑐᓄᓪᓗ ᒪᒃᑯᒃᑐᓄᑦ. "ᖃᐅᔨᒪᑦᑎᐊᕈᒪᕗᖓ ᐃᓄᓕᒫᑦ, ᐱᓗᐊᙳᐊᖅᑐᒥ ᐃᓄᐃᑦ ᓄᓇᖃᖅᑳᖅᓯᒪᔪᑦ, ᐊᑐᐃᓐᓇᖃᕈᓐᓇᕐᓗᑎᒃ ᑮᓇᐅᔭᓕᕆᓂᕐᒥᒃ ᖃᐅᔨᒪᓂᕐᒥᒃ, ᓲᖃᐃᒻᒪ ᐱᒻᒪᕆᐊᓘᖕᒪᑦ. ᑮᓇᐅᔭᖅ ᓱᓕ ᓄᑖᖑᕗᖅ ᐅᕙᑦᑎᓐᓄᑦ. ᑮᓇᐅᔭᖅ ᐊᑯᓂᐊᓗᒃ ᐱᑕᖃᕈᓐᓃᖅᑐᖅ Turtle Island-ᒥ. ᐊᔾᔨᒌᙱᑦᑑᑎᓂᒃ ᑮᓇᐅᔭᖅᑕᖃᖃᑦᑕᖅᓯᒪᕗᒍᑦ, ᑭᓯᐊᓂ ᑮᓇᐅᔭᓕᕆᓂᖅ ᓱᓕ ᓄᑖᖑᕗᖅ ᐅᕙᑦᑎᓐᓄᑦ," ᐅᖃᖅᐳᑦ ᓂᐱᖅᑯᖅᑐᓪᓗᑎᒃ. 

"ᐱᕕᖃᖅᑎᑐᐃᓐᓇᕐᓗᒋᑦ ᐊᒻᒪ ᑮᓇᐅᔭᑎᒍᑦ ᓇᖕᒥᓂᖅᓱᕈᓐᓇᕐᓂᖅᓴᐅᓕᕐᓗᑎᒃ ᐊᒻᒪ ᑮᓇᐅᔭᓕᕆᔪᓐᓇᑦᑎᐊᕐᓗᑎᒃ ᐅᕙᓐᓄᑦ ᐱᒻᒪᕆᐊᓘᕗᖅ, ᓲᖃᐃᒻᒪ ᐅᓪᓗᖅᑕᖃᖅᐸᑦ ᒪᒃᑯᒃᑐᖁᑎᕗᑦ ᐱᐅᒃᓴᕈᓐᓇᕐᓂᖏᓐᓂᒃ, ᐊᓯᔾᔨᖅᓯᓗᑎᒃ ᐃᓅᓯᕆᔭᐅᔪᓂᒃ ᐊᔪᖅᓴᕐᓂᕐᒥᒃ, ᐊᒻᒪ ᐱᔪᒪᔭᖏᓐᓂᒃ ᑎᑭᐅᑎᔪᓐᓇᕐᓗᑎᒃ ᑮᓇᐅᔭᑎᒍᑦ," ᐅᖃᒃᑲᓐᓂᖅᐳᑦ. 

ᑐᓴᖅᑎᑦᑎᔪᓐᓇᕈᑎᒃ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᐊᒃᓱᕈᓗᐊᖅᑕᐃᓕᒋᑦ." ᐱᕈᖅᓴᓪᓗᓂ, ᐊᒃᓱᕈᐃᓐᓇᐅᔭᓚᐅᖅᐳᑦ ᐱᕈᖅᓴᓂᕐᒧᑦ ᐊᒻᒪ ᑮᓇᐅᔭᒧᑦ. ᑮᓇᐅᔭᑭᒃᓴᖅᐸᓚᐅᖅᐳᑦ ᐱᕈᖅᐸᓪᓕᐊᑎᓪᓗᒋᑦ ᒫᓐᓇᓗ ᓱᓕ ᐊᒃᓱᕈᖅᐸᒃᖢᑎᒃ ᖃᐅᔨᓇᓱᒃᖢᑎᒃ ᖃᔅᓯᓂᒃ ᑮᓇᐅᔭᖅᑖᕈᓐᓇᕐᒪᖔᕐᒥᓂᒃ. ᓴᖅᑭᑎᑦᑎᓇᓱᒃᖢᓂ ᖃᓄᐃᙱᑦᑎᐊᖅᑐᒥᒃ ᐃᓅᖃᑎᖃᖅᐸᖕᓂᕐᒥᒃ ᑮᓇᐅᔭᒧᑦ ᑕᒪᓐᓇ ᐱᓕᕆᐊᕆᕙᓪᓕᐊᕙᐅᒃ. 

ᐃᓱᒪᒋᓪᓗᒍ ᐃᓕᓐᓂᐊᕈᒪᔭᖓᑦ ᐃᓕᓐᓂᐊᕐᕕᖕᒧᑦ, ᐃᓕᖅᑯᓯᓕᕆᓂᕐᒥᒃ, ᐅᖃᐅᓯᖃᓚᐅᖅᐳᑦ ᖃᓄᐃᒻᒪᑦ ᑕᒪᑐᒥᖓ ᓂᕈᐊᓚᐅᕐᒪᖔᕐᒥᓂᒃ, ᐅᖃᖅᖢᑎᒃ, "ᖁᕕᐊᒋᔭᖃᐃᓐᓇᐅᔭᕋᒪ ᐱᓕᕆᖃᑎᖃᕆᐊᒃᓴᖅ ᐃᓄᖕᓂᒃ, ᐊᒻᒪ ᖁᕕᐊᒋᑦᑎᐊᖅᖢᒍ ᐃᓕᑦᑎᕙᓪᓕᐊᓂᕐᒥᒃ ᖃᓄᖅ ᐃᓕᖅᑯᓯᑦ ᐱᕙᓪᓕᐊᓲᖑᖕᒪᖔᑕ, ᖃᓄᖅ ᐃᓅᖃᑎᒌᑦ ᐱᕙᓪᓕᐊᓲᖑᖕᒪᖔᑕ, ᐊᒻᒪ ᖁᕕᐊᒋᑦᑎᐊᖅᖢᒍ ᐃᓄᖕᓂᒃ ᑕᐅᑐᒋᐊᒃᓴᖅ ᐱᕈᖅᓴᑎᓪᓗᑕ." ᓂᕆᐅᒃᐳᑦ ᑭᐅᖃᑦᑕᕈᒪᓪᓗᑎᒃ ᐊᐱᖅᑯᑎᓂᒃ ᖃᓄᐃᒻᒪᑦ ᐃᓄᐃᑦ ᖃᓄᐃᓕᐅᖅᐸᖕᒪᖔᑕ ᐊᒻᒪ ᑕᐅᑐᒃᐸᒃᖢᑎᒃ ᐊᔾᔨᒌᙱᑦᑐᓂᒃ ᐃᓕᖅᑯᓯᕆᔭᐅᔪᓂᒃ. 

ᓯᕗᓂᒃᓴᒧᑦ ᑕᐅᑐᒃᖢᒍ, ᑖᑦ−ᒧᐊ ᓂᕆᐅᒃᐳᖅ ᐃᕐᓂᓱᒃᓰᔨᙳᕈᒪᓪᓗᓂ ᐱᓕᕆᖃᑎᖃᕐᓗᓂᓗ ᐅᑭᐅᖅᑕᖅᑐᒥ ᓄᓇᓕᖕᓂᒃ. ᐃᓕᓐᓂᐊᖅᓯᒪᕙᒌᖅᑐᑦ ᐃᓅᓕᓴᐃᔨᐅᓪᓗᑎᒃ ᐊᒻᒪ ᐱᐅᔪᒥᒃ ᐃᓅᓕᓴᐃᔪᓐᓇᕈᒪᓪᓗᑎᒃ ᓄᓇᓕᖕᓄᑦ ᐃᓄᐃᑦ ᐃᕐᓂᔪᓐᓇᕐᓂᐊᕐᒪᑕ ᐊᐅᓪᓚᕆᐊᖃᙱᓪᓗᑎᒃ ᓄᓇᓕᐸᐅᔭᒧᑦ. ᓇᒃᓴᕈᓐᓇᕐᓂᖅ ᑕᒪᐃᓐᓂᒃ ᐊᔪᙱᓐᓂᕆᔭᐅᔪᓂᒃ ᐃᑲᔪᕐᓂᖃᕋᔭᖅᐳᖅ. 

ᐅᖃᐅᔾᔨᒋᐊᕈᑎᒋᔭᖓ ᐃᓕᓐᓂᐊᖅᑎᓄᑦ ᐃᓱᓕᑦᑎᓵᖅᑐᓄᑦ ᑭᓯᐊᓂ ᖃᐅᔨᒪᙱᑦᑐᓄᑦ ᖃᓄᐃᓕᐅᕆᐊᒃᓴᖅ ᕿᓂᕐᓗᑎᒃ ᖃᕋᓴᐅᔭᒃᑯᑦ ᐊᑐᒐᒃᓴᓂᒃ ᓲᕐᓗ ᓯᓚᑦᑐᖅᓴᕐᕕᒡᔪᐊᑉ ᒫᓂᑑᐸᐅᑉ ᐃᑭᐊᖅᑭᕕᖓᓂ ᑕᒻᒪᕇᒃᑯᑎᒥᒃ ᕿᓂᕈᑎᒥᒃ. ᐃᒪᓐᓇᐅᖁᔨᖕᒥᔪᑦ, ᐊᕐᕌᒍᒥᒃ ᐊᑐᙱᓚᐅᑲᖕᓂᕐᒥᒃ ᖃᐅᔨᓇᓱᒡᓗᑎᑦ ᖃᓄᐃᓕᐅᕈᒪᖕᒪᖔᖅᐱᑦ, ᐊᕐᕌᒎᖕᓄᑦ ᒪᕐᕉᖕᓄᑦ ᐱᖓᓱᓄᓪᓘᓐᓃᑦ. "ᑐᐊᕕᕐᓇᙱᑦᑎᐊᖅᑐᖅ. ᓱᓕ ᐃᓅᓯᖃᕐᔪᐊᖅᐳᑎᑦ, ᐊᒻᒪ ᐊᑕᐅᓯᐊᑐᐃᓐᓇᖅᖢᑎᑦ ᒪᒃᑯᒃᑑᓪᓗᑎᑦ," ᐅᖃᒃᑲᓐᓂᓚᐅᖅᐳᑦ. 

ᐃᓱᓕᓕᖅᑎᓪᓗᒍ, ᑖᑦ-ᒧᐊ ᐅᖃᓚᐅᖅᐳᖅ, "ᐱᓕᕆᑦᑎᐊᖅᑐᐊᓘᕗᓯ, ᒫᓐᓇ ᑕᐃᒪᐃᖅᑰᔨᙱᒃᑲᓗᐊᕈᔅᓯ. ᑕᒪᔅᓯᑦᑎᐊᖅ ᓇᖕᒥᓂᖅ ᐊᔾᔨᐅᙱᑦᑐᓂᒃ ᑐᓐᓂᖅᑯᓯᐊᖃᖅᐳᓯ. ᑭᓇᑐᐃᓐᓇᕐᒧᑦ ᐅᖃᐅᔾᔭᐅᑦᑕᐃᓕᒋᑦ, ᑲᒪᓇᖅᑐᐃᓐᓇᐅᕗᓯ. ᓇᒡᓕᒋᕙᔅᓯ ᑕᒪᔅᓯᑦᑎᐊᖅ, ᑕᐃᒪᑐᖅ ᑕᒪᔅᓯᑦᑎᐊᖅ ᑎᑭᐅᑎᓂᐊᖅᐳᓯ ᑐᕌᒐᕆᔭᔅᓯᓐᓄᑦ."

ᑮᓇᐅᔭᖅ ᐱᒻᒪᕆᐊᓘᑎᓪᓗᒍ ᐊᕙᑎᑦᑎᓐᓃᖦᖢᓂᓗ, ᕋᐃᓕ ᑖᑦ−ᒧᐊ ᖁᕕᐊᓱᑦᑎᐊᖅᐳᖅ ᐅᖃᐅᔾᔪᐃᔭᕆᐊᒃᓴᖅ ᒪᒃᑯᒃᑐᓂᒃ ᑮᓇᐅᔭᓕᕆᓂᕐᒧᑦ ᐅᖃᐅᔾᔪᖅᑕᐅᑦᑎᐊᖅᐸᒃᖢᓂ. ᐃᓕᓐᓂᐊᖅᑎᑕᐅᓯᒪᕙᒌᖅᑐᑦ ᐃᕐᓂᓱᒃᓰᔨᙳᕈᒪᔪᑦ ᐃᕐᓂᓱᒃᓰᔨᙳᕈᒪᓪᓗᑎᒃ ᓄᓇᓕᖕᓂ ᐊᒻᒪ ᐃᓕᓐᓂᐊᖅᑕᒥᓂᒃ ᐊᑐᕈᒪᓪᓗᑎᒃ ᑐᕌᒐᕆᔭᒥᓄᑦ ᑎᑭᐅᑎᔪᒪᓪᓗᑎᒃ. ᒪᓕᒃᖢᓂ ᐊᓈᓇᖓᑕ ᑐᒥᖏᓐᓂᒃ ᐃᖅᑲᓇᐃᔭᖅᖢᓂ SEED Winnipeg-ᒥ, ᓇᓂᓯᓚᐅᖅᐳᑦ ᐃᑲᔪᖅᓱᐃᑦᑎᐊᖅᑐᒥᒃ ᐃᖅᑲᓇᐃᔭᕐᕕᒋᔭᐅᔪᒥᒃ ᐱᕕᒃᓴᖃᖅᑎᑦᑎᔪᒥᒃ ᐱᓕᕆᐊᖃᕈᓐᓇᕐᓂᕐᒥᒃ ᖁᕕᐊᒋᔭᒥᓂᒃ ᖃᐅᑕᒫᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.