"ᐱᔪᓐᓇᕐᓂᖃᑦᑎᐊᕐᓂᖅ ᓇᖏᖅᓯᔪᓐᓇᕐᓂᕐᒥᑦ ᖃᐅᔨᒪᔭᕐᓄᑦ ᐱᔭᕆᐊᖃᖅᑕᕐᓄᑦ ᐊᒃᓱᕈᕐᓇᖅᑑᕗᖅ, ᑭᓯᐊᓂ ᐱᒻᒪᕆᐅᔪᖅ ᐊᔪᙱᓐᓂᐅᔪᖅ," ᐅᖃᖅᑐᖅ ᓵᓐᑎ ᐅᐊᑦ. ᓕᐅᓪ'ᐅᐊᑦ ᑲᓇᑕᒦᙶᖅᑐᖅ ᓯᒡᔭᖅᐸᓯᖓᓂ ᐳᕆᑎᔅ ᑲᓚᒻᐱᐊᒥ ᐊᒻᒪ ᐊᐳᑎᓕᐅᕐᕕᖕᒥᙶᖅᓯᒪᔪᖅ ᐊᕐᕌᒍᓄᑦ 20-ᐸᓗᖕᓄᑦ, ᓯᕗᓪᓕᖅᐹᒥ ᐃᓕᓴᐃᔨᙳᓚᐅᖅᓯᒪᓪᓗᓂ. ᐅᐊᑦ ᐊᑭᑦᑐᕋᐅᑎᖃᑕᐅᖃᑦᑕᖅᓯᒪᔪᖅ ᓇᑉᐸᐃᓐᓇᖓᓂᒃ ᐊᐳᑕᐃᔭᐃᔨᐅᓪᓗᓂ, ᑐᓄᐊᓂ ᐊᔾᔨᓕᐅᕆᔭᖅᑐᖅᓯᒪᓪᓗᓂ ᐊᒻᒪᓗ ᐃᓕᓐᓂᐊᖅᑐᓂ ᐃᓐᓈᕈᕐᒥᒃ ᖃᐅᔨᒪᔨᐅᓂᕐᒥᒃ. 

2004-ᖑᑎᓪᓗᒍ ᑖᒃᑯᐊ ᐃᖅᑭᓖᑦ ᐊᐳᑕᐃᔭᐃᑎᓪᓗᒋᑦ ᒪᑐᐃᖅᓯᑎᓪᓗᒋᑦ ᐱᓐᖑᐊᕆᐊᖅᑐᖅᑐᓂᒃ. ᐃᓚᐅᖃᑕᐅᓕᕐᖢᓂ ᑲᑐᔾᔨᖃᑎᒌᓪᓗ ᐃᑲᔪᖅᓱᐃᓪᓗᓂ ᐱᕙᓪᓕᐊᓂᖓᓂᒃ ᐃᓕᓴᐃᔨᐅᓪᓗᓂ ᐱᔪᓐᓇᖁᓪᓗᒍ ᓯᕗᓪᓕᕐᒥ ᐱᖃᑖᓂᒃᓗ ᖁᑦᑎᖕᓂᓕᖕᒧᑦ ᐃᓕᓴᐃᔨᐅᓂᕐᒧᑦ ᓇᓗᓇᐃᒃᑯᑕᓂᑦ. ᑖᓐᓇ ᐱᓕᒻᒪᒃᓴᕐᓂᖅ ᐱᕙᒌᔭᓚᐅᖅᑕᖓ ᐃᓕᓴᐃᓗᓂ ᑭᖑᕚᒃᓴᑦᑎᓐᓄᑦ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᓯᑭᑑᓕᐅᕐᓂᕐᓂ ᐊᕙᑎᖓᓂ, ᐱᕈᓚᐅᖅᑐᖅ ᐃᖅᑲᓇᐃᔮᖓᓄᑦ. 18-ᖑᓕᖅᑐᓂ, ᖁᕕᐊᓱᒃᓯᒪᕗᖅ ᐱᓕᕆᖃᑎᖃᕆᐊᒃᓴᖅ Whistler Blackcomb-ᒥᒃ. 

ᓄᓇᖃᖅᑳᖅᓯᒪᔪᑦ ᐊᐳᑕᐃᔭᐃᔨᖏᑦ ᐱᕈᓚᐅᖅᐳᑦ ᓄᓇᖃᖅᑳᖅᓯᒪᔪᑦ ᐃᓅᓯᖏᓐᓄᑦ ᐱᙳᐊᖅᑐᓕᕆᓂᕐᒧᑦ ᐃᓕᓐᓂᐊᕐᕕᖕᒥ (ILSA), ᐱᓕᕆᐊᒃᓴᖏᓐᓂᒃ ᐋᖅᑭᒃᓱᐃᓪᓗᑎᒃ ᐱᓕᒻᒪᒃᓴᖅᑎᑦᑎᔪᒪᓪᓗᑎᒃ ᐊᑭᒻᒪᑎᔪᓂᒃ ᐊᐳᑎᓂᒃ ᐊᒻᒪ ᐊᓯᔾᔨᒐᒃᓴᐅᓂᖅᓴᐅᓪᓗᑎᒃ ᑲᑐᔾᔨᖃᑎᒌᖑᓗᑎᒃ ᐱᙳᐊᕐᓂᕐᒧᑦ ᐃᓕᓐᓂᐊᖅᑎᑦᑎᔾᔪᑎᒋᓲᖏᓐᓂᒃ. ᒫᓐᓇ ᒪᔪᕋᕈᓐᓇᓕᖅᑐᑦ, ᐃᓐᓈᕈᒃᑯᑦ, ᓯᐊᕐᕆᔮᕐᓗᑎᒃ, ᓯᐊᕐᕆᔭᐅᑎᑯᑖᒃᑯᑦ. 

ᐅᐊᑦ ᐱᓕᕆᖃᑎᖃᖅᐸᒃᑭᕗᖅᑕᐅᖅ ᓄᓇᖃᖅᑳᖅᑐᑦ ᐊᕐᓇᐃᑦ ᓯᓚᒥ (IWO−ᒥᒃ), ᑖᓐᓇ ᑲᑐᔾᔨᖃᑎᒌᖑᔪᖅ ᑐᕌᕆᔭᖃᖅᖢᓂ ᓴᖅᑭᑎᑦᑎᔪᒪᓪᓗᓂ ᖁᐊᖅᓵᕐᓇᙱᑦᑐᒥᒃ ᐃᓂᒥᒃ ᓄᓇᖃᖅᑳᖅᑐᓄᑦ ᐊᕐᓇᓄᑦ ᑲᑎᕝᕕᐅᖃᑦᑕᕐᓂᐊᖅᑐᒥᒃ, ᓄᓇ ᖁᕕᐊᒋᓗᒍ ᐃᓕᑦᑎᓗᓂᓗ ᖃᓄᖅ ᖁᐊᖅᓵᕐᓇᙱᑦᑐᒃᑯᑦ ᐊᔪᕈᓐᓃᖅᓴᕈᓐᓇᕐᓂᕐᒥᒃ ᑭᐱᙳᐃᔭᕐᓂᕐᒧᑦ ᐱᙳᐊᕐᓂᕆᔭᐅᕙᒃᑐᓂᒃ. ᓂᕆᐅᒋᔭᐅᔪᖅ ᐃᓚᐅᖃᑕᐅᔪᑦ ᐱᓂᐊᕐᓗᑎᒃ ᑕᓯᐅᕐᓂᕐᒧᑦ ᓇᓗᓇᐃᒃᑯᑕᖅᑖᕐᓂᕐᒥᒃ ᐊᒻᒪᓗ ᐃᖏᕐᕋᑎᑦᑎᓗᑎᒃ ᐱᓕᕆᐊᒃᓴᓂᒃ ᑲᑐᔾᔨᖃᑎᒌᓄᑦ ᐅᕝᕙᓘᓐᓃᑦ ᐃᓚᐅᖃᑕᐅᓗᑎᒃ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᓅᓯᖏᓐᓂᒃ ᐱᙳᐊᕐᓂᕐᒧᑦ ᐃᓕᓐᓂᐊᕐᕕᖕᒥ ᑲᒪᔨᐅᓗᑎᒃ ᒪᒃᑯᒃᑐᓄᑦ.  

ᐅᖃᐅᔾᔪᐃᒋᐊᖅᓯᒪᔪᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᐃᓱᒪᔪᑦ ᐱᒋᐊᕐᓂᕐᒥᒃ ᓄᑖᒥᒃ ᐱᙳᐊᕐᓂᕐᒥᒃ, ᐊᐳᒻᒧᑦ ᒪᔪᕋᕐᓂᐅᒐᓗᐊᖅᐸᑦ ᐅᕝᕙᓘᓐᓃᑦ ᒪᔪᕋᕐᓂᐅᒐᓗᐊᖅᐸᑦ, ᐱᓲᑎᒃᑰᕋᓗᐊᕈᓂ, ᖃᓄᑐᐃᓐᓇᕐᓘᓐᓃᑦ. ᐅᐊᑦ ᐅᖃᖅᑐᖅ, "ᐅᓗᕆᐊᓇᕈᓐᓇᓪᓚᕆᑦᑐᖅ ᐱᒋᐊᕐᓂᕐᒥᑦ ᖃᓄᐃᑦᑐᑐᐃᓐᓇᕐᒥᑦ ᐱᙳᐊᕐᓂᕐᒥᑦ, ᐱᓗᐊᖅᑐᒥᑦ ᑖᒃᑯᐊ ᐊᑦᑕᕐᓇᓪᓚᕆᑦᑐᑦ. ᐃᒪᓐᓇᐅᖁᔨᓪᓚᕆᒃᐳᖓ, ᓇᓂᓯᑐᐃᓐᓇᕐᓗᖓ ᑲᑐᔾᔨᖃᑎᒌᒥᒃ ᓲᕐᓗ ILSA−ᒥᒃ IWO−ᑯᓐᓂᒡᓗ ᓇᓂᓯᓗᖓᓗ ᖁᐊᖅᓵᕐᓇᙱᑦᑐᒥᒃ ᐃᓂᒥᒃ ᐃᓕᕝᕕᒋᔪᓐᓇᖅᑕᕐᓂᒃ ᐃᓗᐊᖅᓴᕐᓗᑎᑦ." ᐊᑐᖁᔨᑎᓪᓗᒍ ᑲᑐᔾᔨᖃᑎᒌᓂᑦ ᐃᖅᑲᓇᐃᔭᖃᑎᖏᓐᓂ, ᐅᓄᖅᑐᓂᒃ ᐊᓯᖏᓐᓂᒃ ᑲᑐᔾᔨᖃᑎᒌᑕᓕᒃ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ ᐃᓅᕝᕕᒋᔭᖓ ᐃᓄᑑᓪᓗᓂ ᐋᖅᑭᒃᓯᓪᓗᓂ ᐊᑦᑕᕐᓇᙱᑦᑐᓂᒃ ᐃᓂᒃᓴᓂᑦ ᑲᑎᓯᒪᔪᓄᑦ ᐱᙳᐊᖅᑎᓄᑦ ᓯᓚᒥᓗ ᐃᓄᖕᓄᑦ ᐅᐸᒍᑎᓗᑎᒃ ᐃᓕᑦᑎᓗᑎᒃᓗ.

ᐃᓕᑦᑎᕙᓪᓕᐊᓂᖅ ᓄᑖᒥᒃ ᐱᙳᐊᕐᓂᕐᒥᒃ ᐃᓕᕋᓇᕈᓐᓇᖅᑐᖅ, ᑭᓯᐊᓂ ᐃᓕᓐᓂᐊᖅᑎᑦᑐᓐᓇᕐᓂᐊᕐᒪᒋᑦ, ᐅᐊᑦ ᐊᑐᖅᓯᒪᔭᖓᒍᑦ. "ᐊᒃᓱᕈᕐᓇᓵᕐᒪᑦ, ᓄᓇᖃᖅᑳᖅᓯᒪᔪᖅ ᐊᕐᓇᖅ ᐱᖅᑯᓯᑐᖃᒃᑯᑦ ᖃᐅᔨᒪᔭᐅᔪᖅ ᖃᐅᓪᓗᖅᑕᒥᒃ ᐊᖑᑎᖃᕐᓂᖓᓂᒃ, ᐊᒻᒪ ᐃᓚᐅᒐᔪᒃᑭᓪᓗᓂ. ᐊᔭᐅᖅᑕᐅᔪᒻᒪᕆᐅᓚᐅᖅᐳᖓ 18-ᓂᒃ ᐊᕐᕌᒍᓂᒃ. ᒫᓐᓇᓵᕈᓗᒃ, ᑭᓯᐊᓂ, ᑐᙵᓱᒃᑎᑕᐅᓕᓚᐅᖅᑐᖓ ᐅᖃᖃᑎᖃᕈᓐᓇᖅᓯᓚᐅᖅᑐᖓᓗ ᐃᓕᓴᐃᔨᐅᖃᑎᓐᓂᒃ," ᓈᓴᐃᒃᑲᓐᓂᓚᐅᖅᑐᖅ. ᐃᑲᔪᖅᓱᖅᑕᐅᙱᓗᐊᖅᑰᔨᓚᐅᙱᑦᑐᖅ ᐊᕐᓇᐅᓪᓗᓂ ᐃᓕᓴᐃᑎᓪᓗᒍ ᖁᑦᑎᖕᓂᖅᓴᒥᒃ ᐃᓕᓐᓂᐊᕈᑎᒥᒃ. 15-ᓂᒃ ᐊᕐᕌᒍᓂᒃ ᐱᓕᕆᓚᐅᖅᑐᖅ ᓴᐱᖅᑕᐃᓕᓪᓗᓂ ᐊᖓᔪᖅᑳᒥᓄᑦ ᐊᒻᒪᓗ ᐃᒻᒥᓂᒃ ᑭᒡᒐᖅᑐᖅᖢᓂ. 

ᐅᑎᕆᐊᕈᓐᓇᕈᓂ ᑭᖑᕙᙱᓪᓗᓂ ᐊᒻᒪᓗ ᒪᒃᑯᓐᓂᖅᓴᐃᑦ ᐅᖃᐅᑎᒋᐊᕐᓗᓂᒋᑦ ᓈᓚᒐᔭᖏᒻᒪᑦ ᐃᓄᓐᓂᒃ ᐊᒻᒪᓗ ᐃᓱᒪᒋᔭᖏᓐᓂᒃ. "ᐅᖃᐅᔾᔭᐅᓚᐅᖅᓯᒪᕗᖓ 10 ᐊᕐᕌᒍᑦ ᐊᓂᒍᖅᓯᒪᓕᖅᑐᑦ ᐊᐳᑎᖃᓲᖑᒐᒪ, ᐃᓐᓈᕈᕐᒧᑦ ᑕᓯᐅᖅᑎᐅᔪᓐᓇᔾᔮᙱᑦᑐᖓ. ᓯᐊᕐᕆᔭᐅᑎᑯᑖᖑᔭᕆᐊᖃᓚᐅᕋᒪ. ᑕᐃᓐᓇ ᓈᓚᓚᐅᖅᑕᕋ ᐊᔪᕆᖅᓯᐅᔾᔨᔨᐅᓚᐅᕐᒪᑕ. ᐅᑭᐅᑦ ᖁᓕᑦ ᑭᖑᕙᓕᕋᒪ ᑕᓯᐅᖅᑎᐅᓕᖅᖢᖓ ᑕᒪᓐᓇ ᐱᔾᔪᑎᒋᓪᓗᒍ. ᐅᖃᐅᔾᔭᐅᔪᒪᓪᓚᕆᒃᑲᓗᐊᖅᐳᖓ ᐃᓐᓇᐅᓂᖅᓴᓂᒃ ᓈᓚᖃᑦᑕᖁᙱᖦᖢᒋᑦ, ᐊᓪᓛᑦ," ᐅᖃᑦᑎᐊᙱᖦᖢᓂ. 

"ᓄᓇᖃᖅᑳᖅᓯᒪᓪᓗᖓ, ᐅᖃᐅᔾᔭᐅᖏᓐᓇᓲᖑᒐᑦᑕ ᓈᓚᖁᔭᐅᓪᓗᑕ ᐃᓐᓇᖁᑎᑦᑎᓐᓂᒃ, ᑕᐃᒪᐃᒻᒪᑦ ᑖᓐᓇ ᐃᓐᓇᑐᖃᖅ ᖃᐅᔨᒪᔨᑕᐅᔪᖅ ᐅᖃᐅᔾᔨᒻᒪᑦ ᐊᕕᒍᓐᓇᖏᓐᓂᕋᖅᑐᖓ, ᐆᒻᒪᑎᓐᓅᓪᓚᕆᓚᐅᖅᑐᖅ ᐊᒻᒪᓗ ᐃᖅᑲᐅᒪᓂᐊᖅᑕᕋ ᑕᒪᓐᓇ ᑕᐅᕗᖓᓕᒫᖅ. ᖁᓕᓂᒃ ᐊᕐᕌᒍᓂᒃ ᐱᓕᕆᓚᐅᖅᑐᖓ ᐊᒻᒪᓗ ᒪᕐᕈᒃᑲᓐᓃᒃ ᐱᖃᑎᒃᑲ ᐊᐅᓪᓚᐅᔾᔨᔨᐅᓚᐅᖅᑑᒃ ᐅᕝᕙᓘᓐᓃᑦ ᐃᓕᓐᓂᐊᖅᑎᑕᐅᓪᓗᑎᒃ ᐊᐅᓪᓚᐅᔾᔨᔨᐅᓪᓗᑎᒃ ᐅᖃᐅᑎᓪᓗᓂᖓ ᑕᐃᒪᐃᒍᓐᓇᕐᓂᕋᑦᑐᓂᖓ" ᑲᔪᓯᓪᓗᓂ.  

ᐃᓕᑦᑎᓯᒪᔪᖅ ᓇᓕᒧᒌᒃᑎᓐᓇᓱᒃᓗᒍ ᓯᑭᑑᒃᑯᑦ, ᑭᓯᐊᓂ ᐊᓯᐊᓂᒃ ᓇᓕᒧᒌᒃᑎᑦᑎᓂᕐᒥᒃ ᐊᔪᙱᓐᓂᕐᒥ ᐱᑖᕆᐊᖃᖅᓯᒪᔪᖅ ᓇᖕᒥᓂᖅ ᑲᒪᒋᑦᑎᐊᕐᓂᕐᒥᒃ ᐃᓱᒪᒧᓪᓗ ᖃᓄᐃᙱᑦᑎᐊᕐᓂᕐᒥᒃ. ᐊᓂᓂᖅ ᐃᑲᔪᕐᔪᐊᖅᓯᒪᔪᖅ. ᐊᐳᑎᖃᕈᓐᓃᕐᒪᑦ ᐱᓇᓱᐊᕈᓯᒐᓴᖕᓄᑦ ᐋᓐᓂᕐᓂᖓᓄᑦ ᐊᒻᒪᓗ ᐃᓚᐅᙱᖦᖢᓂ ᑕᕐᕆᔭᐅᓯᐅᖅᑕᐅᔪᓂᒃ ᐊᒻᒪᓗ ᐊᔾᔨᓕᐅᕆᔪᓂᒃ ᐅᑭᐅᑉ ᐃᓗᐊᓂ. 

ᑕᐃᒃᑯᐊ ᑭᑭᑕᐅᓯᒪᔪᑦ ᐱᕕᒃᓴᐃᑦ ᐅᕿᙱᓐᓂᖅᓯᐅᖅᓯᒪᕐᔪᐊᖅᐳᑦ ᐃᓱᒪᒃᑯᑦ ᖃᓄᐃᙱᑦᑐᓐᓇᕐᓂᕐᒥᒃ, ᑭᓯᐊᓂᓗᑦᑕᐅᖅ ᖃᐅᔨᓚᐅᖅᐳᖅ ᖃᓄᐃᓕᐅᕆᐊᒃᓴᖅ ᓯᓚᒦᓪᓗᓂ. ᓯᓚᐃᓐᓇᕐᒧᑦ ᐅᖅᑰᓂᖓ ᐊᒻᒪ ᓯᕿᓐᓂᕐᓂᖓ ᐊᓕᐊᓇᐃᒋᔭᐅᑦᑎᐊᓵᖅᐳᖅ ᑐᒃᑲᕆᐊᓕᖕᒦᑎᓪᓗᒍ. ᐃᒃᐱᒋᔭᖏᑦ ᐱᓕᕆᐊᕆᓂᐊᕐᓗᒋᑦ ᐊᒻᒪ ᐆᒻᒪᖅᑎᒃᑲᓐᓂᕋᓱᒃᓗᒋᑦ, ᑎᑎᕋᕈᒪᖃᑦᑕᕐᒥᔪᖅ ᐃᒃᐱᒋᔭᖏᓐᓂᒃ ᖃᕋᓴᐅᔭᒃᑯᑦ ᑎᑎᕋᖅᑕᖏᓐᓂᒃ ᐃᓱᒪᒋᔭᖏᑦ ᐊᑦᑕᕐᓇᙱᑦᑐᒃᑯᑦ ᐃᓯᕈᓐᓇᐅᑎᖏᑦ ᓴᐳᔾᔭᐅᓯᒪᓗᑎᒃ ᐊᒻᒪ ᑐᓴᖅᑕᐅᕈᓘᔭᕆᐊᖃᙱᖦᖢᑎᒃ. ᐱᓇᓱᐊᕈᓯᖅ ᐊᑕᐅᓯᐊᖅᖢᒍ ᐅᕝᕙᓘᓐᓃᑦ ᖁᕕᐊᓱᖅᑰᔨᓕᕌᖓᑦ, Scandinave Spa−ᒧᙵᐅᕙᒃᐳᖅ ᐃᑲᕐᕋᒐᓴᖕᓄᑦ ᐅᖃᓕᒫᕆᐊᖅᑐᖅᖢᓂ, ᓴᐃᓕᔭᖅᑐᖅᖢᓂ, ᐃᒫᓃᑉᐸᒃᖢᓂ, ᐃᓄᑑᓪᓗᓂ ᐃᒃᓯᕚᖅᖢᓂ ᓴᐃᓕᓐᓇᖅᖢᓂᓗ ᓂᐱᖃᙱᖦᖢᓂᓗ. 

ᐱᔪᒃᓯᑎᑦᑎᔪᒪᓕᕌᖓᑦ, ᐱᖃᓐᓇᕆᔭᒥᓂᒃ ᐱᔪᒃᓯᑎᑦᑎᑦᑎᐊᖅᐸᒃᖢᓂ, ᐊᐅᓪᓚᐅᔾᔨᔨᐅᖃᑎᒥᓄᑦ ᐊᓯᖏᓐᓄᓪᓗ ᐃᓄᖕᓄᑦ ᖃᐅᔨᒪᔭᒥᓄᑦ, ᐊᒻᒪᓗ ᐱᓕᕆᖃᑎᖃᖅᐸᖕᓂᖓᓄᑦ ᓄᓇᒥ ᖃᒧᑕᐅᔭᖅᑎᓪᓗᒍ. "ᑕᐃᑲᓂ, ᓄᓇᒦᖦᖢᑎᑦ, ᓄᓇᒦᖃᑕᐅᕗᑎᑦ ᑕᐃᑲᓃᓐᓂᕐᓂ. ᓴᓇᑐᔪᓐᓇᕐᓂᖅ ᓄᓇᐅᑉ ᑕᐅᑦᑐᐊᓂᑦ ᐃᓚᒋᔭᐅᖏᓐᓇᐅᔭᖅᑐᖅ ᐊᐳᑕᐃᔭᐃᓂᕐᒧᑦ. ᐱᙳᐊᖃᑎᖃᖅᑐᑎᑦ ᑕᑯᒃᓴᐅᔪᓂᒃ ᓄᓇᒥ," ᓇᓗᓇᐃᖅᓯᓪᓗᓂ. ᐱᔪᒃᓯᓂᖃᕐᒥᔪᖅ ᑕᑯᕙᒃᑕᒥᓂᒃ ᓇᖕᒥᓂᖅ ᐃᔨᒥᓄᑦ.

ᓄᓇᖃᖅᑳᖅᓯᒪᓪᓗᓂ ᐊᕐᓇᐅᓪᓗᓂ ᐊᐳᑎᒥ ᐱᙳᐊᖅᑐᓂ, ᓵᓐᑎ ᐅᐊᑦ ᖃᐅᔨᒪᔪᖅ ᓇᖏᕈᓐᓇᑦᑎᐊᕐᓂᕐᓂ ᖃᐅᔨᒪᔭᕐᓂ ᐱᔭᕆᐊᖃᖅᑕᕐᓂᑦ ᐊᒃᓱᕈᕐᓇᖅᑑᕗᖅ, ᑭᓯᐊᓂ ᐱᒻᒪᕆᐅᔪᖅ ᐊᔪᙱᓐᓂᐅᔪᖅ. ᐊᓂᒍᐃᔪᓐᓇᖅᑕᖏᑦ ᑐᓗᖅᑕᕈᑏᑦ ᐊᒻᒪ ᓇᑉᐸᖏᑦ, ᐃᓕᓐᓂᐊᖅᑎᑦᑎᓪᓗᓂᓗ ᑭᖑᕚᒃᓴᑦᑎᓐᓂ ᓄᓇᖃᖅᑳᖅᓯᒪᔪᑦ ᓯᑭᑑᓂᒃ. ᐱᓕᕆᖃᑎᖃᖅᑎᓪᓗᒋᑦ ᓄᓇᒥ ᐊᒻᒪᓗ ᑭᒡᒐᖅᑐᐃᓪᓗᓂ ᐃᒻᒥᓂᒃ ᐱᓕᕆᖃᑎᖃᑦᑎᐊᓂᖅᓴᐅᔪᒪᓪᓗᓂ ᐃᓕᓐᓂᐊᖃᑎᒥᓂᒃ, ᓴᓇᙳᐊᖅᑐᖅ ᐊᐳᑎᒃᑯᑦ ᐃᖅᑲᓇᐃᔮᕆᔪᒪᔭᒥᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.