"ᑐᓴᖅᑎᑦᑎᒃᑲᓐᓂᕈᒪᐃᓐᓇᐅᔭᖅᑐᖓ ᑐᓴᒃᑲᓐᓂᕐᓗᖓᓗ ᐅᓂᒃᑳᓂᒃ," ᐅᖃᖅᑐᖅ ᓯᐅᕋ ᓂᑭᐅᓪ, ᐃᓚᒋᔭᐅᔪᖅ Tk'emlúps te Secwepemc ᓄᓇᖃᖅᑳᖅᓯᒪᔪᓂ ᓄᓇᖃᖅᑐᖅ ᓴᐃᓐᑦ ᐋᓪᐳᑦᒥ. ᐊᓈᓇᒋᔭᐅᔪᖅ ᑕᓪᓕᒪᓄᑦ ᐅᑭᐅᓕᒃ ᐊᕐᓇᒧᑦ ᒪᕐᕉᖕᓂᓪᓗ ᐊᖓᔪᒋᔭᖃᖅᖢᓂ ᐊᒻᒪᓗ ᖃᑕᙳᑎᖃᕐᔪᐊᖅᖢᓂ. ᓂᑭᐅᓪ ᐃᑦᑕᕐᓂᓴᓕᕆᔨᒻᒪᕆᐅᓯᒪᕗᖅ ᓄᓇᖃᖅᑳᖅᓯᒪᔪᓂᒃ ᐊᒻᒪ ᑲᓇᑕᒥ ᐱᐅᓯᕆᔭᐅᕙᓚᐅᖅᑐᓂᒃ ᐋᓪᐴᑕᒥ ᓯᓚᑦᑐᖅᓴᕐᕕᒡᔪᐊᖓᓂ ᐊᕐᕌᒍᓄᑦ ᑎᓴᒪᓄᑦ ᐊᒻᒪ ᐅᑭᐅᓄᑦ ᑕᓪᓕᒪᓄᑦ ᐃᖅᑲᓇᐃᔭᓚᐅᖅᓯᒪᓪᓗᓂ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑐᓂᒃ ᓴᔅᑳᑦᓱᐋᓐ ᓯᓚᑦᑐᖅᓴᕐᕕᒡᔪᐊᕐᒥ. 

ᐱᔭᕇᓚᐅᖅᑎᓪᓗᒍ ᐃᓕᓐᓂᐊᕐᕕᐊᓗᒻᒥ, ᓂᑲᓪ ᓯᓚᑦᑐᓴᕐᕕᕐᔪᐊᕐᒨᓚᐅᖅᑐᖅ ᐊᒻᒪᓗ ᖁᕕᐊᒋᔭᖃᑦᑐᓂ ᐃᓕᓐᓂᐊᖅᑕᒥᓂᒃ ᐅᐊᑦᑎᐊᕈᓐᓂᓴᕐᓂᒃ ᐊᒻᒪᓗ ᖃᓪᓗᓈᑎᑐᑦ. ᐃᓕᓐᓂᐊᕇᖅᓯᒪᙱᑦᑐᓄᑦ ᐃᓕᓐᓂᐊᕌᓂᒍᓯᐊᖓᓄᑦ, ᐱᕐᔪᐊᕌᓘᓚᐅᖅᑐᖅ ᐊᑐᕐᓂᑯᓂᑦ ᖃᐅᔨᒪᙱᖦᖢᓂᓗ ᖃᓄᐃᓕᐅᕆᐊᒃᓴᖅ ᐃᓕᓐᓂᐊᕌᓂᖕᒪᑦ ᐱᓇᔪᓕᕐᖢᓂ ᐃᓕᓐᓂᐊᕌᓂᖕᓂᕐᒧᑦ ᐃᓯᕐᖢᓂᓗ. ᓯᕗᓪᓕᖅ ᖃᑕᙳᑎᖏᓐᓂ ᖁᑦᑎᖕᓂᖅᓴᒧᑦ ᐃᓕᓐᓂᐊᕆᐊᕐᓗᓂ, ᐃᓱᒪᓪᓗᓂ, "ᐊᖏᖃᑦᑕᐃᓐᓇᖅᐸᑕ ᐅᕙᓐᓂᒃ, ᑕᐃᒪᐃᓕᐅᖏᓐᓇᕐᓂᐊᖅᐳᖓ." ᐊᓯᖏᓐᓂᒃ ᐸᕐᓇᒍᑎᖃᓚᐅᓐᖏᑦᑐᖅ ᐊᒻᒪᓗ ᓯᕗᒧᐊᖏᓐᓇᖅᑐᓂ. 

"ᖁᕕᐊᓱᑐᐃᓐᓇᓵᖅᑐᖓ, ᐅᕐᕈᔮᑐᐃᓐᓇᓕᖅᖢᖓ. ᑐᑭᓯᓇᑦᑎᐊᖅᑐᒥᒃ ᐊᖅᑯᑎᑕᖃᓚᐅᙱᑦᑐᖅ ᐅᕙᓐᓄᑦ."

PhD−ᖓ ᐊᑐᖅᖢᓂᐅᒃ, ᓄᖅᑲᕈᒪᓕᓚᐅᖅᑐᖅ ᑕᖅᑭᑦ 6 ᐊᓂᒍᕌᖓᑕ ᖃᐅᔨᒪᙱᖦᖢᓂᓗ ᖃᓄᐃᓕᐅᕋᔭᕐᒪᖔᑦ ᐱᔭᕇᑕᐃᓐᓇᕈᓂᐅᒃ. ᐃᖅᑲᓇᐃᔮᖅᑖᕋᓱᐊᓚᐅᖅᑐᖅ ᐊᒥᓱᓂᒃ ᐊᑦᔨᒌᖏᑦᑐᓂᒃ ᐃᖅᑲᓇᐃᔮᓂᒃ ᐊᒻᒪᓗ ᐊᑐᐃᓐᓇᐅᑎᑕᐅᓪᓗᓂ ᐃᖅᑲᓇᐃᔮᒥᒃ ᓵᔅᑳᑦᓱᐊᓐᒥ ᐃᓕᓐᓂᐊᕐᕕᔾᔪᐊᖓᓂ ᐱᐊᓂᓚᐅᖏᑎᓪᓗᒍ. ᐊᒃᓱᕈᖅᑎᑕᐅᓚᐅᕐᒪᑕ ᐊᑕᐅᓯᐊᖅᑐᑎᒃ ᐱᔭᕇᕋᓱᐊᖅᑐᑎᒃ. 

ᐃᓅᓯᓕᒫᖓᓂ, ᓂᑭᐅᓪ ᐊᒃᓱᕈᖅᓯᒪᔪᖅ ᖀᖅᓱᖃᑦᑕᕐᖢᓂ, ᐃᓱᒪᓪᓗᓂ, "ᓈᒻᒪᒃᐳᖔ ᑕᐃᒪᐃᓕᐅᕆᐊᒃᓴᖅ? ᑕᒪᓐᓇ ᐅᕙᓐᓄᑦ ᑐᕌᖓᕙ?" ᕿᓂᕐᖢᓂ ᓯᓚᑖᓂᙶᖅᑐᒥᒃ ᓱᓕᓂᕋᕈᑎᒥᒃ, ᕿᓂᕐᖢᓂ ᐊᖏᖅᑕᐅᓂᕐᒥᒃ ᐊᓯᒥᓂᑦ. ᐅᓪᓗᒥᐅᓕᖅᑐᖅ, ᐊᒃᓱᕈᖃᑦᑕᖅᑐᖅ ᐊᒃᓱᕈᕐᓇᖅᑐᒃᑯᑦ ᐱᔪᒪᓂᖃᕐᓂᒃᑯᑦ. ᓈᕕᒐᔾᔨᓐ ᓯᓚᑦᑐᓴᕐᕕᒡᔪᐊᒥ ᐃᓅᓯᖅ ᐊᒃᓱᕈᕐᓇᓚᐅᖅᑐᖅ ᓯᕗᓪᓕᕐᒥ ᑭᓯᐊᓂ ᐃᓅᓯᓕᒫᒧᑦ ᐃᓕᓐᓂᐊᖅᑎᐅᓪᓗᓂ, ᐃᖢᕐᕆᓕᕐᖢᓂ ᖁᕕᐊᓱᓕᕐᖢᓂᓗ ᓄᑖᒥ ᐊᕙᑎᖓᓂ.   

ᖁᕕᐊᒋᒐᓗᐊᖅᖢᓂᐅᒃ ᖃᓄᐃᓕᐅᕐᑕᖓ, ᐊᒃᓱᕈᕐᓇᖅᑐᖃᐃᓐᓇᐅᔭᖅᑐᖅ. ᓄᑖᓂᒃ ᐃᓕᓐᓂᐊᕐᕕᐊᕈᓯᖅᑕᖃᓕᕌᖓᑦ ᐊᒻᒪ ᓄᑖᓂᒃ ᐃᓕᓐᓂᐊᖅᑎᓂᒃ ᑲᑎᑦᑐᓐᓇᖅᑎᓪᓗᒋᑦ, ᐱᑕᖃᑦᑎᐊᙱᑦᑎᐊᖅᐳᖅ ᓄᑖᓂᒃ ᓴᖅᑭᑕᐅᔪᓂᒃ. "ᖃᐅᔨᓴᕐᓂᐅᑉ ᐃᓚᖓ ᐊᓕᐊᓇᐃᒋᑦᑎᐊᖅᑕᕋ. ᐃᖅᑲᓇᐃᔮᕋᓕ ᓄᓇᓕᓐᓂ-ᐱᓕᕆᖃᑎᖃᖅᑐᓂ ᐅᖃᐅᓯᒃᑯᑦ ᐅᓂᒃᑳᑐᖃᕐᓂᑦ, ᐅᕙᖓ ᓄᓇᓕᖓᓐᓂᑦ, ᑭᓯᐊᓂ ᓄᓇᖃᖅᑳᖅᓯᒪᔪᑦ ᓄᓇᓖᑦ ᐱᖓᓐᓇᕐᒥᑦ ᐊᒻᒪ ᑕᒪᓐᓇ ᖁᕕᐊᓇᖅᑐᒻᒪᕆᐅᕗᖅ. ᒥᑕᐅᑎᒐᔪᒃᑲᑦᑕ ᐅᐸᑐᐃᓐᓇᖃᑦᑕᕋᑦᑕ ᐃᖅᑲᓇᐃᔮᓪᓚᕆᓐᓄᑦ. ᐳᓛᖅᑎᐅᒐᑦᑕ," ᕿᑦᓵᔪᖅ. ᐃᖅᑲᓇᐃᔭᖅᖢᓂ ᓄᓇᓕᖕᒥᓄᑦ ᖁᕕᐊᓱᒍᑎᒋᕙᐅᒃ, "ᐱᐅᑦᑎᐊᒻᒪᕆᒃᑐᖅ. ᖁᕕᐊᓇᖅᑐᖅ," ᐊᓕᐊᓇᖅᐳᖅ."

ᐅᖃᐅᔾᔪᐃᓂᖓ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᕿᒪᐃᓂᕐᒥᒃ ᓄᓇᒥᓂᒃ ᐃᓕᑦᑎᔪᒪᓗᓂ ᑲᓇᑕᐅᑉ ᓯᓚᑖᓂ "ᐃᓕᖕᓂᒃ ᐅᒃᐱᕆᓗᑎᑦ, ᖁᓱᙱᓪᓗᑎᓪᓗ ᐃᓕᖕᓂᒃ ᖃᓄᐃᓕᐅᕈᓐᓇᑦᑎᐊᕐᓂᕐᓂᒃ ᖃᓄᐃᓕᐅᕈᒪᔭᕐᓂᒃ. ᐊᑲᐅᓐᖏᑐᐃᓐᓇᕆᐊᓕᒃ, ᐊᒻᒪᓗ ᐊᑲᐅᒐᔭᖅᑰᖏᑦᑐᖅ. ᐃᓕᖕᓂᒃ ᐊᐱᖅᓱᑐᐃᓐᓇᕆᐊᖃᖅᑐᑎᑦ, ᑭᓯᐊᓂ ᑕᐃᒃᑯᐊ ᐊᑐᖅᑕᓕᒫᑎᑦ ᐱᕚᓪᓕᕐᔪᐊᖅᑐᑦ ᐊᔾᔨᒌᖏᑦᑐᒃᑯᑦ." ᓂᑭᐅᓪ ᐅᖃᐅᓯᖃᖅᑐᖅ ᖃᓄᖅ ᐃᓕᓐᓂᐊᖅᑏᑦ ᐊᑦᓱᕈᖃᑦᑕᕐᒪᖔᑕ ᐃᓅᓯᕐᒥᑦ ᐃᓕᓐᓂᐊᕐᓂᕐᒥᑦ ᓯᕗᓂᑦᓴᕐᒥᑦ ᓂᕆᐅᒋᔭᖃᑦᓯᐊᖅᓱᓂᓗ ᑭᖑᕚᑦᓴᑎᓐᓄᑦ.  

"ᓄᑕᖅᑲᑦ ᐅᓪᓗᒥ, ᐱᐅᔪᐊᓘᖕᒪᑕ. ᑕᑯᑐᐃᓐᓇᕋᒪ ᐊᒥᓱᓂᒃ ᐃᓕᓐᓂᐊᖅᑎᓂᒃ ᐃᓪᓗᕈᓯᕐᓅᖅᑐᓂᒃ... ᑲᒪᓇᖅᑐᓂᒃ ᐱᓕᕆᑐᐃᓐᓇᕐᓂᖅ... ᐃᓱᒪᑐᐃᓐᓇᕋᒪᓕ ᒪᒃᑯᑦᑐᐃᑦ ᐅᓪᓗᒥ ᖃᐅᔨᒪᓂᖅᓴᐅᒻᒪᑕ ᐊᒻᒪᓗ ᖃᐅᔨᒪᓂᖅᓴᐅᓪᓗᑎᒃ ᖃᓄᐃᓕᐅᖅᑐᖃᓕᕐᒪᖔᖅ ᓄᓇᕐᔪᐊᕐᒥ ᐊᒻᒪᓗ ᑕᒪᓐᓇ ᑕᑯᔪᒥᓇᖅᑐᒻᒪᕆᐅᓪᓗᓂ," ᐊᓕᐊᓇ.

ᑕᐅᕗᙵᖅᐸᓪᓕᐊᓪᓗᓂ, ᓂᑭᐅᓪ ᓇᖕᒥᓂᖅ ᐊᒡᕕᐊᕈᑎᒋᓂᖅᐹᕆᓚᐅᖅᐸᐅᒃ ᐃᒻᒥᓂᒃ ᐅᒃᐱᕆᙱᖦᖢᓂ. ᖃᖓᒃᑯᒃᑭᐊᖅ, ᐊᓂᒍᖅᑐᓂᐅᒃ. "ᖃᖓᑦᑎᐊᖅ ᐃᖅᑯᒻᒪᓚᐅᕋᒪ ᓲᕐᓗ ᐃᖅᑯᒻᒪᖅᖢᖓ, ᖃᓄᐃᑦᓴᖏᑦᑐᖓ. ᖃᓄᐃᒋᙱᑕᕋ ᐊᓯᒃᑲ ᐃᓄᐃᑦ ᐃᓱᒪᖕᒪᖔᑕ ᒎᓇᐅᑉ ᐃᓱᒪᓂᖓᓂᒃ ᓈᒻᒪᒃᖢᓂᓗ," ᐃᖅᑲᐅᒪᔪᖅ

ᑕᐃᒪᐃᙱᑉᐸᑦ, ᓂᑭᐅᓪ ᐊᒃᓱᕈᓚᐅᖅᑐᖅ ᑮᓇᐅᔭᑎᒍᑦ. ᐃᑲᔪᖅᑕᐅᓪᓗᓂ ᐃᓕᓐᓂᐊᕆᐊᒃᑲᓐᓂᕈᓯᐊᓄᑦ ᐊᒻᒪᓗ ᑮᓇᐅᔭᓕᐊᕆᓚᐅᖅᑕᖓᓄᑦ, ᐃᓕᓐᓂᐊᕐᕕᒃᑰᓚᐅᖅᑐᖅ.  ᖃᓄᑐᐃᓐᓇᖅ ᐱᕕᖃᖅᑎᖦᖢᓂᒋᑦ, ᐱᓕᕆᐊᒃᓴᖃᐃᓐᓇᕐᖢᓂ ᓇᓂᓯᓪᓗᓂᓗ ᐱᑕᖃᖅᑐᓂᒃ ᐱᔭᕆᐊᖃᖅᑕᒥᓂᒃ ᑲᔪᓯᑦᑎᐊᕐᓂᕐᒧᑦ.

"ᐃᖅᑲᓇᐃᔮᕆᔭᕐᓂ ᓲᕐᓗ ᐃᓕᓐᓂᐊᓕᓵᕐᓂᖅ, ᐃᖅᑲᓇᐃᔭᖅᖢᓂ ᐊᑯᓂᒻᒪᕆᐊᓗᒃ ᑭᓱᒧᒃᑭᐊᖅ, ᐊᔪᕐᓇᖅᑐᖅ ᐃᓚᒋᔭᐅᑎᑦᑕᐃᓕᓗᒍ ᑭᓇᐅᓂᕐᓄᑦ."

ᐱᕈᖅᓴᐃᓂᖅ ᓄᑕᖅᑲᒥᒃ ᐃᖅᑲᓇᐃᔭᖅᑎᓪᓗᒍ ᓯᓚᑦᑐᖅᓴᕐᕕᖕᒥ ᐃᑲᔪᓚᐅᖅᐳᖅ ᓂᑭᐅᓪ ᓇᓂᓯᓪᓗᓂ ᐃᖅᑲᓇᐃᔭᕐᓂᕐᒥᒃ−ᐃᓅᓯᕐᒥᒃ ᓇᓕᒧᒌᒃᑎᑦᑎᓂᕐᒥᒃ ᐃᖅᑲᐅᒪᓗᓂᓗ ᑕᒪᓐᓇ ᐃᖅᑲᓇᐃᔮᖑᓂᖓᓂᒃ ᑭᓇᐅᓂᓕᒫᖓᓅᙱᑦᑐᖅ. ᐱᕕᖃᑦᑎᐊᕐᖢᓂ ᐆᒻᒪᕆᒃᖢᓂᓗ "ᓄᑕᕋᓛᕐᒧᑦ", ᖃᐅᔨᓯᒪᔪᖅ ᖁᕕᐊᓱᖕᓂᕐᒥ ᐊᒃᓱᕈᕐᓇᕋᓗᐊᖅᑎᓪᓗᒍ ᑭᓯᐊᓂ ᓄᑕᕋᐅᓂᕐᒥ ᐃᓕᖅᑯᓯᕆᒐᔪᒃᑕᖏᓐᓂ. ᐃᖅᑲᓇᐃᔭᖅᑎᓪᓗᒍ ᐅᓐᓄᒃᑯᑦ ᐱᓇᓱᐊᕈᓯᐅᓪᓗ ᓄᙳᐊᓂ ᐊᔪᕐᓇᙱᑦᑐᑯᓘᑎᑦᑎᕙᓚᐅᖅᑐᖅ ᐱᔭᕇᖅᓯᔭᕆᐊᒃᓴᖅ ᐃᖅᑲᓇᐃᔮᒥᓂ, ᑕᐅᑐᓪᓗᐊᑕᕐᖢᓂ ᖃᑕᙳᑎᖏᓐᓂ. 

"ᖁᕕᐊᒋᑦᑎᐊᖅᑕᒃᑲ ᐱᓕᕆᐊᒃᑲ, ᐊᓕᐊᓇᐃᒋᑦᑎᐊᖅᑕᒃᑲᓗ ᐱᓕᕆᐊᒃᑲ. ᐃᖅᑲᓇᐃᔮᖑᒻᒥᔪᖅ. ᐳᐃᒍᕈᓐᓇᙱᑦᑐᑎᑦ ᐃᕝᕕᑦ ᒥᒃᓵᓄᑦ ᐱᔾᔪᑎᖃᙱᒻᒪᑦ."

 ᒪᒃᑯᖕᓂᖅᓴᓂᒃ ᐅᖃᐅᔾᔪᐃᔪᓐᓇᕈᓂ ᓴᐃᓕᓐᓇᕋᔭᖅᑐᖅ. "ᑖᓐᓇ ᓯᕘᕋᒌᓐᓇᐅᔭᖅᑕᕋ," ᐃᖅᑲᐅᒪᔪᖅ, ᐃᓱᒪᓪᓗᓂ ᖃᓄᖅ ᑐᓱᒍᓱᖕᒪᖔᑦ ᐊᓈᓇᑦᑎᐊᖓᑕ ᐊᓈᓇᑦᑎᐊᖓᑕ. "ᐊᒥᓱᑦ ᓄᓇᖃᖅᑳᖅᓯᒪᔪᑦ ᐃᓚᒌᑦ ᐊᓯᐅᔨᔭᐅᔪᑦ ᐊᒻᒪ ᖁᐊᖅᓵᖓᓇᖅᑐᒃᑰᖅᓯᒪᔪᑦ ᓴᖅᑭᓴᕋᐃᑦᑐᑦ, ᑕᐃᒪᐃᒻᒪᑦ ᐊᒥᓱᑎᒍᑦ ᐱᕈᖅᓴᕋᐃᑦᑑᔮᖅᑐᒍᑦ. ᑕᒪᓐᓇ ᓂᕆᑎᐊᕐᔪᒍᓐᓇᐸᓪᓚᐃᔭᕗᑦ. ᓯᕘᕋᒍᕕᑦ ᐅᕝᕙᓘᓐᓃᑦ ᐃᓱᒫᓗᒃᑯᕕᑦ ᓲᖃᐃᒻᒪ ᐃᓛᓐᓂᒃᑯᑦ ᐱᔾᔪᑎᑕᖃᓲᖑᖕᒪᑦ. ᑭᓯᐊᓂ ᓴᙱᓂᖃᕐᒥᓗᓂ ᐃᑲᔪᖅᓱᐃᓂᕐᒥᑦ ᐊᕙᑎᖕᓂ ᖃᓄᐃᔾᔮᙱᖦᖢᓂᓗ," ᑲᔪᓯᓗᓂ.

ᐃᓱᒪᖓ ᖃᐅᔨᓴᖅᑕᐅᖏᓐᓇᖁᓪᓗᒍ, ᓂᑭᐅᓪ ᐃᓚᒥᓂᒃ ᑲᑎᖃᑎᖃᖃᑦᑕᖅᐳᖅ, ᖃᑕᙳᑎᒥᓂᒃ ᐅᖄᓚᐅᑎᕋᓛᒃᑯᑦ ᑎᑎᕋᖃᑎᖃᖅᐸᒃᖢᓂ, ᐊᓈᓇᒥᓄᑦ ᐅᖃᖃᑎᖃᖅᖢᓂ ᐊᒻᒪ ᖁᕕᐊᓇᖅᑐᓂᒃ ᐱᓕᕆᓪᓗᓂ ᐸᓂᖓᓗ. ᐊᐃᑉᐸᖓᑦᑕᐅᖅ ᖁᕕᐊᒋᔭᖓ ᐱᓕᕆᔭᕆᐊᒃᓴᖅ ᐃᓄᑑᓗᓂ, ᓴᐃᓕᓗᓂ ᐊᓂᓗᓂᓗ. "ᐅᓪᓗᑦᑎᐊᕙᐅᓚᐅᖅᓯᒪᙱᑦᑐᖅ ᓯᓚᒦᓚᐅᑲᒃᑎᓪᓗᑎᑦ, 40-ᓂᒃ ᐃᒃᑭᖦᖢᓂ," ᖁᖓᖦᖢᓂ.

"ᐃᓕᖕᓂᒃ ᐅᒃᐱᕆᓗᑎᑦ. ᐅᒃᐱᕈᓱᑦᑎᐊᕐᓗᑎᑦ ᐅᒃᐱᕆᓗᒋᓪᓗ ᐃᓱᒪᒋᔭᑎᑦ ᓲᖃᐃᒻᒪ ᑕᒪᑦᑕ ᐱᐅᔪᒥᒃ ᐱᖃᕋᑦᑕ ᓈᓚᒃᑯᑦᑎᒍᑦ."

ᐱᔪᒃᓯᑎᑦᑎᔪᒪᓕᕌᖓᑦ, ᓂᑭᐅᓪ ᐸᓂᐊᓂᒃ ᐃᓐᓇᕐᓂᒡᓗ ᑕᑯᓇᓱᓲᖑᕗᖅ. ᖁᕕᐊᒋᔭᖃᖅᑐᖅ ᐅᓂᒃᑳᕐᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ, ᖃᓄᐃᓕᐅᕐᓂᖏᓐᓄᑦ ᓯᕗᓕᖅᑎᐅᓂᕐᒧᓪᓗ. "ᑕᐃᒃᑯᐊ ᐃᓄᐃᑦ, ᑕᐃᒃᑯᐊ ᐊᕐᓇᐃᑦ ᐅᖃᖃᑎᒋᔪᓐᓇᖅᑕᒃᑲ ᑐᓴᕐᓗᒋᓪᓗ ᐃᓅᓯᖏᓐᓂᒃ ᐊᒻᒪ ᑭᓱᓂᒃ ᐱᐊᓂᒃᓯᓯᒪᖕᒪᖔᑕ ᑭᓱᓂᒃ ᐱᐊᓂᒃᓯᓯᒪᖕᒪᖔᑕ ᑭᓱᖃᙱᖦᖢᑎᒃ, ᐃᑲᔪᖅᓱᖅᑕᐅᙱᖦᖢᑎᒃ, ᐊᑭᕋᖅᑑᑎᒐᔪᒃᖢᑎᒃ ᖃᓄᐃᓕᐅᖅᑐᓂᒃ ᓄᓇᓕᖏᓐᓂᒃ, ᐅᕝᕙᓘᓐᓃᑦ ᖃᓄᐃᓕᐅᕐᒪᖔᑕ ᑲᓇᑕᒥ," ᑕᑯᒃᓴᐅᑎᑦᑎᕗᖅ, ᐃᓱᒪᓪᓗᓂ ᖃᓄᖅ ᑎᔅᓯᓈᕿᖃᑦᑕᕐᒪᖔᕐᒥ ᐊᒻᒪ ᑎᔅᓯᓈᕿᔪᓐᓇᕐᓂᕐᒥᓂᒃ ᐱᓕᕆᓚᐅᕐᒪᑕ ᐱᔭᕆᐊᖃᖅᑕᒥᓂᒃ.

ᐊᒃᑐᐊᓂᖃᕐᓂᖅᓴᐅᔪᒪᐃᓐᓇᐅᔭᖅᑐᖅ ᑐᓴᒃᑲᓐᓂᕐᓗᓂᓗ ᐅᓂᒃᑳᓂᒃ, ᓯᐅᕋ ᓂᑭᐅᓪ ᐊᒥᖅᑳᖃᑎᖃᖅᑐᖅ ᐊᑐᕐᓂᑯᓕᐅᕐᖢᓂᓗ ᐊᑐᕐᓂᑯᕕᓂᕐᓂ ᓄᓇᖃᖅᑳᖅᓯᒪᔪᓄᑦ ᐃᑦᑕᕐᓂᓴᓕᕆᔨᐅᓪᓗᓂ. "ᐱᓕᕆᔨᓪᓚᕆᐅᓂᕐᒧᑦ ᐳᓛᕆᐊᖅᑐᖅ", ᖃᐅᔨᒪᓕᖃᑦᑕᖅᐳᖅ ᐃᓅᓯᕆᔭᐅᔪᓂᒃ ᐃᓅᓯᒪᔪᓂᒃ ᑎᑎᕋᖅᓯᒪᓕᖅᑎᑦᑎᓪᓗᓂᓗ ᑕᒪᒃᑯᓂᖓ ᐊᑐᖅᑕᐅᓯᒪᔪᓂᒃ ᐊᕐᕌᒍᒐᓵᓗᖕᓄᑦ ᐊᒡᒋᖅᑐᓄᑦ. ᐊᖅᑯᑎᖃᑦᑎᐊᓚᐅᙱᑦᑐᖅ ᐱᒋᐊᓕᖅᑎᓪᓗᒍ, ᑭᓯᐊᓂ ᓇᓂᓯᓪᓗᓂ ᓂᐱᓕᐅᕆᓂᕐᒥᒃ ᐃᓅᓯᖏᓐᓂ ᓄᓇᖃᖅᑳᖅᓯᒪᔪᑦ ᐊᕐᓇᑦ ᖃᓄᕐᓗ ᐊᓯᔾᔩᓯᒪᖕᒪᖔᑕ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.

ᓯᑎᐱᕆ 2024−ᒥ ᓄᑖᙳᕆᐊᖅᓯᒪᔪᑦ: ᓯᐅᕋ ᐱᓵᓚᐅᖅᑐᖅ ᑲᓇᑕᒥ ᖃᐅᔨᓴᕐᓂᕐᒧᑦ ᐃᒃᓯᕙᐅᑕᕐᒥᒃ (ᖁᕝᕙᓯᖕᓂᖓ II) ᓄᓇᖃᖅᑳᖅᓯᒪᔪᑦ ᒐᕙᒪᓕᕆᓂᕐᒥᒃ ᐊᒻᒪ ᐊᕐᓇᐃᑦ/ᐊᖑᑎᑦ!