"ᔭᓗᓇᐃᓕᐊᕈᕕᑦ ᓄᓇᖃᖅᑳᖅᓯᒪᔪᓂᒡᓗ ᓘᒃᑖᖅᑕᖃᙱᖦᖢᓂ. ᑭᒡᒐᖅᑐᐃᓂᖅ ᓱᓕ ᑕᐃᑲᓃᖏᑦᑐᖅ. ᐱᔭᒃᓴᓕᒻᒪᕆᐊᓘᒻᒪᑕ. ᐊᔪᕐᓇᙱᑦᑐᑯᓘᑎᑦᑎᕙᙱᑦᑐᑦ ᑭᓯᐊᓂ ᐊᑐᐃᓐᓇᐅᓂᖅᓴᐅᑎᑦᑎᔪᑦ," ᐱᖃᖃᑕᐅᕗᖅ ᓴᐃᕋ ᓯᑉᔅᑕᓐ. ᐊᓪᓚᖓᔪᖅ ᐊᕐᓇᖅ ᔨᐊᓗᓇᐃᒥᐅᑕᖅ ᐱᕈᖅᓴᓚᐅᖅᑐᖅ ᕗᐊᑦ ᓯᒻᑉᓴᓐᒥᒃ ᐊᒻᒪᓗ ᑕᑯᓪᓗᓂ ᓄᓇᖃᖅᑳᖅᓯᒪᔪᓂᒃ ᐅᑭᐅᖅᑕᖅᑐᒥᒃ ᐃᓅᓕᓴᐅᑎᑖᖅᑐᓂ. 

ᖃᓪᓗᓈᑦ ᓄᓇᖓᓐᓅᕋᒥ, ᔭᓗᓇᐃᕝᒨᓚᐅᖅᑐᖅ ᐊᕐᕌᒍᓄᑦ ᖁᓕᓄᑦ 15-ᓄᑦ. ᐃᓕᓐᓂᐊᕐᕕᐊᓗᒻᒥ, ᖃᐅᔨᒪᓪᓚᕆᓚᐅᙱᑦᑐᖅ ᑭᓱᒥᒃ ᐱᔪᒪᒻᒪᖔᖅ ᑭᓯᐊᓂ ᐱᔪᓐᓇᑎᐊᓚᐅᖅᑐᖅ ᐆᒪᔪᓕᕆᓂᕐᒥᒃ ᐊᒻᒪᓗ ᐃᓚᐅᕈᑎᒃᓴᓕᕆᓂᕐᒥᒃ. ᐃᓕᓴᕆᓪᓗᒍ ᐊᔪᙱᓐᓂᖓ ᑭᒃᓕᓯᓂᐊᖅᑐᓕᕆᓂᕐᒥ, ᑎᒥᒥᙶᖅᑐᓂᒃ ᑭᒃᓕᓯᓂᐊᕈᑎᓄᑦ ᐃᓕᓐᓂᐊᕌᓂᒍᓯᐊᖅᑖᕐᖢᓂ ᓯᓚᑦᑐᖅᓴᕐᕕᒃᔪᐊᒥ ᐋᑐᕚᒥ, ᐱᔭᕇᕐᖢᓂ 2019−ᒥ. ᓯᐱᔅᑕᓐ ᐊᖏᖅᑕᐅᓚᐅᖅᑐᖅ ᐋᓐᓂᐊᖅᑐᓕᕆᓂᕐᒧᑦ ᐃᓕᓐᓂᐊᕐᕕᖕᒧᑦ ᐅᑭᐊᒃᓵᖑᓚᐅᖅᑐᖅ ᐊᒻᒪᓗ ᒫᓐᓇ ᑕᖅᑭᓄᑦ 6-ᓄᑦ ᑎᑭᖦᖢᒍ MD-ᖑᙱᖦᖢᓂ. ᑕᒪᓐᓇ ᐱᔭᕇᖅᐸᑦ, ᐊᕐᕌᒍᓄᑦ ᑕᓪᓕᒪᓄᑦ ᓄᓇᖃᖅᓯᒪᔪᖅ. 

ᓄᓇᖃᖅᓯᒪᑎᓪᓗᑎᑦ, ᓘᒃᑖᖑᓗᑎᑦ, ᐊᑭᓕᖅᓱᖅᑕᐅᓗᑎᑦ ᐊᒻᒪᓗ ᐱᔪᓐᓇᕐᓗᑎᑦ ᐃᑲᔫᓯᐊᓂᑦ, ᐊᒻᒪᓗ ᐊᑯᓂᐅᑎᒋᔪᓐᓇᖅᑐᖅ ᒪᕐᕉᓐᓂᒃ 7-ᓄᑦ ᐊᕐᕌᒍᓄᑦ ᒪᓕᓪᓗᒍ ᐊᔾᔨᐅᖏᑦᑐᖅ ᓂᕈᐊᖅᑕᐃᑦ. ᓯᐱᔅᑕᓐ ᓂᕆᐅᒃᑐᖅ ᐱᓚᒃᑕᐅᓂᕐᒧᑦ, ᖃᓄᑐᐃᓐᓇᖅ ᐅᕝᕙᓘᓐᓃᑦ ᓯᖓᐃᔪᓕᕆᔨᓄᑦ ᐊᒻᒪ ᐃᒡᓕᐊᓕᕆᔨᓄᑦ. ᐊᖅᑯᑎᑯᑖᖑᖕᒪᑦ, ᑭᓯᐊᓂ ᐱᒻᒪᕆᐅᕗᖅ ᓯᓐᓇᒃᑑᒪᔭᖓ ᐅᔾᔨᕆᓗᒍ.

ᑕᒪᐅᖓ ᐱᓕᕆᓚᐅᖅᑐᖅ ᐅᖃᐅᓯᖃᖅᖢᓂ ᐱᓕᕆᑦᑎᐊᖅᑕᒥᓂᒃ. ᐊᒃᓱᕈᖅᑐᓂ ᐃᖅᑲᓇᐃᔭᓚᐅᖅᑐᖅ, ᐃᓕᓐᓂᐊᑎᐊᖅᑐᓂ ᐊᒻᒪᓗ ᖃᐅᔨᓪᓗᓂ ᐋᓐᓂᐊᕕᒻᒨᕈᓐᓇᕆᐊᖓ. ᓯᐱᔅᑕᓐ ᐆᒃᑐᕈᒪᓕᓚᐅᖅᑐᖅ ᐊᖏᖅᑕᐅᓪᓗᓂᓗ. ᑲᓇᑕᒥ ᐋᓐᓂᐊᖅᑐᓕᕆᓂᕐᒧᑦ ᐃᓕᓐᓂᐊᕐᕖᑦ ᐱᔭᕇᖅᓯᓯᒪᔭᕆᐊᓖᑦ ᐊᕐᕌᒍᓄᑦ ᑎᓴᒪᓄᑦ ᐊᒻᒪ ᓯᓚᑦᑐᓴᕐᕕᒻᒥᑦ ᐱᔭᕇᕈᓯᐊᖅᓯᒪᓗᑎᑦ. ᐊᒥᓲᓂᕐᓴᐃᑦ ᐃᓕᓐᓂᐊᖃᑎᖏᑦ ᐱᔭᕇᓚᐅᖅᑐᑦ ᖃᐅᔨᓴᕐᓂᕐᒧᑦ ᐃᓕᑕᕆᔭᐅᔾᔪᑎᑖᕐᓯᒪᓪᓗᑎᒃ ᑭᓯᐊᓂᓕ ᐃᓚᖏᑦ ᐃᓄᐃᑦ ᖃᐅᔨᒪᔭᖏᑦ ᐃᓅᓕᓴᐅᑎᓂᒃ ᐱᕙᓪᓕᐊᔪᓕᕆᔨᐅᕙᓚᐅᖅᑐᑦ ᐅᕝᕙᓘᓐᓃᑦ ᐋᓐᓂᐊᓯᐅᖅᑎᐅᔪᑦ. "ᐅᓄᖅᑐᒻᒪᕆᐊᓗᖕᓂᒃ ᐊᖅᑯᑎᑕᖃᖅᐳᖅ ᐃᓅᓕᓴᐅᑎᓄᑦ ᑐᕌᕈᑕᐅᔪᓐᓇᖅᑐᓂᒃ," ᓇᓗᓇᐃᖅᓯᓪᓗᓂ. 

ᐊᖏᕐᕋᒧᑦ ᐊᐅᓪᓚᖅᖢᓂ ᖃᐅᔨᓴᕆᐊᖅᑐᖅᖢᓂ ᐊᔪᕐᓇᓚᐅᙱᑦᑐᖅ ᐊᒻᒪ ᓯᐱᔅᑕᓐ ᓇᓗᓇᐃᖅᓯᓪᓗᓂ ᓂᕈᐊᒐᒃᓴᐅᙱᖦᖢᓂ ᑭᒃᑯᓕᒫᓄᑦ. ᖁᕕᐊᓇᓚᐅᖅᑐᖅ ᐊᒃᑐᐊᓂᖃᕐᒪᑦ ᓄᓇᓕᑖᓵᒥᓄᑦ, ᐃᑦᑐᒃᑯᖏᑦ/ᐊᑖᑕᑦᑎᐊᒃᑯᖏᑦ ᑕᐃᑲᓂ ᓄᓇᖃᖅᑐᑦ ᐊᒻᒪ ᐱᖃᓐᓇᕆᔭᖏᑦ ᐊᐃᓯᒪᓪᓗᑎᒃ ᓯᓚᑦᑐᖅᓴᕐᕕᒡᔪᐊᕐᒧᐊᖃᑎᒋᔭᐅᖏᓐᓇᓚᐅᖅᑐᑦ. ᓯᐱᔅᑕᓐ ᖁᔭᓕᔪᖅ ᐃᓄᑑᙱᖦᖢᓂ. 

"ᐱᖃᓐᓇᕆᓛᕋ ᐅᕙᖓᓗ ᐱᓇᔪᖃᑎᒌᓚᐅᕋᓐᓄᑦ ᐅᑕᕗᐊᓕᐊᖃᑎᒌᒃᖢᑕ ᐊᑕᖏᖅᖢᑕ ᐱᓕᕆᓚᐅᖅᐳᒍᑦ. ᑕᒪᓐᓇ ᐃᓄᑑᓗᐊᕐᓇᕈᓐᓃᓚᐅᖅᑐᖅ, ᖃᐅᔨᓚᐅᖅᑐᖓ. ᑭᓯᐊᓂᓕ, ᑕᒪᓐᓇ ᐱᔭᕆᐊᑭᑦᑐᑯᓘᖏᒻᒪᑦ. ᓂᕈᐊᕈᓐᓇᖏᑦᑐᑎᑦ ᓇᒧᑦ ᐊᖏᕐᓂᐊᕐᒪᖔᖅᐱᑦ. ᑭᓯᐊᓂ ᑕᒪᕐᒥᑲᓴᒃ ᑲᓇᑕᒥ ᓯᓚᑦᑐᖅᓴᕐᕕᒡᔪᐊᑦ ᐃᑲᔫᑎᒃᓴᖃᑦᑎᐊᕐᓂᐊᖅᐳᑦ, ᐱᓗᐊᖅᑐᒥᒃ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᓄᑦ," ᓯᐱᔅᑕᓐ ᐅᓂᒃᑳᖅᐳᖅ. ᐸᓚᐅᒐᓕᐅᖅᑐᓂᑦ ᑏᑐᖅᑐᓂᓪᓗ ᐅᓐᓄᓴᒃᑯᑦ ᐃᓄᑐᖃᐃᓪᓗ ᐅᖃᖃᑎᖃᖅᑎᓪᓗᒋᑦ, ᐱᕕᖃᐅᖅᑐᒻᒪᕆᐅᕗᑦ ᐃᑲᔪᖅᑕᐅᔪᓐᓇᕐᓂᕐᒥᑦ ᓯᓚᑦᑐᓴᕐᕕᓐᓂᑦ. ᐊᕙᓗᔭᐅᓯᒪᓪᓗᓂ ᓄᑖᓄᑦ ᐃᓄᖕᓄᑦ ᑕᐃᒪᙵᓕᒫᖅ, ᐅᓄᖅᑐᓂᒃ ᐱᕕᒃᓴᖅᑕᖃᖅᐳᖅ ᐱᖃᓐᓇᕆᔭᖅᑖᕐᓂᕐᒥᒃ. 

"ᐋᓐᓂᐊᖅᑐᓕᕆᓂᕐᒧᑦ ᐃᓕᓐᓂᐊᕐᕕᐅᔪᖅ ᐊᒻᒪᓗ ᓇᒻᒥᓂᖅ ᐱᒡᒐᓇᖅᑐᒻᒪᕆᐅᕗᖅ." 

ᑎᑎᕋᖅᓯᕙᓪᓕᐊᓪᓗᓂ MCAT−ᒥᒃ ᐊᑭᖏᓐᓄᑦ ᐃᓕᓐᓂᐊᕆᐊᕐᓂᐊᕐᓗᓂ, ᐊᒥᓱᓂᒃ ᐊᓂᒍᖅᑎᓐᓇᓱᒋᐊᓕᖕᓂᒃ ᐱᑕᖃᖅᐳᖅ. ᐊᒥᓱᑦ ᓯᐱᔅᑕᓐ ᐃᓕᓐᓂᐊᖃᑎᖏᑦ ᐃᖅᑲᓇᐃᔭᕆᐊᖃᓚᐅᖏᑦᑐᑦ ᐊᐅᔭᒃᑯᑦ ᐊᒻᒪᓗ ᐃᓕᓐᓂᐊᕆᐊᕈᓐᓇᓚᐅᖏᑦᑐᑦ ᐅᐸᓗᖓᐃᔭᕐᓂᕐᒧᑦ, ᑭᓯᐊᓂ ᐊᔪᓚᐅᖅᑐᖅ. ᑮᓇᐅᔭᖃᓚᐅᖏᒻᒪᑦ ᐊᒻᒪᓗ ᐱᓕᕆᒋᐊᖃᓚᐅᖅᑐᓂ ᐃᒻᒥᓂᒃ ᐃᑲᔪᖅᑐᐃᓂᐊᕐᓗᓂ. 

"ᑕᐃᒪᓕ ᑕᒫᓃᓕᖅᑎᓪᓗᖓ, ᐃᓕᓐᓂᐊᕐᕕᒃ ᐊᔪᕐᓇᕐᒪᑦ. ᑕᒪᓐᓇ ᐱᔭᕆᐊᑭᑦᑐᑯᓘᖏᒻᒪᑦ ᐃᖅᑲᓇᐃᔮᕆᔪᒪᔭᖓ. ᑭᓯᐊᓂ ᒪᓪᓕᖅᑐᒦᑉᐳᖅ. ᐃᓛᓐᓂᒃᑯᑦ ᐱᔭᒃᓴᖃᕐᔪᐊᕐᓇᕐᒪᑦ ᐊᒃᓱᕈᐃᓐᓇᖅᖢᑎᓪᓗ," ᐅᓂᒃᑳᖅᐸᒃᖢᓂ. ᐊᓯᐊᒍᑦᑕᐅᖅ, ᓲᕐᓗ ᐃᓕᓐᓂᐊᕐᓇᖅ ᓄᖅᑲᖓᑎᓪᓗᒍ, ᑕᖃᐃᖅᓯᓚᐅᑲᖕᓇᖅᐳᖅ ᓯᓂᒍᓐᓇᖅᖢᓂᓗ. ᐃᑲᔫᑎᖃᙱᖦᖢᓂ ᐱᖅᑯᓯᒃᑯᑦ ᐋᓐᓂᐊᕕᖕᒥ ᐱᓕᕆᖃᑦᑕᖅᓯᒪᓂᑰᔪᓄᑦ ᐊᖓᔪᖅᑳᓄᑦ ᓘᒃᑖᓄᑦ ᐅᕝᕙᓘᓐᓃᑦ ᓴᐳᓐᓂᐊᖅᑎᓄᑦ, ᑐᓗᖅᑕᕈᑎᖃᕐᓂᖅᓴᐅᖃᑦᑕᓚᐅᖅᐳᖅ ᐃᓕᓐᓂᐊᖃᑎᖏᓐᓂᒃ. 

ᐃᑲᔪᕐᓂᐊᕐᓗᓂ ᐊᓂᒍᐃᑎᑦᑎᓂᐊᕐᓗᓂ ᐃᓚᖏᓐᓂᒃ ᑕᒪᒃᑯᓂᖓ ᐊᔭᖅᑭᑦᑕᕈᑕᐅᕙᒃᑐᓂᒃ, ᐱᕕᒃᓴᖅᑕᖃᖅᐳᖅ ᐃᓕᓐᓂᐊᕐᕕᖕᒥᓂ, ᓲᕐᓗ ᐊᑭᖃᙱᑦᑐᒥᒃ ᐊᔪᕈᓐᓃᖅᓴᖅᑎᑦᑎᓂᕐᒥᒃ MCAT−ᒧᑦ ᖃᐅᔨᓴᖅᑕᐅᓂᕐᒥᒃ. "ᑲᓇᑕᒥ ᓯᓚᑦᑐᖅᓴᕐᕕᒡᔪᐊᑦ, ᐱᓗᐊᖅᑐᒥ ᐅᐊᓕᓂᕐᒥᐅᑦ, ᐃᑲᔪᖅᓱᐃᑦᑎᐊᓕᖅᐸᓪᓕᐊᖕᒪᑕ ᓄᓇᓕᒡᔪᐊᖑᙱᑦᑐᓂᒃ ᐊᒻᒪ ᓄᓇᖃᖅᑳᖅᓯᒪᔪᓂᒃ ᐱᓇᔪᒃᑐᓂᒃ ᐊᔾᔨᒌᒃᑎᑦᑎᓂᖅᓴᐅᓕᖅᖢᑎᒡᓗ ᑕᐃᒪᓐᓇ," ᑕᐃᒪᓐᓇ ᓇᓗᓇᐃᖅᓯᓪᓗᓂ.  

ᐅᑎᕆᐊᒃᑲᓐᓂᕈᓐᓇᕈᓂ ᐊᒻᒪᓗ ᑐᓴᖅᑎᑦᑎᓗᓂ ᒪᒃᑯᖕᓂᖅᓴᒧᑦ ᐃᒻᒥᓂᒃ ᐅᒃᐱᕆᓂᖅᓴᐅᓇᔭᖅᑐᖅ. "ᐃᒃᐱᒋᐃᓐᓇᐅᔭᖅᑕᕋ ᑎᑭᐅᑎᓗᐊᕌᕐᔪᒃᖢᖓ ᐱᔪᓐᓇᕐᓂᕐᒪ ᐅᖓᑖᓄᑦ, ᐱᓗᐊᖅᑐᒥᒃ ᐃᓅᓕᓴᐅᑎᓄᑦ. ᐊᔪᕐᓇᕈᔪᖕᒪᑦ, ᑭᓱᑐᐃᓐᓇᕐᓄᐊᕋᓗᐊᖅᖢᓂ, ᐃᓛᓐᓂᒃᑯᑦ ᑕᐃᑲᓂᒥᐅᑕᐅᖅᑰᔨᕙᙱᖦᖢᑎᑦ, ᐊᒃᓱᕈᓗᐊᓕᓲᖑᒐᔅᓯ ᑕᒻᒪᖅᑰᔨᓕᖅᖢᑎᓪᓗ ᐅᕙᓐᓂᒃ ᐊᖏᖅᑰᔨᓪᓗᑎᒃ," ᓈᓴᐃᒃᑲᓐᓂᖅᖢᓂ. "ᐅᕙᖓ ᐅᖃᐅᔾᔨᑐᐃᓐᓇᕋᔭᖅᑐᖓ ᐃᓱᒫᓗᒍᓐᓃᕐᓗᖓ ᐊᒻᒪ ᐅᒃᐱᕈᓱᑐᐃᓐᓇᕐᓗᖓ ᐊᒃᓱᕈᖅᖢᖓ ᐱᓕᕆᐊᕆᓯᒪᔭᓐᓂᒃ ᐊᒻᒪ ᐅᕙᓐᓂᒃ ᐅᒃᐱᕈᓱᒃᖢᖓ," ᑲᔪᓯᓪᓗᓂ.

ᐃᓕᓐᓂᐊᖅᑎᓪᓗᒍ, ᓯᑉᐱᔅᑕᓐ ᖃᐅᔨᓚᐅᖅᑐᖅ ᐊᖏᔪᖅ ᐃᓅᓕᓴᐅᑎ ᓇᓂᓯᔪᖅ ᐊᑐᒐᒃᓴᓂᒃ ᓇᓕᒧᒌᒃᑎᓐᓇᓱᒃᓗᒍ.  "ᐊᒃᓱᐊᓗᒃ, ᐊᔪᕐᓇᙱᑦᑐᑯᓘᕗᖅ ᐃᓕᖕᓂᒃ ᐊᓯᐅᔨᑐᐃᓐᓇᕆᐊᒃᓴᖅ ᐃᖅᑲᓇᐃᔭᕐᕕᒋᔭᕐᓂ, ᐊᓂᑐᐃᓐᓇᖅᖢᓂᓗ ᑭᓯᐊᓂ ᐊᓂᔪᓐᓇᐃᓪᓕᒍᕕᑦ. ᐱᐅᓯᕙᓪᓕᐊᑐᐃᓐᓇᕋᒪ ᐋᖅᑭᒐᓱᑐᐃᓐᓇᖅᖢᖓ," ᐅᖃᖅᖢᓂ. ᐅᓐᓄᐊᓕᒫᖅ ᐃᓕᓐᓂᐊᖏᖦᖢᓂ, ᕿᒻᒥᒥᒃ ᐱᓱᔪᒃᖢᓂ ᐱᓱᔪᒃᖢᓂ ᐊᒻᒪᓗ ᑕᓚᕕᓴᒃᑯᑦ ᑕᐅᑐᒃᖢᓂ.  ᐱᓕᕆᔪᒪᑦᑎᐊᕌᖓᑦ ᐱᔪᒪᑎᓪᓗᒍ, ᐆᑦᑐᒪᖃᑦᑕᖅᑕᖓ.  

ᐃᓚᖓᑦ ᐱᔾᔪᑎᒋᔭᖓ ᖁᕕᐊᒋᔭᖓ ᐃᓕᓐᓂᐊᕆᐊᕆᐊᒃᓴᖅ ᐃᐊᑦᒪᑕᓐᒥ ᐊᒥᓱᓂᒃ ᐋᓐᓂᐊᕐᕕᓕᐊᕐᓯᒪᒻᒪᑕ ᐅᑭᐅᖅᑕᖅᑐᒥᒃ. ᑕᑯᖃᑦᑕᖅᑐᑦ ᓄᓇᑦᓯᐊᕐᒥ ᑲᑭᖅᑯᐊᓂᒃ ᐋᓐᓂᐊᕕᖓᑕ ᓇᓗᓇᐃᒃᑯᑕᖓᓂᒃ ᐊᒻᒪᓗ ᐱᑕᖃᕋᔪᑦᑐᓂ. "ᐱᐅᕗᖅ ᑕᒪᒃᑯᐊ ᒥᑭᑦᑐᑯᓗᐃᑦ ᐊᑕᖃᑦᑕᐅᑎᔪᓐᓇᖅᖢᑎᒃ ᐃᒃᓯᕚᕈᓐᓇᖅᖢᑎᒡᓗ ᐅᖃᖃᑎᖃᕈᓐᓇᖅᖢᑎᒡᓗ ᑭᓇᒥᑭᐊᖅ ᐋᓐᓂᐊᕕᖕᒦᑦᑐᒥᒃ ᐋᓪᓚᐅᔪᒥᒃ ᓄᓇᓕᐸᐅᔭᕐᒥ. ᖁᕕᐊᓱᓗᐊᓚᐅᖅᓯᒪᙱᑦᑐᖅ ᐅᓂᒃᑎᑕᐅᔭᕆᐊᒃᓴᖅ ᐋᓐᓂᐊᕕᖕᒧᑦ," ᓈᓴᐃᒃᑲᓐᓂᕐᖢᓂ. ᖃᐅᒪᑎᑦᑎᒍᓐᓇᖅᑐᓂ ᑭᓇᒥᑭᐊᖅ ᖃᐅᔨᒪᔪᒥᒃ ᑭᓇᒥᑭᐊᖅ ᑐᑭᓯᐊᔪᒥᒃ ᓇᑭᙶᕐᒪᖔᑕ ᐱᒻᒪᕆᐅᔪᖅ ᑕᐃᔅᓱᒧᖓ ᐊᒻᒪᓗ ᐃᓚᖓ ᐱᑦᔪᑎᖓᑕ ᐊᑦᔨᖓᓂᒃ ᓄᓇᖃᕈᒪᓂᖓᓄᑦ ᐃᐊᑦᒪᑕᓐᒥ ᓯᕗᒧᑦ ᐃᖏᕐᕋᓗᓂ.  

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᓱᒪᒋᔭᖃᖅᖢᓂ ᐃᖅᑲᓇᐃᔮᖃᕐᓂᕐᒥᒃ ᐃᓗᐊᖅᓴᐃᕙᖕᓂᕐᒥᒃ ᐱᔪᒥᓇᖅᐳᖅ. "ᑭᓇᑐᐃᓐᓇᖅ ᑕᖅᑳᓂ ᒥᑭᑦᑐᑯᓗᖕᒥᓪᓘᓐᓃᑦ ᑲᐱᓯᓯᒪᒃᐸᑦ ᐱᔪᒪᑐᐃᓐᓇᕆᐊᖃᖅᑕᒥᓂᒃ, 100%−ᑐᐃᓐᓇᒥᒃ, ᐊᒃᓱᕈᕐᓗᓂ ᐱᓕᕆᓗᓂ, ᐊᔪᙱᓐᓂᖅᑖᕐᓗᓂ, ᐊᒃᓱᕈᓕᕐᓗᓂ ᐊᒻᒪᓗ ᐊᖅᑯᑎᒋᔭᐃᑦ ᐃᓅᓕᓴᐅᑎᑐᓕᕐᓂᕈᕕᑦ, ᐊᒃᓱᕈᕐᓇᖅᑑᕗᖅ, ᑭᓯᐊᓂ ᐅᓪᓗᖅ ᐊᓂᒍᖅᑎᓪᓗᒍ, ᖁᕕᐊᓇᑦᑎᐊᖅᐳᖅ ᐊᑑᑎᖃᖅᖢᓂᓗ," ᐅᖃᖅᖢᓂ. 

ᖃᐅᔨᒪᓪᓗᒍ ᔭᓗᓇᐃᒨᕈᕕᑦ, ᓄᓇᖃᖅᑳᖅᓯᒪᔪᓂᒃ ᓘᑦᑖᖅᑕᖃᓗᐊᙱᒻᒪᑦ ᑕᐃᑲᓂ ᐊᒻᒪᓗ ᑭᒡᒐᖅᑐᐃᓂᖅ ᓱᓕ ᑕᐃᑲᓃᙱᒻᒪᑦ, ᓯᐊᔭ ᓯᑉᔅᑕᓐ ᖁᕕᐊᓱᑦᑐᖅ ᐃᓚᒋᔭᐅᒋᐊᒥᒃ ᐊᓯᔾᔨᕐᓂᐅᔪᒧᑦ ᑕᑯᔪᒪᔭᒥᓄᑦ ᓄᓇᕐᔪᐊᕐᒥ.  ᐱᓕᕆᐊᒃᓴᖃᕐᔪᐊᖅᑐᑦ, ᐊᔪᕐᓇᙱᑦᑐᑯᓘᙱᖦᖢᓂᓗ ᖁᕝᕙᕆᐊᕋᓱᒃᓗᒍ ᐊᒃᓱᕈᕐᓇᕐᓂᖓ ᐃᓯᕋᓱᒃᓗᓂ ᐃᓅᓕᓴᐅᑎᓄᑦ ᔭᓗᓇᐃᒥ, ᓄᓇᖃᖅᑳᖅᓯᒪᓪᓗᓂ ᐅᑭᐅᖅᑕᖅᑐᒥᙶᖅᑐᖅ ᐃᓅᓕᓴᐅᑎᓄᑦ ᐱᓪᓗᓂ.  ᐊᑐᖅᖢᓂ ᑲᒫᓗᖕᒥᒃ ᖃᐅᓪᓗᖅᑕᒥᒃ ᐊᐳᑎᐅᓪᓗᓂ ᐊᖏᕐᕋᒧᑦ, ᐃᑲᔪᓕᖅᐸᒃᐳᖅ ᒪᒥᓴᕐᓂᕐᒥᒃ ᐃᓗᐊᖅᓴᖅᑕᐅᔭᖅᑐᖅᓯᒪᔪᓂᒃ ᑭᒡᒐᖅᑐᐃᑦᑎᐊᙱᓐᓇᐅᔭᖅᖢᓂᓗ ᐃᓄᖁᑎᒥᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᕙᒃᑐᒥ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.