ᓵᑎᐊᓇ ᒎᐱᐅᓪ ᓱᑲᓐᓇᐃᓐᓇᐅᔭᖅᑐᖅ ᐆᒻᒪᖅᑯᑎᒥᒃ, ᐊᓱᐃᓛᒃ ᐱᕕᖃᓕᕋᒥ ᐅᐊᔭᓕᕆᔨᙳᕋᓱᒃᑎᓪᓗᒍ ᐱᓪᓗᓂᐅᒃ.

ᒎᐱᐅᓪ ᐃᖃᓗᖕᒥᐅᑕᖅ, ᓄᓇᕗᒻᒥ, ᓄᓇᖃᖅᓯᒪᓪᓗᓂᓗ ᐊᔾᔨᒌᙱᑦᑐᓂ ᐃᓂᓂ ᑲᓇᑕᒥ ᐊᒥᐊᓕᒃᑲᓂᓗ, ᓲᕐᓗ ᑯᐃᐸᒃ, ᐋᓐᑎᐅᕆᐅ, ᑳᓐᔅ, ᑲᓲᑎᓂᖅ, ᐊᓯᖏᓪᓗ.

ᒎᐱᐅᓪ ᐅᐊᔭᓕᕆᔨᐅᓪᓗᓂ, ᐅᖃᖅᖢᓂᓗ ᐆᒻᒪᖅᑯᑎᖃᐃᓐᓇᐅᔭᕐᓂᕋᖅᖢᓂ ᖃᐅᑕᒫᑦ ᐊᑐᖅᑕᐅᓲᖑᓂᖓᓄᑦ. ᐱᔪᒪᓕᓚᐅᖅᑐᖅ ᑕᐅᖅᓰᓂᕐᒥᒃ ᐅᐃᔅᑕᒥ, ᑭᐊᓐᔅᒥ, ᐱᖃᑎᖓ ᑕᐃᔅᓱᒪᓂ ᖃᑕᙳᑎᖃᕐᖢᓂ ᐃᖅᑲᓇᐃᔭᖅᑐᒥᒃ ᐃᒡᓗᓕᐅᖅᑎᓄᑦ ᐅᐊᔭᓕᕆᔨᓄᑦ.

ᖃᐅᔨᒪᓪᓗᓂ ᓴᓇᔨᕈᕈᒪᓕᕋᒥ, ᐃᓚᒥᓂᒃ ᐱᖃᓐᓇᕆᔭᒥᓂᒡᓗ ᐊᑐᖅᖢᓂ ᐊᒻᒪ ᐅᐊᔭᓕᕆᔨᙳᕆᐅᖅᓴᔪᓐᓇᖅᓯᓚᐅᖅᖢᓂ.

"ᑐᓂᔭᐅᑎᓪᓗᖓ ᐱᕕᖃᖅᑎᓪᓗᖓ, ᐱᒋᐊᓚᐅᖅᑐᖓ ᑐᖑᔪᕈᔪᒃᑐᑎᑐᑦ. ᐊᒻᒪᓗ ᖃᓗᕋᖅᑕᐅᓪᓗᖓ. ᐃᑲᔪᓕᕐᒥᓗᑎᒃ ᐋᖅᑭᒃᓱᐃᑎᓪᓗᒋᑦ, ᐱᖓᓱᑦ ᑲᑎᙵᙱᑦᑐᑦ ᐃᒡᓗᐃᑦ ᐃᓗᐊᓂ," ᒎᐳᓪ ᐅᖃᖅᑐᖅ.

"ᑕᐃᑲᓂ ᐃᒡᓗᓕᐅᕐᕕᖕᒥ, ᐃᓕᑦᑎᔪᓐᓇᓚᐅᖅᑐᖓ ᖃᓄᖅ ᐃᒡᓗᓕᐅᕆᐊᒃᓴᖅ ᐊᔾᔨᓪᓗᐊᑕᖓᓂᒃ ᐃᒡᓗᓕᐅᕈᒪᔪᓂᒃ ᐱᓇᔫᑎᓂᒃ, ᐊᒻᒪ ᑮᓇᐅᔭᓕᐅᕋᓱᐊᕐᕕᖕᓂᒃ, ᐊᒻᒪ ᓴᓇᕝᕕᐊᓗᖕᓂ ᐅᐊᔭᓂᒃ."

ᑭᓯᐊᓂ ᐅᐊᔭᓕᕆᔨᕈᓚᐅᖅᑎᓐᓇᒍ, ᒎᐱᐅᓪ ᕼᐋᑭᖃᑕᐅᓚᐅᖅᐳᖅ ᐋᑐᐋᒥ ᐃᓕᓴᐃᔨᒋᓚᐅᖅᑕᖓᑦ 10-ᓂᒃ ᐱᓐᖑᐊᕆᐊᖅᑐᕈᓐᓇᓚᐅᕐᒪᑦ ᑖᓐᐳᕆᒥ, ᐊᑕᖃᑕᐅᔪᒥᒃ.

ᐱᓕᕆᖃᑎᒌᒃᓂᒃᑯᑦ, ᑲᑎᖃᑎᖃᕈᓐᓇᓚᐅᖅᑐᖅ ᑖᑦ ᔅᑑᓕᖕ, ᐊᐅᓚᑦᑎᓚᐅᖅᑐᖅ ᐸᒃ−ᒥᒃ, ᕼᐋᑭᕐᓂᕐᒧᑦ ᐃᓕᓐᓂᐊᕐᕕᖕᒥ ᐊᒻᒪ ᐅᖃᖃᑎᒋᓪᓗᒍ, ᑲᓲᑎᔪᓐᓇᓚᐅᖅᑐᖅ.

"10−ᓂᒃ ᐱᙳᐊᖅᑎᓪᓗᒋᑦ, ᐱᙳᐊᖃᑕᐅᓚᐅᖅᐳᖓ ᐊᓯᖏᓐᓂᒃ ᐱᙳᐊᖃᑎᒌᓂᒃ, ᐊᒻᒪ ᐊᕐᕌᒍ ᐊᒥᐊᒃᑯᖓᓂ ᐱᓯᒪᔪᒪᓕᓚᐅᖅᐳᖓ. ᐊᒻᒪᓗ ᐃᖏᕐᕋᖃᑦᑕᕐᓂᖏᑎᒍᑦ ᒥᐊᓕᒐᐃᑦ ᓄᓇᖓᓐᓂ, ᑉᓘᒥᖕᑕᓐᓕᐊᕈᓐᓇᓚᐅᖅᑐᖓ, ᐃᓕᓄᐃ, ᐅᐃᔅᑕ, ᑲᓐᔅ, ᓛᑐ, ᑎᐊᒃᓴᔅ, ᐊᒻᒪᓗ ᐊᓕᒃᓵᓐᑐᕋ ᐸᐃ, ᓂᐅ ᔪᐊᒃ," ᐅᖃᖅᑐᖅ ᒎᐱᐅᓪ.

ᐅᖃᖅᑐᖅ ᑕᐃᒃᑯᐊ ᐊᑐᖅᓯᒪᔭᖏᑦ ᐃᑲᔪᓚᐅᖅᑐᑦ ᐃᓕᑦᑐᓐᓇᕐᓂᕐᒥᒃ ᐃᒻᒥᓂᑐᐊᖑᙱᑦᑐᖅ ᑭᓯᐊᓂᑦᑕᐅᖅ ᐊᔾᔨᒌᖏᑦᑐᓂᒃ ᐃᓕᖅᑯᓯᕐᓂᒃ ᐊᑕᐅᓯᕐᒥ ᓄᓇᒋᔭᐅᔪᒥ.

"ᖁᔭᓕᑦᑎᐊᖅᑕᒃᑲ ᑖᒃᑯᐊ ᐱᕕᒃᓴᐃᑦ. ᐃᓱᒪᓪᓗᖓᓗ ᖃᖓᑦᑎᐊᓵᒃᑯᑦ, ᐱᓚᐅᖅᑐᖓ ᓴᓇᔨᒻᒪᕆᐅᓂᕐᒧᑦ ᐅᐊᔭᒨᖅᑐᓂᒃ, ᐊᔾᔨᖃᕈᓐᓇᖅᓯᒪᕗᖓ ᖁᔭᓕᓪᓗᖓᓗ ᐊᑐᖅᓯᒪᔭᓐᓂᒃ," ᐅᖃᖅᑐᖅ ᒎᐱᐅᓪ.

ᒎᐱᐅᓪ ᑐᓴᕈᒥᓇᖅᑐᒥᒃ ᐃᖏᕐᕋᓯᒪᒐᓗᐊᖅᑎᓪᓗᒍ, ᑕᒪᓐᓇ ᐊᐳᖅᑕᕈᑕᐅᖃᑦᑕᖅᓯᒪᒻᒥᔪᖅ.

ᒎᐱᐅᓪᒧᑦ, ᐃᓚᖓᑦ ᐊᕝᕕᐊᕈᑎᓪᓗᐊᑕᐅᔪᖅ ᐊᑖᑕᖓᑕ ᕿᒪᑦᑕᖓ ᐊᒻᒪᓗ ᐊᓈᓇᒃᓴᖓᑕ ᐊᖏᕐᕋᖓᓂ. ᐅᖃᖅᑐᓂ ᖃᐅᔨᖅᑳᓚᐅᕐᓂᕋᖅᑐᓂ ᐊᔅᓱᕈᓐᓇᖅᑐᒥᑦ ᓯᕗᓪᓕᕐᒥ, ᐱᒡᒐᓇᓚᐅᕐᒪᑦ ᓇᓂᓯᒐᓱᐊᕆᐊᖓ ᓄᑖᒥᒃ ᐃᓕᖅᑯᓯᐅᔪᒥᒃ ᖃᐅᔨᒪᙱᑕᒥᓂᒃ.

ᐅᖃᖅᖢᓂ ᑲᓲᑎᖃᑕᐅᑎᓪᓗᒍ ᐊᖏᕐᕋᖅᓯᒪᔪᓐᓇᖅᑎᖦᖢᓂᐅᒃ, ᐃᑲᕐᕋᓄᑦ 7-ᓄᑦ ᐊᑖᑕᒥᓄᑦ ᑕᑯᔭᐅᔭᖅᑐᖅᖢᓂ, ᓯᕘᕋᔪᓐᓃᖅᐹᓪᓕᕈᑎᒋᓪᓗᓂᐅᒃ.

ᒎᐱᐅᓪ ᐅᖃᕐᒥᔪᖅ ᕼᐋᑭᖅᑐᓂ, ᐱᕈᖅᓴᓪᓗᓂ ᐱᙳᐊᖃᑦᑕᓚᐅᖅᓯᒪᔪᖅ ᐃᓄᓐᓂᒃ ᐃᓗᐊᓂ ᐱᖓᓱᓂ ᑎᓴᒪᓂᓪᓘᓐᓃᑦ ᐊᕐᕌᒍᓕᓐᓂᒃ ᑭᓯᐊᓂ ᐱᙳᐊᑲᓪᓚᓚᐅᖅᑐᖅ ᐊᖑᑎᓂᒃ 10-12-ᓂᒃ ᐅᑭᐅᖃᖅᑐᓂ.

"ᖃᐅᔨᒪᕗᑎᑦ ᑖᒃᑯᐊ, ᐃᓕᓐᓂᐊᖃᑎᑎᑦ ᐱᕈᖅᓯᒪᓂᖅᓴᐅᓕᕐᒪᑕ. ᓴᓐᖏᓂᖅᓴᐅᒻᒪᑕ. ᐃᓱᒪᒥᒎᖅᑐᑦ. ᐊᒻᒪ ᒪᓕᒍᓐᓇᑦᑎᐊᖅᑐᑦ," ᐅᖃᖅᑐᖅ ᒎᐳᓪ.

"ᖃᐅᔨᓚᐅᖅᑐᖓ ᐊᒃᓱᕈᕐᓇᕐᓂᖅᐹᖑᖃᑕᐅᓂᖓᓂᒃ. ᒪᓕᑦᑎᐊᕋᓱᒡᓗᑎᑦ ᐃᓕᑦᑎᕙᓪᓕᐊᑎᓪᓗᑎᑦ ᐃᖢᕐᕆᓂᕐᒥᒃ ᑭᓱᑐᐃᓐᓇᑦᑎᐊᓂᒃ ᐊᑐᓚᐅᖅᓯᒪᔭᕐᓂᒃ."

ᒎᐱᐅᓪ ᓱᓕ ᕼᐋᑭᖃᑕᐅᕗᖅ ᐊᒻᒪ ᑲᒪᔨᖏᓐᓂᒃ ᓄᑕᖅᑲᓂᒃ. ᐊᓕᐊᓇᐃᒍᓱᑦᑎᐊᓚᐅᖅᑐᖅ ᐱᕕᖃᖅᑎᑕᐅᔪᓐᓇᕐᓂᕐᒥᓂᒃ ᐱᙳᐊᕈᓐᓇᖅᑎᑕᐅᓪᓗᓂ ᖁᑦᑎᒃᑐᒦᓐᓂᖅᓴᓂᒃ ᐱᙳᐊᖅᑎᓂᒃ ᐃᓕᓐᓂᐊᖅᖢᓂᓗ ᑲᒪᔨᑦᑎᐊᕙᖕᓂᑦ ᐃᖅᑲᓇᐃᔭᖅᑎᓪᓗᒍ, ᑕᐃᒪᐃᒻᒪᑦ ᐱᒻᒪᕆᐅᓇᓱᒋᓚᐅᖅᐸᐅᒃ ᐅᑎᖅᑎᓐᓇᓱᒋᐊᒃᓴᖅ.

"ᑲᔪᓯᓂᖃᑦᑎᐊᖅᑐᖅ ᑕᑯᔭᕆᐊᒃᓴᖅ ᐃᓚᖏᓐᓂᒃ ᐊᖅᑯᑎᓂᒃ ᑐᓂᔪᒪᔭᕐᓂᒃ ᑕᐃᒃᑯᓄᖓ ᑲᒪᔨᐅᕝᕕᒋᔭᕐᓄᑦ. ᐃᓱᒪᔪᖓ ᐱᙳᐊᕐᓂᖅ ᓴᓐᖏᔪᐊᓘᒋᐊᖓ. ᐱᔪᓐᓇᖅᑎᑦᑎᓪᓗᓂᓗ ᒪᒃᑯᒃᑐᓂᑦ ᓂᖅᑐᐃᓗᑎᒃ ᐃᓚᖏᓐᓂ ᐃᓅᓯᕐᒥ ᐊᔪᙱᓐᓂᕐᓂ ᐊᑐᕐᓂᐊᖅᑕᖏᓐᓂ ᑭᖑᓂᐊᒍᑦ," ᐅᖃᖅᑐᖅ ᒎᐳᓪ.

"ᐃᓕᓐᓂᐊᖅᑎᑦᑎᓇᓱᒃᑲᕕᑦ ᐃᓱᒪᒋᔭᐅᔪᓂᒃ ᐊᒻᒪ ᐱᓕᕆᔾᔪᓯᕐᓂᒃ, ᑭᓯᐊᓂ ᑭᖑᓂᐊᒍᑦ, ᐱᕙᒌᔭᖅᓯᕙᓪᓕᐊᔪᓯ ᒪᒃᑯᒃᑐᓂᒃ ᓯᕗᓂᒃᓴᒥ ᐃᖅᑲᓇᐃᔮᒃᓴᖏᓐᓄᑦ, ᐃᓕᓐᓂᐊᖅᑎᓐᓇᓱᒃᓗᒋᓪᓗ ᐃᓚᖏᓐᓂᒃ ᐱᒻᒪᕆᐅᒋᔭᐅᔪᓂᒃ ᐃᓕᓐᓂᐊᓚᐅᖅᑕᔅᓯᓐᓂᒃ ᐱᕈᖅᐸᓪᓕᐊᓂᕐᒥᒃ."

ᐊᒻᒪᓗ ᐃᓄᐃᑦ ᐃᓱᒪᔪᑦ ᕿᒪᐃᒍᒪᓂᕐᒥᒃ ᓄᓇᒥᓐᓂᒃ ᐃᓕᓐᓂᐊᕆᐊᒃᑲᓂᕐᓗᑎᒃ ᐅᕝᕙᓘᓐᓃᑦ ᐃᖅᑲᓇᐃᔮᖃᕐᓗᑎᒃ, ᒎᐱᐅᓪ ᑎᓕᐅᕆᔪᖅ ᑭᓇᑐᐃᓐᓇᕐᒥᒃ ᓯᓐᓇᑦᑑᒪᒋᔭᒥᓂᒃ.

"ᖁᕕᐊᒋᑦᑎᐊᖅᐸᒋᑦ ᖃᓄᐃᓕᐅᕈᒪᔭᕐᓂᒃ. ᐊᖅᑯᑎᐅᑉᐸᑦ ᓯᓚᑦᑐᕐᓴᖅᕕᒃᑯᑎᒍᑦ ᐅᕝᕙᓘᓐᓃᑦ ᐃᓕᓐᓂᐊᕐᕕᔾᔪᐊᒃᑯᑦ, ᐃᓕᑕᖅᓯᓗᑎᒃ ᐃᓚᑎᑦ ᑕᐃᑲᓃᓐᓂᐊᕐᒪᑕ. ᐊᒥᓱᑦ ᖁᕕᐊᒋᖃᑦᑕᖅᑕᑎᑦ ᐊᖏᕐᕋᕐᓂ ᐱᓕᕆᓪᓗᒋᑦ, ᖁᕕᐊᒋᕙᒃᓗᒋᑦ ᑕᒪᒃᑯᐊ ᐱᕕᖃᓕᕌᖓᕕᑦ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.