"ᐊᓯᓐᓂᒃ ᐃᓕᓐᓂᐊᖅᑎᑦᑎᔪᒪᓲᖑᕗᖓ ᐅᖃᐅᓯᕐᓂᒃ, ᐃᓕᖅᑯᓯᕐᓂᒃ ᐊᒻᒪ ᑭᓱᓕᒫᓂᒃ ᐃᓕᓯᒪᔭᓐᓂᒃ ᐃᓅᓯᓕᒫᓐᓂ," ᓯᐅᕋᓐ ᓇᕼᐋᓂ-ᐋᓚᓐ ᐅᓂᒃᑳᖅᑐᖅ. ᖃᑕᙳᑎᖏᑦ ᑳ'ᒌ ᑐ, ᑐᓕᑕ ᐊᒻᒪ ᐲᑦᔨ ᑭᙴᑦ. ᐱᕈᖅᓴᓚᐅᖅᓯᒪᔪᖅ ᑎᕼᐃᑎᓕᒥ ᐊᖓᔪᖅᑳᒥᓄᑦ ᑎᒍᐊᖅᑖᕆᓚᐅᖅᓯᒪᔭᒥᓄᑦ ᐊᒻᒪᓗ ᓄᓇᖃᓚᐅᕆᓪᓗᓂ ᕗᐊᑦ ᓯᒻᓴᓐᒥ ᐊᖓᔪᖅᑳᓪᓚᕆᖏᑦ, ᐊᔭᖏᑦ ᐊᒃᑲᖏᓪᓗ. ᐱᐅᔪᒥᒃ ᐱᖃᓐᓇᕆᔭᖃᖅᐳᖅ ᐊᓈᓇᒥᓂᒃ ᑎᒍᐊᖅᑕᐅᒐᓗᐊᖅᑎᓪᓗᒍ.

20-ᓂᒃ ᐅᑭᐅᖃᖅᖢᓂ, ᓇᕼᐋᓂ−ᐋᓚᓐ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᖅᑲᓇᐃᔭᓚᐅᖅᓯᒪᔪᖅ, ᓲᖃᐃᒻᒪ ᒪᕐᕉᖕᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐅᖃᓪᓚᒍᓐᓇᓚᐅᕐᒪᑦ ᐊᒻᒪ ᐃᓐᓇᕐᓂᒃ ᐱᓕᕆᖃᑎᖃᑦᑎᐊᖅᐸᒃᖢᓂ. ᕿᑐᕐᙵᖅᑖᕋᒥ, ᐃᓕᓐᓂᐊᕆᐊᒃᑲᓐᓂᓕᓚᐅᖅᐳᖅ ᐃᓕᑕᕆᔭᐅᔾᔪᑎᑖᕆᐊᖅᑐᖅᖢᓂ. ᐃᓕᓴᐃᔨᐅᓚᐅᖅᐳᖅ ᐊᕐᕌᒍᓄᑦ ᖁᓕᓄᑦ ᐅᖃᐅᓯᓕᕆᓂᕐᒥᒃ ᐊᒻᒪ ᐃᓕᓐᓂᐊᓕᓵᖅᑐᓂᑦ ᖁᕝᕙᓯᖕᓂᓕᖕᓄᑦ 12-ᒧᑦ ᑎᑭᖦᖢᒍ. ᒫᓐᓇᓕ, ᐃᖅᑲᓇᐃᔮᕆᔭᐅᔪᒪᔪᓕᕆᔨᐅᓕᖅᐳᖅ, ᐃᑲᔪᖅᐸᒃᖢᓂ ᐃᓄᖕᓂᒃ ᐃᖅᑲᓇᐃᔮᒃᓴᖅᓯᐅᖅᑎᓪᓗᒋᑦ ᐊᒻᒪ ᐃᓕᓐᓂᐊᒃᑲᓐᓂᕈᑎᒃᓴᓂᒃ. ᖁᕕᐊᒋᔭᖃᓚᐅᖅᑐᖅ ᐃᖅᑲᓇᐃᔭᖅᖢᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᖁᕕᐊᒋᔭᖃᖅᖢᓂ ᐱᕕᒃᓴᓂᒃ ᐃᓕᓴᐃᓂᕐᒥᒃ, ᐃᑲᔪᕈᓐᓇᖅᓯᓪᓗᓂ ᓄᑕᖅᑲᓂᒃ ᐊᒻᒪ ᐊᖓᔪᖅᑳᓂᒃ. ᒫᓐᓇ ᐃᖅᑲᓇᐃᔮᒥᓄᑦ, ᐃᑲᔪᖅᐸᒃᐳᖅ ᑐᑭᓕᐅᕆᓂᕐᒥᒃ ᑐᓵᔨᐅᓂᕐᒥᒡᓗ, ᐱᕕᒃᓴᖃᖅᑎᖦᖢᓂᐅᒃ ᐅᖃᓪᓚᒍᓐᓇᕐᓂᕐᒥᒃ ᐅᖃᐅᓯᕐᒥᓂᒃ.

ᑖᓐᓇ ᓇᕼᐋᓂ-ᐋᓚᓐ ᑖᓐᓇ ᑭᖑᕚᕇᓄᑦ ᐃᓕᓐᓂᐊᕆᐊᖃᑦᑕᓚᐅᖅᓯᒪᒻᒥᔪᖅ. ᐃᓕᓐᓂᐊᕈᓐᓃᓚᐅᖅᓯᒪᔪᖅ ᒪᒃᑯᒃᖢᓂ ᑭᓯᐊᓂ ᐃᓐᓇᐅᓕᖅᖢᓂ ᐅᑎᓚᐅᖅᐳᖅ ᑕᓪᓕᒪᓂᒃ ᕿᑐᕐᖓᒥᓂᒃ ᐱᕈᖅᓴᐃᓪᓗᓂ. ᖃᑕᙳᑎᖏᑦ ᐱᔪᒃᓯᑎᑦᑎᒃᑲᓐᓂᓚᐅᕐᓂᖏᓐᓂᒃ ᑕᑯᑎᑦᑎᔪᒪᓕᖅᖢᑎᒡᓗ ᐱᐅᔪᒥᒃ ᐃᓅᓯᖃᕈᓐᓇᕐᓂᕐᒥᓂᒃ ᖃᓄᑐᐃᓐᓇᕐᓗ ᐱᓕᕆᔪᓐᓇᕐᓂᕐᒥᓂᒃ. ᓵᓚᒃᓴᓚᐅᕐᒥᔪᖅ ᐅᓄᖅᑐᓂᒃ ᐃᓕᓐᓂᐊᕈᑎᒃᓴᓂᒃ ᐊᒻᒪ ᐱᒋᐊᖅᑎᑦᑎᓪᓗᓂ ᐃᓕᖅᑯᓯᓕᕆᕝᕕᖕᒥ, ᐃᓕᖅᑯᓯᓕᕆᕝᕕᖕᒥ ᐊᐅᓚᑦᑎᔨᙳᖅᖢᓂ ᐊᒻᒪ ᐃᓕᓐᓂᐊᕐᕕᐊᕈᓯᕐᒥ ᑭᒡᒐᖅᑐᐃᔨᐅᓕᖅᖢᓂ. ᐊᒥᓱᓂ ᐱᓕᕆᐊᒃᓴᖃᓚᐅᖅᐳᖅ ᐃᓕᓐᓂᐊᖅᑎᐅᓪᓗᓂ ᐃᓕᓴᐃᔨᐅᓪᓗᓂ ᐊᑭᓕᖅᓱᖅᑕᐅᙱᖦᖢᓂᓗ ᐱᓕᕆᕐᔪᐊᖅᐸᒃᖢᓂ. ᓄᓇᖃᖅᑳᖅᑐᓂᒃ ᐃᓕᓐᓂᐊᓚᐅᖅᓯᒪᕗᖅ ᖃᓪᓗᓈᑎᑐᓪᓗ ᐃᓕᓐᓂᐊᓚᐅᖅᓯᒪᓪᓗᓂ.

ᐃᓚᖓᑦ ᓇᕼᐋᓂ-ᐋᓚᓐ ᐃᕐᓂᖓ ᖃᖓᑕᓲᖅᑎᐅᓕᖅᐳᖅ, ᐊᐃᑉᐸᖓ ᐅᓇᑕᖅᑐᒃᓴᙳᖃᑕᐅᓪᓗᓂ. ᐸᓂᖓᑕ ᐃᓚᖓᑦ ᐃᓅᔪᓐᓃᓚᐅᖅᐳᖅ ᐋᖓᔮᖅᖢᓂ ᐊᖁᑦᑐᒧᑦ 16-ᓂᒃ ᐅᑭᐅᖃᖅᖢᓂ. ᐊᒥᓱᑦ ᐃᓄᐃᑦ ᐃᓱᒪᓚᐅᖅᑐᑦ ᐃᓕᓐᓂᐊᕈᓐᓃᕐᓂᐊᕋᓱᒋᓪᓗᓂ ᐆᒻᒪᑎᒃᑯᑦ ᐋᓐᓂᕐᓇᖅᑐᒥᒃ ᐃᓚᙵᓚᐅᖅᑎᓪᓗᒍ ᑭᓯᐊᓂ ᐊᑎᓕᐅᒃᑲᓐᓂᓕᓚᐅᖅᐳᖅ ᐃᓕᓐᓂᐊᒃᑲᓐᓂᕐᓂᕐᒧᑦ, ᐱᔪᒪᓂᖃᑦᑎᐊᖅᖢᓂ ᐱᔭᕇᖅᓯᔪᒪᓪᓗᓂ ᕿᑐᕐᖓᖏᓪᓗ ᑐᙵᕕᖃᑦᑎᐊᖁᓪᓗᒋᑦ. ᐃᑲᔪᕈᒪᓪᓗᓂᒋᑦ ᐱᔪᒪᔭᖏᑦ ᕿᑐᕐᖓᖏᓪᓗ ᑲᔪᖏᖅᓴᐃᓪᓗᑎᒃ ᑲᔪᓰᓐᓇᕈᒪᓪᓗᓂ. ᑭᖑᓂᐊᒍᑦ, ᖃᖏᐊᕐᒥᓂᒃ ᐃᓅᔪᓐᓃᓚᐅᖅᐳᖅ ᐱᕈᖅᓴᓚᐅᖅᑕᒥᓂᒃ 19-ᓂᒃ ᐅᑭᐅᖃᖅᖢᓂ. ᑐᒃᓯᐅᔾᔨᕙᒃᐳᖅ ᓂᕕᐊᖅᓵᓂᒃ ᐃᓅᔪᓐᓃᓚᐅᖅᑐᓂᒃ ᐅᐱᒋᕙᒃᖢᓂᒋᓪᓗ ᐱᖃᑎᒋᓚᐅᖅᑕᖏᑦ, ᖃᐅᔨᒪᓪᓗᓂ ᐃᓂᖃᑦᑎᐊᕐᓂᖏᓐᓂᒃ ᐃᖅᑲᐅᒪᕙᒃᖢᓂᓗ ᖁᕕᐊᓇᖅᑐᒃᑰᕐᓂᕆᓚᐅᖅᑕᖏᓐᓂᒃ. ᐱᖃᓐᓇᕆᔭᒥᓂᒡᓗ ᐃᓚᙵᖅᓯᒪᔪᓂᒡᓗ ᐃᑲᔪᖅᑎᖃᖅᐸᒃᖢᓂ ᐃᑲᔪᖅᐸᒃᖢᓂᓗ. ᐊᐅᓚᐃᓐᓇᐅᔭᖅᑐᖅ ᐅᐃᕆᓯᒪᔪᒪᙱᖦᖢᓂ ᐊᔪᖅᓯᓯᒪᓪᓗᓂᓗ.

ᐅᓪᓗᐃᑦ ᐊᓂᒍᕌᖓᑕ ᑲᔪᓯᔪᒪᙱᖦᖢᓂ, ᑕᐅᑐᒃᐸᒃᖢᓂ ᓯᕗᓕᕆᓚᐅᖅᑕᒥᓄᑦ ᐊᒻᒪ ᐊᖓᔪᖅᑳᒥᓄᑦ. ᐃᓱᒪᓪᓗᓂ ᐱᕐᓕᕋᕐᓂᕆᓚᐅᖅᑕᖏᓐᓂᒃ ᐃᓄᖁᑎᖏᑦ ᑲᔪᓯᑐᐃᓐᓇᖅᖢᓂᓗ. "ᐊᔪᕐᓇᙱᑦᑐᑯᓗᒃ ᓴᐱᓕᕆᐊᒃᓴᖅ, ᑭᓯᐊᓂ ᑕᒪᑦᑕᑦᑎᐊᖅ ᓂᕈᐊᕈᓐᓇᕋᑦᑕ ᑕᒪᓐᓇᓗ ᑐᓴᖅᑕᐅᑎᓐᓇᐅᔭᖅᖢᒍ ᐃᓄᖕᓄᑦ," ᐅᖃᖅᑐᖅ. "ᐊᔪᕐᓇᖅᑐᒻᒪᕆᐊᓘᓚᐅᕋᓗᐊᖅᑎᓪᓗᒍ ᑭᖑᓂᑦᑎᓐᓂ, ᓱᓕ ᐃᓅᕗᒍᑦ... . ᓱᓕ ᑕᒫᓃᑉᐳᒍᑦ," ᐅᖃᕆᓪᓗᓂ. ᐊᖓᔪᖅᑳᖏᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑎᓪᓗᒋᑦ, ᐊᓈᓇᑦᑎᐊᖓ ᑕᐃᒪᐃᓚᐅᙱᓚᖅ, ᑕᒪᓐᓇᓗ ᐃᓱᒪᒋᓪᓗᓂᐅᒃ ᐱᐅᓂᖓᓂᒃ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᕆᐊᖃᖅᑐᓄᑦ ᓄᓇᓕᖏᓐᓂ ᐃᓕᓐᓂᐊᒃᑲᓐᓂᕆᐊᖅᑐᕐᓗᑎᒃ ᐃᒪᓐᓇᐅᕗᖅ, "ᐱᕕᒃᓴᖃᕐᓂᕐᓂᒃ ᖃᐅᔨᓇᓱᒡᓗᓯ ᖃᓄᐃᓕᐅᕈᓐᓇᕐᒪᖔᖅᐱᑦ. ᑕᒪᑦᑕᑦᑎᐊᖅ ᐊᔪᙱᓐᓂᖃᖅᑐᐃᓐᓇᐅᕗᒍᑦ." ᒪᒃᑯᒃᑑᓪᓗᓂ, ᓇᕼᐋᓂ−ᐋᓚᓐ ᐃᓚᒥᓃᖃᑕᐅᔪᓐᓇᖅᓯᓚᐅᖅᐳᖅ ᒪᓐᑐᕆᐊᒥ ᐊᒻᒪ ᐱᐅᔪᒃᑯᑦ ᐊᒃᑐᖅᑕᐅᓯᒪᓪᓗᓂ ᐃᓪᓗᐊᕐᔪᖓᓄᑦ ᐃᓕᓐᓂᐊᒃᑲᓐᓂᕋᓱᒃᑎᓪᓗᒍ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᖅᑕᒥᓂᒃ. ᒪᓐᑐᕆᐊᓪᒧᑦ ᓄᒃᑎᖅᖢᓂ ᓄᓇᓕᕋᓛᖑᓪᓗᓂ ᖁᐊᖅᓵᕐᓇᕐᔪᐊᓚᐅᖅᐳᖅ ᑭᓯᐊᓂ ᖃᑕᙳᑎᖏᑦ ᐃᑲᔪᓚᐅᖅᐸᖏᑦ ᐊᓂᒍᐃᑎᓪᓗᒍ. ᑭᖑᓂᐊᒍᑦ, ᐅᑎᓚᐅᖅᐳᖅ ᐊᖏᕐᕋᒥᓄᑦ ᐅᖃᐅᓯᕐᒥᓂᒃ ᐊᑐᖅᑎᑦᑎᔭᖅᑐᖅᖢᓂ ᓄᓇᖅᑲᑎᒥᓄᑦ. "ᐃᓄᖁᑎᕗᑦ ᐊᒥᖅᑳᖃᑎᖃᑐᐃᓐᓇᓲᖑᕗᑦ. ᖃᐅᔨᒪᓂᕆᔭᑦᑎᓐᓂᒃ ᐊᒥᖅᑳᕈᑎᖃᕈᒪᑐᐃᓐᓇᖅᐳᒍᑦ. ᐊᒥᖅᑳᖃᑎᖃᕈᒪᑐᐃᓐᓇᖅᐳᒍᑦ ᖃᐅᔨᒪᔭᓕᒫᑦᑎᓐᓂᒃ ᑐᑭᓯᐅᒪᔭᑦᑎᓐᓂᒡᓗ," ᐅᓂᒃᑳᖅᐳᖅ, ᐃᓱᒪᓪᓗᓂ ᖃᓄᖅ ᐱᐅᑎᒋᖕᒪᖔᑦ ᐊᓯᒥᓂᒃ ᐃᑲᔪᓕᕌᖓᒥ.

ᓇᕼᐋᓂ-ᐋᓚᓐ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐅᖃᕋᔭᖅᑐᖅ, "ᐃᖅᑭᓕᖑᕗᖓ, ᐱᒃᑯᒍᓱᒃᑐᖓ ᑭᓇᐅᓂᓐᓂᒃ ᑭᓱᑐᐃᓐᓇᐃᑦ ᓯᕗᓂᑦᓴᖃᕋᓗᐊᖅᑎᓪᓗᒋᑦ, ᐊᒻᒪᓗ ᓵᙵᔭᕆᐊᖃᕋᕕᒋᑦ ᑲᑉᐱᐊᓱᖕᓂᕆᔭᑎᑦ ᐊᒻᒪᓗ ᐃᓅᓯᕐᓂ ᑕᐅᑐᙳᐊᖅᑕᑎᑦ ᐊᑐᕐᓗᒋᑦ ᐊᒻᒪᓗ ᑎᑭᐅᑎᓗᒋᑦ ᑐᕌᒐᕆᔭᑎᑦ ᒪᓕᒡᓗᑎᒃ ᐃᓕᖁᓯᖏᓐᓂᒃ ᓯᕗᓕᕕᓂᖅᐱᑦ, ᐊᒻᒪᓗ ᐃᓕᖕᓂᒃ ᓱᓕᑦᑎᐊᕐᓗᑎᑦ ᐊᑐᖅᑕᕐᓂ." ᐅᐃᒌᒃ ᐃᓕᓐᓂᐊᖅᑎᑦᑎᓚᐅᖅᐳᒃ ᕿᑐᕐᙵᒥᓂᒃ ᖃᐅᔨᓴᖃᑦᑕᖁᔭᐅᓪᓗᑎᒃ ᑭᓱᑐᐃᓐᓇᖅ ᐱᐅᖕᒪᖔᑦ ᑕᐃᒪᐃᓕᐅᓚᐅᙱᓐᓂᕐᒥᓂ ᐊᒻᒪ ᐱᔪᓐᓇᕐᓂᓕᒫᒥᒍᑦ ᐃᑲᔪᕋᓱᒃᐸᒡᓗᒋᑦ ᖃᓄᐃᓕᐅᕈᒪᔭᖏᓐᓂᒃ.

"ᐃᓱᒪᔪᖓᓕ ᐊᖓᔪᖅᑳᕆᔭᐅᔪᑦ ᕿᑐᕐᖓᒥᓂᒃ ᐃᓴᕈᕐᒥᓂᒃ ᐃᓴᕈᖃᖅᑎᑦᑕᕆᐊᖃᕋᓱᒋᓪᓗᒋᑦ ᐊᒻᒪᓗ ᖃᐅᔨᖃᑦᑕᕐᓗᑎᒃ ᑭᓱᓕᒫᓂᒃ ᐊᑐᕆᐊᖃᖅᑕᖏᓐᓂᒃ ᕿᒪᐃᓯᒪᑎᓪᓗᒋᑦ ᐃᓚᒥᓂᒃ, ᓲᖃᐃᒻᒪ ᑕᐃᒪᓐᓇ ᐃᓕᑦᑎᕙᓪᓕᐊᓲᖑᒐᑦᑕ, ᐊᒻᒪᓗ ᑕᐃᒪᓐᓇ ᑭᓇᐅᓂᑦᑎᓐᓂᒃ ᐃᓅᓪᓗᑕ," ᓇᕼᐋᓂ-ᐋᓚᓐ ᐅᖃᖅᑐᖅ. ᐃᒪᓐᓇᐅᖁᔨᓇᔭᖅᐳᖅ, ᓄᑕᖅᑲᑦ ᐊᓂᒍᐃᙱᓪᓗᑎᒃ ᒪᒃᑯᖕᓂᖅᓴᐅᑎᓪᓗᒋᑦ ᐃᓱᒪᓕᐅᕆᑎᑉᐸᒡᓗᒋᓪᓗ ᖃᓄᐃᓕᐅᕐᓂᐊᕐᒪᖔᕐᒥᓂᒃ.

ᑭᖑᒧᑦ ᑕᑯᓪᓗᓂ, ᓇᕼᐋᓂ-ᐋᓚᓐ ᐃᖅᑲᐅᒪᕗᖅ ᐃᓚᖏᑦ ᐃᓄᐃᑦ ᑕᐅᑐᓚᐅᕐᓂᖏᓐᓂᒃ ᐃᓄᖁᑎᒥᓂᒃ ᐊᔪᖅᓴᕐᓂᖏᓐᓂᒃ ᑭᓯᐊᓂ ᐊᔪᖅᓴᖅᑰᔨᓚᐅᖅᐳᖅ, ᐊᕙᓗᔭᐅᓯᒪᓪᓗᓂ ᕿᓯᖕᓂᒃ ᐊᒥᕐᓂᒡᓗ, ᐃᓕᑦᑎᕙᓪᓕᐊᓪᓗᓂ ᓄᓗᐊᓂᒃ ᐋᖅᑭᒃᓱᐃᓂᕐᒥᒃ, ᐸᐅᖅᐸᒃᖢᓂᓗ ᒪᑲᓐᔨ ᑰᖓᓂ ᐊᑖᑕᒥᓂᒃ ᐱᖃᑎᖃᖅᖢᓂ. ᐊᑖᑕᒃᑯᖏᒃ ᐃᓅᔪᓐᓃᓚᐅᖅᓯᒪᔫᒃ ᒪᒃᑯᒃᑑᑎᓪᓗᒍ, 15-ᓂᒃ ᐊᒻᒪ 23-ᓂᒃ ᐅᑭᐅᖃᑐᐃᓐᓇᖅᖢᓂ, ᑭᓯᐊᓂ ᐃᓅᓯᖓ ᐊᓂᒍᐃᓚᐅᖅᐳᖅ ᐃᑲᔪᖅᑕᐅᓪᓗᓂ ᐊᖓᒃᑯᒥᓄᑦ. ᐃᒪᓐᓇᐅᖁᔨᕗᖅ, ᐃᑲᔪᖅᑎᖃᑦᑎᐊᖁᔨᓪᓗᓂ ᐊᒻᒪ ᐊᖑᑎᓂᒃ ᐃᔾᔪᐊᒐᒃᓴᑦᑎᐊᕙᖕᓂᒃ ᐊᒃᑲᒥᑎᑐᑦ.  

ᐃᓱᒪᒃᑯᑦ ᖃᓄᐃᙱᑦᑎᐊᖏᓐᓇᖁᓪᓗᒍ, ᓇᕼᐋᓂ−ᐋᓚᓐ ᖃᐅᑕᒫᑦ ᐅᒃᐱᕐᓂᓕᕆᓂᕐᒥᒃ ᐱᓕᕆᖃᑦᑕᖅᐳᖅ, ᑐᒃᓯᐊᖅᐸᒃᖢᓂ ᔫᒐᖅᐸᒃᖢᓂᓘᓐᓃᑦ ᖃᐅᑕᒫᑦ, ᖁᔭᓕᕙᒃᖢᓂ ᖃᐅᑕᒫᑦ. ᑎᒥᒃᑯᑦ, ᐃᖃᐃᓕᓴᖅᐸᒃᐳᖅ, ᖃᐅᑕᒫᑦ ᐱᓱᒃᐸᒃᖢᓂ, ᓯᐊᕐᕆᔮᖅᐸᒃᖢᓂ, ᐅᒥᐊᖅᑐᖅᐸᒃᖢᓂ ᐊᒻᒪ ᓄᓇᒦᑉᐸᒃᖢᓂ. ᐃᒃᐱᒋᔭᒃᑯᑦ, ᐃᓱᒪᑦᑎᐊᕋᓱᒃᐸᒃᐳᖅ ᐃᕐᙳᓯᕐᒥᓂᒡᓗ ᑕᑕᓕᖅᐸᒃᖢᓂ ᐱᐅᔪᓂᒃ ᐊᔪᕐᓇᙱᓐᓂᓕᒫᖓᓂ. ᐃᓱᒪᑦᑎᐊᓲᖅ, ᓴᓇᙳᐊᖅᐸᒃᖢᓂ ᐊᒻᒪ ᓇᓕᒧᒌᒃᑎᑦᑎᓇᓱᒃᐸᒃᖢᓂ ᐃᓅᓕᓴᐅᑎᓄᑦ ᐊᒃᓴᓗᐊᓕᖕᓄᑦ. ᐸᓂᖃᕈᓐᓃᓚᐅᖅᑎᓪᓗᒍ, ᐃᓚᐅᓚᐅᖅᐳᖅ ᖁᐊᖅᓵᖅᓯᒪᓂᕐᒧᑦ−ᑐᓴᐅᒪᑎᑕᐅᓂᕐᒧᑦ ᒪᒥᓴᕐᓂᕐᒧᑦ. ᔫᒐ, ᐱᓱᖕᓂᖅ ᓄᓇᒥ, ᑕᑯᒃᓴᐅᑎᑦᑎᔪᓐᓇᕐᓂᖅ, ᕿᒻᒥᒥᓂᒃ ᐱᖃᑎᖃᕐᓂᖅ ᐊᑲᐅᓯᕚᓪᓕᕈᑕᐅᓯᒪᖕᒥᔪᑦ.

ᐃᓱᓕᑉᐸᓪᓕᐊᓕᕐᓗᓂ, ᓇᕼᐋᓂ−ᐋᓚᓐ ᐃᓕᓴᖅᓯᕗᖅ ᑕᒪᐃᓐᓂᒃ ᐊᖓᔪᖅᑳᖏᓐᓂᒃ, ᐃᔾᔪᐊᒐᒃᓴᑦᑎᐊᕙᐅᓚᐅᕐᓂᖏᓐᓂᒃ, ᐊᒻᒪ ᐊᕐᓇᓂᒃ ᐃᑲᔪᓚᐅᖅᑐᓂᒃ ᒪᒃᑯᒃᑑᑎᓪᓗᒍ ᖁᔭᓕᓂᖃᕈᓐᓇᖁᓪᓗᒍ. ᖁᕕᐊᒋᔭᖃᖅᑐᖅ ᐊᒥᖅᑳᖃᑎᖃᕐᓂᕐᒥᒃ ᐃᓕᑕᒥᓂᒃ ᐊᒻᒪᓗ ᐃᒃᐱᒍᓱᒃᖢᓂ ᐃᓅᖃᑎᒌᑦ ᐊᒥᖅᑳᕈᑎᖃᙱᓗᐊᕐᓂᖏᓐᓂᒃ ᐊᒻᒪᓗ ᐃᓄᐃᑦ ᓱᓕᙱᓗᐊᕐᓂᖏᓐᓂᒃ ᐃᖕᒥᓄᑦ, ᓄᖅᑲᖓᑎᑦᑎᓕᖅᐸᒃᖢᓂ ᐊᔪᙱᓐᓂᕆᔭᖏᓐᓂᒃ ᓱᓕᔪᓐᓇᕐᓂᕐᒥᒃ ᐊᓯᒥᓄᑦ.

ᐅᖃᐅᓯᕐᒥᓂᒃ, ᐃᓕᖅᑯᓯᕐᒥᓂᒃ ᐊᒻᒪ ᐃᓅᓯᕐᒥ ᐃᓕᓐᓂᐊᖅᑎᑦᑎᔪᒪᑦᑎᐊᖅᑐᖅ, ᐃᓱᒪᖅᓱᖅᖢᓂ ᐃᓕᓐᓂᐊᖅᑎᑦᑎᔾᔪᑎᒋᔭᒥᓂᒃ ᑐᓂᓯᕙᒃᖢᓂ. ᓯᐅᕋᓐ ᓇᕼᐋᓂ−ᐋᓚᓐ ᐃᖅᑲᓇᐃᔭᖃᑦᑕᖅᓯᒪᔪᖅ ᐃᓕᓐᓂᐊᕐᓂᓕᕆᓂᕐᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒥ ᒫᓐᓇᓗ ᐃᖅᑲᓇᐃᔮᓄᑦ ᐱᕚᓪᓕᖅᑎᑦᑎᔨᐅᓕᖅᖢᓂ, ᐃᑲᔪᖅᐸᒃᖢᓂ ᐃᓄᖕᓂᒃ ᓇᐅᒃᑯᑐᐃᓐᓇᖅ ᖃᓄᑐᐃᓐᓇᖅ. ᐊᓯᐅᔨᕐᔪᐊᖅᓯᒪᕗᖅ ᑭᓯᐊᓂ ᐊᓂᒍᐃᓚᐅᖅᐳᖅ ᐃᑲᔪᕋᓱᒃᖢᓂᓗ ᑕᐃᒃᑯᓄᖓ ᐋᓐᓂᐊᕆᔭᒥᓂᒃ ᖃᐅᔨᒪᓗᐊᖅᑐᓄᑦ. ᐊᒥᖅᑳᖃᑎᖃᕐᓂᖅ ᐃᒃᐱᒍᓱᑦᑎᐊᕐᓂᐅᕗᖅ ᐃᒃᐱᒍᓱᑦᑎᐊᖅᖢᓂᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.