"ᖃᐅᔨᔪᒪᑦᑎᐊᖅᐳᑎᑦ ᑭᓱᒥ ᖃᐅᔨᔪᒪᖕᒪᖔᖅᐱᑦ, ᖃᓄᐃᓕᐅᓪᓚᕆᖃᑦᑕᕐᒪᖔᖅᐱᑦ," ᐅᖃᖅᐳᖅ ᓴᓇᔨᒻᒪᕆᒃ ᓯᐅᑕᓐ ᐸᐃᑭ.  ᓄᓇᑖᖃᑕᐅᓯᒪᔪᖅ ᓄᓇᑦᓯᐊᕗᒻᒥ ᓄᓇᑖᕐᓂᕐᒧᑦ, ᓄᐊᔅᕙᔅᑦ ᕆᕗᒥᐅᑕᒃᓴᔭᒃᑯᓐᓂ, ᓛᐸᑐᐊᒥ ᓄᓇᖃᓕᖅᑐᖅ ᓴᐃᓐᑦ ᔮᓐᔅ, ᓂᐅᕙᐅᓐᓛᓐᒥ. ᐸᐃᑭ ᐱᖁᑎᓕᕆᓂᕐᒧᑦ ᐊᐅᓚᑦᑎᔨᐅᔪᖅ ᓂᐅᕙᓐᓛᓐᒥ ᐆᒻᒪᖅᑯᑎᓕᕆᔨᖏᓐᓂᒃ ᐱᓕᕆᖃᑎᖃᖃᑦᑕᖅᑐᖅ ᐊᒻᒪᓗ ᐊᐃᑉᐸᕆᓪᓗᓂᐅᒃ ᐃᖅᑲᓇᐃᔮᖓ, ᖃᐅᔨᔪᒪᓂᖓ. 

ᓯᕗᓪᓕᖅᐹᒥ ᐃᖅᑲᓇᐃᔭᖅᑎᓪᓗᒍ, ᐸᐃᑭ ᑎᒥᓕᕆᓂᕐᒥᒃ ᐃᓕᓐᓂᐊᓚᐅᖅᓯᒪᕗᖅ ᓯᓚᑦᑐᖅᓴᕐᕕᒡᔪᐊᕐᒥ ᐱᓕᕆᖃᑎᖃᓚᐅᖅᓯᒪᓪᓗᓂᓗ ᓄᓇᑦᓯᐊᕗᑦ ᒐᕙᒪᖓᓂ ᐊᒻᒪ ᓛᐸᑐᐊᒥ ᐊᕕᒃᑐᖅᓯᒪᔪᓂ ᒐᕙᒪᓂᒃ ᐊᒡᓚᕝᕕᓕᕆᔨᓂᒃ ᐱᓕᕆᔪᓂᒃ. ᐱᓕᕆᐊᖃᓚᐅᖅᐳᖅ ᑕᑯᔭᒐᖃᕐᕕᓕᐅᖅᑐᓂ ᑕᑯᕙᓪᓕᐊᓕᕋᒥ ᑎᑎᖅᑐᒐᖅᑎᓂᑦ ᐅᓂᒃᑳᓕᐊᓂᑦ ᐊᒻᒪ ᖃᐅᔨᔪᒪᓕᖅᑐᓂ. ᐃᑲᔪᖅᑕᐅᔪᒪᓪᓗᓂ ᖃᕆᑕᐅᔭᖏᓐᓂᑦ, ᐃᓕᑦᑎᕚᓪᓕᓕᓚᐅᖅᑐᖅ ᓴᓇᔪᓕᕆᓂᕐᒥᑦ ᐃᓱᒪᓕᐅᕆᓚᐅᖅᑳᕋᓱᖕᓂᖓᓂᑦ ᐊᖅᑯᑎᑦᑎᐊᕙᐅᓇᔭᖕᓂᖓᓂᑦ. ᖃᑕᙳᑎᖏᑦ ᓅᖦᖢᑎᒃ ᒫᓐᓇ ᓄᓇᓕᖓᓄᑦ ᐃᓕᓐᓂᐊᕆᐊᒃᑲᓐᓂᕈᓐᓇᖁᓪᓗᒍ ᐅᑭᐅᖃᕐᓗᓂ 37−ᓂᒃ ᐱᕈᖅᓴᐃᑎᓪᓗᒍ ᑎᓴᒪᓂᒃ ᐅᑭᐅᖃᕐᓗᓂ. ᐊᕐᕌᒍᑦ ᐊᕐᕕᓂᓕᑦ ᐊᓂᒍᖅᑎᓪᓗᒋᑦ, ᓴᓇᔨᙳᓚᐅᖅᓯᒪᔪᖅ. 

ᐅᑎᖅᖢᓂ ᐃᓕᓐᓂᐊᕐᕕᖕᒧᑦ ᑕᐃᔅᓱᒪᓂ ᐊᒃᓱᕈᕐᓇᓚᐅᖅᐳᖅ, ᐸᐃᑭ ᐃᓕᓐᓂᐊᕈᑎᖃᑦᑎᐊᕈᓐᓃᕐᓂᖓᓄᑦ, ᐳᐃᒍᖅᖢᓂ ᖃᓄᖅ ᑎᑎᕋᕆᐊᒃᓴᖅ ᖃᐅᔨᓴᕈᑎᓂᒃ ᖃᐅᔨᓪᓗᓂᓗ ᐱᓕᕆᕐᔪᐊᕆᐊᖃᕐᓂᖓᓂᒃ ᐱᓕᕆᐊᕆᓂᐊᕐᓗᒋᑦ ᑕᒪᕐᒥᒃ. ᓯᕗᓪᓖᒃ ᒪᕐᕉᒃ ᕿᑎᕈᔪᐊᓂ ᐃᓕᓐᓂᐊᑦᑎᐊᖅᖢᓂᓗ ᓇᓕᒧᒌᒃᑎᓐᓇᓱᒃᖢᒋᑦ ᓇᓗᓇᓚᐅᖅᑐᖅᑕᐅᖅ. ᐊᔾᔨᒌᑎᑦᑎᒐᓱᐊᕐᓂᖅ ᐊᐃᑉᐸᕇᓐᓂᕐᒥᑦ ᐃᕐᓂᖓᓂᑦ ᓄᓕᐊᖓᓂᓪᓗ ᓱᓇᓕᒫᓂᑦ ᐱᔭᕇᕋᓱᐊᕐᓂᕐᒥᑦ ᐊᑦᓱᕈᓐᓇᓚᐅᖅᑐᖅ. 

ᓄᓇᒥᓄᑦ ᓅᖦᖢᑎᒃ ᐊᖓᔪᖅᑳᖏᑦ ᓇᓂᕐᒥᓂ ᓄᓇᖃᖅᖢᑎᒃ ᐊᒻᒪ ᐃᓕᖅᑯᓯᖃᑎᒌᙱᖦᖢᑎᒃ ᐊᒻᒪ ᖃᑕᙳᑎᖏᑦ ᐃᑲᔪᖅᑕᐅᓪᓗᑎᒃ ᐊᒃᓱᕈᕐᓇᓚᐅᖅᐳᖅ. ᓯᕗᓪᓕᖅᐹᒥ ᐃᓕᓐᓂᐊᓚᐅᖅᑐᖅ ᐃᓄᑑᓪᓗᓂ ᓴᐱᓕᕈᒪᓚᐅᖅᑐᖅ ᑭᓯᐊᓂ ᐱᓇᓱᐊᖏᓐᓇᓚᐅᖅᑐᖅ. ᓴᐱᓕᖅᑕᐃᓕᓂᖓ ᓄᖅᑲᓚᐅᖅᐳᖅ.  

ᑕᒪᒃᑯᐊ ᐊᓂᒍᖅᑎᓐᓇᓱᒃᖢᒋᑦ ᐊᔪᕐᓇᖅᑐᖅᓯᐅᕈᑕᐅᕙᒃᑐᑦ, ᐸᐃᑭ ᓇᓂᓯᓚᐅᖅᐳᖅ ᓄᓇᓕᖕᓂᒃ ᐅᑯᑎᒎᓇᖅ, ᓄᓇᖃᖅᑳᖅᑐᓄᑦ ᐊᑐᖅᑕᐅᔪᓐᓇᖅᑐᓄᑦ ᐃᓂᒋᔭᐅᔪᒥ ᓯᓚᑦᑐᖅᓴᕐᕕᒡᔪᐊᒥ ᑕᐃᑲᓂᓗ ᓇᓂᓯᔪᓐᓇᖅᖢᓂ ᐃᓄᖕᓂᒃ ᐅᖃᐅᓯᖃᖅᑐᓂᒃ ᖃᓄᐃᓕᐅᖃᑦᑕᖅᓯᒪᓂᕐᒥᓂᒃ. ᐱᓇᓱᐊᕈᓯᑕᒫᖅᓯᒍᑦ ᐱᙳᐊᖃᑎᖃᖃᑦᑕᓚᐅᕐᒪᑦ ᐃᕐᓂᖓ ᐱᖃᑎᒋᓪᓗᓂᐅᒃ ᐊᒻᒪᓗ ᓄᓕᐊᒥᓂᒃ ᐱᖃᑎᖃᕋᓱᐊᖅᑐᓂ. ᐊᒃᓱᕈᖅᑐᒻᒪᕆᐅᓚᐅᖅᐳᖅ ᑭᓯᐊᓂ ᓂᑯᕕᓚᐅᕐᒪᑦ. 

ᓯᓚᑦᑐᓴᕐᕕᕐᔪᐊᖑᓚᐅᖅᑎᓐᓇᒍ, ᐸᐃᑭ ᐃᓕᓐᓂᐊᑦᑎᐊᓚᐅᓐᖏᓚᖅ ᐃᓕᓐᓂᐊᑦᑎᐊᓚᐅᕋᓗᐊᖅᑎᓪᓗᒍ. ᐊᒃᓱᐊᓗᒃ ᑎᑭᓚᐅᖅᑐᖅ ᐊᒻᒪᓗ ᐃᑲᔪᖅᑐᓂ ᓯᕗᓪᓕᖅᐹᒥᒃ ᐃᓕᓐᓂᐊᖅᑎᓪᓗᒍ ᑭᓯᐊᓂᓕ ᑭᖑᓪᓕᖓᓄᑦ ᑎᑭᒻᒪᑦ ᑮᓇᐅᔭᓂᒃ ᐊᑐᕐᓂᖅᓴᐅᔭᕆᐊᖃᓕᓚᐅᖅᑐᖅ ᑭᓱᑐᐃᓐᓇᕐᒧᑦ. "ᓯᓚᑦᑐᖅᓴᕐᕕᓕᐊᕈᕕᑦ, ᑕᒪᒃᑯᐊ ᐱᐅᓯᐅᔪᑦ ᐋᖅᑭᒃᓯᒪᔭᕆᐊᖃᖅᑕᑎᑦ, ᐊᔪᕐᓇᙱᑦᑐᑯᓘᒐᓗᐊᖅᐸᑦ ᐃᓕᖕᓄᑦ," ᐅᖃᐅᓯᖃᖅᐳᖅ. 

ᐅᖃᐅᔾᔨᒋᐊᕈᓐᓇᕈᓂ ᒪᒃᑯᓐᓂᖅᓴᒧᑦ ᓇᒻᒥᓂᖅ, ᐃᓱᒪᔅᓱᕐᓂᕐᒨᖓᒐᔭᖅᑐᖅ. ᐸᐃᑭ ᖃᐅᔨᓴᖁᔨᓇᔭᖅᑐᖅ ᑭᓱᓂᒃ ᖃᐅᔨᔪᒪᔭᖏᓐᓂᒃ, ᑭᓱᓂᒃ ᑲᓱᑦᑕᐅᑎᙳᐊᓂᒃ ᐱᔪᒪᖕᒪᖔᑕ ᐊᒻᒪ ᐃᑭᑎᑦᑎᓂᕐᒥᒃ ᐃᓗᐊᓂ. ᐊᑐᓕᖁᔨᔪᖅ ᐊᐱᕆᓗᓂ ᐃᓅᖃᑎᒌᓂᑦ ᑲᓲᒪᖃᑎᖃᕐᓂᕐᒥᑦ ᐅᖃᐅᔾᔨᒋᐊᕐᓂᕐᒧᑦ ᑐᓴᖅᑕᐅᑎᑦᓯᓂᕐᒧᓪᓗ ᖃᐅᔨᓇᓱᐊᕐᓂᕐᒥᓪᓗ ᑭᓇ ᐃᑲᔪᖅᑐᐃᒍᓐᓇᕐᒪᖔᑦ ᐃᖏᕐᕋᓂᕐᒧᑦ ᐃᓱᒪᒋᔭᐅᔪᒥᑦ. ᖃᐅᔨᔪᒪᓂᖅ ᕿᓂᖃᑦᑕᖅᑕᖓ ᐊᐱᖅᓱᖅᑎᓪᓗᒍ ᐃᖅᑲᓇᐃᔭᓚᐅᑲᖕᓂᐊᖅᑐᓂᒃ ᐃᓕᓐᓂᐊᖅᑎᓂᒃ ᐃᖅᑲᓇᐃᔮᖏᓐᓂ. ᖃᐅᔨᓯᒪᔪᖅ ᖃᐅᔨᔪᒪᓂᕐᒥᒃ ᑐᕌᖅᑎᑦᑎᔪᓐᓇᖅᑐᖅ ᓄᑖᒥᒃ ᐃᖅᑲᓇᐃᔮᒥᒃ, ᓄᑖᓂᒃ ᐱᕕᒃᓴᓂᑦ ᐅᕝᕙᓘᓐᓃᑦ ᓄᑖᒥᒃ ᐊᑐᒐᒃᓴᒥᒃ ᐱᐅᓯᒋᐊᕐᓗᒍ ᐃᓅᓯᕐᓂ. ᐸᐃᑭ ᓱᓕ ᕿᒥᕐᕈᔪᖅ ᑭᓱᓂᒃ ᖃᐅᔨᔪᒪᖕᒪᖔᑦ ᐊᐱᖅᓱᒃᑲᓐᓂᕐᖢᓂᓗ, ᖃᓄᐃᓕᐅᑦᑎᐊᙱᖦᖢᓂ ᒪᒃᑯᖕᓂᖅᓴᐅᑎᓪᓗᒍ ᐊᒃᓱᕈᕐᓇᖅᑐᒃᑰᕐᔪᐊᕐᖢᓂᓗ. 

ᐃᓱᒪᖓ ᖃᐅᔨᓴᖅᑕᐅᖏᓐᓇᖁᓪᓗᒍ, ᐃᖅᑲᓇᐃᔭᙱᓚᐅᑲᒋᐊᖃᓲᖅ ᖁᕕᐊᒋᔭᒥᓂᒃ ᐱᓕᕆᓇᓱᒃᖢᓂ, ᓲᕐᓗ ᒑᓪᕝ, ᐅᒥᐊᖅᑐᕐᓂᖅ, ᓯᑭᑑᓕᕆᓂᖅ, ᐃᖃᓪᓕᐊᕐᓂᖅ ᐊᒻᒪ ᐊᖑᓇᓱᖕᓂᖅ. ᓄᓇᓕᐸᐅᔭᕐᒥ, ᐱᓱᑲᑕᒍᒪᑦᑎᐊᓲᖅ, ᐱᓱᑲᑕᒃᖢᓂ ᐊᒻᒪ ᓯᓚᒦᑉᐸᒃᖢᓂ ᐆᒻᒪᕆᒃᓯᕚᓪᓕᖅᑎᖦᖢᒍ. ᓅᑉᐸᓪᓕᐊᓂᖅ hectic ᐃᓕᓐᓂᐊᕐᕕᖕᒥ ᐃᓅᓯᖓᓂ ᐃᖅᑲᓇᐃᔭᕐᕕᖕᒧᑦ ᓴᖅᑭᑎᑦᑎᓪᓗᓂ ᓯᕘᕋᓂᕐᒥᒃ ᐸᐃᑭᒧᑦ ᓇᓂᓯᓪᓗᓂᓗ ᒪᒥᓴᐃᔨᒥᒃ ᐅᖃᖃᑎᖃᕐᓂᕐᒥᒃ. "ᐃᓘᓐᓇᑕ ᐊᒃᓱᕉᑎᖃᖅᑐᐃᓐᓇᐅᔪᒍᑦ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ. ᐃᑲᔪᖅᑕᐅᔪᒪᓪᓚᕆᒋᐊᖃᖅᑐᑎᑦ ᐃᑲᔪᖅᑕᐅᔪᒪᓗᑎᑦ," ᓇᓗᓇᐃᖅᐳᖅ. ᐱᕕᖃᙱᖦᖢᓂ ᑭᓱᑐᐃᓐᓇᕐᒧᑦ ᐊᕐᕌᒍᓄᑦ ᑕᓪᓕᒪᓄᑦ ᐃᓕᓐᓂᐊᖅᑎᓪᓗᒍ, ᖃᐅᔨᓪᓗᓂ ᐃᖕᒥᓂᒃ ᓇᓪᓚᖓᓪᓗᓂ ᐃᒃᓯᕙᐅᑖᓗᖕᒧᑦ ᖃᕋᓴᖓ ᓱᒃᑲᐃᒡᓕᒋᐊᕋᔭᙱᖦᖢᓂ. ᑭᖑᑉᐱᐊᖅᓯᓪᓗᓂ ᖃᓄᐃᓕᐅᕐᓂᖓᓄᑦ ᓇᓃᓐᓂᖓᓂᒃ ᓇᓗᓇᓚᐅᖅᑐᖅ ᓇᐅᒃᑰᕆᐊᒃᓴᖅ ᑭᓯᐊᓂ ᒪᒥᓴᐃᓂᖅ ᐃᑲᔪᓚᐅᖅᑐᖅ. 

ᐱᔪᒃᓯᑎᖦᖢᒍ ᖃᐅᑕᒫᑦ ᐱᓕᕆᐊᕆᕙᒃᑕᒥᓂᒃ ᐃᒪᓐᓇᐃᑦᑑᕗᖅ, ᖃᐅᔨᒪᙱᖦᖢᓂ ᖃᓄᑐᐃᓐᓇᖅ ᐱᓕᕆᓯᒋᐊᖅᑎᓂᒃ, ᑕᐃᒪᐃᓐᓂᖓᓄᓪᓗ ᐃᓱᒪᒋᔭᖃᓚᐅᖅᓯᒪᙱᖦᖢᓂ ᐃᖅᑲᓇᐃᔮᖃᕐᓂᕐᒥᒃ ᐱᓕᕆᓯᒋᐊᕐᓂᕐᒧᑦ. ᐃᓚᐅᖃᑕᐅᔪᒪᔪᖅ ᐱᓕᕆᐊᖑᕙᓪᓕᐊᔪᒪᔪᓂ ᐱᖁᓪᓗᒍ ᒪᒃᑯᒃᑐᑦ ᓛᐸᑐᐊᒥ ᖃᐅᔨᒪᓗᑎᒃ ᓇᐅᒃᑯᑐᐃᓐᓈᕈᓐᓇᖅᑐᓕᒫᓂᒃ ᐊᑐᐃᓐᓇᐅᔪᓂᒃ ᑭᒃᓕᓯᓂᐊᕈᑎᓄᑦ ᐃᒡᓗᓕᐅᕐᓂᕐᓄᓪᓗ. ᐃᓱᐊᓄᑦ, ᐃᓚᐅᕙᒃᐳᖅ STEM−ᒧᑦ ᐱᓕᕆᐊᖃᕐᓂᕐᒧᑦ ᐱᓕᕆᐊᖑᔪᓂᒃ ᐱᓕᕆᓯᒋᐊᖅᑎᓂᑦ ᑲᓇᑕᒥ ᐊᒻᒪᓗ WISE NL−ᑯᓐᓂ, ᑖᒃᑯᐊ ᐱᓕᕆᖃᑎᒌᒃᐸᒃᑐᑦ ᑕᐅᑐᒐᖃᓪᓗᐊᑕᖅᖢᑎᒃ ᐊᕐᓇᓂᒃ ᖃᐅᔨᓴᖅᑐᓕᕆᓂᕐᒥᒃ ᐱᓕᕆᓯᒋᐊᕐᓂᕐᒧᓪᓗ ᐊᒻᒪᓗᑦᑕᐅᖅ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ ᑲᑎᒪᕐᔪᐊᕐᓂᕆᔭᐅᔪᓄᑦ. ᐊᑭᓕᖅᓱᖅᑕᐅᙱᖦᖢᓂ ᐱᓕᕆᕙᒃᑐᑦ ᐱᔪᒃᓯᑎᑦᑎᕐᔪᐊᖃᑦᑕᖅᐳᑦ ᖃᓄᐃᓕᐅᖅᑕᒥᓂᒃ ᐱᓕᕆᔭᕆᐊᒃᓴᖅ ᓲᖃᐃᒻᒪ ᓄᓇᖃᖅᑳᖅᓯᒪᔪᑦ STEM−ᑯᑦ ᐃᖅᑲᓇᐃᔮᖏᑕ ᖃᐅᔨᒪᔭᖏᓐᓂᒃ ᓯᕗᒻᒧᐊᒃᑎᑦᑎᔪᒪᑦᑎᐊᕐᓂᖓᓄᑦ. 

ᐱᓕᕆᔾᔪᓯᖅ ᐱᖁᑎᓂᒃ ᐊᐅᓚᑦᑎᔾᔪᓯᕐᓂᒃ ᐱᔪᒃᓯᓕᕈᑎᒋᖕᒥᔭᖓ. ᑕᐅᑐᒃᖢᓂ ᐊᑕᖐᓪᓗᓂ ᐊᑐᖅᑕᐅᓇᔭᕐᓂᖓᓂᒃ ᐃᓱᒪᒋᔭᖃᖅᖢᓂ ᑲᑐᔾᔨᖃᑎᒌᑦ ᐊᓐᓂᕆᔭᖏᓐᓂᒃ ᑐᓴᐅᒪᑎᑦᑎᕙᖕᓂᕐᒥᒡᓗ ᑕᒪᓐᓇᓗ ᑕᐃᒪᐃᑎᑦᑎᒃᑲᓐᓂᖅᖢᓂ ᐱᓕᕆᖃᑦᑕᖅᓯᒪᓂᖓᓄᑦ ᓄᓇᖃᖅᑳᖅᑐᑦ ᒐᕙᒪᖏᓐᓂ ᓄᓇᓕᖕᓂᓗ. ᐃᖅᑲᐃᑎᑦᓯᔪᖅ ᖃᓄᖅ ᐃᓚᐅᖃᑦᑕᖅᓯᒪᒻᒪᖔᖅ ᓄᓇᒥᓐᓂ ᐊᒻᒪᓗ ᖃᐅᔨᑎᑦᓯᑦᓱᓂ ᒫᓐᓇ ᓄᓇᖃᓕᕋᒥ ᓄᓇᓕᐸᐅᔭᕐᒥ. 

ᖃᐅᔨᔪᒪᓗᐊᒧᑦ ᐃᑲᔪᓚᐅᖅᐳᖅ ᓅᖦᖢᓂ ᓯᐅᑕᓐ ᐸᐃᑭ ᐃᖅᑲᓇᐃᔭᖅᖢᓂ ᒐᕙᒪᒃᑯᓐᓂ ᑎᒥᓕᕆᓂᕐᒥᒃ ᐃᓕᑕᕆᔭᐅᔾᔪᑎᑖᖅᖢᓂ ᓄᑖᒧᑦ ᐃᓅᓯᕐᒧᑦ ᐃᓄᖕᓄᑦ ᐊᐅᓚᐅᓯᕆᔨᙳᕐᓂᕐᒧᑦ. ᖁᕕᐊᒋᑦᑎᐊᓚᐅᖅᖢᓂᐅᒃ, ᕿᒪᐃᕗᖅ ᐊᖅᑯᑎᒥᒃ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓄᑦ ᒪᓕᖁᓪᓗᒋᑦ ᐊᒻᒪ ᐃᑯᒻᒪᒃᓯᓗᑎᒃ ᐃᖅᑲᓇᐃᔮᖅᑖᕆᔪᒪᔭᒥᓂᒃ ᓯᓐᓇᒃᑑᒪᓚᐅᖅᓯᒪᙱᑕᒥᓂᒃ. ᐊᐱᖅᓱᒃᑲᓐᓂᖅᖢᓂ ᑭᐅᔭᐅᒃᑲᓐᓂᖅᐳᖅ ᐊᒻᒪ ᓄᑖᓂᒃ ᐊᑐᒐᒃᓴᓂᒃ ᐅᑎᖅᑎᑦᑎᔪᓐᓇᖅᖢᓂ ᐱᓕᕆᐊᒃᓴᑖᓵᖓᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.

‍