ᓯᐅᓪᑕᓐ ᓂᐱᓴᖅ ᐃᓅᓪᓗᓂ ᐃᓕᓐᓂᐊᖅᑎᐅᔪᖅ ᐊᕐᕕᐊᓂ, ᓄᓇᕗᒻᒥ, ᐊᒃᓱᕉᑎᖃᑦᑎᐊᖅᑐᖅ ᐃᓄᐃᑦ ᐃᓕᖅᑯᓯᖓᓂ ᐅᖃᐅᓯᖓᓂᒡᓗ, ᐊᔾᔪᒥᓇᖅᑑᓪᓗᓂᓗ ᐊᒥᓱᓄᑦ ᐃᓄᖕᓄᑦ ᒪᒃᑯᒃᑐᓄᑦ. ᐱᔭᕇᕋᑖᓚᐅᖅᑐᖅ ᓄᓇᕗᑦ ᓯᕗᓂᒃᓴᕗᒻᒥ ᐋᑐᕚᒥ. ᓄᓇᕗᑦ ᓯᕗᓂᒃᓴᕗ, ᐅᕝᕙᓘᓐᓃᑦ ᓄᓇᕗᑦ ᓯᕗᓂᒃᓴᕗᑦ ᑕᐃᔭᐅᒐᔪᖕᒪᑦ, ᐃᓕᓐᓂᐊᕐᓂᖅ ᐊᒻᒪ ᐃᓕᖅᑯᓯᓕᕆᓂᕐᒥᒃ ᐃᓕᓐᓂᐊᒐᒃᓴᖅ ᐃᓄᖕᓄᑦ ᐃᓕᓐᓂᐊᖅᑎᓄᑦ ᒪᓂᒪᑎᑦᑎᓲᑦ ᐊᑕᐅᓯᕐᒥᒃ, ᒪᕐᕉᖕᓂ, ᐊᒻᒪ ᐅᑭᐅᓄᑦ ᐱᖓᓱᓄᑦ ᐃᓕᓐᓂᐊᖅᑕᐅᔪᒃᓴᓂᒃ ᐃᓄᖕᓄᑦ ᐃᓕᓐᓂᐊᖅᑎᓄᑦ ᐅᖃᐅᓯᓕᕆᓂᕐᒧᑦ, ᐃᓕᖅᑯᓯᓕᕆᓂᕐᒧᑦ, ᐊᒻᒪ ᐃᓕᓐᓂᐊᖅᑕᐅᕙᒃᑐᓄᑦ.

ᓯᐅᓪᑕᓐ ᐱᔭᕇᕋᑖᓚᐅᖅᑐᖅ ᐊᕐᕌᒍ 2 ᓄᓇᕗᑦS-ᒥ, ᐊᒻᒪᓗ ᐱᓕᕆᐊᖅ ᑐᕌᒐᖃᒻᒪᕆᓚᐅᖅᑐᖅ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪᓗ ᐊᑐᖅᓯᒪᔭᖏᓐᓂᒃ. "ᐊᕐᕌᒎᒃ ᒪᕐᕉᓵᖅᑑᖕᓂ, ᐋᑐᕚᒥᐅᑕᐅᓚᐅᖅᓯᒪᕗᖓ ᐃᓕᓐᓂᐊᖅᑎᐅᓪᓗᖓ ᓄᓇᕗᑦ ᓯᕗᓂᒃᓴᕗᒻᒥ ᐃᓕᓐᓂᐊᖅᑕᐅᔪᒥ, ᑕᐃᑲᓂᓗ ᐃᓕᑦᑎᔭᕆᐊᖃᖅᖢᑕ ᖃᓄᐃᓕᐅᖅᐸᓚᐅᕈᓯᑦᑎᓐᓂᒃ, ᐃᓕᖅᑯᓯᑦᑎᓐᓂᒃ, ᐃᓱᒪᒋᔭᒃᓴᓂᒃ ᓵᑦᑎᐊᕐᒥᐅᑕᕆᓕᖅᑕᑦᑎᓐᓂᒃ ᐅᓪᓗᒥ, ᐊᒻᒪᐃᓛᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑕᐅᓯᒪᔪᒥᒃ. ᓯᕗᓪᓕᖅᐹᒥ ᐊᕐᕌᒍᒥ, ᐃᓕᓐᓂᐊᓕᓚᐅᖅᐳᒍᑦ ᐃᓄᐃᑦ ᖃᐅᔨᓴᖅᑕᐅᓂᖏᓐᓂᒃ, ᓄᓇᕗᒻᒥ ᐱᓗᐊᖅᑐᒥ, ᐊᓯᖏᓪᓗ ᓄᓇᖃᖅᑳᖅᓯᒪᔪᑦ ᑲᓇᑕᒥ. ᐊᒻᒪᓗ ᐊᐃᑉᐸᖓᓂ ᐊᕐᕌᒍᒥ ᐃᓕᓐᓂᐊᕐᕈᑎᒥ, ᐃᓕᓐᓂᐊᕆᐊᖃᓚᐅᖅᑐᒍᑦ ᓯᕗᕙᓯᓐᓂᖅᓴᓂᒃ ᐃᓄᐃᑦ ᐃᓕᓐᓂᐊᕐᓂᕐᒥᒃ, ᐅᑭᐅᖅᑕᖅᑐᒨᖓᔪᖅ. ᖃᐅᔨᓴᕆᐊᖃᓚᐅᖅᑐᒍᑦ ᓄᓇᖃᖅᑳᖅᓯᒪᔪᓂᑦ ᐅᑭᐅᖅᑕᖅᑐᒥᐅᓂᑦ."

ᐃᓕᑦᑎᒃᑲᓐᓂᕐᓂᖅ ᐅᖃᐅᓯᕐᒥ ᐃᓕᖅᑯᓯᖓᓂᓗ ᐊᖏᓂᖅᓴᒥ ᑕᐅᑐᒃᑕᖓᒍᑦ ᐱᒻᒪᕆᐅᔪᖅ ᓯᐅᓪᑕᓐᒧᑦ, ᐊᓱᐃᓛᒃ ᖃᑕᙳᑎᖏᓐᓄᑦ ᓄᓇᓕᖓᓄᓪᓗ. ᐅᑎᕋᑖᓚᐅᖅᑐᖅ ᐊᕐᕕᐊᓄᑦ, ᑕᐃᑲᓂᓗ ᐸᕐᓇᑦᑐᓂ ᐊᕐᕌᒍ ᐃᓚᒥᓂᒃ ᐱᖃᑎᖃᕐᓗᓂ ᐊᕕᑦᑕᐅᓚᐅᖅᑎᓪᓗᒋᑦ ᑖᒃᑯᓇᙵᑦ ᐊᕐᕌᒎᓐᓂᒃ ᒪᕐᕉᓐᓂᒃ.

ᑭᖑᓂᐊᒍᑦ, ᐃᖅᑲᓇᐃᔮᖃᕈᒪᔪᖅ ᐊᓯᐅᔨᑦᑕᐃᓕᓂᕐᒥᒃ ᐊᒻᒪᓗ ᐅᖃᓕᒪᓂᕐᒥᒃ ᐅᖃᐅᓯᕐᒥᓂᒃ. "ᐸᕐᓇᒃᑐᖓ ᐃᖃᓗᖕᓄᙵᐅᓂᐊᕐᓗᖓ, ᓄᓇᓕᐸᐅᔭᐅᔪᖅ ᓄᓇᕗᒻᒥ. ᐱᓇᓱᐊᕐᓂᐊᖅᑯᖓ ᓄᓇᕗᒻᒥ ᓯᓚᑦᑐᓴᕐᕕᒻᒥ ᐃᓕᓐᓂᐊᓂᕐᒥᑦ, ᐊᒻᒪᓗ ᐱᓇᓱᐊᕈᒪᕗᖓ ᐅᖃᐅᓯᓕᕆᓂᕐᒥᑦ ᑐᓵᔨᐅᓂᕐᒧᑦ ᐃᓕᓐᓂᐊᕐᓂᐅᔪᒥᑦ, ᑐᓵᔨᐅᔪᓐᓇᓂᐊᕋᒪ ᐅᕝᕙᓘᓐᓃᑦ ᓇᓗᓇᐃᖅᓯᓗᖓ ᐃᓕᓯᒪᔭᓐᓂ ᓄᓇᕗᑦ ᓯᕗᓂᒃᓴᕗᒻᒥ ᐃᓕᓐᓂᐊᕐᓂᐅᔪᒥᑦ ᐃᓄᑦᑎᑐᑦ ᐃᓄᓐᓄᑦ ᖃᓪᓗᓇᐅᔭᕈᓐᓇᖏᑦᑐᓄᑦ ᐅᕝᕙᓘᓐᓃᑦ ᐅᖃᕈᓐᓇᖏᑦᑐᓄᑦ ᖃᓪᓗᓈᑎᑐᑦ. ᑕᐃᒪᐃᒍᒪᕗᖓ, ᐅᐱᓐᓇᕋᓂ ᓇᑭᙶᕋᒪ, ᐊᒥᓲᓂᖅᓴᐃᑦ ᐃᓄᐃᑦ ᓄᓇᑦᑎᓐᓂ ᐃᓄᑦᑎᑑᖅᑐᑦ. 3,200-ᖏᓐᓃᒻᒪᑕ ᐃᓄᐃᑦ ᓄᓇᑦᑎᓐᓂ ᐊᒻᒪᓗ 95% ᑕᐃᑲᓂ ᓄᓇᓕᓐᓂ ᐃᓄᒃᑎᑐᑦ ᐅᖃᕈᓐᓇᖅᑐᑦ."

ᐊᒻᒪᓗᑦᑕᐅᖅ ᐃᔾᔪᐊᒐᒃᓴᑦᑎᐊᕙᐅᓪᓗᓂ ᐱᔪᓐᓇᐅᑎᒥᓂᒃ, ᓯᐅᓪᑕᓐ ᐊᔾᔪᒥᓇᖅᑐᓂᒃ ᐊᔾᔪᒥᓇᖅᑐᓂᒃ ᐊᔾᔪᒥᓇᖅᐳᖅ, ᓲᕐᓗ ᔫᓯ ᑯᓱᒐᖅ, ᖃᐅᔨᒪᔭᐅᑦᑎᐊᖅᑐᖅ ᓴᐳᔾᔨᔨᐅᓪᓗᓂ ᐊᒻᒪ ᓴᖅᑭᔮᖅᑎᑦᑎᔨᐅᓪᓗᓂ ᐃᓄᐃᑦ ᐅᖃᐅᓯᖓᓂ. "ᑕᐃᒪᓕ, ᑖᓐᓇ ᐃᓄᒃ ᐊᑎᖃᓚᐅᖅᑐᖅ ᔫᓯ ᑯᓱᒐᖅ ᐊᒻᒪᓗ ᐅᖃᐅᓯᖅᐳᑦ ᓴᙱᔫᖁᓪᓗᓂᐅᒃ, ᐅᖃᓪᓚᒍᒪᑦᑎᐊᕈᑎᒋᓕᓚᐅᖅᑕᕋ ᐅᖃᐅᓯᙵᐅᑎᒋᓪᓗᒍ, ᐱᔾᔪᑎᒋᓪᓗᒍ, ᐅᖃᐅᓯᖅᐳᑦ ᓴᙱᔫᑎᑦᑐᒪᒐᒃᑯ. ᑕᐃᒪᐃᒻᒪᑦ ᐱᓇᔪᒍᒪᕗᖓ ᐅᖃᐅᓯᓕᕆᓂᕐᒧᑦ ᑐᓵᔨᒧᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖃᑕᐅᔪᓂᒃ." ᓯᐅᓪᑕᓐ ᐊᖏᖅᑕᐅᓚᐅᖅᑐᖅ ᑖᔅᓱᒧᖓ ᐱᓕᕆᐊᒃᓴᒧᑦ.

ᐃᓄᒃᑎᑐᑦ ᐅᖃᕈᓐᓇᑦᑎᐊᕋᓗᐊᖅᑎᓪᓗᒍ ᐋᑐᕚᒨᓚᐅᙱᑎᓪᓗᒍ, ᑐᑭᓯᐊᑦᑎᐊᕐᓂᖅᓴᐅᓚᐅᖅᐳᖅ ᐅᖃᐅᓯᕐᒥᓂᒃ ᓯᐅᑕᓐ ᐊᑐᓪᓗᐊᑕᖃᑦᑕᓚᐅᖅᑕᖓ ᓄᓇᕗᑦ ᑐᙵᕕᒃᑯᓐᓂ. "ᐃᓄᒃᑎᑐᑦ ᐅᖃᐅᓯᕋ ᐊᖏᒡᓕᒋᐊᖅᑰᔨᓚᐅᖅᑐᖅ, ᓲᖃᐃᒻᒪ ᐃᓄᒃᑎᑐᑦ ᐃᓕᓐᓂᐊᖅᑎᖃᕋᑦᑕ, ᓯᕗᕙᓯᒃᑐᒦᖦᖢᖓᓗ ... ᑕᒪᑦᑕ ᐊᕐᕕᐊᕐᒥᐅᑕᐅᙱᑦᑐᑎᒍᑦ ᑕᐃᑲᓂ (ᓯᕗᕙᓯᖕᓂᖅᓴᖅ). ᓇᒻᒥᓂᖅ ᖃᐅᔨᓚᐅᖅᑐᖓ, ᐃᓄᒃᑎᑐᑦ ᐅᖃᕈᓐᓇᑦᑎᐊᕋᒪ ᐅᕝᕙᓘᓐᓃᑦ ᐅᖃᐅᓯᕐᓂᒃ. ᐊᒻᒪᓗ ᐊᐃᑉᐸᖓᓂ ᐊᕐᕌᒍᒥ ᐃᓕᓐᓂᐊᖅᑕᓐᓂ, ᖃᐅᔨᓚᐅᖅᑐᖓ ᑭᓇᐅᓂᓐᓂᒃ ᐃᓅᓪᓗᖓ. ᓇᖕᒥᓂᖅ ᖃᐅᔨᓚᐅᖅᑐᖓ."

ᑭᓯᐊᓂ ᐊᑐᖅᓯᒪᑦᑎᐊᕋᓗᐊᖅᑎᓪᓗᒍ ᓄᓇᕗᑦ ᓯᕗᓂᒃᓴᕗᒻᒥ, ᓅᑦᑐᓂ ᓄᓇᓕᓐᓂ 3,000 ᐅᖓᑖᓃᕌᕐᔪᑦᑐᓂᒃ ᐃᓄᓐᓂᒃ ᓄᓇᕗᒻᒥ ᓄᓇᓕᐸᐅᔭᖓᓄᑦ ᐋᑐᕚᒥ ᓴᖅᑮᓚᐅᖅᑐᖅ ᐊᒃᓱᕈᕈᑎᐅᔪᓂᒃ ᓯᐅᓪᑕᓐᒧᑦ. ᑮᓇᐅᔭᑎᒍᑦ ᐊᒃᓱᕈᕈᑎᖃᓚᐅᕐᒪᑦ ᖃᐅᔨᒐᒥ ᑮᓇᐅᔭᑎᒍᑦ ᐃᑲᔪᖅᑕᐅᒍᓐᓇᖅᑐᓂᒃ ᐊᑐᐃᓐᓇᐅᔪᓂᒃ ᓄᓇᕗᒻᒥ ᐃᓕᓐᓂᐊᖅᑎᓄᑦ, ᐊᒻᒪᓗ ᐃᓕᖅᑯᓯᖅᑎᒍᑦ ᖁᐊᖅᓵᓇᖅᑐᓂ ᓅᒋᐊᒃᓴᖅ ᓄᓇᓕᐸᐅᔭᕐᒧᑦ. "ᑕᒪᕐᒥᑦᑎᐊᖅ ᐅᕙᓐᓄᑦ ᓄᑖᖑᓚᐅᖅᑐᑦ. ᓇᒻᒥᓂᖅ ᓄᓇᖃᓚᐅᖅᓯᒪᙱᑦᑐᖓ ᓄᓇᓕᐸᐅᔭᒥ. ᐃᓕᖅᑯᓯᒃᑯᑦ ᖁᐊᖅᓵᓚᐅᖅᑐᖓ ... ᐃᑉᐱᒍᓲᑎᖃᓚᐅᖅᑐᖅ ᖃᐅᒪᓂᒃ, ᐃᓪᓗᓂᒃ, ᓄᓇᓯᐅᑎᓂᒃ. ᑭᓱᓕᒫᑦ ᑕᖅᑳᓃᑦᑐᑦ ᐅᕙᓐᓄᑦ ᐱᓗᐊᓚᐅᖅᑐᑦ ... ᓇᑭᙶᕐᓂᓐᓂ, ᑕᑯᔪᓐᓇᖅᑐᑎᑦ ᐅᖓᓯᒃᑐᒥ ᓄᓇᒥ, ᐅᕝᕙᓘᓐᓃᑦ ᐊᐅᓪᓚᑐᐃᓐᓇᕐᓗᑎᑦ ᓴᐃᓕᓗᑎᓪᓗ ᑕᖅᑳᓂ. ᑭᓯᐊᓂ ᓄᓇᓕᐸᐅᔭᕐᒥ ᐊᔾᔨᒋᙱᓚᐅᒃ. ᑕᒪᓐᓇ ᐱᒡᒐᓇᖅᑐᒻᒪᕆᐅᓚᐅᖅᐳᖅ ᐅᕙᓐᓄᑦ, ᑭᓯᐊᓂ ᐊᑐᓚᐅᖅᓯᒪᕙᕋ ᖁᕕᐊᓱᕝᕕᒻᒥ ᓄᖅᑲᖓᑲᐃᓐᓇᓚᐅᖅᑎᓪᓗᖓ. ᑕᒪᒃᑯᐊᓕᒫᑦ ᐱᓕᕆᐊᕆᔭᐃᓐᓇᕆᓚᐅᖅᐸᒃᑲ ᖁᕕᐊᓱᒡᕕᖕᒥ ᓄᖅᑲᖓᓐᓇᐅᑎᓪᓗᒍ ᐊᒻᒪ ᐋᑐᕚᒧᑦ ᐅᑎᕋᒪ ᐅᑭᐅᒃᑯᑦ ᐃᓕᓐᓂᐊᕐᓇᒧᑦ, ᐱᕙᒌᔭᖅᓯᒪᑦᑎᐊᓚᐅᖅᑐᖓ ᐃᓱᒪᒃᑯᑦ."

"ᓯᕗᓪᓕᖅᐹᒥ ᐊᕐᕌᒍᒥ, ᐊᒃᓱᕈᓚᐅᖅᑐᖓ ᑮᓇᐅᔭᑎᒍᑦ ᐃᓕᑦᑎᔭᕆᐊᖃᕐᐸᒃᖢᖓᓗ ᖃᓄᖅ ᐃᖏᕐᕋᔭᕆᐊᒃᓴᖅ ᓄᓇᓕᐸᐅᔭᒃᑯᑦ. ᑭᓯᐊᓂ ᐅᑎᕋᒪ ᐊᐃᑉᐸᖓᓄᑦ ᐊᕐᕌᒍᒧᑦ, ᖃᐅᔨᒪᓚᐅᖅᑐᖓ ᖃᓄᐃᓕᐅᕐᓂᐊᕐᒪᖔᕐᒪ, ᐅᐸᓗᖓᐃᖅᓯᒪᓚᐅᖅᑐᖓ ᑕᒪᑐᒧᖓ. ᐅᕙᓐᓂᒃ ᐃᓕᑦᑎᒃᑲᓐᓂᕆᐊᖃᕋᒪ ᐅᑭᐅᒃ ᒪᕐᕉᒃ ᐊᓂᒍᖅᑎᓪᓗᒋᑦ NS−ᑯᓐᓂ."

ᓯᐅᓪᑕᓐ ᐅᖃᐅᔾᔨᒋᐊᕐᓂᖓ ᐃᓕᓐᓂᐊᖅᑎᓄᑦ ᓄᓇᓕᐸᐅᔭᕐᒨᖅᐸᓪᓕᐊᔪᓄᑦ ᓯᕗᓪᓕᖅᐹᒥ ᐃᑲᔪᖅᑕᐅᔪᒪᓪᓗᓂ, ᐃᓕᓐᓂᐊᖅᑎᐅᖃᑎᒥᓄᑦ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᓄᑦ, ᖃᐅᔨᒪᒐᓗᐊᖅᑐᓂ ᑕᒪᓐᓇ ᐱᒡᒐᓇᕈᓐᓇᕐᒪᑦ ᐃᓄᓐᓄᑦ ᖃᐅᔨᒪᙱᑕᕐᓄᑦ. "ᓯᕗᓪᓕᖅᐹᒥ ᐊᕐᕌᒍᒥ NS−ᑯᓐᓂ, ᐊᐱᖅᓱᕈᓐᓇᖅᓯᓚᐅᖅᐳᖓ ᐃᓄᖕᓄᑦ ᓈᒻᒪᒋᔭᓐᓄᑦ. ᐃᓄᒃᑎᑐᑦ ᐃᓕᓴᐃᔨᑕᖃᓚᐅᕐᒪᑦ. ᐊᑲᐅᒋᓂᖅᓴᐅᓚᐅᖅᑕᒃᑲ ᐅᖃᐅᓯᕋ ᐱᔾᔪᑎᒋᓪᓗᒍ. ᑭᓯᐊᓂ ᖁᕕᐊᓱᕝᕕᒻᒥ ᓄᖅᑲᖓᑲᐃᓐᓇᓚᐅᖅᑎᓪᓗᖓ, ᐊᑲᐅᒋᓂᖅᓴᐅᓚᐅᕋᒃᑭᑦ ᐊᓯᖏᑦ ᐃᓕᓴᐃᔩᑦ. ᐅᖃᐅᓯᕆᔭᕆᐊᖃᓚᐅᕋᒃᑯᑦ ᐃᓱᒪᓕᕆᓂᓐᓄᑦ ᐱᔾᔪᑎᓖᑦ ᖁᐊᖅᓵᖅᓯᒪᔪᓄᑦ ᒪᒥᓴᐃᔨᒧᑦ ᐊᒻᒪ ᐃᓄᓕᕆᔨᒧᑦ. ᐅᖃᖃᑎᒋᓚᐅᕐᒥᔭᒃᑲ ᐃᓱᒪᒃᑯᑦ ᐋᓐᓂᐊᕈᑎᒪ ᒥᒃᓵᓄᑦ ᐅᕝᕙᓘᓐᓃᑦ ᖃᓄᑐᐃᓐᓇᖅ ᐃᑲᔪᖅᑕᐅᔭᕆᐊᖃᕐᓂᓐᓂᒃ, ᓲᕐᓗ ᓄᓇᓕᐸᐅᔭᒃᑯᑦ ᕿᓂᕐᓂᖅ, (ᐊᑐᕐᓂᖅ) Uber ᐅᕝᕙᓘᓐᓃᑦ ᓚᐃᕝ ᐅᕝᕙᓘᓐᓃᑦ ᖃᓄᖅ ᐊᑐᕈᓐᓇᕐᒪᖔᑦ ᐸᓯᒥᒃ... ᐃᑲᔪᖅᑕᐅᔭᕆᐊᖃᕐᓂᕈᒪ ᑮᓇᐅᔭᑎᒍᑦ, ᐃᑲᔪᖅᑕᐅᒐᔭᖅᑐᑦ ᑕᑕᑎᕆᐊᓕᓐᓂᒃ ᐅᕝᕙᓘᓐᓃᑦ... ᐱᔭᕆᐊᖃᕌᖓᒪ ᐃᓕᓐᓂᐊᕐᕕᖕᒧᑦ ᓂᕿᒧᓪᓘᓐᓃᑦ. ᐃᑲᔪᑦᑎᐊᓚᐅᖅᑐᑦ ᐱᓕᕆᑎᓪᓗᒋᑦ."

ᓯᐅᓪᑕᓐ ᐃᓕᑦᑎᓚᐅᕐᒥᔪᖅ ᐱᒻᒪᕆᐅᓂᖓᓂᒃ ᓇᖕᒥᓂᖅ ᑲᒪᒋᑦᑎᐊᕐᓂᖅ, ᐊᒻᒪᓗ ᐊᒃᑐᐊᓂᖃᐃᓐᓇᕐᓂᖅ ᐅᖃᐅᓯᕐᓄᑦ ᐃᓕᖅᑯᓯᕐᓄᓪᓗ. "ᐊᒃᓱᕈᕐᓇᖅᑐᒃᑰᖅᑎᓪᓗᑕ, ᐃᓕᓴᐃᔨᑦ ᐅᖃᐅᑎᓚᐅᖅᑕᒃᑲ ᐊᖏᕐᕋᖅᓯᒪᔪᒪᓂᕋᖅᖢᖓ, ᑕᖃᐃᖅᓯᑲᑕᖁᓪᓗᖓ, ᐱᓗᐊᖅᑐᒥᒃ ᐃᓱᒪᒐ ᖃᓄᐃᙱᑦᑎᐊᖁᓪᓗᒍ. ᐊᒻᒪᐃᓛᒃ ᐊᖏᕐᕋᒧᑦ ᖃᐅᔨᒋᐊᓕᕆᓪᓗᖓ, ᐱᓗᐊᖅᑐᒥᒃ ᐱᖃᓐᓇᕆᔭᒃᑲ ᖃᑕᙳᑎᒃᑲᓗ. ᐊᒻᒪᓗ ᑕᒪᓐᓇ ᐱᔾᔪᑎᒋᓪᓗᒍ, ᐱᒡᒐᓇᙱᓂᖅᓴᐅᓚᐅᖅᑐᖅ ᐅᕙᓐᓄᑦ ᐅᖃᐅᓯᖃᕆᐊᖓ ᐅᖃᐅᓯᙵᐅᑎᓐᓂ, ᐃᓄᑦᑎᑐᑦ. ᐅᖃᖃᑎᖃᓚᐅᕐᒥᔪᖓ ᐊᐃᑉᐸᕆᓕᖅᑕᖓᓂᒃ ᐊᕐᕌᒍᒥ ᐃᓕᓐᓂᐊᖅᑎᐅᔪᓂᒃ ᖃᓄᐃᓕᐅᖃᑦᑕᕐᒪᖔᕐᒪ ᐅᖃᐅᔾᔭᐅᒋᐊᕈᒪᓪᓗᖓ, ᐱᓗᐊᖅᑐᒥᒃ ᑕᐃᒃᑯᐊ ᐃᓄᒃᑎᑐᑦ ᐅᖃᕈᓐᓇᖅᑐᑦ, ᐊᒻᒪᓗ ᐅᖃᖃᑎᒋᓪᓗᒋᑦ ᐃᓕᓐᓂᐊᖃᑎᒃᑲ ᑕᐃᒪᐃᑦᑐᒃᑰᓚᐅᖅᑐᑦ. (ᖃᖓᒃᑯᑦ) ᐃᓄᑑᔪᒪᓚᐅᖅᑐᖓ, ᐱᓱᕋᔭᒃᖢᖓ, ᒥᕐᖑᐃᖅᓯᕐᕕᓕᐊᕐᓗᖓ ᐊᒻᒪ ᓯᓚᒦᓪᓗᖓ ᐊᓕᐊᓇᐃᒋᓇᓱᒡᓗᒍ."

ᐅᐸᓗᖓᐃᔭᖅᐸᓪᓕᐊᑎᓪᓗᒍ ᑭᖑᓪᓕᕐᒥ ᐃᓕᓐᓂᐊᕐᓂᕆᓂᐊᖅᑕᒥᓄᑦ, ᓯᐅᓪᑕᓐ ᐃᓱᒪᐃᓐᓇᖅᐳᖅ ᐃᓄᖕᓂᒃ ᖃᐃᓚᐅᖅᑐᓂᒃ ᐊᒃᓱᕈᒻᒪᕆᒃᖢᓂᓗ ᐱᐅᓕᒃᖠᕋᓱᒃᖢᓂ ᐅᖃᐅᓯᕐᒥᓂᒃ ᐃᓕᖅᑯᓯᕐᒥᓂᒡᓗ, ᓄᓇᕗᓕᐅᕈᒪᓂᕐᒧᓪᓗ. "ᑕᐃᒪᓕ ᐱᔪᒃᓯᓕᓚᐅᖅᑐᖓ ᐃᓄᐃᑦ ᓯᕗᓕᖅᑎᖏᑦ, ᐊᑐᓚᐅᖅᓯᒪᔭᖏᑦ ᑕᐃᔅᓱᒪᓂ 1970−ᖏᓐᓂ, ᓲᕐᓗ ᒐᕙᒪᓕᕆᓂᒃᑯᑦ ᑕᐅᑐᒃᑕᖓᒍᑦ. ᐊᔅᓱᕈᑦᑎᐊᓚᐅᖅᐳᑦ ᓂᐱᖃᕋᓱᐊᖅᑐᑎᒃ ᐃᓄᓐᓄᑦ ᑲᓇᑕᒥ. ᑕᐃᒪᐃᒻᒪᑦ, ᐱᔾᔪᑎᒋᓪᓗᒍ ᐊᑐᓚᐅᖅᑕᖓᑦ, ᑲᔪᓯᔪᒪᕗᖓ. ᑕᐃᒃᑯᐊ ᐃᓄᐃᑦ ᓯᕗᓕᖅᑎᐅᔪᑦ ᐅᕙᓐᓂᒃ ᐱᔪᒃᓯᑎᑦᑎᓚᐅᖅᐳᑦ ᐃᓕᖅᑯᓯᓐᓂ ᐱᐅᓯᒃᑲᓐᓂᖁᔨᓪᓗᑎᒃ ᐊᒻᒪ ᑭᓇᐅᓂᓐᓄᑦ ᐃᓅᓪᓗᖓ."

ᖁᔭᓐᓇᒦᑦᑎᐊᕐᒥᔭᕋ ᑮᑦ ᑳᓕᐊᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.