"ᑲᔪᓰᓐᓇᓚᐅᖅᐳᖓ, ᑕᐃᒪᐃᓐᓂᖓᓄᓪᓗ ᐅᓪᓗᒥ ᑕᒫᓃᑉᐳᖓ," ᓯᐅᕈᓪ ᔭᑭᓕᔭ ᖁᕕᐊᓱᒃᑐᖅ. ᐱᕈᖅᓴᓚᐅᖅᓯᒪᔪᖅ ᕗᐊᑦ ᐳᕋᓐᑎᓐᓯ, ᓄᓇᑦᑎᐊᕐᒥ. ᐃᖅᑲᓇᐃᔭᓕᓵᖅᑎᓪᓗᒍ, ᐃᖅᑲᓇᐃᔭᓚᐅᖅᓯᒪᕗᖅ ᓯᖓᐃᔪᓄᑦ ᐃᕐᓂᓯᒪᓕᖅᑐᓄᓪᓗ ᐱᓕᕆᐊᖑᕙᒃᑐᓄᑦ ᐊᐅᓚᑦᑎᔨᐅᓪᓗᓂ, ᐃᑲᔪᖅᑐᐃᕙᒃᖢᓂ ᐊᕐᓇᓂᒃ ᕗᐊᑦ ᓯᒻᓴᓐᒥ. ᐱᓕᕆᖃᑎᖃᖃᑦᑕᓚᐅᕆᕗᖅ ᐃᓐᓇᕐᓂᒃ ᓄᓇᓕᖕᓂ, ᐃᓕᓐᓂᐊᖅᑎᑦᑎᔭᖅᑐᖅᑎᖦᖢᓂᒋᑦ ᓇᖕᒥᓂᖅ ᑲᒪᒋᑦᑎᐊᕐᓂᕐᒥᒃ ᓯᖓᐃᑎᓪᓗᒋᑦ. ᓱᓕᒃᑲᓐᓂᖅ, ᓂᕿᑦᑎᐊᕙᓕᕆᓂᕐᒧᑦ ᐃᓅᓯᓕᕆᖃᑦᑕᓚᐅᖅᑐᖅ ᐃᓅᓯᕐᒧᑦ ᐊᔪᙱᑕᐅᔭᕆᐊᓕᖕᓂᒃ. ᑭᖑᓂᐊᒍᑦ, ᐃᖅᑲᓇᐃᔭᓕᓚᐅᖅᓯᒪᕗᖅ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐱᓕᕆᐊᖑᕙᒃᑐᓄᑦ ᐊᐅᓚᑦᑎᔨᒋᔭᐅᓪᓗᓂ, ᓄᓇᓕᖕᓂ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᐱᓕᕆᐊᖑᕙᒃᑐᓄᑦ ᐊᐅᓚᑦᑎᔨᒋᔭᐅᓪᓗᓂ, ᒪᓕᒐᓕᕆᓂᕐᒧᑦ ᐊᐅᓚᑦᑎᔨᒋᔭᐅᓪᓗᓂ, ᐃᓚᒌᓄᑦ ᑲᔪᖏᖅᓴᐃᔨᐅᓪᓗᓂ ᒪᓕᒐᓕᐅᖅᑎᙳᓚᐅᙱᓐᓂᕐᒥᓂ. ᐊᐃᑉᐸᕆᓕᖅᑕᖓᓂ ᐊᕐᕌᒍᖓᓂ ᒪᓕᒐᓕᐅᖅᑎᐅᓪᓗᓂ.

ᑲᔪᖏᖅᓴᐅᑎᒋᓚᐅᖅᑕᖓ ᒪᓕᒐᓕᐅᖅᑎᙳᕐᓂᕐᒧᑦ ᐱᓕᕆᓂᕆᓚᐅᖅᑕᖓ ᑲᔪᖏᖅᓴᐃᔨᐅᓪᓗᓂ, ᑲᑎᒪᑎᑦᑎᕙᒃᖢᓂ ᐊᒻᒪ ᑭᒡᒐᖅᑐᐃᓪᓗᓂ ᐃᓄᖕᓂ ᐃᒡᓗᓕᕆᓂᕐᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᓇᖕᒥᓂᖅ ᐱᕙᓪᓕᐊᓂᕐᒧᑦ. ᓯᕗᓂᐊᒍᑦ, ᐃᓚᐅᓕᓚᐅᖅᐳᖅ ᓂᕈᐊᒐᒃᓴᐅᓂᕐᒧᑦ ᐃᓕᓐᓂᐊᕐᕕᖕᒥ ᐊᕐᓇᓄᑦ. ᐃᓕᓐᓂᐊᖅᑕᖓ ᓄᓇᓕᖕᓅᕈᓐᓇᓚᐅᖅᐳᖅ ᐊᒻᒪ ᐃᓕᓐᓂᐊᖅᑎᑦᑎᓪᓗᓂ ᐊᕐᓇᓂᒃ ᖃᓄᖅ ᓂᕈᐊᒐᒃᓴᐅᓂᕐᒥᒃ. ᐱᓕᕆᖃᑎᖃᓚᐅᕐᒪᑦ ᐊᕐᓇᒥᒃ ᒪᓕᒐᓕᐅᖅᑎᐅᓚᐅᖅᓯᒪᔪᒥᒃ ᐊᒻᒪᓗ ᐅᐃᖓ ᒪᓕᒐᓕᐅᖅᑎᐅᓚᐅᖅᓯᒪᒻᒥᔪᖅ. ᐃᓄᓐᓄᑦ ᐅᐸᑦᑕᐅᓚᐅᖅᑯ ᐊᒻᒪᓗ ᐊᐱᕆᔭᐅᓪᓗᓂ ᐊᑎᕐᒥᓂᒃ ᐃᓕᓯᖁᔭᐅᓪᓗᓂ ᓄᓇᕗᒻᒥ ᓂᕈᐊᕐᓇᐅᓕᖅᑲᑦ ᐊᒻᒪᓗ ᑕᐃᒪᐃᓚᐅᖅᑯ, ᓵᓚᖃᖅᑐᓂ ᐊᕝᕙᓪᓗᐊᖏᓐᓂ ᓂᕈᐊᖅᑕᐅᔪᓂᑦ ᐊᕕᑦᑐᖅᓯᒪᔪᓂ.

ᐃᓕᓐᓂᐊᕐᓂᒃᑯᓪᓕ, ᔭᑭᓕᔭ ᐱᔭᕇᖅᓯᓚᐅᖅᐳᖅ GED-ᒥᒃ ᐊᕈᐊᕋ ᓯᓚᑦᑐᖅᓴᕐᕕᖕᒥ ᕗᐊᑦ ᓯᒥᑦ-ᒥ 1994-ᒥ ᐊᒻᒪ ᐊᕐᕌᒍᑦ ᐊᕙᑎᑦ ᐊᓂᒍᖅᑎᓪᓗᒋᑦ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᔨᙳᕆᐅᖅᓴᓕᓚᐅᖅᐳᖅ. ᓯᕗᓂᐊᒍᑦ, ᐊᕐᕌᒍᓕᒫᒥ ᐃᓄᓕᕆᔨᐅᓚᐅᖅᓯᒪᕗᖅ ᑭᓯᐊᓂ ᓈᒻᒪᒋᙱᖦᖢᓂᐅᒃ.  ᐱᓕᒻᒪᒃᓴᖅᓯᒪᖕᒥᔪᖅ ᐃᖃᐃᓕᓴᕐᓂᕐᒥᒃ, NLP-ᒥᒃ, ᐊᓯᖏᓐᓂᒡᓗ ᒪᒥᓴᐃᓂᕐᒥᒃ ᐊᒻᒪ ᐆᒻᒪᖁᑎᓕᕆᓂᕐᒥᒃ ᐱᓕᕆᓂᕐᒥᒃ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᕆᐊᖃᖅᐸᒃᑐᓄᑦ ᓄᓇᓕᖏᓐᓂ ᐃᓕᓐᓂᐊᕆᐊᕐᓗᑎᒃ ᐃᒪᓐᓇᐅᕗᖅ, "ᐱᒻᒪᕆᐊᓘᕗᖅ, ᐃᒪᐃᓐᓂᖓᓄᑦ... ᐃᓪᓗᖁᑎᖃᙱᓇᑦᑕ ᓄᓇᑦᓯᐊᕐᒥ, ᓯᓚᑦᑐᓴᕐᕕᔾᔪᐊᑎᑐᑦ ᖃᓪᓗᓈᓂ. ᑕᐃᑯᙵᕌᖓᕕᑦ, ᖃᐅᔨᕚᓪᓕᕐᓇᖅᐳᖅ ᐊᒥᓱᓂᒃ ᐊᔾᔨᒌᙱᑦᑐᓂᒃ. ᓄᑖᖑᓂᐊᖅᐳᖅ, ᑭᓯᐊᓂ ᖁᕕᐊᓇᕐᓂᐊᕐᒥᔪᖅ, ᓲᖃᐃᒻᒪ ᑲᑎᖃᑎᖃᕐᓂᐊᕋᕕᑦ ᐃᓄᑦᑎᐊᕙᖕᓂᒃ ᐃᓕᖕᓂᒃ ᐃᑲᔪᕐᓂᐊᖅᑐᓂᒃ ᐊᖅᑯᑎᒋᔭᕐᓂ. ᐱᕕᒃᓴᒥᒃ ᐊᑐᕐᓂᖅ ᐊᒻᒪ ᐃᒻᒥᓂᒃ ᐅᒃᐱᕆᓂᖅ. ᑕᐃᒪᐃᒍᓐᓇᕈᒪ, ᐊᓯᒃᑲᓗ ᑕᐃᒪᐃᒍᓐᓇᖅᐸᑕ, ᑕᐃᒪᐃᒍᓐᓇᕆᕗᑎᑦ. ᑲᒪᓇᒻᒪᕆᒃᑐᖅ ᖃᓄᐃᓕᔪᖃᕈᓐᓇᕐᓂᖓᓂᒃ. ᖃᐅᔨᒪᙱᓐᓇᕕᑦ ᑭᓯᐊᓂ ᑕᐃᑯᙵᕈᕕᑦ ᐊᒻᒪ ᐃᑲᔪᖅᑎᒃᓴᓕᐅᕐᓂᐊᕋᕕᑦ ᑖᕙᓂ. ᐊᓯᖏᓐᓂᒃ ᐃᓕᓐᓂᐊᖅᑎᓂᒃ ᑲᑎᖃᑎᖃᕐᓂᐊᖅᐳᑎᑦ. ᐊᑦᔨᒌᖏᑦᑐᓂᒃ ᐱᓕᕆᒍᓐᓇᕐᓂᐊᖅᑐᓯ, ᑕᐃᒪᐃᑉᐸᖏᓇᑦᑕ ᓄᓇᓕᕋᓛᖑᓂᖅᓴᓂ ᑕᒫᓂ. ᐱᒻᒪᕆᐊᓘᖕᒪᑦ ᐃᓕᓐᓂᐊᕆᐊᖃᑦᑕᕐᓂᖅ, ᑕᐃᒪᓐᓇ, ᐅᑎᕈᕕᑦ, ᐃᑲᔪᕈᓐᓇᕐᓂᐊᕋᕕᒋᑦ ᓄᓇᓖᑦ. ᐅᑭᐅᕐᑕᖅᑐᕐᒥ ᖃᓄᐃᓐᓂᕆᔭᖓ ᒪᓕᒃᖢᒍ, ᐃᓄᖕᓂ ᐅᑎᕆᐊᖃᓪᓚᕆᓕᖅᐳᒍᑦ ᐃᑲᔪᕆᐊᖅᑐᕐᓗᑕᓗ."

ᐊᔪᕐᓇᖅᑐᖅᓯᐅᕈᑕᐅᕙᒃᑐᓂ ᔭᑭᓕᔭ ᓵᙵᔭᖃᖅᑎᓪᓗᒍ, ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᖅᑕᒥᓂᒃ ᐃᓱᓕᑦᑎᓚᐅᙱᑦᑐᖅ ᐊᒻᒪ ᖃᑕᙳᑎᖏᑦ ᐱᒋᐊᓚᐅᖅᓯᒪᓪᓗᑎᒃ ᒪᒃᑯᒃᑑᓪᓗᑎᒃ. ᐸᓂᖃᖅᖢᓂ ᒪᒃᑯᓗᐊᕐᓂᑯᒧᑦ, ᐱᔪᒪᓂᖃᑦᑎᐊᓚᐅᙱᓚᖅ ᐃᓕᓐᓂᐊᕆᐊᕆᐊᒃᓴᖅ ᓲᖃᐃᒻᒪ ᕿᑐᕐᙵᒥᓂᒃ ᑕᐅᑐᒐᖃᓗᐊᕋᒥ. ᑭᖑᓂᐊᒍᑦ ᖃᓄᖅ ᐃᓕᓐᓂᐊᕆᐊᕐᓂᐊᕆᐊᒃᓴᖅ ᐊᔪᕐᓇᖃᑦᑕᓚᐅᖅᑐᖅ. ᑭᖑᓂᐊᒍᑦ, ᐊᐅᓪᓚᑐᐃᓐᓇᕈᒪᓕᓚᐅᖅᐳᖅ, ᐊᓯᐊᓄᑦ ᓄᓇᓕᖕᒧᑦ ᓅᓪᓗᓂ. "ᓲᕐᓗ ᖃᓄᑐᐃᓐᓇᖅ ᐊᕝᕕᐊᕈᑕᐅᔪᓂᒃ ᓵᑦᑎᐊᓐᓃᑦᑐᓂᒃ, ᑲᔪᓯᑐᐃᓐᓇᓚᐅᖅᐳᖓ... ᐱᓕᕆᑐᐃᓐᓇᓕᓚᐅᖅᐳᖓ... ᐱᔭᕇᕋᓱᓐᓂᓐᓂ," ᐃᖅᑲᐅᒪᔪᖅ. ᐃᑲᔪᖅᑎᒋᕙᒃᑕᒥᓄᑦ ᐃᑲᔪᖅᑎᖃᓚᐅᖅᐳᖅ, ᐃᓚᒥᓄᑦ ᐅᖃᓪᓚᖃᑎᖃᖅᖢᓂ ᑕᑎᖃᖅᖢᓂᓗ ᐃᑲᔪᖅᑐᐃᓂᖏᓐᓂᒃ. ᑭᒃᑯᓕᒫᓄᑦ ᑲᔪᖏᖅᓴᖅᑕᐅᓚᐅᖅᐳᖅ ᑲᔪᓯᖁᔭᐅᓪᓗᓂ ᑕᐃᒪᐃᓚᐅᖅᖢᓂᓗ.

ᔭᑭᓕᔭ ᐅᐃᒥᓂᒃ ᐃᕐᓂᖏᓐᓂᒡᓗ ᐃᑲᔪᖅᑎᖃᓚᐅᕆᕗᖅ. ᐅᖃᐅᔾᔨᒋᐊᕈᑎᒋᔭᖓ ᐃᑲᔪᖅᑎᖃᙱᒃᑯᕕᑦ, ᓇᓂᓯᖃᑦᑕᕐᓗᓯ ᐃᑲᔪᕈᓐᓇᖅᑐᓂᒃ ᐳᓛᕆᐊᖃᑦᑕᕐᓗᓯ ᐃᓐᓇᑐᖃᕐᒥᒃ ᐅᖃᖃᑎᖃᕐᓗᑎᓪᓘᓐᓃᑦ ᐃᓐᓇᑐᖃᕐᒥᒃ.  "ᐊᒃᓱᕈᕐᓇᖅᑐᒃᑰᑐᐃᓐᓇᕆᐊᖃᖅᐳᑎᑦ, ᑭᓯᐊᓂ ᐃᓐᓇᐅᓂᖅᓴᒧᑦ ᐃᓐᓇᕐᒧᓪᓘᓐᓃᑦ ᐃᑲᔪᑐᐃᓐᓇᕆᐊᖃᖅᐳᑎᑦ ᐊᓂᒍᐃᑎᓪᓗᑎᑦ. ᐱᑕᖃᐃᓐᓇᐅᔭᖅᑐᖅ ᓄᓇᓕᖕᒥ ᐃᑲᔪᕈᓐᓇᖅᑐᒥᒃ, ᐃᓄᑑᖅᑰᔨᑦᑕᐃᓕᒋᑦ," ᑎᓕᐅᕆᔪᖅ. ᐅᖃᖃᑎᖃᖁᔨᕗᖅ ᐃᑲᔪᖅᑎᒋᔭᕐᓄᑦ ᐅᕝᕙᓘᓐᓃᑦ ᓇᓂᓯᓗᑎᑦ ᑭᓇᒥᑭᐊᖅ ᐅᒃᐱᕆᔪᓐᓇᖅᑕᕐᓂᒃ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᐊᑑᑎᖃᑦᑎᐊᖅᐳᑎᑦ.... ᐅᒃᐱᕆᓗᒍ, ᓇᒃᓴᕐᓗᒍ." ᐊᓯᐊᑦᑕᐅᖅ ᑐᓴᖅᑕᐅᔪᒃᓴᖅ ᐃᒪᓐᓇᐅᓇᔭᖅᐳᖅ, "ᐊᖏᓂᖅᓴᐅᕗᑎᑦ ᐃᓱᒪᒋᔭᕐᓂᒃ. ᑕᐃᒪᐃᓐᓂᖓᓄᑦ ᓇᖏᕐᓗᑎᑦ ᖃᐅᒪᔪᒥ ᐅᒃᐱᕈᓱᒡᓗᑎᓪᓗ ᖃᓄᑐᐃᓐᓇᑦᑎᐊᖅ ᐱᓕᕆᔪᓐᓇᕐᓂᕐᓂᒃ. ᐱᑖᕈᓐᓇᖅᐳᑎᑦ ᐊᒻᒪ ᑕᐃᒪᐃᓕᔪᓐᓇᖅᐳᑎᑦ ᐊᒻᒪ ᖃᓄᑐᐃᓐᓇᖅ ᐱᓕᕆᔪᓐᓇᖅᐳᑎᑦ. ᐅᓪᓛᒃᑯᑦ ᒪᑭᑦᑕᕆᐊᖃᖅᐳᑎᑦ ᖃᐅᑕᒫᑦ ᕿᓂᖅᐸᒡᓗᒋᑦ, ᐃᖅᑲᓇᐃᔭᕆᐊᕆᐊᖃᕈᕕᑦ, ᑮᓇᐅᔭᓕᐅᕐᓗᑎᑦ ᑮᓇᐅᔭᓂᒃ ᐊᑐᙱᓐᓂᖅᓴᐅᓂᐊᕋᕕᑦ ᐃᓕᓐᓂᐊᕆᐊᕐᓂᐊᕐᓗᑎᑦ, ᑮᓇᐅᔭᐃᑦ ᑐᖅᑯᕐᓗᒋᑦ, ᑐᕌᒐᕆᔭᕐᓄᑦ ᑲᔪᓯᑎᓐᓇᕐᓗᒍ. ᐃᓕᓐᓂᐊᕆᐊᕈᒪᓕᕈᕕᑦ, ᑕᐃᒪᐃᓐᓂᐊᖅᐳᑎᑦ. ᑲᒪᓇᒻᒪᕆᒃᑐᓂᒃ ᓴᖅᑭᑦᑐᖃᕐᓂᐊᖅᑐᖅ ᐅᓪᓗᒥ ᖃᓄᐃᓕᐅᕈᒪᓕᓚᐅᕋᕕᑦ."

ᐃᑲᔪᕈᒪᓪᓗᓂ ᓇᓕᒧᒌᒃᑎᑦᑎᓂᕐᒥᒃ ᖃᓄᐃᙱᑦᑎᐊᕈᓐᓇᕐᓂᕐᒥᓂᒃ ᖃᓄᐃᙱᑦᑎᐊᕈᓐᓇᕐᓂᕐᒥᒡᓗ, ᔭᑭᓕᔭ ᐅᖃᓪᓚᖃᑎᖃᖅᐸᒃᐳᖅ ᐃᑲᔪᖅᑐᐃᔪᒪᓪᓗᓂ ᐃᓄᖕᓂᒃ ᓲᕐᓗ ᐃᓅᓯᓕᕆᔨᑐᖃᕆᓚᐅᖅᑕᖓᑎᑐᑦ. ᑕᖃᐃᖅᓯᖅᐸᒃᑭᕗᖅ ᑕᕐᕆᔭᖅᖢᓂ. ᐃᓱᒪᓕᕆᔨᒥᒃ ᑕᑯᔭᖅᑐᖅᐸᒃᐳᖅ, ᐃᓄᖕᓂ ᐳᓛᕆᐊᖅᐸᒃᖢᓂ ᐊᒻᒪ ᑯᑭᓕᕆᔭᐅᑦᑎᐊᕋᓱᒃᐸᒃᖢᓂ. ᓄᓇᓕᖕᓃᓕᕌᖓᒥ ᐅᐸᒃᐸᒃᐳᖅ ᐊᕐᓇᐃᑦ ᑲᑐᔾᔨᖃᑎᒌᖕᓂᖏᓐᓄᑦ ᐅᖃᓪᓚᒋᐊᖅᑐᖅᖢᓂ ᐅᖃᐅᓯᒃᓴᒥᓂᒃ. ᓄᓇᒨᕐᓂᖅ ᐃᒡᓗᕋᓛᒥᓃᑲᑕᖕᓂᕐᓗ ᐱᓕᕆᐊᕆᕙᒃᑕᖏᑦ ᐱᕕᒃᓴᖃᓕᕌᖓᒥ.

ᐱᔪᒃᓯᑎᑕᐅᓕᕋᒥ, ᔭᑭᓕᔭ ᑕᐅᑐᒃᐳᖅ ᐊᑖᑕᑦᑎᐊᒥᓄᑦ ᓯᕗᓪᓕᖅᐹᖑᖃᑕᐅᓪᓗᓂ ᐃᓕᖅᑯᓯᑐᖃᒃᑯᑦ ᐊᖓᔪᖅᑳᕆᔭᐅᓚᐅᖅᓯᒪᔪᒥ ᕗᐊᑦ ᐳᕋᓐᑎᓐᓯᒥ. ᐱᒃᑯᒥᒍᓱᒃᑐᖅ ᖃᓄᖅ ᐱᓕᕆᖃᑎᖃᖅᐸᖕᓂᖓᓂᒃ ᐃᓄᖕᓂᒃ, ᐋᖅᑭᒃᓯᓇᓱᒃᖢᓂ ᐊᑲᐅᙱᓕᐅᕈᑕᐅᔪᓂᒃ ᐸᓖᓯᖃᙱᖦᖢᓂ, ᒪᓕᒃᖢᓂ ᐊᓪᓚᐃᑦ ᒪᓕᒐᖏᓐᓂᒃ. ᐊᓈᓇᑦᑎᐊᖓ ᐊᑯᓂᐊᓗᒃ ᐃᓅᓚᐅᖅᓯᒪᒻᒥᔪᖅ ᐊᒻᒪᓗ ᐊᖓᔪᖅᑳᖏᒃ ᓄᓇᑐᐃᓐᓇᕐᒥᐅᑕᐅᓪᓗᑎᒃ. ᐃᓅᓯᖃᑦᑎᐊᓚᐅᖅᑑᒃ, ᑲᑎᙵᐃᓐᓇᖅᐸᒃᖢᑎᒃ ᖃᓄᑐᐃᓐᓇᑦᑎᐊᖅ ᕿᑐᕐᙵᒥᓂᒡᓗ ᐃᑲᔪᐃᓐᓇᐅᔭᖅᐸᒃᖢᑎᒃ. ᖃᑕᙳᑎᒌᑦ ᐱᒻᒪᕆᐊᓘᕗᑦ ᔭᑭᓕᔭᒧᑦ.

ᐃᓱᓕᑉᐸᓪᓕᐊᓕᕐᓗᓂ, ᔭᑭᓕᔭ ᐅᖃᓚᐅᖅᐳᖅ ᐅᓪᓗᒥ ᒪᒃᑯᒃᑐᓄᑦ, "ᑲᔪᓯᑐᐃᓐᓇᕆᑦ. ᐃᓛᓐᓂᒃᑯᑦ ᐃᓅᓯᖅ ᐊᒃᓱᕈᕐᓇᖅᓯᓲᖑᕗᖅ, ᑭᓯᐊᓂ ᑲᔪᓯᑐᐃᓐᓇᕆᑦ. ᐃᓕᖕᓂᒃ ᐅᒃᐱᕆᓗᑎᑦ. ᐃᓛᓐᓂᒃᑯᑦ ᐊᔪᕐᓇᖅᑐᑯᓘᕙᙱᓚᖅ, ᑭᓯᐊᓂ ᑕᐃᒪᐃᒍᓐᓇᖅᐳᑎᑦ. ᓇᓂᓯᓗᑎᑦ ᐃᑲᔪᖅᓱᐃᔾᔪᑎᒥᒃ ᑲᔪᓯᑐᐃᓐᓇᕐᓗᓯᓗ."

ᐃᓕᓐᓂᐊᖅᑎᑦᑎᓚᐅᖅᑐᖅ ᐊᓯᖏᓐᓂᒃ ᐊᕐᓇᓂᒃ ᖃᓄᖅ ᓂᕈᐊᒐᒃᓴᐅᓂᕐᒥᒃ ᐊᒻᒪᓗ ᓇᖕᒥᓂᖅ ᐊᐅᓚᑦᑎᓕᓚᐅᖅᓯᒪᓪᓗᓂ, ᒪᓕᒐᓕᐅᖅᑎᙳᖅᖢᓂ. ᖃᑕᙳᑎᒌᓕᖅᖢᓂ ᒪᒃᑯᒃᑑᓪᓗᓂ, ᐃᓕᓐᓂᐊᕐᕕᐊᓗᖕᒥ ᐊᓂᒍᐃᓚᐅᙱᖦᖢᓂ, ᓯᐅᕈᓪ ᔭᑭᓕᔭ ᐊᒥᓱᓂᒃ ᐊᕝᕕᐊᕈᑎᖃᓚᐅᖅᐳᖅ ᐃᓅᓯᕐᒥᓂ ᑭᓯᐊᓂ ᑲᔪᓯᖏᓐᓇᓚᐅᖅᐳᖅ ᑕᐃᒪᓐᓇᓗ ᑎᑭᐅᑎᓚᐅᖅᐳᖅ. ᑲᔪᖏᖅᓴᖅᑕᐅᓪᓗᓂ ᖃᑕᙳᑎᖏᓐᓄᑦ ᐊᒻᒪ ᐃᑲᔪᖅᓱᐃᓂᖏᓐᓄᑦ, ᓯᕗᒻᒧᐊᖏᓐᓇᕈᓐᓇᓚᐅᖅᐳᖅ ᐊᒻᒪ ᓄᓇᖅᑲᑎᒥᓄᑦ ᑐᓂᓯᔪᓐᓇᖅᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.