"ᒪᒥᓴᕐᓂᕐᒧᑦ ᐃᖏᕐᕋᓯᒋᐊᓚᐅᖅᑐᑦ ᐃᓕᑦᑎᕙᓪᓕᐊᓪᓗᑎᒃ," ᐅᖃᖅᐳᖅ ᑎᐅᕆ ᐸᑦᑕᐃᓄᓪ. ᑖᓐᓇ Saddle Lake Cree Nation-ᒥᐅᑕᖅ, ᑖᓐᓇ ᐊᐅᓚᑦᑎᔨᐅᔪᖅ ᑲᓇᑕᒥ ᓱᕈᓯᓕᕆᓂᕐᒧᑦ ᑕᐃᑲᓂᓗ ᐃᒃᓯᕚᖃᑕᐅᓪᓗᓂ. ᑭᖑᓪᓕᖅᐹᖓᓃᓕᖅᑐᖅ ᐊᕐᕌᒍᒥ ᓄᓇᖃᖅᑳᖅᓯᒪᔪᑦ ᐱᔭᕇᖅᓯᔾᔪᓯᐊᖅᔪᐊᒥ ᐃᓄᓕᕆᔨᐅᓂᕐᒧᑦ ᐃᓕᓐᓂᐊᒐᒃᓴᒥ ᓯᓚᑦᑐᖅᓴᕐᕕᒡᔪᐊᒥ Blue Quills−ᒥ. ᐃᖅᑲᓇᐃᔮᕆᓛᕈᒪᔭᖓᑦ ᑐᓴᖅᑎᑕᐅᓚᐅᖅᑐᖅ ᐃᓅᓯᖓᓂ ᐊᑐᖅᓯᒪᔭᖓᒍᑦ.

ᐱᕈᖅᓴᓪᓗᓂ, ᐊᓈᓇᑦᑎᐊᒃᑯᒥᓂᒃ ᐃᒡᓗᖃᑎᖃᓚᐅᖅᑐᖅ ᐊᑕᐅᓯᕐᒥᒃ ᐃᒡᓗᕈᓯᖃᖅᑐᒥᒃ ᓇᑎᖃᙱᖦᖢᓂ, ᐆᒻᒪᖅᑯᑎᖃᙱᖦᖢᓂ, ᐅᖅᑰᓴᙱᖦᖢᓂ ᐅᕝᕙᓘᓐᓃᑦ ᐃᒪᖃᙱᖦᖢᓂ. ᓄᓇᖃᓚᐅᖅᑐᑦ ᓄᓇᒥᑦ ᒥᑭᑦᑐᑯᓘᓪᓗᓂ, ᐊᔪᕈᓐᓃᖅᓴᖅᖢᑎᒃ ᓄᓇᖃᖅᑳᖅᓯᒪᔪᓂᑦ ᑲᔪᓰᓐᓇᕈᓐᓇᖕᓂᖕᒥᑦ, ᖁᕕᐊᓲᑎᖃᖅᖢᑎᒃ, ᐃᓕᑦᑎᓪᓗᑎᒡᓗ ᐊᔾᔨᒌᖕᓂᓕᕆᓂᖕᒥᑦ.  9-ᖑᕋᓱᖕᓂᖓᓂ ᐃᓅᖃᑎᒋᖃᑦᑕᓚᐅᖅᑕᖏᑦ, ᐃᓕᓐᓂᐊᕆᐊᖃᑦᑕᓕᕋᒥ ᐅᐊᓕᓂᕐᒥ.

ᐃᓕᓐᓂᐊᖅᑎᓪᓗᒍ, ᓲᖑᓵᖃᑦᑕᖅᑐᒻᒪᕆᐅᓚᐅᖅᐳᖅ ᐊᔾᔨᒌᖃᑦᑕᖏᓐᓂᖓᓄᑦ. ᑭᓯᐊᓂ, ᐃᓕᑦᑎᓚᐅᖅᑐᖅ ᑖᒃᑯᓇᙵᑦ ᐊᑐᕐᓂᑯᓂᑦ, ᐃᑲᔫᑎᖃᓕᕐᖢᑎᒃᓗ ᐊᓐᓇᐅᒪᓂᖓᓄᑦ ᓄᓇᑐᖃᕆᙱᑕᒥᓄᑦ ᓄᓇᓕᐸᐅᔭᐅᔪᓄᓪᓗ ᐃᓅᖃᑎᒌᓄᑦ. ᑕᒪᑐᒥᖓ ᐊᑐᖅᑎᓪᓗᒍ, ᐅᖃᖃᑎᖃᐃᓐᓇᓚᐅᖅᑐᖅ ᑭᓇᒥᒃ ᖁᕕᐊᓲᑎᖃᕐᓂᒃᑯᑦ, ᐃᙱᕐᓂᒃᑯᑦ, ᒧᒥᕐᓂᒃᑯᓪᓗ. ᒫᓐᓇ, ᐃᓐᓇᐅᓪᓗᓂ ᐊᓈᓇᐅᓪᓗᓂᓗ, ᐃᑳᖃᑦᑕᖅᑐᖅ ᖃᓪᓗᓈᑦ ᐃᓕᓐᓂᐊᕐᓂᖏᓐᓂᒃ ᐃᓕᖅᑯᓯᕐᒥᓂᒃ ᐃᓕᓴᐃᓪᓗᓂ, ᐱᓕᕆᖃᑎᒌᒃᑎᖦᖢᓂᔾᔪᒃ ᒪᕐᕈᐃᓕᖓᔪᒃᑯᑦ ᑕᑯᓪᓗᓂ ᐃᓅᑦᑎᐊᕈᓐᓇᕐᓂᐊᕐᒪᑦ ᐃᓅᓯᖓᓂ ᐱᕈᖅᓴᑎᖦᖢᓂᒋᓪᓗ ᕿᑐᕐᖓᖏᑦ ᐊᔪᙱᓐᓂᓕᒫᖓᒍᑦ.

ᐃᓅᓱᒃᑑᓪᓗᓂ, ᐃᒥᖅᐸᓚᐅᖅᓯᒪᔪᖅ ᐊᒻᒪᓗ ᐃᒥᖅᐸᓚᐅᖅᓯᒪᓪᓗᓂ ᐊᒻᒪᓗ ᐊᒥᓱᓂᒃ ᐃᓅᓯᓕᕆᖃᑦᑕᖅᓯᒪᓪᓗᓂ. ᐊᓂᒍᐃᑦᑎᐊᙱᖦᖢᓂ ᐃᓱᒪᓕᕋᒥᓗ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕐᓂᕐᒥᒃ, ᖃᕋᓴᐅᔭᒃᑯᑦ ᐊᔪᙱᓐᓂᕐᒧᑦ ᖃᐅᔨᓴᕈᑎᑦ ᐅᖃᕐᖢᑎᒃ ᐊᔪᕈᓐᓃᕋᔭᕐᓂᖓᓂᒃ ᐃᓗᐊᖅᓴᐃᔨᐅᓂᕐᒧᑦ ᐃᓕᓴᐃᓂᕐᒧᓪᓘᓐᓃᑦ. ᐊᐅᒃ ᐊᐅᖓᑕ ᒥᒃᓵᓄᑦ ᓂᑲᒍᓱᓚᐅᖅᑐᖅ ᑕᐃᒪᓕ ᐋᓐᓂᐊᓯᐅᖅᑎᐅᔪᖅ ᐆᒃᑐᒃᑲᓐᓂᓚᐅᖏᑦᑐᖅ ᐊᒻᒪᓗ ᐱᓇᓱᐊᖅᑎᓪᓗᒍ ᑐᖑᔪᖅᑕᓂᒃ, ᐃᓕᑦᑎᓚᐅᖅᑐᖅ ᐃᓄᓕᕆᓂᕐᒥᒃ. ᑕᒪᓐᓇ ᐃᓅᓯᖅ ᐊᓯᔾᔨᖅᓯᒪᔪᖅ ᐊᒻᒪᓗ ᐃᓕᓐᓂᐊᑦᑎᐊᖅᓯᒪᓪᓗᓂ, ᒪᓕᒐᓕᕆᓂᕐᒧᑦ ᐃᓕᓐᓂᐊᕐᕕᓕᐅᖅᑐᓂ ᕆᔭᐃᓇᒥ. ᐊᓯᔾᔨᕐᔪᐊᓚᐅᖅᑐᖅ ᐊᒃᓱᕈᖅᑎᓪᓗᒍ ᖁᑦᑎᖕᓂᖅᓴᖅ ᐃᓕᓐᓂᐊᕐᕕᖕᒥ. "ᐊᑦᑕᕐᓇᖅᑐᒦᖅᑰᔨᙱᒃᑯᕕᑦ, ᐃᑲᔪᖅᑐᖅᑕᐅᒍᕕᑦ, ᓱᓕᔪᒥᑦ ᐊᒻᒪ ᑐᓵᒍᕕᑦ, ᐃᓕᑦᑎᔪᓐᓇᖅᐳᑎᑦ ᐊᒻᒪ ᐱᓯᒪᐃᓐᓇᕈᓐᓇᖅᖢᑎᑦ ᐱᓕᕆᑦᑎᐊᕈᓐᓇᕐᓂᖅᓴᐅᓗᑎᓪᓗ," ᖁᖓᓪᓗᓂ.

ᖁᐊᖅᓵᖅᓯᒪᓂᒃᑰᕈᓐᓇᖅᓯᓚᐅᖅᑐᖅ ᐊᒻᒪ ᐃᒻᒥᓂᒃ−ᐃᓱᒪᒃᓴᖅᓯᐅᕈᑎᖃᕈᓐᓇᖅᓯᓪᓗᓂ, ᐃᒻᒥᓂᒃ ᐅᔾᔨᕈᓱᓕᖅᐸᒃᖢᓂ, ᐋᓐᓂᕈᑎᒋᓯᒪᔭᖏᑦ ᐃᓕᑕᕆᓪᓗᒋᑦ, ᕿᒃᓵᒍᑎᒋᖃᑦᑕᖅᑕᖏᑦ ᐊᒻᒪ ᐃᓚᙵᖅᑕᖏᑦ ᐊᒻᒪ ᓵᑕᐅᔪᓐᓇᕐᓂᖓ. ᐆᒻᒪᑎᒧᑦ ᐃᑲᔪᖅᑕᐅᔪᒪᓂᖅ ᓇᓂᓯᓂᕐᓗ ᐱᑕᖃᖅᑐᓂᑦ, ᐃᓚᐅᓪᓗᓂ ᖁᕕᐊᓲᑎᖃᕐᓂᖅ ᐃᓕᖅᑯᓯᕐᓗ. ᓯᓚᑦᑐᖅᓴᕐᕕᒡᔪᐊᕐᒥ, ᐊᑐᕈᓐᓇᖅᐳᖅ ᖃᐅᔨᒪᔪᓂᒃ ᐱᓯᒪᕙᒃᑐᓂᒃ, ᐃᓐᓇᕐᓂᒃ, ᐃᓕᓴᐃᔨᓂᒡᓗ ᑕᐅᑐᒋᕙᒃᑕᒥᓂᒃ, ᑭᒃᑯᓪᓗ ᐅᖃᐅᓯᖃᖅᐸᖕᒪᖔᑕ ᐃᓅᓯᕆᕙᒃᑕᒥᓂᒃ ᐊᑐᖃᑦᑕᖅᓯᒪᔭᒥᓂᒃ. ᐃᓕᓐᓂᐊᖅᑐᖅ 7-ᓂᒃ ᐃᓕᓴᐃᓂᕐᒥᒃ, ᒪᓕᒐᓪᓚᑦᑖᓂᒃ, ᐃᓚᒌᖕᓂᕐᒥᒃ, ᐊᒻᒪ ᑭᒃᑯᑐᐃᓐᓇᑦᑎᐊᓂᒃ ᐃᓅᔪᓂᒃ ᐊᒻᒪ ᐃᓚᒥᓂᒃ ᐱᐅᒃᓴᙱᖦᖢᓂ. ᑖᒃᑯᐊ ᐃᓱᒪᒋᔭᐅᔪᑦ ᐃᓕᔭᐅᓯᒪᔪᑦ ᐃᓕᓐᓂᐊᖅᑎᑦ ᐊᑐᕐᓂᑯᖏᓐᓂ ᐃᓕᓐᓂᐊᕐᕕᓪᓗ ᐃᓕᖅᑯᓯᖏᓐᓂ.

ᖃᓪᓗᓈᖑᖃᑎᒌᙱᑦᑐᑦ ᐃᓕᓐᓂᐊᖃᑦᑕᖅᓯᒪᔭᖏᑦ, ᐆᒻᒪᑎᒃᑯᑦ ᓂᑲᒍᓱᖃᑦᑕᓚᐅᖅᐳᖅ ᐊᒻᒪ ᑲᙳᓵᕆᓪᓗᓂ ᑭᓇᐅᓂᕐᒥᓂᒃ. ᒫᓐᓇ ᐱᓕᕆᐊᕆᔭᖓᓂ, ᐃᓚᐅᓕᖃᑦᑕᖅᐳᖅ ᓄᓇᒥ−ᑐᙵᕕᓕᖕᒥᒃ ᐃᓕᓐᓂᐊᕐᓂᕐᒥᒃ, ᐃᓕᖅᑯᓯᑐᖃᕐᓂᒃ ᖁᕕᐊᓱᖃᑎᒌᖕᓂᕐᒥᒡᓗ ᐱᓕᕆᖃᑦᑕᖅᓯᒪᓂᑰᓪᓗᓂᓗ ᐅᑎᖅᑎᑦᑎᕙᓪᓕᐊᓪᓗᓂ ᐃᖅᑲᐅᒪᔾᔪᑕᐅᕙᒃᑐᓂᒃ.  "ᐃᖏᕐᕋᓂᐅᔪᖅ ᓇᖕᒥᓂᖅ ᖃᐅᔨᓂᕐᒧᑦ ᐊᒻᒪᓗ ᓇᖕᒥᓂᖅ ᐅᔾᔨᕈᓱᖕᓂᖅ," ᖃᐅᔨᑎᑦᑎᔪᖅ, ᖃᐅᔨᑎᑦᑎᔪᖅ ᐃᖏᕐᕋᓂᖅ ᐋᓐᓂᕐᓇᕈᓐᓇᕐᒪᑦ ᑭᓯᐊᓂ ᐋᓐᓂᐊᕐᓂᖅ ᑎᑭᐅᑎᔭᐅᔪᓐᓇᖅᑐᖅ ᓂᐊᖁᒃᑯᑦ.  ᐃᑲᔪᖅᓱᖅᑎᐊᕐᓂᖅ ᐱᒻᒪᕆᐅᕗᖅ ᐆᒻᒪᑎᒧᑦ, ᐊᒻᒪ ᐊᑐᕋᔅᓴᖃᓗᐊᕋᓂ ᓴᓂᕐᕙᖅᓯᒪᔭᖏᓐᓂᑦ. ᐃᓚᒋᔭᐅᓇᓱᖃᑦᑕᖅᑐᖅ ᓄᓇᓕᓐᓂ ᖃᓄᐃᓕᐅᕐᓂᐅᔪᓄᑦ ᐱᔪᓐᓇᕋᐃᒐᒥ ᐊᒻᒪᓗ ᐃᑲᔪᖅᑐᖅᑕᐅᔪᒻᒪᕆᐅᓪᓗᓂ ᐃᓚᒥᓄᑦ.

ᒪᒥᓴᖅᐸᓪᓕᐊᑎᓪᓗᒍ, ᐆᒻᒪᑎᐅᑉ ᐅᐃᖓ ᐃᑲᔪᖅᑐᐃᖃᑦᑕᖅᓯᒪᕗᖅ. ᐊᑖᑕᖓ, ᐃᓅᔪᓐᓃᓚᐅᖅᑐᖅ 2018−ᒥ, ᐃᔾᔪᐊᒐᒃᓴᑦᑎᐊᕙᐅᓚᐅᖅᑐᖅ ᓄᑲᖓᓗ ᐃᑲᔪᑦᑎᐊᖅᓯᒪᓪᓗᓂᐅᒃ, ᑐᓐᓂᖅᑯᓯᐊᖅᖢᓂ ᑐᓴᐅᒪᖃᑎᒌᖕᓂᕐᒥᒃ. ᐃᓐᓇᑐᖃᖏᑦ, ᓂᖏᐅᖓ ᐊᒻᒪ ᐃᕐᓂᖓ ᐊᖏᔪᒥᒃ ᐱᓕᕆᐊᖃᖅᓯᒪᒻᒪᑕ ᑭᓇᐅᓂᕐᒥᓂᒃ. ᒪᒃᑯᓛᖓ ᓄᑕᕋᖓ ᖃᐅᔨᓴᖅᑕᐅᔪᖅ ᐃᓱᒪᒃᑯᑦ ᐃᓕᖅᑯᓯᖅᓱᙱᔾᔪᑎᓕᖕᓄᑦ ᐱᓕᕆᐊᖃᕐᖢᓂᓗ ᐊᒃᓱᕈᕐᓇᖅᑐᒃᑰᕈᑎᖏᓐᓂ ᐊᑐᖃᑦᑕᖅᑕᖏᓐᓂ ᐱᖁᓪᓗᒍ ᓴᙱᓂᕐᓂ−ᑐᙵᕕᓕᖕᒥᒃ ᐊᑐᕆᐊᕐᓂᕐᒥ ᑕᑯᓇᒃᓗᓂᓗ ᐃᓕᖅᑯᓯᒃᑯᑦ ᑕᐅᑐᖕᓂᕐᓂ ᐱᖁᓪᓗᒍ ᐱᓗᓂ ᐃᓱᒪᒥᒃ, ᑎᒥᒃᑯᑦ, ᐃᒃᐱᖕᓂᐊᓂᒃᑯᑦ ᐅᒃᐱᕐᓂᒃᑯᓪᓗ ᐃᑲᔪᖅᑕᐅᓂᕐᒥᒃ ᐱᔭᕆᐊᖃᖅᑕᖏᓐᓂᒃ.

ᓇᖕᒥᓂᖅ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖓᓄᑦ ᐊᓈᓇᐅᓪᓗᓂ, ᖁᕕᐊᓱᒍᑎᖃᕐᖢᓂ ᑲᑎᒃᑲᓐᓂᕐᖢᓂ ᓇᓕᒧᒌᒃᓗᓂᓗ. ᖁᕕᐊᒋᔭᖃᖅᑐᖅ ᑎᑎᕋᕐᓂᕐᒥᑦ ᖁᔭᓕᓂᕐᒥᓪᓗ ᑎᑎᕋᖅᓯᒪᔪᓂᑦ. ᑕᐅᓄᙵᕌᖓᑦ, ᕿᑐᕐᖓᒥᓂᒃ ᐱᖃᑎᖃᖅᖢᓂ, ᓄᓇᒦᑉᐸᒃᖢᓂ ᐃᓕᖅᑯᓯᑐᖃᕐᒥᓂᒡᓗ ᐊᐅᓪᓛᖅᓯᒪᓪᓗᓂ. ᒧᒥᖃᑦᑕᖅᑐᖅ ᐱᖅᑯᓯᑐᖃᖅᑎᒍᑦ ᐊᒻᒪᓗ ᒥᑕᐅᑎᓪᓗᓂ ᐊᒻᒪᓗ ᐃᓅᓯᓕᕆᔨᒥᒃ ᑕᑯᓪᓗᓂ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᐃᒪᐃᒃᑲᔭᖅᑐᖅ, "ᓴᐱᓕᖅᑕᐃᓕᒋᑦ. ᑲᔪᓯᓗᑎᑦ." ᐃᒻᒥᓂᒃ ᐅᖃᐅᔾᔨᔪᒪᓇᔭᖅᑐᖅ ᐅᐱᒍᓱᖁᔨᓗᓂ ᑭᓇᐅᓂᕐᒥᓂᒃ ᓇᑭᙶᕐᒪᖔᓪᓗ ᖃᓄᐃᙱᖦᖢᓂᓗ ᐊᔾᔨᒋᙱᖦᖢᓂᐅᒃ.  ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᓱᒪᔪᓄᑦ ᐊᐅᓪᓚᕈᒪᓂᕐᒥᒃ ᓄᓇᒥᓂᒃ ᐃᓕᓐᓂᐊᕆᐊᕐᓗᑎᒃ ᑲᓇᑕᐅᑉ ᓯᓚᑖᓄᑦ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᒡᔪᐊᓕᐊᕐᓗᑎᒃ ᐱᓕᕆᓇᔭᕐᒪᑕ ᓇᒡᓕᒋᔭᒥᓂᒃ ᓴᐱᓕᖅᑕᐃᓕᓗᑎᒡᓗ. "ᐊᒃᓱᕈᕐᓇᖅᑐᒻᒪᕆᐅᖕᒪᑦ, ᐱᓗᐊᖅᑐᒥ ᐃᓄᐃᑦ ᐃᓚᒥᓂᒃ ᕿᒪᐃᔭᕌᖓᑕ ᖃᐅᔨᒪᔭᒥᓂᒡᓗ. ᑭᓯᐊᓂ ᐊᖏᕐᕋᖅ ᓴᓇᕙᒃᑕᐃᑦ ᐊᒻᒪᓗ ᕿᓂᕐᓗᒋᑦ ᑕᒪᒃᑯᐊ ᐃᑲᔪᕈᑎᒃᓴᐃᑦ ᐊᒻᒪᓗ ᐊᔾᔨᒌᙱᑦᑐᑦ ᑲᑐᔾᔨᖃᑎᒌᑦ. ᐱᓕᕆᐊᒃᓴᖃᐃᓐᓇᕐᓗᑎᑦ, ᐱᓕᕆᓗᑎᑦ, ᓂᕿᑦᑎᐊᕙᖕᓂ ᓂᕆᕙᒡᓗᑎᑦ. ᐃᓂᒃᓴᓕᐅᖅᓯᒪᓗᑎᑦ ᐃᓕᖕᓄᑦ ᖃᐅᔨᒪᒋᐊᕐᓗᑎᓪᓗ ᐃᓗᐊᓂ ᐃᓅᓕᓴᐅᑎᑦ, ᖃᓄᑐᐃᓐᓇᖅ ᑕᐅᑦᑐᖃᕋᓗᐊᖅᐸᑦ, ᓇᓕᒧᒌᒃᓗᓂ," ᑎᓕᐅᕆᔪᖅ.

ᑕᐃᒪᓕ, ᖃᐅᔨᒪᔪᖅ ᓇᒻᒥᓂᖅ ᐊᑐᖅᓯᒪᔭᒥᓂᒃ, ᒪᒥᓴᖅᐸᓪᓕᐊᓂᖅ ᐱᒋᐊᓚᐅᖅᑐᖅ ᐃᓕᓐᓂᐊᐸᓪᓕᐊᓂᕐᒥᒃ ᐊᒻᒪᓗ ᑕᐃᒪᓐᓇ ᐃᓅᓱᒃᑐᐃᑦ ᐃᒻᒥᓂᒃ ᓇᓂᓯᒍᓐᓇᖅᑐᑎᒃ ᒪᓕᓪᓗᑎᒃ ᐱᔪᒪᔭᒥᓂᒃ. ᑐᓴᖅᑎᑕᐅᓯᒪᓪᓗᓂ ᐃᓅᓯᕐᒥᓂ ᐊᑐᖅᓯᒪᔭᖓᓄᑦ, ᐃᓕᓐᓂᐊᖅᓯᒪᓂᖓ ᓯᓚᑦᑐᖅᓴᕐᕕᒡᔪᐊᒥ ᓄᓇᒥᓗ, ᐋᖅᑭᒃᓱᐃᕙᓪᓕᐊᕗᖅ ᓯᕗᓂᒃᓴᒥᒃ ᑭᖑᕚᒃᓴᑦᑎᓐᓄᑦ ᐅᑯᑎᒎᓇᖅ, ᐃᓕᓐᓂᐊᕆᐅᖅᓴᓕᓵᖅᑐᓄᑦ ᓄᑕᖅᑲᓄᓪᓗ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᓇᓂ ᐃᓅᓯᕆᔭᒥᓂ. ᐊᑕᐅᓯᐊᕐᖢᓂ ᖃᐅᔨᒪᙱᖦᖢᓂ ᓄᓇᖃᖅᑳᖅᓯᒪᔪᑦ ᐃᓄᓕᕆᓂᕐᒥ ᐃᖅᑲᓇᐃᔮᖏᓐᓂ, ᒫᓐᓇᓗ ᐃᑲᔪᓕᖅᑐᖅ ᐱᒋᐊᕐᓂᕐᒥ ᓄᑖᒥᒃ ᐃᓅᓯᖓᓂ ᓄᓇᓕᖕᒥᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.