"ᑭᖑᕙᓗᐊᓚᐅᖅᓯᒪᙱᑦᑐᖅ ᐃᓕᓐᓂᐊᕆᐊᒃᓴᖅ," ᑎᓕᐅᕆᔪᖅ ᓗᕋᐃᓐ ᐅᐊᐃᑦᒪᓐ, ᐃᓅᓚᐅᖅᑐᖅ ᐱᕈᖅᓴᓪᓗᓂᓗ ᕗᐊᑦ 16−ᓂᑦ ᐅᑭᐅᖃᓕᕋᒥ ᑭᓯᐊᓂ ᐃᓕᓐᓂᐊᕆᐊᕋᒥ ᔭᓗᓇᐃᕝᒧᑦ. ᐃᖅᑲᓇᐃᔭᓚᐅᖅᑐᖅ ᑕᐃᑲᓂ ᐃᖅᑲᓇᐃᔭᑲᐃᓐᓇᖅᑐᓂ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ ᐊᒻᒪᓗ ᑕᐃᑲᓃᒍᒪᓪᓗᓂ ᐊᒻᒪᓗ ᐱᓕᕆᓪᓗᓂ ᐃᒻᒥᓂᒃ ᐃᑲᔪᖅᑐᐃᓪᓗᓂ ᐅᐱᓐᓇᕋᓂ ᐊᓯᖃᓚᐅᖏᒻᒪᑦ. ᐊᕐᕌᒍᑦ ᖃᔅᓯᐊᕐᔪᐃᑦ ᐊᓂᒍᖅᑎᓪᓗᒋᑦ, ᓅᓚᐅᖅᓯᒪᔪᖅ ᕼᐊᐃ ᕆᕗᒧᑦ, ᐊᓱᐃᓛᒃ ᓈᒻᒪᒃᑐᓄᑦ ᐅᐃᓪᔅᒧᑦ ᐊᕐᕌᒍᓄᑦ 7-ᓄᑦ. 

ᑕᐃᔅᓱᒪᓂ, ᐅᐊᐃᑦᒪᓐ ᐃᓕᓐᓂᐊᕆᐊᙱᑲᐃᓐᓇᓚᐅᖅᑐᖅ ᐊᐅᓚᑦᑎᔨᐅᓂᕐᒧᑦ ᐃᓕᓴᕆᔭᐅᔾᔪᑎᑖᓚᐅᖅᑐᖅ ᐃᓅᕕᖕᒥ. 30-ᑲᓴᐅᓚᐅᖅᐳᖅ ᐊᒻᒪ ᓯᕗᓪᓕᖅᐹᒥ ᐃᓕᓐᓂᐊᕐᓂᖃᖅᑎᓪᓗᒋᑦ, ᕿᑐᕐᖓᒥᓂᒃ ᐱᖃᑎᖃᖅᑐᓂ ᐊᒻᒪ ᐊᐃᑉᐸᕆᓕᖅᑕᖓᓂ ᐃᓕᓐᓂᐊᕐᓂᖃᖅᑎᓪᓗᒋᑦ ᐊᑖᑕᒥᓃᓚᐅᖅᐳᑦ ᓄᐊᒪᓐ ᐅᐃᓪᔅᒥ. ᐱᔭᕇᓚᐅᖅᑐᖅ ᐸᐃᑉᐹᖅᑖᕐᓂᕐᒧᑦ ᐃᓕᓐᓂᐊᕐᓂᕐᒥᒃ ᐊᒻᒪᓗ ᐃᖅᑲᓇᐃᔭᖅᑐᓂ ᕗᐊᑦ ᓯᒥᑦᒥ ᐃᖅᑲᓇᐃᔭᓚᐅᖏᑎᓪᓗᒍ ᐊᒥᐊᑯᖓᓄᑦ ᐊᕐᕌᒍᓄᑦ ᔨᐊᓗᓇᐃᒥ ᓄᖅᑲᕕᒋᓚᐅᖅᑕᖓᓂ. 

ᐃᖅᑲᓇᐃᔭᖅᑎᓪᓗᒍ ᓄᐊᒪᓐ ᐅᐃᓪᔅᒥ, ᑭᐅᔨᐅᓚᐅᖅᑐᖅ ᐊᒻᒪᓗ ᓅᓚᐅᖅᓯᒪᔪᖅ ᑎᑎᕋᖅᑎᐅᓂᕐᒧᑦ ᐃᖅᑲᓇᐃᔭᖅᑐᓂ ᑮᓇᐅᔭᓕᕆᔨᒃᑯᓐᓂ, ᖁᕕᐊᒋᒻᒪᕆᓚᐅᖅᑕᖓ. ᒐᕙᒪᒃᑯᓐᓄᑦ ᐃᖅᑲᓇᐃᔭᖅᖢᓂ ᐊᓕᐊᓇᐃᒋᑦᑎᐊᓚᐅᖅᑕᖓ ᐊᒻᒪ ᐊᒃᓱᕈᖅᖢᓂ ᐱᓕᕆᖃᑦᑕᓚᐅᖅᐳᖅ ᐃᒻᒥᓂᒃ ᐃᑲᔪᕋᓱᒃᖢᓂ. ᐅᐊᐃᑦᒪᓐ ᐃᖅᑲᓇᐃᔮᖃᖅᑎᓪᓗᒍ, ᐊᒥᓱᓂᒃ ᐃᖅᑲᓇᐃᔮᒃᓴᓂᒃ ᐱᑎᑕᐅᓚᐅᖅᑐᖅ ᐱᔪᒪᙱᑕᒥᓂᒃ, ᑭᓯᐊᓂ ᐊᔪᓚᐅᖅᑐᖅ ᐃᖅᑲᓇᐃᔮᖓᓄᑦ ᐃᑭᑎᖦᖢᓂᐅᒃ ᐱᓇᔪᑐᐃᓐᓇᙱᖦᖢᓂ ᑮᓇᐅᔭᓂᒃ. 

"ᖃᓄᐃᓕᐅᕐᓗᑎᑦ ᐃᓅᓯᕐᓂ ᐊᓐᓇᐅᒪᓇᓱᒡᓗᑎᑦ ᐃᑲᔪᕐᓗᑎᓪᓗ ᐃᓕᖕᓂᒃ ᑲᒪᒋᔭᖃᑦᑎᐊᕐᓗᑎᓪᓗ."

ᒪᒃᑯᒃᑐᓄᑦ ᐊᐅᓪᓚᕈᒪᔪᓄᑦ ᓄᓇᒥᓂᒃ ᕿᓂᕐᓗᑎᒃ ᐱᕕᒃᓴᐅᔪᓂᑦ, ᐅᐊᐃᑦᒪᓐ ᐅᖃᐅᔾᔨᒋᐊᕈᑎᖃᕈᓐᓇᖅᑐᖅ. "ᐃᓕᓐᓂᐊᖅᑎᑦ ᑎᓕᐅᕋᔭᖅᐸᒃᑲ ᕿᒥᕐᕈᔭᖅᑐᖁᓪᓗᒋᑦ ᓄᓇᕐᔪᐊᕐᒥ. ᐃᓛᒃ, ᑕᖅᑳᓃᒻᒪᑦ ᖃᓄᑐᐃᓐᓇᖅ ᐱᓕᕆᓂᐊᕐᓗᓂ, ᓱᓕᕚ? ᑲᔪᓯᑦᑎᐊᕈᒪᒍᕕᑦ, ᑕᐃᒪᐃᓕᐅᕈᒪᔭᕆᐊᖃᖅᑐᑎᑦ," ᐅᖃᐅᔾᔨᔪᖅ. 

"ᐊᓕᐊᓇᐃᒍᓱᑦᑎᐊᓚᐅᖅᑐᖓ, ᐄᖑᖅᑰᖅᑐᖅ. ᐊᐅᓚᔨᙱᑦᑐᖓ ᐊᖏᔪᐊᓗᒻᒥᒃ, ᐊᖏᔪᐊᓗᒻᒥᒃ ᐊᐳᖅᑕᕈᑎᖃᓚᐅᖅᓯᒪᒋᐊᒪ ᐃᖅᑲᓇᐃᔮᓐᓂ. ᐃᖅᑲᓇᐃᔭᕆᐊᑐᐃᓐᓇᓚᐅᖅᑐᖓ ᖃᓄᐃᓕᐅᕆᐊᖃᖅᑕᓐᓂᒃ ᐱᓕᕆᓪᓗᖓ," ᓈᓴᐃᒃᑲᓐᓂᖅᖢᓂ. ᐅᐊᐃᑦᒪᓐ ᐱᓇᔪᓚᐅᖅᐳᖅ ᐱᓕᕆᐊᒃᓴᓄᑦ ᑐᕌᖓᑎᑕᐅᓚᐅᖅᑐᓄᑦ ᐊᔾᔨᒌᒃᑎᑦᑎᓂᕐᒧᑦ−ᕿᓂᕐᓂᕐᒧᑦ ᐱᓕᕆᖃᑎᒌᒃᐸᒃᑐᓄᑦ ᐃᖅᑲᓇᐃᔭᕐᓂᕐᒥᓂ, ᑕᒪᓐᓇᓗ ᐃᑲᔪᕐᓂᖃᖅᖢᓂ. ᐃᖅᑲᓇᐃᔭᖅᖢᓂ ᓇᖕᒥᓂᖅ ᓄᓇᓕᖕᒥᓂ ᐊᒃᓱᕈᕐᓇᓚᐅᖅᑐᖅ ᑭᓯᐊᓂ ᐃᓱᒪᔪᖅ ᐃᖕᒥᓂᒃ ᓴᐃᒻᒪᖅᑎᑕᐅᓯᒪᓂᕐᒥᓂᒃ ᐃᖅᑲᓇᐃᔮᖓᓂ ᐃᓅᓯᖓᓂ.

ᐱᕈᖅᐸᓪᓕᐊᑎᓪᓗᒍ, ᐃᓕᓐᓂᐊᕆᐊᒃᑲᓂᖅᑐᓂ ᐱᑕᖃᕋᔪᓚᐅᖏᑦᑐᖅ ᐊᒻᒪᓗ ᑎᓕᐅᖅᑕᐅᒐᓂ. ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᕌᓂᒃᑎᓪᓗᒍ, ᖃᐅᔨᒪᙱᖦᖢᓂ ᖃᓄᐃᓕᐅᕈᒪᖕᒪᖔᑦ ᐃᖅᑲᓇᐃᔭᕆᐊᒃᓴᖅ, ᑭᓯᐊᓂ ᓇᖕᒥᓂᖃᕐᓂᕐᒧᑦ ᐃᓕᓐᓂᐊᖃᑦᑕᓚᐅᖅᐳᖅ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐱᕙᒌᔭᖅᑎᖦᖢᓂᒋᑦ ᐃᖅᑲᓇᐃᔭᖅᑎᓄᑦ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᑎᓪᓗᒍ ᐊᒻᒪ ᓇᖕᒥᓂᖅᓱᕈᓐᓇᖅᓯᓚᐅᖅᖢᓂ. 

"ᐊᒃᓱᕈᕐᓇᖅᑐᑦ ᓱᓕ ᑕᐃᑲᓃᑦᑐᑦ, ᑭᓯᐊᓂ ᐃᒥᐊᓗᒃ ᑭᓱᑐᐃᓐᓇᒥᒃ ᐋᖅᑭᒃᓯᔪᓐᓇᙱᑦᑐᖅ."

ᐃᒥᐊᓗᒃ ᐱᔾᔪᑕᐅᓚᐅᖅᐳᖅ ᓄᓇᒥᓂ ᒪᒃᑯᖕᓂᖅᓴᐅᑎᓪᓗᒍ, ᐃᓱᒪᓪᓗᓂ ᐊᒃᓱᕈᕐᓇᓗᐊᕋᓱᒋᙱᖦᖢᒍ ᐅᓪᓗᒥᑎᑐᑦ.  "ᐅᔾᔨᕈᓱᓕᓚᐅᖅᑐᖓ ᕿᑐᕐᖓᒃᑲ ᖃᐅᔨᖁᙱᖦᖢᒋᑦ. ᐱᓯᒪᓕᑐᐊᕈᒃᑭᑦ, ᐃᒥᐊᓗᒃ ᐃᓅᓯᓐᓃᓚᐅᖅᑐᖅ. ᖃᐅᔨᓚᐅᖅᓯᒪᙱᑦᑐᑦ ᑕᒪᑐᒥᖓ," ᐅᐊᐃᑦᒪᓐ ᓈᓴᐃᒃᑲᓐᓂᖅᑎᓪᓗᒋᑦ. 

ᑎᓕᐅᕆᔪᖅ ᒪᒃᑯᑦᑐᓂᑦ ᐅᔾᔨᕈᓱᖁᔨᓂᕐᒥᑦ ᐃᒥᐊᓗᒻᒥᑦ ᓅᑎᑦᓯᓂᕐᒥᓪᓗ ᖃᐅᔨᓴᕐᓂᕐᒥᑦ ᐃᒥᐊᓗᒻᒥᑦ ᐱᕈᕈᓐᓇᕐᓂᐊᕐᒪᑕ ᐃᓐᓇᕐᓂᓪᓗ ᑲᒪᒋᔭᖃᕐᓂᕐᒥᑦ, ᐱᓗᐊᖅᑐᒥᑦ ᓄᑕᖅᑲᐃᑦ ᐃᓚᒋᔭᐅᑉᐸᑕ. "ᐃᓕᖕᓂᒃ ᐱᐅᓛᒥᒃ ᐊᑐᖁᓇᔭᖅᑐᑎᑦ, ᕿᑐᕐᖓᕐᓄᓪᓗ, ᕿᑐᕐᖓᖃᕈᕕᑦ ᐃᕐᖑᑕᖃᕈᕕᓪᓗ," ᑲᔪᓯᓗᓂ. 

ᓄᖅᑲᖅᓯᒪᔪᒃᓴᐅᔫᒐᓗᐊᖅ ᐃᖅᑲᓇᐃᔭᕐᓂᕐᒥᒃ, ᑭᓯᐊᓂ ᓱᓕ ᐃᑲᔪᖅᑐᖅ ᓇᖕᒥᓂᖅ. ᐊᑭᓕᖅᓱᖅᑕᐅᓇᓂ ᐱᓕᕆᓪᓗᓂ ᓄᓇᓕᖕᓂ ᑲᑎᒪᔨᓄᑦ, ᓄᓇᒥᓄᑦ ᐅᑎᖅᑎᑦᑎᔪᖅ ᐋᓐᓂᐊᕕᖕᒥ, ᐱᖃᓐᓇᕆᔭᒃᑯᑦ ᐊᒻᒪ ᑮᓇᐅᔭᓕᐅᕋᓱᐊᖅᑏᑦ ᑲᑎᒪᔨᖏᓐᓄᑦ. "ᐃᓱᒪᔪᖓ ᒫᓐᓇ ᐃᓐᓇᐅᓂᖅᓴᐅᓕᕋᒪ, ᐱᓕᕆᓕᒪᓂᖅᓴᐅᓕᖅᑐᖓ ᐃᓚᐅᔪᒪᑦᑎᐊᖅᖢᖓᓗ, ᐊᒃᓱᕉᑎᖃᕈᒪᑦᑎᐊᖅᑐᖓ ᓈᓚᒍᓐᓇᖅᖢᖓ ᐃᓄᖕᓂᒃ ᐊᒻᒪ ᐱᔾᔪᑕᐅᓲᓂᒃ ᓄᓇᓕᖕᓂ," ᐅᐊᐃᑦᒪᓐ ᐅᖃᖅᖢᓂ. 

ᑭᖑᕙᓗᐊᓚᐅᖅᓯᒪᙱᑦᑐᖅ ᐃᓕᓐᓂᐊᕆᐊᒃᓴᖅ, ᑭᖑᕙᓗᐊᓚᐅᖅᓯᒪᓇᓂᓗ ᐃᑲᔪᕆᐊᒃᓴᖅ ᓄᓇᓕᖕᓄᑦ ᓄᑖᑎᒍᑦ. ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᓚᐅᖅᑎᓪᓗᒍ ᐊᒻᒪ ᓇᖕᒥᓂᖅ ᓄᓇᒥᓂ ᐃᖅᑲᓇᐃᔭᖅᑎᐅᓪᓗᓂ, ᓄᖅᑲᓛᕐᓂᕐᒥᓂᒃ ᖁᕕᐊᒋᔭᖃᖅᐳᖅ ᑭᓯᐊᓂ ᐱᓕᕆᐊᒃᓴᖃᐃᓐᓇᖅᖢᓂ ᐱᔪᒪᒐᓗᐊᖅᖢᓂ. ᐃᖅᑲᓇᐃᔮᖓ ᐊᑐᖅᑕᐅᓚᐅᖅᑐᖅ ᐱᓕᕆᐊᕆᔪᒪᔭᒥᓂᑦ ᐃᑲᔪᕈᒪᓪᓗᓂ ᐃᒻᒥᓂᒃ, ᒫᓐᓇᓗ ᖃᓄᐃᓕᐅᕈᓐᓇᖅᓯᔪᖅ ᐃᑲᔪᕈᒪᓪᓗᓂ ᐊᓯᒥᓂᑦ. 

‍

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.