ᓯᕗᓪᓕᕐᒥ ᖃᐅᔨᒪᓚᐅᙱᑦᑐᖅ ᑭᓱᓕᕆᔨᐅᓂᐊᕐᒪᖔᕐᒥᓂᒃ, ᑭᓯᐊᓂ ᓇᒧᙵᐅᕙᓪᓕᐊᓂᕆᔭᖓ ᓇᓂᓯᓇᓱᒃᖢᓂ ᐊᖅᑯᑎᒋᓂᐊᖅᑕᒥᓂᒃ ᐊᒥᓱᓂᒃ ᐱᕕᒃᓴᖃᖅᑎᑦᑎᓚᐅᖅᐳᖅ ᐃᑲᔪᕈᒪᓪᓗᓂ ᖃᓄᑐᐃᓐᓇᑦᑎᐊᖅ. ᑖᒪᔅ ᐋᓐᑐᓂ ᐳᕋᓐ ᐱᕈᖅᓴᓚᐅᖅᓯᒪᔪᖅ ᓵᓪᑦ ᓴᐃᓐᑦ ᒪᕆᐅᑉ ᖃᓂᒋᔮᓂ. ᒪᕐᕉᖕᓂᒃ ᓄᓇᖃᖅᖢᓂ ᑲᓇᑕᒥᐅᑕᐅᓪᓗᓂ ᐊᒥᐊᓕᑲᒥᐅᓂᓗ, ᐃᓕᓐᓂᐊᕆᐊᓚᐅᖅᓯᒪᕗᖅ ᒥᓯᒐᓐᒧᑦ ᒪᒃᑯᒃᑑᑎᓪᓗᒍ. Garden River-ᒦᓚᐅᖅᓯᒪᕗᖅ ᐊᒥᐊᓕᒐᐃᑦ ᓄᓇᖓᓐᓂ ᐊᑖᑕᖓᑕ ᓄᓇᒋᓚᐅᖅᓯᒪᔭᖓᓂ ᐊᒻᒪ ᐋᓐᑎᐅᕆᐅᒥ ᐊᖏᕐᕋᕆᔭᒥᓂ ᖃᖓᑐᐃᓐᓇᒃᑯᑦ ᐃᓅᓯᖓᓂ. ᐱᕈᖅᓴᓪᓗᓂ, ᐃᖃᓪᓕᐊᖃᑦᑕᓚᐅᖅᑐᖅ, ᕿᔪᖕᓂᒃ ᓇᑲᑎᕆᕙᒃᖢᓂ, ᐊᕝᕗᖅᐸᒃᖢᓂ ᒪᐃᐳᓪ ᓯᐅᕋᐅᔮᒥᒃ ᐊᒻᒪᓗ ᐃᓕᑦᑎᓪᓗᓂ ᐊᓐᓇᐅᒪᓇᓱᐊᕐᓂᕐᒥᒃ ᓄᓇᒥ ᐃᓚᒥᓄᑦ. 

ᐅᓪᓗᒥᐅᔪᖅ, ᐴᕋᓐ ᐃᓕᓴᐃᕙᒃᐳᖅ ᓯᓚᑦᑐᖅᓴᕐᕕᖕᒥ ᖃᐅᔨᓴᖅᐸᒃᖢᓂᓗ. 38-ᓂᒃ ᐅᑭᐅᖃᓚᐅᖅᑐᖅ ᐊᑎᑐᖃᕐᒥᓂᒃ ᐊᑎᖅᑖᕋᒥ, ᑕᓐᑐ ᐄᒍᓪ. "ᐱᓕᕆᓯᒪᕗᖓ ᑕᒪᒃᑭᓂ ᑰᖕᒥ ᑕᐃᒪᙵᓕᒫᖅ ᐃᖅᑲᓇᐃᔮᓐᓂ ᐊᒻᒪ ᐃᓚᖓᒍᑦ, ᐃᒻᒪᖄ ᑕᐃᒪᓐᓇ ᑕᑯᓚᐅᖅᐳᑦ ᐱᓕᕆᔪᓐᓇᕐᓂᓐᓂ ᐊᖏᓂᖅᓴᐅᔪᒥᑦ, ᐊᖏᓂᖅᓴᐅᔪᒥ ᑭᓯᐊᓂ ᐅᕙᓐᓂ ᑕᑯᓚᐅᙱᓐᓇᒪ ᑕᐃᒪᓐᓇ," ᐅᓂᒃᑳᖅᐳᖅ. 

ᐊᐱᕆᔭᐅᒐᒥ ᖃᓄᐃᒻᒪᑦ ᐃᓕᓴᐃᔨᙳᓚᐅᕐᒪᖔᑦ, ᐳᕋᓐ ᐅᖃᓚᐅᖅᐳᖅ, "ᐃᓱᒪᓕᐊᕆᑐᐃᓐᓇᓚᐅᙱᑕᕋ. ᐱᔭᐅᔭᕆᐊᖃᓚᐅᕐᒥᔪᖅ ᓄᓇᓕᖕᓂᑦ." ᑐᑭᓕᐊᕐᓂᖃᓚᐅᙱᓚᖅ ᐃᓕᓐᓂᐊᕐᕕᐊᕈᓯᕐᒧᑦ, ᑭᓯᐊᓂ. ᐊᕐᕌᒍᓂ ᐱᖓᓱᓂ ᐃᓕᓐᓂᐊᕌᓂᒃᓯᒪᓕᖅᑎᓪᓗᒍ, ᐳᕋᓐ ᑯᒃᑭᑕᐹᖅᑎᐅᓚᐅᖅᐳᖅ ᐊᐅᓪᓚᖅᐸᒃᖢᓂᓗ ᐊᒥᐊᓕᑲᒥᐅᑦ ᐅᓇᑕᖅᑐᒃᓴᖏᓐᓄᑦ ᐃᓚᐅᓕᓚᐅᖅᑳᕋᓂ ᐃᓗᐊᖅᓴᐃᔨᙳᓚᐅᖅᑳᕋᓂᓗ. ᓘᒃᑖᙳᕐᓂᐊᕋᓱᒋᓕᓚᐅᖅᐳᖅ ᑭᓯᐊᓂ ᖃᐅᔨᓕᓚᐅᖅᐳᖅ ᓈᒻᒪᔾᔮᙱᓐᓂᖓᓂ. ᐅᓇᑕᖅᑐᒃᓴᙳᓚᐅᖅᖢᓂ, ᓯᓚᑦᑐᖅᓴᕐᕕᖕᒧᑦ ᐅᑎᓚᐅᖅᐳᖅ ᐊᑖᑕᒋᔭᐅᓪᓗᓂ ᐃᓄᑑᓪᓗᓂ Lake Superior State ᓯᓚᑦᑐᖅᓴᕐᕕᒡᔪᐊᕐᒥ. ᓯᓚᑦᑐᖅᓴᕐᕕᖕᒥ ᓄᖅᑲᓚᐅᖅᓯᒪᔫᒐᓗᐊᖅ ᑭᓯᐊᓂ ᒫᓐᓇ ᐱᐅᓯᕚᓪᓕᓚᐅᖅᐳᖅ. 

ᐃᓕᓐᓂᐊᖅᑎᓪᓗᒍ, ᐳᕋᓐ ᐃᖅᑲᓇᐃᔭᓚᐅᖅᓯᒪᔪᖅ ᓵᓪᑦ ᓴᐃᓐᑦ ᒪᕆ ᐊᓪᓚᓄᑦ ᐃᓄᓕᕆᔨᐅᓂᕐᒧᑦ ᐃᓕᓐᓂᐊᖅᖢᓂ. "ᖃᐅᔨᕙᓪᓕᐊᓕᓚᐅᖅᐳᖓ ᖃᓄᐃᙱᓐᓂᖓᓂᒃ ᐊᖏᔪᐊᓗᖕᒥᒃ, ᐊᖏᔪᐊᓗᖕᒥᒃ ᓯᓐᓇᒃᑑᒪᒋᔭᖃᙱᓪᓗᓂ... ᒥᑭᑦᑐᑯᓗᖕᓂᒃ ᐊᓪᓗᕆᐊᖅᐸᒡᓗᓯ, ᐃᓕᓐᓂᐊᒐᒃᓴᖅ ᐱᐊᓂᒃᐸᒡᓗᒍ, ᖁᕕᐊᓱᖃᑎᒌᒃᑐᓄᐊᖅᐸᒡᓗᓯ, ᓈᓚᒃᐸᒡᓗᓯ ᐊᒻᒪ ᖃᐅᔨᒑᖓᕕᑦ ᐋᖅᑭᒃᓯᔪᓐᓇᙱᓐᓇᕕᑦ ᐃᓚᖏᓐᓂᒃ ᐊᑲᐅᙱᓕᐅᕈᑕᐅᔪᓂᒃ ᓵᑦᑎᐊᕐᒥᐅᑕᓂᒃ, ᑕᐃᒪᓕ ᐃᓕᑦᑎᔪᓐᓇᕆᕗᑎᑦ," ᐃᖅᑲᐅᒪᔪᖅ. 

"ᐅᑎᕐᕕᒋᓗᒋᑦ ᑲᑎᓐᓂᕗᑦ ᐊᒻᒪ ᖁᕕᐊᓲᑎᖃᕐᓂᕗᑦ, ᐊᒻᒪ ᑕᒪᓐᓇ ᐅᖓᑖᓅᖓᓚᐅᕐᑐᖅ PhD-ᒧᑦ ᐃᓕᓐᓂᐊᕐᓂᕐᒧᑦ. ᐊᒃᓱᕈᕐᓇᓚᐅᕐᑐᖅ ᑭᓯᐊᓂ ᐅᐸᒍᑎᓚᐅᖅᐳᖓ ᐊᒻᒪ ᑭᒃᑯᓕᒫᑦ ᑎᓕᐅᖅᐸᒃᑲ ᐊᔪᙱᑦᑐᓕᒫᑦ."

ᐃᓚᖏᑦ ᐊᕝᕕᐊᕈᑕᐅᕙᒃᑐᑦ ᐳᕋᐅᓐ ᓵᙵᔭᖏᑦ ᐊᕐᕌᒍᒐᓴᖕᓄᑦ ᐅᑯᐊᖑᓚᐅᖅᐳᑦ, ᑕᑯᒃᓴᐅᑦᑎᐊᙱᓐᓂᖅ ᐊᓯᒥᓄᑦ, ᐅᔾᔨᕈᓱᓕᖅᖢᓂ ᑐᕌᑦᑎᐊᙱᓐᓂᕐᒥᓂᒃ ᐃᓅᓯᕐᒥᓂ, ᐃᒥᐊᓗᓗᐊᖃᑦᑕᓕᕐᓂᕐᒥᓂᒃ ᐋᖓᔮᕐᓇᖅᑐᖅᑐᓗᐊᖅᐸᖕᓂᕐᒥᓂᒡᓗ ᐃᒻᒥᓂᒡᓗ ᓇᓂᓯᓇᓱᒃᐸᒃᖢᓂ. ᐃᒻᒥᓂᒃ ᐊᐱᕆᓪᓗᓂ, "ᖃᓄᕐᓕ ᐊᓂᒍᐃᔪᓐᓇᖅᐳᖓ ᑕᒪᒃᑯᓂᖓ ᐊᒃᓱᕈᕐᓇᖅᑐᓂᒃ, ᖃᓄᕐᓗ ᑲᒪᒋᔪᓐᓇᖅᐸᒃᑲ ᑭᓇᑐᐃᓐᓇᕐᒥᒃ ᐋᓐᓂᖅᓯᓂᐊᙱᓐᓇᒪ ᐅᕙᓐᓂᒡᓘᓐᓃᑦ ᐋᓐᓂᖅᓯᓂᐊᙱᓐᓇᒪ?" 

ᐴᕋᓐ ᐃᓐᓇᕈᖅᐸᓪᓕᐊᑎᓪᓗᒍ, ᑲᑎᑎᑕᐅᓪᓗᓂ ᐊᒻᒪ ᕿᑐᕐᙵᖅᑖᖅᐸᓪᓕᐊᓪᓗᓂ, ᑲᒪᑦᑎᐊᕐᓂᖅᓴᐅᓕᓚᐅᖅᐳᖅ ᐊᒻᒪ ᐃᑲᔪᖅᑎᐅᕙᓪᓕᐊᓕᖅᖢᓂ ᐃᓕᖅᑯᓯᒃᑯᑦ ᐊᒻᒪ ᐱᓕᕆᔨᒻᒪᕆᐅᓂᒃᑯᑦ. ᖃᐅᔨᕙᓪᓕᐊᓕᓚᐅᖅᐳᖅ ᑭᓱᒥᒃ ᐱᔪᒪᖕᒪᖔᕐᒥᓂᒃ ᐃᓅᓯᕐᒥᓂᒃ. ᑭᖑᓂᐊᒍᑦ ᓄᓇᖃᖅᑳᖅᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᑭᒧᐊᖅᑎᑦᑎᔨᙳᓚᐅᖅᐳᖅ, ᐃᑲᔪᖅᖢᓂ ᒪᒥᓴᕐᕕᓕᐅᕐᓂᕐᒥᒃ ᐊᒻᒪ ᐅᑎᖅᑎᑦᑎᓪᓗᓂ ᓯᕗᓕᕆᓚᐅᖅᑕᑦᑕ ᑎᒥᕕᓂᖏᓐᓂᒃ. ᓂᔾᔭᐅᓯᔭᖅᑎᓂᒃ ᐱᙳᐊᖃᑕᐅᔪᓐᓇᖅᓯᓚᐅᕆᕗᖅ. "ᐅᔾᔨᕈᓱᓕᓚᐅᕆᕗᖓ ᖃᓄᐃᙱᓐᓂᖓᓂᒃ ᑐᓐᓂᖅᑯᓯᐊᖅᑖᖅᑎᑕᐅᓗᖓ ᖁᕕᐊᓱᖃᑎᒋᑦᑎᐊᕐᓗᒍᓘᓐᓃᑦ, ᓂᕆᑦᑎᐊᕐᓗᖓᓘᓐᓃᑦ, ᐅᕙᓐᓄᓪᓘᓐᓃᑦ," ᐅᓂᒃᑳᕆᓪᓗᓂ. ᐃᓛᓐᓂᒃᑯᑦ ᑮᓇᐅᔭᑎᒍᑦ ᒪᑭᑕᑦᑎᐊᙱᖦᖢᓂ, ᑭᓯᐊᓂ ᖃᓄᖅᑑᕈᓐᓇᑦᑎᐊᓚᐅᖅᐳᖅ ᐊᒃᓱᕈᕐᓇᖅᑐᒃᑰᖅᐸᒃᖢᓂᓗ.   

ᐃᓚᒋᔭᐅᓪᓗᓂ ᒪᒥᓴᕐᕕᖕᒧᑦ ᐱᓕᕆᐊᒧᑦ ᐊᓯᔾᔨᕈᑕᐅᓚᐅᖅᐳᖅ ᐃᓅᓯᖓᓄᑦ. ᐱᔭᕇᓚᐅᖅᑎᓪᓗᒍ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᖅᑕᒥᓂᒃ ᐊᒻᒪ ᐃᓕᓐᓂᐊᒃᑲᓐᓂᓕᖅᖢᓂ ᐋᓐᓂᐊᖅᑐᓕᕆᓂᕐᒧᑦ ᐃᓅᓯᓕᕆᓂᕐᒥᒃ ᐅᐊᓕᓂᖅᐸᓯᐊᓂ ᒥᓯᒐᓐ ᓯᓚᑦᑐᖅᓴᕐᕕᒡᔪᐊᕐᒥ, ᐳᕋᓐ ᐃᑲᔪᖅᑎᐅᔪᓐᓇᖅᓯᓚᐅᖅᐳᖅ, ᐃᒃᓯᕚᖃᑕᐅᓪᓗᓂ ᑕᒪᐃᓐᓂᒃ 7-ᓂᒃ ᓄᓇᓕᖕᓂ ᐅᖃᖃᑎᖃᕆᐊᖅᑐᖅᖢᓂ ᑐᔪᕐᒥᕕᐅᑉ ᒥᒃᓵᓄᑦ ᐊᒻᒪ ᐱᓕᕆᖃᑎᖃᖅᖢᓂ ᑖᓐ ᐸᐃᓐ ᖃᑕᙳᑎᖏᓐᓂᒡᓗ. ᐱᓕᕆᖃᑎᒋᓪᓗᒋᑦ ᓄᓇᓖᑦ, ᐃᓐᓇᐃᑦ, ᒐᕙᒪᒃᑯᓪᓗ ᑕᐅᑐᙳᐊᖅᑕᐅᔪᖅ ᓄᓇᓕᖕᓂ ᓯᕗᓕᖅᑎᐅᓂᕐᒧᑦ ᓴᖅᑭᑎᑦᑐᒪᓪᓗᒍ ᐊᒃᓱᐊᓗᒃ ᐱᕚᓪᓕᕈᑎᒋᓚᐅᖅᐸᐅᒃ. ᐃᓅᓯᓕᒫᕐᒥᓂ ᐃᓕᑦᑎᕙᓪᓕᐊᖏᓐᓇᖅᖢᓂ, ᑭᖑᓂᐊᒍᓪᓗ ᐃᓕᓴᐃᔨᙳᕆᐅᖅᓴᓂᕐᒧᑦ ᐃᓕᓐᓂᐊᒃᑲᓐᓂᓕᓚᐅᖅᓯᒪᕗᖅ.

ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᐊᐅᓪᓚᕈᒪᔪᓄᑦ ᓄᓇᓕᖏᓐᓂ ᐃᓕᓐᓂᐊᒃᑲᓐᓂᕆᐊᖅᑐᕐᓗᑎᒃ ᐅᕝᕙᓘᓐᓃᑦ ᐃᖅᑲᓇᐃᔮᕆᔪᒪᔭᒥᓄᑦ, ᐱᕉᓐ ᓇᓗᓇᐃᖅᓯᔪᖅ ᐊᑐᖅᓯᒪᔭᖓ ᐊᔾᔨᒋᙱᑦᑎᐊᖅᑕᖓ ᑭᓯᐊᓂ ᐅᖃᖅᑐᖅ, "ᑲᑉᐱᐊᓱᙱᓪᓗᑎᑦ ᐆᒃᑐᕆᐊᒃᓴᖅ... ᐅᒃᐱᕆᔭᕆᐊᖃᖅᑕᐃᑦ. ᑲᔪᓰᓐᓇᕆᐊᖃᖅᐳᑎᑦ. ᑲᑉᐱᐊᓱᙱᑦᑎᐊᕆᑦ, ᑕᒪᕐᒥᑦᑎᐊᖅ ᑕᒪᒃᑯᐊ ᐃᓕᓴᐃᔾᔪᑕᐅᕙᒃᑐᑦ, 7-ᖑᔪᑦ ᐃᓕᓴᐃᔾᔪᑕᐅᕙᒃᑐᑦ, ᑕᒪᕐᒥᑦᑎᐊᖅ ᐱᓕᕆᖃᑎᒌᒃᐸᒃᐳᑦ ᐊᔪᕐᓇᙱᑦᑐᑯᓘᕙᙱᖦᖢᑎᒡᓗ, ᑭᓯᐊᓂᓗ, ᖃᓄᐃᙱᓚᖅ ᓯᓚᑖᓅᕆᐊᒃᓴᖅ ᐃᓕᓐᓂᐊᕐᓂᕆᔭᐅᕙᒃᑐᒥᒃ, ᐋᖅᑭᒃᓱᖅᑕᐅᓯᒪᔪᒥᒃ ᐃᓕᓐᓂᐊᕐᓂᓕᕆᓂᕐᒧᑦ ᐊᑐᖅᑕᐅᕙᒃᑐᒥᒃ ᑕᐃᕙᒃᑕᑦᑎᓐᓂᒃ ᐃᓕᓐᓂᐊᕐᓂᓕᕆᓂᕐᒥᒃ, ᐊᒻᒪᓗ ᕿᓂᕆᐊᖅᑐᕐᓗᓂ ᖃᐅᔨᒪᓂᕆᔭᐅᔪᓂᒃ ᐊᓯᖏᓐᓂᒃ ᐃᓕᓴᐃᔨᓂᒃ ᓈᓚᒡᓗᓂᓗ, ᑕᒪᓐᓇᓗ ᐃᓕᖕᓄᑦᑕᐅᖅ ᐱᕚᓪᓕᕈᑕᐅᓂᐊᕆᕗᖅ." ᓴᙱᒃᑎᒋᐊᖅᑎᑦᑎᒃᑲᓐᓂᕆᕗᖅ ᐃᓅᓕᓴᐅᑎᓄᑦ ᐊᑑᑎᖃᕐᓂᖓᓂᒃ ᐊᖏᕐᕋᐅᓂᐊᕐᓗᓂ ᐊᔪᙱᑦᑐᓄᑦ. 

"ᐱᒃᑯᒍᓱᑦᑎᐊᖅᐳᖓ ᐃᓄᖕᓂ ᖃᓂᒋᔭᖃᕋᒪ ᓴᐱᓕᖅᓯᒪᙱᑦᑐᓂ ᐅᕙᓐᓂᒃ ᑕᐃᒪᐃᓐᓂᖓᓄᓪᓗ ᐱᕚᓪᓕᖅᓯᒪᕗᖓ, ᐱᕚᓪᓕᖅᓯᒪᑦᑎᐊᖅᐳᖓ, ᖁᔭᓕᐃᓐᓇᐅᔭᖅᖢᖓᓗ."

ᐃᓱᒪᒥᒍᑦ ᖃᓄᐃᖏᑦᑎᐊᕋᓱᒃᖢᓂ, ᐴᕋᓐ ᖁᔭᓕᓂᖃᖅᐳᖅ ᐊᒻᒪ ᒥᑭᓪᓕᑎᖅᓯᒪᓪᓗᓂ. "ᑕᕝᕘᓇ ᖃᐅᔨᕙᓪᓕᐊᓕᓲᖑᕗᑎᑦ ᒥᑭᑦᑑᓂᓐᓂᒃ. ᐃᑲᔪᖅᑕᐅᔭᕆᐊᖃᖅᐳᖓ, ᓇᖕᒥᓂᕐᓗ ᐃᑲᔪᕈᓐᓇᖅᖢᖓ. ᖃᐅᔨᕙᓪᓕᐊᓕᓚᐅᖅᐳᖓ ᓱᓕᔪᒥᒃ ᐅᖃᕋᓱᒃᑯᒪ, ᑭᓇᐅᓇᓱᒃᑲᓗᐊᕈᒪ, ᐊᑲᐅᓯᕚᓪᓕᖅᐳᖓ," ᐅᖃᓚᐅᖅᐳᖅ. "ᓱᓕᓂᖅ ᐊᖏᔪᐊᓗᖕᒥ ᐃᓕᓴᐃᔾᔪᑕᐅᓕᓚᐅᖅᐳᖅ ᐊᒻᒪ ᐅᕙᓐᓂᒃ ᓈᒻᒪᒋᓕᖅᖢᖓ ᐃᒪᓐᓇ ᐅᖃᖅᑐᒥᒃ ᖃᓄᐃᙱᓐᓂᕐᓂᒃ, ᐊᓯᖕᓂᒃ ᐃᑲᔪᕈᓐᓇᖅᑐᑎᑦ, ᐊᒻᒪ ᑕᕝᕘᓇ ᐃᑲᔪᕐᓂᖅ ᓴᖅᑭᓚᐅᖅᐳᖅ," ᐅᖃᕆᓪᓗᓂ.

ᐴᕋᓐ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, ᑲᑎᖃᑎᖃᕐᓂᐊᕋᒥ ᐊᔪᕆᖅᓱᐃᔨᒥᓂᒃ, ᐃᑲᔪᖅᑎᒋᓂᐊᕋᒥᐅᒃ ᑲᔪᓯᖏᓐᓇᕐᓗᓂᓗ, ᑕᒪᓐᓇ ᕿᑲᑐᐃᓐᓇᕈᓐᓇᙱᓐᓂᖓᓂᒃ. "ᐃᓄᑑᓚᐅᖅᓯᒪᙱᓚᑎᑦ, ᑭᓯᐊᓂ ᑕᒪᓐᓇ ᑐᑭᖃᙱᓚᖅ ᐃᓅᓯᖅ ᐊᔪᕐᓇᙱᓗᐊᓕᖅᐸᖕᓂᖓᓂ ᐸᓯᔭᒃᓴᐅᙱᖦᖢᓂᓗ," ᐅᖃᓚᐅᖅᐳᖅ. ᑕᐅᑐᒃᖢᒋᑦ ᑕᒪᕐᒥᑦᑎᐊᖅ ᐃᓕᓴᐃᔾᔪᑕᐅᕙᒃᑐᑦ ᐅᖃᐅᓯᕐᓄᓪᓗ ᐃᓕᑦᑎᕙᓪᓕᐊᓂᕐᒧᑦ ᐱᕕᒃᓴᐅᕙᒃᑐᑦ ᒫᓐᓇ ᒪᓂᒪᑎᑕᖏᑦ, ᐊᒃᓱᕈᖅᖢᓂ ᐃᓕᑦᑎᓇᓱᒃᐸᒃᐳᖅ ᑎᓕᐅᕆᕙᒃᖢᓂᓗ ᐊᓯᒥᓂᒃ ᑕᐃᒪᐃᓕᐅᖁᔨᓪᓗᓂ.  

"ᑕᒪᑦᑕᑦᑎᐊᖅ ᐃᓄᑑᒐᑦᑕ, ᑭᓯᐊᓂ ᑲᙳᓱᙱᓪᓗᓯ ᐃᑲᔪᖅᑕᐅᔪᒪᔭᕆᐊᒃᓴᖅ."

ᐱᔪᒃᓯᑎᑦᑎᓇᓱᓕᕌᖓᒥ, ᐳᕋᓐ ᐅᖃᓚᐅᖅᐳᖅ, "ᐆᒪᑐᐃᓐᓇᖅᖢᓂ ᐱᒻᒪᕆᐊᓘᕗᖅ. ᐊᒥᓱᐊᓗᖕᓂ ᖃᓂᒃᓴᓗᐊᙱᑦᑐᒃᑰᖅᓯᒪᕗᖓ, ᑕᐃᒪᐃᓐᓂᖓᓄᓪᓗ ᖁᔭᓕᑦᑎᐊᖅᐳᖓ ᐅᕙᓃᑦᑐᓐᓇᕋᒪ." ᖄᒃᑲᓐᓂᐊᒍᑦ ᑲᒪᓇᕐᓂᖓᑕ ᓇᖕᒥᓂᖅ ᐊᓐᓇᐅᒪᔪᓐᓇᕐᓂᖓᓂ, ᐱᔪᒪᓂᖃᖅᐳᖅ ᐃᓕᓴᖅᑕᐅᓂᐅᔪᓂ ᐊᒥᖅᑳᕈᑕᐅᓯᒪᔪᓂ ᑖᔅᓱᒧᖓ. ᐃᓐᓇᐅᓕᕐᓂᕐᒧᑦ ᓄᖅᑲᕋᓱᒃᑎᓪᓗᒍ, ᑕᑯᓪᓗᓂ ᓇᓗᓕᕈᑕᐅᔪᓂᒃ ᓴᖅᑭᓚᐅᖅᑐᓂᒃ ᐋᓐᓂᐊᕕᒡᔪᐊᕐᓇᒧᑦ, ᐃᑲᔪᕈᒪᓕᓚᐅᖅᐳᖅ ᓯᕗᓕᖅᑎᐅᔪᒪᓪᓗᓂᓗ ᖃᐅᔨᒪᓪᓗᓂ ᖃᐅᔨᒪᓂᕐᒥᓂᒃ ᐊᒻᒪ ᐱᓕᕆᖃᑦᑕᖅᓯᒪᓂᑰᓂᕐᒥᓂᒃ. ᐱᔪᒃᓯᑎᑕᐅᕙᒃᑭᕗᖅ ᐆᒻᒪᕆᒃᑐᓂᒃ ᒪᒃᑯᒃᑐᓂᒃ ᐱᑐᐃᓐᓇᕆᐊᖃᓕᖅᑐᓂᒃ. 

ᖃᐅᔨᒪᓚᐅᙱᒃᑲᓗᐊᖅᖢᓂ ᑭᓱᓕᕆᔨᐅᓛᕐᒪᖔᑦ ᓯᕗᓪᓕᕐᒥ, ᓇᓂᓯᓪᓗᓂ ᐊᖅᑯᑎᒋᓂᐊᖅᑕᒥᓂᒃ ᑖᒪᔅ ᐳᕋᓐᒧᑦ ᐱᕕᒃᓴᖃᖅᑎᑦᑎᓚᐅᖅᐳᖅ ᐃᑲᔪᕐᓂᕐᒥᒃ ᖃᓄᑐᐃᓐᓇᑦᑎᐊᖅ. ᐋᓐᓂᐊᓯᐅᖅᑎᐅᓪᓗᓂ, ᓱᕈᓯᓕᕆᔨᐅᓪᓗᓂ, ᒪᒥᓴᕐᕕᓕᐅᖅᑐᓂ, ᐅᑎᖅᑎᑦᑎᕙᓪᓕᐊᓪᓗᓂ ᐊᒻᒪ ᒫᓐᓇ ᐃᓕᓐᓂᐊᕐᓂᓕᕆᔨᒃᑯᓐᓂ, ᐊᖏᔪᐊᓗᒻᒥᒃ ᑐᓂᓯᓯᒪᕗᖅ ᑕᒪᒃᑮᓐᓂᒃ ᑰᒻᒥᑦ. ᐊᓯᒥᓂᒃ ᐃᑲᔪᖅᐸᒃᖢᓂ ᐃᒻᒥᓂᒡᓗ ᓈᒻᒪᒋᕙᒃᖢᓂ, ᖁᔭᓕᓂᖃᖅᐸᒃᐳᖅ ᐃᓅᓯᖃᖅᐸᒃᖢᓂᓗ ᒥᑭᓪᓕᑎᖅᓯᒪᕙᒃᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.