"ᑭᒃᑯᓕᒫᑦ ᐱᙳᐊᕈᓐᓇᕐᓂᖃᖅᐳᑦ," ᐅᖃᓚᐅᖅᐳᖅ ᑖᒪᔅ ᐱᐅᕆᐅ. ᐊᒪᕈᕐᒥᐅᑕᐅᕗᖅ, ᒨᕼᐋᒃᒥᐅᑕᖅ ᐊᒃᕼᐊᔅᓂᒥᐅᑕᖅ. ᓄᓇᓕᒃ ᐋᓐᑎᐅᕆᐅᒥ, ᑯᐸᐃᒃᒥ, ᐊᒻᒪ ᓂᐅ ᔪᐊᒃᒥ. ᐃᖅᑲᓇᐃᔭᕐᓇᐅᔪᓐᓃᕌᖓᑦ ᐱᙳᐊᕈᒪᓲᖑᕗᖅ ᑕᕐᕆᔭᐅᑎᒃᑯᑦ ᐱᙳᐊᕈᑎᓂᒃ, ᐸᑦᑕᙳᐊᓂᒃ ᓲᕐᓗ Magic the Gathering, ᐱᙳᐊᕈᓯᕐᓂᒃ ᓲᕐᓗ Dungeons and Dragons ᐊᒻᒪ ᖃᑕᙳᑎᖏᑦ ᑲᑎᙵᖃᑎᒋᕙᒃᖢᓂᒋᑦ.

ᓯᕗᓪᓕᖅᐹᒥ ᐃᖅᑲᓇᐃᔮᕆᓚᐅᖅᓯᒪᔭᖓ ᓯᓚᑦᑐᖅᓴᕐᕕᖕᒥ ᐃᖅᑲᓇᐃᔭᓚᐅᖅᓯᒪᕗᖅ ᑎᒥᒃᑯᑦ ᓱᑲᖃᓗᐊᓕᖅᐸᒃᑐᓄᑦ ᐃᓕᓴᐃᔨᐅᓪᓗᓂ ᐊᒃᕼᐊᐃᓴᓐ ᓄᑲᑉᐱᐊᑦ ᐊᒻᒪ ᓂᕕᐊᖅᓵᑦ ᑲᑐᔾᔨᖃᑎᒌᖏᓐᓄᑦ, ᑭᖑᓂᐊᒍᓪᓗ ᐊᖓᔪᖅᑳᕆᔭᐅᓕᖅᖢᓂ, ᐊᐅᓚᑦᑎᓪᓗᓂ ᐱᖓᓱᓂᒃ ᑲᑎᙵᔪᓂᒃ ᑲᓇᑕᒥᐅᓂᒃ. ᐊᕐᕌᒍᑦ ᖁᓕᑦ ᐊᓂᒍᖅᑎᓪᓗᒋᑦ, ᐱᐅᕆᕉ ᓄᖅᑲᓚᐅᖅᐳᖅ ᒫᓐᓇᓗ ᐊᐅᓚᑦᑎᓕᖅᖢᓂ ᑮᓇᐅᔭᓕᐅᕋᓱᒃᑎᐅᙱᑦᑐᒥ ᑕᐃᔭᐅᔪᒥ Good Mind Grappling-ᒥ, ᐃᓚᖃᖅᖢᓂ ᓄᑲᕐᒥᓂᒃ ᐊᓯᖏᓐᓂᒡᓗ, ᐱᑎᑦᑎᕙᒃᖢᑎᒃ ᐊᑭᖃᙱᑦᑐᒥ ᐹᓂᕐᒥᒃ, ᐊᙳᑎᓂᕐᒥᒃ ᐊᓯᖏᓐᓂᒡᓗ ᐊᐅᓚᓂᕐᒧᑦ ᐊᔪᕈᓐᓃᖅᓴᕐᓂᐅᔪᓂ ᓲᕐᓗ ᐃᖃᐃᓕᓴᕐᓂᐅᔪᓂ. ᐊᖅᓴᖃᑕᐅᕙᒃᑭᕗᑦ. "ᑐᕌᒐᕆᔭᕗᑦ ᐊᑐᕐᓗᒍ ᐱᙳᐊᕐᓂᖅ ᐱᕈᖅᑎᑦᑎᕙᓪᓕᐊᓂᕐᒧᑦ ᓄᓇᓕᖕᓂ ᐊᒻᒪᓗᑦᑕᐅᖅ ᑲᒪᒋᔭᖃᕐᓂᕐᒧᑦ ᑭᖑᕚᕇᓄᑦ ᐊᒃᓱᕈᕐᓇᖅᑐᒃᑰᕈᑕᐅᕙᒃᑐᓄᑦ. ᐊᒥᓱᑦ ᓴᖅᑭᑦᑐᑦ ᑭᖑᕚᕇᓄᑦ ᖁᐊᖅᓵᖅᓯᒪᓂᐅᔪᒥ ᐊᑐᖅᑕᐅᔪᒥ ᓄᓇᓕᑦᑎᓐᓂ ᓱᕋᐃᓂᐅᕗᖅ ᐃᓚᒌᖕᓂᐅᔪᒥ ᐊᒻᒪ ᓄᓇᓕᖕᓂ ᑲᑎᙵᓂᐅᔪᒥ, ᐊᒻᒪ ᐃᓚᖓ ᐱᓕᕆᐊᕆᓇᓱᐊᖅᐸᒃᑕᕗᑦ ᐃᓄᐃᑦ ᑲᑎᙵᓂᖏᓐᓂ ᖁᕕᐊᓇᖅᑐᒃᑯᑦ, ᐱᐅᔪᒃᑯᑦ ᑲᑎᙵᓂᖃᕈᓐᓇᕐᓂᐊᕐᒪᑕ ᑕᐃᒪᐃᑦᑐᓂ ᑲᑎᙵᓂᐅᔪᒥ ᐊᒻᒪ ᓄᓇᓕᖕᓂ," ᐅᓂᒃᑳᖅᐳᖅ.

"ᐱᙳᐊᕈᓯᖅ ᖃᐅᔨᒪᔭᕋ ᐹᓂᖅ, ᖃᓄᖅ ᐃᑲᔪᕈᓐᓇᕐᒪᖔᑦ ᓴᐱᓕᖅᓴᕋᐃᙱᓐᓂᕐᒥᒃ ᒪᒃᑯᒃᑐᓄᑦ."

ᐱᐅᕆᕉ 6-ᖏᖅᓱᖅᖢᓂ ᑲᓇᑕᒥ ᓵᓚᒃᓴᖃᑕᐅᓯᒪᔪᖅ ᑲᓇᑕᒥ ᐱᙳᐊᕕᒡᔪᐊᖅᑐᓂᒃ 2019-ᒥ. ᐹᔨᐅᓯᒪᓕᖅᐳᖅ 25-ᓂᒃ ᐊᕐᕌᒍᓂᒃ. ᑭᒡᒐᖅᑐᐃᓚᐅᖅᐳᖅ ᑲᓇᑕᒥ ᓄᓇᕐᔪᐊᒥ ᐱᙳᐊᕕᒡᔪᐊᕐᓂᐅᔪᓂ ᐱᖓᓱᐃᖅᓱᖅᖢᓂ ᐊᒻᒪ ᐹᓐ ᐊᒥᐊᕆᑲᒥ ᐱᙳᐊᕕᒡᔪᐊᕐᓂᐅᔪᓂ 2019−ᒥ. ᓄᑲᖓ ᐱᖓᓱᐃᖅᓱᖅᖢᓂ ᓵᓚᒃᓴᖃᑕᐅᓯᒪᔪᖅ ᐃᓕᓴᐃᔨᐅᓯᒪᓪᓗᓂ Division 1-ᒥ ᐊᒥᐊᓕᑲᐃᑦ ᓄᓇᖓᓂ. 2023-ᒥ ᑕᒪᕐᒥᒃ ᐃᓕᔭᐅᓚᐅᖅᑑᒃ ᐅᐊᖕᓇᖓᓂ ᐊᒥᐊᓕᑲᒥ ᓄᓇᖃᖅᑳᖅᓯᒪᔪᑦ ᐱᙳᐊᖅᑎᑦ Hall of Fame ᕗᐃᔅᑲᓐᓯᓐᒥ. ᐃᓚᐅᖃᑦᑕᖅᓯᒪᖕᒥᔪᑦ ᔫᑐᒥ ᐊᒻᒪ jiu ᔨᑦᓱᒥ.

ᐱᕈᖅᓴᓪᓗᓂ, ᐱᐅᕆᕉ ᐊᑖᑕᖓ ᐃᓕᓴᐃᔨᐅᓚᐅᖅᐳᖅ ᑯᕆᓄᓪᒥ ᓄᓇᖃᖅᑳᖅᑐᓂᒃ ᖃᐅᔨᓴᕐᓂᕐᒥᒃ ᐊᒻᒪ ᐊᓈᓇᖓ ᓄᓇᖃᖅᑳᖅᓯᒪᔪᓄᑦ ᐃᕐᓂᓱᒃᓰᔨᐅᓪᓗᓂ ᐃᑲᔪᓚᐅᖅᓯᒪᓪᓗᓂ ᐃᕐᓂᓱᒃᓰᕕᖕᒥ ᐊᕐᕕᓂᓕᖕᓂ ᓄᓇᕐᔪᐊᓂ. ᒪᕐᕈᓕᐊᕇᒃ ᓯᕗᓪᓕᕐᒥ ᑲᔪᖏᖅᓴᖅᑕᐅᓚᐅᖅᓯᒪᔫᒃ ᓚᑯᕌᔅᒥᒃ ᐱᙳᐊᖁᔭᐅᓪᓗᑎᒃ ᑭᓯᐊᓂ ᐱᒃᑲᐅᓗᐊᓚᐅᙱᑦᑐᑦ ᐱᐅᒋᙱᖦᖢᒋᓪᓗ. ᐱᑦᑎᐊᖅᑕᐅᕙᓚᐅᖅᑑᒃ ᓄᔭᑯᑖᖏᓐᓄᑦ ᑭᓯᐊᓂ ᓄᑲᕇᒃ ᐋᓐᓂᖅᓯᕙᓚᐅᖅᑑᒃ ᓲᖑᓴᒃᑐᓂᒃ. ᐅᓪᓗᐃᑦ ᐃᓚᖓᓐᓂ ᓲᖑᓴᒃᑐᑦ ᐹᔨᙳᕋᓱᖁᔨᓕᓚᐅᖅᐳᑦ ᐊᒻᒪ ᐱᙳᐊᕈᓯᕐᒥᒃ ᖁᕕᐊᒋᔭᖃᓕᓚᐅᖅᐳᑦ. ᐊᐃᑉᐸᖓᓂ ᐊᕐᕌᒍᒥ ᓄᑲᖓ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᒌᓄᑦ ᐃᓚᐅᓕᓚᐅᖅᐳᖅ ᐊᒻᒪ ᐱᙳᐊᖅᑎᙳᖃᑕᐅᓪᓗᓂ ᐊᕐᕌᒎᑉ ᓄᙳᐊᓂ. ᑲᒪᔨᖓ, ᐊᕕᒃᓯᒪᓂᕐᒥ 3-ᒥ ᑲᓇᑕᓕᒫᒥ ᓵᓚᖃᓛᖑᖃᑕᐅᔪᖅ ᐃᑦᕼᐊᑲ ᓯᓚᑦᑐᖅᓴᕐᕕᖓᓂᙶᖅᑐᖅ, ᑲᑎᖃᑎᖃᓚᐅᖅᐳᖅ ᐃᑲᔪᖅᖢᓂᐅᒡᓗ ᓄᖅᑲᖅᑎᖦᖢᓂᐅᒃ ᐱᙳᐊᕐᓂᐅᔪᒥ ᓯᓚᑖᓂ. ᐊᖓᔪᖅᑳᖏᒃ ᓅᓚᐅᖅᓯᒪᔫᒃ ᐅᐊᓯᖕᑕᓐ ᑏᓰᒧᑦ ᐃᖅᑲᓇᐃᔭᕆᐊᖅᖢᑎᒃ ᓇᔭᒥᓃᖦᖢᑎᒃ ᐊᓯᖏᓐᓂᒡᓗ ᖃᑕᙳᑎᖏᓐᓂᒃ. ᐹᓚᐅᖅᑑᒃ ᒪᓯᓇᒥ ᐊᒻᒪᓗ ᓄᑲᖓ ᒪᕐᕈᐃᖅᓱᖅᖢᓂ ᓄᓇᖃᖅᑳᖅᑐᑦ ᐱᙳᐊᕕᒡᔪᐊᕐᓂᖏᓐᓂ ᓵᓚᖃᓚᐅᕐᑐᖅ. ᑕᒪᕐᒥᒃ ᐹᖃᑕᐅᓚᐅᖅᑑᒃ Division 1-ᒥ ᓯᓚᑦᑐᖅᓴᕐᕕᖕᒥ ᐊᒻᒪ ᑕᖃᓗᐊᓕᓚᐅᖅᓯᒪᓪᓗᓂ ᐃᓕᓐᓂᐊᖅᑕᒥᓂᒃ ᐊᓂᒍᐃᒐᒥ.

ᐃᖅᑲᓇᐃᔭᖅᑎᓪᓗᒍ ᓄᑲᑉᐱᐊᑦ ᓂᕕᐊᖅᓵᓪᓗ ᑲᑎᙵᕕᖓᓂ, ᐊᖓᔪᖓ ᐊᐱᕆᓚᐅᖅᓯᒪᕗᖅ ᐱᓕᕆᖃᑎᖃᕈᓐᓇᕐᒪᖔᕐᒥᓂᒃ ᐹᔨᙳᖅᐸᓪᓕᐊᔪᒥᒃ 15-ᓂᒃ ᐅᑭᐅᓕᖕᒥᒃ. ᐃᖅᑲᓇᐃᔭᕆᐊᖃᑎᒋᓪᓗᓂᐅᒃ ᐊᒻᒪ ᐅᓪᓚᑲᑕᒃᑎᓪᓗᒍ, ᐅᖃᓚᐅᖅᐳᖅ ᐅᓐᓄᐊᓕᒫᖅ ᐃᒥᓚᐅᕐᓂᕋᖅᖢᓂ. ᐹᔨᙳᕈᒪᓕᓚᐅᕐᓯᒪᔫᒃ ᐊᒻᒪ ᐃᓕᑦᑎᓪᓗᓂ ᑕᐃᒪᐃᓕᐅᕆᐊᖃᙱᓐᓂᕐᒥᒃ. ᑕᐃᑲᙵᑦ, ᐊᔪᕆᖅᓲᔾᔨᓕᓚᐅᖅᓯᒪᕗᑦ ᐊᕐᕌᒍᒐᓴᖕᓄᑦ, ᐱᓕᒻᒪᒃᓴᖃᑎᒋᓪᓗᓂᐅᒃ ᓄᑲᑉᐱᐊᑦ ᓂᕕᐊᖅᓵᓪᓗ ᑲᑎᙵᕕᖓᓂ, ᒪᓐᑐᕆᐊᓕᐊᕈᔾᔭᐅᓪᓗᓂ ᐱᓕᒻᒪᒃᓴᕆᐊᖅᑐᖅᖢᓂ ᑲᒪᔨᒋᔭᐅᔪᒥᒃ ᑕᓪᓕᒪᐃᖅᓱᖅᖢᓂ ᐱᙳᐊᕕᒡᔪᐊᖃᑕᐅᓚᐅᖅᓯᒪᔪᒥᒃ, ᑲᓇᑕᒥ ᐱᙳᐊᕕᒡᔪᐊᖃᑕᐅᓚᐅᖅᓯᒪᔪᖅ. ᐃᑲᔪᖅᐸᓚᐅᖅᐸᖏᑦ ᐃᓕᓐᓂᐊᕈᑎᖏᓐᓂᒃ ᐃᓱᓕᑦᑎᓇᓱᖕᓂᖓᓂ ᐃᓕᓐᓂᐊᕐᕕᐊᓗᖕᒥ ᐊᒻᒪ ᑲᓇᑕᒥ ᓄᑲᖅᖠᕐᓄᑦ ᓵᓚᖃᓛᖑᓪᓗᓂ ᒍᕇᑯᒥ, ᓯᐅᓪᕗ Freestyle-ᒥ, ᐊᒥᐊᓕᑲᒥ ᒍᕇᑯ ᓵᓚᖃᓛᖑᓪᓗᓂ ᐊᒻᒪ ᐊᑕᐅᓯᕐᒥ ᐱᙳᐊᖃᑕᐅᙱᖦᖢᓂ ᐊᒥᐊᓕᑲᒥᐅᓄᑦ ᐃᓄᑐᐃᓐᓇᕐᓄᑦ ᐱᙳᐊᕐᓂᐅᔪᓂ ᐊᒥᐊᓕᑲᐃᑦ ᓄᓇᖓᓐᓂ ᑭᐱᙳᐃᔭᖅᑎᓪᓗᒍ. ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᓯᒪᔪᖅ ᐅᐊᔭᓕᕆᔨᐅᓪᓗᓂᓗ, ᓄᓕᐊᖃᖅᖢᓂ ᕿᑐᕐᙵᖃᖅᖢᓂᓗ ᐃᖅᑲᓇᐃᔮᖃᖅᖢᓂᓗ, ᓯᕗᓪᓕᖅᐹᖑᓪᓗᓂ ᖃᑕᙳᑎᖏᓐᓂ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᓯᒪᔪᖅ, ᐊᓈᓇᒥᓂᒃ ᑲᔪᖏᖅᓴᐃᓪᓗᓂ ᐃᓕᓐᓂᐊᕆᐊᒃᑲᓐᓂᖁᔨᓪᓗᓂ ᐊᒻᒪ ᑭᖑᓂᐊᒍᑦ ᐃᓕᑕᕆᔭᐅᔾᔪᑎᑖᖅᖢᓂ ᐊᒻᒪ ᓄᑲᖓ ᐃᓕᑕᕆᔭᐅᔾᔪᑎᑖᖅᖢᓂ. ᐃᓱᒪᓕᓚᐅᖅᐳᖅ ᖃᓄᐃᒃᑲᔭᕐᒪᖔᑦ ᐊᑕᐅᓯᐅᙱᑦᑐᒥᒃ ᓱᕈᓯᕐᒥᒃ ᐱᓇᔪᒃᑯᓂ ᐊᒻᒪ ᐃᓱᒪᒃᑯᑦ ᐊᙳᑎᑦᑎᐊᕐᓂᖅ ᑕᐃᒪᐃᓕᓚᐅᖅᐳᖅ.

ᐃᓚᖏᑦ ᐊᕝᕕᐊᕈᑕᐅᕙᒃᑐᑦ ᓵᙵᔭᖏᑦ ᐃᓚᖃᖅᐳᑦ ᐱᐅᙱᓐᓂᖏᓐᓂᒃ ᒪᒃᑯᒃᑐᑦ ᐱᙳᐊᕈᓯᖏᑦ, ᐊᖓᔪᖅᑳᕆᔭᐅᔪᑦ ᐊᔭᐅᖅᓯᕙᒃᖢᑎᒃ ᓄᑕᕋᑯᓗᖕᓂᒃ ᐱᙳᐊᖅᑎᒻᒪᕆᐅᖁᓪᓗᒋᑦ. ᐊᒃᓱᕈᕐᓇᓗᐊᖅᑎᓪᓗᒍ, ᓄᑕᖅᑲᑦ ᐱᙳᐊᖃᑕᐅᔪᓐᓇᐃᓪᓕᕙᒃᐳᑦ ᐃᓗᒥᒍᓪᓗ ᐱᔪᒃᓯᓂᖃᑦᑎᐊᕈᓐᓃᖅᐸᒃᖢᑎᒃ ᓵᓚᖃᕋᓱᒋᐊᒃᓴᖅ. ᓴᖅᑭᔮᖅᑎᒃᑲᓐᓂᕋᓱᒡᓗᒍ ᐹᔨ ᐱᙳᐊᕐᓂᐅᔪᖅ ᓄᓇᒋᔭᖓᓂ ᐊᒃᓱᕈᕐᓇᕆᕗᖅ ᐱᐅᒋᔭᐅᙱᓗᐊᕐᓂᖓᓄᑦ ᓄᓇᖓᓂ. ᐱᐅᒋᑦᑎᐊᖅᑕᖓ ᐹᔨᓂ ᐃᓚᐅᑎᑦᑎᑦᑎᐊᕐᓂᐅᔪᒥ ᐹᓂᐅᔪᒥ, ᐅᖃᖅᖢᓂᓗ ᑭᓇᑐᐃᓐᓇᖅ ᑲᔪᓯᑦᑎᐊᕈᓐᓇᕐᓂᖓᓂ, ᑎᒃᑯᐊᖅᓯᓪᓗᓂ Arizona State-ᒥ ᐹᔨᒥ ᐊᑕᐅᓯᑐᐊᕐᒥ ᓂᐅᖃᖅᑐᒥ ᑭᓯᐊᓂ ᑲᓇᑕᓕᒫᒥ ᐊᔪᙱᓛᖑᓚᐅᕐᓂᖓᓂ. ᐅᓇᑕᕐᓂᕐᒧᑦ ᐱᙳᐊᕐᓂᐅᔪᓂ ᐃᓕᖅᑯᓯᕆᔭᐅᔪᒥ, ᐊᕐᓇᓄᑦ ᐃᓚᐅᔪᒪᙱᕐᔪᐊᖅᑐᖃᕈᓐᓇᖅᐳᖅ ᐊᒻᒪ ᐃᓚᐅᔪᒪᙱᖦᖢᑎᒃ ᐊᕐᓇᓄᑦ, ᑭᓯᐊᓂ 48 ᐳᓴᓐᑎᐅᕗᑦ ᐊᕐᓇᐃᑦ ᐃᓚᐅᖃᑕᐅᔪᑦ ᐱᓕᕆᐊᒃᓴᖏᓐᓂ. ᐱᖁᑎᖃᑦᑎᐊᙱᓐᓂᖅ ᐃᓂᒃᓴᖃᑦᑎᐊᙱᓐᓂᕐᓗ ᐱᔾᔪᑕᐅᓚᐅᖅᐳᖅ ᐊᑯᓂᑲᓪᓚᒃ, ᑭᓯᐊᓂ ᐊᓂᒍᐃᓚᐅᖅᐳᑦ ᐊᐃᑦᑑᑎᒃᑯᑦ ᑮᓇᐅᔭᓂᒃ ᒪᓂᒪᑎᑦᑎᔪᒪᓪᓗᑎᒃ ᐃᓚᐅᔪᓂᒃ ᐊᑭᖃᙱᑦᑐᒥᒃ. "ᑐᓗᖅᑕᕈᑎᑕᖃᖁᙱᑕᕋ ᐃᓄᖕᓄᑦ ᖃᐅᔨᔪᓐᓇᕐᓗᑎᒃ ᑎᒥᒥᖕᓂᒃ ᐊᒻᒪ ᐃᓅᖃᑎᖃᕈᓐᓇᕐᓂᕐᒥᒃ ᑎᒥᒥᓄᑦ," ᐅᓂᒃᑳᖅᑐᖅ.

"ᑕᒪᓐᓇ ᓄᓇᖃᖅᑳᖅᑐᕕᓂᐅᓂᖅ ᑐᑭᖃᖅᐳᖅ, ᓄᓇᓕᐅᕗᖅ."

ᑲᔪᖏᖅᓴᐃᓂᕐᒧᑦ, ᐱᐅᕆᕉ ᑕᐅᑐᒃᐸᒃᐳᖅ ᓲᕐᓗ ᐃᖃᓗᒃᑑᑦᑎᐊᒥ ᐹᔨᓄᑦ, ᐊᑐᖅᐸᒃᑐᓄᑦ ᐊᙳᑎᑲᑕᖕᓂᕐᒥᒃ ᐊᓯᖏᓐᓂᒡᓗ ᐱᙳᐊᕈᓯᕐᓂᒃ ᑭᐅᓯᓇᓱᒃᖢᑎᒃ ᐃᒻᒥᓃᖃᑦᑕᕐᓂᕐᒥᒃ. ᐃᓱᒪᕗᖅ ᐊᖓᔪᖅᑳᖏᒃ ᐊᑯᓂᐊᓗᒃ ᐃᓚᐅᖃᑦᑕᖅᓯᒪᔫᒃ ᖃᓄᐃᓕᐅᖅᑎᑦᑎᓇᓱᒃᐸᒃᑐᓂᒃ, ᑲᑎᓚᐅᖅᓯᒪᓪᓗᑎᒃ ᐊᒥᐊᓕᑲᒥᐅᑦ ᐊᓪᓚᐃᑦ ᐱᙳᐊᖅᑎᖏᓐᓂᒃ, Wounded Knee 1973-ᖑᑎᓪᓗᒍ. ᐱᕈᖅᓴᐃᓪᓗᑎᒃ ᕿᑐᕐᖓᒥᓂᒃ ᓂᕆᐅᖕᓂᖃᖅᖢᑎᒃ ᐱᐅᑦᑎᐊᕋᔭᕐᓂᖏᓐᓂᒃ, ᐱᕈᖅᓴᔭᕆᐊᖃᕐᓂᖏᓐᓂᒃ ᐃᑲᔪᕈᓐᓇᖅᓯᓗᑎᒃ ᐊᓯᒥᓂᒃ ᐊᒻᒪᓗ ᑕᐅᑐᙳᐊᕐᓗᑎᒃ ᐃᑲᔪᖃᑦᑕᐅᑎᔪᓐᓇᕐᓂᕐᒥᒃ.

ᑕᐃᒃᑯᓄᖓ ᐹᔨᙳᕈᒪᔪᓄᑦ, ᐱᐅᔪᒥᒃ ᐃᓅᖃᑎᖃᖃᑦᑕᖁᔨᕗᖅ ᐊᔪᓕᕋᓗᐊᕈᕕᑦ ᖃᐅᔨᒪᓗᑎᓪᓗ ᖃᓄᖅ ᐃᑲᔪᖅᑕᐅᔪᓐᓇᕐᒪᖔᖅᐱᑦ ᐃᑲᔪᖅᑕᐅᔪᒪᓗᑎᓪᓗ ᐊᔪᕈᕕᑦ. ᐃᑲᔪᖅᑐᐃᙱᓚᖅ ᐊᑐᖅᑕᐅᕙᒃᑐᓂᒃ ᐱᙳᐊᖅᑎᓄᑦ ᐱᙳᐊᖅᑎᓂᒃ ᐸᒡᕕᓵᕆᕙᒃᑐᓂᒃ ᐱᙳᐊᖅᑎᓂᒃ ᐊᓂᒍᐃᙱᖦᖢᑎᒃ.

ᓚᑯᕌᔅᒥ ᐱᙳᐊᕈᓐᓇᙱᑎᓪᓗᒍ ᑖᒪᔅ ᐱᐅᕆᐅᒧᑦ, ᓇᓂᓯᓚᐅᖅᐳᖅ ᐱᙳᐊᕈᓯᕐᒥᒃ ᖁᕕᐊᒋᑦᑎᐊᖅᑕᒥᓂᒃ: ᐹᓂᕐᒥᒃ. ᐱᒃᑯᒥᒋᔭᐅᓪᓗᓂ ᐊᔪᙱᓛᖑᓪᓗᓂ ᑕᐃᔅᓱᒪᓂᐅᑎᓪᓗᒍ, ᒫᓐᓇ ᓯᐊᒻᒪᒃᑎᕆᕗᖅ ᖁᕕᐊᒋᔭᒥᓂᒃ ᐹᓂᕐᒥᒃ ᓄᓇᖅᑲᑎᒥᓄᑦ, ᓄᑲᕐᒥᓂ ᓴᓂᐊᓂ, ᐱᓕᕆᐊᖃᖅᖢᓂ ᑲᒪᒋᔭᖃᕐᓂᕐᒥᒃ ᑭᖑᕚᕇᓄᑦ ᐊᒃᓱᕈᕐᓇᖅᑐᒃᑰᕈᑕᐅᕙᒃᑐᓂᒃ. ᐊᑭᖃᙱᑦᑐᒥᒃ ᐱᙳᐊᕐᓂᕐᒧᑦ ᐱᓕᕆᐊᒃᓴᖃᖅᑎᑦᑎᓪᓗᑎᒃ ᑭᒃᑯᓕᒫᓄᑦ ᐃᓚᐅᔪᒪᔪᓄᑦ, ᒪᕐᕉᒃ ᐹᔩᒃ ᓵᓚᖃᕋᓱᐊᖅᑑᒃ ᐱᓕᕆᐊᖃᖅᐳᑦ ᓄᓇᓕᖕᓂ ᑲᑎᙵᓗᑎᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.