ᓇᓂᓯᔪᖃᑐᐃᓐᓇᕆᐊᓕᒃ ᐋᒻᐳ ᓵᓐᑎ ᕿᑐᒻᒪᒃᓴᐃᓪᓗᓂ ᐊᒥᕐᓂᒃ ᑐᕌᓐᑐᒥ ᓲᖃᐃᒻᒪ ᐊᒃᑐᐊᖃᑦᑕᐅᑎᓂᖅ ᐊᖅᑯᑎᐅᖕᒪᑦ ᓄᓇᖃᖅᑳᖅᓯᒪᔪᑦ ᐃᓐᓇᑐᖃᖏᓐᓄᑦ ᒪᒃᑯᒃᑐᓄᓪᓗ ᐊᖅᑯᑎᐅᓪᓗᓂᓗ ᑐᙵᑦᑎᐊᖏᓐᓇᕐᓂᕐᒧᑦ ᐱᓕᕆᓐᓇᕐᔪᐊᖅᑐᓂ ᓄᓇᓕᐸᐅᔭᕐᒥ.  ᐅᒃᐱᕈᓱᒃᐳᖅ ᓄᓇᖃᖅᑳᖅᓯᒪᔪᑦ ᐃᓄᐃᑦ ᖃᐅᔨᓴᖅᑎᒻᒪᕆᐅᓂᖏᓐᓂᒃ ᐊᒻᒪ ᐱᓕᕆᓲᖑᓂᖏᓐᓂᒃ ᐃᓚᓕᐅᔾᔨᓇᓱᒃᖢᑎᒃ ᒪᕐᕉᖕᓂᒃ ᖃᐅᔨᒪᔭᒥᓂᒃ ᐱᓕᕆᐊᒃᓴᖃᖅᑎᓪᓗᒍ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᓐᓂᒃ ᐊᒻᒪ ᖃᐅᔨᓴᖅᑐᓕᕆᓂᕐᒥᒃ ᑐᓴᐅᒪᑎᑦᑎᔨᐅᓪᓗᓂ ᕋᐃᐅᓴᓐ ᓯᓚᑦᑐᖅᓴᕐᕕᒡᔪᐊᕐᒥ.

"ᓄᓇᒦᖃᑕᐅᒋᐊᒃᓴᖅ ᐊᓕᐊᓇᐃᒋᑦᑎᐊᖅᑕᕋ ᐊᒻᒪ ᓄᓇᒥ ᐃᓕᓐᓂᐊᕆᐊᒃᓴᖅ ᐊᓕᐊᓇᐃᒋᑦᑎᐊᖅᑕᕋ ᐊᒻᒪ ᐊᖑᓇᓱᒋᐊᕆᐊᒃᓴᖅ ᐅᕝᕙᓘᓐᓃᑦ ᐊᖑᓇᓱᒋᐊᕈᓐᓇᖅᖢᖓ ᐊᕐᕌᒍᑕᒫᑦ, ᐅᕙᓐᓄᑦ ᐱᕐᔪᐊᖑᖕᒪᑦ. ᑕᒪᓐᓇ ᐃᑲᔪᖅᐸᒃᐳᖅ ᐅᕙᓐᓂᒃ ᐱᐅᓂᖅᓴᒥᒃ ᐃᓅᓂᕐᒥᒃ ᓄᓇᓕᐸᐅᔭᕐᒥ ᑭᓱᓂᒡᓗ ᐱᓕᕆᔪᖃᖅᐸᓪᓕᐊᖕᒪᖔᑦ," ᑕᐃᒪᓐᓇ ᓵᓐᑎ ᐅᖃᖅᖢᓂ.

ᐃᓚᒋᔭᐅᔪᖅ ᓯᐴᕙᔅᒧᑦ ᓇᕙᔅ ᓄᓇᖃᖅᑳᖅᓯᒪᔪᓂᑦ ᑭᓯᐊᓂ ᐱᕈᖅᓴᓯᒪᔪᖅ ᓂᕿᓕᐅᕐᕕᖕᒥ−ᐃᒪᕐᓗᒥ. ᓵᓐᑎ ᑐᕌᓐᑐᒥᐅᑕᐅᓯᒪᓕᖅᑐᖅ ᐊᕐᕌᒍᓄᑦ 12-ᓄᑦ ᖃᐅᔨᒪᓪᓗᓂᓗ ᓅᓐᓂᐅᔪᖅ ᓄᓇᓕᐸᐅᔭᕐᒧᑦ ᐃᓄᑑᑎᑕᐅᔪᓐᓇᕐᒪᑦ. 

ᑕᐃᒪᐃᒻᒪᑦ ᐅᖃᖅᐳᖅ ᐊᓯᒥᓄᑦ ᕿᓂᖁᓪᓗᒋᑦ ᓄᓇᓕᖕᓂ, ᐊᑭᓯᕐᒥᐅᑕᐅᒐᓗᐊᖅᐸᑕ ᐅᕝᕙᓘᓐᓃᑦ ᓄᓇᖃᖅᑳᖅᓯᒪᔪᑦ ᓄᓇᓕᖕᓂ ᐱᓕᕆᑎᑦᑎᑎᓪᓗᒋᑦ, ᑲᑎᖃᑎᖃᕐᓂᖅ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ ᐱᒻᒪᕆᐅᕗᖅ. 

"ᐊᒃᓱᕈᕐᓇᖅᑐᖅ ᓄᓇᔅᓯᓐᓂ ᕿᒪᐃᔭᕆᐊᒃᓴᖅ ᓲᖃᐃᒻᒪ ᐱᖃᓐᓇᕆᔭᓕᒫᑎᑦ ᐃᓚᑎᓪᓗ ᑕᐃᑲᓃᒻᒪᑕ, ᑕᒪᕐᒥᑦᑎᐊᕐᓗ ᐃᓄᐃᑦ ᑐᑭᓯᐅᒪᔪᑦ ᐊᔾᔨᒌᓂᒃ ᐃᓕᖅᑯᓯᑦᑎᓐᓂᒃ ᓇᑭᙶᖅᓯᒪᓂᑦᑎᓐᓂᒃ, ᑕᒻᒪᙱᖦᖢᑎᒃ? ᑕᐃᒪᐃᓐᓂᖓᓄᓪᓗ ᑕᒪᓐᓇ ᐱᒻᒪᕆᐊᓘᕗᖅ," ᑕᐃᒪᓐᓇ ᓵᓐᑎ ᐅᖃᖅᖢᓂ. 

ᓯᕗᓪᓕᖅᐹᒥ ᓄᓇᓕᐸᐅᔭᕐᒨᕆᐅᓚᐅᖅᑐᖅ ᑲᓇᑕᒥ ᐱᐅᓯᕆᔭᐅᕙᓚᐅᖅᑐᓂᒃ ᑐᕌᓐᑐᒥ ᓯᓚᑦᑐᓴᕐᕕᕐᔪᐊᖓᓂ ᑭᓯᐊᓂ ᓯᓚᑎᑦᑎᓃᙶᖅᑐᑎᑐᑦ ᖁᕕᐊᓇᙱᑦᑐᒻᒪᕆᐅᓚᐅᕐᒪᑦ. ᓵᓐᑎ ᓄᓇᖃᖅᑳᖅᑐᑐᐊᖑᖅᑰᔨᖃᑦᑕᓚᐅᖅᐳᖅ ᐃᓚᖏᓐᓂ ᐃᓕᓐᓂᐊᖅᑕᖏᓐᓂ ᐃᓕᓴᐃᔨᖏᓪᓗ ᖃᐅᔨᒪᓇᔭᖅᖢᑎᒃ ᓄᓇᖃᖅᑳᖅᓯᒪᔪᑦ ᐱᐅᓯᕆᕙᓚᐅᖅᑕᖏᓐᓂᒃ. 

ᐊᒻᒪᓗ ᐃᓕᓐᓂᐊᖅᑐᓂ ᓇᒻᒥᓂᖅ ᐃᓚᒌᑦ ᖃᓄᐃᓕᐅᖃᑦᑕᖅᓯᒪᓂᖓᓂᒃ ᐅᖁᒪᐃᑦᑑᓚᐅᖅᑐᖅ ᓇᓄᕐᒧᑦ. 

"ᐊᒃᓱᕈᕐᓇᖅᑐᖅ ᐃᓕᑦᑎᕚᓪᓕᕐᓇᓚᐅᖅᑐᖅ ᖃᓪᓗᓈᖑᖃᑎᒌᓂᒃ ᐊᒻᒪ ᖃᓄᐃᓕᐅᓚᐅᕐᒪᖔᑕ ᓄᓇᓕᕗᑦ ᐊᒻᒪ ᐃᓕᓐᓂᐊᒃᑲᓐᓂᖅᖢᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᒃ ᐊᒻᒪ ᖃᓄᐃᓕᓚᐅᕐᒪᖔᑦ ᐊᓈᓇᑦᑎᐊᕋ ᐊᑖᑕᒐᓗ ᐊᓯᖏᓪᓗ," ᓵᓐᑎ ᐅᖃᖅᑐᖅ. "ᐊᒃᓱᕈᕐᓇᖅᑐᒻᒪᕆᐅᓕᓚᐅᖅᑐᖅ."

ᓄᖅᑲᑐᐃᓐᓇᖅᐸᓚᐅᖅᑐᖅ ᐊᒻᒪᓗ ᐅᖃᖅᑐᓂ ᐃᓅᓇᓱᓐᓂᐅᑉ ᐊᑭᖓ ᐱᔾᔪᑕᐅᓂᕋᑦᑐᓂᐅᒃ. ᓵᓐᑎ ᐅᖃᖅᖢᓂ ᑐᑭᓯᓂᕐᓗᒃᑕᐅᓯᒪᓂᕋᐃᓪᓗᓂ ᑲᓇᑕᒥ ᐃᓅᖃᑎᒌᓂᒃ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᖏᑦ ᐊᑭᓕᖅᓱᖅᑕᐅᔪᐃᓐᓇᐅᖕᒪᑕ. ᑭᓯᐊᓂᓕ ᐃᒪᐃᓕᖓᕗᖅ ᐊᒥᓱᑦ ᐃᖅᑭᓖᑦ ᑮᓇᐅᔭᖅᑖᕈᓯᐊᖏᑦ ᐊᑭᑦᑐᕋᐅᑎᔪᒻᒪᕆᐅᒻᒪᑕ ᐊᒻᒪ ᐃᓚᖏᑦ ᐃᓕᓐᓂᐊᖅᑏᑦ ᐊᔅᓱᕈᖅᐸᒻᒪᑕ ᑮᓇᐅᔭᖅᑖᕋᓱᐊᖅᑐᑎᒃ.

ᑭᓯᐊᓂ ᐊᖅᑯᑎᒋᔭᖓ ᐃᖅᑲᓇᐃᔭᕈᓐᓇᖅᓯᓚᐅᖅᐳᖅ ᓄᓇᓕᖕᓂ ᑐᓴᐅᒪᑎᑦᑎᔨᓂᒃ ᐊᒻᒪ ᐊᖅᑯᑎᒃᓴᖓ ᐋᖅᑭᒃᖢᓂᐅᒃ ᒫᓐᓇ. ᐊᒻᒪᓗ ᐱᒃᑯᒥᒋᔭᐃᓐᓇᕆᕙᖏᑦ ᐊᔪᕐᓂᕆᔭᖏᑦ ᐊᔪᕈᓐᓃᖅᓯᒪᔭᒥᓄᑦ.

"ᑕᒪᒃᑯᐊ ᐊᖅᑯᓵᕈᓐᓇᖅᑕᑎᑦ ᑭᓱᑐᐃᓐᓇᑦ ᐱᐅᙱᑦᑕᕌᖓᑕ ᐱᓕᕆᙱᖦᖢᑎᓪᓗ ᓇᒡᓕᒋᔭᕐᓂᒃ, ᑭᓯᐊᓂ ᐊᒃᓱᕈᕐᓗᑎᑦ ᐱᓕᕆᑐᐊᕈᕕᑦ ᑲᔪᓯᓗᑎᓪᓗ, ᑐᕌᒐᖃᐃᓐᓇᕐᓗᑎᓪᓗ, ᑕᐃᑯᙵᓛᖅᐳᑎᑦ," ᓵᓐᑎ ᐅᖃᖅᐳᖅ. 

ᐃᖅᑲᓇᐃᔭᓚᐅᖅᓯᒪᔪᖅ ᑐᕌᓐᑐ Zoo-ᒥ ᐊᒻᒪᓗ ᑭᓱᑐᐃᓐᓇᐃᑦ ᐃᓱᓕᑦᑎᐊᖏᒃᑲᓗᐊᖅᑎᓪᓗᒋᑦ, ᓵᓐᑎ ᑐᓵᓕᓚᐅᖅᑐᖅ ᐅᓂᒃᑳᖅᑐᓂᒃ ᑐᐱᐅᔭᕐᓂᒃ ᐊᒻᒪᓗ ᐱᔭᐅᓂᑯᓂᒃ ᓄᓇᓕᓐᓂ ᐃᓄᑐᖃᕐᓂᒃ. ᐃᖅᑲᓇᐃᔭᖃᑦᑕᓚᐅᕐᒥᔪᖅ ᓄᓇᓕᓐᓂ ᑐᓴᐅᒪᑎᑦᑎᔨᐅᓪᓗᓂ ᐃᓐᓇᑐᖃᕐᓂᒃ ᐊᒻᒪᓗ ᐃᓐᓇᑐᖃᕐᓂᒃ ᐃᓕᓐᓂᐊᑲᓐᓂᑎᑦᑎᓪᓗᓂ ᑕᑯᔭᒐᖃᕐᕕᐅᔪᓂᒃ ᐊᒻᒪᓗ ᐊᓯᖏᓐᓂᒃ ᓄᐊᑕᐅᓯᒪᔪᓂᒃ. 

ᐊᒻᒪ ᓵᓐᑎ ᐱᓕᕆᖃᑎᖃᓚᐅᕆᕗᖅ ᓯᕗᓪᓕᖅᐹᒥ ᐅᓂᒃᑳᕐᒥ ᑐᕌᓐᑐᒥ ᓴᖅᑭᑦᑎᓇᓱᒃᖢᓂ ᐱᓕᕆᔾᔪᑎᒥᒃ ᑕᑯᒃᓴᐅᑎᑦᑎᔪᒥᒃ ᓄᓇᖃᖅᑳᖅᓯᒪᔪᑦ ᐱᐅᓯᕆᕙᓚᐅᖅᑕᖏᓐᓂᒃ ᐊᒻᒪ ᓇᓃᓐᓂᖏᓐᓂᒃ ᓄᓇᓕᐸᐅᔭᕐᒥ. 

"ᑖᒃᑯᐊ ᐅᓂᒃᑳᖅᑐᐊᑦ ᐃᓕᑉᐸᓪᓕᐊᓪᓗᒋᑦ ᐃᓐᓇᕐᓂᒃ ᑕᑯᓪᓗᖓᓗ ᖃᓄᑎᒋ ᖃᐅᔨᓴᖅᑐᓕᕆᓂᕐᒥᒃ ᐱᑕᖃᓚᐅᕐᒪᖔᑦ ᖃᐅᔨᒪᔭᑦᑎᓐᓂ, ᐱᔪᒃᓯᑦᑎᐊᓚᐅᖅᐳᖓ ᐱᓕᕇᓐᓇᕆᐊᒃᓴᖅ ᑖᒃᑯᓂᖓ ᐱᓕᕆᐊᓂᒃ ᑕᒪᓐᓇᓗ ᐊᒃᓱᕉᑎᖃᕈᑎᒋᓯᒪᓪᓗᒍ ᐊᓯᓐᓂᒃ ᑐᓴᖅᑎᑦᑎᒋᐊᒃᓴᖅ," ᐅᖃᓚᐅᖅᐳᖅ ᓵᓐᑎ. 

ᐅᓂᒃᑳᒥᓂᒃ ᑕᑯᑎᑦᑎᖁᒐᓗᐊᖅᐳᖅ ᒪᒃᑯᒃᑐᓂᒃ ᐃᓕᓐᓂᐊᕐᓂᖅ ᑐᑭᓕᐊᖏᓐᓇᐅᔭᙱᒻᒪᑦ ᐊᒻᒪ ᐊᒥᓱᓂᒃ ᐱᕚᓪᓕᕈᓐᓇᖅᖢᓂ ᓈᓚᖕᓂᒃᑯᑦ ᓄᓇᓕᖕᓄᑦ ᐊᒻᒪ ᐃᓐᓇᕐᓄᑦ. ᓵᓐᑎ ᐅᖃᖅᖢᓂ ᑲᑎᒪᓂᖕᒧᑦ ᑲᓱᖃᑎᒌᖕᓃᑦ ᑐᓴᐅᒪᖃᑎᒌᖕᓂᓪᓗ ᓯᓚᑦᑐᖅᓴᕐᕕᒡᔪᐊᒥᑦ ᐊᑑᑎᖃᒻᒪᕆᓚᐅᖕᒥᔪᖅ.

ᓵᓐᑎ ᐅᖃᖃᑎᖃᕆᐊᖃᓚᐅᖅᑐᖅ ᒪᒥᓴᐃᔨᒥᑦ ᐱᒻᒪᕆᐅᓯᒪᔪᖅ ᐃᓱᒪᖓᓄᑦ ᐊᒻᒪ ᑎᓕᐅᕆᔪᒪᓪᓗᓂ ᐊᓯᒥᓂᑦ ᐆᑦᑐᖁᔨᓪᓗᓂ ᑭᖑᕚᕇᓄᑦ ᖁᐊᖅᓵᖓᓇᖅᑐᒃᑰᖅᓯᒪᓂᖓᓄᑦ. ᐃᖅᑭᓕᖕᓄᑦ ᐃᓄᖕᓄᑦ ᖃᓄᐃᓕᖓᓂᓕᖕᓄᑦ, ᐅᕝᕙᓘᓐᓃᑦ ᐃᓄᐃᑦ ᓄᓇᑖᖃᑕᐅᓯᒪᔪᑦ, ᒪᒥᓴᖅᑎᑦᑎᓃᑦ ᐃᓚᓕᐅᔾᔭᐅᓯᒪᕗᑦ ᓇᓪᓕᐅᒃᑯᒫᖃᙱᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᕚᓪᓕᕈᑕᐅᕙᒃᑐᓄᑦ ᐱᕙᒌᔭᖅᑕᐅᓯᒪᔪᒧᑦ.

"ᐅᔾᔨᕈᓱᓚᐅᖅᓯᒪᙱᑦᑐᖓ ᖃᓄᖅ ᐊᓈᓇᑦᑎᐊᕋ ᐃᓕᓐᓂᐊᕆᐊᖅᑎᑕᐅᕙᓚᐅᕐᒪᖔᑦ ᐊᑖᑕᒐᓗ ᐃᖅᑭᓕᖕᓄᑦ ᐃᓕᓐᓂᐊᕆᐊᖅᐸᒃᖢᖓ ᐅᕙᓐᓂᒃ ᐊᒃᑐᐃᖃᑦᑕᖅᓯᒪᖕᒪᑦ. ᑭᓯᐊᓂ ᒫᓐᓇ ᑕᒪᓐᓇ ᐅᖃᐅᓯᕆᔭᐃᓐᓇᕆᓯᒪᓕᕋᒃᑯ ᐃᓕᑦᑎᕚᓪᓕᖅᑐᖓᓗ, ᑕᑯᕙᒃᑲ ᑕᒪᒃᑯᐊ ᐊᒃᑐᐃᓂᐅᔪᑦ ᐱᒻᒪᕆᐅᓪᓗᓂᓗ ᓯᕗᓂᑦᑎᓐᓂᑦ ᖃᓄᐃᙱᑦᑎᐊᖕᓂᖏᓐᓄᑦ ᐃᓚᒃᑲ, ᐅᕙᖓᑦᑕᐅᖅ, ᑲᒪᒋᓂᐊᕐᓗᒋᑦ ᑕᒪᒃᑯᐊ," ᐅᖃᖅᑐᕕᓂᖅ ᓵᓐᑎ. 

ᖁᔭᓐᓇᒦᒃ ᐋᔅᑳᕐ ᖃᒪᓂ'ᑐᐊᕐᒧᑦ III−ᒧᑦ ᑎᑎᕋᓚᐅᕐᓂᖏᓐᓄᑦ ᑖᔅᓱᒥᖓ ᓂᐱᙵᑕᕐᒥᒃ.