"ᐃᓅᓯᖅ ᑎᑭᐅᑎᕙᓪᓕᐊᑦᑎᐊᖅᑐᖅ ᐱᓕᕆᓇᓱᐊᖅᑎᓪᓗᑎᑦ ᑐᕌᒐᕆᔭᕐᓄᑦ," ᐊᐃᒥ ᔮᒃᓴᓐ ᓴᖅᑭᔮᖅᑎᑦᑎᔪᖅ. ᐃᓅᓯᖅ ᑎᑭᐅᑎᕙᓪᓕᐊᒐᓗᐊᖅᑎᓪᓗᒍ, ᑎᑭᐅᑎᒍᓐᓇᓚᐅᖅᑐᖅ ᑐᕌᒐᖏᓐᓄᑦ ᐊᒻᒪᓗ ᓯᓐᓇᑦᑑᒪᒋᔭᖏᑦ ᑲᔪᓯᑎᒐᓱᐊᖅᓱᓂᒋᑦ. ᔮᒃᓴᓐ, ᐱᒋᐊᖅᑎᑦᑎᓚᐅᖅᑐᖅ ᓄᓇᖃᖅᑳᖅᓯᒪᔪᓂᑦ ᓚᕝ ᑎᑎᕋᖅᑕᖏᓐᓂᒃ, Opaskwayak Cree Nation-ᑯᓐᓂᙶᖅᑐᖅ, ᓄᓇᖃᖅᖢᓂ ᐊᐃᐸᐃᒥ ᐊᑕᐅᓯᕐᒥᒃ ᐅᑭᐅᖅᑕᖅᑐᒥ, ᐅᐃᓂᐹᒡᒥ, ᒫᓂᑑᐸᒥ ᐊᒻᒪ ᐱᓕᕆᖃᑎᖃᓚᐅᖅᖢᓂ ᐅᑭᐅᖅᑕᖅᑐᒥ ᑲᑎᙵᖃᑎᖃᖅᖢᓂ ᐅᓂᒃᑳᕆᐊᖅᑐᖅᖢᓂ ᓂᐱᑦᑕᖅᑐᒥᒃ ᐃᓚᒋᔭᐅᓪᓗᓂ ᐅᖃᐅᓯᖃᖅᖢᓂ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ ᐊᒻᒪ ᐱᒻᒪᕆᐅᓂᖓᓂᒃ ᓴᓇᐅᒐᓕᕆᓂᖅ ᐊᒻᒪ ᑎᔅᓯᓈᕿᖃᑦᑕᕐᓂᖅ ᒪᒥᓴᕐᓂᕐᒥᒃ. ᐃᓕᓴᐃᖃᑦᑕᖅᑎᓪᓗᒍ ᐃᓕᓐᓂᐊᕐᕕᐊᕈᓯᕐᒥ ᔮᒃᓴᓐᒥ ᐃᓕᑕᕆᔭᐅᔾᔪᑎᑖᖅᓯᒪᖕᒥᔪᖅ ᐃᓕᓐᓂᐊᖅᑎᐅᓪᓗᓂ, ᐃᓕᑕᕆᔭᐅᔾᔪᑎᑖᕋᓱᒃᖢᓂ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑕᐅᖃᑦᑕᕐᓂᑯᓂᒃ ᑲᒪᒋᔭᖃᓪᓗᐊᑕᖅᖢᓂ ᐱᐅᓯᕆᔭᐅᕙᓚᐅᖅᑐᓂᒃ, BA−ᒥ ᐱᕈᖅᑎᑦᑎᕙᓪᓕᐊᓪᓗᓂ ᐱᐅᓯᕆᔭᐅᕙᓚᐅᖅᑐᓂᒃ. 

ᓂᐱᑦᑕᖅᑐᑦ ᐊᑐᖃᑦᑕᖅᑕᖏᑦ ᐅᓂᒃᑳᖅᑎᓪᓗᒍ ᓇᖕᒥᓂᖃᖅᑎᐅᓂᕐᒧᑦ ᐃᖏᕐᕋᓂᕆᔭᖓᓂᙶᖅᑐᖅ ᓴᖅᑭᓚᐅᖅᑐᖅ ᓄᓇᕐᔪᐊᒥ ᖃᓂᒻᒪᒍᑕᐅᕙᓪᓕᐊᑎᓪᓗᒍ. ᑎᔅᓯᓈᕿᔪᓂᒃ ᓴᓇᓚᐅᖅᑐᖅ ᐱᖃᓐᓇᕆᔭᒥᓄᑦ ᑐᓴᖅᑎᑦᑎᔪᒪᓪᓗᓂ ᐃᒡᓚᖃᑦᑕᐅᑎᔪᓐᓇᕐᓂᐊᕐᒪᑕ. ᐅᖃᖅᑐᖃᖅᑲᐅᒻᒪᑦ ᓂᐱᑎᒐᓕᐅᖃᑦᑕᕐᓂᕋᖅᑐᓂ ᐊᒻᒪᓗ ᒫᓐᓇ 100-ᓂᒃ ᐊᔾᔨᒌᙱᑦᑐᓂᒃ ᐱᖁᑎᖃᓕᖅᑐᖅ ᓴᓇᕕᒻᒥᓂ. "ᑕᖅᑭᒥᑦ ᑎᑎᕋᖅᐸᓪᓕᐊᓪᓗᖓ ᓯᕗᓪᓕᖅᐹᓂᑦ ᓂᐱᑦᑕᖅᑐᓂᑦ, ᓂᐅᕕᕐᕕᖃᓚᐅᖅᑐᖓ ᐅᓪᓚᒃᖢᖓᓗ, ᑭᓱᑐᐃᓐᓇᐃᓪᓗ ᐲᖅᓯᒪᑐᐃᓐᓇᖅᖢᑎᒃ ᑕᐃᒪᙵᓂᑦ," ᐊᓂᐊᕕᖏᑦ. 

ᖁᕕᐊᒋᔭᖃᖅᑐᖅ ᐱᓕᕆᖃᑎᖃᕆᐊᑦᓴᖅ ᓄᑕᖅᑲᕐᓂᑦ ᐊᖅᑯᑕᐅᓪᓗᓂ ᑲᓲᑎᓂᖅ ᐅᑭᐅᖅᑕᖅᑐᒥᑦ, ᑎᔅᓯᓈᕿᓂᖏᑦ, ᐸᑎᖏᑦ ᓴᓇᑐᓂᖏᓪᓗ. "ᐱᕕᖃᖅᑎᓪᓗᒋᑦ ᐃᓱᒪᒃᓴᖅᓯᐅᕈᓐᓇᑦᑎᐊᕐᓂᕐᒥᑦ ᐲᕐᓯᓗᑎᒃᓗ.  ᖁᕕᐊᓇᖅᑐᖅ," ᐅᖃᖅᐳᖅ. ᖁᕕᐊᒋᔭᖃᖅᑎᓪᓗᒍ ᐃᑲᔪᕆᐊᒃᓴᖅ ᐃᓕᓐᓂᐊᕐᕕᐊᕈᓯᕐᒧᑦ, ᐅᖓᕙᕆᐊᖅᑎᑦᑎᓪᓗᓂ ᓯᓚᑦᑐᖅᓴᕐᕕᒃᔪᐊᓕᐊᕆᐊᒃᓴᖅ 28−ᖑᕋᓱᖕᓂᖓᓂ ᐊᓯᔾᔨᑐᐃᓐᓇᕆᐊᖃᓕᕐᖢᓂᓗ. ᐃᓕᓐᓂᐊᕕᔾᔪᐊᒥ ᐃᓕᓐᓂᐊᖅᑎᓪᓗᒍ, ᐊᒥᓱᓂᒃ ᐊᒃᓱᕈᕐᓇᖅᑐᓂᒃ ᓵᓐᖓᑦᑎᓚᐅᖅᑐᖅ ᑭᓯᐊᓂ ᖁᑦᑎᓂᖅᐹᒧᑦ ᐃᓕᓐᓂᐊᓚᐅᖅᑐᖅ ᑮᓇᐅᔭᖃᖅᑎᑕᐅᓪᓗᓂ ᐊᒻᒪᓗ ᖁᔭᓕᔪᒻᒪᕆᐅᓪᓗᓂ ᐱᕕᒃᓴᖃᑦᑎᑕᐅᓂᖓᓄᑦ. 

ᓄᑲᖅᖡᑦ ᐃᓕᓐᓂᐊᕐᕕᖓᓃᖃᑦᑕᖅᑎᓪᓗᒍ ᐊᒃᓱᕈᕐᓇᓚᐅᕐᒥᔪᖅ. ᓲᖑᓴᖃᑦᑕᕐᓂᖅ ᑲᒪᒋᖃᑦᑕᓚᐅᖅᑕᖓ, ᓵᓚᒋᓇᓱᒃᖢᓂᐅᒃ ᐊᒻᒪ ᐊᖏᕐᕋᒥᓂᒃ ᐃᓅᑎᓪᓗᒍ ᐊᔪᕐᓇᓚᐅᖅᐳᖅ, ᐊᖓᔪᖅᑳᒥᓄᑦ ᐱᕈᖅᓴᓪᓗᓂ ᐊᔪᖅᓴᕈᓐᓃᖅᓯᒪᔪᓄᑦ ᐊᓈᓇᖓᓗ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ. ᑖᒃᑯᐊ ᐊᔪᕐᓇᖅᑐᖅᓯᐅᕈᑕᐅᓲᑦ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐊᒃᓱᕈᕐᓇᖅᑐᖅᓯᐅᕈᑕᐅᓚᐅᖅᐳᑦ, ᐃᓕᓐᓂᐊᕐᕕᖕᒧᐊᓚᐅᖅᓯᒪᓪᓗᓂᓗ ᓴᓇᙳᐊᕐᓂᕐᒧᑦ ᐃᓕᓐᓂᐊᕆᐊᕈᓐᓇᕐᓂᐊᕐᒪᑦ ᐃᓕᓐᓂᐊᖅᑕᖏᑦ ᖁᕝᕙᕆᐊᖅᑎᖦᖢᒋᑦ. ᐊᓂᒍᐃᓚᐅᖅᑐᖅ ᐃᖅᑲᓇᐃᔭᓕᕐᖢᓂᓗ ᐃᑲᔪᕐᖢᓂ ᐃᖕᒥᓂᒃ. 

23-ᖑᑎᓪᓗᒍ, ᐃᖅᑲᓇᐃᔭᖅᑎᑕᐅᓕᓚᐅᖅᑐᖅ ᒪᓕᒐᓕᐅᖅᑎᕐᔪᐊᓄᑦ, ᓂᑭ ᐋᔅᑕᓐ, ᐃᖅᑲᓇᐃᔭᖁᔭᐅᓪᓗᓂ ᐊᓪᓚᕝᕕᖓᓂ. ᑕᐃᒪᐃᓚᐅᖅᑐᖅ ᐊᕐᕌᒍᓄᑦ ᖁᓕᓄᑦ ᐊᒻᒪᓗ ᓱᓕ ᐃᖅᑲᓇᐃᔭᖅᑐᓂ ᐃᓛᓐᓂᒃᑯᑦ ᑳᓐᑐᕌᑎᒍᑦ. 12-ᖏᓐᓂ ᐃᖅᑲᓇᐃᔭᓚᐅᖅᑐᖅ ᑲᑎᒪᔨᐅᓂᕐᒧᑦ, ᐊᐅᓪᓚᖅᑐᓂ ᐊᒻᒪᓗ ᓂᔾᔭᐅᓯᔭᖅᑐᓂ. ᐊᒋᐊᒐᙳᐊᓕᐅᓚᐅᖅᑐᖅ, ᐸᓐᔫ ᐊᒻᒪ ᐱᐊᓄ, ᓂᔾᔭᐅᓯᔭᕐᓂᖓ ᓇᒥᑐᐃᓐᓈᖅᑐᓂ ᑲᓇᑕᒥ ᐊᒻᒪ ᓯᓚᕐᔪᐊᒥ. 

ᐃᖅᑲᓇᐃᔭᖅᖢᓂ ᒐᕙᒪᓕᕆᓂᕐᒥ, ᖁᕕᐊᒋᑦᑎᐊᖅᑕᖓ ᐱᓕᕆᖃᑎᖃᕐᓂᕐᒥᒃ, ᓄᒃᑕᕐᓂᕐᒥᒃ ᓄᓇᓕᖕᓄᑦ ᑲᑎᖃᑎᖃᖅᐸᒃᖢᓂᓗ ᐃᓄᖕᓂᒃ ᐅᑭᐅᖅᑕᖅᑐᓕᒫᒥ. "ᐱᐅᒋᓛᕆᓚᐅᖅᑕᕋ ᑖᒃᑯᓄᖓ ᓄᓇᓕᖕᓄᑦ, ᑲᑎᒪᖃᑎᖃᕐᓂᖅ ᐃᓄᖕᓂᒃ, ᐃᒃᓯᕚᖃᑎᒋᓪᓗᒋᑦ ᑭᐳᖏᓐᓂ, ᑏᑐᖃᑎᒋᓪᓗᒋᑦ ᐳᓛᕐᓗᒋᓪᓗ ᐅᓂᒃᑳᖏᑦ ᐊᒃᓱᕈᕐᓇᖅᑐᖏᓪᓗ ᖃᐅᔨᓗᒋᓪᓗ ᖃᓄᐃᓕᐅᕈᓐᓇᕐᒪᖔᕐᒪ ᖃᓄᕐᓗ ᐃᑲᔪᕈᓐᓇᕐᒪᖔᒃᑭᑦ ᓇᒧᙵᐅᕙᓪᓕᐊᑎᓪᓗᒋᑦ ᓇᓕᐊᒃᑯᑐᐃᓐᓇᖅ ᒐᕙᒪᒃᑯᓐᓄᑦ ᐱᔨᑦᑎᕋᐅᑎᓄᓪᓘᓐᓃᑦ ᑕᐃᒪᐃᑦᑐᒐᓚᖕᓄᓪᓘᓐᓃᑦ," ᐃᖅᑲᐅᒪᔪᖅ.  

‍

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐊᐅᓪᓚᕈᒪᔪᓄᑦ ᐃᓕᓐᓂᐊᕆᐊᕐᓗᑎᒃ ᐱᕕᒃᓴᓄᓪᓘᓐᓃᑦ "ᐱᒻᒪᕆᐅᕗᖅ ᑐᙵᕕᖃᕐᓗᓂ, ᐱᖃᓐᓇᕆᔭᐅᒐᓗᐊᕈᓂ, ᐃᓚᒋᒐᓗᐊᕈᕕᐅᒃᓘᓐᓃᑦ, ᐃᓪᓗᐊᕐᔪᒋᒐᓗᐊᕈᕕᐅᒃ, ᑭᓇᒥᑭᐊᖅ ᓱᓕ ᖃᓂᒃᓴᕈᕕᑦ, ᓄᓇᓕᔅᓯᓐᓂᑦ ᑐᙵᕕᖃᑦᑎᐊᖅᑎᑦᑎᓂᐊᖅᑐᖅ ᐃᑲᔪᕐᓗᓂᓗ ᐃᖅᑲᐅᒪᓗᑎᑦ ᑭᓇᐅᖕᒪᖔᖅᐱᑦ. ᐃᓛᓐᓂᒃᑯᑦ ᐊᓯᐅᓯᒪᖅᑰᔨᖃᑦᑕᕐᓂᐊᖅᐳᑎᑦ, ᓇᓗᓗᑎᓪᓗ ᓇᖕᒥᓂᖅ ᑭᓇᐅᓂᕐᓂᒃ ᓇᓂᓗ ᐃᓂᖃᕐᒪᖔᖅᐱᑦ ᓄᓇᕐᔪᐊᕐᒥ. ᐱᖃᓐᓇᕆᔭᐃᑦ, ᐅᕝᕙᓘᓐᓃᑦ ᐃᓪᓗᐊᕐᔪᐃᑦ ᐅᕝᕙᓘᓐᓃᑦ ᓄᓇᔅᓯᓐᓂᙶᖅᑐᖅ ᐃᖅᑲᐃᓯᔭᐅᖏᓐᓇᐅᔭᕐᓂᐊᖅᑐᖅ ᑭᓇᐅᖕᒪᖔᖅᐱᑦ ᐱᒻᒪᕆᐅᒋᔭᕐᓂᒡᓗ." ᔮᒃᓴᓐᒧᑦ, ᐊᒃᑐᐊᓂᖃᖅᖢᓂ ᓄᓇᓕᖕᓄᑦ ᐱᒻᒪᕆᐅᑎᓪᓗᒍ. 

"ᒪᒥᓴᕐᓂᖅ ᓄᑕᕋᐅᑎᓪᓗᒋᑦ ᖁᐊᖅᓵᖓᓇᖅᑐᒃᑰᖅᓯᒪᔪᓂᑦ. ᐱᔭᕇᓚᐅᖅᓯᒪᖅᑰᖏᑦᑐᖅ, ᑭᓯᐊᓂ ᐱᓕᕆᔪᓐᓇᖅᑐᑎᑦ ᐃᓕᖕᓂᒃ ᐃᑲᔪᕐᓗᑎᑦ ᕿᓄᐃᓵᕋᓱᒃᓗᑎᑦ ᓴᖅᑭᒃᑲᓐᓂᖅᐸᑦ."

ᓇᒡᓕᒍᓱᑦᑎᐊᖅᖢᓂ ᐊᒻᒪ ᐃᒃᐱᒍᓱᑦᑎᐊᖅᖢᓂ ᐊᒻᒪ ᒪᒥᓴᖅᖢᓂ ᐃᑲᔪᓚᐅᖅᐳᖅ ᔮᒃᓴᓐ ᐊᓂᒍᐃᔪᓐᓇᓚᐅᕐᒪᑦ ᓄᑕᕋᐅᓂᕐᒥᓂᒃ ᐊᔪᕐᓇᖅᑐᖅᓯᐅᖅᑎᓪᓗᒍ. ᑎᓕᐅᕆᔪᖅ ᒪᒃᑯᒃᑐᓂᒃ ᐊᒃᓱᕈᖅᑐᓂᒃ ᑲᑉᐱᐊᓱᖁᙱᖦᖢᒋᑦ ᐃᓅᓕᓴᐅᑎᓂᒃ ᐱᔭᕆᐊᖃᖅᐸᑦ, ᓲᖃᐃᒻᒪ ᐃᑲᔪᕈᓐᓇᕐᒪᑦ ᐱᑕᖃᕈᓐᓃᖅᑎᓪᓗᒍ ᐅᓚᕕᑕᐅᓂᖅ ᓴᙱᔪᓂᒃ ᐃᒃᐱᖕᓂᐊᓂᕐᓂ ᑕᐅᑐᓪᓗᐊᑕᕐᓗᓂᓗ ᒪᒥᓴᕐᓂᕐᒥᒃ. ᔮᒃᓴᓐ ᒪᒥᓴᕆᐊᖃᓚᐅᕐᒥᔪᖅ ᑭᖑᓂᐊᒍᑦ ᐃᓅᓯᖓᓂ, ᓲᕐᓗ ᖁᐊᖅᓵᖅᓯᒪᓂᖅ ᓄᓇᓯᐅᑎᒃᑯᑦ ᐱᕐᕈᓗᐊᕿᑲᓴᒃᑐᒧᑦ. ᐃᓕᓐᓂᐊᖅᑕᖏᑦ ᐊᒻᒪᓗ ᐱᓕᕆᓂᖓ ᐃᑲᔪᓚᐅᖅᑐᖅ. 

ᓯᓚᑦᑐᖅᓴᕐᕕᔾᔪᐊᖅ ᓴᖅᑭᓚᐅᖅᑐᖅ ᐊᑦᓱᕉᑕᐅᔪᓂᑦ ᔮᒃᓴᓐ ᐃᓱᒪᓕᕆᓂᕐᒧᑦ ᐃᓄᑑᓗᐊᖅᑑᔮᕋᓂᓗ. "ᑭᓇᑐᐃᓐᓇᖅ ᓯᓚᑦᑐᖅᓴᕐᕕᒡᔪᐊᒥ ᖃᐅᔨᒪᔪᖓ ᐊᒃᓱᕈᖃᑦᑕᕐᓂᖓᓂᒃ ᑕᖃᓂᕐᒧᑦ. ᐃᓛᓐᓂᒃᑯᑦ ᐅᖁᒪᐃᓗᐊᓕᕈᓐᓇᕐᒪᑦ ᐊᐅᓚᔾᔭᒍᑕᐅᔪᓐᓇᒻᒪᕆᖕᒪᑦ... ᓄᑕᐅᙱᑦᑐᑦ ᖁᐊᖅᓵᖅᓯᒪᓃᑦ ᐊᓯᖏᓪᓗ ᑕᐃᒪᐃᑦᑐᑦ, ᓲᖃᐃᒻᒪ ᑕᐃᒪᓐᓇ ᑎᒦᑦ ᑭᐅᒐᔪᖕᒪᑦ," ᓇᓗᓇᐃᖅᓯᓪᓗᓂ.  ᖃᐅᔨᒪᔪᖅ ᖃᓄᖅ ᑕᖃᓯᒪᓂᖅ, ᓂᑲᓪᓗᖓᓂᖅ, ᓯᕘᕋᓂᖅ ᐊᒻᒪ ᐊᒃᓱᕈᕐᓂᖅ ᐃᓕᓐᓂᐊᕐᕕᖕᒥ ᐊᔪᕐᓇᑲᓴᒍᓐᓇᖅᑐᖅ.

ᒪᒃᑯᖕᓂᖅᓴᓂᒃ ᐅᖃᐅᔾᔪᐃᔪᓐᓇᕈᓂ ᐃᒪᐃᑦᑑᓇᔭᖅᐳᖅ, "ᐃᓕᖕᓂᒃ ᐱᑦᑎᐊᕆᑦ. ᑎᒥᐃᑦ ᑲᒪᒋᑦᑎᐊᕐᓗᒍ. ᑎᒥᒐ ᖃᓄᐃᒋᓗᐊᓚᐅᙱᑕᕋ ᐊᒃᓱᕈᓗᐊᒧᑦ ᐃᓱᒪᒐ ᖃᓄᐃᔾᔪᑎᖃᓕᓚᐅᕐᒪᑦ ᐊᓯᓐᓄᑦ ᐋᓐᓂᐊᕈᑕᐅᓕᕈᓐᓇᖅᖢᓂ. ᐅᑎᕈᒪᓇᔭᖅᐳᖓ ᐅᖃᐅᑎᓗᖓᓗ, 'ᖃᓄᐃᙱᑦᑎᐊᖅᑐᑎᑦ, ᐱᐅᔪᐊᓘᔪᑎᑦ ᐃᓕᖕᓂᒃ ᑲᒪᒋᑦᑎᐊᕐᓗᑎᓪᓗ."

ᐅᓪᓗᒥ ᖃᓄᐃᓕᐅᖃᑦᑕᕐᓂᕐᒥᓂᒃ ᐱᔪᒃᓯᑎᑦᑎᕗᖅ ᐊᓯᖏᓐᓄᑦ ᓴᓇᙳᐊᖅᑎᓄᑦ ᐊᒻᒪ ᐱᙳᐊᖅᑎᓄᑦ. "ᖁᕕᐊᓱᒃᑎᑕᐅᑐᐃᓐᓇᕋᒪ ᐃᓄᐃᑦ ᑕᖃᔪᐃᑦᑑᓪᓗᑎᒃ ᑭᒡᒐᖅᑐᐃᓂᖏᓐᓄᑦ ᑭᓱᑦ ᓈᒻᒪᖕᒪᖔᑕ ᐊᒻᒪ ᒪᓕᒐᓕᕆᔨᒃᑯᓐᓄᑦ ᓄᓇᖃᖅᑳᖅᓯᒪᔪᓄᑦ ᑕᒫᓂ ᑲᓇᑕᒥ. ᐃᓱᒪᔪᖓ ᐊᖏᓂᖅᓴᐃᑦ ᓄᓇᖃᖅᑲᖅᓯᒪᔪᑦ ᓄᓇᓕᖓᑦ, ᑕᖃᓯᒪᒐᓗᐊᖅᑎᓪᓗᑕ, ᑕᖃᓯᒪᒐᓗᐊᖅᑎᓪᓗᑕ, ᐋᓐᓂᐊᒐᓗᐊᖅᑎᓪᓗᑕ, ᑕᒪᒃᑯᐊᓕᒫᑦ, ᓴᐱᓕᖅᑕᐃᓕᖏᓐᓇᕋᑦᑕ, ᐊᒻᒪᓗ ᐊᔭᐅᖅᑐᐃᓪᓗᑕ, ᐊᒻᒪᓗ ᐊᐅᓚᓪᓗᑕ ᐊᒻᒪᓗ ᐋᖅᑭᒃᓱᐃᓪᓗᑕ ᐊᒻᒪᓗ ᓴᖅᑮᓪᓗᑕ ᐊᒻᒪᓗ ᑐᓂᓯᓪᓗᑕ. ᐃᓱᒪᔪᖓ ᐊᖏᓂᖅᓴᖅ ᓄᓇᖃᖅᑳᖅᓯᒪᔪᑦ ᓄᓇᓕᖓ ᐱᐅᔪᐊᓘᓂᖓᓂᒃ, ᐱᔪᒃᓯᑎᑦᑎᓪᓗᓂᓗ," ᖁᖓᖦᖢᓂ. 

ᐊᓂᒍᐃᓂᖅ ᓄᑕᕋᐅᑎᓪᓗᒋᑦ ᖁᐊᖅᓵᖓᓇᖅᑐᒃᑰᖅᓯᒪᔪᑦ ᐊᒻᒪ ᐱᔭᕆᐊᑐᔪᓂᑦ ᐃᓕᓐᓂᐊᖅᓯᒪᓂᒃᑯᑦ, ᐊᐃᒥ ᔮᒃᓴᓐ ᐃᓕᓐᓂᐊᖅᑎᐅᓕᖅᑐᖅ ᐱᔭᕇᖅᑐᓂᑦ ᐃᓕᓐᓂᐊᕐᕕᒻᒥ, ᐃᓕᓐᓂᐊᖅᑎᑦᑎᓪᓗᓂ ᓴᓇᙳᐊᕐᓂᕐᒥᑦ ᐊᒻᒪ ᒪᒥᓴᕐᓂᕐᒥᑦ ᑲᓲᑎᓯᒪᔪᓂᑦ ᐅᑭᐅᖅᑕᖅᑐᒥᑦ ᐃᓪᓗᕈᓯᖏᓐᓂᑦ. ᐃᓅᓯᖅ ᑎᑭᐅᑎᓚᐅᖅᑐᖅ ᐱᓇᓱᐊᖅᑎᓪᓗᒍ ᑐᕌᒐᖏᓐᓂᑦ, ᑭᓯᐊᓂ ᐊᐃᒥ ᔮᒃᓴᓐ ᓇᓂᓯᓚᐅᖅᑐᖅ ᓯᓐᓇᑦᑑᒪᒋᔭᖏᓐᓂᑦ (ᓴᓇᒻᒪᖏᓪᓗ) ᓂᐱᑦᑕᖅᑐᑦ ᐃᑲᔪᖅᓱᓂᓗ ᒪᒃᑯᑦᑐᓂᑦ ᐊᔾᔨᓴᐃᓐᓇᖏᓐᓂᑦ ᓇᒻᒥᓂᖅ ᖃᐅᔨᓇᓱᐊᕐᓂᕐᒥᑦ ᓴᓇᑐᓂᖏᓐᓂᑦ ᐅᑉᐱᕈᓱᓐᓂᕐᒥᓪᓗ ᓇᒻᒥᓂᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.