"ᐃᓱᒪᔪᖓᓕ ᐃᓕᖅᑯᓯᕋ, ᓱᓕᓪᓗᖓ, ᐊᓯᔾᔨᖅᓯᓯᒪᓪᓚᕆᖕᒪᑦ ᐃᓅᓯᓐᓂᒃ ᐃᓱᒪᓕᐅᓕᕋᒪ ᐊᑐᕈᒪᓕᖅᖢᒍ ᐱᒃᑯᒍᓱᒃᖢᖓ," ᐅᖃᓚᐅᖅᐳᖅ ᐊᓇᐱᐅᓪ ᓚᑐᕆᐅᓪ. 19-ᓂᒃ ᐅᑭᐅᓕᒃ ᐃᖃᓗᖕᒥᐅᑕᐅᓚᐅᖅᓯᒪᓪᓗᓂᓗ, ᓄᓇᕗᒻᒥ ᑭᓯᐊᓂ ᐱᕈᖅᓴᓚᐅᖅᑐᖅ ᑳᓪᑕᓐ ᐸᐃᒃ, ᐋᓐᑎᐅᕆᐅᒥ, ᐋᑐᕚ ᓯᓚᑎᑦᑎᐊᖓᓂ. ᓇᖕᒥᓂᖃᖅᑎᐅᔪᖅ, ᓴᓇᙳᐊᖅᑎᐅᓪᓗᓂ, ᐱᐅᓴᐅᑎᓂᒃ ᐋᖅᑭᒃᓱᐃᔨᐅᓪᓗᓂ, ᐅᖃᓗᕋᐅᔭᖅᑎᐅᓪᓗᓂ, ᑲᑕᔾᔭᖅᑎᐅᓪᓗᓂ, ᐊᒻᒪ ᖃᕋᓴᐅᔭᑎᒍᑦ ᓴᖅᑭᑎᑦᑎᔨᐅᓪᓗᓂ ᐱᐅᔪᒻᒪᕆᖕᒥᒃ ᐱᓕᕆᓂᖃᖅᖢᓂ.

ᐱᕈᖅᓴᓪᓗᓂ, ᓛᑐᕆᐅᓪ ᐊᓈᓇᒥᓃᖃᑎᖃᓚᐅᖅᑐᖅ ᐊᓈᓇᑦᑎᐊᒥᓂᓪᓗ ᐃᓅᔫᒃ. ᖃᑯᖅᑕᒻᒪᕆᐅᓪᓗᓂ ᐃᓅᖃᑕᐅᓪᓗᓂᓗ ᖃᓂᒋᔭᖏᓐᓂ, ᐊᒃᓱᕉᑎᖃᓚᐅᖅᐳᖅ ᐃᓕᖅᑯᓯᕐᒥᓂᒃ ᐅᖃᐅᓯᖃᕋᓱᒃᖢᓂ ᑲᙳᓱᒃᐸᒃᖢᓂᓗ. ᒍᕋᐃᑦ 10-ᒥ, ᐊᓈᓇᖓ ᒥᖅᓱᖃᑦᑕᓕᓚᐅᖅᑐᖅ ᐊᒻᒪᓗ ᖃᐅᔨᕚᓪᓕᖅᑐᓂ ᐊᓈᓇᖓᑕ ᐅᐱᒍᓱᓐᓂᖓᓂᒃ ᐃᓕᖅᑯᓯᕐᒥᓂᒃ. ᐊᓈᓇᖓ ᖃᐅᖓ ᑕᖅᓴᓕᖅᑕᐅᓪᓗᓂ ᑭᖑᓂᐊᒍᓪᓗ ᒪᓕᓕᖅᖢᓂ. "ᐊᓂᓚᐅᖅᑐᖓ ᕿᐊᓪᓗᖓ ᑕᑯᒥᓇᖅᑐᐊᓗᖕᒥᒃ ᐃᒃᐱᒋᓚᐅᖅᓯᒪᙱᓐᓇᒪ ᐃᓅᓯᓐᓂ," ᐃᖅᑲᐅᒪᔪᖅ.

ᓚᑐᕆᐅᓪ ᐃᖅᑲᐅᒪᕗᖅ ᐃᓕᓐᓂᐊᕐᕕᖕᒥ ᐊᓯᐅᓯᒪᓚᐅᕐᓂᕐᒥᓂᒃ ᐃᓕᖅᑯᓯᕐᒥᓂᒃ ᓇᓗᖅᑯᑎᙱᖦᖢᓂ. ᑕᖅᓴᖅᑖᕋᒥ, ᐊᑐᖃᑦᑕᓕᓚᐅᖅᑐᖅ ᐃᓄᐃᑦ ᐊᓐᓄᕌᖏᓐᓂᒃ, ᕿᓯᕋᔭᓐᓂᒃ ᓯᐅᒻᒥᐊᓂᒃ, ᐊᓈᓇᖓᑕ ᖁᓕᑦᑕᐅᔭᖓᓂᒃ ᐊᒻᒪᓗ ᐃᒃᐱᒋᓕᑕᐃᓐᓇᖅᑐᓂ, "ᓈᒻᒪᑉᐳᖓ, ᑲᑉᐱᐊᓱᙱᑦᑐᖓ, ᐊᒻᒪᓗ ᐅᓇ ᑭᓇᐅᒐᒪ ᐊᒻᒪᓗ ᐃᒪᐃᑦᑑᔪᒪᐃᓐᓇᐅᔭᖅᑐᖓ."

ᑭᖑᓪᓕᖅᐹᖓᓂ ᐊᕐᕌᒍᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ, ᓛᑐᕆᐅᓪ ᓴᙱᔪᒥ ᑭᒡᒐᖅᑐᐃᔨᐅᓚᐅᖅᐳᖅ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ, ᐅᓇᑕᖅᖢᓂ ᐃᓅᖃᑎᒥᓂᒃ ᐊᑭᕋᖅᑐᕐᓂᕐᒥᒃ. ᐃᑲᔪᖅᑕᐅᓕᑕᐃᓐᓇᓚᐅᕆᕗᖅ ᐱᔭᕆᐊᖃᖅᑕᒥᓂᒃ ᓵᙵᔭᖃᙱᓐᓂᕐᒧᑦ, ᓯᕘᕋᓂᕐᒧᑦ ᐊᒻᒪ ᓄᒫᓱᖕᓂᕐᒧᑦ. ᖁᕝᕙᓯᖕᓂᓕᖕᒥ 12-ᒥ, ᐃᓕᓐᓂᐊᖅᑎᓂᒃ ᐱᖃᑎᖃᖅᐸᓚᐅᖅᐳᖅ ᓄᓇᕗᑦ ᓯᕗᓂᒃᓴᕗᒻᒥ ᑕᐃᓐᓇᑐᐊᑦᑎᐊᕐᓗ ᐃᓕᓐᓂᐊᕐᕕᖕᒧᑦ ᐱᓇᔪᒡᕕᒋᓚᐅᖅᓯᒪᔭᖓ.

ᐱᒋᐊᓕᓵᖅᑎᓪᓗᒍ, ᓛᑐᕆᐅᓪ ᐃᓱᒪᓚᐅᖅᐳᖅ ᓄᓇᕗᑦ ᓯᕗᓂᒃᓴᕗᑦ ᐊᔪᕐᓇᕋᔭᙱᓐᓂᖓᓂ, ᑭᓯᐊᓂ ᐃᒃᐱᖕᓂᐊᓂᐅᔪᒥ ᐊᒃᓱᕈᕐᓇᓚᐅᖅᐳᖅ. ᓅᓚᐅᕐᑐᖅ ᐊᖏᕐᕋᕆᔭᒥᓂᑦ ᓇᖕᒥᓂᖅ ᐃᒡᓗᒧᑦ ᑕᖅᑭᑦ ᑎᓴᒪᑦ ᐊᑐᖅᑎᓪᓗᒋᑦ. ᐊᔪᕐᓇᖃᑦᑕᓚᐅᖅᑐᖅ ᓂᐅᕕᖅᑎᑦᑎᔨᓄᑦ ᐅᐸᒍᑎᙱᖦᖢᓂ ᖃᖓᑐᐃᓐᓇᒃᑯᑦ ᑭᓯᐊᓂ ᓇᖕᒥᓂᖃᖃᑎᖓ ᐊᓈᓇᖓᓗ ᐃᖅᑲᐃᑎᑦᑎᓚᐅᖅᐳᖅ ᐃᓕᓐᓂᐊᕐᓂᖅ ᐱᒻᒪᕆᐅᓂᖓᓂᒃ. ᐃᓕᑉᐹᓪᓕᖅᑐᒻᒪᕆᐅᓚᐅᖅᐳᖅ ᐃᓕᖅᑯᓯᕐᒥᓂᒃ ᐊᒻᒪ ᐱᒻᒪᕆᐅᔪᓂᒃ ᐃᓅᓯᕐᒧᑦ ᐊᔪᙱᑕᖃᕐᓂᕐᒥᒃ.

ᓛᑐᕆᐅᓪ ᑲᑕᔾᔭᕈᓐᓇᓚᐅᖅᐳᖅ, ᕿᓚᐅᔾᔭᖅᖢᓂ, ᐃᓚᐅᕙᒃᖢᓂ ᐃᓕᖅᑯᓯᑐᖃᕐᓄᑦ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ ᐃᓕᑦᑎᓪᓗᓂᓗ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑕᐅᓯᒪᔪᒥᒃ. "ᐅᕙᓐᓂᒃ ᐃᓕᑦᑎᕐᔪᐊᓚᐅᖅᐳᖓ ᑭᓇᐅᔪᒪᖕᒪᖔᕐᒪᓗ. ᑕᑯᑎᑦᑎᓚᐅᖅᐳᖓ ᓯᕗᓕᖅᑎᐅᔪᒪᓇᔭᕐᓂᓐᓂᒃ ᓯᕗᓂᒃᓴᑦᑎᓐᓂ," ᐃᖅᑲᐅᒪᔪᖅ. ᐊᕐᕌᒎᑉ ᓄᙳᐊᓂ, ᓄᐊᕙᐃᒨᓚᐅᖅᐳᖅ ᑲᑎᖃᑎᖃᕆᐊᖅᑐᖅᖢᓂ ᓵᒥᒥᐅᓂᒃ. ᓄᓇᕗᑦ ᓯᕗᓂᒃᓴᕗᑦ ᐊᓂᒍᖅᓯᒪᓕᖅᑎᓪᓗᒍ, ᐳᓚᕋᖅᑎᓄᑦ ᐅᒥᐊᕐᔪᐊᕐᒥ ᐃᖅᑲᓇᐃᔭᓚᐅᖅᓯᒪᕗᖅ ᑲᓛᖦᖡᑦ ᓄᓈᓐᓂᙶᖅᖢᓂ, ᓄᓇᑦᑎᐊᒃᑰᖅᖢᓂ ᐊᒻᒪ ᓄᓇᑦᑎᐊᑉ ᑕᕆᐅᖓᑕ ᓱᓪᓗᐊᓗᖏᒍᑦ ᐊᓛᔅᑲᒥ.

ᓇᖕᒥᓂᕆᔭᒥᓄᑦ, ᓛᑐᕆᐅᓪ ᐱᒋᐊᓚᐅᖅᓯᒪᕗᖅ 16-ᓂᒃ ᐅᑭᐅᖃᖅᑎᓪᓗᒍ. ᓯᕗᓪᓕᖅᐹᑦᑎᐊᒥ ᓴᐸᖓᓕᖅᓯᒪᓪᓗᓂ ᐃᕙᓗᓕᐅᓚᐅᖅᐳᖅ ᐱᖃᓐᓇᕆᔭᖓᑕ ᓇᓪᓕᐅᑎᓂᖓᓄᑦ. ᐱᖃᓐᓇᕆᔭᖓᑕ ᐊᔭᐅᖅᑐᖅᖢᓂᐅᒃ ᓂᐅᕐᕈᑎᒋᖁᓪᓗᓂᒋᑦ ᐱᙳᐊᕕᒡᔪᐊᕐᓇᒥ ᐊᒻᒪ ᐱᓕᕆᖃᑎᖓ, ᑎᓃᔅ, ᓯᕗᓪᓕᖅᐹᖑᓪᓗᓂ ᓂᐅᕕᖅᑎᒋᓚᐅᖅᑕᖓ. ᓄᖑᓚᐅᖅᑐᑦ ᐃᑲᕐᕋᖅ ᓇᑉᐸᕐᓗ ᐊᓂᒍᖅᑎᓪᓗᒍ. ᓇᖕᒥᓂᕆᔭᓂ ᐊᑦᑎᓚᐅᖅᓯᒪᔭᖓ ᑯᐃᓐ ᐋᑐᕚᒥ ᐊᓈᓇᑦᑎᐊᖓᑕ ᐊᑎᕆᓚᐅᖅᓯᒪᔭᖓᓂᒃ. ᕿᓚᒥᑯᓗᒃ ᒥᕝᕕᖕᒦᓕᓚᐅᖅᐳᖅ ᐊᒻᒪ ᑲᒻᐸᓂᐅᔪᑦ ᖃᐅᔨᒋᐊᕐᕕᐅᓕᖅᖢᑎᒃ. "ᓴᐸᖓᓕᖅᓯᒪᔪᑦ ᓴᐸᖓᓕᖅᓯᒪᔪᑦ ᐅᕙᓐᓄᑐᐊᖑᙱᓚᑦ. ᐅᓄᕐᓂᖅᓴᒻᒪᕆᐅᕗᑦ," ᖁᕕᐊᓱᒃᑐᖅ. ᐱᔪᒃᓯᑎᑕᐅᓯᒪᕗᖅ ᐊᓈᓇᖓᑕ ᓇᖕᒥᓂᕆᔭᖓᓂᒃ, ᐱᒋᐊᓚᐅᖅᓯᒪᔭᖓᓂᒃ ᓄᓇᕐᔪᐊᓕᒫᒥ ᖃᓂᒪᓐᓇᐅᑎᓪᓗᒍ ᓴᓇᕙᒃᖢᓂ ᕿᓯᖕᓂᒃ ᓯᐅᒻᒥᐊᓂᒃ ᐱᐅᓴᐅᑎᓂᒡᓗ.

ᐃᓕᓐᓂᐊᒃᑲᓐᓂᕋᓱᒃᑎᓪᓗᒍ, ᓛᑐᕆᐅᓪ ᐃᓕᓐᓂᐊᖅᑐᖅ ᓇᖕᒥᓂᖃᕐᓂᕐᒧᑦ ᑐᙵᕕᒋᔭᐅᔪᓂᒃ Algonquin College-ᒥ. ᓯᕗᓪᓕᕐᒥ ᖁᒃᓴᓱᓚᐅᖅᐳᖅ ᓄᓇᖃᖅᑳᖅᑐᑐᐊᖑᓪᓗᓂ ᐱᓕᕆᐊᖓᓂ. ᐃᓕᓐᓂᐊᕇᕈᓂ, ᐊᐃᑉᐸᖓᓂ ᐊᕐᕌᒍᖓᓂ ᐃᓕᓐᓂᐊᕈᒪᔪᖅ ᓄᓇᕗᑦ ᓯᕗᓂᒃᓴᕗᒥ ᐊᒻᒪ ᐃᓕᓐᓂᐊᓕᕐᓗᓂ. ᐃᓕᓴᐃᔨᐅᔪᒪᔪᖅ ᓄᓇᕘᒥ, ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ ᐅᕝᕙᓘᓐᓃᑦ ᐃᓕᓴᐃᔨᐅᓗᓂ. ᖃᖓᑭᐊᖅ, ᐃᖅᑲᓇᐃᔭᕈᒪᔪᖅ ᒐᕙᒪᒃᑯᓐᓄᑦ ᓄᓇᕗᒻᒥ.

ᑲᔪᖏᖅᓴᐃᔾᔪᑎᒋᕙᒃᑕᖓ ᐃᓕᓐᓂᐊᕐᓂᕐᒧᑦ ᐆᒻᒪᑎᕐᔪᐊᖓ, ᐃᓅᖃᑎᒥᓂᒃ ᓇᒡᓕᒍᓱᖕᓂᖓ ᐃᑲᔪᕈᒪᓂᖓᓗ. "ᐃᓄᐃᑦ ᐊᓐᓂᕐᓇᕐᓂᖅᐹᖑᖃᑕᐅᕗᑦ, ᐱᐅᔪᐊᓗᐃᑦ, ᓴᓇᑐᔪᐊᓗᐃᑦ ᐃᓄᐃᑦ ᑕᑯᓚᐅᖅᓯᒪᔭᑎᑦ," ᓚᑐᕆᐅᓪ ᐅᖃᖅᑐᖅ. ᓄᓇᓕᒥᓄᑦ ᐅᑎᖅᑎᑦᑎᔪᒪᕗᖅ ᐃᓱᒪᒋᕙᒃᖢᓂᒋᓪᓗ ᒪᒃᑯᒃᑐᓕᒫᑦ ᑲᑎᓯᒪᔭᖏᑦ ᓇᖕᒥᓂᕆᔭᒥᒍᑦ. ᑕᑯᕙᒃᐳᖅ ᓇᖕᒥᓂᕆᔭᖓᑕ ᐱᓕᕆᖃᑎᖓ ᖃᓄᐃᓕᐅᖅᓯᒪᖕᒪᖔᑦ ᐃᓕᑕᕆᔭᐅᔾᔪᑎᑖᖅᓯᒪᓪᓗᓂ ᐃᓕᓐᓂᐊᕐᓂᓕᕆᓂᕐᒥᒃ ᖃᐅᔨᒪᓪᓗᓂᓗ ᑭᓱᑦ ᐊᓂᒍᖅᑎᑕᐅᔪᓐᓇᕐᒪᖔᑕ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐃᓱᒪᔪᓄᑦ ᐊᐅᓪᓚᕈᒪᓂᕐᒧᑦ ᓄᓇᓕᖏᓐᓂ ᐃᒪᓐᓇᐅᓇᔭᖅᐳᖅ, "ᐊᖏᕐᕋᕆᔭᐃᑦ ᑕᐃᑲᓃᖏᓐᓇᐅᔭᕐᓂᐊᖅᐳᖅ, ᖃᑕᙳᑎᑎᑦ ᑕᐃᑲᓃᖏᓐᓇᐅᔭᕐᓂᐊᖅᐳᑦ, ᐊᒻᒪ ᐃᓕᖕᓂᒃ ᐃᑲᔪᖅᑐᐃᙱᒃᑲᓗᐊᖅᐸᑕ, ᐃᓕᖕᓂᒃ ᐃᑲᔪᖅᑐᐃᓂᐊᖅᐳᑦ ᐃᓱᐊᓂ, ᓲᖃᐃᒻᒪ ᐃᓕᓐᓂᐊᖅᓯᒪᒐᕕᑦ." ᓚᑐᕆᐅᓪ ᐃᖅᑲᐅᒪᕗᖅ ᓄᓇᕗᑦ ᓯᕗᓂᒃᓴᕗᑦ ᑐᑭᒧᐊᖅᑎᑦᑎᔨᖓ ᐅᖃᐅᔾᔨᓚᐅᕐᓂᖓᓂᒃ ᑭᓇᑐᐃᓐᓇᕐᒧᑦ ᐊᖅᓵᖅᓯᔪᓐᓇᙱᓐᓂᖏᓐᓂᒃ ᐃᓕᓐᓂᐊᖅᑕᖏᓐᓂᒃ ᐊᒻᒪ ᐱᕕᒃᓴᐃᑦ ᐊᑐᐃᓐᓇᐅᔪᑦ ᐅᓄᖅᓯᕚᓪᓕᑐᐃᓐᓇᕐᓂᐊᕐᓂᖏᓐᓂᒃ. ᓄᓇᕗᑦ ᓯᕗᓂᒃᓴᕗᑦ ᐊᒻᒪ ᐋᓪᒑᓐᑯᐃᓐᒥ, ᐱᕕᒃᓴᖅᑕᖃᖅᐳᖅ ᑲᑎᙵᖃᑎᖃᕈᓐᓇᕐᓂᕐᒥᒃ ᐊᓯᖏᓐᓂᒃ ᐃᓕᓐᓂᐊᖅᑎᓂᒃ ᐊᔾᔨᒌᓂᒃ ᓇᑭᙶᖅᓯᒪᓂᖏᓐᓂᒃ ᐃᓄᑑᙱᓐᓂᖅᓴᐅᓕᕐᓗᑎᒡᓗ.

ᑐᓗᖅᑕᕈᑕᐅᕙᒃᑐᓄᓪᓕ, ᓛᑐᕆᐅᓪ ᐊᒃᓱᕉᑎᖃᓛᖑᓚᐅᖅᐳᖅ ᑭᒡᒐᖅᑐᐃᔨᓂᒃ ᐃᑲᔪᖅᑐᐃᓂᕋᖅᑐᓂᒃ ᓄᓇᖃᖅᑳᖅᑐᓂᒃ ᒪᒃᑯᒃᑐᓂᒃ ᐃᑲᔪᖅᑐᐃᓪᓚᕆᙱᖦᖢᑎᒃ. ᐊᒃᓱᕉᑎᖃᖅᓯᒪᖕᒥᔪᖅ ᖀᒥᒍᓱᖕᓂᕐᒥᒃ ᐃᓅᖃᑎᒥᓄᑦ ᐅᖃᖅᐸᒃᑐᓄᑦ ᖃᑯᖅᑕᐅᓗᐊᕐᓂᕋᖅᑐᓂᒃ ᖃᓄᐃᓕᐅᕆᐊᒃᓴᖅ. ᐅᖃᐅᓯᖃᖅᓯᒪᕗᖅ ᐃᓚᖏᓐᓂᒃ ᐃᖢᕐᕆᙱᓐᓂᕐᒥᓂᒃ ᐃᒃᐱᒋᔭᖃᕐᓂᕐᒥᒃ "ᓈᒻᒪᙱᓗᐊᕐᓂᕐᒥᒃ" ᐱᔾᔪᑎᖃᖅᖢᓂ ᐊᔾᔨᒌᙱᕈᓘᔭᖅᑐᓂᒃ ᓯᕗᓕᕆᓚᐅᖅᑕᒥᓂᒃ TikTok−ᑯᑦ ᐊᒥᓱᓂᒡᓗ ᑕᐅᑐᒃᑕᐅᖃᑦᑕᖅᓯᒪᓪᓗᓂ ᐃᓗᓕᕆᔭᖏᑦ.

ᓛᑐᕆᐅᓪ ᒪᒃᑯᖕᓂᖅᓴᒧᑦ ᐃᒻᒥᓄᑦ ᐅᖃᐅᔾᔨᔪᓐᓇᕈᓂ ᑲᑉᐱᐊᓱᙱᓪᓗᓂ ᑭᓇᐅᓂᕐᒥᓂᒃ ᐅᖃᕐᓗᓂᓗ, "ᐃᓕᖅᑯᓯᕐᓅᖏᓐᓇᐅᔭᕆᑦ, ᓲᖃᐃᒻᒪ ᐃᓕᖅᑯᓯᖅ ᒪᒥᓴᓲᖑᖕᒪᑦ. ᐃᓕᖅᑯᓯᒃᑯᑦ ᐃᓕᖕᓂᒃ ᓇᒡᓕᒍᓱᒃᐳᑦ." ᐅᖃᐅᔾᔨᒋᐊᕈᑎᒋᔭᖓ ᑭᓇᑐᐃᓐᓇᕐᒧᑦ ᒪᒃᑯᒃᑐᒧᑦ, "ᐃᓕᖅᑯᓯᕆᔭᐃᑦ ᐊᑐᕐᓗᒍ ᐅᐱᒋᓗᒍ ᑲᑉᐱᐊᓱᙱᓪᓗᓯᓗ ᑭᓇᐅᖕᒪᖔᖅᐱᑦ ᓇᑭᙶᖅᓯᒪᖕᒪᖔᕐᐱᓪᓘᓐᓃᑦ, ᐊᒃᓱᕈᕐᓇᕋᓗᐊᖅᑎᓪᓗᒍ ᐋᓐᓂᕐᓇᕋᓗᐊᕈᕕᓪᓘᓐᓃᑦ, ᓲᖃᐃᒻᒪ ᐅᓪᓘᑉ ᓄᙳᐊᓂ, ᑭᓇᑐᐃᓐᓇᕐᒧᑦ ᐊᖅᓵᖅᑕᐅᔪᓐᓇᙱᓚᑎᑦ."

ᓇᓕᒧᒌᒃᑎᑦᑎᓇᓱᒃᖢᓂ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᒃ, ᓛᑐᕆᐅᓪ ᓯᕗᓪᓕᕐᒥ ᐃᑲᔪᖅᑕᐅᔪᒪᓚᐅᖅᐳᖅ ᒪᒃᑯᒃᑑᓪᓗᓂ ᓯᕘᕋᓂᖓᓄᑦ ᓄᒫᓱᖕᓂᖓᓄᓪᓗ. ᖃᐅᑕᒫᑦ ᑎᑎᕋᖅᐸᒃᖢᓂ ᑎᑎᕋᖅᐸᒃᖢᓂᓗ ᐅᓂᒃᑳᖅᑐᐊᓂᒃ ᒪᒥᓴᕐᓂᕐᒧᑦ ᐱᓕᕆᖃᑎᒋᔭᖏᓪᓗ ᐊᒥᖅᑳᕈᑎᒋᕙᒃᖢᓂᒋᑦ ᐊᓯᖏᓐᓄᑦ ᐃᓄᖕᓄᑦ ᖃᑕᙳᑎᒌᓄᑦ. ᑲᑕᔾᔭᖅᐸᒃᐳᖅ ᐃᙱᖅᐸᒃᖢᓂᓗ ᐃᓕᖅᑯᓯᑐᖃᒃᑯᑦ ᕿᓚᐅᔾᔭᕐᓂᕐᒧᑦ ᐃᙱᐅᓯᕐᓂᒃ ᓯᕘᕋᓕᕌᖓᒥ.

"ᐃᑲᔪᖅᑕᐅᔪᒪᔪᓐᓇᖅᐳᑎᑦ ᖃᓄᕈᓘᔭᖅ, ᐊᒻᒪ ᐊᑕᐅᓯᖅ ᐊᑐᕈᖕᓇᙱᒃᑲᓗᐊᖅᐸᑦ, ᐱᓇᔪᐃᓐᓇᕆᑦ... ᐊᔪᕐᓇᙱᑦᑐᑯᓘᓚᐅᖅᓯᒪᙱᓚᖅ ᐃᑲᔪᖅᑕᐅᓇᓱᒋᐊᒃᓴᖅ, ᑭᓯᐊᓂ ᐃᓱᐊᓂ, ᐊᔪᕐᓇᙱᓐᓂᖅᓴᐅᓕᖅᐸᒃᐳᖅ."

ᑭᓱᒥᒃ ᐱᔪᒃᓯᑎᑦᑎᓕᖅᐸᖕᒪᖔᑦ, ᓛᑐᕆᐅᓪ ᐃᓱᒪᐃᓐᓇᐅᔭᖅᐳᖅ ᑭᖑᕚᒃᓴᕆᓂᐊᖅᑕᒥᓂᒃ. ᐱᔪᒃᓯᑎᑕᐅᕗᖅ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ. ᒫᓐᓇ ᓇᖕᒥᓂᖅ ᖁᓕᑦᑕᐅᔭᓕᐅᕋᓱᒃᐳᖅ ᐱᓕᕆᖃᑎᖃᕈᒪᓪᓗᓂᓗ ᐃᓕᓐᓂᐊᕐᕕᖕᒥ ᑲᑎᒪᔨᓂᒃ ᐃᑲᔪᕈᒪᓪᓗᓂ ᐃᓕᓐᓂᐊᕈᑎᒃᓴᓕᐅᕐᓂᕐᒥᒃ ᐃᓄᐃᑦ ᒥᒃᓵᓄᑦ.

"ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᓯᕗᓂᒃᓴᕆᔭᐅᕗᑦ ᐃᓄᖁᑎᑦᑎᓐᓄᑦ."

ᐃᓱᓕᓕᖅᑎᓪᓗᒍ, ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᓇᖕᒥᓂᖅᑖᕈᒪᔪᓄᑦ ᐃᒪᓐᓇᐅᓇᔭᖅᐳᖅ, "ᐊᑏ! ᐃᓗᐊᕆᔭᕐᓂ ᕿᒪᕉᑎᓗᑎᑦ... ᖃᐅᔨᒪᓇᙱᓚᖅ ᓇᒧᙵᐅᕙᓪᓕᐊᓂᐊᕐᒪᖔᖅᐱᑦ ᓇᖕᒥᓂᖃᕐᓂᕐᒧᑦ... ᓇᖕᒥᓂᖃᕐᓂᖅ ᓴᙱᔪᒻᒪᕆᐅᕗᖅ ᐊᒻᒪ ᑲᒪᓇᖅᑐᒻᒪᕆᐅᓪᓗᓂ ᐃᓚᒋᔭᐅᓪᓗᓂ."

ᓇᖕᒥᓂᖃᖅᑎᐅᓪᓗᓂ, ᓴᓇᙳᐊᖅᑎᐅᓪᓗᓂ, ᐱᐅᓴᐅᑎᓂᒃ ᐋᖅᑭᒃᓱᐃᔨᐅᓪᓗᓂ, ᐅᖃᓗᕋᐅᔭᖅᑎᐅᓪᓗᓂ, ᑲᑕᔾᔭᖅᑎᐅᓪᓗᓂ, ᐊᒻᒪ ᖃᕆᓴᐅᔭᒃᑯᑦ ᓴᖅᑭᑎᑦᑎᔨᐅᓪᓗᓂ 19-ᓂᒃ ᐅᑭᐅᖃᑐᐃᓐᓇᖅᖢᓂ, ᐋᓇᐱᐅᓪ ᓚᑐᕆᐅᓪ ᐊᒥᖅᑳᕈᑎᖃᕐᔪᐊᖅᐳᖅ ᓄᓇᕐᔪᐊᕐᒥᐅᓄᑦ. ᑯᐃᓐ ᐋᑐᕚᒥ ᐊᓈᓇᑦᑎᐊᖓᑕ ᐊᑎᕆᓚᐅᖅᓯᒪᔭᖓ ᐊᒻᒪ ᓇᖕᒥᓂᕆᔭᖓ ᐊᑦᑎᓚᐅᖅᓯᒪᔭᖓ ᓴᐸᖓᓕᖅᓱᒐᓕᐅᕐᓂᖅ ᑲᔪᓯᑦᑎᐊᖅᓯᒪᒻᒪᕆᒃᑐᖅ ᑕᐃᒪᙵᑦ ᐱᙳᐊᕆᐊᖅᑐᑲᑕᒃᑎᓪᓗᒋᑦ ᒥᕝᕕᖕᓄᑦ. ᐃᖃᓗᖕᒥᐅᑕᒃᓴᔭᖅ ᑭᓯᐊᓂ ᐱᕈᖅᓴᓂᑰᓪᓗᓂ ᐋᑐᕚ ᖃᓂᒋᔮᓂ, ᓄᓇᓕᒡᔪᐊᕐᒥᐅᑕᐅᓪᓗᓂ ᐃᓅᓪᓗᓂ ᐆᒻᒪᑎᖃᑦᑎᐊᖅᖢᓂ ᐃᓅᖃᑎᒥᓄᑦ ᓄᓇᒋᔭᒥᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.