ᐃᑲᔪᖅᑐᐃᔪᓐᓇᕐᓂᖅ ᒪᒃᑯᒃᑐᓂᒃ ᐊᔪᙱᑦᑎᐊᕐᓂᕐᒥᒃ: ᓯᐅᕋ ᕼᐊᓐᓴᕆᐅᑉ ᐊᖅᑯᑎᖓ ᐋᖅᑭᒃᓱᐃᓂᕐᒧᑦ ᐱᕕᒃᓴᐃᑦ
"ᑲᔪᓯᑦᑎᐊᕐᓂᐊᖅᑐᖅ ᐱᓇᔪᐃᓐᓇᕈᕕᑦ," ᓯᐅᕋ ᕼᐊᓐᓴᕆᒃ ᐅᖃᖅᑐᖅ. ᒫᓂᑑᓕᓐᒥᐅᑕᖅ ᑭᓯᐊᓂ ᑐᕌᓐᑐᒥᐅᑕᐅᓯᒪᓕᖅᑐᖅ ᐅᑭᐅᓂᒃ 15-ᓂᒃ. ᐃᓚᒋᔭᐅᓪᓗᓂ ᐄᒍᓪ ᐃᓚᒌᓄᑦ, ᑕᕐᓂᖓ ᐊᑎᖓ White Eagle Woman. ᐃᓕᓐᓂᐊᖅᑎᐅᓪᓗᓂ, ᐊᓈᓇᐅᓪᓗᓂ ᐊᒻᒪ ᐃᓕᓴᐃᔨᐅᓪᓗᓂ, ᐃᓕᖅᑯᓯᑐᖃᕐᒥᓂᒃ ᐃᓕᓴᐃᕙᒃᖢᓂ ᐃᓱᒪᖅᓱᖅᖢᓂ ᐃᓚᒋᔭᐅᓪᓗᓂ ᐃᓚᒌᓄᑦ ᑲᒪᒋᔭᒃᓴᖏᓐᓄᑦ.
ᐱᒋᐊᖅᑎᑦᑎᖃᑕᐅᓯᒪᔪᖅ Three Sisters ᓄᓇᖃᖅᑳᖅᑐᑦ ᓴᓇᐅᒐᖏᓐᓂᒃ ᓂᐅᕕᐊᒃᓴᖃᕐᓂᕐᒥᒃ ᑐᕌᓐᑐᒥ, ᓯᕗᒻᒧᐊᒃᑎᑦᑎᓯᒪᕗᖅ ᑕᐅᑐᙳᐊᖅᑕᒥᓂᒃ ᓄᓇᖃᖅᑳᖅᑐᒨᖓᓕᖅᑎᑦᑎᓂᕐᒥᒃ ᓄᓇᓕᐸᐅᔭᐃᑦ ᐃᓂᒋᔭᖏᓐᓂᒃ ᐊᕐᕌᒍᓄᑦ ᐱᖓᓱᓄᑦ ᓂᐅᕕᐊᒃᓴᖃᕐᓂᖅ ᐊᐅᓚᓕᖅᑎᓪᓗᒍ. ᐱᓕᕆᖃᑎᖃᖅᖢᑎᒃ ᐊᖏᓂᖅᓴᓂᒃ ᑲᑐᔾᔨᖃᑎᒌᓂᒃ, ᑎᑭᑎᑦᑎᕙᒃᐳᑦ ᓄᓇᖃᖅᑳᖅᑐᓂᒃ ᓂᐅᕕᐊᒃᓴᖃᖅᐸᒃᑐᓂᒃ ᐊᒻᒪ ᓄᓇᖃᖅᑳᖅᓯᒪᔪᑦ ᓴᓇᐅᒐᖏᓐᓂᒃ ᐃᓂᒋᔭᐅᒐᔪᒃᑐᓄᑦ.
ᖄᒃᑲᓐᓂᐊᒍᑦ ᐱᓕᕆᐊᖓᑕ ᓂᐅᕕᐊᒃᓴᖃᖅᐸᒃᑐᓄᑦ, ᕼᐊᓐᓴᕆᒃ ᐃᖅᑲᓇᐃᔭᐃᓐᓇᖃᑦᑕᕆᕗᖅ ᓄᓇᖃᖅᑳᖅᑐᑦ ᐱᖃᓐᓇᕆᔭᖏᓐᓄᑦ ᑲᑐᔾᔨᖃᑎᒌᓄᑦ ᑲᔪᖏᖅᓴᐃᔨᐅᓪᓗᓂ. ᐱᓕᕆᕙᒃᖢᓂ ᐅᖓᓯᒃᑐᒥ ᑲᓇᑕᓕᒫᒥ, ᑲᑐᔾᔨᖃᑎᒌᖑᔫᑉ ᐃᖅᑲᓇᐃᔭᖅᑎᖏᑦ ᐃᓕᓐᓂᐊᖅᑎᑦᑎᕙᒃᐳᑦ ᓄᓇᖃᖅᑳᖅᓯᒪᔪᓂᒃ, ᐊᓪᓚᖓᔪᓂᒃ ᐊᒻᒪ ᐃᓄᖕᓂ ᒪᒃᑯᒃᑐᓂᒃ ᖃᓄᖅ ᐊᑐᕈᓐᓇᕐᒪᖔᑕ ᓄᑖᙳᖅᐸᓪᓕᐊᔪᓂᒃ. ᐱᓕᕆᕙᒃᖢᓂ ᑭᖑᓂᐊᒍᑦ, ᐃᑲᔪᖅᐸᒃᐳᖅ ᐃᓚᐅᔪᓂᒃ ᐊᑲᐅᙱᓕᐅᕈᑎᓂᒃ ᐋᖅᑭᒃᓯᓇᓱᒃᖢᓂ ᓲᕐᓗ ᑮᓇᐅᔭᓂᒃ.
ᕼᐊᓐᓴᕆᒃ ᐱᓕᕆᐊᒃᓴᕆᖕᒥᔭᖓ ᐅᑭᐅᖅᑕᖅᑐᒥ ᕉᔅ ᑐᙵᕕᖓᓂ, ᕼᐊᓐᓴᕆᒃ ᓴᓇᙳᐊᖅᑎᓄᑦ ᑭᒡᒐᖅᑐᐃᔨᐅᓪᓗᓂ. ᓇᒧᑐᐃᓐᓇᖅ ᐊᐅᓪᓚᖃᑦᑕᖅᐳᖅ ᐃᓕᓐᓂᐊᖅᑎᑦᑎᓪᓗᓂ ᓄᓇᖃᖅᑳᖅᓯᒪᔪᓂᒃ ᒪᒃᑯᒃᑐᓂᒃ ᓴᐸᖓᓕᕆᓂᕐᒥᒃ, ᖁᐱᕐᕈᓕᐅᕐᓂᕐᒥᒃ ᐊᒻᒪ ᑭᒍᑎᙳᐊᓂᒃ ᓴᓇᙳᐊᕐᓂᕐᒥᒃ.
ᑲᔪᖏᖅᓴᐃᔾᔪᑎᒋᕙᐅᒃ ᑕᒪᑐᒥᖓ ᐱᓕᕆᔪᒪᓪᓗᓂ ᓇᖕᒥᓂᖅ ᐊᑐᖅᓯᒪᔭᖏᑦ ᑐᕌᓐᑐᒧᑦ ᓄᒃᑎᖅᖢᓂ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᓄᖅᑲᖅᓯᒪᓪᓗᓂ ᐊᒃᓱᕈᕈᑎᖃᖅᖢᓂᓗ ᐃᓂᑖᕋᓱᒃᖢᓂ. ᕼᐊᓐᓴᕆᒃ ᓇᓂᓯᓚᐅᖅᐳᖅ ᐃᑲᔪᖅᑐᖅᑕᐅᓂᕐᒥᒃ ᖃᓂᒋᔭᖓᓂ ᐊᑐᖅᑕᐅᔪᓐᓇᖅᑐᓄᑦ ᐃᓂᒋᔭᐅᔪᒥ ᐃᓚᐅᓚᐅᖅᖢᓂᓗ ᑮᓇᐅᔭᖃᖅᑎᑕᐅᓪᓗᓂ ᐊᔪᕈᓐᓃᖅᓴᕐᓂᕆᔭᐅᔪᒥ ᑕᒪᓐᓇᓗ ᐋᖅᑭᒃᓱᐃᓪᓗᓂ ᑲᔪᓯᓂᖃᑦᑎᐊᕈᓐᓇᕐᓂᕐᒧᑦ. ᑲᔪᖏᖅᓴᐃᒋᕗᖅᑕᐅᖅ ᐃᕐᓂᖓ. ᐱᓕᕆᐊᖃᕈᒪᓂᖃᑦᑎᐊᖅᐳᖅ ᐱᑕᖃᙱᓐᓂᕆᔭᐅᔪᓂᒃ ᐊᑐᖅᑕᐅᕙᒃᑐᓂ ᓄᖅᑲᖓᑎᑦᑎᕙᒃᑐᓂᒃ ᓄᓇᖃᖅᑳᖅᑐᓂᒃ ᐊᓂᒍᐃᔪᓐᓇᕐᓂᕐᒥᒃ, ᑕᐃᒪᐃᓐᓂᖓᓄᓪᓗ ᐃᓕᓐᓂᐊᖅᐳᖅ ᓄᓇᖃᖅᑳᖅᑐᓄᑦ ᐃᓕᓴᐃᔨᐅᓂᕐᒧᑦ ᐃᓕᓴᐃᔨᙳᕈᒪᓪᓗᓂ.
ᐃᓱᒪᒋᓪᓗᒍ ᐅᖃᐅᔾᔨᒋᐊᕈᑎᒋᓂᐊᖅᑕᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᕈᒪᔪᓄᑦ ᓄᓇᓕᖏᓐᓂᑦ, ᐅᖃᓚᐅᖅᐳᖅ "ᐊᐅᓪᓚᕋᓗᐊᕈᕕᑦ ᑕᐃᑲᓃᖏᓐᓇᕋᓗᐊᕈᕕᓪᓘᓐᓃᑦ, ᐃᑲᔪᖅᓱᖅᑕᐅᖏᓐᓇᐅᔭᕐᓂᐊᖅᐳᑎᑦ ᓄᓇᔅᓯᓐᓂ. ᓄᓇᓖᑦ ᐊᑐᐃᓐᓇᐅᖏᓐᓇᐅᔭᕐᓂᐊᖅᑐᑦ ᐃᓕᖕᓄᑦ." ᕼᐊᓐᓴᕆᒃ ᓇᓗᓇᐃᖅᓯᒐᓗᐊᖅᑎᓪᓗᒍ ᓅᓪᓗᓂ ᑲᑉᐱᐊᓇᕐᓂᖓᓂᒃ, ᐅᒃᐱᕈᓱᒃᐳᖅ ᐊᔪᕐᓇᙱᓐᓂᖓᓂᒃ ᓇᓂᓯᔭᕆᐊᒃᓴᖅ ᐃᓅᖃᑎᖕᓂᒃ ᑭᓱᓂᒡᓗ ᐱᔭᕆᐊᖃᕐᒪᖔᖅᐱᑦ ᐃᑲᔪᖅᑕᐅᓂᕐᒧᑦ ᐊᒻᒪ ᐃᑲᔫᑎᒃᓴᓄᑦ ᓇᒧᙵᕋᓗᐊᕈᕕᑦ. ᐊᔭᐅᖅᑐᐃᕗᖅ ᐊᑐᕐᓂᕐᒥᒃ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᓂᒃ ᓇᓂᓯᓂᕐᒧᑦ ᖃᕆᓴᐅᔭᒃᑯᑦ ᑲᑐᔾᔨᖃᑎᒌᓂᒃ ᓲᕐᓗ We Matter ᐃᑲᔫᑎᖃᕈᓐᓇᖅᑐᓂᒃ.
ᐅᖃᐅᓯᖃᖅᖢᓂ ᑭᖑᓂᑦᑎᓐᓂ ᐊᔪᕐᓇᖅᑐᖅᓯᐅᕈᑕᐅᕙᓚᐅᖅᑐᓂᒃ ᐊᓂᒍᖅᑎᓯᒪᔭᒥᓂᒃ, ᕼᐊᓐᓴᕆᒃ ᐅᖃᐅᓯᖃᓚᐅᖅᐳᖅ ᐱᒋᐊᓕᓵᕐᓂᖓᓂ ᑐᕌᓐᑐᒧᑦ ᑎᑭᖦᖢᓂ ᐊᒻᒪ ᐃᑲᔪᖅᑎᒃᓴᖅᓯᐅᖅᖢᓂ ᑕᑎᒋᔪᓐᓇᖅᑕᒥᓂᒃ ᐊᓂᒍᐃᔪᓐᓇᖁᓪᓗᒍ ᐃᓚᖏᓐᓂᒃ ᐊᒃᓱᕈᕐᓇᖅᑐᓂᒃ. ᑎᓕᐅᕆᕙᒃᐳᖅ ᒪᒃᑯᒃᑐᓂᒃ ᑲᑉᐱᐊᓱᖃᑦᑕᖁᔨᙱᖦᖢᓂ ᐊᔭᖅᑭᑦᑕᕈᑕᐅᕙᒃᑐᓂᒃ ᓵᙵᔭᖏᓐᓂᒃ.
ᑐᓴᕆᐊᖃᓚᐅᖅᑕᖓ ᐱᕈᖅᓴᓪᓗᓂ ᐅᓇᐅᕗᖅ, ᓴᐸᖓᓕᕆᓂᖅ ᐱᒻᒪᕆᐅᓕᓚᐅᖅᐳᖅ ᐃᓅᓯᖓᓂ ᐊᒻᒪ ᐃᑲᔪᖅᐸᒃᖢᓂ ᐅᐃᒪᔮᙱᓐᓂᖅᓴᐅᓕᖅᖢᓂ ᑕᐃᒪᐃᓐᓂᖓᓄᑦ ᐃᓄᖕᓂ ᐊᔭᐅᕆᖏᓐᓇᐅᔭᖅᐳᖅ ᓇᓂᓯᓇᓱᒃᖢᓂ ᐃᒻᒥᓂᙶᕐᓂᖏᓐᓂ ᐃᒃᐱᒋᑦᑎᐊᕐᓂᖏᓐᓂ. ᐃᓕᑦᑎᓚᐅᖅᐳᖅ ᑮᓇᐅᔭᓕᕆᓂᕐᒧᑦ ᐅᖃᓕᒫᕈᓐᓇᑦᑎᐊᕐᓂᕐᒥᒃ ᓴᐸᖓᓕᕆᓂᕐᒥᒍᑦ. ᖁᕕᐊᓲᑎᖃᕐᓂᖅ ᐱᒻᒪᕆᐊᓘᓯᒪᒋᕗᖅ ᑖᔅᓱᒧᖓ. ᐊᒡᒐᒥᓄᑦ ᐱᓕᕆᕙᒃᖢᓂ ᒪᓕᒃᐸᒃᖢᓂᓗ ᐃᓕᖅᑯᓯᑐᖃᕆᔭᐅᔪᓂᒃ ᐱᕚᓪᓕᖅᑎᑦᑎᓚᐅᖅᐳᖅ ᕼᐊᓐᓴᕆᒃᒧᑦ.
ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᓄᖅᑲᖅᖢᓂ ᐊᔪᕐᓇᖅᑐᖅᓯᐅᕈᑎᒋᓚᐅᖅᐸᖓ ᐃᓕᓐᓂᐊᒃᑲᓐᓂᕆᐊᒃᓴᖅ. ᕼᐊᓐᓴᕆᒃ ᐃᓕᓐᓂᐊᖅᑕᒥᓂᒃ ᖁᕝᕙᕆᐊᖅᑎᑦᑎᔭᕆᐊᖃᓚᐅᖅᐳᖅ. ᒫᓐᓇᓕ ᐃᓕᑕᕆᔭᐅᔾᔪᑎᑖᕋᓱᓕᕋᒥ ᐃᓕᓐᓂᐊᕐᓂᓕᕆᓂᕐᒧᑦ, ᐃᑲᔪᕈᒪᓂᖃᑦᑎᐊᖅᐳᖅ ᐃᓕᓐᓂᐊᕈᑎᒃᓴᓂᒃ ᐋᖅᑭᒃᓱᐃᒃᑲᓐᓂᕐᓂᕐᒥᒃ ᐃᓚᓕᐅᔾᔨᒃᑲᓐᓂᕐᓂᕐᒧᑦ ᓄᓇᖃᖅᑳᖅᓯᒪᔪᑦ ᑕᐅᑐᖅᑰᖅᑕᖏᓐᓂᒃ. "ᑕᑯᔪᒪᓇᔭᖅᐳᖓ ᐃᓄᖁᑎᕗᑦ ᐱᕚᓪᓕᖅᑎᓪᓗᒋᑦ ᐊᒻᒪ ᐊᓂᒍᐃᑦᑎᐊᕐᓗᑎᒃ ᐊᔪᓚᐅᖅᑎᓪᓗᖓ," ᐅᖃᖅᑐᖅ. ᑎᓕᐅᕆᕗᖅ ᒪᒃᑯᒃᑐᓂᒃ ᓴᓇᙳᐊᒐᒃᓴᖅᓯᐅᖁᓪᓗᒋᑦ ᐊᒡᒐᒥᓄᑦ ᐱᓕᕆᑦᑎᐊᕐᓂᖅᓴᐅᖁᓪᓗᒋᑦ ᐊᒃᓱᕈᕈᑎᖃᕈᑎᒃ ᐃᒃᓯᕚᑐᐃᓐᓇᕐᓂᕐᒥᒃ ᐃᓕᓐᓂᐊᕐᕕᐊᕈᓯᕐᒥ ᓈᓚᒍᓐᓇᑦᑎᐊᙱᒃᑯᑎᒃ.
ᓴᓇᙳᐊᖅᑎᓄᑦ ᑭᒡᒐᖅᑐᐃᔨᐅᓪᓗᓂ, ᑲᔪᖏᖅᓴᐃᔨᓄᑦ ᐊᐅᓚᑦᑎᔨᐅᓪᓗᓂ ᐊᒻᒪ ᓂᐅᕐᕈᑎᖃᕐᓂᕐᒧᑦ ᐱᒋᐊᖅᑎᑦᑎᔨᐅᓪᓗᓂ, ᓯᑕᐃᓯ ᕼᐋᓐᓴᕆᒃ ᓇᓂᓯᓯᒪᕗᖅ ᑲᔪᓯᓂᖃᑦᑎᐊᕐᓂᕐᒥᒃ ᐊᒻᒪ ᓈᒻᒪᒃᓯᓕᖅᓯᒪᓪᓗᓂ ᐊᓂᒍᐃᓚᐅᖅᑎᓪᓗᒍ ᐃᓕᓐᓂᐊᕐᕕᐊᓗᖕᒥ ᓄᖅᑲᓚᐅᖅᓯᒪᓂᕐᒥᓂᒃ. ᐃᓚᐅᕙᒃᖢᓂ ᐃᓕᖅᑯᓯᑐᖃᒃᑯᑦ ᐊᑐᖅᑕᐅᕙᒃᑐᓂᒃ ᐊᒡᒐᖏᓪᓗ ᐱᓕᕆᑎᑉᐸᒃᖢᓂᒋᑦ, ᓇᓂᓯᓚᐅᖅᐳᖅ ᓴᐃᓕᓂᕐᒥᒃ ᐱᔪᒪᓚᐅᖅᑕᒥᓂᒃ. ᓇᖕᒥᓂᖅ ᒪᒃᑯᖕᓂᕆᔭᖓ ᐊᒃᓱᕈᕐᓇᕋᓗᐊᖅᑎᓪᓗᒍ, ᒫᓐᓇ ᐃᑲᔪᖅᑐᐃᕙᒃᐳᖅ ᑎᓕᐅᕆᕙᒃᖢᓂᓗ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ ᐱᕙᒌᔭᖅᓯᒪᓪᓗᓂᓗ ᑲᔪᓰᓐᓇᕈᒪᓪᓗᓂ ᑕᒪᑐᒧᖓ ᐊᖅᑯᑎᒋᔭᐅᔪᒧᑦ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.
