"ᐊᓐᓇᐅᒪᕗᒍᑦ ᑭᖑᕚᕇᓄᑦ ᐊᒃᓱᕈᕐᓇᖅᑐᒃᑰᕈᑕᐅᕙᒃᑐᓄᑦ. ᑕᒫᓃᑉᐳᒍᑦ ᐱᓕᕆᓪᓗᑕᓗ, ᐃᓅᓯᖃᑦᑎᐊᕐᓂᖅᓴᐅᖁᓪᓗᑕ ᕿᑐᕐᖓᑦᑎᓐᓄᓪᓗ." ᐅᖃᖅᑐᖅ ᓯᑕᐃᓯ ᑐᕋᐃᒌᔅ ᓴᓐᑦᐴᒡ. ᔭᓗᓇᐃᕝ ᐊᓪᓚᓄᑦ ᐃᓚᒋᔭᐅᔪᖅ ᐱᕈᖅᓴᓂᑰᓪᓗᓂ ᑎᑦᑕᒥ ᐊᒻᒪ ᐃᓕᓐᓂᐊᕐᕕᐊᓗᖕᒥ ᐃᓱᓕᑦᑎᓪᓗᓂ ᔭᓗᓇᐃᒥ.

ᐱᔭᕇᖅᓯᓚᐅᖅᖢᓂ ᐊᕐᕌᒍᒥᒃ ᐊᑕᐅᓯᕐᒥᒃ ᓄᓇᖃᖅᑳᖅᑐᓂᒃ ᖃᐅᔨᓴᕐᓂᕐᒥᒃ ᓯᓚᑦᑐᖅᓴᕐᕕᒡᔪᐊᒥ ᐋᓪᐴᑕᒥ, ᓴᓐᑦᐴᒡ ᖃᐅᔨᓕᓚᐅᖅᐳᖅ ᐊᖏᕐᕋᐅᔭᕆᐊᖃᕐᓂᕐᒥᓂᒃ ᐃᓐᓇᕆᔭᒥᓄᑦ ᐃᓕᖅᑯᓯᑐᖃᒃᑯᓪᓗ ᖃᐅᔨᒪᓂᕆᔭᐅᔪᓂᒃ ᐱᓯᒪᔨᒋᔭᒥᓄᑦ ᐃᓕᑦᑎᕝᕕᒋᓂᐊᕐᓗᓂᒋᑦ. ᐅᔾᔨᕈᓱᓕᓚᐅᕆᕗᖅ ᐱᔭᕆᐊᖃᓪᓚᕆᖕᓂᖏᓐᓂᒃ ᓄᓇᖃᖅᑳᖅᑐᑦ ᓇᖕᒥᓂᖁᑎᖏᓐᓂᒃ ᐊᒻᒪᓗ ᐃᖅᑲᓇᐃᔭᓕᕋᒥ ᓄᓇᑦᑎᐊᒥ ᐅᖃᓕᒫᕈᓐᓇᕐᓂᕐᒧᑦ/ᑎᑎᕋᕈᓐᓇᕐᓂᕐᒧᑦ, ᓄᓇᓕᖕᓂ ᓇᖕᒥᓂᕆᔭᐅᔪᒥᒃ ᐱᓕᕆᐊᖃᓕᓚᐅᖅᐳᑦ.

ᓇᖕᒥᓂᕆᔭᐅᔪᖅ ᓂᕈᐊᓚᐅᖅᑕᖓᑦ ᐋᖅᑭᒃᓯᔪᒪᓪᓗᑎᒃ ᑳᐱᑐᕐᕕᖕᒥ ᐊᒻᒪ ᓂᕆᔭᒃᓴᓕᐅᕐᕕᖕᒥ ᑎᑦᑕᒥ ᐊᒻᒪ ᓴᓐᑦᐴᒡ ᐱᓕᕆᐊᒃᓴᒥᒃ ᐱᓕᕆᐊᖃᓕᓚᐅᖅᐳᖅ ᐃᓚᒋᔭᐅᓪᓗᓂ ᓄᓇᖃᖅᑳᖅᓯᒪᔪᓄᑦ−ᓇᖕᒥᓂᕆᔭᐅᔪᒧᑦ ᐊᒻᒪ ᐊᐅᓚᑕᐅᓪᓗᓂ ᓄᓇᓕᖕᓂ ᑲᑐᔾᔨᖃᑎᒌᓄᑦ ᐊᑎᖓ ᑐᑭᖃᖅᖢᓂ "ᒪᒪᖅᑐᑦ ᒪᒪᖅᑐᑦ". ᐃᖅᑲᓇᐃᔮᒥᓄᑦ, ᓴᓐᑦᐴᒡ ᐃᖅᑲᓇᐃᔭᖅᑎᑦᑎᕙᒃᐳᖅ ᓄᓇᓕᖕᒥᐅᓂᒃ ᓂᕿᓕᐅᖅᑎᐅᓂᐊᖅᑐᓂᒃ ᐊᔾᔨᒌᙱᑦᑐᓄᑦ ᓂᕿᓕᐅᖅᑎᓄᑦ, ᓯᐊᒻᒪᒃᑎᕆᕙᒃᖢᓂ ᑮᓇᐅᔭᓕᐅᕈᑕᐅᔪᓂᒃ ᓂᕿᓕᐅᕐᓂᕐᒧᑦ ᐱᓕᕆᐊᖑᔪᓄᑦ ᓄᓇᓕᖕᒥᐅᓄᑦ.

ᐃᖅᑲᐅᒪᓪᓗᓂ ᓯᓚᑦᑐᖅᓴᕐᕕᒡᔪᐊᕐᒥ ᐋᓪᐴᑕᒥ ᐃᓕᓐᓂᐊᖅᑎᓪᓗᒍ ᓄᓇᖃᖅᑳᖅᓯᒪᔪᓂᒃ ᖃᐅᔨᓴᕐᓂᕐᒥᒃ, ᓴᓐᑦᐴᒡ ᐃᖅᑲᐅᒪᓚᐅᖅᐳᖅ ᐃᓕᓐᓂᐊᕈᑎᒃᓴᑦ ᐱᔾᔪᑎᖃᓗᐊᓚᐅᕐᓂᖏᓐᓂᒃ ᖃᓪᓗᓈᓂ ᓄᓇᖃᖅᑳᖅᓯᒪᔪᓂᒃ, ᐱᓗᐊᖅᑐᒥ ᐊᓪᓚᓂᒃ, ᐊᒻᒪ ᐊᖏᖃᑎᒌᒍᑎᓂᒃ ᑭᑭᑦᑎᓪᓗᑎᒃ ᐅᕝᕙᓘᓐᓃᑦ ᐊᑐᖅᖢᑎᒃ ᐃᑲᔫᑎᒃᓴᓂᒃ ᑭᒡᒐᖅᑐᐃᑦᑎᐊᙱᑦᑐᓂᒃ ᓇᖕᒥᓂᖅ ᐃᓄᖁᑎᖏᓐᓂᒃ.

ᐃᓱᒪᒋᓪᓗᒍ ᐃᓱᒪᓕᐊᕆᓚᐅᖅᑕᖓ ᐊᖏᕐᕋᒧᑦ ᐅᑎᕈᒪᓪᓗᓂ ᐃᓕᑦᑎᒋᐊᖅᑐᖅᖢᓂ ᐃᓐᓇᕆᔭᒥᓂᒃ, ᓴᓐᑦᐴᒡ ᐅᖃᓚᐅᖅᐳᖅ, "ᐃᖅᑭᓕᖕᓂᒃ ᖃᓂᒋᔭᖃᖅᐸᓚᐅᖅᐳᖓ, ᓄᓇᑐᐃᓐᓇᒦᑐᐃᓐᓇᕐᓗᖓ, ᑏᑐᕆᐊᖅᑐᖅᖢᖓ ᐸᓚᐅᒑᖅᑐᕐᓗᖓᓗ." ᐊᖏᕐᕋᖅᖢᓂ ᓇᖕᒥᓂᖅ ᐱᕕᒃᓴᖃᖅᑎᑦᑎᓚᐅᖅᐳᖅ, ᓲᕐᓗ ᐃᓚᐅᔪᓐᓇᕐᓂᕐᒥᒃ ᓂᕿᓕᐅᖅᑎᐅᓂᕐᒥᒃ. "ᖃᐅᔨᒪᙱᖦᖢᖓ ᓇᒧᙵᐅᓂᐊᕐᒪᖔᕐᒪ, ᐃᓱᒪᑐᐃᓐᓇᓚᐅᖅᐳᖓ ᐆᒃᑐᕈᒪᓪᓗᒍ," ᐅᖃᓚᐅᖅᐳᖅ.

ᐊᐱᕆᔭᐅᒐᒥ ᖃᓄᖅ ᐅᖃᐅᔾᔪᖅᑕᐅᔪᓐᓇᕐᒪᖔᑦ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᖅᑐᓄᑦ ᓄᓇᓕᖏᓐᓂ ᕿᓂᖅᖢᑎᒃ ᐱᕕᒃᓴᓂᒃ, ᓴᓐᑦᐴᒡ ᐃᒡᓚᓚᐅᖅᐳᖅ ᐅᖃᖅᖢᓂᓗ, "ᐅᖄᓚᕕᒋᙵ ᐸᓂᖅᑐᒥ ᓂᕿᒥᒃ ᐃᖃᓗᖕᒥᓪᓘᓐᓃᑦ." ᕿᒪᐃᓯᒪᓪᓗᓂ ᓂᕿᑐᖃᖏᓐᓂᒃ ᐊᒃᓱᕈᕐᓇᓚᐅᖅᐳᖅ ᖃᓪᓗᓈᓃᑎᓪᓗᒍ ᓯᓚᑦᑐᖅᓴᕐᕕᒡᔪᐊᒧᑦ, ᐊᒻᒪᓗᑦᑕᐅᖅ ᐅᖓᓯᒃᓯᒪᓪᓗᓂ ᐃᓚᒥᓂᒃ, ᐱᖃᓐᓇᕆᔭᒥᓂᒃ ᐊᒻᒪ ᐃᖢᕐᕆᔮᕐᕕᒋᔭᒥᓂᒃ. ᐅᖃᓪᓚᕆᒃᐳᖅ ᐱᒻᒪᕆᐅᓂᖓᓂᒃ ᓴᙱᔪᒥᒃ ᐃᑲᔪᖅᑎᖃᕐᓂᖅ ᐊᖏᕐᕋᖅᓯᒪᙱᑎᓪᓗᒍ, ᑕᕐᕆᔭᐅᑎᒃᑯᑦ ᐅᖄᓚᓂᒃᑯᑦ ᐊᖏᕐᕋᒧᑦ ᐅᕝᕙᓘᓐᓃᑦ ᐃᓚᐅᓂᒃᑯᑦ ᐅᕝᕙᓘᓐᓃᑦ ᐊᑭᓕᖅᓱᖅᑕᐅᙱᓪᓗᓂ ᐃᑲᔪᕐᓂᒃᑯᑦ ᓄᓇᓕᖕᓂ ᓄᓇᖃᖅᑳᖅᓯᒪᔪᑦ ᖃᓄᐃᓕᐅᕈᑎᖏᓐᓂᒃ ᓄᓇᒋᓕᖅᑕᕐᓂ.

ᑐᓗᖅᑕᕈᑕᐅᕙᒃᑐᓄᓪᓕ, ᓴᓐᑦᐴᒡ ᖃᐅᔨᓚᐅᖅᐳᖅ ᐊᓂᒍᐃᔪᓐᓇᓚᐅᕐᓂᕐᒥᓂᒃ ᐊᒥᓱᓂᒃ ᐊᒃᓱᕈᕐᓇᖅᑐᓂᒃ ᐅᖃᐅᓯᕐᒥᒍᑦ ᐃᓕᖅᑯᓯᕐᒥᒍᓪᓗ ᖃᐅᔨᒪᓂᕐᒥᒍᓪᓗ ᑭᓇᐅᓂᕐᒥᓂᒃ. ᐊᔭᐅᖅᑐᐃᕙᒃᐳᖅ ᐊᒃᓱᕈᕐᓇᖅᑐᓂᒃ ᐱᓕᕆᐊᖃᓪᓚᕆᒍᒪᓪᓗᓂ, ᐃᑲᔪᖅᑕᐅᕙᒃᖢᓂ ᓴᙱᔪᒥᒃ ᐃᑲᔪᖅᑎᖃᖅᖢᓂ ᐊᐱᕆᕙᒃᖢᓂᓗ ᐃᓐᓇᕐᓂᒃ ᐊᖓᒃᑯᖏᓐᓂᒡᓗ ᐅᖃᐅᔾᔪᖅᑕᐅᔪᒪᓪᓗᓂ. ᑕᐃᒪᐃᑦᑐᒥᒃ ᐃᓅᓇᓱᒃᐸᒃᐳᖅ ᐱᕈᖅᓴᓪᓗᓂ ᑕᓯᐅᖅᓯᔪᒪᓪᓗᓂ ᑭᖑᕚᕆᓂᐊᖅᑕᒥᓂᒃ.

ᑭᖑᒧᑦ ᑕᑯᓪᓗᒍ, ᓴᓐᑦᐴᒡ ᐅᖃᐅᔾᔪᖅᑕᐅᔪᒪᓇᔭᓚᐅᖅᐳᖅ ᐅᖃᐅᓯᕐᒥᓄᑦ ᐃᓕᖅᑯᓯᕐᒧᓪᓗ (ᐃᓕᓐᓂᐊᖏᓐᓇᕐᓗᓂᓗ!) ᐅᖃᐅᔾᔭᐅᔪᒪᓇᔭᓚᐅᕆᕗᖅ ᐃᓚᐅᓂᖅᓴᐅᖁᔭᐅᓪᓗᓂ ᐃᓚᒌᑦ ᑲᑎᙵᓂᖏᓐᓂ ᐊᒻᒪ ᓄᓇᓕᖕᓂ ᖃᓄᐃᓕᐅᕐᓂᐅᔪᓂ.

ᐃᓱᒪᒥᒍᑦ ᖃᓄᐃᖏᑦᑎᐊᕈᒪᓪᓗᓂ, ᓴᓐᑦᐴᒡ ᓄᓇᒧᑦ ᐊᐅᓪᓚᖃᑦᑕᖅᐳᖅ. ᐃᑲᔪᖅᑎᖃᑦᑎᐊᕐᓂᖅ ᐱᒻᒪᕆᐅᓯᒪᕗᖅ ᑖᔅᓱᒧᖓ, ᐳᐃᔾᔪᕋᕆᐊᖅᐸᒃᖢᓂ ᐊᒻᒪ ᓴᐅᓇᒦᑲᑕᒃᐸᒃᖢᓂ. ᐅᖓᓯᒃᑐᒧᑦ ᐱᓱᑲᑕᖕᓂᖅ, ᑐᓴᕐᓈᕐᓂᖅ, ᐊᒻᒪ ᕿᓚᐅᔾᔭᕐᓂᖅ ᐃᑲᔫᑎᖃᑦᑎᐊᕐᒥᔪᑦ.

ᑲᔪᖏᖅᓴᐃᓕᕌᖓᒥ, ᓴᓐᑦᐴᒡ ᐱᔪᒃᓯᑎᑕᐅᕙᒃᐳᖅ ᐊᓈᓇᒥᓄᑦ, ᐊᓈᓇᑦᑎᐊᒥᓄᑦ, ᐊᖓᒃᑯᒥᓄᑦ, ᐊᒻᒪ ᐊᓈᓇᒋᔭᐅᔪᓄᑦ ᐱᖃᓐᓇᕆᔭᒥᓄᑦ ᐃᑲᔪᖅᐸᓚᐅᖅᑕᖏᓐᓂᒃ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ. ᐱᐅᒃᓴᑦᑎᐊᖅᐳᖅ ᑲᔪᓯᓯᒪᓂᖏᓐᓂᒃ ᐅᖃᐅᓯᕐᒥᓂᒃ, ᐃᓕᖅᑯᓯᕐᒥᓂᒃ ᐊᒻᒪ ᒪᓕᒐᖏᓐᓂᒃ.

ᓯᓚᑦᑐᖅᓴᕐᕕᒡᔪᐊᕐᒦᓚᐅᖅᖢᓂ, ᓯᑕᐃᓯ ᑐᕋᐃᒋᔅ ᓴᓐᑦᐴᒡ ᖃᐅᔨᓕᓚᐅᖅᐳᖅ ᐃᓕᓐᓂᐊᕆᐊᖃᕐᓂᕐᒥᓂᒃ ᓄᓇᓕᖓᑕ ᖃᐅᔨᒪᓂᕆᔭᖏᓐᓂᒃ ᐊᖏᕐᕋᖅᖢᓂᓗ. ᒫᓐᓇ ᓯᕗᓕᖅᑎᐅᓕᖅᖢᓂ ᓄᓇᖃᖅᑳᖅᑐᓄᑦ−ᓇᖕᒥᓂᕆᔭᐅᔪᒧᑦ ᐊᒻᒪ ᐊᐅᓚᑕᐅᔪᒧᑦ ᓄᓇᓕᖕᓂ ᓂᕆᔭᒃᓴᓕᐅᖅᑎᓄᑦ, ᐊᒥᖅᑳᖃᑎᖃᖅᐸᒃᐳᖅ ᐊᔪᖅᓴᙱᓐᓂᕐᒥᒃ ᐊᒻᒪ ᓂᕆᑎᑦᑎᕙᒃᖢᓂ ᐃᓄᖕᓂ ᖁᕕᐊᓱᒃᖢᓂ. ᐊᑎᖓᑎᑐᑦ ᑲᑎᙵᓂᖏᓐᓂ, ᖃᐅᔨᓚᐅᖅᐳᖅ ᐱᓕᕆᖃᑎᒌᖕᓂᖅ "ᒪᒪᑦᑎᐊᖅᐳᖅ."

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.