"ᖃᐅᑕᒫᑦ ᐃᓕᑦᑎᔪᐃᓐᓇᐅᕙᒃᐳᒍᑦ. ᒫᓐᓇᓘᓐᓃᑦ 60-ᖏᓐᓂ, ᓱᓕ ᒪᑐᐃᖓᑦᑎᐊᖅᑐᖓ ᐃᓕᑦᑎᓂᕐᒥᒃ ᓄᑖᓂᒃ ᐃᓕᖅᑯᓯᕐᓂᒃ, ᑭᓯᐊᓂᑦᑕᐅᖅ ᐊᑐᕐᓂᑯᓐᓂᙶᖅᑐᓂᒃ," ᐋᒡᓂᔅ ᐋᓐᑐᓴᓐ ᓴᖅᑭᔮᖅᑎᑦᑎᔪᖅ. ᐋᓐᑐᓴᓐ ᐃᓕᑦᑎᓯᒪᔪᖅ ᓛᐸᑐᐊᒥ ᐃᓄᐃᑦ ᐱᐅᓯᕆᕙᓚᐅᖅᑕᖏᓐᓂᒃ 8000 ᐊᕐᕌᒍᑦ ᐊᓂᒍᖅᑐᓂᒃ ᖃᓄᕐᓗ ᐃᓄᖁᑎᖏᑦ ᑐᐱᕐᒦᑉᐸᓚᐅᕐᒪᖔᑕ ᓇᑦᑎᕐᒥ ᐅᕝᕙᓘᓐᓃᑦ ᑐᒃᑐᓂ. ᓴᓂᐊᓃᑦᑐᖅ ᐃᓕᑉᐸᓪᓕᐊᑎᓪᓗᒍ ᓄᓕᐊᓂ ᓄᓕᐊᕆᔭᐅᔪᖅ 15-ᓄᑦ ᐊᕐᕌᒍᓄᑦ ᐃᑲᔪᖅᑐᐃᖏᓐᓇᐅᔭᖅᑐᖅ ᐱᓇᓱᐊᖅᑕᖏᓐᓂᒃ.

ᐅᓪᓗᒥ ᐋᓐᑐᓴᓐ ᓂᐅᕙᐅᓐᓛᓐᒥᐅᑕᐅᓪᓗᓂ ᑭᓯᐊᓂ ᓛᐸᑐᐊᒥᐅᑕᖅ. ᐃᓅᓪᓗᓂ ᐊᐅᓪᓚᖃᑦᑕᖅᓯᒪᓪᓗᓂᓗ ᑲᓇᑕᓕᒫᒥ ᐊᕐᕌᒍᒐᓴᖕᓄᑦ ᐊᔾᔨᒌᖏᑦᑐᓄᑦ ᑲᑐᔾᔨᖃᑎᒌᓄᑦ ᓯᓚᑦᑐᖅᓴᕐᕕᒡᔪᐊᓄᓪᓗ. ᐅᖃᕈᓐᓇᑦᓯᐊᖅᓱᓂ ᖃᓪᓗᓈᑎᑐᑦ ᐃᓄᑦᑎᑐᑦ, ᐃᓕᓐᓂᐊᑎᑦᓯᔨᐅᓯᒪᔪᖅ, ᒐᕙᒪᓕᕆᔨᐅᓪᓗᓂ, ᓴᓂᕐᓂᑦ ᓄᐊᑦᓯᔨᐅᑦᓱᓂ, ᐃᖃᓗᓕᕆᕕᒻᒥ ᐃᖅᑲᓇᐃᔭᖅᑎ, ᐃᖃᓗᒐᓱᑦᑎ, ᐱᕙᓪᓕᐊᔪᓕᕆᔨᓗ ᐱᕙᓪᓕᐊᔪᓂ, ᓈᓚᐅᑎᒃᑯᑦ ᑕᓚᕖᓴᒃᑯᓪᓗ. ᑐᑭᓕᐅᕆᔪᖅ ᑲᑐᔾᔨᖃᑎᒌᓂᑦ ᐃᓚᒋᔭᐅᑦᓱᑎᒃ ᓯᓚᑦᑐᓴᕐᕕᔾᔪᐊᑦ ᐋᓐᓂᐊᕖᓪᓗ ᓄᓇᓕᓐᓂᑦ ᑲᓇᑕᒥᓪᓗ, ᐃᖅᑲᓇᐃᔮᖃᖅᑐᖅ ᑲᔪᓯᑎᑦᓯᓂᕐᒥᑦ ᐃᓕᓐᓂᐊᑎᑦᓯᓂᕐᒥᓪᓗ ᓛᐸᑐᐊᒥ ᐃᓄᐃᑦ ᐅᖃᐅᓯᖓᓂᑦ.

ᐋᑐᓴᓐ ᖃᐅᔨᖃᑦᑕᖅᓯᒪᔭᖓ ᐊᕐᕌᒍᓂ ᐊᕙᑎᓂ ᐊᓂᒍᖅᑐᓂ ᐃᓄᐃᓴᓪᓕᕙᓪᓕᐊᒻᒪᑕ ᒪᒃᑯᑦᑐᐃᑦ ᐃᓕᓐᓂᐊᖅᑐᑦ ᐅᖃᐅᓯᕐᒥᒃ, ᑭᓯᐊᓂ ᐃᓄᐃᑦ ᒐᕙᒪᖏᑦ ᓛᐸᑐᐊᒥ ᓴᖅᑮᓯᒪᔪᑦ ᐱᓕᕆᕕᒻᒥᒃ ᐊᑐᐃᓐᓇᐅᑎᑦᓯᑲᓐᓂᖁᓪᓗᒋᑦ ᐅᖃᐅᓯᕐᒥᒃ ᐃᓕᓐᓂᐊᑎᑦᓯᓂᕐᒥᒃ. ᒫᓐᓇ ᐃᓄᐃᑦ 1930-ᖏᓐᓃᓕᖅᑐᑦ ᐃᓕᓴᐃᔨᕈᖅᐸᓪᓕᐊᑐᐃᓐᓇᖅᐳᑦ ᐊᒻᒪ ᐃᓕᓴᐃᔨᙳᖅᐸᓪᓕᐊᓪᓗᑎᒃ ᐃᑲᔪᖅᐸᒃᑭᓪᓗᑎᒃ ᐅᖃᕈᓐᓇᑦᑎᐊᕐᓂᕐᒥᒃ ᐅᖃᐅᓯᕐᒥᒃ.

1970-ᖏᓐᓂ, ᐋᓐᑐᓴᓐ ᐅᖃᐅᓯᕐᒥᓂᒃ ᐊᓯᐅᔨᑲᓴᓚᐅᕐᒪᑦ. 10-ᓂᒃ 11-ᓂᓪᓘᓐᓃᑦ ᐅᑭᐅᖃᖅᑎᓪᓗᒍ, ᐊᓈᓇᑦᑎᐊᖓᑕ ᐅᖃᐅᓯᕆᓚᐅᖅᑕᖓ ᐃᓄᒃᑎᑐᑦ ᐅᖃᕈᓐᓇᑐᐃᓐᓇᕐᓂᕋᖅᑐᓂ, ᖃᓄᓕᒫᑦᑎᐊᖅ ᐱᓕᕆᓚᐅᖅᐳᖅ ᐅᑎᖅᑎᑦᑎᓇᓱᐊᖅᑐᓂ ᐅᖃᐅᓯᕐᒥᓂᒃ. ᐃᓕᓚᐅᖅᑐᖅ ᐃᓐᓇᕐᓂᑦ, ᐃᑦᑐᒃᑯᓂᑦ/ᐊᑖᑕᑦᑎᐊᓂᑦ, ᐊᖑᓇᓱᒃᑎᓂᑦ, ᑭᓇᑐᐃᓐᓇᕐᒥᑦ ᐃᑲᔪᕈᓐᓇᖅᑐᒥᑦ.

ᐱᔭᕇᓚᐅᖅᑐᖅ ᒍᕋᐃᑦ 9-ᒥ ᐱᑦᔪᑎᒋᓪᓗᒍ ᑲᔪᓯᓂᐊᕐᓗᓂ ᐃᓕᓐᓂᐊᕕᒻᒦᒋᐊᖃᕋᔭᖅᑐᖅ, ᐊᓈᓇᑦᑎᐊᒃᑯᖏᑕ/ᐊᑖᑕᑦᑎᐊᒃᑯᖏᑕ ᑕᐃᒪᐃᖁᓚᐅᖏᑕᖓ. ᑕᑯᓚᐅᖅᑐᑦ ᖃᓄᖅ ᑕᐅᕗᙵᕆᐊᖅ ᐊᑦᑐᐃᓂᖃᕐᒪᖔᖅ ᕿᑐᕐᖓᒥᓂᒃ ᐊᒻᒪᓗ ᐱᓯᒪᔪᒪᓕᖅᓱᓂᒋᑦ. ᑭᖑᓂᐊᒍᑦ ᓴᐃᓐᑦ ᔮᓐᔅ, ᓂᐅᕙᐅᓐᓛᓐᒧᑦ ᓯᓚᑦᑐᓴᕐᕕᕐᔪᐊᕐᒨᓚᐅᖅᑐᖅ ᑭᓯᐊᓂ ᑮᓇᐅᔭᖏᑦ ᑲᔪᓯᓚᐅᙱᒻᒪᑕ. ᐃᓄᐃᑦ ᖃᐅᔨᒐᒥᒃ ᐅᖃᕈᓐᓇᑦᑎᐊᕐᓂᕐᒥᓂᒃ, ᐃᓕᓴᐃᔨᒻᒪᕇᑦ ᐊᐱᕆᓪᓗᑎᒃ ᐃᑲᔪᖁᓪᓗᒍ ᐊᔾᔨᒌᖏᑦᑐᓄᑦ ᐱᓕᕆᐊᒃᓴᓄᑦ. ᐋᓐᑐᓴᓐ ᐱᕈᓚᐅᖅᐳᖅ ᐱᓕᕆᖃᑎᖃᖃᑦᑕᖅᓯᒪᓪᓗᓂᓗ ᐊᒥᓱᓂᒃ ᐃᓕᓴᐃᔨᕐᔪᐊᓂᒃ ᐊᔾᔨᒌᙱᑦᑐᓂᒃ ᓯᓚᑦᑐᖅᓴᕐᕕᒡᔪᐊᓂ. ᐱᔭᕇᖅᓯᓚᐅᖅᑐᖅ ᐊᕐᕌᒍᒥᒃ ᐊᑕᐅᓯᕐᒥᒃ ᐃᓕᓐᓂᐊᖅᑕᒥᓂᒃ ᑭᓯᐊᓂ ᐃᓕᓐᓂᐊᖅᑕᖓ ᐃᓕᓐᓂᐊᖅᑎᐅᓪᓗᓂ ᐃᓅᓯᖓᓂ.

ᐅᖃᐅᔾᔪᐃᓂᖓ ᑭᓇᑐᐃᓐᓇᑦᑎᐊᒧᑦ ᐃᓱᒪᑐᐃᓐᓇᕆᐊᓕᖕᒧᑦ ᐊᐅᓪᓚᕈᒪᓗᓂ ᓄᓇᒥᓂᒃ ᐊᐅᓪᓚᕐᓗᓂ ᐅᕝᕙᓘᓐᓃᑦ ᐃᓕᓐᓂᐊᕆᐊᕐᓗᓂ ᑲᓇᑕᐅᑉ ᓯᓚᑖᓄᑦ ᓇᖕᒥᓂᖅ ᐊᑐᖅᓯᒪᔭᒥᓃᙶᖅᐳᖅ. ᑲᑉᐱᐊᓱᓕᓚᐅᖅᓯᒪᔫᒐᓗᐊᖅ ᓄᓇᓕᐸᐅᔭᕐᒨᕆᐊᔅᓴᖅ ᓄᓇᓕᕋᓛᒥᐅᑕᐅᒐᒥ. 20-ᖏᓐᓂ, ᐃᓚᒋᔭᐅᓕᓚᐅᖅᑐᖅ ᐅᑭᐅᖅᑕᖅᑐᒥ ᐃᖅᑲᖅᑐᐃᔨᕋᓛᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᑐᓂᓯᓪᓗᓂ ᐱᓕᕆᐊᕆᔭᒥᓂᒃ ᓄᓇᓕᖓᓂ, ᐃᖅᑲᖅᑐᐃᕕᓕᐊᖅᑐᓂ ᑐᓵᔨᐅᓪᓗᓂ ᐊᒻᒪᓗ ᐱᒋᐊᖅᑐᓂ ᐃᓅᓱᒃᑐᓂᒃ ᐅᐸᑦᑕᕐᕕᐅᔪᒥᒃ. ᒪᒃᑯᓛᖑᓚᐅᖅᑐᖅ ᑲᑎᒪᑎᓪᓗᒋᑦ ᐊᒻᒪᓗ ᖁᕕᐊᓱᙱᖦᖢᓂ ᐅᓂᒃᑳᕆᐊᒃᓴᖅ. ᐋᓐᑐᓴᓐ ᐃᓕᓐᓂᐊᓚᐅᖅᑐᖅ ᐅᒃᐱᕈᓱᓕᕐᓂᕐᒥᒃ ᐃᓄᖕᓂᒃ ᐃᖅᑲᓇᐃᔭᖅᑎᑖᓚᐅᖅᑐᓂᒃ ᓇᒧᙵᐅᓂᐊᕐᓂᕐᒥᒃ. "ᐅᒃᐱᕈᓱᒋᐊᖃᕐᓇᖅᐳᖅ ᐊᒻᒪ ᓴᐱᓕᖅᓴᕋᐃᙱᖦᖢᓂ ᐱᓕᕆᐊᒃᓴᖃᕐᔪᐊᕐᓇᖅᖢᓂ," ᓇᓗᓇᐃᖅᓯᓪᓗᓂ. ᐃᒪᐃᖁᔨᒐᔭᖅᑐᖅ ᐃᓅᓱᒃᑐᓂᒃ ᐊᐅᓪᓚᕈᒪᔪᓂᒃ ᖃᐅᔨᒪᒍᒪᔪᓂᒃ, "ᐃᓱᒪᖃᕐᓗᑎᒃ ᒪᑐᐃᖓᔪᒥᒃ ᐱᑦᔪᑎᒋᓪᓗᒍ ᐊᑐᓂᒃ ᓄᓇᓕᐸᐅᔭᐃᑦ ᐊᑦᔨᒌᖏᒻᒪᑕ. ᐃᓕᖅᑯᓯᖅ ᑕᒪᕐᒥᒃ ᐊᔾᔨᒌᙱᒻᒪᑕ. ᑭᓯᐊᓂ ᐊᑕᐅᑦᑎᒃᑯᑦ, ᐃᒃᐱᒋᑦᑎᐊᕐᓗᒍ ᑭᓇ ᑲᑎᖃᑦᑕᕐᒪᖔᖅᐱᑦ ᐃᓕᑦᑎᓗᑎᓪᓗ."

ᐃᖏᕐᕋᑎᓪᓗᒍ ᐊᕐᕌᒍᓄᑦ 40-ᓄᑦ, ᓄᓇᓕᓕᒫᓅᖅᓯᒪᔪᖅ ᑭᓯᐊᓂ ᒫᓂᑑᕙ, ᐊᓛᔅᑲᒨᖅᓯᒪᔪᖅ, ᑲᓇᓐᓇᖓᓄᑦ ᐅᓛᓴ, ᐊᑯᑭᑦᑐᑦ ᐊᒻᒪᓗ ᐃᓕᑦᑐᑎᒃ ᑭᒃᑯᑦ ᐃᓄᖁᑎᖏᑦ ᐃᓅᖃᑦᑕᕐᒪᖔᑕ. ᐊᐅᓪᓚᖅᓯᒪᔪᖅ ᐃᓂᓕᐅᖅᓯᒪᔪᓄᑦ ᐃᓕᑦᑎᓪᓗᓂᓗ ᐃᓐᓇᑐᖃᕐᓂ ᖃᓄᖅ ᓱᖏᐅᑎᓯᒪᖕᒪᖔᑕ, ᐊᓐᓇᐅᒪᔪᓐᓇᕐᓂᕐᒥᓂᒃ ᑲᔪᓯᑦᑎᐊᕐᓂᖏᓐᓂᒡᓗ.

ᐊᐳᖅᑕᕈᑏᑦ ᐋᓐᑐᓴᓐ ᐅᖃᐅᓯᖃᑎᒌᖃᑦᑕᖅᓯᒪᕗᑦ, ᐱᔾᔪᑎᒋᓗᐊᖅᑕᓂ ᐅᖃᐅᓯᑦᑕᖃᐃᓐᓇᖏᒻᒪᑦ ᐃᓄᑦᑎᑐᑦ ᐅᖃᐅᓯᕐᓂᒃ ᓄᑖᓂᒃ ᐅᖃᐅᓯᕐᓂᒃ ᐅᕝᕙᓘᓐᓃᑦ ᐃᓱᒪᒋᔭᐅᔪᓂᒃ, ᐊᒻᒪᓗ ᐅᖃᐅᓯᖅᑕᖅᑕᖃᖅᑐᓂ ᐃᓄᑦᑎᑑᓕᖅᑎᑕᐅᓯᒪᙱᑦᑐᓂᒃ. ᐊᖅᑯᑎᒃᑯᑦ ᐊᑎᕐᓂ ᐃᖅᑲᐅᒪᒡᒐᖃᑦᑕᖅᑐᖅ ᑭᓯᐊᓂ ᐃᓕᑦᑎᓯᒪᔪᖅ ᓱᖏᐅᑎᓂᕐᒥᑦ ᐃᖅᑲᐅᒪᓂᕐᒥᑦ ᓄᓇᒥᑦ ᓇᓗᓇᐃᒃᑯᑕᓂᑦ ᓇᐅᒃᑰᕆᐊᒃᓴᖅ, ᑕᐃᒪᐃᓚᐅᕐᒪᑦ ᒪᒃᑯᒃᑎᓪᓗᒍ ᓄᓇᒥᓗ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᓄᑦ, ᐃᒪᐃᒃᑲᔭᖅᑐᖅ, "ᑲᑉᐱᐊᓱᒃᑕᐃᓕᒋᑦ ᐊᔾᔨᒌᙱᑦᑐᓂᒃ ᐃᖅᑲᓇᐃᔮᖅᑖᕆᐊᒃᓴᖅ, ᓄᑖᓂᒃ ᐃᖅᑲᓇᐃᔮᒃᓴᓂᒃ, ᐊᐅᓪᓚᑲᑕᖕᓂᕐᒥᒃ, ᐃᓕᓐᓂᐊᕐᓂᕐᒥᒃ. ᐃᖅᑲᐅᒪᐃᓐᓇᐅᔭᕐᓗᑎᑦ ᐅᓪᓗᒥᓕᓴᖅ ᐃᓕᓐᓂᐊᕐᓂᖅ ᑖᓐᓇᑑᙱᒻᒪᑦ ᐃᓕᓐᓂᐊᕐᓂᖅ. ᐃᓕᑦᑎᔪᓐᓇᖅᑐᑎᑦ ᐃᓐᓇᑐᖃᕐᓂ... ᒪᑐᐃᖓᐃᓐᓇᐅᔭᕐᓗᑎᑦ ᐃᓱᒪᒥᒃ."

ᐃᒻᒥᓂᒃ ᒪᑭᑕᑦᑎᐊᖁᒧᑦ, ᐋᓐᑐᓴᓐ ᐱᓱᕋᔭᖃᑦᑕᖅᑐᖅ ᓇᐹᖅᑐᓄᑦ ᐅᕝᕙᓘᓐᓃᑦ ᑕᓯᕐᒧᑦ ᐃᒃᓯᕚᖅᖢᓂ, ᐃᑦᑐᕐᒥᓂᒃ ᑕᐃᒪᐃᓕᐅᖃᑦᑕᓚᐅᕐᒪᑦ. ᐃᒃᓯᕚᕆᐊᒃᓴᖅ ᐊᓕᐊᓇᐃᒋᔭᓕᒃ ᐃᑭᑎᓪᓗᒍ ᓯᓚᑎᑦᑎᐊᖓᓂ ᐅᓂᒃᑳᑲᑕᒃᖢᓂᓗ, ᓂᐱᓕᐅᖅᖢᓂᒋᑦ ᐊᒥᖅᑳᖃᑎᒋᓪᓗᓂᒋᓪᓗ ᓄᓇᕐᔪᐊᕐᒧᑦ. ᓄᓇᒧᑦ ᐊᒃᑐᐊᖃᑎᖃᕐᓂᖅ, ᐆᒪᔪᓂᒃ ᐊᒻᒪ ᓯᓚᒥ ᖁᕕᐊᓱᒍᑎᒋᕙᒃᐸᖏᑦ.

ᐅᖃᐅᓯᕆᔪᒪᓇᔭᖅᑕᖓ ᐱᔪᒃᓯᑎᑦᑎᔪᒪᓪᓗᓂ ᓄᓇᖃᖅᑳᖅᑐᑦ ᒪᒃᑯᒃᑐᖁᑎᖏᓐᓂᒃ ᐃᒪᓐᓇᐅᔪᖅ, "ᒫᓐᓇ, ᐅᖃᐅᓯᖃᕐᓗᓂ ᓱᓕᔪᒥᒃ ᐋᕿᒋᐊᕈᑎᖃᕐᓂᕐᒥᒡᓗ, ᐅᕙᒍᑦ ᑕᕝᕙᑑᙱᑦᑐᒍᑦ ᐋᖅᑭᒃᓯᔾᔪᑕᐅᔭᕆᐊᖃᙱᖦᖢᑕ ᑕᒻᒪᓚᐅᙱᓐᓂᑦᑎᓐᓄᑦ. ᒐᕙᒪᒃᑯᑦ, ᐸᓖᓯᒃᑯᑦ, ᑐᔅᓯᐊᕐᕕᒃ, ᖃᓄᐃᑦᑐᑐᐃᓐᓇᑦᑎᐊᑦ ᒐᕙᒪᒃᑯᑦ ᐅᕙᑦᑎᓐᓂᒃ ᐸᐸᑦᑎᓇᓱᓚᐅᖅᑐᑦ. ᓇᖏᕐᓗᑎᑦ ᓴᙱᓗᑎᑦ, ᐃᖅᑲᐅᒪᓗᑎᑦ ᑭᓇᐅᓂᑦᑎᓐᓂᒃ, ᐃᖅᑲᐅᒪᓗᒍ ᑭᓲᓚᐅᕐᒪᖔᑦᑕ ᑲᔪᓯᑎᓪᓗᒍᓗ."

ᖃᐅᑕᒫᑦ, 60-ᖏᓐᓂᓘᓐᓃᑦ, ᐋᒡᓂᔅ ᐋᓐᑐᓴᓐ ᐃᓕᑉᐸᓪᓕᐊᔪᖅ. ᓱᓕ ᒪᑐᐃᖓᓪᓗᓂ ᐃᓱᒪᒥᐅᑕᖅ ᐃᓕᑦᑎᔪᒪᓪᓗᓂ ᓄᑖᓂᒃ ᐃᓕᖅᑯᓯᐅᔪᓂᑦ, ᐃᓕᑦᑎᖕᒥᔪᖅᑕᐅᖅ ᐱᐅᓯᕆᔭᐅᕙᓚᐅᖅᑐᓂᑦ ᐃᓄᖁᑎᖏᓐᓂ. ᐊᓈᓇᑦᑎᐊᒧᑦ ᐅᖃᐅᔾᔭᐅᓪᓗᓂ ᐅᖃᓪᓚᖃᑦᑕᖁᔨᓪᓗᓂ ᐃᓄᒃᑎᑐᑦ ᐃᓕᓐᓂᐊᖅᖢᓂᓗ ᐅᖃᐅᓯᕐᒥᒃ ᐊᒃᑐᐊᓂᖃᐃᓐᓇᖁᓪᓗᒍ, ᑲᑎᙵᓕᓚᐅᖅᓯᒪᕗᖅ ᐊᒥᓱᒃᑲᓐᓂᕐᓂᒃ ᐃᓄᖕᓂᒃ ᐊᕐᕌᒍᒐᓴᐅᓕᖅᑐᓂᒃ, ᑲᓇᑕᒥ ᐊᕕᒃᑐᖅᓯᒪᔪᓂ ᐊᒻᒪ ᓄᓇᓕᒡᔪᐊᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.