ᐋᓇ ᓛᒻ ᐊᔪᙱᑦᑐᖅ ᐊᒥᓱᓂᑦ ᐊᔾᔨᒌᙱᑦᑑᑎᓂᑦ. ᓛᒻ, ᐃᖃᓗᖕᓂᑦ, ᓄᓇᕗᒻᒥᑦ, ᑭᓯᐊᓂᓕ ᒫᓐᓇ ᐋᑐᕚᒥᐅᑕᖅ, ᐃᓕᓐᓂᐊᕐᑎᐅᔪᖅ, ᐊᔭᐅᖅᑐᐃᔨᐅᓪᓗᓂ, ᑭᒡᒐᖅᑐᐃᔨᐅᓪᓗᓂᓗ ᓄᓇᖃᖅᑳᖅᓯᒪᔪᑦ ᐱᔪᓐᓇᖕᓂᖏᓐᓂᑦ — ᑭᓯᐊᓂᓕ ᐅᖃᖅᑐᕕᓂᖅ "ᐃᓕᓐᓂᐊᕐᑎ ᓯᕗᓪᓕᐅᓪᓗᓂ."

ᐃᓕᓐᓂᐊᖃᑦᑕᖅᑐᖅ ᓯᓚᑦᑐᓴᕐᕕᔾᔪᐊᖓᓂ ᐋᑐᕚᒥ ᓄᓇᕐᔪᐊᕐᒥ ᐱᕙᓪᓕᐊᓂᕐᒧᑦ ᐊᒻᒪᓗ ᓄᓇᕐᔪᐊᕐᒥ ᐃᓕᓐᓂᐊᖅᑎᐅᓪᓗᓂ, ᑐᕌᒐᖃᖅᑐᖅ ᐱᕙᓪᓕᐊᑎᑦᑎᓂᕐᒥᒃ ᓄᓇᓕᕐᔪᐊᓂᒃ ᐊᒻᒪᓗ ᓴᖅᑮᓪᓗᓂ ᓄᑖᓂᒃ ᖃᓄᖅᑑᕈᑎᓂᒃ ᓇᒻᒥᓂᖅ ᓈᒻᒪᖁᓪᓗᒋᑦ, ᑯᒃᑭᖐᔭᕐᓂᕐᒧᑦ, ᐊᒻᒪᓗ ᐱᕈᑉᐸᓪᓕᐊᓂᕐᒧᑦ ᒪᑭᒪᒍᓐᓇᓂᒃᑯᑦ.

"ᖁᕕᐊᒋᔭᖃᐃᓐᓇᐅᔭᖅᑐᖓ ᐃᑲᔪᕆᐊᒃᓴᖅ ᐃᓄᖕᓂᒃ, ᑖᓐᓇᓗ ᐱᓕᕆᐊᒃᓴᖅ ᐅᕙᓐᓄᑦ ᓴᖅᑭᔮᓚᐅᖅᑐᖅ ᐱᓕᕆᐊᕆᔪᒪᓇᔭᖅᑕᓐᓂᒃ ᑭᓱᒥᑭᐊᖅ ᐃᒃᐱᒋᓇᔭᖅᑕᓐᓂᒃ ᐱᓕᕆᐊᕆᔭᕆᐊᒃᓴᖅ," ᐅᖃᖅᑐᖅ ᓛᒻ.

ᓄᓇᕐᔪᐊᕐᒥ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᖑᒐᓗᐊᖅᑎᓪᓗᒍ, ᐃᒻᒥᓂᒃ ᑕᑯᕙᙱᓚᖅ ᓄᓇᕐᔪᐊᕐᒧᑦ ᑭᓯᐊᓂ ᐃᓕᑕᒥᓂᒃ ᐱᖔᖅᖢᓂ ᐱᓕᕆᐊᒥᙶᖅᑐᓂᒃ ᐅᑎᖅᑎᓪᓗᒍᓗ ᓄᓇᕗᒻᒧᑦ.

"ᑲᓇᑕᒧᑦ ᐃᓚᒋᔭᐅᒐᓗᐊᖅᑎᓪᓗᑕ, ᓯᕗᓪᓕᖅᐹᖑᓪᓗᓂ ᓄᓇᕐᔪᐊᖅ, ᑐᓄᒧᑦ ᐃᑭᑎᑕᐅᒐᔪᒃᑲᑦᑕ ᑕᑯᕙᒃᖢᑕᓗ ᐊᒥᓱᓂᑦ ᓄᓇᓕᖕᓂᑦ, ᐃᓄᐃᑦ ᓄᓇᖃᖅᐳᑦ ᐱᖓᔪᖓᓐᓂᑦ ᓄᓇᕐᔪᐊᒥᑦ," ᐅᖃᖅᑐᕕᓂᖅ ᓛᒻ.

ᐅᖃᖅᖢᓂ ᐃᑲᔪᕈᒪᓂᕋᖅᖢᓂ ᓴᖅᑭᑦᑎᓂᕐᒥᒃ ᐱᐅᓂᖅᓴᒥᒃ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥᒃ ᐃᓕᖅᑯᓯᒧᑦ ᐊᒃᑐᐊᓂᖃᕐᓗᓂ ᐊᒻᒪᓗ ᑲᔪᓰᓐᓇᕈᓐᓇᕐᓗᓂ.

ᓛᒻ ᐅᖃᖅᑐᖅ ᓯᑕᒪᓄᑦ ᐊᕐᕌᒍᓄᑦ ᐱᓕᕆᐊᖅ ᓇᓖᕌᕋᑦᓴᖃᕆᐊᖓ ᑯᐊᐸᓕᕆᓂᕐᒧᑦ ᐊᒻᒪᓗ ᐃᓕᓐᓂᐊᖅᑎᑕᖃᖅᓯᒪᔪᖅ ᐃᖅᑲᓇᐃᔮᖅᑖᖅᓯᒪᔪᓂᒃ ᓄᓇᕐᔪᐊᕐᒥ ᓄᓇᓕᕐᔪᐊᓂ ᐅᕝᕙᓘᓐᓃᑦ ᑲᓇᑕᐅᑉ ᒐᕙᒪᒃᑯᖏᓐᓂ, ᑭᓯᐊᓂ ᐃᓱᒪᓐᖏᑦᑐᖅ ᑕᐃᒪᐃᒋᐊᑐᙱᒋᐊᖓ.

"ᐃᖅᑲᓇᐃᔮᒃᓴᖃᕇᖅᑐᖓ ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᐃᓄᐃᑦ ᑲᑐᔾᔨᖃᑎᒌᓂᒃ ᐱᓕᕆᖃᑎᖃᖔᕈᒪᓇᔭᖅᑐᖓ ᐊᓯᓕᒫᒃᑲ," ᐅᖃᖅᑐᖅ ᓛᒻ.

ᐃᓕᓐᓂᐊᖅᑎᓪᓗᒍ ᐳᑐᒍᖏᑦ ᒥᓱᒃᑕᐅᑎᖦᖢᓂᒋᑦ, 'ᐅᐱᕐᖔᖅ' ᐊᒃᖤᐃᑦ, ᑲᓇᑕᒥ ᑕᕐᕆᔭᐅᓯᐊᖑᓚᐅᖅᑐᖅ ᓂᕈᐊᒐᒃᓴᙳᖅᑎᖦᖢᒍ ᐃᑲᔪᖅᓱᐃᑦᑎᐊᓛᖑᓂᕐᒧᑦ ᐱᙳᐊᖅᑎᓂᒃ.

ᓰᕖᓰᒃᑯᑦ ᓄᑖᓂᒃ ᑕᑯᖅᑯᔾᔨᓛᕐᒥᔪᖅ, 2020−ᒥ ᐅᑭᐊᒃᓵᒃᑯᑦ ᑕᕐᕆᔭᖅᑕᐅᓛᖅᖢᓂ.

ᖃᓄᑐᐃᓐᓇᖅ ᐅᖃᐅᔾᔨᔪᓐᓇᕈᓂ ᐃᓕᓐᓂᐊᖅᑎᓂᒃ ᓄᓇᒥᓂᒃ ᐊᐅᓪᓚᖅᑐᓂᒃ ᐃᓕᓐᓂᐊᕆᐊᕐᓗᑎᒃ ᐅᕝᕙᓘᓐᓃᑦ ᐃᖅᑲᓇᐃᔮᖅᑖᕐᓗᑎᒃ, ᓇᓗᓇᔭᖅᐳᑎᑦ ᐊᔪᙱᓐᓂᕆᔭᕐᓂᒃ, ᓇᓗᓗᑎᑦ ᐃᓕᓐᓂᐊᓚᐅᖅᑕᕐᓂᒃ, ᐊᒻᒪ ᐃᓄᖕᓂᒃ ᐅᖃᐅᔾᔨᕙᙱᓪᓗᑎᑦ ᐊᓂᒍᐃᔾᔮᙱᓐᓂᕐᓂᒃ ᓯᓚᑦᑐᖅᓴᕐᕕᒡᔪᐊᕐᒥ.

"ᐃᓄᐃᑦ ᐅᕙᓐᓄᑦ ᐅᖃᖃᑦᑕᖅᓯᒪᔪᑦ ᓄᓇᕗᒻᒥ ᐃᓕᓐᓂᐊᕐᓂᓕᕆᓂᐅᑉ ᐊᐅᓚᓂᖓ, ᐸᕐᓇᐸᓪᓕᐊᖏᑦᑐᖅ ᐃᓕᓐᓂᑦ ᐃᓕᓐᓂᐊᕐᓂᕐᒧᑦ. ᓯᓚᑦᑐᖅᓴᕐᕕᒡᔪᐊᓕᐊᓕᓚᐅᖅᑐᖓ ᖃᐅᔨᓚᐅᖅᑐᖓᓗ ᐱᓕᕆᑦᑎᐊᕐᓂᓐᓂᒃ," ᐅᖃᖅᑐᖅ ᓛᒻ.

"[ᖃᓄᐃᓕᐅᓚᐅᖅᑐᖓ ᑖᒃᑯᓇᓂ ᐃᓕᓐᓂᐊᕐᓂᕐᓂ ᐱᓕᕆᐊᕆᖃᑦᑕᓚᐅᖅᑕᓐᓂ ᖁᑦᑎᖕᓂᓕᖕᓂ 12−ᒥ ᐊᕐᕌᒍᓄᑦ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ. ᑕᐃᒪᓕ ᒫᓐᓇᐅᔪᖅ ᐅᖃᐅᔾᔭᐅᖃᑦᑕᖅᓯᒪᔪᖓ ᐃᓕᓐᓂᐊᕐᓂᓐᓂᒃ, ᒪᓕᒃᑕᐅᔭᕆᐊᖃᖅᑐᓂᒃ, ᐱᔪᓐᓇᖅᑕᓐᓂᒃ ᑕᒻᒪᕐᓯᒪᑐᐃᓐᓇᖅᑐᓂᒃ."

ᐱᑕᖃᕋᓗᐊᖅᑎᓪᓗᒍ "ᐊᔾᔨᒌᖏᓐᓂᖃᕋᓗᐊᖅᑎᓪᓗᒍ" ᐃᓕᓐᓂᐊᖅᑐᓕᕆᓂᕐᒥᑦ ᐅᑭᐅᖅᑕᖅᑐᒥ, ᓛᒻ ᓱᓕ ᑎᓕᐅᕆᕗᖅ ᐃᓄᓐᓂᑦ ᐃᒻᒥᓂᒃ ᓇᓗᖅᑯᑎᖁᓇᒋᑦ ᐊᒻᒪᓗ ᐊᒥᓱᓂᑦ ᐱᕕᔅᓴᖅᑕᖃᖅᑐᓂ.

"ᓂᐱᓕᒫᑦ ᐊᔾᔨᐅᙱᑦᑑᕗᑦ ᐱᒻᒪᕆᐅᓪᓗᓂᓗ, ᐃᓱᒪᑦᑕᐃᓕᓗᑎᓪᓗ ᐃᓅᓯᕐᓂᑦ ᐊᑐᖅᓯᒪᔭᐃᑦ ᐊᑑᑎᖃᙱᓐᓂᖅᓴᐅᓇᓱᒋᙱᖦᖢᒍ ᓂᐱᑎᓪᓗ ᐱᒻᒪᕆᐅᙱᓐᓂᖅᓴᐅᓪᓗᑎᒃ," ᐅᖃᖅᑐᖅ ᓛᒻ.

ᓛᒻ ᑲᔪᓯᑦᑎᐊᖅᓯᒪᒐᓗᐊᖅᑎᓪᓗᒍ ᐃᓕᓐᓂᐊᖅᑎᐅᓪᓗᓂ ᐊᒻᒪ ᐱᙳᐊᖅᑎᐅᓪᓗᓂ, ᑐᓗᖅᑕᕈᑕᐅᓂᖅᐹᖑᖃᑕᐅᕗᖅ ᐃᓱᒪᖓ ᖃᓄᐃᙱᑦᑎᐊᖅᖢᓂ.

ᐃᓕᓐᓂᐊᕐᕕᐊᓗᒻᒥ, ᐅᖃᖅᑐᓂ ᐱᒡᒐᓇᖅᑐᒻᒪᕆᐅᓂᕋᖅᑐᓂᐅᒃ ᓇᒻᒥᓂᖅ ᐸᖅᑭᓇᓱᐊᖅᑐᓂ ᐊᒻᒪ ᐃᓕᓐᓂᐊᕐᓂᕐᒥᓂᒃ ᑲᒪᑦᑎᐊᖅᑐᓂ, ᑕᐃᓪᓗᓂᐅᒃ ᑖᖅᑐᒻᒪᕆᒻᒥᑦ ᐊᒻᒪ ᐱᒡᒐᓇᖅᑐᒻᒪᕆᒻᒥᑦ.

ᓛᒻ ᐅᖃᖅᐳᖅ ᖁᔭᓕᓂᕋᖅᖢᓂ ᒫᓐᓇ ᐃᓅᓯᖓᓂ, ᐅᖃᖅᖢᓂ ᓴᙱᓂᖅᓴᐅᓕᓚᐅᕐᓂᖓᓂᒃ ᐊᒻᒪ ᓴᐱᓕᖅᓴᕋᐃᙱᖦᖢᓂ ᑭᓯᐊᓂ ᐱᒻᒪᕆᐅᒋᕗᖅ ᐃᓄᖕᓄᑦ ᐃᒻᒥᓂᒃ ᑲᒪᒋᑦᑎᐊᕆᐊᖃᕐᓂᖏᓐᓂᒃ ᐊᒻᒪ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖏᓐᓂᒃ.

"ᓴᙱᔪᒥᒃ ᐃᓱᒪᒃᑯᑦ ᐃᒃᐱᖕᓂᐊᓂᒃᑯᓪᓗ ᑐᙵᕕᖃᙱᒃᑯᕕᑦ ᐃᓕᖕᓄᑦ, ᐃᓕᖕᓂᒃ ᑲᒪᒋᑦᑎᐊᕐᓗᑎᑦ, ᐊᔪᕐᓇᖅᑐᒻᒪᕆᐊᓘᖕᒪᑦ ᐃᓕᓐᓂᐊᑦᑎᐊᕆᐊᒃᓴᖅ ᐊᒻᒪ ᑲᔪᓯᓇᓱᒋᐊᒃᓴᖅ ᐃᓕᓐᓂᐊᑦᑎᐊᕆᐊᒃᓴᖅ. ᑕᒪᓐᓇ ᐊᒃᓱᕉᑎᒋᓪᓚᕆᓚᐅᖅᑕᕋ. ᑕᒪᓐᓇ ᐊᕐᕌᒍᒐᓴᓐᓄᑦ ᐊᓂᒍᖅᑎᒐᓱᐊᖅᓯᒪᓕᖅᑕᕗᑦ."

ᐊᒻᒪᓗ ᑭᓱᒥ ᑲᔪᖏᕐᓴᐃᓂᖃᕐᒪᖔᖅ ᐃᖅᑲᓇᐃᔮᖓᓂᒃ, ᑲᔪᖏᕐᓴᐃᓂᑐᐃᓐᓇᐅᖏᒻᒪᑦ ᑭᓯᐊᓂ ᐱᓕᕆᐊᕆᔭᕆᐊᓕᖓ.

"ᐃᓕᑦᑎᕙᓪᓕᐊᔪᖓ ᖃᓄᑐᐃᓐᓇᖅ ᐊᔪᙱᓐᓂᓕᒫᓐᓂᒃ ᐃᓕᖅᑯᓯᓐᓂ ᐅᖃᐅᓯᓐᓂᓗ ᓇᑭᙶᕐᒪᖔᕐᒪᓗ, ᖃᐅᔨᒪᓂᖅ ᓴᙱᓂᕐᓗ ᑐᓂᔭᐅᔪᓐᓇᕐᓂᐊᕐᒪᑕ ᕿᑐᕐᖓᓐᓄᑦ. ᑕᐃᒪᓐᓇ ᐱᔪᒃᓯᑎᑦᑎᔾᔪᑎᒋᖃᑦᑕᖅᑕᕋ ᐱᐅᓂᖅᓴᒥᒃ ᐱᓕᕆᔪᒪᓪᓗᖓ ᐊᒻᒪ ᐃᓕᑦᑎᓇᓱᐃᓐᓇᖅᐸᒡᓗᖓ ᐱᕙᓪᓕᐊᑦᑎᐊᖏᓐᓇᕋᓱᒃᐸᒡᓗᖓᓗ ᑭᓱᓕᒫᓂᒃ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.